ܒܪܙܪܥܐ ܚܪܫܢܐ ܕܚܪܕܠܐ

ܦܘܫܩܐ: ܫܡܝܪܡ ܕ.ܦܘܪܝܐܢ

   ܚܕܵܐ  ܬܘܼܢܝܼܬܵܐ ܥܲܬܝܼܩܬܵܐ ܕܨܝܼܢܵܝܸ̈ܐ (ܟ̰ܝܼܢܵܝܸܐ) ܗܲܩܘܼܝܸܐ ܝܠܵܗܿ ܒܘܼܬ ܚܕܵܐ ܒܲܟܼܬܵܐ ܕܫܘܼܢܸܐܠܸܗ ܒܪܘܼܢܘܼܗܿ ܝܲܟܵܢܵܐ ܡܼܢ ܚܲܝܘܼܬܵܐ ܘܗܿܝ ܟܲܕ ܛܡܝܼܪܬܵܐ ܒܚܲܫܘܼܗܿ ܐ݇ܙܸܠܵܗܿ ܠܟܸܣ ܚܲܕ݇ ܐ݇ܢܵܫܵܐ ܙܲܕܝܼܩܵܐ ܘܒܘܼܩܸܪܵܗܿ ܡܸܢܸܗ: ـ ܡܘܼܕ ܛܸܠܝܼܣܡܵܐ ܐܝܼܬܠܘܼܟܼ ܩܵܐ ܕܝܵܪܬܵܐ ܕܒܪܘܿܢܝܼ ܠܚܲܝܘܼܬܵܐ؟ ܘܗܿܘ ܙܲܕܝܼܩܵܐ ܡܼܢ ܓܸܒܵܐ ܕܡܲܕܥܲܪܬܘܼܗܿ ܡܼܢ ܩܲܕ݇ܡ ܬܲܪܥܵܐ ܕܒܲܝܬܸܗ ܝܲܢ ܕܪܵܫܬܵܐ ܥܲܡܘܼܗܿ ܐ݇ܡܸܪܸܗ ܐܸܠܘܼܗܿ: ـ ܡܲܝܬ݇ܝܼ ܠܝܼ ܚܲܕ݇ ܒܲܪ ܙܲܪܥܵܐ ܚܲܪܫܵܢܵܐ ܕܚܲܪܕܵܠܵܐ ܡܼܢ ܚܲܕ݇ ܒܲܝܬܵܐ ܕܟ̰ܘܼ ܥܕܵܢܵܐ ܠܵܐ ܗܵܘܸܐ ܚܸܙܝܵܐ ܚܲܫܵܐ. ܐܵܢܵܐ ܒܸܕ ܡܲܦܠܸܚܸܢܸܗ ܗܿܘ ܒܲܪܙܲܪܥܵܐ ܩܵܐ ܡܲܪܚܲܩܬܵܐ ܕܚܲܫܵܐ ܡܼܢ ܚܲܝܘܼܬܵܟܼܝ. ܘܒܲܟܼܬܵܐ ܡܸܚܕܵܐ ܦܠܸܛܠܵܗܿ ܠܛܲܥܘܼܝܸܐ ܒܵܬ݇ܪ ܒܲܪܙܲܪܥܵܐ ܚܲܪܫܵܢܵܐ ܕܚܲܪܕܵܠܵܐ.

   ܩܲܕܡܵܝܬܵܐ ܗܿܝ ܐ݇ܙܸܠܵܗܿ  ܠܚܲܕ݇ ܒܲܝܬܵܐ ܫܲܦܝܼܪܵܐ ܘܓܲܐܝܵܐ (ܫܝܼܟ)، ܬܘܼܩܬܸܩܠܵܗܿ ܠܬܲܪܥܵܐ ܘܐ݇ܡܸܪܵܗܿ: ـ ܐܵܢܵܐ ܛܲܥܘܼܝܸܐ ܝܘܵܢ ܒܵܬ݇ܪ ܚܲܕ݇ ܒܲܝܬܵܐ ܕܟ̰ܘܼ ܥܕܵܢܵܐ ܠܵܐ ܗܵܘܸܐ ܚܸܙܝܵܐ ܚܲܫܵܐ. ܐܵܪܵܐ ܐܵܗܵܐ ܗܲܪ ܗܿܘ ܒܲܝܬܵܐ ܝܠܸܗ؟ ܐܵܗܵܐ ܟ̰ܸܡ ܐܵܢܲܢܩܵܝܬܵܐ ܝܠܵܗܿ ܩܵܬܝܼ. ܐܵܢܝܼ ܓ̰ܘܼܘܸܒܠܗ݇ܘܿܢ: ـ ܕܠܵܐ ܫܸܟ ܐܲܢ݇ܬܝ ܒܸܚܠܵܛܵܐ ܝܘܲܬܝ. ܘܫܘܼܪܸܐܠܗ݇ܘܿܢ ܠܗܲܩܘܼܝܸܐ ܠܟܠܲܝܗܝ ܩܲܘܲܡܝܵܬܸ̈ܐ ܚܲܫܵܢܸ̈ܐ ܕܩܘܼܘܸܡܸܐ ܗ݇ܘܵܘ ܩܵܬܲܝܗܝ ܒܥܕܵܢܵܬܸ̈ܐ ܚܲܖ̈ܵܝܸܐ. ܒܲܟܼܬܵܐ ܬܘܼܚܡܸܢܵܗܿ ܠܟܸܣ ܓܵܢܘܼܗܿ: ـ ܡܵܢܝܼ ܡܵܨܸܐ ܗܲܝܸܪܗ݇ܘܿܢ ܐܲܢܸܐ ܡܸܣܟܸܢܸ̈ܐ ܒܸܫ ܨܦܵܝܝܼ ܡܸܢܝܼ ܕܐܝܼܬܠܝܼ ܚܲܫܵܐ ܕܓܵܢܝܼ؟

   ܗܿܝ ܦܝܼܫܠܵܗܿ ܬܵܡܵܐ ܕܝܵܗܒܼܵܠܗ݇ܘܿܢ ܠܸܒܵܐ. ܗܿܝܓܵܗܵܐ ܐ݇ܙܸܠܵܗܿ ܠܛܲܥܘܼܝܸܐ ܒܵܬ݇ܪ ܗܿܘ ܒܲܝܬܵܐ ܕܠܵܐ ܗܵܘܸܐ ܚܸܙܝܵܐ ܚܲܫܵܐ ܒܓܵܢܸܗ. ܐܝܼܢܵܐ ܐܲܝܟܵܐ ܕܛܘܼܥܸܐܠܵܗܿ، ܒܦܘܼܬܩܸ̈ܐ (ܗܘܿܬܹܝܠܸ̈ܐ) ܝܲܢ ܒܕܘܼܟܵܢܸ̈ܐ ܐ݇ܚܸܖ̈݇ܢܸܐ؛ ܟܠ ܥܕܵܢܵܐ ܡܘܼܫ݇ܟ̰ܸܚܠܵܗܿ ܗܲܩܝܵܬܸ̈ܐ ܕܚܲܫܵܐ ܘܟܡܝܼܪܘܼܬܵܐ.

   ܗܵܕܟܼܵܐ ܗܿܝ ܒܲܟܼܬܵܐ ܒܠܝܼܓܠܵܗܿ ܒܗܲܝܲܪܬܵܐ ܕܐ݇ܚܸܖ̈݇ܢܸܐ ܘܬܦܵܩܬܵܐ ܒܚܲܫܲܝܗܝ ܗܲܠ ܕܚܲܫܘܼܗܿ ܫܒܼܸܩܠܵܗܿ ܘܦܪܸܩܠܵܗܿ. ܒܵܬ݇ܪ ܚܲܕ݇ ܡܸܬܚܵܐ ܗܿܝ ܪܓܼܸܫܠܵܗܿ ܕܫܘܼܐܵܠܵܐ ܕܗܿܘ ܐ݇ܢܵܫܵܐ ܙܲܕܝܼܩܵܐ ܩܵܐ ܡܲܫ݇ܟ̰ܲܚܬܵܐ ܕܒܲܪܙܲܪܥܵܐ ܕܚܲܪܕܵܠܵܐ ܚܲܕ݇ ܛܸܠܝܼܣܡܵܐ ܗ݇ܘܵܐ ܩܵܐ ܡܲܪܚܲܩܬܵܐ ܕܚܲܫܘܼܗܿ ܘܦܲܪܲܩܬܘܼܗܿ ܡܼܢ ܟܡܝܼܪܘܼܬܵܐ. 

ܡܒܘܥܐ:          

Thoughtful and inspirational stories/ Roger Darlington’s world