ܚܙܘܐ ܝܢ ܫܪܪܐ

ܡܕܠܝܢ ܣܛܝܦܢܣ

   ܗܿܝ ܟܲܪܬܘܼܗܿ ܡܠܝܼܬܵܐ ܡܼܢ ܕܲܖ̈ܕܸܐ ܡܲܪܝܼܖܸ̈ܐ ܪܵܒܵܐ ܝܲܩܘܼܪܬܵܐ ܗ݇ܘܵܐ ܘܦܲܓܼܪܘܼܗܿ ܢܘܝܼܠܵܐ ܘܫܘܼܪܫܝܼܵܐ ܘܒܸܖ̈ܟܵܟܘܼܗܿ ܬܒܼܝܼܢܸ̈ܐ ܠܲܝܬ ܗ݇ܘܵܘ ܠܗ݇ܘܿܢ ܚܲܝܠܵܐ ܕܒܸܫ ܙܵܘܕܵܐ ܫܵܩܠܵܐ ܗ݇ܘܵܐ ܦܵܣܘܿܥܝܵܬܸ̈ܐ ܠܩܲܕ݇ܡܵܐ. ܕܸܡܥܸ̈ܐ ܕܥܲܝܢܘܼܗܿ ܒܖ̈ܝܼܙܸܐ ܗ݇ܘܵܘ ܘܐܘܼܦ ܚܕܵܐ ܢܵܛܘܿܦܬܵܐ ܠܸܐ ܗ݇ܘܵܐ ܒܸܢܛܵܦܵܐ ܠܦܲܐܬܘܼܗܿ ܝܩܝܼܕܬܵܐ ܩܲܕ݇ܡ ܫܸܡܫܵܐ ܩܵܘܡܵܐ ܕܚܲܕ݇ܟ̰ܵܐ ܫܵܠܝܼ ܗ݇ܘܵܘ ܠܵܗܸ̈ܐ ܕܢܘܼܪܵܐ ܕܢܦܝܼܠܸܐ ܗ݇ܘܵܘ ܒܠܸܒܘܼܗܿ ܘܟܠ ܪܦܵܦܵܐ ܒܸܙܝܵܕܵܐ ܘܒܸܠܒܼܵܟܼܵܐ ܗ݇ܘܵܐ ܒܟܠ ܓܲܫܲܩܬܘܼܗܿ ܠܒܲܬ݇ܪܵܐ. ܒܸܕܟܼܵܪܵܐ ܗ݇ܘܵܐ ܠܚܲܕ݇ ܓܘܼܢܚܵܐ ܨܵܘܵܢܵܐ. ܬܲܚܡܘܼܢܸܐ ܗ݇ܘܵܐ ܠܟܸܣ ܓܵܢܘܼܗܿ ܕܵܐܟܼܝܼ ܟܸܐ ܗܵܘܝܵܐ ܕܟܠܲܝܗܝ ܐܲܢܸܐ ܩܲܘܲܡܝܵܬܸ̈ܐ ܗܵܘܝܼ ܫܪܵܪܵܐ؟ ܒܲܠܟܸܐ ܕܙܸܐ ܚܲܕ݇ ܚܸܠܡܵܐ ܝܠܸܗ ܡܲܙܕܸܥܵܢܵܐ ܘܗܲܪ ܪܥܸܫܠܵܗܿ ܡܼܢ ܫܸܢܬܵܐ ܒܸܕ ܦܵܪܸܩ.

   ܕܵܐܟܼܝܼ ܗܿܝ ܕܸܫܬܵܐ ܫܲܡܝܼܢܬܵܐ ܕܡܵܬܘܼܗܿ، ܡܠܝܼܬܵܐ ܡܼܢ ܐܝܼܠܵܢܸ̈ܐ ܘܘܲܖ̈ܕܸܐ، ܗ݇ܘܸܐ ܠܵܗܿ ܒܹܝܬ ܩܲܒܼܪܵܐ ܕܐܸܡܸܐ̈ܐ ܕܙܥܘܿܖܸ̈ܐ ܘܓܘܼܖܸ̈ܐ ܕܠܵܐ ܩܲܒܼܪܵܐ ܘܕܠܵܐ ܟܘܼܪܵܟܼܵܐ؟ ܕܵܐܟܼܝܼ ܗܿܝ ܥܲܝܢܵܐ ܕܡܵܬܵܐ ܕܡܝܼܘܼ̈ܗܿ ܨܸܦܝܸ̈ܐ ܘܨܠܘܼܠܸ̈ܐ ܟܸܐ ܕܵܡܝܼ ܗ݇ܘܵܘ ܠܡܝܼܵ̈ܐ ܕܚܲܝܸ̈ܐ ܨܘܼܪܒܝܼܵܐ ܠܗ݇ܘܿܢ ܘܚܒܼܝܼܛܠܗ݇ܘܿܢ ܒܕܸܡܵܐ ܙܲܟܵܝܵܐ ܕܓ̰ܘܲܢܩܸ̈ܐ ܛܠܘܿܠܵܢܸ̈ܐ ܕܡܵܬܵܐ؟ ܕܵܐܟܼܝܼ ܙܵܘܓܵܐ ܛܘܼܒܼܵܢܵܐ ܕܒܢܘܼܢܘܼܗܿ ܦܝܼܫܠܗ݇ܘܿܢ ܩܛܝܼܠܸ̈ܐ ܘܦܘܼܖ̈ܙܝܼܸܐ ܩܲܕ݇ܡ ܥܲܝܢ̈ܘܼܗܿ؟

   ܟܠܸܐ ܠܵܗܿ ܘܥܟ̰ܝܼܡܲܝܗܝ ܠܵܗܿ ܥܲܝܢܘܼܗܿ ܘܡܸܢ݇ܕܪܸܫ݇ ܦܬܝܼܚܲܝܗܝ ܠܵܗܿ ܚܕܵܐ ܓܵܗܵܐ ܐ݇ܚܸܪ݇ܬܵܐ ܩܵܘܡܵܐ ܕܪܵܥܫܵܐ ܗ݇ܘܵܐ ܘܦܵܪܸܩ ܗ݇ܘܵܐ ܐܵܗܵܐ ܛܠܘܼܡܝܵܐ. ܒܐܵܗܵܐ ܥܕܵܢܵܐ ܕܟܼܸܪܵܗܿ ܕܕܵܐܟܼܝܼ ܐܝܼܕܵܐ ܙܥܘܿܪܬܵܐ ܕܒܪܵܬܘܼܗܿ ܚܠܝܼܬܵܐ ܫܠܝܼܓܵܐ ܠܗ݇ܘܿܢ ܡܼܢ ܐܝܼܕܘܼܗܿ ܘܗܿܝ ܒܐܵܢܝ݇ ܥܲܝܢܘܼܗܿ ܫܸܛܖ̈ܵܢܸܐ ܘܚܘܼܒܵܢܸ̈ܐ ܘܒܐܵܢܝ݇ ܨܘܼܨܝܵܬܘܼܗܿ ܐ݇ܟܘܼܡܸ̈ܐ ܘܓܕܝܼܠܸ̈ܐ، ܥܲܡܵܐ ܥܲܡ ܐ݇ܚܸܖ̈݇ܢܸܐ ܒܢܵܬܸ̈ܐ ܕܡܵܬܵܐ ܠܘܼܒܠܵܠܗ݇ܘܿܢ ܘܩܵܠܵܐ ܕܒܸܟܼܝܵܐ ܘܟ̰ܼܲܪܟ̰ܲܪܝܵܬܘܼܗܿ ܗܲܠ ܐܵܕܝܼܵܐ ܦܲܪܬܘܼܠܸܐ ܗ݇ܘܵܐ ܓܵܘ ܢܵܬܝܵܬܘܼܗܿ.

   ܦܲܢܦܘܼܠܸܐ ܦܲܢܦܘܼܠܸܐ ܫܩܸܠܵܗܿ ܚܕܵܐ ܦܵܣܘܿܥܬܵܐ ܠܩܲܕ݇ܡܵܐ ܐܝܼܢܵܐ ܐ݇ܬܸܐ ܠܵܗܿ ܦܲܐܬܵܐ ܕܒܪܘܼܢܘܼܗܿ ܙܥܘܿܪܵܐ ܩܲܕ݇ܡ ܥܲܝܢ̈ܘܼܗܿ. ܗܿܘ ܕܛܘܼܫܝܼܬܘܼܗܝ ܘܡܘܼܥܪܸܩܬܘܼܗܝ ܗ݇ܘܵܐ ܡܼܢ ܐܝܼܕܵܐ ܕܩܵܛܘܿܠܸ̈ܐ ܐܝܼܢܵܐ ܡܝܼܬܠܸܗ ܒܐܘܼܖ̈ܚܵܬܸܐ ܡܼܢ ܡܲܪܥܵܐ ܘܟܸܦܢܵܐ.

   ܡܼܢ ܢܵܓܸܣܬܲܢ ܐܲܩܠܘܼܗܿ ܬܘܼܪܩܸܠܵܗܿ ܒܚܲܕ݇ ܟܸܐܦܵܐ ܓܘܼܪܵܐ ܘܢܦܸܠܵܗܿ ܠܐܲܪܥܵܐ... ܐܝܼܡܲܢ ܕܬܥܸܪܵܗܿ ܠܓܵܢܘܼܗܿ ܠܵܐ ܝܕܸܥܠܵܗܿ ܕܟܡܵܐ ܥܕܵܢܵܐ ܦܝܼܫܬܵܐ ܗ݇ܘܵܐ ܒܐܵܗܵܐ ܐܲܝܟܵܢܵܝܘܼܬܵܐ ܐܝܼܢܵܐ ܢܝܼܚܵܐ ܒܢܝܼܚܵܐ ܬܸܠܦܵܦܘܼܗܿ ܝܲܩܘܼܖܸ̈ܐ ܡܘܼܪܡܲܝܗܝ ܠܵܗܿ ܘܚܙܸܐ ܠܵܗܿ ܠܨܲܠܡܵܐ ܕܡܵܪܬܝ ܡܲܪܝܲܡ ܕܒܪܝܼܟܬܵܐ ܩܲܕ݇ܡ ܙܩܝܼܦܵܐ ܕܒܪܘܼܢܘܼܗܿ ܝܑܼܚܝܼܕܵܝܵܐ ܒܸܟܼܝܵܐ ܘܦܲܪܦܘܼܠܸܐ ܗ݇ܘܵܐ ܘܗܿܝܓܵܗ ܚܙܸܐ ܠܵܗܿ ܠܦܲܐܬܵܐ ܒܲܗܪܵܢܬܵܐ ܘܛܘܼܒܼܵܢܬܵܐ ܕܝܑܼܫܘܿܥ ܡܫܝܼܚܵܐ ܕܐܝܼܕܘܼܗܝ ܦܘܼܫܛܘܼܗܿ ܗ݇ܘܵܐ ܠܓܸܒܘܼܗܿ ܘܒܸܩܪܵܝܘܼܗܿ ܗ݇ܘܵܐ.

   ܗܿܝ ܐ݇ܚܸܪ݇ܢܵܐ ܠܸܐ ܗ݇ܘܵܐ ܒܝܼܕܵܥܵܐ ܕܐܲܝܟܵܐ ܝܠܵܗܿ. ܐܲܚܟ̰ܝܼ ܒܸܪܓܼܵܫܵܐ ܗ݇ܘܵܐ ܕܠܸܐ ܝܠܵܗܿ ܟܦܝܼܢܬܵܐ ܘܨܗܝܼܬܵܐ ܘܫܘܼܪܫܝܼܬܵܐ ܘܦܪܝܼܩܬܵܐ ܗ݇ܘܵܐ ܡܼܢ ܬܲܢܲܚܬܵܐ ܘܓ̰ܘܼܢܓ̰ܵܪܵܐ. ܒܣܸܦܘܵܬܘܼܗܿ ܦܩܝܼܥܸ̈ܐ ܘܒܖ̈ܝܼܙܸܐ ܐ݇ܡܸܪܵܗܿ: ܝܵܐ ܡܵܪܝܼ ܘܐܲܠܵܗܝܼ، ܗܲܝܸܪܝܼ ܘܫܩܘܼܠܵܗܿ ܓܵܢܝܼ ܕܡܲܢܝܸܚܵܢ!