ܥܪܩܐ ܡܢܪܘܣܝܐ

ܒܪܙܝܠܐ ܩܫܐ

   ܢܵܢܘܿܢܬܝܼ "ܬܵܟܘܼܗܝܼ" ܒܪܝܼܬܵܐ ܗ݇ܘܵܐ ܒܫܸܢ݇ܬܵܐ 1897  ܓܵܘ ܡܵܬܵܐ  ܕܗܲܦ̰ܬܘܼܘܵܢ ܠܚܲܕܸܖ̈ܘܵܢܸܐ ܕܡܕܝܼܢ݇ܬܵܐ ܕܣܵܠܵܡܵܣ ܒܐܲܬܪܵܐ ܕܐܝܼܪܵܢ. ܒܘܼܫܵܝܘܼܬܵܐ ܕܥܲܡܖ̈ܵܢܸܐ ܕܡܵܬܵܐ ܐܲܖܸ̈ܡܢܵܝܸܐ ܗ݇ܘܵܘ. ܢܵܢܘܼܢܬܝܼ ܬܵܡܵܐ ܓܲܪܘܘܼܣܸܐ ܝܠܵܗܿ ܓܵܘ ܫܠܵܡܵܐ ܘܫܸܠܝܘܼܬܵܐ ܗܲܠ ܕܡܛܵܝܵܐ ܝܠܵܗܿ ܠܫܒܼܲܥܣܲܪ ܫܸܢܸ̈ܐ. ܒܗܿܘ ܙܲܒܼܢܵܐ ܬܘܼܖ̈ܟܵܝܸܐ ܥܘܼܬܼܡܵܢܠܘܼ ܫܘܼܪܸܐܠܗ݇ܘܿܢ ܠܸܕܝܵܫܵܐ (ܠܸܢܫܵܪܵܐ) ܠܡܵܬܘܵܬܸ̈ܐ ܕܡܫܝܼܚܵܝܸ̈ܐ ܘܒܸܣܠܵܒܵܐ ܠܡܸܢܕܝܲܝܗܝ ܘܠܥܘܼܬܪܲܝܗܝ ܘܒܸܩܛܵܠܵܐ ܡܼܢ ܙܥܘܿܪܵܐ ܗܲܠ ܓܘܼܪܵܐ        

   ܐܝܼܡܲܢ ܕܢܫܸܖ̈ܗ݇ܘܿܢ ܠܡܵܬܘܵܬܸ̈ܐ ܕܣܵܠܵܡܵܣ، ܐܵܒܼܵܗܸ̈ܐ ܕܢܵܢܘܼܢܬܝܼ ܟܲܕ ܡܸܠܝܸ̈ܐ ܗ݇ܘܵܘ ܡܼܢ ܙܕܘܿܥܬܵܐ ܛܘܼܫܝܵܐܠܗ݇ܘܿܢ ܓܵܢܲܝܗܝ ܓܵܘ ܒܲܝܬܵܐ ܕܚܲܕ݇ ܡܼܢ ܫܒܼܵܒܼܲܝܗ̈ܝ ܡܘܼܫܸܠܡܵܢܸ̈ܐ. ܐܝܼܢܵܐ ܠܵܐ ܡܨܸܐܠܗ݇ܘܿܢ ܕܦܵܝܫܝܼ ܗ݇ܘܵܘ ܩܵܐ ܚܲܕ݇ ܡܸܬܚܵܐ ܝܲܪܝܼܟܼܵܐ ܬܵܡܵܐ ܒܗܿܝ ܕܬܘܼܖ̈ܟܵܝܸܐ ܡܘܼܚܒܸܖܸ̈ܐ ܗ݇ܘܵܘ ܕܟܠ ܚܲܕ݇ ܡܘܼܫܸܠܡܵܢܵܐ ܕܛܵܫܸܐ ܠܡܫܝܼܚܵܝܸ̈ܐ ܒܸܕ ܦܵܐܸܫ ܬܘܼܥܠܸܡܵܐ. ܐܵܒܼܵܗܸ̈ܐ ܕܢܵܢܝܼ ܥܸܨܝܸ̈ܐ ܦܝܼܫܠܗ݇ܘܿܢ ܕܡܐܲܝܟܼ ܒܘܼܫܵܝܘܼܬܵܐ ܕܐܵܬܘܼܖ̈ܵܝܸܐ ܥܵܪܩܝܼ ܡܼܢ ܡܵܬܲܝܗܝ ܘܐܵܙܠ݇ܝܼ ܠܐܲܬܪܵܐ ܕܪܘܼܣܝܼܵܐ ܕܦܬܝܼܚܲܝܗܝ ܗ݇ܘܵܐ ܬܲܖ̈ܥܵܢܘܼܗܝ ܩܵܐ ܡܫܝܼܚܵܝܸ̈ܐ

   ܒܐܘܼܪܚܵܐ ܕܥܪܵܩܵܐ ܬܦܸܩܠܗ݇ܘܿܢ ܒܪܵܒܵܐ ܥܲܣܩܘܵܬܸ̈ܐ ܡܐܲܝܟܼ ܟܸܦܢܵܐ، ܨܲܗܘܵܐ ܘܟܸܟ̰ܚܵܐ (ܫܲܪܫܵܝܬܵܐ). ܢܵܢܘܿܢܬܝܼ ܟܸܐ ܗܲܩܝܵܐ ܗ݇ܘܵܐ ܒܘܼܬ ܚܵܠܘܼܘܘܼܗܿ ܩܲܕ ܒܥܕܵܢܵܐ ܕܥܪܵܩܵܐ ܡܘܼܬܒܼܘܼܗܿ ܗ݇ܘܵܐ ܒܪܵܬܘܼܗܝ ܙܥܘܿܪܬܵܐ ܥܲܠ ܚܵܨܘܼܗܝ ܘܒܹܝܬ ܦܲܠܓܵܐ ܕܐܘܼܪܚܵܐ ܚܸܙܝܵܐ ܗ݇ܘܵܐ ܕܡܝܼܬܬܵܐ ܝܠܵܗܿ ܐܝܼܢܵܐ ܠܸܐ ܗ݇ܘܵܐ ܡܘܼܬܒܼܘܼܗܿ ܠܐܲܪܥܵܐ ܘܟܡܵܐ ܕܐ݇ܡܝܼܪܘܼܗܝ ܗ݇ܘܵܐ ܕܡܲܨܠܸܐܠܵܗܿ ܩܲܕ ܣܲܦܝܼ ܠܵܗܿ ܒܪܵܬܵܐ ܠܗܲܩܘܼܬܘܼܗܿ، ܠܸܐ ܗ݇ܘܵܐ ܡܘܼܫܡܸܥܝܵܐ ܠܟ̰ܘܼ ܚܲܕ݇ ܘܗܵܕܟܼܵܐ ܗܲܠ ܪܘܼܣܝܼܵܐ ܠܘܼܒܠܘܼܗܿ ܗ݇ܘܵܐ ܥܲܠ ܚܵܨܘܼܗܝ.  

  ܒܵܬ݇ܪ ܕܡܛܸܐܠܗ݇ܘܿܢ ܠܪܘܼܣܝܼܵܐ، ܟܡܵܐ ܫܸܢܸ̈ܐ ܚܝܼܸ̈ܐ ܗ݇ܘܵܘ ܓܵܘ ܐܘܼܠܨܵܢܵܐ ܘܥܝܼܩܘܼܬܵܐ ܗܲܠ ܕܡܨܸܐܠܗ݇ܘܿܢ ܫܲܬܐܸܣܝܼ ܠܵܗܿ ܚܲܝܘܼܬܲܝܗܝ ܓܵܘ ܡܕܝܼܢ݇ܬܵܐ ܕܝܹܟܵܬܪܝܼܢܘܿܕܵܪ ܘܐܝܼܡܲܢ ܕܢܵܢܝܼ ܡܛܸܐܠܵܗܿ ܠܫܒܼܲܥܣܲܪ ܫܸܢܸ̈ܐ ( 1915) ܡܘܼܓܒܼܸܪܵܐ ܠܗ݇ܘܿܢ ܩܵܐ ܣܵܒܼܘܿܢܝܼ

   ܣܵܒܼܘܼܢܝܼ ܕܵܘܝܼܕ ܪܵܒܵܐ ܥܲܬܝܼܪܵܐ ܗ݇ܘܵܐ ܒܗܿܝ ܕܚܲܕ݇ ܬܲܓܵܪܵܐ ܗ݇ܘܵܐ ܪܸܫܵܝܵܐ ܘܡܵܪܵܐ ܕܕܲܪܓܼܵܐ ܗ݇ܘܵܐ ܓܵܘ ܫܘܼܠܛܵܢܵܐ ܘܗܲܪ ܒܗܿܝ ܥܕܵܢܵܐ ܟܸܐ ܚܵܦܸܛ ܗ݇ܘܵܐ ܕܦܵܠܸܚ ܒܕܘܼܙܘܼܬܵܐ (ܬܪܘܼܨܘܼܬܵܐ) ܓܵܘ ܪܲܗܛܵܐ ܕܫܘܼܓܼ݇ܠܘܼܗܝ. ܗܿܘ ܟܸܐ ܦܵܠܸܚ ܗ݇ܘܵܐ ܒܬܲܓܵܪܘܼܬܵܐ ܕܦܵܖ̈ܟ̰ܵܐ ܘܐܝܼܬ ܗ݇ܘܵܐܠܸܗ ܟܡܵܐ ܕܘܼܟܵܢܸ̈ܐ ܩܵܐ ܙܲܒܲܢܬܵܐ ܕܦܵܪܟ̰ܵܐ. ܡܼܢ ܒܵܬ݇ܪ ܕܓܒܼܸܪܸܗ ܩܵܐ ܢܵܢܘܼܢܬܝܼ ܚܲܝܘܼܬܘܼܗܝ ܪܵܒܵܐ ܚܕܝܼܬܵܐ ܘܦܨܝܼܚܬܵܐ ܗ݇ܘܵܐ. ܢܵܢܝܼ ܘܣܵܒܼܝܼ ܩܵܡ ܗܵܘܝܼ ܠܗ݇ܘܿܢ ܬܠܵܬܵܐ ܝܲܠܸܕ݇̈ܐ ܗ.ܕ. ܚܲܕ݇ ܒܪܘܿܢܵܐ ܘܬܪܹܝܢ ܒܢܵܬܸ̈ܐ

   ܒܫܸܢ݇ܬܵܐ 1917  ܩܘܼܘܸܡܠܸܗ ܚܲܕ݇ ܫܘܼܚܠܵܦܵܐ ܝܲܢ ܩܝܵܡܵܐ ܓܘܼܪܵܐ ܒܐܲܬܪܵܐ ܕܪܘܼܣܝܼܵܐ ܘܫܘܼܠܛܵܢܵܐ ܕܬܣܵܪ (ܡܲܠܟܵܐ ܕܪܘܼܣܝܼܵܐ) ܦܘܼܪܦܸܣܠܸܗ ܘܬܣܵܪ ܦܝܼܫܠܸܗ ܩܛܝܼܠܵܐ. ܗܵܝܓܵܗ ܩܸܡܠܸܗ ܚܲܕ݇ ܫܘܼܠܛܵܢܵܐ ܚܲܕ݇ܬܵܐ ܕܡܘܼܬܸܒܼܠܸܗ ܩܵܢܘܿܢܸ̈ܐ ܚܲܕ݇ܬܸ̈ܐ ܩܵܐ ܬܲܓܒܲܪܬܵܐ ܕܐܲܬܪܵܐ. ܚܲܕ݇ ܡܼܢ ܥܒܼܵܕܸ̈ܐ ܕܫܘܼܠܛܵܢܵܐ ܚܲܕ݇ܬܵܐ ܙܲܒܛܲܢܬܵܐ ܕܥܘܼܬܪܵܐ ܕܥܲܬܝܼܖܸ̈ܐ ܗ݇ܘܵܐ ܒܗܿܝ ܕܒܬܲܚܡܲܢܬܵܐ ܕܫܲܠܝܼܛܸ̈ܐ ܚܲܕ݇ܬܸ̈ܐ ܟܠܲܝܗܝ ܥܲܡܖ̈ܵܢܸܐ ܕܐܲܬܪܵܐ ܓܵܪܲܓ ܗܵܘܝܼ ܗ݇ܘܵܐ ܓܵܘ ܚܕܵܐ ܐܲܝܟܵܢܵܝܘܼܬܵܐ ܐܸܩܢܘܼܡܝܼܵܝܬܵܐ ܫܲܘܝܵܐ

   ܗܵܕܟܼܵܐ ܣܵܒܼܘܼܢܝܼ ܘܒܲܝܬܘܼܬܘܼܗܝ ܢܦܸܠܗ݇ܘܿܢ ܓܵܘ ܐܘܼܠܨܵܢܵܐ ܘܦܝܼܫܠܗ݇ܘܿܢ ܥܸܨܝܸ̈ܐ ܕܡܲܫܚܸܛܝܼ ܠܐܲܬܪܵܐ ܕܐܝܼܪܵܢ. ܒܵܬ݇ܪ ܕܡܛܸܐܠܗ݇ܘܿܢ ܠܐܝܼܪܵܢ ܪ݇ܚܸܫܠܗ݇ܘܿܢ ܠܓܲܪܒܝܵܐ ܕܐܲܬܪܵܐ ܠܡܕܝܼܢ݇ܬܵܐ ܕܐܲܢܙܲܠܝܼ ܘܫܘܼܬܐܸܣܠܗ݇ܘܿܢ ܬܵܡܵܐ ܘܚܝܸܐܠܗ݇ܘܿܢ ܩܵܐ ܡܸܬܚܵܐ ܕܟܡܵܐ ܫܸܢܸ̈ܐ. ܒܗܿܘ ܡܸܬܚܵܐ ܣܵܒܼܘܿܢܝܼ ܠܲܝܬ ܗ݇ܘܵܐ ܠܸܗ ܫܘܼܓܼ݇ܠܵܐ ܘܦܘܼܠܚܵܢܵܐ ܘܐܵܢܝܼ ܟܸܐ ܚܵܝܝܼ ܗ݇ܘܵܘ ܒܐܵܢܝܼ ܙܘܼܙܸ̈ܐ ܘܕܲܗܒܼܸ̈ܐ ܕܡܘܼܬ݇ܝܲܝܗܝ ܗ݇ܘܵܘ ܥܲܡ ܓܵܢܲܝܗܝ ܡܼܢ ܪܘܼܣܝܼܵܐ

    ܒܡܕܝܼܢ݇ܬܵܐ ܕܐܲܢܙܲܠܝܼ ܬܪܸܝܢ ܝܲܠܸܕ݇̈ܐ ܐ݇ܚܸܖ̈݇ܢܸܐ ܙܸܐ ܙܝܼܕܠܗ݇ܘܿܢ ܥܲܠ ܒܲܝܬܘܼܬܵܐ ܕܣܵܒܼܘܼܢܝܼ ܕܚܲܕ݇ ܡܸܢܲܝܗܝ ܝܸܡܝܼ ܗ݇ܘܵܐ. ܒܟܠܸܗ ܐܵܢܝܼ ܫܸܢܸ̈ܐ ܕܡܘܼܥܒܼܸܪܲܝܗܝ ܠܗ݇ܘܿܢ ܓܵܘ ܐܲܢܙܲܠܝܼ ܒܐܵܗܵܐ ܗܸܒܼܝܼ ܒܸܚܵܝܵܐ ܗ݇ܘܵܘ ܕܩܵܘܡܵܐ ܚܲܕ݇ ܝܵܘܡܵܐ ܐܲܝܟܵܢܵܝܘܼܬܵܐ ܕܐܲܬܪܵܐ ܕܪܘܼܣܝܼܵܐ ܫܲܚܠܸܦܵܗܿ ܘܐܵܢܝܼ ܡܵܨܝܼ ܕܵܝܪܝܼ ܬܵܡܵܐ ܐܝܼܢܵܐ ܬܲܚܡܲܢܬܲܝܗܝ ܗܲܒܲܣ ܗ݇ܘܵܐ ܒܗܿܝ ܕܣܵܒܼܘܼܢܝܼ ܡܪܸܥܠܸܗ ܘܢܝܼܚܠܸܗ ܘܦܝܼܫܠܸܗ ܣܘܼܦܝܵܐ ܠܗܲܩܘܼܬܘܼܗܝ ܓܵܘ ܐܲܢܙܲܠܝܼ

   ܒܵܬ݇ܪ ܡܵܘܬܵܐ ܕܣܵܒܼܘܼܢܝܼ، ܢܵܢܘܼܢܬܝܼ ܫܩܸܠܵܗܿ ܠܚܲܡܫܵܐ ܙܲܖ̈ܥܘܼܗܿ ܘܐ݇ܙܸܠܵܗܿ ܠܡܕܝܼܢ݇ܬܵܐ ܕܐܘܼܪܡܝܼ ܒܗܿܝ ܕܬܵܡܵܐ ܐܝܼܬ ܗ݇ܘܵܘ ܠܗ݇ܘܿܢ ܚܲܕ݇ܟܡܵܐ ܚܸܙܡܵܢܸ̈ܐ ܓܵܘ ܡܵܬܵܐ ܕܓܘܼܠܦܵܫܵܢ ܘܒܸܕ ܗܲܝܸܪܝܼ ܗ݇ܘܵܘ ܠܗ݇ܘܿܢ. ܡܸܢ݇ܕܪܸܫ݇ ܟܡܵܐ ܫܸܢܸ̈ܐ ܡܘܼܥܒܼܸܪܲܝܗܝ ܠܗ݇ܘܿܢ ܒܙܲܗܡܲܬ ܘܐܘܼܠܨܵܢܵܐ ܗܲܠ ܕܓܘܼܪܘܸܣܠܗ݇ܘܿܢ ܐܵܢܝܼ ܝܲܠܸ̈ܕ݇ܐ ܙܥܘܿܖܸ̈ܐ ܘܟܠ ܚܲܕ݇ ܪܚܸܫܠܸܗ ܒܵܬ݇ܪ ܚܲܝܘܼܬܵܐ ܕܓܵܢܸܗ

   ܚܵܠܬܝܼ ܓܘܼܪܬܵܐ ܓܒܼܸܪܵܗܿ ܩܵܐ ܚܲܕ݇ ܦܲܪܨܘܿܦܵܐ ܕܟܸܐ ܚܵܝܸܐ ܗ݇ܘܵܐ ܒܡܕܝܼܢ݇ܬܵܐ ܕܗܵܡܵܕܵܢ ܘܒܵܬ݇ܪ ܓܒܼܵܪܵܐ ܠܘܼܒܠܵܐܠܸܗ ܟܠܵܗܿ ܒܲܝܬܘܼܬܵܐ ܕܢܵܢܝܼ ܠܗܵܡܵܕܵܢ ܘܗ݇ܘܸܐ ܠܸܗ ܪܵܒܵܐ ܗܲܝܸܪܵܢܵܐ ܩܵܬܲܝܗܝ 

   ܐܵܢܝܼ ܦܝܼܫܠܗ݇ܘܿܢ ܓܵܘ ܗܵܡܵܕܵܢ ܩܵܐ ܡܸܬܚܵܐ ܕܥܸܣܖ̈ܝܼܢ ܫܸܢܸ̈ܐ. ܬܵܡܵܐ ܟܸܐ ܚܲܝܝܼ ܗ݇ܘܵܘ ܒܐܘܼܪܚܵܐ ܕܚܝܘܼܛܵܐ ܒܗܿܝ ܕܚܵܠܬܝܼ ܚܲܝܵܛܬܵܐ ܗ݇ܘܵܐ ܘܒܐܵܗܵܐ ܐܘܼܪܚܵܐ ܟܸܐ ܩܵܢܝܵܐ ܗ݇ܘܵܐ ܙܘܼܙܸ̈ܐ ܩܵܐ ܦܲܪܲܥܬܵܐ ܕܢܲܦܩܵܬܸ̈ܐ ܕܒܲܝܬܵܐ. ܒܵܬ݇ܪ ܟܡܵܐ ܫܸܢܸ̈ܐ ܟܠܲܝܗܝ ܝܲܠܸܕ݇̈ܐ ܙܥܘܿܖܸ̈ܐ ܓܒܼܸܪܗ݇ܘܿܢ ܬܵܡܵܐ. ܝܸܡܝܼ ܕܫܸܡܘܼܗܿ ܪܘܿܙܵܐ ܗ݇ܘܵܐ ܓܒܼܸܪܵܗܿ ܩܵܐ ܒܵܒܝܼ ܕܡܼܢ ܡܕܝܼܢ݇ܬܵܐ ܕܣܵܠܵܡܵܣ ܗ݇ܘܵܐ. ܗܿܘ ܐܝܼܬ ܗ݇ܘܵܐܠܸܗ ܚܕܵܐ ܡܵܫܝܼܢܵܐ (ܪܵܕܝܼܬܵܐ) ܩܵܐ ܓܪܵܫܬܵܐ ܕܛܲܥܢܵܐ ܘܒܐܵܗܵܐ ܐܘܼܪܚܵܐ ܟܸܐ ܬܲܓܒܸܪ ܗ݇ܘܵܐܠܸܗ ܒܲܝܬܘܼܗܝ  

   ܚܲܪܬܵܐ ܟܠ ܚܲܕ݇ ܡܼܢ ܝܲܠܸܕ݇̈ܐ ܕܢܵܢܝܼ ܪ݇ܚܸܫܠܸܗ ܒܵܬ݇ܪ ܚܲܝܘܼܬܵܐ ܕܓܵܢܘܼܗܝ ܘܐܲܚܟ̰ܝܼ ܚܕܵܐ ܒܪܵܬܵܐ ܦܝܼܫܠܵܗܿ ܥܲܡ ܢܵܢܘܼܢܬܝܼ ܓܵܘ ܗܵܡܵܕܵܢ. ܒܵܬ݇ܪ ܟܡܵܐ ܫܸܢܸ̈ܐ ܐܘܼܦ ܗܿܝ ܓܒܼܸܪܵܗܿ ܘܐ݇ܬܸܐܠܵܗܿ ܠܡܕܝܼܢ݇ܬܵܐ ܕܬܸܗܪܵܢ ܘܢܵܢܘܼܢܬܝܼ ܙܸܐ ܐ݇ܬܸܐܠܵܗܿ ܥܲܡܘܼܗܿ ܘܥܲܡ ܚܸܬܢܘܼܗܿ ܘܚܝܸܐܠܵܗܿ ܚܕܵܐ ܚܲܝܘܼܬܵܐ ܪܵܒܵܐ ܨܦܵܝܝܼ                 

  1982 ܢܵܢܘܿܢܬܝܼ ܚܝܸܐܠܵܗܿ85ܫܸܢܸ̈ܐ ܓܵܘ ܐܵܗܵܐ ܕܘܼܢܝܸܐ ܘܢܝܼܚܠܵܗܿ ܓܵܘ ܬܸܗܪܵܢ ܓܵܘ ܒܲܝܬܵܐ ܕܒܪܵܬܘܼܗܿ ܒܫܸܢ݇ܬܵܐ ܕ

ܐܸܕܝܘܿܡ ܡܼܢ ܒܲܝܬܘܼܬܵܐ ܕܢܵܢܝܼ ܦܝܵܫܵܐ ܝܠܵܗܿ ܝܸܡܝܼ ܘܚܕܵܐ ܡܼܢ ܚܵܬܘܵܬܘܼܗܿ ܕܟܸܐ ܚܵܝܵܐ ܓܵܘ ܐܲܬܪܵܐ ܕܐܵܠܡܵܢܝܼܵܐ. ܫܠܡ