ܒܲܟܼܬܵܐ ܘܣܵܛܵܢܵܐ

ܚܕܐ ܗܘܩܝܬܐ ܕܐܒܼܗܬ̈ܐ

   ܐܝܼܬ ܗ݇ܘܵܐ؛ ܠܲܝܬ ܗ݇ܘܵܐ؛ ܐܝܼܬ ܗ݇ܘܵܐ ܚܲܕ݇ ܓܲܒܼܪܵܐ ܘܒܲܟܼܬܵܐ ܕܒܸܚܵܝܵܐ ܗ݇ܘܵܘ ܒܚܕܵܐ ܡܵܬܵܐ. ܒܲܟܼܬܵܐ ܪܵܒܵܐ ܚܵܝܬܵܐ ܘܙܪܝܼܙܬܵܐ(ܙܸܪܵܢܓ) ܗ݇ܘܵܐ ܘܠܲܝܬ ܗ݇ܘܵܐ ܠܵܗܿ ܪܵܙܝܼܘܼܬܵܐ ܡܼܢ ܚܲܝܘܼܬܘܼܗܿ. ܓܲܒܼܪܵܐ ܐܝܼܢܵܐ ܫ̰ܵܪܸܐ ܗ݇ܘܵܐ ܘܡܸܣܟܸܢܵܐ ܘܟܠ ܥܕܵܢܵܐ ܒܲܟܼܬܸܗ ܟܸܐ ܗܵܘܝܵܐ ܗ݇ܘܵܐ ܣܲܪܣܘܼܪܸܐ ܒܪܸܫܸܗ ܘܡܲܢܟܼܘܼܣܸܗ ܘܠܲܝܬ ܗ݇ܘܵܐ ܫܠܵܡܵܐ ܘܚܲܕܘܼܬܵܐ ܒܚܲܝܘܼܬܲܝܗܝ. ܗܵܕܟܼܵܐ ܓܲܒܼܪܵܐ ܪܵܒܵܐ ܣܩܝܼܕܵܐ ܗ݇ܘܵܐ ܡܼܢ ܚܲܝܘܼܬܸܗ.                                                                                 

   ܚܲܕ݇ ܝܵܘܡܵܐ ܓܲܒܼܪܵܐ ܟܲܕ ܒܸܚܕܵܪܵܐ ܗ݇ܘܵܐ ܓܵܘ ܕܸܫܬܵܐ؛ ܥܲܝܢܸܗ ܩܝܼܬܠܵܗܿ ܥܲܠ ܚܲܕ݇ ܩܘܼܢܝܵܐ. ܬܘܼܚܡܸܢܸܗ ܠܟܸܣ ܓܵܢܸܗ: (ܚܵܙܸܢ ܡܘܼܕܝܼ ܐܝܼܬ ܓܵܘ ܐܵܗܵܐ ܩܘܼܢܝܵܐ!).ܗܵܝܓܵܗ ܩܘܼܪܒܸܢܸܗ ܠܩܘܼܢܝܵܐ ܘܓܘܼܫܸܩܠܸܗ ܓܵܘܸܗ ܘܚܙܸܐ ܠܸܗ ܕܥܲܡܘܼܩܵܐ ܝܠܸܗ. ܡܸܢ݇ܕܪܸܫ݇ ܬܘܼܚܡܸܢܸܗ: ـ  ܒܸܕ ܬܲܢܝܸܢ ܩܵܐ ܒܲܟܼܬܵܐ ܕܩܘܼܢܝܵܐ ܡܸܠܝܵܐ ܝܠܸܗ ܡܼܢ ܕܲܗܒܼܸ̈ܐ ܘܒܸܕ ܐܵܬܝܵܐ ܘܒܸܕ ܪܲܦܸܢܵܗܿ ܓܵܘܸܗ ܘܒܸܕ ܦܵܪܩܸܢ ܡܐܝܼܕܘܼܗܿ.                                       

   ܟܲܕ ܡܛܸܐ ܠܸܗ ܠܒܲܝܬܵܐ ܐ݇ܡܸܪܸܗ: (ܒܲܟܼܬܵܐ؛ ܗܲܒܼܠܝܼ ܫܸܚܕܵܐ! ܡܘܼܫܟ̰ܚܵܐ ܝܘܸܢ ܚܲܕ݇ ܩܘܼܢܝܵܐ ܡܸܠܝܵܐ ܡܼܢ ܕܲܗܒܼܸ̈ܐ. ܫܩܘܿܠ ܚܲܕ݇ ܚܲܒܼܠܵܐ ܘܟܡܵܐ ܓ̰ܘܵܠܸ̈ܐ ܕܐܵܙܲܠ݇ܚ ܦܵܠܛܲܚ ܠܗ݇ܘܿܢ ܕܵܗܒܼܸ̈ܐ). ܒܲܟܼܬܵܐ ܗܲܕܘܼܪܸܐ ܝܠܵܗܿ ܚܲܒܼܠܵܐ ܘܓ̰ܘܵܠܸ̈ܐ ܘܐ݇ܡܵܪܵܐ ܝܠܵܗܿ ܩܵܐ ܓܲܒܼܪܘܼܗܿ: (ܐܘܼܦ ܐܵܢܵܐ ܒܸܕ ܐܵܬܝܵܢ ܥܲܡܘܼܟܼ). ܓܲܒܼܪܵܐ ܐ݇ܡܵܪܵܐ ܝܠܸܗ: (ܠܵܐ. ܐܵܢܵܐ ܒܓܵܢܝܼ ܒܸܕ ܐܵܙܸܠ݇ܢ). ܐܝܼܢܵܐ ܒܲܟܼܬܵܐ ܒܸܟܠܵܝܵܐ ܝܠܵܗܿ ܥܲܠ ܚܲܒܪܘܼܗܿ ܘܐ݇ܡܵܪܵܐ ܝܠܵܗܿ:(ܕܵܐܟܼܝܼ ܒܢܲܦ̰ܫܘܼܟܼ ܒܸܕ ܐܵܙܸܠ݇ܬ؟ ܐܲܢ݇ܬ ܒܸܕ ܫܵܒܼܩܸܬ ܠܗ݇ܘܿܢ ܕܲܗܒܼܸ̈ܐ ܬܵܡܵܐ. ܐܲܢ݇ܬ ܠܲܝܬ ܠܘܼܟܼ ܡܨܵܝܬܵܐ ܘܚܲܕ݇ ܦܵܦܵܪܵܐ ܝܘܸܬ. ܓܲܒܼܪܵܐ ܠܸܐ ܝܠܸܗ ܐ݇ܡܵܪܵܐ ܟ̰ܘܼ ܚܲܕ݇ ܚܲܒܪܵܐ.                                               

   ܒܸܪܚܵܫܵܐ ܝܢܵܐ ܡܐܘܼܕܵܠܸܐ ܘܟܲܕ ܡܛܵܝܵܐ ܝܢܵܐ ܬܵܡܵܐ؛ ܓܲܒܼܪܵܐ ݇ܡܵܪܵܐ ܝܠܸܗ:( ܗܲܒܼܠܸܗ ܚܲܒܼܠܵܐ ܕܐܵܣܪܸܢܸܗ ܒܚܵܨܝܼ). ܐܝܼܢܵܐ ܒܲܟܼܬܵܐ ܓ̰ܲܘܘܼܒܸܐ  ܝܠܵܗܿ:( ܙܸܠ݇ ܠܗܿܘ ܓܸܒܵܐ. ܐܲܢ݇ܬ ܡܲܨܠܝܼ ܩܵܬـܝܼ ܐܸܠܬܸܚܬ݇ ܐܵܢܵܐ ܒܸܕ ܡܵܠܝܵܢܗ݇ܘܿܢ ܓ̰ܘܵܠܸ̈ܐ). ܗܵܕܟܼܵܐ ܡܲܩܪܘܼܨܸ̈ܐ ܝܢܵܐ ܡܐܘܼܕܵܠܸ̈ܐ ܘܒܚܲܪܬܵܐ ܓܲܒܼܪܵܐ ܒܸܫܬܵܩܵܐ ܝܠܸܗ. ܒܲܟܼܬܵܐ ܒܸܨܠܵܝܵܐ ܝܠܵܗܿ ܓܵܘ ܩܘܼܢܝܵܐ ܘܓܲܒܼܪܵܐ ܦܪܵܡܘܼܗـܝ ܝܠܸܗ ܚܲܒܼܠܵܐ ܘܚܲܕ݇ ܟܸܐܦܵܐ ܓܘܼܪܵܐ ܙܸܐ ܡܲܬܘܼܒܼܸܐ ܝܠܸܗ ܥܲܠ ܦܘܼܡܵܐ ܕܩܘܼܢܝܵܐ ܩܵܐ ܢܝܼܫܵܢܩܵܐ. ܘܡܲܩܘܘܼܚܸܐ ܝܠܸܗ:(ܦܘܼܫ ܬܵܡܵܐ. ܕܘܼܟܬܵܟܼܝ ܗܲܪ ܬܵܡܵܐ ܝܠܵܗܿ). ܗܵܝܓܵܗ ܒܸܫܒܼܵܩܵܐ ܘܒܸܪܚܵܫܵܐ ܝܠܸܗ.                                                                   

   ܒܵܬ݇ܪ ܟܡܵܐ ܝܲܖ̈ܚܸܐ ܐܘܼܪܚܸܗ ܒܸܢܦܵܠܵܐ ܝܠܵܗܿ ܡܼܢ ܬܵܡܵܐ ܘܒܸܚܙܵܝܵܐ ܝܠܸܗ ܕܩܘܼܢܝܵܐ ܒܫܵܘܦܸܗ ܝܠܸܗ ܘܟܸܐܦܵܐ ܕܥܲܠ ܦܘܼܡܸܗ ܙܸܐ ܠܸܐ ܝܠܸܗ ܓ̰ܘܝܼܓ̰ܵܐ. ܐܝܼܢܵܐ ܟܲܕ ܒܵܥܸܐ ܚܵܙܸܐ ܕܡܘܼܕ݇ ܐ݇ܬܝܼܵܐ ܝܠܸܗ ܒܪܸܫܵܐ ܕܒܲܟܼܬܸܗ. ܗܵܠܵܐ ܠܵܐ ܡܲܓ̰ܘܘܼܓ̰ܸܐ ܟܸܐܦܵܐ؛ ܒܸܢܕܵܝܵܐ ܝܠܸܗ ܚܲܕ݇ ܡܸܢܕܝܼ ܡܼܢ ܓܵܘ ܩܘܼܢܝܵܐ ܘܒܸܢܦܵܠܵܐ ܝܠܸܗ ܩܲܕ݇ܡ ܐܲܩܠܘܼ̈ܗـܝ. ܓܲܫܘܼܩܸܐ ܘܒܸܚܙܵܝܵܐ ܝܠܸܗ ܕܚܲܕ݇ ܐ݇ܢܵܫܵܐ ܟܸܪܝܵܐ ܘܨܵܘܵܢܵܐ ܝܠܸܗ. ܒܲܩܘܼܪܸܐ ܝܠܸܗ:(ܐܲܢ݇ܬ ܡܵܢܝܼ ܝܘܸܬ؟). ܗܵܘ ܓ̰ܲܘܘܼܒܸܐ ܝܠܸܗ:(ܐܵܢܵܐ ܣܵܛܵܢܵܐ ܝܘܸܢ. ܡܼܢ ܗܿـܝ ܥܕܵܢܬܵܐ ܕܐܵܗܵܐ ܒܲܟܼܬܵܐ ܐ݇ܬܝܼܬܵܐ ܝܠܵܗܿ ܠܲܐܟܼܵܐ ܒܵܒܝܼ ܡܘܼܟܼܸܠܬܘܼܗـܝ ܝܠܵܗܿ ܒܝܼܝܼ. ܟܠ ܡܸܢܕܝܼ ܒܵܥܸܬ ܛܠܘܼܒ ܡܸܢܝܼ ܣܲܒܲܒ ܕܐܲܢ݇ܬ ܦܘܼܪܩܝܼ ܝܘܸܬ ܡܼܢ ܐܝܼܕܘܼܗܿ. ܒܥܵܒܼܪܸܢ ܓܵܘ ܓܸܠܕܵܐ ܕܒܪܵܬ ܡܲܠܟܵܐ ܘܒܸܕ ܫܲܕܸܢܸܢܵܗܿ. ܟܠ ܗܲܟܝܼܡ ܕܐܵܬܸܐ ܠܸܐ ܡܵܨܸܐ ܕܒܵܣܸܡ ܠܵܗܿ ܫܒܼܘܿܩ ܡܸܢܘܼܟܼ. ܐܝܼܡܲܢ ܕܐ݇ܬܸܐ ܠܘܼܟܼ ܬܵܡܵܐ ܬܲܢܸܝܬ: ـ ܐܵܢܵܐ ܝܘܸܢ. ܗܿـܝ ܥܕܵܢܵܐ ܒܸܕ ܦܵܠܛܸܢ ܡܼܢ ܓܸܠܕܘܼܗܿ ܘܗܿܝ ܒܸܕ ܒܵܣܡܵܐ ܘܐܲܢ݇ܬ ܒܸܕ ܓܵܒܼܪܸܬ ܠܵܗܿ ܘܒܸܕ ܗܵܘܸܬ ܚܸܬܢܵܐ ܕܡܲܠܟܵܐ  ܘܥܲܬܝܼܪܵܐ.                                                                             

   ܒܸܕܝܵܪܵܐ ܝܠܸܗ ܓܲܒܼܪܵܐ ܠܒܲܝܬܸܗ ܘܥܒܼܵܪܵܐ ܝܢܵܐ ܟܡܵܐ ܝܲܖ̈ܚܸܐ. ܗܵܝܓܵܗ ܦܪܵܣܵܐ ܝܠܸܗ ܚܲܒܪܵܐ ܕܒܪܵܬܵܐ ܕܡܲܠܟܵܐ ܫܘܼܕܸܢܬܵܐ ܝܠܵܗܿ ܘܟܠ ܚܲܕ݇ ܐ݇ܢܵܫܵܐ ܕܡܵܨܸܐ ܒܲܣܸܡ ܠܵܗܿ ܒܸܕ ܗܵܘܸܐ ܚܸܬܢܵܐ ܕܡܲܠܟܵܐ. ܪܵܒܵܐ ܗܲܟܝܼܡܸ̈ܐ ܒܸܪܚܵܫܵܐ ܝܢܵܐ ܩܵܐ ܒܲܣܲܡܬܘܼܗܿ ܐܝܼܢܵܐ ܠܸܐ ܝܢܵܐ ܡܲܢܬܘܼܝܸܐ ܒܫܘܼܓܼ݇ܠܲܝܗـܝ.ܚܲܫܵܐ ܒܸܕܝܵܫܵܐ ܝܠܵܗܿ ܠܡܲܠܟܵܐ.                                                   

   ܓܲܒܼܪܵܐ ܐ݇ܡܵܪܵܐ ܝܠܸܗ ܠܟܸܣ ܓܵܢܸܗ:ـ ܡܘܼܕ݇ ܥܵܒܼܕܸܢ؟ ܡܘܼܕ݇ ܠܵܐ ܥܵܒܼܕܸܢ؟ ܚܲܪܬܵܐ ܒܸܩܝܵܡܵܐ ܝܠܸܗ ܘܒܸܪܚܵܫܵܐ ܝܠܸܗ ܠܩܲܨܪܵܐ ܕܡܲܠܟܵܐ   ܘܐ݇ܡܵܪܵܐ ܝܠܸܗ ܩܵܐ ܢܵܛܘܿܖܸ̈ܐ ܕܗܲܟܝܼܡ ܝܠܸܗ ܘܫܡܝܼܥܵܐ ܝܠܸܗ ܒܘܼܬ ܡܲܪܥܵܐ ܕܒܪܵܬܵܐ ܕܡܲܠܟܵܐ. ܘܡܲܙܝܘܼܕܸܐ ܝܠܸܗ ܕܟܸܐ ܡܵܨܸܐ ܒܵܣܸܡ ܠܵܗܿ   ܒܪܵܬܵܐ. ܐܵܢܝܼ ܓ̰ܲܘܘܼܒܸܐ ܝܢܵܐ: ـ (ܡܼܢ ܩܲܕ݇ܡ ܕܝܼܝܘܼܟܼ ܙܸܐ ܪܵܒܵܐ ܓܵܢܵܬܸ̈ܐ ܐ݇ܬܝܼܸ̈ܐ ܝܢܵܐ ܠܲܐܟܼܵܐ ܐܝܼܢܵܐ ܠܸܐ ܝܢܵܐ ܡܸܨܝܸ̈ܐ ܕܒܲܣܡܝܼ ܠܵܗܿ ܒܪܵܬ ܡܲܠܟܵܐ. ܓܲܒܼܪܵܐ ܒܸܛܠܵܒܵܐ ܝܠܸܗ ܡܼܢ ܢܵܛܘܿܖܸ̈ܐ ܕܐܵܙܠ݇ܝܼ ܘܡܲܚܒܸܪܝܼ ܠܸܗ ܡܲܠܟܵܐ).   ܡܲܠܟܵܐ ܙܸܐ ܟܲܕ ܦܝܼܫܵܐ ܝܠܸܗ ܕܠܵܐ ܟ̰ܵܪܵܐ ܒܸܛܠܵܒܘܼܗـܝ ܝܠܸܗ ܓܲܒܼܪܵܐ ܠܟܸܣܠܸܗ ܘܒܲܩܘܼܪܸܐ ܝܠܸܗ ܡܸܢܸܗ:                                  

ـ ܡܵܢܝܼ ܝܘܸܬ ܐܲܢ݇ܬ؟                                    

ـ ܡܲܠܟܵܐ ܕܗܵܘܸܬ ܒܲܣܝܼܡܵܐ؛ ܐܵܢܵܐ ܗܲܟܝܼܡ ܝܘܸܢ ܘܒܸܕ ܒܲܣܡܸܢܵܗܿ ܒܪܵܬܘܼܟܼ.                                        

ـ ܪܵܒܵܐ ܨܦܵܝܝܼ. ܐܝܼܢܵܐ ܐܝܼܬ ܠܝܼ ܚܕܵܐ ܫܲܪܛܵܐ. ܐܸܢ ܠܵܐ ܡܵܨܸܬ ܕܒܵܣܡܸܬ ܠܵܗܿ ܒܪܵܬܝܼ؛ ܪܸܫܘܼܟܼ ܒܸܕ ܦܵܪܡܸܢܸܗ.              

   ܩܲܒܘܼܠܸܐ ܝܠܸܗ ܓܲܒܼܪܵܐ ܘܒܸܪܚܵܫܵܐ ܝܠܸܗ ܓܵܘ ܬܵܘܵܢܵܐ ܠܟܸܣ ܒܪܵܬ ܡܲܠܟܵܐ. ܒܸܚܙܵܝܵܐ ܝܠܸܗ ܕܦܸܨܠܘܼܗܿ ܚܕܝܼܪܵܐ ܝܠܸܗ ܐܲܝܟܼ ܫܸܐܕܵܢܸ̈ܐ. ܒܸܛܠܵܒܵܐ ܝܠܸܗ ܡܼܢ ܟܠܲܝܗـܝ ܕܫܵܒܼܩܝܼ ܠܸܗ ܒܢܲܦ̰ܫܸܗ ܥܲܡ ܒܪܵܬ ܡܲܠܟܵܐ.                               

  ܗܵܝܓܵܗ ܒܸܬܝܵܒܼܵܐ ܝܠܸܗ ܓܲܒܼܪܵܐ ܠܟܸܣ ܒܪܵܬܵܐ ܘܐ݇ܡܵܪܵܐ ܝܠܸܗ:ـ (ܩܘܼܡ ܦܠܘܿܛ. ܐܵܢܵܐ ܝܘܸܢ. ܗܵܘ ܕܦܘܼܪܸܩܠܸܗ ܩܵܬܘܼܟܼ ܡܼܢ ܐܝܼܕܵܐ ܕܒܲܟܼܬܵܐ). ܗܲܪ ܒܗܿـܝ ܥܕܵܢܵܐ ܦܠܵܛܵܐ ܝܠܸܗ ܣܵܛܵܢܵܐ ܡܼܢ ܓܵܘ ܓܸܠܕܵܐ ܕܒܪܵܬܵܐ. ܒܪܵܬܵܐ ܒܸܢܦܵܠܵܐ ܘܒܸܫܢܵܝܵܐ ܝܠܵܗܿ. ܣܵܛܵܢܵܐ ܐ݇ܡܵܪܵܐ ܝܠܸܗ: (ـ ܐܵܢܵܐ ܦܘܼܪܸܥܠܝܼ ܕܲܝܢܝܼ ܩܵܬܘܼܟܼ. ܐܵܕܝܼܵܐ ܒܸܕ ܐܵܙܸܠ݇ܢ ܠܚܕܵܐ ܕܘܼܟܬܵܐ ܪܸܚܩܵܐ. ܟܡܵܐ ܕܡܵܨܸܢ ܒܸܫ ܪܸܚܩܵܐ ܡܼܢ ܒܲܟܼܬܘܼܟܼ.) ܗܵܝܓܵܗ ܒܸܪܚܵܫܵܐ ܝܠܸܗ ܩܵܐ ܓܵܢܸܗ.                                                           

   ܓܲܒܼܪܵܐ ܐ݇ܡܵܪܵܐ ܝܠܸܗ ܩܵܐ ܢܵܛܘܿܖܸ̈ܐ:ـ ܬܲܢܝܼܡܘܿܢ ܩܵܐ ܡܲܠܟܵܐ ܐܵܬܸܐ ܘܫܵܩܸܠܵܗܿ ܒܪܵܬܸܗ. ܟܲܕ ܡܲܠܟܵܐ ܒܸܐܬܵܝܵܐ ܘܒܸܚܙܵܝܵܐ ܝܠܸܗ ܠܒܪܵܬܸܗ ܕܛܠܝܼܬܵܐ ܝܠܵܗܿ؛ ܒܸܚܕܵܝܵܐ ܝܠܸܗ ܪܵܒܵܐ ܘܐ݇ܡܵܪܵܐ ܝܠܸܗ ܩܵܐ ܓܲܒܼܪܵܐ:ـ (ܐܲܢ݇ܬ ܚܫܝܼܚܵܐ ܝܘܸܬ ܩܵܐ ܡܲܠܟܘܼܬܵܐ). ܓܲܒܼܪܵܐ ܓ̰ܲܘܘܼܒܵܐ ܝܠܸܗ:ـ (ܐܵܢܵܐ ܠܸܐ ܒܵܥܝܸܢ ܟ̰ܘܼ ܡܸܢܕܝܼ ܡܸܢܘܼܟܼ. ܐܲܚܟ̰ܝܼ ܡܘܼܟܡܸܠܘܼܗܿ ܝܘܸܢ ܘܵܠܝܼܬـܝܼ. ܗܲܒܼܠܝܼ ܦܣܵܣܵܐ ܕܐܵܙܸܠ݇ܢ). ܐܝܼܢܵܐ ܠܸܐ ܝܠܸܗ ܩܲܒܘܼܠܸܐ ܡܲܠܟܵܐ ܘܡܸܢ݇ܕܪܸܫ݇ ܐ݇ܡܵܪܵܐ ܝܠܸܗ ܕܗܿܘ ܓܲܪܲܓ ܓܵܒܼܸܪ ܩܵܐ ܒܪܵܬܸܗ. ܟܡܵܐ ܕܓܲܒܼܪܵܐ ܐ݇ܡܵܪܵܐ ܝܠܸܗ ܕܠܸܐ ܝܠܸܗ ܚܫܝܼܚܵܐ ܩܵܐ ܡܲܠܟܘܼܬܵܐ؛ ܠܸܐ ܝܠܸܗ ܩܲܒܘܼܠܸܐ ܡܲܠܟܵܐ ܘܒܸܟܠܵܝܵܐ ܝܠܸܗ ܥܲܠ ܚܲܒܪܸܗ. ܗܲܪ ܒܐܵܗܵܐ ܥܕܵܢܵܐ ܒܸܪܥܵܫܵܐ ܝܠܵܗܿ ܒܪܵܬ ܡܲܠܟܵܐ ܟܲܕ ܠܸܐ ܝܠܵܗܿ ܒܸܕܟܼܵܪܵܐ ܒܘܼܬ ܡܲܪܥܘܼܗܿ. ܗܵܝܓܵܗ ܫܲܒܼܥܵܐ ܝܵܘܡܵܢܸ̈ܐ ܘܫܲܒܼܥܵܐ ܠܲܝܠܵܘܵܬܸܐ ܚܠܘܼܠܵܐ ܥܒܼܵܕܵܐ ܝܢܵܐ ܓܵܘ ܟܠܸܗ ܐܲܬܪܵܐ.                                                                                      

   ܥܒܼܵܪܵܐ ܝܢܵܐ ܟܡܵܐ ܫܸܢܸ̈ܐ ܘܒܐܵܗ ܡܸܬܚܵܐ ܓܲܒܼܪܵܐ ܥܲܡ ܒܪܵܬ ܡܲܠܟܵܐ ܒܸܚܵܝܵܐ ܝܢܵܐ ܚܸܕܝܸ̈ܐ ܘܦܨܝܼܚܸ̈ܐ.ܦܪܵܣܵܐ ܝܠܸܗ ܚܲܒܪܵܐ ܒܟܠ ܕܘܼܟܵܐ ܕܐܝܼܬ ܚܲܕ݇ ܗܲܟܝܼܡ ܕܒܘܼܣܡܵܐ ܝܠܸܗ ܠܒܪܵܬ ܡܲܠܟܵܐ ܘܗ݇ܘܝܼܵܐ ܝܠܸܗ ܚܸܬܢܸܗ. ܟܲܕ ܒܸܫܡܵܥܵܐ ܝܠܸܗ ܡܲܠܟܵܐ ܕܟ̰ܝܼܢ ܒܸܟܬܵܒܼܵܐ ܝܠܸܗ ܚܕܵܐ ܐܸܓܵܪܬܵܐ ܩܵܐ ܡܲܠܟܵܐ ܘܒܸܛܠܵܒܵܐ ܝܠܸܗ ܕܫܲܕܸܪܸܗ ܗܿܘ ܗܲܟܝܼܡ ܩܵܐ ܒܲܣܲܡܬܵܐ ܕܒܪܵܬܸܗ ܡܪܝܼܥܬܵܐ. ܒܸܚܕܵܝܵܐ ܝܠܸܗ ܡܲܠܟܵܐ ܡܼܢ ܐܵܗܵܐ ܚܲܒܪܵܐ ܣܲܒܲܒ ܕܟܠ ܥܕܵܢܵܐ ܟܸܐ ܒܵܥܸܐ ܗ݇ܘܵܐ ܕܗܵܘܸܐ ܗ݇ܘܵܐ ܒܸܫܠܵܡܵܐ ܥܲܡ ܡܲܠܟܵܐ ܕܟ̰ܝܼܢ. ܫܲܕܘܼܪܸܐ  ܝܠܸܗ ܒܵܬ݇ܪ ܚܸܬܢܸܗ. ܓܲܒܼܪܵܐ ܒܸܐܬܵܝܵܐ ܘܒܸܢܫܵܩܘܼܗܿ ܝܠܸܗ ܐܝܼܕܵܐ ܕܡܲܠܟܵܐ ܘܐ݇ܡܵܪܵܐ ܝܠܸܗ:ـ (ܡܲܠܟܵܐ ܕܗܵܘܸܬ ܒܲܣܝܼܡܵܐ. ܡܘܼܕܝܼ ܝܠܸܗ ܦܘܼܩܕܵܢܘܼܟܼ؟).ܡܲܠܟܵܐ ܐ݇ܡܵܪܵܐ ܝܠܸܗ: (ܚܙܝܼ ܕܡܘܼܕ ܫܸܡܵܐ ܦܘܼܠܛܵܐ ܝܘܸܬ. ܒܪܵܬ ܡܲܠܟܵܐ ܕܟ̰ܝܼܢ ܙܸܐ ܗܲܪ ܐܲܝܟܼ ܒܪܵܬܝܼ ܡܪܝܼܥܬܵܐ ܝܠܵܗܿ. ܠܵܙܸܡ ܝܠܵܗܿ ܕܐܵܙܸܠ݇ܬ ܘܒܲܣܡܸܬ ܠܵܗܿ.) ܓܲܒܼܪܵܐ ܒܸܩܪܵܛܘܼܗܿ ܝܠܸܗ ܨܸܒܥܘܼܗـܝ ܘܐ݇ܡܵܪܵܐ ܝܠܸܗ:ـ (ܐܲܚܢܲܢ ܐܲܝܟܵܐ ܘܡܲܠܟܵܐ ܕܟ̰ܝܼܢ ܐܲܝܟܵܐ؟).ܘܡܲܠܟܵܐ ܓ̰ܲܘܘܼܒܵܐ ܝܠܸܗ:ـ (ܒܐܵܗܵܐ ܫܘܼܓܼ݇ܠܵܐ ܒܸܕ ܩܵܢܸܢ ܠܪܲܚܡܘܼܬܵܐ ܕܡܲܠܟܵܐ ܕܟ̰ܝܼܢ ܘܒܸܕ ܚܲܠܸܢܲܚ ܘܟ̰ܘܼ ܚܲܕ݇ ܐܲܬܪܵܐ ܠܸܐ ܝܵܐܸܪ ܕܦܵܫܸܛ ܠܵܗܿ ܐܝܼܕܸܗ ܥܲܠ ܐܲܬܪܝܼ. ܘܵܠܸܐ ܝܠܵܗܿ ܕܐܵܙܸܠ݇ܬ). ܓܲܒܼܪܵܐ ܐ݇ܡܵܪܵܐ ܝܠܸܗ ܠܟܸܣ ܓܵܢܸܗ:ـ ܣܵܛܵܢܵܐ! ܣܵܛܵܢܵܐ! ܐ݇ܡܸܪܝܼ ܫܘܼܓܼ݇ܠܘܼܟܼ ܛܵܒܼܵܐ ܠܸܐ ܝܠܸܗ ܘܫܲܪܵܐ ܝܘܸܬ). ܡܲܠܟܵܐ ܫܲܕܘܼܪܸܐ ܝܠܸܗ ܠܓܲܒܼܪܵܐ ܒܝܲܕ ܚܕܵܐ ܣܦܝܼܢܬܵܐ(ܓܵܡܝܼ) ܥܲܡ ܚܲܕ݇ ܡܸܢܝܵܢܵܐ ܓܘܼܪܵܐ ܕܖܸ̈ܓܵܘܵܬܸܐ. ܒܵܬ݇ܪ ܟܡܵܐ ܝܲܖ̈ܚܸܐ ܥܲܠ ܦܲܐܬܵܐ ܕܝܲܡܵܐ؛ ܡܛܵܝܵܐ ܝܢܵܐ ܠܟ̰ܝܼܢ ܘܒܸܪܚܵܫܵܐ ܝܠܸܗ ܓܲܒܼܪܵܐ ܠܩܲܨܪܵܐ ܕܡܲܠܟܵܐ. ܒܸܥܒܼܵܪܵܐ ܝܠܸܗ ܠܘܼܩܕܲܡ(ܥܲܠ ܗܸܙܘܼܪ) ܡܲܠܟܵܐ. ܡܲܠܟܵܐ ܒܸܩܪܵܝܘܼܗـܝ ܝܠܸܗ ܠܟܸܣ ܓܵܢܸܗ ܘܡܲܕܘܼܥܘܼܗـܝ ܝܠܸܗ ܒܘܼܬ ܡܲܪܥܵܐ ܕܒܪܵܬܸܗ. ܗܵܝܓܵܗ ܠܲܒܘܼܠܘܼܗـܝ ܝܢܵܐ ܠܟܸܣܠܘܼܗܿ. ܟܲܕ ܒܸܚܙܵܝܸܗ ܝܠܵܗܿ ܒܪܵܬܵܐ؛ ܥܲܝܢܘܼܗܿ ܒܠܵܩܵܐ ܝܢܵܐ ܘܒܵܥܵܝܵܐ ܕܢܵܫܪܵܐ   ܥܲܠܸܗ ܒܗܿـܝ ܕܣܵܛܵܢܵܐ ܒܕܵܥܵܐ ܝܠܸܗ ܩܵܬܸܗ.                                                             

ܓܲܒܼܪܵܐ ܐ݇ܡܵܪܵܐ ܝܠܸܗ:( ـ ܩܵܡܘܼ ܒܸܢܫܵܪܵܐ ܝܘܸܬ ܥܲܠܝܼ؟ ܐܵܢܵܐ ܐ݇ܬܝܼܵܐ  ܝܘܸܢ  ܡܼܢ ܚܕܵܐ ܐܘܼܪܚܵܐ ܪܸܚܩܵܐ. ܒܵܥܝܸܢ ܥܵܒܼܕܸܢ ܚܕܵܐ ܛܵܒܼܬܵܐ ܩܵܬܘܼܟܼ ܘܦܵܪܥܸܢܵܗܿ ܨܦܵܝܘܼܬܘܼܟܼ). ܣܵܛܵܢܵܐ ܓ̰ܲܘܘܼܒܵܐ ܝܠܸܗ:ـ (ܡܘܼܕܝܼ ܝܠܵܗܿ ܛܵܒܼܬܘܼܟܼ)؟ ܓܲܒܼܪܵܐ ܐ݇ܡܵܪܵܐ ܝܠܸܗ: (ـ ܒܸܕܟܼܵܪܵܐ ܝܘܸܬ ܕܦܘܼܠܸܛܠܝܼ ܩܵܬܘܼܟܼ ܡܼܢ ܓܵܘ ܩܘܼܢܝܵܐ ܘܒܸܕܟܼܵܪܘܼܗܿ ܝܘܸܬ ܗܵـܝ ܒܲܟܼܬܵܐ؟) ܣܵܛܵܢܵܐ ܐ݇ܡܵܪܵܐ ܝܠܸܗ: (ـ ܗܸܐ.) ܡܸܢ݇ܕܪܸܫ݇ ܓܲܒܼܪܵܐ ܐ݇ܡܵܪܵܐ ܝܠܸܗ:(ـ ܗܵـܝ ܦܠܝܼܛܬܵܐ ܝܠܵܗܿ ܡܼܢ ܓܵܘ ܩܘܼܢܝܵܐ ܘܛܲܥܘܼܝܸܐ ܝܠܵܗܿ ܒܵܬ݇ܪܘܼܟܼ.) ܣܵܛܵܢܵܐ ܙܸܐ ܓ̰ܲܘܘܼܒܸܐ ܝܠܸܗ:(ـ ܗܵܘܸܬ ܒܲܣܝܼܡܵܐ. ܐ݇ܚܸܪ݇ܢܵܐ ܠܸܐ ܝܘܸܢ ܕܲܝܢܵܢܵܐ ܩܵܬܘܼܟܼ. ܒܸܕ ܐܵܙܸܠ݇ܢ ܓܵܘ ܛܘܼܖ̈ܵܢܸܐ ܩܲܕ ܠܵܐ ܡܲܫ݇ܟ̰ܚܵܠܝܼ ܗܵـܝ ܒܲܟܼܬܵܐ). ܘܦܠܵܛܵܐ ܝܠܸܗ ܡܼܢ ܓܵܘ ܓܸܠܕܵܐ ܕܒܪܵܬܵܐ ܘܒܸܪܚܵܫܵܐ ܝܠܸܗ ܒܡܲܠܝܲܙܬܵܐ.                                                        

   ܡܲܚܒܘܼܪܸܐ ܝܢܵܐ ܩܵܐ ܡܲܠܟܵܐ ܕܒܪܵܬܸܗ ܒܣܝܼܡܬܵܐ ܝܠܵܗܿ ܡܼܢ ܡܲܪܥܵܐ. ܗܵܝܓܵܗ ܗ݇ܘܵܝܵܐ ܝܠܵܗܿ ܚܕܵܐ ܚܲܕܘܼܬܵܐ ܓܘܼܪܬܵܐ ܘܓܲܒܼܪܵܐ ܒܸܫܩܵܠܵܐ ܝܠܸܗ ܦܣܵܣܵܐ ܕܕܵܝܸܪ ܠܐܲܬܪܸܗ. ܡܲܠܟܵܐ ܕܟ̰ܝܼܢ ܐ݇ܡܵܪܵܐ ܝܠܸܗ:(ܩܵܐ ܡܲܠܟܘܼܟܼ ܬܲܢܝܼ ܕܐܲܚܘܿܢܘܵܬܸ̈ܐ ܝܘܲܚ ܘܟܠ ܥܕܵܢܵܐ ܕܗܵܘܸܐ ܣܢܝܼܩܵܐ ܒܸܕ ܗܲܝܸܪܸܢܸܗ). ܘܒܝܵܗܒܼܵܐ ܝܠܸܗ ܩܵܬܸܗ ܚܕܵܐ ܕܲܫܢܵܐ ܓܘܼܪܬܵܐ ܘܗܵܘ ܒܸܕܝܵܪܵܐ ܝܠܸܗ ܠܐܲܬܪܸܗ ܘܠܒܲܝܬܸܗ ܘܟܠܲܝܗـܝ ܒܸܚܵܝܵܐ ܝܢܵܐ ܒܫܠܵܡܵܐ ܡܐܘܼܕܵܠܸܐ.                                                                     

                          ܗܘܩܝܬܐ ܒܝܕ ܘܝܘܠܝܬ ܣܪܓܝܣܝ

                      ܡܘܪܝܙܬܐ ܒܝܕ ܫܡܝܪܡ ܕܘܝܕ ܦܘܪܝܐܢ