ܡܠܬܐ ܒܠܫܢܐ ܐܬܘܪܝܐ

        ܣܘܪܝܐ ܩܠܣܝܩܝܐ (2)

                     

ܒـܐܵܗܵܐ ܦܵܣܘܿܩܵܐ ܕܣܝܵܡܵܐ ܒܸܕ ܗܲܓܲܚ ܥܲܠ ܒܘܼܫܵܝــܘܼܬܵܐ ܕܩܸܛــܖܸ̈ܐ ܕܦܝܵܫܵܐ ܝܢܵܐ ܚܸܙܝܸ̈ܐ ܒܪܲܗܛܵܐ ܕܟܬܝܼܒܼܬܵܐ ܒܠܸܫܵܢܵܐ ܣܘܼܪܵܝܵܐ.      ܐ ـ ܙܵܘܥܸ̈ܐ: ܚܲܕ݇ ܒܘܼܩܵܪܵܐ ܐܵܢܲܢܩܵܝܵܐ ܕܟܠ ܚܲܕ݇ ܝܵܠܘܿܦܵܐ ܐܵܗܵܐ ܝܠܸܗ ܕܡܲܦܠܲܚܬܵܐ ܕܙܵܘܥܸ̈ܐ ܪܵܒܵܐ ܥܲܣܩܘܼܢܸܐ ܝܠܵܗܿ ܠܝܠܵܦܬܵܐ ܕܠܸܫܵܢܲܢ ܘܪܵܒܵܐ ܒܸܫ ܨܦܵܝܝܼ ܒܸܕ ܗܵܘܝܵܐ ܐܸܢ ܙܵܘܥܸ̈ܐ ܦܵܝܫܝܼ ܫܩܝܼܠܸ̈ܐ. ܦܘܼܢܵܝܵܐ: ܗܲܠ ܕܵܪܵܐ ܬܠܝܼܬܵܝܵܐ ܒ.ܡ ܣܵܝܘܿܡܸ̈ܐ ܐܵܬܘܼܖ̈ܵܝܸܐ ܠܸܐ ܡܲܦܠܸܚܝܼ ܗ݇ܘܵܘ ܙܵܘܥܸ̈ܐ ܘܗܵܝܓܵܗ ܫܘܼܪܸܐ ܠܗ݇ܘܿܢ ܡܲܦܠܘܼܚܲܝܗܝ. ܐܵܦܸܢ ܕܒܘܼܫܵܝܘܼܬܵܐ ܕܝܲܠܝܼܦܸ̈ܐ ܕܠܸܫܵܢܵܐ ܣܘܼܪܵܝܵܐ ܠܸܐ ܡܲܦܠܸܚܝܼ ܙܵܘܥܸ̈ܐ ܒܟܬܝܼܒܼܝܵܬܲܝܗܝ؛ ܐܝܼܢܵܐ ܚܲܕ݇ ܩܸܛܪܵܐ ܫܸܪܫܵܝܵܐ ܩܵܐ ܝܵܠܘܿܦܸ̈ܐ ܐܵܗܵܐ ܝܠܸܗ ܕܐܸܢ ܠܵــܐ ܟܵܬܒܼܝܼ ܠܗ݇ܘܿܢ ܙܵܘܥܸ̈ܐ ܪܵܒܵـܐ ܡܼܢ ܚܲܒܖ̈ܵܢܸܐ ܒܸܕ ܦܵܝـܫـܝܼ ܓܼܠܝܼܛܸ̈ܐ(ܚܠܝܼܛܼ̈ܐ) ܒܐܘܼܕܵܠܸܐ.  ܩܵܐ ܛܘܼܦ̰ܣܵܐ ܐܸܢ ܟܲܬܒܼܲܚ ܚܡܪܐ ܡܵܨܲܚ ܩܵܪܲܚܠܸـܗ:ܚܲܡܪܵܐ؛ ܚܡܵܪܵܐ  ܝܲܢ ܚܸܡܪܵܐ. ܗܲܪ ܗܵܕܟܼܵܐ ܚܲܒܪܵܐ ܕܐܢܐ ܟܸܐ ܡܵܨܲܚ ܩܵܪܲܚܠܸܗ: ܐܵܢܵܐ ܝܲܢ ܐܲܢܸܐ. ܚܕܵܐ ܐܘܼܪܚܵܐ ܐ݇ܚܸܪ݇ܬܵܐ ܕܟܸܐ ܡܲܚܫܸܚܝܼ ܠܵܗܿ ܪܵܒܵܐ ܡܼܢ ܡܲܠܦܵܢܸ̈ܐ ܕܠܸܫܵܢܲܢ ܦܪܝܼܫܵܐܝܼܬ ܒܐܲܬܖ̈ܵܘܵܬܸܐ ܕܝܘܼܪܘܿܦ ܐܵܗܵܐ ܝܠܵܗܿ ܕܒܫܵܘܦܵܐ ܕܙܵܘܥܸ̈ܐ ܡܲܦܠܸܚܲܚ ܚܲܕ݇ܟܡܵܐ ܖ̈ܘܼܫܡܸܐ ܐ݇ܚܸܖ̈݇ܢܸܐ ܐܲܝܟܼ ܕܐܝܼܬ ܒܠܸܫܵܢܵܐ ܠܵܛܝܼܢܵܝܵܐ. ܟܲܕ ܣܘܼܖ̈ܵܝܸܐ ܡܲܥܖ̈ܒܼܵܝܸܐ ܡܲܦܠܘܼܚܸܐ ܝܢܵܐ ܠܚܲܕ݇ ܗܵܕܟܼܵܐ ܪܸܐܙܵܐ ܐܝܼܢܵܐ ܗܸܫ ܠܸܐ ܝܠܸܗ ܦܝܼܫܵܐ ܩܘܼܒܠܵܐ   ܒܣܘܼܖ̈ܵܝܸܐ ܡܲܕܸܢܚܵܝܸ̈ܐ.                                                                             

ܒ ـ ܛܲܠܩܵܢܵܐ: ܒܘܼܩܵܪܵܐ ܐ݇ܚܸܪ݇ܢܵܐ ܐܵܗܵܐ ܝܠܸܗ ܕܠܡܘܼܕܝ ܒܸܟܬܵܒܼܵܐ ܝܘܲܚ ܠܚܕܵܐ ܐܵܬܘܼܬܵܐ ܐܝܼܢܵܐ ܡܲܬܘܼܒܼܸܐ ܝܘܲܚ ܠܛܲܠܩܵܢܵܐ ܥܲܠܘܼܗܿ ܘܠܸܐ ܝܘܲܚ ܒܸܪܬܵܡܘܼܗܿ؟ ܩܲܕ݇ܡܵܝܬܵܐ ܘܵܠܸܐ ܝܠܵܗܿ ܕܡܲܕܟܼܸܪܲܚ ܕܒܪܵܒܵܐ ܠܸܫܵܢܸ̈ܐ ܐ݇ܚܸܖ̈݇ܢܸܐ ܙܸܐ ܐܝܼܬ ܚܲܕ݇ܟܡܵܐ ܚܲܒܖ̈ܵܢܸܐ ܕܟܸܐ ܟܵܬܒܼܝܼܠܗ݇ܘܿܢ ܐܝܼܢܵܐ ܠܸܐ ܩܵܪܝܼܠܗ݇ܘܿܢ. ܒܠܸܫܵܢܵܐ ܦܪܵܢܣܵܝܵܐ ܘܐܸܢܓܠܝܼܣܢܵܝܵܐ ܘܐܵܠܡܵܢܵܝܵܐ ܙܸܐ ܐܝܼܬ ܗܵܕܟܼܵܐ ܚܲܒܖ̈ܵܢܸܐ.ܩܵܐ ܛܘܼܦ̰ܣܵܐ ܒܠܸܫܵܢܵܐ ܦܪܵܢܣܵܝܵܐ ܐܵܬܘܼܬܵܐ H ܠܸܐ ܦܵܝܫܵܐ ܪܬܝܼܡܬܵܐ. ܟܲܕ ܒܐܲܠܦܸ̈ܐ ܫܸܢܸ̈ܐ ܝܠܵܗܿ ܕܒܸܟܬܵܒܼܲܝܗܝ ܝܢܵܐ ܐܲܢܸܐ ܚܲܒܖ̈ܵܢܸܐ ܘܣܵܟܼ(ܗܸܟ̰) ܠܸܐ ܝܢܵܐ ܐ݇ܡܵܪܵܐ ܕܠܸܫܵܢܲܝܗܝ ܥܵܣܩܵܐ ܝܠܸܗ ܘܠܸܐ ܐܵܬܸܐ ܠܸܝܠܵܦܵܐ!                 

   ܢܘܼܩܙܵܐ ܬܪܝܼܵܢܵܐ ܐܵܗܵܐ ܝܠܵܗܿ ܕܐܸܢ ܛܲܠܩܵܢܵܐ ܦܵܐܸܫ ܫܩܝܼܠܵܐ؛ ܝܵܠܘܿܦܵܐ ܠܸܐ ܡܵܨܸܐ ܕܡܲܫ݇ܟ̰ܸܚ ܠܥܸܩܪܵܐ ܕܚܲܒܪܵܐ ܘܒܸܕ ܒܵܪܸܐ ܚܲܕ݇ ܒܘܼܠܒܵܠܵܐ ܓܘܼܪܵܐ ܒܣܝܵܡܸ̈ܐ ܒܠܸܫܵܢܵܐ ܣܘܼܪܝܵܝܵܐ. ܩܵܐ ܛܘܼܦ̰ܣܵܐ: ܐܸܢ ܟܵܬܒܼܲܚ ܒܲܪ ܡܼܢ ܓܸܒܵܐ ܕܒܵܬ݇ܪ؛ ܐܵܗܵܐ ܚܲܒܪܵܐ ܒܸܕ ܦܵـܐܸܫ ܓܼܠܝܼܛܵܐ(ܚܠܝܼܛܵܐ) ܥܲـܡ ܒܲܪ ܒܡܲܥܢܵܝܵܐ ܕܝܲܠܵܕ݇ܐ. ܘܗܲܪ ܗܵܕܟܼܵܐ ܐܸܢ ܟܵܬܒܼܲܚ ܟܢܐ ܠܸܐ ܡܵܨܲܚ ܦܵܪܫܲܚ ܠܸܗ ܐܸܢ ܟܲܢܵܐ ܝܠܸܗ(ܣܛܘܼܢܵܐ) ܝܲܢ ܟܵܗܢܵܐ(ܩܵܫܵܐ). ܐܵܦ ܐܸܢ ܟܵܬܒܼܲܚ: ܫܕܐ ܠܸܐ ܡܵܨܲܚ ܦܵܪܫܲܚ ܠܸܗ ܕܫܵܓܼ݇ܕܵܐ ܝܠܸܗ ܝܲܢ ܫܸܕܵܐ.

   ܡܼܢ ܚܲܕ݇ ܓܸܒܵܐ ܐ݇ܚܸܪ݇ܢܵܐ ܟܲܕ ܚܲܕ݇ ܣܲܗܡܵܐ ܓܘܼܪܵܐ ܡܼܢ ܣܝܵܡܲܢ ܦܝܵܫܵܐ ܝܢܵܐ ܟܬܝܼܒܼܸ̈ܐ ܒܝܲܕ ܣܵܝܘܿܡܲܢ ܒܢܲܝ̈ ܥܝܼܪܵܩ ܘܣܘܼܪܝܼܵܐ؛ ܫܝܵܦܬܵܐ ܕܚܲܒܖ̈ܵܢܸܐ ܛܠܝܼܩܸ̈ܐ ܒܸܕ ܒܵܪܝܵܐ ܚܕܵܐ ܪܘܼܚܩܵܝܘܼܬܵܐ ܒܲܝܢܵܬ ܟܵܬܘܿܒܼܸ̈ܐ ܘܐܘܼܡܵܢܸ̈ܐ ܕܐܘܼܡܬܲܢ ܒܗܿܝ ܕܒܸܕ ܙܵܝܕܝܼ ܐܲܕܫܸ̈ܐ ܕܟܬܵܒܼܬܵܐ ܒܠܸܫܵܢܲܢ؛ ܟܲܕ ܐܘܼܡܬܲܢ ܣܢܝܼܩܬܵܐ ܝܠܵܗܿ ܠܒܪܵܝܬܵܐ ܕܚܕܵܐ ܝܣܘܼܪܵܐ ܘܐܵܘܝܘܼܬܵܐ ܒܪܲܗܛܵܐ ܕܡܲܪܘܲܚܬܵܐ ܕܣܸܦܪܵܝܘܼܬܵܐ ܐ݇ܣܘܼܪܝܵܝܬܵܐ.

ܓ ـ ܒܘܼܬ ܥܲܣܩܘܼܬܵܐ ܕܦܪܵܫܬܵܐ ܕܩܵܠܵܐ ܕـܲ ܢ ـܵ

ܚܲܕ݇ܟܡܵܐ ܡܼܢ ܣܵܝܘܿܡܲܢ ܒܸܚܫܵܒܼܵܐ ܝܢܵܐ ܕܟܲܕ ܠܸܐ ܝܘܲܚ ܡܨܵܝܵܐ ܕܦܵܪܫܲܚ ܠܗ݇ܘܿܢ ܐܲܢܸܐ ܬܪܸܝܢ ܩܵܠܸ̈ܐ ܡܐܘܼܕܵܠܸܐ ܠܲܝܬ ܠܵܗܿ ܙܝܵܢܵܐ ܐܸܢ ܡܲܬܒܼܲܚ ܙܩܵܦܵܐ ܐܲܝܟܵܐ ܕܬܘܼܪܩܸܠܲܢ. ܐܵܗܵܐ ܙܸܐ ܠܲܝܬ ܠܵܗܿ ܚܲܕ݇ ܝܘܼܬܪܵܢܵܐ ܫܒܼܘܿܩ ܡܼܢ ܒܪܵܝܬܵܐ ܕܒܘܼܠܒܵܠܵܐ. ܟܲܕ ܦܝܼܫܬܵܐ ܝܠܵܗܿ ܒܘܼܗܪܸܢܬܵܐ ܒܝܲܕ ܣܵܝܘܿܡܲܢ ܝܲܕܝܼܕܸ̈ܐ ܐܲܝܟܼ ܢܸܡܪܘܼܕ ܣܝܼܡܘܿܢܘܿ؛ ܕܩܵܐ ܡܸܠܬܵܐ ܦܵܥܸܠ ܫܸܡܵܐ ܥܵܒܼܘܿܕܵܐ ܝܠܸܗ ܦܵܥܘܿܠܵـܐ ܘܡܼܢ ܡܸܠܬܵܐ ܦܲܥܸܠ ܦܠܵܛܵܐ ܝܠܸـܗ ܫܸܡܵـܐ ܥܵܒܼܘܿܕܵܐ ܦܲܥܠܵܢܵܐ.  

ܩܵܐ ܛܘܼܦ̰ܣܵܐ ܡܼܢ ܡܸܠܬܵܐ ܐܵܟܼܸܠ ܦܠܵܛܵܐ ܝܠܸܗ ܫܸܡܵܐ ܥܵܒܼܘܿܕܵܐ: ܐܵܟܼܘܿܠܵܐ.

ܘܡܼܢ ܡܸܠܬܵܐ ܨܲܠܸܐ ܦܠܵܛܵܐ ܝܠܸܗ ܫܸܡܵܐ ܥܵܒܼܘܼܕܵܐ ܨܲܠܝܵܢܵܐ.

ܗܵܕܟܼܵܐ ܐܝܼܡܲܢ ܕܢܝܼܫܵܐ ܗܵܘܸܐ ܡܸܠܬܵܐ ܦܵܥܸܠ ܒܸܕ ܟܵܬܒܼܲܚ ܡܵܠܸܐ (ܡܵܠܸܐ ܡܼܢ ܚܵܕܘܼܬܵܐ) ܘܐܸܢ ܢܝܼܫܵܐ ܗܵܘܸܐ ܡܠܵܝܬܵܐ ܕܚܲܕ݇ ܡܸܢܕܝܼ ܐ݇ܚܸܪ݇ܢܵܐ ܒܸܕ ܟܵܬܒܼܲܚ ܡܲܠܸܐ (ܡܲܠܸܐ ܓܵܘ ܡܵܐܢܵܐ). ܦܪܵܫܬܵܐ ܕܙܩܵܦܵܐ ܡܼܢ ܦܬܵܚܵܐ ܓܵܘ ܫܸܡܵܢܸ̈ܐ؛ ܙܸܐ ܐܝܼܬ ܠܵܗܿ ܚܲܕ݇ ܩܵܢܘܿܢܵܐ ܦܪܝܼܫܵܐ. ܩܵܐ ܛܘܼܦ̰ܣܵܐ: ܒܥܸܩܖܸ̈ܐ ܕܼܐܲܪܒܥܵܐ ܐܲܬܘܵܬܸ̈ܐ؛ ܐܵܬܘܼܬܵܐ ܩܲܕ݇ܡܵܝܬܵܐ ܟܸܐ ܫܵܩܠܵܐ ܦܬܵܚܵܐ. ܐܲܝܟܼ ܟܲܪܡܵܐ.ܒܲܝܬܵܐ. ܕܲܫܬܵܐ(ܫܒܼܘܿܩ ܡܼܢ ܫܸܡܵܐ ܥܵܒܼܘܿܕܵܐ ܕܙܩܵܦܵܐ ܝܠܵܗܿ) ܒܥܸܩܖܸ̈ܐ ܕܚܲܡܫܵܐ ܐܵܬܘܵܬܸ̈ܐ ܐܸܢ ܒܸܝܬ ܦܲܠܓܵܐ ܝ ܝܲܢ ܘ ܗܵܘܝܵܐ؛ ܚܲܒܪܵܐ ܩܲܕ݇ܡܵܝܵܐ ܟܸܐ ܫܵܩܸܠ ܙܩܵܦܵܐ. ܕܠܵܐ ܟ̰ܘܼ ܦܘܼܫܵܟܼܵܐ ܐܸܢ ܐܲܢܸܐ ܩܵܢܘܿܢܸ̈ܐ ܦܵܝܫܝܼ ܝܠܝܼܦܸ̈ܐ ܘܡܘܼܠܦܸ̈ܐ؛ ܠܸܐ ܦܵܝܫܵܐ ܟ̰ܘܼ ܚܕܵܐ ܥܵܣܩܘܼܬܵܐ ܒܝܠܵܦܬܵܐ ܕܠܸܫܵܢܵܐ ܝܸܡܵܝܵܐ.

ܕ ـ ܒܘܼܬ ܟܬܵܒܼܬܵܐ ܕ: ـܵܝ ܝܲܢ ܝܗܝ ܡܼܢ ܓܸܒܵܐ ܕܚܠܵܦܫܡܵܐ ܩܲܢܵܝܵܐ (ܦܲܪܨܘܿܦܵܐ ܬܠܝܼܬܵܝܵܐ ܣܲܓܝܼܵܢܵܝܵܐ)؛ ܡܸܢ݇ܕܪܸܫ݇ ܒܸܫ ܫܲܦܝܼܪܬܵܐ ܝܠܵܗܿ ܕ(ܝܗܝ) ܦܵܝܫܵܐ ܟܬܝܼܒܼܬܵܐ ܒܗܿܝ ܕܐܸܢ ܠܵܐ ܡܲܬܒܼܲܚ ܙܵܘܥܸ̈ܐ؛ ܒܩܪܵܝܬܵܐ ܕܚܲܒܖ̈ܵܢܸܐ ܒܸܕ ܬܵܦܩܲܚ ܒܥܵܣܩܘܼܬܵܐ. ܩܵܐ ܛܘܼܦ̰ܣܵܐ ܐܸܢ ܚܲܕ݇ ܕܘܼܟܵܐ ܚܵܙܲܚ ܠܚܲܒܪܵܐ ܕܒܝܬـܝ ܠܸܐ ܝܵܕܥܲܚ ܢܝܼܫܵܐ ܒܲܝܬـܝܼ ܝܠܸܗ ܝܲܢ ܒܲܝܬܵـܝ. ܐܝܼܢܵܐ ܐܸܢ ܟܵܬܒܼܲܚ ܒܲܝܬܲܝܗـܝ ܐܵܗܵܐ ܟܸܬܪܵܐ ܒܸܫܪܵܝܵܐ ܝܠܸܗ. ܐܵܦ ܐܸܢ ܟܵܬܒܼܲܚ ܟܠܝ ܠܸܐ ܦܵܪܫܲܚ ܠܚܲܒܪܵܐ: ܟܵܠܝܼ ܡܼܢ ܟܠܵܝ ܝܲܢ ܟܠܝܼ. ܐܝܼܢܵܐ ܐܸܢ ܟܵܬܒܼܲܚ ܟܠܲܝܗܝ ܦܪܵܫܘܼܗܝ ܝܘܲܚ ܚܲܒܪܵܐ ܒܸܕܠܝܼܠܘܼܬܵܐ(ܒܗܲܣܲܢܵܝܘܼܬܵܐ) ܡܼܢ ܟܠܝܼ.

ܗ ـ ܒܘܼܬ ܡܸܠܬܵܐ ܐܝܼܬܘܼܬܵܢܵܝܬܵܐ(ܦܲܪܨܘܿܦܵܐ ܬܠܝܼܬܵܝܵܐ ܣܲܓܝܼܵܢܵܝܵܐ):

ܟܬܵܒܼܬܵܐ ܕܗ݇ܘܵܘ ܒܸܫ ܫܲܦܝܼܪܬܵܐ ܝܠܵܗܿ ܡܼܢ ܗ݇ܘܵܐ. ܩܵܐ ܛܘܿܦ̰ܣܵܐ: ܐܝܼܬ ܗ݇ܘܵܐ ܬܪܸܝܢ ܡܲܥܢܵܝܸ̈ܐ ܐܝܼܬ ܠܵܗܿ: ܗܿܘ ܐܝܼܬ ܗ݇ܘܵܐ ـ ܐܵܢܝܼ ܐܝܼܬ ܗ݇ܘܵܐ. ܘܟܲܕ ܟܵܬܒܼܲܚ: ܐܝܼܬ ܗ݇ܘܵܘ؛ ܟ̰ܸܡ ܒܲܗܪܵܢـܬܵܐ ܝܠܵܗܿ ܕܒܸܪܡܵܙܵܐ ܝـܘܲܚ ܥܲـܠ

ܦܲܪܨܘܿܦܵܐ ܬܠܝܼܬܵܝܵܐ ܣܓܝܼܵܢܵܝܵܐ.

   ܟܠ ܕܐܲܝܟܼ ܕܗܵܘܝܵܐ ܒܓ̰ܪܵܝܬܵܐ ܕܙܲܒܼܢܵܐ ܪܵܒܵܐ ܫܘܼܚܠܵܦܸ̈ܐ ܒܸܓܕܵܫܵܐ ܝܢܵܐ ܥܲܠ ܒܪܝܼܬܵܐ ܘܥܲܠ ܟܠ ܚܲܕ݇ ܡܸܢܕܝܼ ܕܐܝܼܬ ܒܓܵܘܘܼܗܿ ܘܗܲܪ ܗܵܕܟܼܵܐ ܥܲܠ ܟܠ ܚܲܕ݇ ܠܸܫܵܢܵܐ. ܟܠܵܢܵܐܝܼܬ ܟܠܲܝܗܝ ܐܲܢܸܐ ܫܘܼܚܠܵܦܸ̈ܐ ܩܲܘܘܼܡܸܐ ܝܢܵܐ ܒܢܝܼܫܵܐ ܕܡܕܲܠܲܠܬܵܐ ܕܗܲܡܙܲܡܬܵܐ ܘܟܬܵܒܼܬܵܐ. ܐܝܼܢܵܐ ܚܕܵܐ ܘܵܠܝܼܬܵܐ ܓܘܼܪܬܵܐ ܕܐܝܼܬ ܠܸܗ ܟܠ ܚܲܕ݇ ܦܲܪܨܘܿܦܵܐ ܕܒܸܟܬܵܒܼܵܐ ܝܠܸܗ ܒܠܸܫܵܢܵܐ ܣܘܼܪܵܝܵܐ؛ ܐܵܗܵܐ ܝܠܵܗܿ ܕܠܵܐ ܫܵܒܼܸܩ ܕܐܲܢܸܐ ܦܘܼܖ̈ܫܘܼܢܝܸܐ ܡܲܪܚܸܩܝܼܠܲܢ ܡܐܸܚܕܵܕܸܐ؛ ܦܪܝܼܫܵܐܝܼܬ ܒܐܵܗܵܐ ܙܲܒܼܢܵܐ ܕܐܲܚܟ̰ܝܼ ܠܸܫܵܢܲܢ ܝܠܸܗ ܒܸܚܠܵܨܲܢ ܘܩܲܪܒܘܼܢܲܢ ܠܐܘܼܕܵܠܸܐ.

ܢܘܼܩܙܸ̈ܐ ܐ݇ܚܸܖ̈݇ܢܸܐ:

   ܡܸܠܬܵܐ ܐܝܼܬܘܼܬܵܢܵܝܬܵܐ ܟܸܐ ܦܵܝܫܵܐ ܟܬܝܼܒܼܬܵܐ ܒܟܡܵܐ ܦܸܨܠܸ̈ܐ. ܣܵܝܘܿܡܸ̈ܐ ܐܵܬܘܼܖ̈ܵܝܸܐ ܐܝܼܪܵܢܵܝܵܐ ܟܸܐ ܡܲܦܠܸܚܝܼ ܠܚܲܫܚܵܬܸ̈ܐ: ܝܘܸܢ(ܝܘܵܢ) ـ ܝܘܸܬ(ܝܘܵܬܝ) ـ ܝܠܸܗ(ܘܿܝܠܵܗܿ) ـ ܝܘܲܚ ـ ܝܬܘܿܢ ـ ܝܢܵܐ ܐܲܝܟܼ ܡܸܠܬܵܐ ܐܝܼܬܘܼܬܵܢܵܝܬܵܐ. ܟܲܕ ܚܲܕ݇ܟܡܵܐ ܐܵܬܘܼܖ̈ܵܝܸܐ ܟܸܐ ܡܲܦܠܸܚܝܼ ܗ݇ܘܸܢ(ܗ݇ܘܵܢ) ـ ܗ݇ܘܸܬ(ܗ݇ܘܵܬܝ) ـ ܐܝܼܠܸܗ(ܐܝܼܠܵܗܿ)ܗ݇ܘܲܚܢ ـ ܗ݇ܘܲܝܬܘܿܢ ـ ܝܠܲܝܗܝ ܘܫܪ..

ܘܚܲܕ݇ܟܡܵܐ ܐ݇ܚܸܖ̈݇ܢܵܐ ܟܸܐ ܟܵܬܒܼܝܼ: ܝܘܸܝܢ(ܝܘܵܝܢ) ـ ܝܘܸܝܬ(ܝܘܸܝܬܝ) ـ ܘܫܪ.

   ܟܠܲܝܗܝ ܐܲܢܸ̈ܐ ܦܘܼܖ̈ܫܘܼܢܝܸܐ ܒܸܢܒܼܵܥܵܐ ܝܢܵܐ ܡܼܢ ܠܸܥܙܸ̈ܐ ܕܘܼܟܬܵܢܵܝܸܐ ܕܒܢܲܝ̈

ܐܘܼܡܬܲܢ. ܟܸܐ ܬܲܢـܝܼ ܕܬܘܼܪܵܨ ܡܲܡܠܠܵܐ ܕܟܠܲܝـܗܝ ܠܸܫܵܢܸ̈ܐ ܦܝܼܫܵܐ ܝܠܸـܗ

ܒܸܢܝܵܐ ܥܲܠ ܪܘܼܟܵܒܼ ܡܸܠܸ̈ܐ ܕܗܿܘ ܠܸܫܵܢܵܐ ܕܥܲܡܵܐ ܗܲܡܙܘܼܡܸܐ ܝܠܸܗ ܒܝܼܸܗ.

ܐܝܼܢܵܐ ܟܲܕ ܐܝܼܬ ܩܘܼܪܒܵܐ ܥܲܠ ܚܲܡܫܝܼܢ ܠܸܥܙܸ̈ܐ ܒܠܸܫܵܢܵܐ ܣܘܼܪܵܝܵܐ ܕܵܐܟܼܝܼ ܡܵܨܲܚ ܟܵܬܒܼܲܚ ܠܸܗ ܬܘܼܪܵܨ ܡܲܡܠܠܵܐ؟ ܐܝܼܡܲܢ ܕܫܠܝܼܚܸ̈ܐ ܢܘܼܟܼܖ̈ܵܝܸܐ ܫܘܼܬܐܸܣܠܗ݇ܘܿܢ ܒܐܘܼܪܡܝܼ(ܒܕܵܪܵܐ 19) ܟܠ ܚܲܕ݇ ܟܬܝܼܒܼܠܸܗ ܠܬܘܼܪܵܨ ܡܲܡܠܠܸܗ ܥܲܠ ܚܲܕ݇ ܠܸܥܙܵܐ ܘܦܠܵܛܵܐ ܐܵܗܵܐ ܗ݇ܘܵܐ ܕܒܪܸܐ ܠܸܗ ܒܘܼܠܒܵܠܵܐ ܒܣܝܵܡܸ̈ܐ ܕܣܵܝܘܿܡܸ̈ܐ ܐܝܼܖ̈ܵܢܵܝܸܐ ܕܗܲܠ ܐܸܕܝܘܿܡ ܠܸܐ ܝܘܲܚ ܡܸܨܝܸܐ ܕܓܼܵܠܒܲܚ ܥܲܠܸܗ. ܗܵܕܟܼܵܐ ܐܵܢܲܢܩܵܝܬܵܐ ܝܠܵܗܿ ܕܦܵܐܸܫ ܒܸܢܝܵܐ ܬܘܼܪܵܨ ܡܲܡܠܠܵܐ ܕܠܸܫܵܢܵܐ ܣܘܼܪܵܝܵܐ ܥܲܠ ܠܸܫܵܢܵܐ ܣܸܦܪܵܝܵܐ ܕܝܼܠܸܗ ܫܸܪܫܵܐ ܕܠܸܫܵܢܲܢ ܣܘܵܕܵܝܵܐ
  ܫܡܥܘܢ ܒܝܬ ܐܝܫܘ