ܛܟܼܣ̈ܐ ܕܐܒܼܗ̈ܬܐ

  ܫܡܝܪܡ ܕܘܝܕ ܦܘܪܝܐܢ 

ܓ̰ܐܢ ܓܘܠܘܡ: ܐܵܗܵܐ ܛܲܟܼܣܵܐ ܓܵܘ ܡܵܬܘܵܬܸ̈ܐ ܕܐܘܼܪܡܝܼ ܦܝܼܫܵܐ ܗ݇ܘܵܐ ܚܸܙܝܵܐ ܗܲܠ 50 ܫܸܢܸ̈ܐ ܡܼܢ ܩܲܕ݇ܡ ܐܵܕܝܼܵܐ. ܚܲܕ݇ ܠܲܝܠܸܐ ܡܼܢ ܩܲܕ݇ܡ ܟܵܠܘܼ ܣܘܼܠܵܩܵܐ؛ ܐܝܼܡܲܢ ܕܐܝܼܠܵܢܸ̈ܐ ܕܣܸܢܓܝܼܸ̈ܐ ܟܸܐ ܗܵܘܝܼ ܗ݇ܘܵܘ ܦܩܝܼܚܸ̈ܐ؛ ܬܪܸܝܢ ܦܲܥܘܸ̈ܐ ܙܥܘܿܖܸ̈ܐ ܡܸܢܲܝܗـܝ ܟܸܐ ܢܵܟ̰ܠܝܼ ܗ݇ܘܵܘ ܠܗ݇ܘܿܢ ܘܟܠ ܚܲܕ݇ ܟܸܐ ܡܲܬܒܼܝܼ ܗ݇ܘܵܘ ܠܸܗ ܥܸܠܸܠ ܡܼܢ ܚܲܕ݇ ܓܸܒܵܐ ܕܬܲܪܥܵܐ ܕܒܲܝܬܵܐ. ܒܗܿܘ ܠܲܝܠܸܐ ܕܲܣܬܵܐ ܕܒܲܟܼܬܵܬܸ̈ܐ ܟܸܐ ܫܵܩܠܝܼ ܗ݇ܘܵܘ ܚܕܵܐ ܟ̰ܲܪܸܟܬܵܐ(ܬܲܠܸܡܬܵܐ) ܕܟܼܝܼܬܵܐ ܘܟܸܐ ܗܲܕܪܝܼ ܗ݇ܘܵܘ ܠܗ݇ܘܿܢ ܡܠܘܼ̈ܐܸܐ ܕܠܬܸܚܬ݇:    

   ܐ:ܥܲܦܪܵܐ ܕܫܲܒܼܥܵܐ ܥܘܼܡܖ̈ܵܢܸܐ ܝܲܢ ܫܲܒܼܥܵܐ ܒܸܝܬ ܩܒܼܘܼܖܸ̈ܐ             

         ܒ:ܟܸܐܦܸ̈ܐ ܡܼܢ ܫܲܒܼܥܵܐ ܐܘܼܖ̈ܚܵܬܸܐ                            

ܓ:ܛܲܖ̈ܦܸܐ ܡܼܢ ܫܲܒܼܥܵܐ ܐܝܼܠܵܢܸ̈ܐ                             

ܕ: ܘܲܖ̈ܕܸܐ ܡܼܢ ܫܲܒܼܥܵܐ ܓܢܵܢܸ̈ܐ(ܒܲܓܼܟ̰ܵܢܸ̈ܐ)                       

ܗ: ܡܝܼܵܐ ܡܼܢ ܫܲܒܼܥܵܐ ܥܲܝܢܵܬܸ̈ܐ                             

ܘ: ܬܲܪܥܵܐ ܕܫܲܒܼܥܵܐ ܒܲܝܬܘܵܬܸ̈ܐ ܙܸܐ ܟܸܐ ܬܲܩܬܸܩܝܼ ܗ݇ܘܵܘ ܠܸܗ.        

ܗܵܝܓܵܗ ܟܠ ܚܲܕ݇ ܡܼܢ ܡܸܫܬܲܪܟܵܢܸ̈ܐ ܒܐܵܗܵܐ ܚܘܼܪܙܵܐ ܟܸܐ ܕܵܪܸܐ ܗ݇ܘܵܐ ܚܲܕ݇

ܡܸܢܕܝܼ ܐܲܝܟܼ ܥܸܙܵܩܬܵܐ ܝܲܢ ܩܸܢܸܫܬܵܐ ܝܲܢ ܣܲܢܓ̰ܵܩܵܐ ܓܵܘ ܬܲܠܸܡܬܵܐ ܟܲܕ ܡܼܢ ܩܲܕ݇ܡ ܥܕܵܢܵܐ ܟܸܐ ܗܵܘܝܼ ܗ݇ܘܵܘ ܥܒܼܝܼܕܸ̈ܐ ܢܝܼܲܬ ܩܵܐ ܚܕܵܐ ܒܵܥܘܼܬܵܐ ܕܐܝܼܬ ܗ݇ܘܵܘ ܠܗ݇ܘܿܢ ܒܠܸܒܲܝܗܝ. ܒܵܬ݇ܪ ܗܵܕܵܐ ܟܸܐ ܬܵܠܝܼ ܗ݇ܘܵܘ ܠܵܗܿ ܬܲܠܸܡܬܵܐ ܓܵܘ ܥܘܼܡܪܵܐ (ܩܲܕ݇ܡ ܨܸܚܘܵܐ) ܗܲܠ ܩܲܝܕܵܡܬܵܐ. ܐ݇ܢܵܫܸ̈ܐ ܟܸܐ ܗܲܡܸܢܝܼ ܗ݇ܘܵܘ ܕܒܗܿܘ ܠܲܝܠܸܐ؛ ܬܪܸܝܢ ܟܵܘܟܼܒܼܸܐ ܕܠܲܝܠܸܐ ܘܡܲܓ̰ܢܘܼܢ ܟܸܐ ܩܲܪܒܸܢܝܼ ܠܐܘܼܕܵܠܸܐ ܘܒܘܼܬ ܐܵܗܵܐ ܟܸܐ ܚܲܫܒܼܝܼ ܗ݇ܘܵܘ ܕܟܠ ܚܲܕ݇ ܦܵܠܵܐ ܕܦܵܐܸܫ ܕܒܼܝܼܩܵܐ ܒܐܵܗܵܐ ܠܲܝܠܸܐ ܬܪܘܼܨܵܐ ܒܸܕ ܦܵܠܸܛ.                     

   ܠܩܘܼܕܡܸܐ ܕܗܿܘ ܝܵܘܡܵܐ ܚܕܵܐ ܒܲܟܼܬܵܐ ܕܒܸܫ ܒܫܸܢܸܐ ܗ݇ܘܵܐ ܟܸܐ ܫܵܩܠܵܐ ܗ݇ܘܵܐ ܠܵܗܿ ܬܲܠܸܡܬܵܐ ܘܟܸܐ ܛܵܠܒܵܐ ܗ݇ܘܵܐ ܡܼܢ ܚܕܵܐ ܒܪܵܬܵܐ ܙܥܘܿܪܬܵܐ(7ـ 8ܫܸܢܸ̈ܐ) ܕܡܼܢ ܠܲܝܠܸܐ ܕܲܥܒܼܲܪ ܠܸܐ ܗ݇ܘܵܐ ܗܘܼܡܙܸܬܵܐ ܘܣܘܼܩܠܘܼܗܿ ܗ݇ܘܵܘ ܐܲܝܟܼ ܟܵܠܘܼ؛ ܕܦܵܠܛܵܐ ܠܚܲܕ݇ ܡܸܢܕܝܼ ܡܼܢ ܓܵܘ ܬܲܠܸܡܬܵܐ. ܘܒܥܕܵܢܵܐ ܕܦܲܠܲܛܬܵܐ ܕܗܿܘ ܡܸܢܕܝܼ ܗܵـܝ ܒܲܟܼܬܵܐ ܟܸܐ ܩܵܪܝܵܐ ܗ݇ܘܵܐ ܚܕܵܐ ܡܫܘܼܚܬܵܐ ܘܟܸܐ ܦܵܫܩܵܐ ܗ݇ܘܵܐ ܠܵܗܿ ܘܟܸܐ ܗܲܡܸܢܝܼ ܗ݇ܘܵܘ ܕܗܵܘ ܦܘܼܫܵܩܵܐ ܒܸܕ ܬܲܡܸܡ ܩܵܐ ܡܵܪܵܐ ܕܡܸܢܕܝܼ. ܡܫܘܼܚܝܵܬܸ̈ܐ ܕܓ̰ܵܢ ܓܘܼܠܘܼܡ ܒܸܫ ܙܵܘܕܵܐ ܒܠܸܫܵܢܵܐ ܕܬܘܼܪܟܸܕ ܗ݇ܘܵܘ ܐܝܼܢܵܐ ܐܝܼܬ ܦܝܵܫܵܐ ܚܲܕ݇ܟܡܵܐ ܥܘܼܢܝܼܵܬܸܐ ܒܠܸܫܵܢܵܐ ܐܵܬܘܼܪܵܝܵܐ ܘܐܵܪܸܡܢܵܝܸܐ. ܒܸܠܬܸܚܬ݇ ܒܸܕ ܡܲܕܟܼܸܪܲܚ ܠܟܡܵܐ ܡܸܢܲܝܗܝ ܕܦܝܼܫܸ̈ܐ ܝܢܵܐ ܗܘܼܩܝܼܸܐ ܒܝܲܕ ܡܝܲܩܲܪܬܵܐ ܪܲܒܩܵܐ ܓܘܿܠܙܵܪܝܼ.                                                              

ܐܵܢܵܐ ܐܲܢ݇ܬܸܢ ܬܸܪܘܲܝܢܝܼ ܓ̰ܵܢ ܓܘܼܠܘܼܡ ܓ̰ܵܢ ܓ̰ܵܢ                                                      

     ܢܵܛܸܪܲܢ ܐܲܠܵܗܲܝܢܝܼ ܓ̰ܵܢ ܓܘܼܠܘܼܡ ܓ̰ܵܢ ܓ̰ܵܢ                                                         

     ܩܸܘܝܵܐ ܗܵܘܸܐ ܚܘܼܒܲܝܢܝܼ ܓ̰ܵܢ ܓܘܼܠܘܼܡ ܓ̰ܵܢ ܓ̰ܵܢ

     ܗܲܠ ܕܗܵܘ ܝܵܘܡܵܐ ܕܡܵܘܬܲܝܢܝܼ ܓ̰ܵܢ ܓܘܼܠܘܼܡ ܓ̰ܵܢ ܓ̰ܵܢ

                    ܀܀܀܀܀

     ܒܪܵܬܵܐ ܫܸܡܵܟܼܝ ܬܲܢܝܼ ܠܸܗ ܓ̰ܵܢ ܓܘܼܠܘܼܡ ܓ̰ܵܢ ܓ̰ܵܢ

     ܒܵܒܵܟܼܝ ܙܸܐ ܚܸܡܝܵܢܝܼ ܝܠܸܗ ܓ̰ܵܢ ܓܘܼܠܘܼܡ ܓ̰ܵܢ ܓ̰ܵܢ    

     ܐܸܢ ܕܵܒܼܩܸܢܵܟܼܝ ܢܵܫܩܸܢܵܟܼܝ ܓ̰ܵܢ ܓܘܼܠܘܼܡ ܓ̰ܵܢ ܓ̰ܵܢ

     ܡܲܬܢܝܼܵܢܝܼ ܡܵܢܝܼ ܝܠܸܗ ܓ̰ܵܢ ܓܘܼܠܘܼܡ ܓ̰ܵܢ ܓ̰ܵܢ

                    ܀܀܀܀܀

     ܛܲܝܪܵܐ ܝܘܸܢ ܢܦܝܼܠܵܐ ܒܓܲܪܕܵܟܼܝ ܓ̰ܵܢ ܓܘܼܠܘܼܡ ܓ̰ܵܢ ܓ̰ܵܢ

     ܒܸܩܝܵܕܵܐ ܝܘܸܢ ܡܼܢ ܕܖ̈ܕܵܟܼܝ ܓ̰ܵܢ ܓܘܼܠܘܼܡ ܓ̰ܵܢ ܓ̰ܵܢ  

     ܝܲܢ ܩܛܘܼܠܝܼ ܝܲܢ ܡܲܚܸܒܠܝܼ ܓ̰ܵܢ ܓܘܼܠܘܼܡ ܓ̰ܵܢ ܓ̰ܵܢ  

     ܝܲܢ ܡܼܢ ܚܘܼܒܵܟܼܝ ܡܲܨܒܼܸܥܠܝܼ ܓ̰ܵܢ ܓܘܼܠܘܼܡ ܓ̰ܵܢ ܓ̰ܵܢ  

                    ܀܀܀܀܀

     ܠܐ݇ܓܵܪܸܐ ܪܵܡܵܐ ܕܡܝܼܟܼܸܬ ܝܲܠܵܕ݇ܐ

     ܣܘܼܕܪܵܐ ܕܟܬܵܢܵܐ ܠܒܼܝܼܫܸܬ ܝܲܠܵܕ݇ܐ

     ܠܘܼܒܠܵܐ ܠܗ݇ܘܿܢ ܛܠܝܼܒܬܘܼܟܼ ܫܲܦܝܼܪܬܵܐ

     ܠܲܝܬ ܠܘܼܟܼ ܚܲܒܪܵܐ ܕܡܝܼܟܼܸܬ ܝܲܠܵܕ݇ܐ