ܛܘܒܼܢܘܬܐ

      ܠܝܘ ܬܠܣܬܘܝ

   ܒܙܲܒܼܢܸ̈ܐ ܕܲܥܒܼܲܪ ܐܝܼܬ ܗ݇ܘܵܐ ܚܲܕ݇ ܡܲܠܟܵܐ ܕܢܦܝܼܠܵܐ ܗ݇ܘܵܐ ܒܬ݇ܫܘܝܼܬܵܐ ܕܡܲܪܥܵܐ. ܚܲܕ݇ ܝܵܘܡܵܐ ܐ݇ܡܸܪܸܗ ܩܵܐ ܒܢܲܝ̈ ܬܪܲܥ ـ ܡܲܠܟܘܼܬܸܗ (دربار) ܕܒܸܕ ܝܵܗܒܼܸܠ ܠܦܲܠܓܵܐ ܕܥܘܼܬܪܸܗ ܩܵܐ ܟܠ ܚܲܕ݇ ܕܡܵܨܸܐ ܒܲܣܸܡ ܠܸܗ ܟܘܼܪܗܵܢܸܗ (ܡܲܪܥܸܗ). ܓ̰ܡܸܥܠܗ݇ܘܿܢ ܟܠܲܝܗܝ ܚܲܟܝܼܡܸ̈ܐ ܕܡܲܫܟ̰ܚܝܼ ܗ݇ܘܵܘ ܚܕܵܐ ܐܘܼܪܚܵܐ ܩܵܐ ܒܲܣܲܡܬܸܗ ܐܝܼܢܵܐ ܟ̰ܘܼ ܚܲܕ݇ ܠܵܐ ܡܘܼܢܬܸܐ ܠܸܗ ܫܒܼܘܿܩ ܡܼܢ ܚܲܕ݇ ܕܐ݇ܡܸܪܸܗ ܕܒܸܚܫܵܒܼܵܐ ܝܠܸܗ ܕܡܵܨܸܐ ܕܒܲܣܸܡ ܠܡܲܪܥܵܐ ܕܡܲܠܟܵܐ. ܗܿܘ ܐ݇ܡܸܪܸܗ: ܐܸܢ ܡܵܨܝܼܬܘܿܢ ܕܡܲܫ݇ܟ̰ܚܝܼܬܘܿܢ ܠܚܲܕ݇ ܐ݇ܢܵܫܵܐ ܚܸܕܝܵܐ ܘܡܲܝܬ݇ܝܼܬܘܿܢ ܠܵܗܿ ܣܘܼܕܪܸܗ ܘܡܲܠܒܼܸܫܝܼܬܘܿܢ ܠܵܗܿ ܥܲܠ ܡܲܠܟܵܐ ܗܿܘ ܒܸܕ ܒܵܣܸܡ ܡܼܢ ܡܲܪܥܸܗ 

   ܫܘܼܕܸܪܸܗ ܡܲܠܟܵܐ ܠܒܝܼܠܕܵܖ̈ܘܼܗܝ (ܡܫܘܼܕܖ̈ܘܼܗܝ) ܩܵܐ ܡܲܫܟ̰ܲܚܬܵܐ ܕܚܲܕ݇ ܐ݇ܢܵܫܵܐ ܚܸܕܝܵܐ. ܚܙܸܩܠܗ݇ܘܿܢ ܐܵܢܝܼ ܒܟܠܸܗ ܐܲܬܪܵܐ ܐܝܼܢܵܐ ܠܵܐ ܡܘܼܢܬܸܐ ܠܗ݇ܘܿܢ ܒܡܲܫ݇ܟ̰ܲܚܬܵܐ ܕܐܵܦ ܚܲܕ݇ ܐ݇ܢܵܫܵܐ ܚܸܕܝܵܐ. ܗܿܘ ܕܐܝܼܬ ܗ݇ܘܵܐ ܠܸܗ ܥܘܼܬܪܵܐ، ܡܲܪܥܵܢܵܐ ܗ݇ܘܵܐ ܘܗܿܘ ܕܨܲܚܝܼܚܵܐ (ܣܵܠܵܡܵܬ) ܗ݇ܘܵܐ ܛܡܝܼܪܵܐ ܗ݇ܘܵܐ ܓܵܘ ܣܢܝܼܩܘܼܬܵܐ. ܐܸܢ ܙܸܐ ܡܲܫܟ̰ܸܚ ܗ݇ܘܵܐ ܚܲܕ݇ ܐ݇ܢܵܫܵܐ ܨܲܚܝܼܚܵܐ ܘܥܲܬܝܼܪܵܐ ܚܲܝܘܼܬܸܗ ܘܒܪܵܬ ـ ܙܵܘܓܸܗ ܠܸܐ ܗ݇ܘܵܐ ܚܫܝܼܚܸ̈ܐ ܘܐܸܢ ܗܵܘܸܐ ܗ݇ܘܵܐ ܠܸܗ ܙܲܖ̈ܥܸܐ ܐܵܦ ܐܵܢܝܼ ܠܸܐ ܗ݇ܘܵܘ ܐܲܝܟܼ ܨܸܒܼܝܵܢܸܗ 

   ܚܲܕ݇ ܠܲܝܠܸܐ ܒܲܪ ܡܲܠܟܵܐ (ܒܪܘܿܢܵܐ ܕܡܲܠܟܵܐ) ܥܒܼܵܪܵܐ ܗ݇ܘܵܐ ܡܼܢ ܟܸܣ ܚܲܕ݇ ܟܘܼܪܚܵܐ (ܟܘܼܠܘܼܚܬܵܐ) ܘܫܡܸܥܠܸܗ ܕܚܲܕ݇ ܐ݇ܢܵܫܵܐ ܐ݇ܡܵܪܵܐ ܝܠܸܗ: ـ ܡܸܢܬܵܐ ܡܼܢ ܐܲܠܵܗܵܐ ܡܪܲܝܡܵܐ ܕܡܘܼܟܡܸܠܘܼܗܝ ܝܘܸܢ ܫܘܼܓܼ݇ܠܝܼ، ܐ݇ܟܼܝܼܠܘܼܗܿ ܝܘܸܢ ܡܸܐܟܼܘܿܠܬܝܼ ܘܐܵܕܝܼܵܐ ܟܸܐ ܡܵܨܸܝܢ ܕܝܵܪܟܼܸܢ ܘܕܵܡܟܼܸܢ. ܡܘܼܕ ܡܸܢܕܝܼ ܐ݇ܚܸܪ݇ܢܵܐ ܡܵܨܸܝܢ ܛܵܠܒܸܢ ܡܼܢ ܡܵܪܝܵܐ ܐܲܠܵܗܵܐ؟

   ܚܕܸܐ ܠܸܗ ܪܵܒܵܐ ܒܲܪ ܡܲܠܟܵܐ ܘܦܘܼܩܸܕܠܸܗ ܕܫܵܩܠܝܼ ܠܵܗܿ ܣܘܼܕܪܸܗ ܘܡܲܝܬ݇ܝܼ ܠܵܗܿ ܠܟܸܣ ܒܵܒܸܗ ܘܦܵܪܥܝܼ ܠܸܗ ܗܿܘ ܐ݇ܢܵܫܵܐ ܦܲܩܝܼܪܵܐ (ܡܸܣܟܝܼܢܵܐ) ܐܲܝܟܼ ܨܸܒܼܝܵܢܸܗ. ܐܝܼܡܲܢ ܕܒܝܼܠܕܵܖܸ̈ܐ ܥܒܼܸܪܗ݇ܘܿܢ ܓܵܘ ܟܘܼܪܚܵܐ ܩܵܐ ܫܩܵܠܬܵܐ ܕܣܘܼܕܪܵܐ ܕܗܿܘ ܐ݇ܢܵܫܵܐ ܚܙܸܐ ܠܗ݇ܘܿܢ ܕܐܲܚܟ̰ܝܼ ܐܝܼܬ ܚܲܕ݇ ܣܘܼܕܪܵܐ ܥܲܠ ܦܲܓܼܪܵܐ ܕܗܿܘ ܡܸܣܟܸܢܵܐ ܐܝܼܢܵܐ ܒܟܠܵܗܿ ܐܵܗܵܐ ܫܲܟܘܼܪܸܐ ܗ݇ܘܵܐ ܠܐܲܠܵܗܵܐ

                                     ܦܘܫܩܐ ܒܝܕ: ܫܡܝܪܡ ܕ. ܦܘܪܝܐܢ