ܡܬܠ̈ܐܐܬܘܖ̈ܝܐ

ܫܡܝܪܡ ܕ. ܦܘܪܝܐܢ

  

܀ ܩܵܙܵܠܵܚܬܵܐ ܪܸܫܘܼܗܿ ܟܸܐ ܕܵܝܫܵܐ ܠܸܗ ܬ݇ܚܘܿܬ ܬܲܠܓܵܐ، ܟܸܐ ܚܵܫܒܼܵܐ ܕܚܲܕ݇ ܐ݇ܢܵܫܵܐ ܠܸܐ ܝܠܸܗ ܒܸܚܙܵܝܘܼܗܿ.                                                             

ܦܘܼܫܵܩܵܐ: ܒܘܼܬ ܐܵܢܝܼ ܝܠܵܗܿ ܕܟܸܐ ܦܵܠܚܝܼ ܒܛܸܫܘܵܐ ܘܟܸܐ ܚܵܫܒܼܝܼ ܕܐ݇ܢܵܫܸ̈ܐ ܠܸܐ ܪܵܥܫܝܼ ܠܥܒܼܵܕܲܝܗ̈ܝ ܟܲܕ ܒܸܚܠܵܛܵܐ ܝܢܵܐ ܘܫܘܼܓܼ݇ܠܵܢܲܝܗ̈ܝ ܟܸܐ ܦܵܝܫܝܼ ܓܸܠܝܸ̈ܐ ܠܟܸܣ ܥܵܠܡܵܐ.                                                                    

܀ ܩܵܛܘܼ ܠܲܝܬ ܓܵܘ ܒܲܝܬܵܐ، ܚܠܘܼܠܵܐ ܕܥܘܿܩܸܒܖܸ̈ܐ ܝܠܸܗ.

ܦܘܼܫܵܩܵܐ: ܒܘܼܬ ܐܵܢܝܼ ܝܠܵܗܿ ܕܟܲܕ ܪܸܫܵܐ ܕܒܲܝܬܵܐ ܝܲܢ ܪܸܫܵܐ ܕܫܘܼܓܼ݇ܠܵܐ ܠܵܐ ܗܵܘܸܐ ܡܛܲܝܒܼܵܐ (ܗܵܙܸܪ، ܗܕܝܼܪܵܐ) ܟܸܐ ܥܵܒܼܕܝܼ ܟܠ ܡܸܢܕܝܼ ܐܲܝܟܼ ܕܒܠܸܒܲܝܗܝ ܝܠܸܗ ܗܲܪ ܐܲܝܟܼ ܥܘܿܩܸܒܖܸ̈ܐ ܕܟܲܕ ܠܵܐ ܚܵܙܝܼ ܠܩܵܛܘܼ ܟܸܐ ܦܵܠܛܝܼ ܡܼܢ ܩܸܢܲܝܗܝ ܘܟܸܐ ܪܵܚܛܝܼ ܡܼܢ ܐܵܗ ܓܸܒܵܐ ܠܗܿܘ ܓܸܒܵܐ.                                                    

܀ ܩܲܝܣܵܐ ܐܸܢ ܡܼܢ ܓܵܢܘܼܗܝ ܬܸܘܸܠܥܬܵܐ ܠܵܐ ܗܵܘܝܵܐ، ܐܲܠܦܵܐ ܫܸܢܸ̈ܐ ܒܸܕ ܚܵܝܸܐ.

ܦܘܼܫܵܩܵܐ: ܐܸܢ ܚܲܕ݇ ܐ݇ܢܵܫܵܐ ܠܸܐ ܝܠܸܗ ܡܲܬܢܘܼܝܸܐ ܒܚܲܝܘܼܬܸܗ ܝܲܢ ܠܸܐ ܝܠܸܗ ܒܸܫܩܵܠܵܐ ܝܘܼܬܪܵܢܵܐ ܡܼܢ ܫܘܼܓܼ݇ܠܵܢܘܼܗܝ، ܦܠܵܛܵܐ  ܕܥܒܼܵܕܸ̈ܐ ܕܓܵܢܘܼܗܝ ܝܠܸܗ ܒܗܿܝ ܕܐܸܢ ܗܵܘܸܐ ܨܲܠܝܼܠܵܐ ܘܙܗܝܼܪܵܐ ܟ̰ܘܼ ܐ݇ܢܵܫܵܐ ܠܸܐ ܡܵܨܸܐ ܕܡܵܚܸܐ ܙܝܵܢܵܐ ܥܲܠܘܼܗܝ.                

܀ ܩܝܼܪܲܬ ܩܲܕ݇ܡ ܟܲܠܒܵܐ ܖ̈ܘܼܦܝܘܼܗܿ ܗ݇ܘܵܐ، ܠܸܐ ܗ݇ܘܵܐ ܐ݇ܟܼܝܼܠܘܼܗܿ.

ܦܘܼܫܵܩܵܐ: ܡܲܕܘܼܥܸܐ ܝܠܸܗ ܒܘܼܬ ܐܵܢܲܢܩܵܝܘܼܬܵܐ ܕܛܢܵܢܵܐ (ܩܝܼܪܲܬ) ܠܟܸܣ ܒܲܪܢܵܫܵܐ ܒܡܲܦܠܲܚܬܵܐ ܕܐܵܗܵܐ ܛܘܼܦ̰ܣܵܐ ܕܐܵܦ ܚܲܝܘܵܬܸ̈ܐ ܙܸܐ ܡܵܪܵܐ ܕܩܝܼܪܲܬ ܝܢܵܐ ܘܠܸܐ ܥܵܒܼܪܝܼ ܡܼܢ ܪܵܒܵܐ ܡܸܢܕܝܼܵܢܸ̈ܐ ܩܵܐ ܛܘܼܦ̰ܣܵܐ ܡܼܢ ܚܘܼܒܵܐ ܕܠܟܸܣ ܡܵܪܲܝܗܝ.                

܀ ܩܵܠܘܼܟܼ ܡܼܢ ܕܘܼܟܵܐ ܫܲܚܝܼܢܬܵܐ ܦܠܵܛܵܐ ܝܠܸܗ.

ܦܘܼܫܵܩܵܐ: ܗܿܝ ܥܕܵܢܵܐ ܟܸܐ ܡܲܦܠܸܚܝܼ ܠܸܗ ܐܵܗܵܐ ܡܲܬܠܵܐ ܕܚܲܕ݇ ܐ݇ܢܵܫܵܐ ܝܵܗܒܼܸܠ ܚܕܵܐ ܡܲܚܫܲܚܬܵܐ ܝܲܢ ܛܵܠܸܒ ܚܲܕ݇ ܡܸܢܕܝܼ ܟܲܕ ܗܿܘ ܐ݇ܚܸܪ݇ܢܵܐ ܠܲܝܬ ܠܸܗ ܡܨܵܝܬܵܐ ܝܲܢ ܗܕܝܼܪܘܼܬܵܐ ܩܵܐ ܗܿܝ ܡܲܚܫܲܚܬܵܐ ܝܲܢ ܗܿܘ ܡܸܢܕܝܼ.                                   

܀ ܩܲܖ̈ܢܵܢܘܼܗܝ ܡܘܼܚܪܸܦܲܝܗܝ ܝܠܸܗ.

ܦܘܼܫܵܩܵܐ: ܗܲܪ ܐܲܝܟܼ ܬܵܘܪܵܐ ܕܒܥܕܵܢܵܐ ܕܦܠܵܫܵܐ ܩܲܖ̈݇ܢܵܢܘܼܗܝ ܟܸܐ ܡܲܚܪܸܦ ܠܗ݇ܘܿܢ، ܦܸܠܵܢ ܐ݇ܢܵܫܵܐ ܙܸܐ ܗܕܝܼܪܵܐ ܝܠܸܗ ܩܵܐ ܦܠܵܫܵܐ ܘܐܵܗܵܐ ܦܝܵܫܵܐ ܝܠܵܗܿ ܚܙܝܼܬܵܐ ܡܼܢ ܗܸܡܸܙܡܵܢܘܼܗ̈ܝ ܘܥܒܼܵܕܘܼܗ̈ܝ.                                                  

ܪ

܀ ܪܵܒܵܐ ܚܵܨܘܼܗܝ ܚܘܵܪܵܐ ܝܠܸܗ.

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܠܚܲܕ݇ ܦܲܪܨܘܿܦܵܐ ܡܲܥܝܼܢܵܐ (ܬܲܢܒܲܠ) ܕܓܵܢܘܼܗܝ ܠܸܐ ܡܵܚܸܐ ܠܵܗܿ ܠܫܘܼܓܼ݇ܠܵܐ ܒܗܿܝ ܕܐܝܼܡܲܢ ܕܦܵܠܸܚ، ܚܵܨܘܼܗܝ ܒܸܕ ܟܵܝܸܡ ܟܲܕ ܒܙܲܒܼܢܸ̈ܐ ܕܲܥܒܼܲܪ ܟܸܐ ܦܵܠܚܝܼ ܗ݇ܘܵܘ ܓܵܘ ܕܸܫܝܵܬܸ̈ܐ ܘܚܲܩܠܵܢܸ̈ܐ ܘܫܸܡܫܵܐ ܟܸܐ ܡܵܚܝܵܐ ܗ݇ܘܵܐ ܥܲܠ ܚܵܨܵܐ ܕܦܲܠܵܚܸ̈ܐ ܘܟܸܐ ܚܵܕܸܪ ܗ݇ܘܵܐ ܪܲܢܓܵܐ ܕܚܵܨܲܝܗܝ.                                      

܀ ܪ݇ܚܸܫܠܲܢ ܛܒܼܝܼܬܵܐ ܐܵܟܼܠܲܚ، ܚܙܸܐ ܠܲܢ ܕܚܡܵܪܵܐ ܒܸܟܘܵܝܵܐ ܝܢܵܐ (ܟܲܒܵܒܸ̈ܐ ܥܒܼܵܕܵܐ ܝܢܵܐ).

ܦܘܼܫܵܩܵܐ: ܗܿܘ ܡܸܢܕܝܼ ܕܫܡܝܼܥܘܼܗܝ ܝܘܲܚ ܗ݇ܘܵܐ ܠܸܐ ܗ݇ܘܵܐ ܬܪܘܼܨܵܐ ܘܫܪܵܪܵܐ ܚܲܕ݇ ܡܸܢܕܝܼ ܐ݇ܚܸܪ݇ܢܵܐ ܗ݇ܘܵܐ ܘܠܵܐ ܡܛܸܐ ܠܲܢ ܠܢܝܼܫܲܢ.                                 

܀ ܪܵܝܪܘܼܗܝ ܘܦܘܼܕܘܼܗܝ ܚܒܼܝܼܛܸ̈ܐ ܝܢܵܐ.

ܦܘܼܫܵܩܵܐ: ܦܸܠܵܢ ܐ݇ܢܵܫܵܐ ܚܲܕ݇ܐ ܗܵܕܟܼܵܐ ܪܸܫܘܼܗܝ ܚܒܼܝܼܛܵܐ ܝܠܸܗ ܕܠܸܐ ܝܠܸܗ ܡܸܨܝܵܐ ܕܚܲܠܸܠܗ݇ܘܿܢ ܐܝܼܕܘܼܗܝ ܘܦܲܐܬܘܼܗܝ ܘܦܘܼܫܵܩܘܼܗܝ ܐܵܗܵܐ ܝܠܸܗ ܕܫܘܼܓܼ݇ܠܵܢܘܼܗܝ ܚܒܼܝܼܛܸ̈ܐ ܝܢܵܐ ܒܐܘܼܕܵܠܸܐ ܘܠܸܐ ܝܠܸܗ ܡܨܵܝܵܐ ܕܨܲܦܸܐ ܠܗ݇ܘܿܢ.                     

܀ ܪܸܫܵܐ ܕܟܘܼܣܝܼܬܘܼܗܝ ܒܸܙܥܵܐ ܝܠܸܗ.                                             

ܦܘܼܫܵܩܵܐ: ܠܸܐ ܡܵܨܸܐ ܕܚܲܡܸܐ ܠܠܸܫܵܢܘܼܗܝ ܘܓ̰ܲܠܕܸܐ ܟܸܐ ܡܲܦܪܸܚ ܠܸܗ ܚܲܒܪܵܐ. ܠܲܐܟܼܵܐ ܟܘܼܣܝܼܬܵܐ ܡܘܼܕܡܝܼܬܵܐ ܝܠܵܗܿ ܠܚܲܕ݇ ܣܸܬܪܵܐ ܩܵܐ ܚܲܒܖ̈ܵܢܸܐ ܘܬܲܚܡܲܢܝܵܬܸ̈ܐ ܕܐ݇ܢܵܫܵܐ ܕܐܝܼܡܲܢ ܕܒܸܙܥܵܐ ܗܵܘܸܐ ܚܲܒܖ̈ܵܢܸܐ ܦܠܵܛܵܐ ܝܢܵܐ ܡܼܢ ܪܸܫܵܐ.                        

܀ ܪܸܫܵܐ ܕܩܲܪܥܵܐ ܡܘܼܦܪܸܚܘܼܗܝ ܝܠܸܗ.                                         

ܦܘܼܫܵܩܵܐ: ܚܲܕ݇ ܚܲܒܪܵܐ ܛܸܫܝܵܐ ܓܸܠܝܘܼܗܝ ܝܠܸܗ ܘܫܘܼܓܼ݇ܠܵܐ ܡܘܼܚܪܸܒܼܘܼܗܝ ܝܠܸܗ. ܒܐܵܗܵܐ ܡܲܬܠܵܐ ܙܸܐ ܪܸܫܵܐ ܕܩܲܪܥܵܐ ܡܐܲܝܟܼ ܪܸܫܵܐ ܕܒܲܪܢܵܫܵܐ ܚܲܕ݇ ܡܲܟܠܵܝܬܵܐ ܝܠܸܗ ܩܵܐ ܓܠܵܝܬܵܐ ܕܣܸܖܸ̈ܐ ܘܐ݇ܖ̈ܵܙܸܐ.                                                     

܀ ܪܸܫܘܼܗܝ ܡܼܢ ܐܸܫܬܵܐ ܕܚܡܵܪܵܐ ܠܸܐ ܝܠܸܗ ܦܠܵܛܵܐ.                             

ܦܘܼܫܵܩܵܐ: ܪܵܒܵܐ ܣܲܟܼܠܵܐ ܝܠܸܗ ܕܫܘܼܓܼ݇ܠܵܢܸ̈ܐ ܟ̰ܸܡ ܦܫܝܼܛܸ̈ܐ ܙܸܐ ܠܸܐ ܦܵܠܛܝܼ ܡܼܢ ܐܝܼܕܘܼܗܝ.                                                                    

ܫ

܀ ܫܘܼܓܼ݇ܠܵܐ ܕܒܲܟܼܬܵܐ ܟܸܐ ܕܵܡܸܐ ܥܲܠ ܫܘܼܓܼ݇ܠܵܐ ܕܣܵܛܵܢܵܐ.

ܦܘܼܫܵܩܵܐ: ܗܲܪ ܐܲܝܟܼ ܣܵܛܵܢܵܐ ܕܠܸܐ ܟܵܠܸܐ ܡܼܢ ܦܘܼܠܚܵܢܘܼܗܝ ܕܒܝܼܫܬܵܐ ܗܲܪ ܗܵܕܟܼܵܐ ܒܲܟܼܬܵܐ ܙܸܐ ܠܸܐ ܟܵܠܝܵܐ ܡܼܢ ܦܘܼܠܚܵܢܘܼܗܿ ܕܚܒܼܵܛܵܐ ܘܚܲܪܒܲܫܬܵܐ!!!                    

܀ ܫܸܚܪܵܐ ܠܓܘܼܕܵܐ.

ܦܘܼܫܵܩܵܐ: ܐܝܼܡܲܢ ܕܚܕܵܐ ܩܲܘܲܡܬܵܐ ܩܲܘܸܡܵܐ ܕܠܸܐ ܝܘܲܚ ܗ݇ܘܵܐ ܒܸܣܒܵܪܵܐ ܥܲܠܘܼܗܿ ܗܵܕܟܼܵܐ ܟܸܐ ܐܵܡܪܲܚ ܝܲܥܢܸܐ ܕܐܲܝܟܼ ܡܸܢܘܼܟܼ. ܡܚܵܝܬܵܐ ܕܫܸܚܪܵܐ ܥܲܠ ܓܘܼܕܵܐ ܚܲܕ݇ ܫܘܼܓܼ݇ܠܵܐ ܝܠܸܗ ܕܟܸܐ ܥܵܒܼܕܝܼ ܗ݇ܘܵܘ ܠܸܗ ܒܙܲܒܼܢܸ̈ܐ ܥܒܼܝܼܖܸ̈ܐ ܐܝܼܡܲܢ ܕܩܵܐ ܟܬܵܒܼܬܵܐ ܝܲܢ ܡܲܬܲܒܼܬܵܐ ܕܢܸܫܵܢܩܵܐ ܟܸܐ ܡܲܦܠܸܚܝܼ ܗ݇ܘܵܘ ܠܫܸܚܪܵܐ ܒܫܵܘܦܵܐ ܕܩܲܠܵܡܵܐ ܘܡܼܢ ܓܸܒܵܐ ܕܘܲܪܵܩܵܐ ܟܸܐ ܡܲܦܠܸܚܝܼ ܗ݇ܘܵܘ ܠܓܘܼܕܵܐ.                                          

܀ ܫܸܡܵܐ ܓܘܼܪܵܐ ܘܡܵܬܵܐ ܚܲܪܵܒܵܐ.

ܦܘܼܫܵܩܵܐ: ܒܘܼܬ ܐܵܢܝܼ ܝܠܸܗ ܕܡܼܢ ܪܸܚܩܵܐ ܪܵܒܵܐ ܓܘܼܖܸ̈ܐ ܘܥܸܠܵܝܸ̈ܐ ܟܸܐ ܡܲܒܝܸܢܝܼ ܐܝܼܢܵܐ ܟܲܕ ܩܲܪܒܸܢܲܚ ܥܲܠܲܝܗܝ ܒܸܕ ܚܲܙܲܚ ܕܟܠܲܝܗܝ ܐܵܢܝܼ ܚܘܼܫܵܒܼܸ̈ܐ ܗܲܒܲܣ ܗ݇ܘܵܘ ܘܐܵܢܝܼ ܠܸܐ ܗ݇ܘܵܘ ܐܲܝܟܼ ܚܫܵܒܼܬܲܢ.                                                     

܀ ܫܸܡܵܐ ܕܕܸܐܒܼܵܐ ܘܕܸܐܒܼܵܐ ܒܬܲܪܥܵܐ.

ܦܘܼܫܵܩܵܐ: ܐܝܼܡܲܢ ܕܒܘܼܬ ܚܲܕ݇ ܦܲܪܨܘܿܦܵܐ ܡܲܙܕܸܥܵܢܵܐ ܗܲܡܙܸܡܝܼ ܘܗܿܘ ܥܵܒܼܸܪ ܡܼܢ ܬܲܪܥܵܐ ܗܵܕܟܼܵܐ ܟܸܐ ܡܲܦܠܸܚܝܼ ܠܸܗ ܐܵܗܵܐ ܡܲܬܠܵܐ.                                        

܀ ܫܪܵܓܼܝܵܐ ܬ݇ܚܘܿܬ ܓܵܢܘܼܗܿ ܒܲܗܪܵܐ ܠܸܐ ܝܵܗܒܼܵܐ.

ܦܘܼܫܵܩܵܐ: ܒܘܼܬ ܐܵܢܝܼ ܝܠܵܗܿ ܕܩܵܐ ܐ݇ܚܸܖ̈݇ܢܸܐ ܨܦܵܝܝܼ ܝܢܵܐ ܐܝܼܢܵܐ ܠܸܐ ܗܵܘܝܼ ܠܗ݇ܘܿܢ ܚܕܵܐ ܛܵܒܼܬܵܐ ܩܵܐ ܐܲܒܼܵܗܲܝܗ̈ܝ ܘܚܸܙܡܵܢܲܝܗ̈ܝ ܐܵܦܸܢ ܕܗܵܘܝܼ ܡܫܲܡܗܵܐ ܘܥܸܠܵܝܸ̈ܐ.     

܀ ܫܲܪܚܘܼܗܝ ܕܸܐܒܼܵܐ ܐ݇ܟܼܝܼܠܘܼܗܝ (ܠܘܼܒܠܘܼܗܝ) ܝܠܸܗ.

ܦܘܼܫܵܩܵܐ: ܒܘܼܬ ܗܿܘ ܦܲܪܨܘܿܦܵܐ ܝܠܸܗ ܕܗܵܘܸܐ ܡܘܼܚܣܸܪܵܐ (ܗܵܘܸܐ ܩܘܼܒܠܵܐ ܙܝܵܢܵܐ) ܘܢܦܝܼܠܵܐ ܡܼܢ ܚܲܝܠܵܐ ܘܥܘܼܬܪܵܐ ܘܒܘܼܬ ܗܵܕܵܐ ܚܲܫܵܢܵܐ ܘܚܘܼܠܩܵܢܵܐ ܟܸܐ ܗܵܘܸܐ.     

܀ ܫܲܪܚܘܼܗܝ ܬܵܘܪܵܐ ܠܸܐ ܗܵܘܸܐ.

ܦܘܼܫܵܩܵܐ: ܫܘܼܓܼ݇ܠܵܢܘܼܗܝ ܠܸܐ ܗܵܘܝܼ ܠܗ݇ܘܿܢ ܚܲܕ݇ ܦܠܵܛܵܐ ܒܗܿܝ ܕܐܝܼܡܲܢ ܕܒܲܪܢܵܫܵܐ ܚܵܦܸܛ ܘܓܵܪܸܫ ܥܲܡܠܵܐ ܒܵܬ݇ܪ ܚܲܕ݇ ܡܸܬܚܵܐ ܟܸܐ ܡܵܛܸܐ ܠܚܲܕ݇ ܦܠܵܛܵܐ. ܗܲܪ ܐܲܝܟܼ ܓܲܪܘܲܣܬܵܐ ܘܒܲܓ̰ܲܪܬܵܐ ܕܚܲܕ݇ ܫܲܪܚܵܐ ܕܒܵܬ݇ܪ ܚܲܕ݇ ܡܸܬܚܵܐ ܒܸܕ ܚܵܕܸܪ ܠܚܲܕ݇ ܬܵܘܪܵܐ ܐܝܼܢܵܐ ܐܸܢ ܒܘܼܨܵܪܵܐ ܗܵܘܸܐ ܒܪܲܗܛܵܐ ܕܒܲܓ̰ܲܪܬܘܼܗܝ ܫܲܪܚܵܐ ܒܸܕ ܡܲܪܥܸܐ ܘܡܵܐܸܬ ܘܠܸܐ ܗܵܘܸܐ ܬܵܘܪܵܐ.                                                                        

ܬ

܀ ܬܵܐ ܐܵܗܵܐ ܚܡܵܪܵܐ ܡܼܢ ܥܲܠ ܓܸܫܪܵܐ ܡܲܥܒܼܸܪܸܗ.                                

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܠܥܲܣܩܘܼܬܵܐ ܕܚܲܕ݇ ܫܘܼܓܼ݇ܠܵܐ ܕܓܵܪܲܓ ܦܵܐܸܫ ܡܘܼܓܡܸܪܵܐ. ܗܲܪ ܐܲܝܟܼ ܡܲܥܒܼܲܪܬܵܐ ܕܚܲܕ݇ ܚܡܵܪܵܐ ܡܼܢ ܥܲܠ ܓܸܫܪܵܐ ܕܝܼܠܸܗ ܚܲܕ݇ ܫܘܼܓܼ݇ܠܵܐ ܟ̰ܸܡ ܥܲܣܩܵܐ ܘܪܵܒܵܐ ܥܕܵܢܵܬܸ̈ܐ ܟܸܐ ܢܵܦܸܠ ܡܼܢ ܥܲܠ ܓܸܫܪܵܐ ܘܠܸܐ ܡܵܛܸܐ ܠܗܿܘ ܓܸܒܵܐ ܐ݇ܚܸܪ݇ܢܵܐ.                                                                     

܀ ܬܵܘܪܵܐ ܕܢܵܦܸܠ ܣܟܝܼܢܝܵܬܸ̈ܐ ܟܸܐ ܚܲܪܦܝܼ.

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܥܲܠ ܐܵܗܵܐ ܕܐܝܼܡܲܢ ܕܚܲܕ݇ ܐ݇ܢܵܫܵܐ ܙܲܪܒܵܢܵܐ ܥܵܒܼܸܪ ܒܫܸܢܸ̈ܐ ܘܢܵܦܸܠ ܡܼܢ ܚܲܝܠܵܐ ܪܵܒܵܐ ܓܵܢܵܬܸ̈ܐ ܟܸܐ ܩܵܝܡܝܼ ܒܲܪܩܘܼܒܼܠܸܗ ܟܲܕ ܐܝܼܡܲܢ ܕܚܲܝܠܵܢܵܐ ܗ݇ܘܵܐ، ܠܸܗ ܝܵܪܝܼ ܗ݇ܘܵܘ ܒܝܼܸܗ ܗܲܪ ܐܲܝܟܼ ܬܵܘܪܵܐ ܕܟܲܕ ܙܥܘܿܪܵܐ ܝܠܸܗ ܟܸܐ ܡܲܦܠܸܚܝܼ ܠܸܗ ܘܝܘܼܬܪܵܢܵܐ ܟܸܐ ܫܵܩܠܝܼ ܡܸܢܸܗ ܐܝܼܢܵܐ ܟܲܕ ܣܝܼܒܼܠܸܗ ܟܸܐ ܦܵܪܡܝܼ ܠܸܗ ܩܵܐ ܡܲܦܠܲܚܬܵܐ ܕܒܸܨܪܸܗ.                                                                    

܀ ܬܲܠܡܵܐ ܕܡܝܼܵ̈ܐ ܓܵܘ ܐܘܼܪܚܵܐ ܕܡܝܼܵ̈ܐ ܟܸܐ ܫܵܡܸܛ.

ܦܘܼܫܵܩܵܐ: ܡܲܕܘܼܥܸܐ ܝܠܸܗ ܕܐܝܼܡܲܢ ܕܪܵܒܵܐ ܡܲܦܠܸܚܝܼ ܠܸܗ ܟܠ ܚܲܕ݇ ܡܸܢܕܝܼ ܟܸܐ ܚܵܪܸܒܼ ܐܵܦ ܐܸܢ ܗܵܘܸܐ ܒܲܪܢܵܫܵܐ.                                                           

܀ ܬܲܢܸܝܬ ܚܲܒܘܿܫܵܐ ܣܡܘܿܩܵܐ ܫܘܼܕܖܸ̈ܐ ܝܢܵܐ ܒܵܬ݇ܪܘܼܗܝ.

ܦܘܼܫܵܩܵܐ: ܒܘܼܬ ܐܵܢܝܼ ܝܠܸܗ ܕܠܵܐ ܟ̰ܝܵܕܵܐ ܟܸܐ ܐܵܙܠ݇ܝܼ ܠܐܲܟܼܵܐ ܘܬܵܡܵܐ ܝܲܢ ܟܸܐ ܚܵܒܼܛܝܼ ܓܵܘ ܫܘܼܓܼ݇ܠܵܢܸ̈ܐ ܕܐ݇ܚܸܖ̈݇ܢܸܐ ܘܗܲܪ ܒܗܿܝ ܥܕܵܢܵܐ ܟܸܐ ܗܵܘܝܼ ܒܸܩܵܒܼܵܠܵܐ ܘܛܲܪܛܘܼܡܸܐ.    

܀ ܬܲܢܸܝܬ ܡܘܼܠܟܵܐ ܕܒܵܒܲܝܗܝ ܦܲܠܘܼܓܼܘܼܗܿ ܝܢܵܐ.

ܦܘܼܫܵܩܵܐ: ܒܘܼܬ ܐܵܢܝܼ ܝܠܵܗܿ ܕܟܸܐ ܚܵܒܼܛܝܼ ܓܵܘ ܫܘܼܓܼ݇ܠܵܢܸܐ ܕܐ݇ܢܵܫܸ̈ܐ ܘܟܸܐ ܡܵܚܝܼ ܚܲܝܠܵܐ ܒܘܼܫ ܙܵܘܕܵܐ ܡܼܢ ܡܵܪܵܐ ܕܡܲܬܠܵܐ (ܡܲܣܲܠܵܐ).                                        

܀ ܬܲܥܠܵܐ ܥܲܠ ܥܲܢܒܼܸ̈ܐ ܠܵܐ ܡܛܸܐ ܠܸܗ ܐ݇ܡܸܪܸܗ: ܚܲܡܘܼܨܸܐ ܝܢܵܐ.

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܥܲܠ ܐܵܢܝܼ ܦܲܪܨܘܿܦܸ̈ܐ ܕܠܲܝܬ ܠܗ݇ܘܿܢ ܡܨܵܝܬܵܐ ܘܚܲܝܠܵܐ ܕܡܵܛܝܼ ܠܪܵܒܵܐ ܡܸܢܕܝܵܢܸ̈ܐ ܗܿܝܓܵܗܿ ܟܸܐ ܡܲܣܠܝܼ ܠܸܗ ܗܿܘ ܡܸܢܕܝܼ. ܩܵܐ ܛܘܼܦ̰ܣܵܐ ܟܲܕ ܠܸܐ ܡܵܨܝܼ ܙܵܒܼܢܝܼ ܚܲܕ݇ ܒܲܝܬܵܐ ܓܘܼܪܵܐ ܟܸܐ ܗܲܡܙܸܡܝܼ ܒܘܼܬ ܒܘܼܨܵܖܸ̈ܐ ܕܗܵܕܟܼܵܐ ܒܲܝܬܘܵܬܸ̈ܐ.                                                                    

܀ ܬܸܦܬܝܼܓܘܼܗܝ ܒܸܕ ܕܲܪܸܝܢܵܗܿ.

ܦܘܼܫܵܩܵܐ: ܐܘܼܚܟ̰ܵܐ ܒܸܕ ܡܵܚܸܢܸܗ ܕܡܐܲܝܟܼ ܚܕܵܐ ܟܬܵܝܬܵܐ ܟܠܲܝܗܝ ܡܸܙܝܵܬܘܼܗܝ ܬܵܦܟܼܝܼ ܘܓܵܢܵܐ ܠܵܐ ܦܵܝܫܵܐ ܩܵܬܘܼܗܝ.                                          

܀ ܬܲܪܥܵܐ ܝܠܸܗ، ܡܲܬ݇ܝܵܐ ܝܠܸܗ.

ܦܘܼܫܵܩܵܐ: ܐܝܼܡܲܢ ܕܚܲܕ݇ ܒܲܝܬܵܐ ܪܵܒܵܐ ܐܲܙܵܠ݇ܢܸ̈ܐ ܘܐܲܬܝܵܢܸ̈ܐ ܗܵܘܸܐ ܠܸܗ ܗܵܕܟܼܵܐ ܟܸܐ ܐܵܡܪܝܼ ܘܡܲܥܢܵܝܘܼܗܝ ܐܵܗܵܐ ܝܠܵܗܿ ܕܟܲܕ ܬܲܪܥܵܐ ܕܒܲܝܬܵܐ ܗܵܘܸܐ ܦܬܝܼܚܵܐ ܐܲܖ̈ܚܸܐ ܪܵܒܵܐ ܟܸܐ ܗܵܘܝܼ.                                                                        

   ܢܘܗܪܐ

   ܩܵܐ ܗܲܕܲܪܬܵܐ ܘܟܬܵܒܼܬܵܐ ܕܐܵܗܵܐ ܣܝܵܡܵܐ ܫܩܸܠܝܼ ܗܲܝܲܪܬܵܐ ܡܼܢ ܐܘܼܡܵܢܬܵܐ ܡܘܼܚܸܒܬܵܐ ܡܝܲܩܲܪܬܵܐ ܘܝܘܿܠܸܝܬ ܣܲܪܓܝܼܙܝܼ ܕܣܲܗܡܵܐ ܓܘܼܪܵܐ ܕܡܲܬ̈ܠܸܐ ܕܣܵܠܵܡܲܣ ـ ܕܠܸܐ ܡܲܫܟ̰ܚܝܼ ܐܵܦ ܓܵܘ ܚܲܕ݇ ܟܬܵܒܼܵܐ ܛܒܼܝܼܥܵܐ ـ ܡܘܼܕܟܼܸܪܲܝܗܝ ܠܵܗܿ ܩܵܬܝܼ. ܗܲܪ ܗܵܕܟܼܵܐ ܝܸܡܝܼ ܡܝܲܩܲܪܬܵܐ ܐܵܫܚܹܝܢ ܨܵܝܵܬ ܡܘܼܕܟܼܸܪܬܵܐ ܝܠܵܗܿ ܠܚܲܕ݇ܟܡܵܐ ܡܼܢ ܐܲܢܸܐ ܡܲܬܠܸ̈ܐ ܕܟܸܐ ܦܵܝܫܝܼ ܗ݇ܘܵܘ ܡܘܼܦܠܸܚܸ̈ܐ ܓܵܘ ܡܵܬܲܝܗܝ ܦܲܩܵܒܲܝܠܘܼܘܸܐ (فقی بیگلو) ܒܕܸܫܬܵܐ ܕܐܘܼܪܡܝܼ. ܗܵܕܟܼܵܐ ܒܸܛܥܵܢܵܐ ܝܘܵܢ ܡܸܢܬܵܐ ܡܼܢ ܐܲܢܸܐ ܬܪܸܝܢ ܦܲܖ̈ܨܘܿܦܸܐ ܚܲܒܝܼܒܸ̈ܐ. ܚܲܕ݇ܟܡܵܐ ܡܲܬܠܸ̈ܐ ܙܸܐ ܫܩܝܼܠܬܲܝܗܝ ܝܘܵܢ ܡܼܢ ܟܬܵܒܼܵܐ ܕܩܸܣܸܡܝܵܬܸ̈ܐ ܕܐܵܬܘܿܖ̈ܵܝܸܐ ܣܝܼܡܵܐ ܒܝܲܕ ܒܸܢܝܵܡܝܼܢ ܐܲܪܣܵܢܝܼܣ ܛܒܼܝܼܥܵܐ ܒܫܸܢ݇ܬܵܐ 1948 ܘܗܲܪ ܗܵܕܟܼܵܐ ܡܼܢ ܟܬܵܒܼܵܐ ܕܡܲܬܠܸ̈ܐ ܕܒܵܒܵܐ ܠܵܟ̰ܝܼܢ. ܒܣܲܒܼܪܵܐ ܝܘܵܢ ܕܐܵܗܵܐ ܣܝܵܡܵܐ ܗܵܘܸܐ ܡܵܘܬܪܵܢܵܐ ܒܪܲܗܛܵܐ ܕܢܛܵܪܬܵܐ ܘܡܲܪܘܲܚܬܵܐ ܕܠܸܫܵܢܵܐ ܘܣܸܦܪܵܝܘܼܬܵܐ ܐܵܬܘܼܪܵܝܬܵܐ.