ܡܢܕܪܫ ܢܝܣܢ

ܫܡܝܪܡ ܕ.ܦܘܪܝܐܢ

   ܐܝܼܡܲܢ ܕܕܠܝܼܚܘܼܬܵܐ ܕܟܝܵܢܵܐ ܒܸܥܪܵܩܵܐ ܝܠܵܗܿ ܡܼܢ ܩܲܕ݇ܡ ܫܲܦܝܘܼܬܵܐ (ܨܸܦܝܘܼܬܵܐ) ܕܓܵܘܢܸ̈ܐ ܫܲܦܝܼܖܸ̈ܐ، ܐܝܼܡܲܢ ܕܩܵܠܵܐ ܕܙܡܵܪܵܐ ܕܦܲܖ̈ܲܚܝܵܬܸܐ ܒܸܓܼܠܵܒܵܐ ܝܠܸܗ ܠܫܸܬܩܵܐ ܡܲܡܪܸܝܵܢܵܐ ܕܐܵܐܲܪ، ܐܝܼܡܲܢ ܕܩܲܪܬܵܐ ܒܸܥܪܵܩܵܐ ܝܠܵܗܿ ܡܼܢ ܩܲܕ݇ܡ ܓܸܙܡܵܐ ܕܫܚܘܼܢܬܵܐ ܘܐܝܼܡܲܢ ܕܐܲܪܥܵܐ ܬܘܝܼܢܬܵܐ ܒܸܬܥܵܪܵܐ ܝܠܵܗܿ ܠܓܵܢܘܼܗܿ ܘܢܫܵܡܵܐ ܝܠܵܗܿ ܡܼܢ ܥܘܼܡܩܵܐ ܕܨܲܕܪܘܼܗܿ ܡܘܼܓܕܸܠܵܐ، ܗܵܝܓܵܗ ܚܲܝܘܼܬܵܐ ܒܸܕܝܵܪܵܐ ܝܠܵܗܿ ܠܒܪܝܼܬܵܐ. ܗܿܘ ܝܵܘܡܵܐ ܝܵܘܡܵܐ ܕܩܝܵܡܬܵܐ ܝܠܸܗ ܕܟܠ ܚܲܕ݇ ܐܝܼܬܝܵܐ ܥܲܢܝܼܕܵܐ ܡܼܢ ܓܵܘ ܩܲܒܼܪܸܗ ܘܕܝܵܪܬܸܗ ܠܚܲܝܘܼܬܵܐ. ܗܿܘ ܝܵܘܡܵܐ ܝܵܘܡܵܐ ܕܫܪܵܝܬܵܐ ܕܢܝܼܣܵܢ ܝܠܸܗ ܥܲܠ ܦܲܐܬܵܐ ܕܐܲܪܥܵܐ.

   ܒܹܝܬ ܢܝܼܣܵܢܸ̈ܐ ܝܵܘܡ ܢܘܼܚܵܡܵܐ ܕܟܝܵܢܵܐ ܝܠܸܗ ܘܗܲܪ ܒܗܿܝ ܥܕܵܢܵܐ ܙܲܒܼܢܵܐ ܕܫܘܵܚܵܐ (ܡܲܓ̰ܝܵܢܬܵܐ)  ܕܣܲܒܼܪܵܐ ܝܠܸܗ ܒܠܸܒܵܐ ܕܟܠ ܚܲܕ݇ ܒܲܪܢܵܫܵܐ. ܒܫܘܼܪܵܝܵܐ ܕܒܹܝܬ ܢܝܼܣܵܢܸ̈ܐ ܡܙܲܝܘܼܚܸܐ ܝܘܲܚ ܠܚܲܝܘܼܬܵܐ ܚܲܕ݇ܬܬܵܐ ܘܢܸܣܟܼܵܢܵܐ ܕܒܲܗܪܵܐ ܥܲܠ ܚܸܫܟܵܐ. ܘܐܲܝܟܼ ܗܲܝܡܵܢܘܼܬܵܐ ܕܒܢܲܝ̈ ܐܘܼܡܬܲܢ ܡܫܝܼܚܵܝܸ̈ܐ ܒܹܝܬ ܢܝܼܣܵܢܸ̈ܐ ܐܵܦ ܝܠܸܗ ܙܲܒܼܢܵܐ ܕܩܝܵܡܬܵܐ ܕܡܵܪܲܢ ܝܼܫܘܿܥ ܡܼܢ ܓܵܘ ܡܝܼܬܸ̈ܐ ܕܡܙܲܝܘܼܚܘܼܗܝ ܝܘܲܚ ܐܲܝܟܼ ܥܸܐܕܵܐ ܕܩܝܵܡܬܵܐ ܝܲܢ ܥܸܐܕܵܐ ܓܘܼܪܵܐ.

   ܐܝܼܢܵܐ ܒܐܵܗܵܐ ܐܲܩܡܵܐ ܫܲܦܝܼܪܵܐ ܘܚܸܕܝܵܐ ܐܵܦ ܒܸܕܟܼܵܪܵܐ ܝܘܲܚ ܠܣܵܗܕܲܢ ܡܙܲܟܝܸ̈ܐ (ܕܠܵܐ ܟ̰ܘܼ ܚܛܝܼܬܵܐ) ܒܲܩܛܲܠܥܲܡܵܐ ܕܣܲܝܦ̰ܘܿ، ܗܿܘ ܕ750،000 ܐܵܬܘܼܖ̈ܵܝܸܐ ܦܝܼܫܠܗ݇ܘܿܢ ܩܛܝܼܠܸ̈ܐ ܒܝܼܸܗ ܒܝܲܕ ܚܲܝܠܵܘܵܬܸ̈ܐ ܛܵܠܘܿܡܸ̈ܐ ܕܫܘܼܠܛܵܢܵܐ ܥܘܼܬܼܡܵܢܵܝܵܐ. ܐܵܦܸܢ ܕܗܲܠ ܐܵܗܵܐ ܙܲܒܼܢܵܐ ܫܘܼܠܛܵܢܸ̈ܐ ܡܫܲܚܠܦܸ̈ܐ ܕܐܲܬܪܵܐ ܕܬܘܼܪܟܝܼܵܐ ܠܸܐ ܝܢܵܐ ܩܘܼܒܠܘܼܗܿ ܡܸܫܬܲܐܠܵܢܘܼܬܲܝܗܝ ܒܐܵܗܵܐ ܓܘܼܢܚܵܐ ܐܝܼܢܵܐ ܐܸܕܝܘܿܡ ܒܘܼܫܵܝܘܼܬܵܐ ܕܥܵܡܖ̈ܵܢܸܐ ܕܒܪܝܼܬܵܐ ܪܥܝܼܫܸ̈ܐ ܝܢܵܐ ܒܘܼܬ ܐܵܗܵܐ ܩܛܲܠܥܲܡܵܐ ܨܵܘܵܢܵܐ ܘܗܸܫ ܠܸܐ ܝܠܸܗ ܩܛܝܼܥܵܐ ܘܠܸܐ ܩܵܛܥܸܐ ܩܵܠܵܐ ܕܐܵܢܝ݇ ܐܸܡܘܵܬܸ̈ܐ ܕܐܲܒܼܵܗܵܬܲܝܗܝ ܦܝܼܫܠܗ݇ܘܿܢ ܦܘܼܢܝܸ̈ܐ ܒܐܝܼܕܵܐ ܕܫܘܼܠܛܵܢܵܐ ܥܘܼܬܼܡܵܢܵܝܵܐ ܒܡܸܬܚܵܐ ܕܩܪܵܒܼܵܐ ܬܹܒܼܝܼܠܵܝܵܐ ܩܲܕ݇ܡܵܝܵܐ.

   ܘܗܵܕܟܼܵܐ ܐܲܩܡܵܐ ܫܲܦܝܼܪܵܐ ܕܒܹܝܬ ܢܝܼܣܵܢܸ̈ܐ ܩܵܬܲܢ ܐܵܬܘܼܖ̈ܵܝܸܐ ܐܲܩܡܵܐ ܕܚܲܕܘܼܬܵܐ ܐܵܦ ܚܲܫܵܐ ܝܠܸܗ. ܐܲܩܡܵܐ ܕܡܵܘܬܵܐ ܘܚܲܝܸ̈ܐ ܝܠܸܗ ܘܐܲܩܡܵܐ ܕܗܸܒܼܝܼ ܘܦܣܝܼܩܘܼܬ ܣܲܒܼܪܵܐ. ܒܲܪܘܼܟܼܸܐ ܝܘܲܚ ܠܥܸܐܕܵܐ ܕܢܝܼܣܵܢ ܥܲܡ ܫܸܢ݇ܬܵܐ ܚܲܕ݇ܬܬܵܐ 6766 ܘܠܥܸܐܕܵܐ ܕܩܝܵܡܬܵܐ ܕܡܵܪܲܢ ܝܼܫܘܿܥ ܡܫܝܼܚܵܐ ܘܗܲܪ ܒܗܿܝ ܥܕܵܢܵܐ ܡܲܩܪܘܼܒܼܸܐ ܝܘܲܚ ܠܒܘܼܝܵܐܐܲܢ (ܒܲܣܲܡܬܵܐ ܕܪܸܫܲܢ) ܠܩܘܼܕܡܵܐ ܕܒܢܲܝ̈ ܐܘܼܡܬܲܢ ܚܲܒܝܼܒܼܸ̈ܐ ܒܘܼܬ ܡܵܘܬܵܐ ܕܟܠܲܝܗܝ ܣܵܗܕ̈ܲܢ ܕܝܼܠܵܢܵܐܝܼܬ ܣܵܗܕܸ̈ܐ ܕܩܛܲܠܥܲܡܵܐ ܕܣܲܝܦ̰ܘܿ، ܗܿܘ ܕܠܸܐ ܝܠܸܗ ܦܪܝܼܩܵܐ ܘܐܝܼܬ ܠܸܗ ܟܘܼܬܵܪܵܐ ܗܲܠ ܐܸܕܝܘܿܡ. ܘܒܸܛܠܵܒܵܐ ܝܘܲܚ ܚܘܼܠܡܵܢܵܐ ܘܚܲܬܝܼܬܘܼܬܵܐ ܩܵܐ ܟܠܲܝܗܝ ܒܢܲܝ̈ ܥܲܡܲܢ ܐܵܦ ܡܲܢܬܵܝܬܵܐ ܘܫܘܼܘܫܵܛܵܐ ܩܵܐ ܐܘܼܡܬܲܢ ܡܘܼܚܸܒܬܵܐ.