ܓ̰ܡܥܢ̈ܐܕܩܖ̈ܫܐ

ܕܟܬܪ ܡܕܠܝܢ ܕܝܒܼܝܣ

   ܐܲܝܟܼ ܕܟܸܐ ܬܵܢܝܼ، ܒܪܲܡܫܵܐ ܓ̰ܲܡܥܵܢܸ̈ܐ ܕܩܲܖ̈ܫܸܐ ܪܵܒܵܐ ܟܸܐ ܗܵܘܝܼ. ܐܝܼܢܵܐ ܒܲܙܪܵܩܵܐ ܕܫܸܡܫܵܐ ܚܲܕ݇ܟ̰ܵܐ ܓܵܢܵܬܸ̈ܐ ܟܸܐ ܗܵܘܝܼ ܗܲܝܸܖ̈ܵܢܸܐ ܕܫܵܒܼܩܝܼ ܠܸܫܘܝܼܬܲܝܗܝ ܪܲܟܝܼܟܼܬܵܐ ܘܫܲܚܝܼܢܬܵܐ ܘܦܵܠܛܝܼ ܘܐܵܙܠ݇ܝܼ ܠܥܵܒܼܵܐ ܠܓ̰ܲܡܥܘܼܝܸܐ ܩܲܖ̈ܫܸܐ ܩܵܐ ܬܲܢܘܼܪܵܐ.

   ܒܥܵܒܼܘܿܕܘܼܬܵܐ ܐܘܼܡܬܵܢܵܝܬܵܐ ܙܸܐ ܗܲܪ ܗܵܕܟܼܵܐ ܝܠܵܗܿ. ܪܵܒܵܐ ܓܵܢܵܬܸ̈ܐ ܟܸܐ ܩܲܘܸܠܝܼ ܕܒܸܕ ܗܲܝܸܪܝܼ ܘܒܸܕ ܡܲܟܡܸܠܝܼ ܠܦܸܠܵܢ ܣܲܗܡܵܐ ܡܼܢ ܦܘܼܠܚܵܢܵܐ. ܐܝܼܢܵܐ ܒܥܕܵܢܵܐ ܕܦܘܼܠܚܵܢܵܐ ܠܸܐ ܡܲܒܝܸܢܝܼ ܘܠܸܐ ܡܲܚܙܝܼ ܠܓܵܢܲܝܗܝ. ܗܲܡܙܲܡܬܵܐ ܪܵܒܵܐ ܦܫܝܼܩܬܵܐ ܝܠܵܗܿ ܐܝܼܢܵܐ ܦܘܼܠܚܵܢܵܐ ܥܲܣܩܵܐ ܝܠܸܗ. ܗܵܕܟܼܵܐ ܓܵܢܵܬܸ̈ܐ ܠܸܐ ܝܢܵܐ ܦܲܪܡܘܼܝܸܐ ܕܟܡܵܐ ܙܝܵܢܵܐ ܡܚܵܝܵܐ ܝܢܵܐ ܥܲܠ ܥܵܒܼܘܿܕܸ̈ܐ ܒܩܵܘܠܸ̈ܐ ܣܦܝܼܩܸ̈ܐ. ܥܵܒܼܘܿܕܸ̈ܐ ܦܝܵܫܵܐ ܝܢܵܐ ܡܘܼܠܝܸܨܸ̈ܐ ܒܕܲܩܝܼܩܵܐ ܚܲܪܵܝܵܐ ܒܗܿܝ ܕܓ̰ܲܡܥܵܢܸ̈ܐ ܕܩܲܖ̈ܫܸܐ ܠܸܐ ܡܲܕܥܝܼ ܡܼܢ ܩܲܕ݇ܡ ܥܕܵܢܵܐ ܕܠܸܐ ܒܵܥܝܼ ܕܬܲܡܸܡܝܼ ܠܩܵܘܠܲܝܗܝ.

   ܐܝܼܬ ܐܵܢܝܼ ܕܪܵܒܵܐ ܨܦܵܝܝܼ ܟܸܐ ܝܵܕܥܝܼ ܘܦܲܪܡܝܼ ܕܡܲܚܦܲܠܬܲܝܗܝ ܥܲܓ̰ܸܙܵܢܬܵܐ ܘܡܲܚܪܸܒܼܵܢܬܵܐ ܝܠܵܗܿ. ܐܵܢܝܼ ܢܝܼܫܲܝܗܝ ܡܲܚܪܲܒܼܬܵܐ ܘܕܪܵܝܬܵܐ ܕܒܘܼܠܒܵܠܵܐ ܝܠܸܗ. ܓܵܢܲܝܗܝ ܠܸܐ ܡܵܨܝܼ ܦܵܠܚܝܼ ܘܬܲܡܸܡܝܼ ܠܚܕܵܐ ܥܵܒܼܘܿܕܘܼܬܵܐ ܡܵܪܵܐ ܝܘܼܬܪܵܢܵܐ ܘܗܲܪ ܒܗܿܝ ܥܕܵܢܵܐ ܠܸܐ ܒܵܥܝܼ ܕܟ̰ܘܼ ܐ݇ܢܵܫܵܐ ܐ݇ܚܸܪ݇ܢܵܐ ܙܸܐ ܡܲܢܬܸܐ ܘܬܲܡܸܡ ܠܚܲܕ݇ ܦܘܼܠܚܵܢܵܐ. ܘܐܝܼܬ ܐܵܦ ܐܵܢܝܼ ܕܦܫܵܡܵܐ ܝܘܵܢ ܕܬܲܢܝܵܢ ܕܩܵܐ ܢܘܼܟܼܖ̈ܵܝܸܐ ܘܒܥܸܠܕܒܼܵܒܼܲܢ ܦܠܵܚܵܐ ܝܢܵܐ ܘܢܝܼܫܲܝܗܝ ܡܼܢ ܙܲܘܲܓܬܵܐ ܥܲܡ ܫܵܘܬܵܦܘܼܬܲܢ ܡܲܚܪܲܒܼܬܵܐ ܘܡܚܵܝܬܵܐ ܕܙܝܵܢܵܐ ܝܠܸܗ.

   ܚܲܕ݇ܟܡܵܐ ܡܼܢ ܓ̰ܲܡܥܵܢܸ̈ܐ ܕܩܲܖ̈ܫܸܐ ܟܸܐ ܫܲܪܸܟܝܼ ܒܫܘܼܪܵܝܵܐ ܕܚܕܵܐ ܥܵܒܼܘܿܕܘܼܬܵܐ ܐܝܼܢܵܐ ܒܣܘܼܪܗܵܒܼܵܐ (ܓ̰ܲܠܕܸܐ) ܠܸܒܲܝܗܝ ܟܸܐ ܩܵܐܸܫ ܐܝܼܡܲܢ ܕܚܵܙܝܼ ܕܒܫܘܼܪܵܝܵܐ ܦܠܵܛܵܐ ܕܥܵܒܼܘܿܕܘܼܬܵܐ ܡܚܝܼܠܵܐ ܝܠܸܗ. ܐܵܢܝܼ ܟܸܐ ܒܵܥܝܼ ܕܗܵܐ ܡܼܢ ܦܣܵܥܬܵܐ ܩܲܕ݇ܡܵܝܬܵܐ ܟܠ ܡܸܢܕܝܼ ܗܵܘܸܐ ܥܸܠܵܝܵܐ ܘܪܸܫܵܝܵܐ. ܠܸܐ ܒܵܥܝܼ ܕܫܸܡܲܝܗܝ ܡܲܒܝܸܢ ܥܲܡ ܚܕܵܐ ܥܵܒܼܘܿܕܘܼܬܵܐ ܙܥܘܿܪܬܵܐ. ܐܝܼܢܵܐ ܦܫܝܼܛܬܵܐ ܝܠܵܗܿ ܕܓܵܘ ܐܵܗܵܐ ܕܘܼܢܝܸܐ ܘܟܝܵܢܵܐܝܼܬ ܐܝܼܬ ܣܢܝܼܩܘܼܬܵܐ ܥܲܠ ܪܵܒܵܐ ܥܕܵܢܵܐ ܘܪܵܒܵܐ ܟ̰ܲܠܲܫܬܵܐ ܩܵܐ ܬܲܡܲܡܬܵܐ ܕܟܠ ܫܘܼܓܼ݇ܠܵܐ ܘܩܵܐ ܒܲܓ̰ܲܪܬܵܐ ܕܟܠ ܡܸܢܕܝܼ.

   ܚܲܕ݇ ܝܲܠܘܼܕܵܐ ܐܝܼܡܲܢ ܕܒܪܵܝܵܐ ܝܠܸܗ ܡܼܢ ܝܸܡܸܗ ܡܚܝܼܠܵܐ ܘܙܥܘܿܪܵܐ ܝܠܸܗ ܘܠܲܝܬ ܠܸܗ ܟ̰ܘܼ ܝܘܼܠܦܵܢܵܐ ܘܒܲܫܲܪܬܵܐ ܘܐܲܚܟ̰ܝܼ ܡܼܢ ܒܵܬ݇ܪ ܥܸܣܖ̈ܝܼܢ ܝܲܢ ܬܠܵܬܝܼܢ ܫܸܢܸ̈ܐ ܩܲܒܲܠܬܵܐ ܕܝܘܼܠܦܵܢܵܐ ܡܼܢ ܐܲܒܼܵܗܸܗ، ܡܼܢ ܖ̈ܵܒܝܼܸܗ ܘܡܲܠܦܵܢܸܗ، ܡܼܢ ܚܸܙܡܵܢܸܗ ܘܖ̈ܵܚܡܸܗ ܟܡܵܠܵܐ ܝܠܸܗ ܒܦܲܓܼܪܵܐ ܘܒܪܘܼܚܵܐ. ܒܲܣ ܕܵܐܟܼܝܼ ܓ̰ܲܡܥܵܢܸ̈ܐ ܕܩܲܖ̈ܫܸܐ ܟܸܐ ܡܵܨܝܼ ܬܲܚܡܸܢܝܼ ܘܣܵܒܪܝܼ ܕܦܠܵܛܵܐ ܕܚܲܕ݇ ܥܵܒܼܘܿܕܘܼܬܵܐ ܒܸܕ ܗܵܘܝܵܐ ܒܚܲܕ݇ ܕܲܪܓܼܵܐ ܥܸܠܵܝܵܐ ܗܵܐ ܡܼܢ ܝܵܘܡܵܐ ܩܲܕ݇ܡܵܝܵܐ؟

   ܡܼܢ ܗܿܘ ܓܸܒܵܐ ܐ݇ܚܸܪ݇ܢܵܐ ܐܲܚܢܲܢ ܐܵܬܘܼܖ̈ܵܝܸܐ ܡܚܝܼܠܸ̈ܐ ܘܡܸܣܟܸܢܸ̈ܐ ܝܘܲܚ ܘܠܲܝܬ ܠܲܢ ܗܿܘ ܙܘܼܙܵܐ ܕܡܵܨܝܼ ܕܡܲܟܡܸܠܝܼ ܠܗ݇ܘܿܢ ܥܵܒܼܘܿܕܘܵܬܲܢ ܒܚܲܕ݇ ܕܲܪܓܼܵܐ ܛܝܼܡܵܢܵܐ. ܚܲܕ݇ܟܡܵܐ ܓ̰ܲܡܥܵܢܸ̈ܐ ܕܩܲܖ̈ܫܸܐ ܟܸܐ ܡܲܕܒܼܸܩܝܼ ܠܲܢ ܥܲܡ ܢܘܼܟܼܖ̈ܵܝܸܐ ܡܵܖܸ̈ܐ ܙܘܼܙܸ̈ܐ ܘܟܸܐ ܒܵܥܝܼ ܘܣܵܒܖ̈ܝܼ ܕܐܵܦ ܐܲܚܢܲܢ ܒܲܫܪܲܚ ܕܟܠ ܥܵܒܼܘܿܕܘܼܬܲܢ ܗܵܘܝܵܐ ܒܕܲܪܓܼܵܐ ܥܸܠܵܝܵܐ ܘܛܝܼܡܵܢܵܐ. ܐܝܼܢܵܐ ܐܲܚܢܲܢ ܠܸܐ ܡܵܨܲܚ ܕܫܵܠܲܚ ܡܼܢ ܦܘܼܠܚܵܢܵܐ ܐܘܼܡܬܵܢܵܝܵܐ ܘܥܵܒܼܘܿܕܘܼܬܵܐ ܐܘܼܡܬܵܢܵܝܬܵܐ ܘܣܵܦܪܵܝܬܵܐ ܒܗܿܝ ܕܡܸܣܟܸܢܸ̈ܐ ܘܡܚܝܼܠܸ̈ܐ ܝܘܲܚ.