Bulletin No. 17 

ܫܘܬܦܘܬܐ ܕܢܫ̈ܐ ܐܬܘܖ̈ܝܐ

      ܫܡܝܪܡ      

   ܡܢܝܢܐ 17 ܩܝܛܐ 2013

ܚܒܼܝܫܬ̈ܐ

ܒܠܫܢܐ ܐܬܘܪܝܐ

                        

                                               Paul Batu

   7 ܒܛܒܚ 1933

          ܡܘܫܚ̈ܬܐ

         ܛܐܠܬܐ ܕܨܚܨܝܬܐ

         ܒܗܠܘܠ ܝܕܘܥܐ

         ܬܘܢܝ̈ܐ ܐܬܘܖ̈ܝܐ

         ܐܢܐ ܘܒܥܒܐ

بزبان فارسی

         انجمن های آشوری

         اخبار

         شعر

            تأثیر سریانی در زبان فارسی

            شیرینِ خسرو

            در تونل تاریخ

            بنای یادبود سیفو

            گفت وگو

           سمیل 1933

*روی جلد: تابلویِ" زیبای بین النهرین" اثر پل باتو نقاش آشوری

*مسئولیت مطالب مندرج در این بولتن بر عهده نویسندگان مقالات می باشد.

7 ܒܛܒܚ

7 ܒܛܒܚ 1933

               

   ܟܠ ܫܸܢ݇ܬܵܐ ܒܐܵܗܵܐ ܐܲܩܡܵܐ ܟܸܐ ܦܵܝܫܝܼ ܩܛܝܼܖܸ̈ܐ ܚܘܼܖ̈ܙܸܐ ܕܕܘܼܟܼܪܵܢܵܐ ܕܣܲܗܕܸ̈ܐ ܕ7ܒܛܲܒܲܚ 1933ܒܟܠܲܝܗܝ ܐܵܢܝܼ ܐܲܬܖ̈ܵܘܵܬܸܐ ܕܒܸܥܡܵܪܵܐ ܝܢܵܐ ܐܵܬܘܼܖ̈ܝܸܐ ܒܓܵܘܲܝܗܝ. ܬܡܵܢܝܼܢ ܫܸܢܸ̈ܐ ܡܼܢ ܩܲܕ݇ܡ ܐܵܕܝܼܵܐ ܦܝܼܫܠܸܗ ܩܛܝܼܠܵܐ ܚܲܕ݇ ܡܸܢܝܵܢܵܐ ܓܘܼܪܵܐ ܡܼܢ ܒܢܲܝ̈ ܐܘܼܡܬܲܢ ܒܐܝܼܕܵܐ ܕܡܸܫܬܲܐܠܵܢܸ̈ܐ ܕܫܘܼܠܛܵܢܵܐ ܥܸܪܵܩܵܝܵܐ. ܩܲܪܣܘܼܬܵܐ ܘܒܲܪܒܪܵܝܘܼܬܵܐ ܕܦܝܼܫܠܵܗܿ ܡܘܼܦܠܸܚܬܵܐ ܒܐܵܗ ܓܘܼܢܚܵܐ ܡܘܼܥܒܼܸܕܠܵܗܿ ܕܪܵܒܵܐ ܡܼܢ ܡܓܼܵܠܝܵܬܸ̈ܐ ܘܣܦܲܪ ܙܲܒܼܢܸ̈ܐ ܡܫܲܡܗܸ̈ܐ ܕܒܪܝܼܬܵܐ ܡܲܢܗܸܪܝܼ ܠܸܗ ܩܵܐ ܝܕܵܥܬܵܐ ܕܥܵܡܖ̈ܵܢܸܐ ܕܬܸܒܼܸܝܠ ܘܠܵܐ ܢܫܸܠܗ݇ܘܿܢ ܐܵܬܘܼܖ̈ܵܝܸܐ ܠܐܵܗܵܐ ܓܘܼܢܚܵܐ ܗܲܠ ܐܸܕܝܘܿܡ ܘܟܸܐ ܕܵܟܼܪܝܼܠܸܗ ܒܡܸܨܥܵܝܘܼܬܵܐ ܕܚܘܼܖ̈ܙܸܐ ܡܫܲܚܠܦܸ̈ܐ ܕܟܸܐ ܦܵܝܫܝܼ ܩܛܝܼܖܸ̈ܐ ܒܐܲܪܒܥܵܐ ܦܸܢܝܵܬܸ̈ܐ ܕܒܪܝܼܬܵܐ.                                                                  

                                                                              کلیسای روستای سمیل  که به یادبود شهدای 7 طاباخ  بنا شده است. 

                  

 ܒܐܵܗܵܐ ܫܸܢ݇ܬܵܐ ܘܒܐܵܗܵܐ ܐܲܩܡܵܐ ܟܲܕ ܒܸܕܟܼܵܪܲܝܗܝ ܝܘܲܚ ܣܵܗܕܸ̈ܐ ܙܲܟܵܝܸ̈ܐ ܕܐܘܼܡܬܲܢ ܐܵܢܝܼ ܕܠܵܐ ܟ̰ܘܼ ܚܕܵܐ ܓܢܵܗܵܐ ܦܝܼܫܠܗ݇ܘܿܢ ܦܖ̈ܝܼܡܸܐ ܘܩܛܝܼܠܸ̈ܐ؛ ܖܸ̈ܓܼܫܸܐ ܕܚܲܫܵܐ ܘܬܘܵܬܵܐ ܒܸܟܒܼܵܫܵܐ ܝܢܵܐ ܠܟܠܵܗܿ ܓܵܢܲܢ؛ ܘܗܲܪ ܒܗܵܝ ܥܕܵܢܵܐ ܠܸܒܵܐ ܘܪܘܼܚܵܐ ܕܟܠܲܝܗܝ ܐܵܬܘܼܖ̈ܵܝܸܐ ܒܬܸܫܘܸܫܬܵܐ ܝܢܵܐ ܒܘܼܬ ܒܢܲܝ̈ ܐܘܼܡܬܲܝܗܝ ܥܲܡܖ̈ܵܢܸܐ ܒܚܲܕ݇ܟܡܵܐ ܐܲܬܪܵܘܵܬܸܐ ܕܒܸܬܦܵܩܵܐ ܝܢܵܐ ܒܟܠ ܚܕܵܐ ܪܦܵܦܵܐ ܒܩܝܼܘܲܢܕܸܢܘܼܣܸ̈ܐ ܡܸܬܩܲܛܠܵܢܸ̈ܐ ܘܡܵܘܒܕܵܢܸ̈ܐ. ܐܸܕܝܘܿܡ ܘܒܐܵܗܵܐ ܙܲܒܼܢܵܐ ܙܸܐ ܒܚܘܼܦܵܛܵܐ ܝܢܵܐ ܚܲܕ݇ܟܡܵܐ ܚܲܝܠܵܘܵܬܸ̈ܐ ܣܲܢܕܵܢܸ̈ܐ ܕܩܲܪܣܘܼܬܵܐ ܘܣܘܼܪܵܕܵܐ؛ ܐܵܢܝܼ ܕܒܸܚܙܵܝܘܼܗܿ ܝܢܵܐ ܐܘܼܡܬܲܢ ܐܲܝܟܼ ܚܲܕ݇ ܟܸܬܘܵܐ ܓܵܘ ܥܲܝܢܲܝ̈ܗܝ  ܘܚܲܦܘܼܛܸ̈ܐ ܝܢܵܐ ܕܫܵܝܦܝܼ ܠܵܗܿ ܡܼܢ ܥܲܠ ܦܲܐܬܵܐ ܕܐܲܪܥܵܐ ܒܚܲܝܠܵܐ ܕܖ̈ܕܘܼܦܝܸܐ ܘܩܸܛܠܸ̈ܐ ܘܟܲܡܲܖ̈ܝܵܬܸܐ. ܒܐܲܢܸܐ ܟܡܵܐ ܫܸܢܸ̈ܐ ܕܲܥܒܼܲܪ ܬܦܝܼܩܸ̈ܐ ܝܢܵܐ ܒܢܲܝ̈ ܐܘܼܡܬܲܢ ܛܠܝܼܡܸ̈ܐ ܒܐܲܬܪܵܐ ܕܣܘܼܪܝܼܵܐ ܒܚܲܕ݇ܟܡܵܐ ܐܲܝܟܵܢܵܝܘܵܬܸ̈ܐ ܩܸܫܝܸ̈ܐ ܘܩܘܼܒܠܸܐ ܝܢܵܐ ܠܪܵܒܵܐ ܖ̈ܕܘܼܦܝܸܐ ܘܓ̰ܘܼܢܕ̰ܵܖܸ̈ܐ. ܚܲܝܠܵܘܵܬܸ̈ܐ ܖ̈ܗܝܼܒܼܵܝܸܐ ܒܸܢܫܵܪܵܐ ܝܢܵܐ ܠܡܵܬܘܵܬܸ̈ܐ ܐܵܬܘܼܪܵܝܸܐ ܘܦܬܵܚܵܐ ܝܢܵܐ ܓܘܼܠܠܵܬܸ̈ܐ ܠܥܲܡܖ̈ܵܢܲܝܗܝ. ܒܟܡܵــܐ ܝܲܖ̈ܚܸــܐ ܕܲܥܒܼܲܪ ܩܛܝܼܠܸ̈ܐ ܝܢܵܐ ܠܚܲܕ݇ܟܡܵــܐ ܦܲܖ̈ܨܘܿܦܸـܐ ܡܼܢ ܒܢܲ̈ܝ ܐܘܼܡܬܲܢ ܘܚܛܝܼ̈ܦܸܐ(ܓܢܝܼ̈ܒܼܸܐ) ܝܢܵܐ ܠܟܡܵܐ ܟܵܗܢܸ̈ܐ. ܒܐܲܬܪܵܐ ܕܥܸܪܵܩ ܙܸܐ ܗ݇ܘܝܼܸܐ ܝܢܵܐ ܪܵܒܵܐ ܨܦܵܚܝܵܬܸ̈ܐ ܚܲܝܠܵܢܸ̈ܐ ܥܲܠ ܐܲܪܒܥܵܐ ܚܵܢܘܵܬܸ̈ܐ (ܕܘܼܟܵܢܵܢܸ̈ܐ) ܕܐܵܬܘܼܖ̈ܵܝܸܐ ܐܵܦ ܠܚܲܕ݇ ܥܘܼܡܪܵܐ. ܒܡܕܝܼܢ݇ܬܵܐ ܕܒܲܓܼܕܲܕ ܙܸܐ ܬܪܸܝܢ ܦܲܖ̈ܨܘܼܦܸܐ ܡܝܼܬܸ̈ܐ ܘܝܲܬܝܼܪ ܡܼܢ ܬܪܸܥܣܲܪ ܓܵܢܵܬܸ̈ܐ ܨܠܝܼܦܸ̈ܐ ܝܢܵܐ؛ ܐܵܦ ܡܘܼܩܕܸܐ ܝܢܵܐ ܠܥܘܼܡܪܵܐ ܕܡܵܪܬܝ ܡܲܪܝܲܡ ܒܡܲܕܢܚܵܐ ܕܡܕܝܼܢ݇ܬܵܐ.                                                        

   ܐܸܕܝܘܿܡ ܟܲܕ ܡܝܲܩܘܼܖܸ̈ܐ ܝܘܲܚ ܠܸܕܟܼܵܪܵܐ ܕܣܵܗܕܘܼܬܵܐ ܕܬܠܵܬ݇ ܐܲܠܦܸ̈ܐ ܐܵܬܘܼܖ̈ܵܝܸܐ ܕܦܝܼܫܠܗ݇ܘܿܢ ܩܛܝܼܠܸ̈ܐ ܒܐܸܫܬܝܼܢ ܘܬܠܵܬ݇ ܡܵܬܘܵܬܸ̈ܐ ܒܐܘܼܚܕܵܢܵܐ ܕܕܘܼܗܘܼܟ ܘܡܲܘܨܸܠ؛ ܐܵܦ ܡܝܲܩܘܼܖܸ̈ܐ ܝܘܲܚ ܠܕܘܼܟܼܪܵܢܵܐ ܕܟܠܲܝܗܝ ܐܵܢܝܼ ܕܦܝܼܫܠܗ݇ܘܿ ܩܛܝܼܠܸ̈ܐ ܒܐܲܢܸܐ ܥܸܣܖ̈ܝܼܢ ܫܸܢܸ̈ܐ ܚܲܖ̈ܵܝܸܐ ܒܐܘܼܪܚܵܐ ܕܐܘܼܡܬܲܝܗܝ ܘܬܵܘܕܝܼܬܲܝܗܝ. ܘܒܸܛܠܵܒܵܐ ܝܘܲܚ ܡܼܢ ܡܵܪܝܵܐ ܕܢܵܛܸܪܵܗܿ ܘܦܵܪܸܩܠܵܗܿ ܐܘܼܡܬܲܢ ܛܠܝܼܡܬܵܐ ܡܼܢ ܟܠܲܝܗܝ ܒܘܼܨܸ̈ܐ ܘܢܸܫܒܼܸ̈ܐ ܕܦܝܵܫܵܐ ܝܢܵܐ ܣܝܼܡܸ̈ܐ ܩܲܕ݇ܡ ܐܘܼܪܚܘܼܗܿ. ܛܵܒܼܵܐ ܝܠܸܗ ܕܟܼܵܖ̈ܲܝܗܝ ܚܸܠܝܵܐ ܠܐܲܒܲܕ.                    

      

ܝܘܡܐ ܕܣܗܕ̈ܐ                                 

                                 ܣܝܡܘܢ ܐܡܪܝܚܐܨ                                                               

ܝܵܘܡܵــܐ ܕܫܲܒܼܥܵــܐ ܒܝܲܪܚܵــܐ ܕܛܲܒܲــܚ  

                           ܝܵܘܡܵـܐ ܝܠܸـܗ ܡܲܪ݇ܝܼܪܵܐ ܓܵـܘ ܚܲـܝܸ̈ܐ

ܝܵܘܡܵــܐ ܕܒܝܼــܘܼܗܝ ܠܕܸܒܼܚܲܢ ܕܵܟܼــܪܲܚ 

                            ܝܵـܘܡܵــــܐ ܕܣܲـــܗܕܸ̈ܐ ܐܵܬܘܼܖ̈ܵܝܸــــܐ

ܓܵــܘ ܢܝܼܢܘܸܐ؛ ܐܘܼܪܡــܝܼ ܘܣܸܡܹܝܠܸــܐ   

                          ܘܐܸܡܸـــܐ̈ܐ ܡܵــܬܘܵܬܸ̈ܐ ܘܡـܕܝܼـܢܵــܬܸ̈ܐ

ܓܘܼܖܸ̈ܐ ܘܙܥـܘܿܖܸ̈ܐ؛ ܐܘܼܦ ܛܸܦܝܼــܠܸ̈ܐ 

                        ܡܘܼܫܬܸܐ ܠܗ݇ܘܿܢ ܕܸܡܲܝܗܝ ܠܖ̈ܘܼܡܝܵܬܸܐ

ܩܵܠܵܐ ܕܕܒܼܝܼܚܸ̈ܐ ܡܼܢ ܩܲܒܼܖܸ̈ܐ ܡܲܩܘܘܼܚܸܐ ܝܠܸܗ

            ܗܲܩܘܼܝܸܐ ܒܡܲܪ݇ܝܼܪܘܼܬܵܐ ܗܲܩܝܵܬܸ̈ܐ ܕܙܠܘܼܡܝܵܐ

ܕܸܡܵܐ ܕܣܵܗܕܸ̈ܐ ܗܲܠ ܐܸܕܝܘܿܡ ܒܸܪܬܵܚܵܐ ܝܠܸܗ

                   ܒܸܛܠܵܒܲܝܗܝ ܝܠܸܗ ܗܲܩܘܼܝܵܬܘܼܗܝ ܡܼܢ ܫܡܲܝܵܐ

                     ܀܀܀܀܀

ܟܡܵـܐ ܕܗܘܼܟܸܡܠܵܗܿ ܐܵܬܘܼܪ ܠܕܘܼܢܝܸــܐ

                          ܝـܘܼܗܒܼܸــܠܵܗܿ ܠـܡܸــــܠܵــܬܸ̈ܐ ܚܲــܝܸ̈ܐ

ܘܡܼܢ ܒܵܬ݇ܪ ܢܦܵܠܬܘܼܗܿ ܦܝܼܫܠܲܢ ܣܸܢܝܸ̈ܐ

                        ܘܒـܘܼܬ ܨܦܵܝــܘܼܬܲܢ ܦܝܼܫـܠܲܢ ܦـܘܼܢـܝܸ̈ܐ

ܒܵــܬ݇ܪ ܢܦܵܠــܬܵܐ ܕܐܸܡܦــܪܵܛــܘܼܪܘܼܬܲܢ

                       ܕܠܸـܐ ܗ݇ܘܵܐ ܠܗܸܟ̰ ܦܠܵܫܵܐ ܡܘܼܓܼܠܸܒـܬܵܐ

ܓܵــܘ ܕܘܼܢܝܸــܐ ܒܘܼܪܒܸܙܠܵــܗܿ ܐܘܼܡܬܲܢ

                      ܘܦܝܼܫܠܵــܗܿ ܡܘܼܦܪܸܡܬܵܐ ܘܡܘܼܩܛܸܠــܬܵܐ

ܩܵܠܵܐ ܕܕܒܼܝܼܚܸ̈ܐ ܡܼܢ ܩܲܒܼܖܸ̈ܐ ܡܲܩܘܘܼܚܸܐ ܝܠܸܗ

ܗܲܩܘܼܝܸܐ ܒܡܲܪ݇ܝܼܪܘܼܬܵܐ ܗܲܩܝܵܬܸ̈ܐ ܕܙܠܘܼܡܝܵܐ                                

ܕܸܡܵܐ ܕܣܵܗܕܸ̈ܐ ܗܲܠ ܐܸܕܝܘܿܡ ܒܸܪܬܵܚܵܐ ܝܠܸܗ

                   ܒܸܛܠܵܒܲܝܗܝ ܝܠܸܗ ܗܲܩܘܼܝܵܬܘܼܗܝ ܡܼܢ ܫܡܲܝܵܐ