ܐ݇ܢܫܐ ܣܒܼܐ ܘܝܡܐ

                                               ܝܘܐܪܫ ܗܝܕܘ

   ܒܵܬܲܪ ܚܲܕ݇ܟܡܵܐ ܙܘܼܡܵܖܸ̈ܐ ܥܝܵܕܵܝܸ̈ܐ ܒܚܲܕ݇ ܪܲܡܫܵܐ ܕܚܲܕ݇ܒܫܲܒܵܐ ܩܲܫܝܼܫܵܐ ܕܡܲܪܥܝܼܬܵܐ ܡܸܢ݇ܕܪܸܫ݇ ܩܝܼܡܠܸܗ ܠܐܲܩܠܸܗ ܢܝܼܚܵܐܝܼܬ ܘܡܘܼܩܪܸܒܼܠܸܗ ܚܕܵܐ ܡܵܘܕܥܵܢܘܼܬܵܐ ܟܪܝܼܬܵܐ ܥܲܠ ܚܲܒܼܪܵܐ ܕܫܲܒܼܪܘܼܬܸܗ ܘܝܼܬܸܒܼܠܸܗ. ܗܵܝ ܓܵܗܵܐ ܚܲܕ݇ ܓܲܒܼܪܵܐ ܣܵܒܼܵܐ ܦܣܝܼܥܠܸܗ ܠܩܘܼܕܡܵܐ ܘܣܸܠ݇ܩܠܸܗ ܠܒܸܝܡܵܐ ܘܐ݇ܡܸܪܸܗ "ܒܚܲܕ݇ ܡܼܢ ܝܵܘܡܵܢܸ̈ܐ ܬܠܵܬܵܐ ܦܲܖ̈ܨܘܿܦܸܐ، ܒܵܒܵܐ ܘܒܪܘܿܢܸܗ ܘܚܲܒܼܪܵܐ ܕܒܪܘܿܢܸܗ، ܪܕܸܐܠܗܘܿܢ ܒܝܲܡܵܐ ܡܼܢ ܣܝܼܦܵܐ ܕܐܸܘܩܝܵܢܘܼܣ ܫܲܠܝܵܐ. ܡܼܢ ܫܸܠܬܵܢܸܐ ܚܕܵܐ ܥܲܠܥܵܠܵܐ ܥܲܫܝܼܢܬܵܐ ܗܘܵܬ ܠܵܗܿ ܒܝܲܡܵܐ ܘܐܸܠܦܵܐ ܦܝܼܫܠܵܗܿ ܛܪܝܼܦܬܵܐ ܒܠܲܦܸ̈ܐ ܫܓܼܝܼܫܸ̈ܐ ܘܠܵܐ ܡܨܸܐܠܗ݇ܘܿܢ ܕܕܵܥܪܝܼ ܠܣܝܼܦܵܐ. ܘܐܵܦܸܢ ܕܒܵܒܵܐ ܡܲܠܵܚܵܐ ܡܗܝܼܪܵܐ ܝܼܗܘܵܐ ܘܡܵܪܸܐ ܢܸܣܝܵܢܵܐ، ܠܵܐ ܡܨܸܐܠܸܗ ܕܲܡܕܲܒܲܪ ܠܐܸܠܦܵܐ ܐܲܝܟܼ ܕܘܵܠܸܐ. ܦܝܼܫܠܗ݇ܘܿܢ ܡܖ̈ܘܼܦܝܸܐ ܒܥܘܼܡܩܵܐ ܕܐܸܘܩܝܵܢܘܼܣ".

    ܠܚܲܕ݇ܟܡܵܐ ܖ̈ܦܵܦܸܐ ܟܠܸܐܠܸܗ ܡܼܢ ܗܲܡܙܲܡܬܵܐ ܘܐܝܼܬܵܐ ܐ݇ܡܸܪܸܗ: "ܕܒܼܸܩܠܸܗ ܒܵܒܵܐ ܠܚܲܒܼܠܵܐ ܕܫܘܼܙܵܒܼܵܐ (ܦܘܼܨܵܝܵܐ) ܟܲܕ ܠܲܝܬ ܗ݇ܘܵܐܠܸܗ ܫܒܼܘܿܩ ܡܼܢ ܚܲܕ݇ܟܡܵܐ ܖ̈ܦܵܦܸܐ ܕܦܵܣܸܩ ܒܪܸܥܝܵܢܸܗ ܠܐܲܝܢܝܼ ܡܼܢ ܬܪܸܝܢ ܥܠܲܝܡܸ̈ܐ ܒܸܬ ܦܵܪܸܩ: ܠܒܪܘܿܢܸܗ ܚܲܒܝܼܒܼܵܐ ܝܲܢ ܠܚܲܒܼܪܵܐ ܕܒܪܘܿܢܸܗ!! ܗܿܘ ܝܵܕܸܥ ܗ݇ܘܵܐ ܕܒܪܘܿܢܸܗ ܝܼܗ݇ܘܵܐ ܡܗܲܝܡܢܵܐ ܘܲܡܫܝܼܚܵܝܵܐ ܫܲܪܝܼܪܵܐ ܟܲܕ ܚܲܒܼܪܸܗ ܠܸܐ ܗ݇ܘܵܐ. ܒܚܲܕ݇ ܩܵܠܵܐ ܚܲܫܵܢܵܐ ܘܡܲܪܝܼܪܵܐ ܡܘܿܩܘܸܚܠܸܗ ܒܵܒܵܐ "ܒܪܘܿܢܝܼ، ܐܲܢ݇ܬ ܝܵܕܥܸܬ ܕܐܵܢܵܐ ܟܸܐ ܡܲܚܒܸܢܘܼܟܼ ܝܲܬܝܼܪ ܡܼܢ ܚܲܝ̈ܝܼ".

   ܒܗܿܘ ܪܦܵܦܵܐ ܡܪܘܿܦܸܐ ܠܸܗ ܚܲܒܼܠܵܐ ܠܚܲܒܼܪܵܐ ܕܒܪܘܿܢܸܗ ܘܩܵܡ ܦܵܪܸܩܠܸܗ ܡܼܢ ܡܵܘܬܵܐ. ܚܢܸܩܠܸܗ ܒܪܘܿܢܸܗ ܘܦܲܓܼܪܸܗ ܛܠܸܩܠܸܗ ܒܚܸܫܟܵܐ ܕܠܸܠܝܵܐ ܒܥܘܼܡܩܵܐ ܕܝܲܡܵܐ ܫܓܼܝܼܫܵܐ. ܒܵܒܵܐ ܚܲܬܝܼܬܵܐ ܗ݇ܘܵܐ ܕܒܪܘܿܢܸܗ ܝܼܗ݇ܘܵܐ ܡܫܝܼܚܵܝܵܐ ܡܗܲܝܡܢܵܐ ܘܒܸܬ ܐܵܙܸܠ ܠܡܲܠܟܘܼܬܵܐ ܫܡܲܝܵܢܝܼܬܵܐ ܘܚܲܝܸ̈ܐ ܥܲܠܡܝܼܢܵܝܸ̈ܐ ܩܕܲܡ ܬܪܘܿܢܘܿܣ ܕܡܵܪܸܗ ܘܦܵܪܘܿܩܸܗ ܝܼܫܘܿܥ ܡܫܝܼܚܵܐ. ܘܠܵܐ ܒܥܸܐܠܸܗ ܕܚܲܒܼܪܵܐ ܕܒܪܘܿܢܸܗ ܡܵܐܸܬ ܗ݇ܘܵܐ ܘܗܿܘ ܠܵܐ ܝܵܕܸܥ ܗ݇ܘܵܐ ܠܡܫܝܼܚܵܐ. ܥܲܠ ܗܵܕܵܐ ܕܒܼܸܚܠܸܗ ܠܒܪܘܿܢܸܗ ܚܠܵܦ ܦܘܼܪܩܵܢܵܐ ܕܚܲܒܼܪܸܗ. ܚܙܵܘ ܟܡܵܐ ܥܲܡܝܼܩܵܐ ܝܠܸܗ ܚܘܼܒܸܗ ܕܡܵܪܝܵܐ ܐܲܠܵܗܵܐ ܕܲܥܒܼܸܕܠܸܗ ܗܵܕܸܟܼ ܚܠܵܦ ܦܘܼܪܩܵܢܲܢ.!!!

   ܒܵܬܲܪ ܐܲܢܸܐ ܦܸܬܓܼܵܡܸ̈ܐ ܨܠܸܐ ܠܸܗ ܐ݇ܢܵܫܵܐ ܣܵܒܼܵܐ ܡܼܢ ܒܸܝܡܵܐ ܘܝܼܬܸܒܼܠܸܗ ܒܕܘܼܟܸܗ. ܘܟܲܕ ܫܠܸܡܠܵܗܿ ܬܸܫܡܸܫܬܵܐ، ܬܪܸܝܢ ܥܠܲܝܡܸ̈ܐ ܐ݇ܬܸܐܠܗ݇ܘܿܢ ܘܩܘܼܪܒܸܢܗ݇ܘܿܢ ܠܗܿܘ ܐ݇ܢܵܫܵܐ ܣܵܒܼܵܐ. ܚܲܕ݇ ܡܼܢ ܐܵܢܝܼ ܐ݇ܡܸܪܸܗ "ܐܵܗܵܐ ܬܘܼܢܵܝܘܼܟܼ ܫܲܦܝܼܪܵܐ ܗ݇ܘܵܐ ܐܝܼܢܵܐ ܠܸܐ ܚܵܫܒܼܸܢ ܕܚܲܕ݇ ܡܸܢܕܝܼ ܣܘܼܥܪܵܢܵܝܵܐ ܝܠܸܗ. ܐܝܼܡܲܢ ܕܒܵܒܵܐ ܕܵܒܼܸܚ ܠܲܒܪܘܿܢܸܗ ܥܲܠ ܣܲܒܼܪܵܐ ܕܗܿܘ ܥܠܲܝܡܵܐ ܐ݇ܚܸܪ݇ܢܵܐ ܒܸܕ ܗܵܘܸܐ ܡܫܝܼܚܵܝܵܐ ܒܕܲܥܬܝܼܕ"

   ܥܢܸܐ ܠܸܗ ܓܲܒܼܪܵܐ ܣܵܒܼܵܐ ܘܐ݇ܡܸܪܸܗ ܥܲܡ ܚܕܵܐ ܒܲܪܣܲܡܬܵܐ ܪܫܝܼܡܬܵܐ ܥܲܠ ܓܒܼܝܼܢܸܗ ܪܘܝܼܚܵܐ "ܫܪܵܪܵܐ ܒܸܐܡܵܪܵܐ ܝܬܘܿܢ، ܗܵܕܟܼܵܐ ܣܘܼܥܪܵܢܵܐ ܠܸܐ ܝܠܸܗ ܪܵܒܵܐ ܩܵܝܡܵܢܵܝܵܐ، ܐܝܼܢܵܐ ܐܵܢܵܐ ܡܛܲܝܒܼܵܐ ܝܘܸܢ ܠܐܲܟܼܵܐ ܐܸܕܝܘܿܡ ܕܐܵܡܪܸܢ ܐܸܠܵܘܟܼܘܿܢ ܕܐܵܗܵܐ ܬܘܼܢܵܝܵܐ ܩܵܡ ܝܵܗܸܒܼ ܠܝܼ ܚܲܕ݇ ܨܸܡܚܵܐ ܚܛܝܼܦܵܐ ܡܼܢ ܣܘܼܥܪܵܢܵܐ ܬܡܝܼܗܵܐ ܕܡܵܪܝܵܐ ܟܲܕ ܕܒܼܸܚܠܸܗ ܠܒܪܘܿܢܸܗ ܝܼܚܝܼܕܵܝܵܐ ܚܠܵܦ ܦܘܼܪܩܵܢܲܢ. ܘܒܵܥܝܸܢ ܕܡܲܕܥܸܢܵܘܟܼܘܿܢ ....................ܕܐܵܢܵܐ ܝܼܘܸܢ ܗ݇ܘܵܐ ܗܿܘ ܚܲܒܼܪܵܐ ܕܲܒܪܘܿܢܵܐ"!!!  

   ܐܵܗܵܐ ܡܲܬܠܵܐ ܡܲܠܘܼܦܲܢ ܝܼܠܸܗ: ܩܵܐ ܥܵܠܡܵܐ ܐܲܢ݇ܬ ܝܑܼܘܸܬ ܚܲܕ݇ ܦܲܪܨܘܿܦܵܐ ܒܲܠܚܘܿܕ، ܐܝܼܢܵܐ ܩܵܐ ܚܲܕ݇ܟܡܵܐ ܐܲܢ݇ܬ ܝܼܘܸܬ ܥܵܠܡܵܐ ܟܠܸܗ