ܡܬܠ̈ܐ ܐܬܘܖ̈ܝܐ

ܫܡܝܪܡ ܕ.ܦܘܪܝܐܢ

ܦ

܀ ܦܲܐܬܵܐ ܠܸܐ ܝܠܵܗܿ ܟ̰ܲܪܘܼܚܬܵܐ ܝܠܵܗܿ

ܦܘܼܫܵܩܵܐ: ܟܸܐ ܦܵܐܸܫ ܡܘܼܦܠܸܚܵܐ ܩܵܐ ܡܲܕܲܥܬܵܐ ܕܚܲܕ݇ ܐ݇ܢܵܫܵܐ ܦܲܐܬܵܢܵܐ ܕܟܡܵܐ ܕܚܲܒܖܸ̈ܐ ܫܵܡܥܸܐ ܠܸܐ ܢܵܟܼܸܦ ܘܠܸܐ ܓܵܪܸܫ ܐܝܼܕܵܐ ܡܼܢ ܫܘܼܓܼ݇ܠܘܼܗܝ

܀ ܦܲܐܬܘܼܗܝ ܐ݇ܟܘܼܡܬܵܐ ܝܠܵܗܿ. ܐܸܢ ܓܵܪܘܼܣܬܵܐ ܓܵܪܣܝܼ ܒܪܸܫܘܼܗܝ ܩܵܠܘܼܗܝ ܠܸܐ ܦܵܠܸܛ

ܦܘܼܫܵܩܵܐ: ܦܸܠܵܢ ܐ݇ܢܵܫܵܐ ܚܲܕ݇ ܗܵܕܟܼܵܐ ܡܵܪܵܐ ܕܓܢܵܗܵܐ ܝܠܸܗ ܕܟܠ ܡܸܢܕܝܼ ܕܩܵܬܘܼܗܝ ܐܵܡܪܝܼ ܝܲܢ ܡܲܝܬ݇ܝܼ ܒܪܸܫܘܼܗܝ ܠܸܐ ܩܵܘܸܠ

܀ ܦܵܘܚܵܐ ܐ݇ܡܝܼܪܵܐ ܗ݇ܘܵܐ ܩܵܐ ܡܘܼܠܵܐ: ܦܬܘܿܚ ܬܲܪܥܘܼܟܼ ܬܸܒܼܢܵܐ ܡܲܬ݇ܝܸܢ. ܡܘܼܠܵܐ ܐ݇ܡܝܼܪܵܐ ܗ݇ܘܵܐ: ܗܵܘܸܝܢ ܚܠܵܦܘܼܟܼ ܠܵܐ ܡܲܝܬ݇ܝܼ؛ ܠܵܐ ܦܵܠܸܛ

ܦܘܼܫܵܩܵܐ: ܒܘܼܬ ܗܿܘ ܐ݇ܢܵܫܵܐ ܝܠܵܗܿ ܕܐܸܢ ܚܲܕ݇ ܫܘܼܓܼ݇ܠܵܐ ܥܵܒܼܸܕ ܙܝܵܢܘܼܗܝ ܒܘܼܫ ܙܵܘܕܵܐ ܟܸܐ ܗܵܘܝܵܐ ܡܼܢ ܚܲܝܪܘܼܗܝ ܒܘܼܬ ܗܵܕܵܐ ܗܵܕܟܼܵܐ ܟܸܐ ܬܲܢܝܼ ܕܠܵܐ ܡܵܚܸܐ ܙܝܵܢܵܐ.

܀ ܦܠܘܿܚ ܩܵܐ ܕܝܼܝܼ، ܝܠܘܿܦ ܩܵܐ ܓܵܢܘܼܟܼ.

ܦܘܼܫܵܩܵܐ: ܚܲܕ݇ ܡܲܪܬܝܵܢܘܼܬܵܐ ܝܠܵܗܿ ܩܵܐ ܥܠܲܝܡܸ̈ܐ ܕܡܲܕܥܝܼ ܠܗ݇ܘܿܢ ܕܦܘܼܠܚܵܢܵܐ ܐܵܦܸܢ ܕܗܵܘܸܐ ܕܠܵܐ ܦܘܼܪܥܵܢܵܐ. ܐܝܼܢܵܐ ܥܸܠܬܵܐ ܕܩܢܵܝܬܵܐ ܕܢܸܣܝܵܢܵܐ ܝܠܸܗ ܘܒܘܼܬ ܗܵܕܵܐ ܡܵܪܵܐ ܕܝܘܼܬܪܵܢܵܐ ܝܠܸܗ ܩܵܬܲܝܗܝ

܀ ܦܵܠܚܝܼ ܦܠܝܼܚܸ̈ܐ ܘܐܵܟܼܠܝܼ ܢܝܼܚܸ̈ܐ.

ܦܘܼܫܵܩܵܐ: ܟܸܐ ܡܲܦܠܸܚܝܼ ܠܸܗ ܐܵܗܵܐ ܡܲܬܠܵܐ ܐܝܼܡܲܢ ܕܚܲܕ݇ܟܡܵܐ ܐ݇ܢܵܫܸ̈ܐ ܕܠܸܐ ܝܢܵܐ ܦܠܝܼܚܸ̈ܐ ܘܓ̰ܘܼܢܓ̰ܸܖܸ̈ܐ ܡܼܢ ܩܲܕ݇ܡ ܐܵܢܝܼ ܕܙܲܗܡܲܬ ܓܖ̈ܝܼܫܸܐ ܝܢܵܐ ܟܸܐ ܝܵܬܒܼܝܼ ܥܲܠ ܣܘܼܦܪܵܐ ܘܫܲܖ̈ܝܼ ܒܸܐܟܼܵܠܵܐ ܘܒܸܫܬܵܝܵܐ

܀ ܦܸܠܵܢܟܲܣ ܗܲܪ ܠܵܐ ܒܘܼܪܒܸܐ ܠܸܗ (ܓܘܼܪܘܸܣܠܸܗ). ܗܲܡܵܫܵܐ ܗ݇ܘܸܐ ܠܵܗܿ ܡܚܸܠܬܘܼܗܝ ܬܠܝܼܬܵܐ ܒܥܸܪܒܵܠܵܐ

ܦܘܼܫܵܩܵܐ: ܒܘܼܬ ܚܲܕ݇ ܐ݇ܢܵܫܵܐ ܝܠܵܗܿ ܕܠܸܐ ܝܠܸܗ ܡܲܢܬܘܼܝܸܐ ܘܟܠ ܥܕܵܢܵܐ ܦܝܵܫܵܐ ܝܠܸܗ ܒܚܕܵܐ ܐܲܝܟܵܢܵܝܘܼܬܵܐ

܀ ܦܠܵܫܵܐ ܕܓܲܖ̈ܓܘܼܡܸܐ ܒܪܸܫܵܐ ܕܛܠܲܦ̰ܚܸ̈ܐ ܝܠܸܗ.

ܦܘܼܫܵܩܵܐ: ܐܝܼܡܲܢ ܕܬܪܸܝܢ ܓܵܢܵܬܸ̈ܐ ܗܵܘܝܼ ܒܸܕܪܵܫܵܐ ܝܲܢ ܦܠܵܫܵܐ ܐܝܼܢܵܐ ܠܵܐ ܗܵܘܝܵܐ ܒܲܗܪܵܢܬܵܐ ܕܒܪܸܫܵܐ ܕܡܘܼܕܝܼ ܝܠܸܗ، ܟܸܐ ܡܲܦܠܸܚܝܼ ܠܸܗ ܐܵܗܵܐ ܡܲܬܠܵܐ ܕܡܲܕܥܝܼ ܕܒܹܝܠ ܐܵܢܝܼ ܬܪܸܝܢ ܐܝܼܬ ܚܲܕ݇ ܦܘܼܠܵܓܼܵܐ ܛܸܫܝܵܐ 

܀ ܦܲܪܕܸܝܣܵܐ ܕܐܵܢܵܐ ܠܵܐ ܐܵܙܸܠ݇ܢ، ܚܘܼܫ ܟܲܠܒܸ̈ܐ ܓܲܪܡܸܠܝܼ ܓܵܘܘܼܗܝ.

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܠܐܵܢܝܼ ܕܐܵܢܵܝܸ̈ܐ ܝܢܵܐ ܘܟܠ ܚܲܕ݇ ܡܸܢܕܝܼ ܐܸܢ ܠܵܐ ܗܵܘܸܐ ܠܝܘܼܬܪܵܢܲܝܗܝ ܦܲܪܨܘܿܦܵܝܵܐ ܠܸܐ ܫܵܩܠܝܼ ܚܕܵܐ ܦܵܣܘܵܥܬܵܐ ܩܵܬܘܼܗܝ

ܨ

܀ ܨܸܒܥܝܼ ܩܪܝܼܛܵܐ ܠܝܼ.

ܦܘܼܫܵܩܵܐ: ܐܝܼܡܲܢ ܕܒܚܙܵܝܬܵܐ ܝܲܢ ܫܡܵܥܬܵܐ ܕܚܲܕ݇ ܡܸܢܕܝܼ ܪܵܥܫܝܼ ܠܫܪܵܪܵܐ ܕܠܸܐ ܗ݇ܘܵܐ ܓܸܠܝܵܐ، ܟܸܐ ܡܲܦܠܸܚܝܼ ܠܐܵܗܵܐ ܡܲܬܠܵܐ.

܀ ܨܦܵܝܝܼ ܣܸܪܝܵܐ ܠܸܐ ܝܵܕܸܥ.

ܦܘܼܫܵܩܵܐ: ܦܸܠܵܢ ܐ݇ܢܵܫܵܐ ܠܸܐ ܝܠܸܗ ܝܲܕܥܵܢܵܐ ܕܨܦܵܝܘܼܬܵܐ ܗ.ܕ. ܟܡܵܐ ܕܗܲܝܸܪܸܬ ܠܸܗ، ܟܲܕ ܐܵܬܝܵܐ ܥܕܵܢܵܐ ܚܵܨܘܼܗܝ ܒܸܕ ܦܵܬܸܠܸܗ ܥܲܠܘܼܟܼ

ܩ

܀ ܩܵܐ ܒܵܒܲܢ ܒܪܘܿܢܵܐ ܠܸܐ ܗܵܘܲܚ.

ܦܘܼܫܵܩܵܐ: ܚܲܕ݇ ܡܸܢܕܝܼ ܡܸܢܲܢ ܠܸܐ ܦܵܠܸܛ، ܥܲܠ ܚܲܕ݇ ܕܘܼܟܵܐ ܠܸܐ ܡܵܛܲܚ.

܀ ܩܵܐ ܚܡܵܪܵܐ ܐ݇ܡܸܪܗ݇ܘܿܢ: ܩܵܡ ܗܵܘܸܐ ܠܘܼܟܼ ܟܘܼܪܪܵܐ، ܐ݇ܡܸܪܸܗ: ܛܲܥܢܝܼ ܙܝܼܕ ܠܸܗ

ܦܘܼܫܵܩܵܐ: ܗܿܝ ܥܕܵܢܵܐ ܟܸܐ ܡܲܦܠܸܚܝܼ ܠܸܗ ܡܲܬܠܵܐ ܕܐ݇ܢܵܫܵܐ ܠܵܐ ܚܵܕܸܐ ܒܚܕܵܐ ܩܲܘܲܡܬܵܐ ܒܗܿܝ ܕܗܿܝ ܩܲܘܲܡܬܵܐ ܐܵܦܸܢ ܡܲܚܕܝܼܵܢܬܵܐ ܗܵܘܝܵܐ ܒܸܕ ܒܵܪܝܵܐ ܚܕܵܐ ܝܘܼܩܪܵܐ ܐ݇ܚܸܪ݇ܬܵܐ ܥܲܠ ܩܕܵܠܵܐ ܕܐ݇ܢܵܫܵܐ

܀ ܩܵܐ ܟܵܘܸܕܢܵܐ ܐ݇ܡܸܪܗ݇ܘܿܢ: ܒܵܒܵܟܼܝ ܡܵܢܝܼ ܝܠܸܗ؟ ܐ݇ܡܸܪܵܗܿ: ܚܵܠܘܼܘܝܼ ܣܘܼܣܸܐ ܝܠܸܗ

ܦܘܼܫܵܩܵܐ: ܐܝܼܡܲܢ ܕܚܲܕ݇ ܐ݇ܢܵܫܵܐ ܠܵܐ ܗܵܘܸܐ ܠܸܗ ܕܝܼܠܵܝܵܬܸ̈ܐ ܥܸܠܵܝܸ̈ܐ ܘܚܵܦܸܛ ܕܐܵܣܸܪܵܗܿ ܓܵܢܘܼܗܝ ܒܚܲܕ݇ܟܡܵܐ ܦܲܖ̈ܨܘܿܦܸܐ ܚܫܝܼܚܸ̈ܐ ܟܸܐ ܡܲܦܠܸܚܝܼ ܠܸܗ ܐܵܗܵܐ ܡܲܬܠܵܐ ܩܵܐ ܕܡܲܕܥܝܼ ܕܦܸܠܵܢ ܐ݇ܢܵܫܵܐ ܠܲܝܬ ܠܸܗ ܚܲܕ݇ ܡܸܢܕܝܼ ܩܵܐ ܚܸܩܪܵܐ ܘܒܵܥܝܸܐ ܓܲܪܘܸܣܠܵܗܿ ܓܵܢܘܼܗܝ ܒܡܸܨܥܵܝܘܼܬܵܐ ܕܚܸܙܡܵܢܘܼܗܝ ܡܫܲܡܗܸ̈ܐ 

܀ ܩܵܐ ܟܸܪܘܝܼܫ ܒܸܕ ܬܲܢܝܼ ܥܪܘܿܩ، ܩܵܐ ܬܵܙܝܼ ܒܸܕ ܬܲܢܝܼ ܕܒܼܘܿܩ.

ܦܘܼܫܵܩܵܐ: ܒܘܼܬ ܐܵܢܝܼ ܝܠܵܗܿ ܕܒܡܲܦܠܲܚܬܵܐ ܕܦܲܢܕܸ̈ܐ ܘܦܝܼܠܸ̈ܐ ܒܸܚܒܼܵܛܘܼܗܿ ܝܢܵܐ ܐܵܪܵܐ ܘܒܸܕܪܵܝܲܝܗܝ ܝܢܵܐ ܐ݇ܢܵܫܸ̈ܐ ܠܓܵܢܵܐ ܕܐܘܼܕܵܠܸܐ

܀ ܩܵܐ ܩܵܪܵܟ̰ܵܝܬܵܐ ܐ݇ܡܸܖ̈ܗ݇ܘܿܢ: ܬܵܐ ܗ݇ܘܝܼ ܚܵܢܸܡ، ܐ݇ܡܸܪܵܗܿ: ܢܵܥܟܸܡ ܟܸܐ ܢܵܥܟܸܡ.  

ܦܘܼܫܵܩܵܐ: ܒܘܼܬ ܐܵܢܝܼ ܝܠܵܗܿ ܕܠܸܐ ܝܢܵܐ ܒܸܪܥܵܫܵܐ ܠܗܿܘ ܡܸܢܕܝܼ ܕܠܝܘܼܬܪܵܢܲܝܗܝ ܝܠܸܗ ܘܠܸܐ ܝܢܵܐ ܩܲܒܘܼܠܸܐ ܠܡܸܠܟܸ̈ܐ ܛܵܒܼܸ̈ܐ ܕܐ݇ܚܸܖ̈݇ܢܸܐ

܀ ܩܵܐ ܬܲܥܠܵܐ ܐ݇ܡܸܪܗ݇ܘܿܢ: ܣܵܗܕܘܼܟܼ ܡܵܢܝܼ ܝܠܸܗ؟ ܐ݇ܡܸܪܸܗ: ܛܘܼܦܪܝܼ

 ܦܘܼܫܵܩܵܐ: ܒܘܼܬ ܐ݇ܢܵܫܸ̈ܐ ܝܠܸܗ ܕܟܲܕ ܥܵܒܼܕܝܼ ܚܲܕ݇ ܫܘܼܓܼ݇ܠܵܐ ܓܼܸܠܛܵܐ (ܚܸܠܛܵܐ) ܟܸܐ ܕܲܓܠܝܼ ܘܟܸܐ ܡܲܚܙܝܼ ܚܲܕ݇ܟܡܵܐ ܣܵܗܕܸ̈ܐ ܙܝܼܦܵܢܸ̈ܐ ܕܐܵܦ ܐܵܢܝܼ ܐܝܼܕܲܝܗܝ ܓܵܘ ܫܘܼܓܼ݇ܠܵܐ ܝܠܵܗܿ. 

܀ ܩܘܼܒܠܵܐ ܕܐܘܿܪܸܫܠܸܡ ܗܵܘܸܐ، ܐ݇ܚܸܪ݇ܢܵܐ ܠܸܐ ܕܵܝܠܵܢܸܗ (ܚܵܙܝܵܢܸܗ).

ܦܘܼܫܵܩܵܐ: ܐܵܗܵܐ ܡܲܬܠܵܐ ܟܸܐ ܡܲܦܠܸܚܝܼ ܠܸܗ ܐܝܼܡܲܢ ܕܗܵܘܝܼ ܟܖ̈ܝܼܒܸܐ ܪܵܒܵܐ ܡܼܢ ܚܲܕ݇ ܐ݇ܢܵܫܵܐ ܘܒܵܥܝܼ ܐܵܡܪܝܼ ܕܠܸܐ ܡܲܬܒܼܝܼ ܠܵܗܿ ܐܲܩܠܲܝܗܝ ܓܵܘ ܒܲܝܬܘܼܗܝ

܀ ܩܘܿܡ ܐܵܗ ܚܡܵܪܵܐ ܡܼܢ ܥܲܠ ܐܵܗ ܓܸܫܪܵܐ ܡܲܥܒܼܸܪܸܗ!

ܦܘܼܫܵܩܵܐ: ܐܝܼܡܲܢ ܕܫܘܼܓܼ݇ܠܵܐ ܬܵܦܸܩ ܒܚܕܵܐ ܥܲܣܩܘܼܬܵܐ ܟܸܐ ܡܲܦܠܸܚܝܼ ܠܸܗ ܒܗܿܝ ܕܐܝܼܡܲܢ ܚܡܵܪܵܐ ܙܵܕܸܥ ܘܠܵܐ ܒܵܥܸܐ ܕܓ̰ܵܘܸܓ̰، ܪܵܒܵܐ ܥܲܣܩܵܐ ܝܠܵܗܿ ܡܲܥܒܼܲܪܬܘܼܗܝ   ܡܼܢ ܥܲܠ ܓܸܫܪܵܐ. 

܀ ܩܘܼܣܵܪܬܵܐ ܟܸܐ ܚܵܕܪܵܐ، ܟܣܵܝܬܘܼܗܿ ܟܸܐ ܡܲܫܟ̰ܚܵܐ ܠܵܗܿ.

ܦܘܼܫܵܩܵܐ: ܢܝܼܫܵܐ ܐܵܗܵܐ ܝܠܸܗ ܕܐܵܡܪܝܼ ܦܸܠܵܢ ܐ݇ܢܵܫܵܐ ܬܦܝܼܩܵܐ ܘܡܘܼܫܟ̰ܚܵܐ ܝܠܸܗ ܠܚܲܕ݇ ܕܒܸܠܚܵܡܵܐ ܝܠܵܗܿ ܩܵܬܘܼܗܝ 

܀ ܩܘܼܣܵܪܬܵܐ ܩܵܐ ܟ̰ܲܡܟ̰ܵܐ ܐ݇ܡܸܪܵܗܿ: ܐܸܫܬܝܼ ܡܼܢ ܕܲܗܒܼܵܐ ܝܠܵܗܿ. ܟ̰ܲܡܟ̰ܵܐ ܐ݇ܡܸܪܸܗ: ܒܸܝܬ ܒܵܒܘܼܗܿ ܠܵܐ ܫܸܥܝܵܐ ܐܵܕܝܼܵܐ ܦܠܸܛܠܝܼ ܡܼܢ ܓܵܘܵܟܼܝ!

ܦܘܼܫܵܩܵܐ: ܒܘܼܬ ܐܵܢܝܼ ܝܠܸܗ ܕܟܸܐ ܚܵܩܪܝܼ ܠܵܗܿ ܓܵܢܲܝܗܝ ܒܕܘܼܓܠܸ̈ܐ ܟܸܣ ܐܵܢܝܼ ܕܟ̰ܸܡ ܨܦܵܝܝܼ ܟܸܐ ܝܵܕܥܝܼܠܗ݇ܘܿܢ.

        ܐܩܦܬܐ ܒܡܢܝܢܐ ܕܥܬܝܕ

ܠܐܝ ܠܐܝ ܒܐܘܡܬܐ ܣܘܪܝܝܬܐ

      ܫܡܝܪܡ ܕ.ܦܘܪܝܐܢ

   ܙܡܝܼܖ̈ܝܵܬܸܐ ܕܠܵܐܝ ܠܵܐܝ ܚܲܕ݇ ܣܲܗܡܵܐ ܡܼܢ ܣܸܦܪܵܝܘܼܬܵܐ ܣܸܦܬܵܢܵܝܬܵܐ ܝܢܵܐ ܘܐܵܢܝܼ ܟ̰ܸܡ ܥܲܬܝܼܩܸ̈ܐ ܙܡܝܼܖ̈ܝܵܬܸܐ ܕܒܪܝܼܬܵܐ. ܙܡܝܼܪܬܵܐ ܕܠܵܐܝ ܠܵܐܝ ܟܸܐ ܦܵܝܫܵܐ ܙܡܝܼܪܬܵܐ ܒܝܲܕ ܝܸܡܵܐ ܩܵܐ ܡܲܫܠܵܝܬܵܐ ܘܡܲܕܡܲܟܼܬܵܐ ܕܫܲܒܼܪܘܼܗܿ. ܒܐܲܢܸܐ ܙܡܝܼܖ̈ܝܵܬܸܐ ܝܸܡܵܐ ܟܸܐ ܗܲܩܝܵܐ ܡܼܢ ܚܲܫܘܼܗܿ، ܚܲܕܘܼܬܘܼܗܿ، ܝܘܼܐܵܒܼ̈ܘܼܗܿ ܘܩܒܼܵܠܝܵܬܘܼܗܿ.       

   ܐܲܪܒܐܸܡܵܐܐ ܫܸܢܸ̈ܐ ܡܼܢ ܩܲܕ݇ܡ ܐܵܕܝܼܵܐ ܚܲܕ݇ ܒܲܒܼܠܵܝܵܐ ܟܬܸܒܼܠܸܗ ܒܝܲܕ ܩܲܢܝܘܼܗܝ ܠܚܕܵܐ ܙܡܝܼܪܬܵܐ ܕܠܵܐܝ ܠܵܐܝ ܥܲܠ ܚܲܕ݇ ܠܘܼܚܵܐ ܙܥܘܿܪܵܐ ܒܡܫܘܼܚܬܵܐ (ܟܝܘܼܠܵܐ) ܕܚܕܵܐ ܟܲܦܵܐ ܕܐܝܼܕܵܐ ܟܲܕ 2000 ܫܸܢܸ̈ܐ ܩ.ܡ ܦܝܼܫܬܵܐ ܝܠܵܗܿ ܙܡܝܼܪܬܵܐ. ܘܐܵܗܵܐ ܡܫܲܪܘܼܪܸܐ ܝܠܵܗܿ ܕܙܡܝܼܪܬܵܐ ܕܠܵܐܝ ܠܵܐܝ ܚܲܕ݇ ܣܲܗܡܵܐ ܡܼܢ ܣܸܦܪܵܝܘܼܬܵܐ ܥܲܡܵܝܬܵܐ ܕܒܪܝܼܬܵܐ ܝܠܵܗܿ. ܒܐܵܗܵܐ ܠܵܐܝ ܠܵܐܝ ܝܸܡܵܐ ܐ݇ܡܵܪܵܐ ܝܠܵܗܿ ܩܵܐ ܫܲܒܼܪܘܼܗܿ ܕܒܥܸܠܬܵܐ ܕܪܵܘܒܵܐ (ܙܕܘܿܥܬܵܐ) ܕܒܸܪܝܵܐ ܝܠܸܗ ܗܿܘ ܒܝܲܕ ܒܸܟܼܝܘܼܗܝ ܡܘܼܪܥܸܫܵܐ ܝܠܸܗ ܠܕܲܝܘܵܐ ܕܒܲܝܬܵܐ ܘܒܘܼܬ ܐܵܗܵܐ ܒܸܕ ܦܵܐܸܫ ܐ݇ܟܼܝܼܠܵܐ ܒܝܲܕ ܕܲܝܘܵܐ

   ܡܲܙܕܲܥܬܵܐ ܕܫܲܒܼܪܵܐ ܒܢܝܼܫܵܐ ܕܡܲܟܠܲܝܬܘܼܗܝ ܡܼܢ ܒܟܼܵܝܵܐ ܒܙܡܝܼܖ̈ܝܵܬܸܐ ܕܠܵܐܝ ܠܵܐܝ ܦܝܼܫܬܵܐ ܝܠܵܗܿ ܚܙܝܼܬܵܐ ܐܵܦ ܒܐܸܡܘܵܬܸ̈ܐ ܐ݇ܚܸܖ̈݇ܢܸܐ. ܩܵܐ ܛܘܼܦ̰ܣܵܐ ܒܚܕܵܐ ܠܵܐܝ ܠܵܐܝ ܕܐܲܬܪܵܐ ܕܟܸܝܢܝܵܐ (Kenya) ܝܸܡܵܐ ܐ݇ܡܵܪܵܐ ܝܠܵܗܿ ܩܵܐ ܫܲܒܼܪܘܼܗܿ ܕܐܸܢ ܠܵܐ ܟܵܠܸܐ ܡܼܢ ܒܟܼܵܝܵܐ ܒܸܕ ܦܵܐܸܫ ܐ݇ܟܼܝܼܠܵܐ ܒܝܲܕ ܗܵܘܛܲܪ (ܟܲܦܛܲܪ) ܘܐܵܗܵܐ ܛܘܼܦ̰ܣܵܐ ܡܫܲܪܘܼܪܸܐ ܝܠܸܗ ܠܕܡܘܼܬܵܐ ܕܙܡܝܼܖ̈ܝܵܬܸܐ ܕܠܵܐܝ ܠܵܐܝ ܒܐܵܗܵܐ ܒܪܝܼܬܵܐ ܪܘܝܼܚܬܵܐ. ܒܚܕܵܐ ܠܵܐܝ ܠܵܐܝ ܕܐܲܬܪܵܐ ܕܐܸܢܓܠܵܢܕ ܝܸܡܵܐ ܐ݇ܡܵܪܵܐ ܝܠܵܗܿ ܕܫܲܒܼܪܵܐ ܘܕܲܪܓܘܼܫܬܘܼܗܝ ܒܸܕ ܢܵܦܠܝܼ ܡܼܢ ܥܲܠ ܩܘܼܪܡܵܐ (ܩܲܝܣܵܐ) ܕܐܝܼܠܵܢܵܐ.                                

   ܐܝܼܢܵܐ ܟܠ ܚܲܕ݇ ܚܲܒܪܵܐ ܕܡܲܦܠܸܚܵܐ ܝܸܡܵܐ ܩܵܐ ܡܲܕܡܲܟܼܬܵܐ ܕܫܲܒܼܪܘܼܗܿ ـ ܚܘܼܒܵܢܵܐ ܝܲܢ ܡܲܙܕܸܥܵܢܵܐ ـ ܕܠܵܐ ܟ̰ܘܼ ܦܘܼܫܵܟܼܵܐ ܒܸܢܒܼܵܥܵܐ ܝܠܸܗ ܡܼܢ ܚܘܼܒܘܼܗܿ ܠܵܐ ܡܬܲܚܡܵܐ ܠܟܸܣ ܫܲܒܼܪܘܼܗܿ

   ܙܡܝܼܖ̈ܝܵܬܸܐ ܩܲܕ݇ܡܵܝܸ̈ܐ ܕܠܵܐܝ ܠܵܐܝ ܪܵܒܵܐ ܦܫܝܼܛܸ̈ܐ ܗ݇ܘܵܘ ܘܡܪܲܟܒܼܵܐ ܗ݇ܘܵܘ ܡܼܢ ܚܲܕ݇ ܡܸܢܝܵܢܵܐ ܙܥܘܿܪܵܐ ܕܚܲܒܖ̈ܵܢܸܐ ܕܦܝܵܫܵܐ ܝܢܵܐ ܙܡܝܼܖܸ̈ܐ ܬܸܢܝܵܐܝܼܬ. ܗܲܪ ܗܵܕܟܼܵܐ ܡܘܼܣܝܼܩܝܼ ܕܠܵܐܝ ܠܵܐܝ ܪܵܒܵܐ ܦܫܝܼܛܬܵܐ ܝܠܵܗܿ ܘܒܚܲܕ݇ ܪܸܟܼܢܵܐ (ریتم) ܝܠܵܗܿ ܕܡܲܕܟܼܘܼܪܸܐ ܝܠܵܗܿ ܠܙܲܘܥܵܐ ܕܫܲܒܼܪܵܐ ܒܥܕܵܢܵܐ ܕܒܸܚܵܝܵܐ ܗ݇ܘܵܐ ܓܵܘ ܡܲܪܒܥܵܐ ܕܝܸܡܘܼܗܝ. ܐ݇ܡܵܪܵܐ ܝܢܵܐ ܐܵܣܝܸ̈ܐ ܡܸܬܕܝܼܠܵܢܸ̈ܐ ܒܦܲܥܘܵܐ ܕܫܲܒܼܖܸ̈ܐ ܕܥܘܼܠܵܐ ܒܡܲܪܒܥܵܐ ܕܝܸܡܸܗ ܟܸܐ ܫܵܡܥܸܐ ܠܩܵܠܵܐ ܕܠܒܲܪ (ܠܒܼܲܕܲܪ) ܡܼܢ ܡܲܪܒܥܵܐ ܐܝܼܢܵܐ ܩܵܠܵܐ ܕܝܸܡܵܐ ܒܘܼܫ ܚܲܝܠܵܢܵܐ ܝܠܸܗ ܡܼܢ ܟܠ ܚܲܕ݇ ܩܵܠܵܐ ܐ݇ܚܸܪ݇ܢܵܐ ܒܗܿܝ ܕܦܝܵܫܵܐ ܝܠܸܗ ܫܡܝܼܥܵܐ ܒܬܪܸܝܢ ܫܒܼܝܼܠܸ̈ܐ: ܡܼܢ ܠܒܼܲܪ ܡܼܢ ܡܲܪܒܥܵܐ ܘܗܲܪ ܒܗܿܝ ܥܕܵܢܵܐ ܡܼܢ ܓܵܘ ܡܲܪܒܥܵܐ.

   ܡܼܢ ܐܵܬܘܼܖ̈ܵܝܸܐ ܘܒܲܒܼܠܵܝܸ̈ܐ ܕܟܬܝܼܒܼܸ̈ܐ ܝܢܵܐ ܠܗܿܝ ܠܵܐܝ ܠܵܐܝ ܩܲܕ݇ܡܵܝܬܵܐ ܒܒܪܝܼܬܵܐ، ܠܲܝܬ ܦܝܵܫܵܐ ܪܵܒܵܐ ܙܡܝܼܖ̈ܝܵܬܸܐ. ܩܵܘܡܵܐ ܕܩܸܛܠܸ̈ܐ، ܓܘܼܢܚܸ̈ܐ ܡܲܪܝܼܖܸ̈ܐ ܘܡܲܫܚܲܛܝܵܬܸ̈ܐ ܡܵܪܲܝ ܐܘܼܠܨܵܢܸ̈ܐ ܕܬܦܝܼܩܸ̈ܐ ܝܢܵܐ ܒܐܵܗܵܐ ܐܘܼܡܬܵܐ ܬܲܫܥܝܼܬܵܢܵܝܬܵܐ ܠܸܐ ܝܢܵܐ ܫܒܼܝܼܩܸ̈ܐ ܕܢܵܛܪܵܐ ܠܸܗ ܝܘܼܪܬܵܢܵܐ ܛܝܼܡܵܢܵܐ ܕܐܵܒܼܵܗܵܬܘܼܗܿ

   ܐܲܢܸܐ ܝܢܵܐ ܚܲܒܖ̈ܵܢܸܐ ܕܚܕܵܐ ܠܵܐܝ ܠܵܐܝ ܟ̰ܸܡ ܥܲܬܝܼܩܬܵܐ ܕܦܝܼܫܬܵܐ ܝܠܵܗܿ ܡܘܼܕܟܼܸܪܬܵܐ ܒܝܲܕ ܡܝܲܩܲܪܬܵܐ ܡܲܪܝܼܵܐ ܠܵܥܵܙܲܪܝܵܐܢ ܡܼܢ ܡܵܬܵܐ ܕܐܲܢܗܲܪ (ܡܕܝܼܢ݇ܬܵܐ ܕܐܘܼܪܡܝܼ) ܐܵܦܸܢ ܕܥܘܼܢܝܵܬܘܼܗܿ ܐ݇ܚܸܖ̈݇ܢܸܐ ܦܝܼܫܸ̈ܐ ܝܢܵܐ ܢܸܫܝܸ̈ܐ:

                

                  ܠܵܐܝܸܐ ܠܵܐܝܸܐ

                  ܒܫܲܕܪܵܢܵܟܼܝ ܥـܘܼܡܖܸ̈ܐ ܥܸܠܵܝܸ̈ܐ

                  ܬܵܡܵܐ ܒܚܲܡܝܼ ܠܵܟܼܝ ܚܘܼܕܵܝܸ̈ܐ

                  ܒܥܵܒܼܕܝܼ ܠܵܟܼܝ ܢܲܢܸܐ ܢܲܢܸܐ

                  ܕܲܪܓܘܼܫܬܵܟܼܝ ܩܲܝܣܵܐ ܕܩܸܢܸ̈ܐ

               ..................................

   ܪܵܒܝܼ ܨܘܿܦܝܵܐ ܩܵܓ̰ܵܪܝܵܐܢ ܗܵܕܟܼܵܐ ܟܬܝܼܒܼܬܵܐ ܝܠܵܗܿ ܒܡܫܘܼܚܬܘܼܗܿ ܕܠܵܐܝ ܠܵܐܝ ܒܫܸܢ݇ܬܵܐ 1965.                                            

                ܠܵܐܝ ܠܵܐܝ ܒܵܥܠܝܼ ܛܠܝܼ ܓ̰ܲܠܕܸܐ

                 ܐܵܙܵܠ݇ܢ ܡܲܫܬܝܼܵܢ ܟܲܪܕܸܐ

                 ܓܲܒܝܵܢ ܢܲܥܢܵܐ ܘܐܸܖ̈ܝܵܢܸܐ

                 ܒܵܫܠܵܢ ܙܵܕܸ̈ܐ ܛܲܥܡܵܢܸ̈ܐ

                          ܀܀܀

                 ܠܵܐܝ ܠܵܐܝ ܒܵܥܠܝܼ ܛܠܝܼ ܓ̰ܲܠܕܸܐ

                 ܒܵܒܘܼܟܼ ܒܐܵܬܸܐ ܗܲܪ ܐܵܕܸܐ

                 ܓ̰ܸܗܝܵܐ، ܢܸܗܝܵܐ ܗܲܡ ܨܸܗܝܵܐ

                 ܓܵܪܫܵܢܸܗ ܕܵܘܥܸ̈ܐ ܡܩܘܼܢܝܵܐ

                          ܀܀܀

                 ܠܵܐܝ ܠܵܐܝ ܒܵܥܠܝܼ ܛܠܝܼ ܓ̰ܲܠܕܸܐ

                 ܓܲܪܘܸܣ ܩܵܐ ܕܠܸܒܲܢ ܚܵܕܸܐ

                 ܕܒܼܘܼܩܠܸܗ ܫܵܘܦܵܐ ܕܐܵܢܝ݇ ܓܲܒܼܖܸ̈ܐ

                 ܬܲܡܸܡ ܠܒܵܥܘܼܬܲܢ ܕܕܵܘܖܸ̈ܐ

                          ܀܀܀

  

ܟܡܵܐ ܙܡܝܼܖ̈ܝܵܬܸܐ ܕܛܒܼܝܼܥܸ̈ܐ ܝܢܵܐ ܒܟܬܵܒܼܵܐ ܕ"لمحة عن تاریخ عنکاوه ماضیها و حاضرها" ܣܝܼܡܵܐ ܒܝܲܕ ܣܵܝܘܿܡܵܐ ܡܫܲܡܗܵܐ ܡܝܲܩܪܵܐ حنا عبدالاحد روفو ܒܫܸܢ݇ܬܵܐ 1994 ܒܸܚܒܼܵܫܵܐ ܝܢܵܐ ܡܼܢ ܚܕܵܐ ܗܲܝܡܵܢܘܼܬܵܐ ܡܫܝܼܚܵܝܬܵܐ ܘܒܸܛܠܵܒܵܐ ܝܢܵܐ ܗܲܝܲܪܬܵܐ ܡܼܢ ܐܲܠܵܗܵܐ، ܡܫܝܼܚܵܐ ܘܡܵܪܬܝ ܡܲܪܝܲܡ ܩܵܐ ܢܛܵܪܬܵܐ ܕܫܲܒܼܪܵܐ. ܐܲܢܸܐ ܙܡܝܼܖ̈ܝܵܬܸܐ ܒܠܸܥܙܵܐ ܕܒܢܲܝ̈ ܥܲܢܟܵܘܵܐ ܝܢܵܐ

                              

1ـ

       ܕܸܕܡܘܼܟܼ ܢܲܢܸܐ ܢܲܢܸܐ

       ܡܼܢ ܡܚܘܼܫܟܵܐ ܠܝܵܘܡܵܐ ܓܵܢܸܐ    

       ܒܐܵܡܪܵܢ ܬܘܼ ܣܸܗܪܵܐ ܒܲܗܘܼܪܵܐ ܡܼܢ ܕܘܼܟܬܼܝܼܵܗܿ ܠܵܐ ܡܫܲܢܸܐ       

       ܘܗܿܘ ܟܵܘܟܼܒܼܵܐ ܙܥܘܿܪܵܐ ܡܩܲܢܕܸܠ ܘܠܵܐ ܦܵܢܸܐ       

       ܗܲܠ ܕܐܵܬܝܼ ܡܼܢ ܕܲܫܬܵܐ ܟܘܼܠܠܘܼ ܐܲܟܵܖܸ̈ܐ ܘܝܲܬܼܢܵܢܸ̈ܐ        

       ܘܕܵܝܪܝܼ ܠܡܵܬܼܵܐ ܟܘܼܠܠܘܼ ܥܸܖ̈ܒܸܐ ܘܘܲܥܢܸ̈ܐ

       ܪܵܚܩܝܼ ܡܸܢܘܼܟܼ ܕܲܖ̈ܕܸܐ ܘܟܘܼܖ̈ܗܵܢܸܐ

       ܠܸܐ ܡܲܪܕܸܐ ܕܘܼܟܬܼܵܐ ܕܙܥܘܿܖܸ̈ܐ ܘܡܛܲܐܠܵܢܸ̈ܐ

       ܢܵܛܪܵܐܠܘܼܟܼ ܡܲܪܝܲܡ ܒܬܼܘܼܠܬܼܵܐ ܡܲܠܟܬܼܵܐ ܕܛܘܼܒܼܵܢܸ̈ܐ

       ܘܦܲܓܼܪܘܼܟܼ ܙܥܘܿܪܵܐ ܐܲܠܵܗ ܥ݇ܒܼܸܕ ܫ̰ܵܢܸ̈ܐ

       ܪܸܫܘܼܟܼ ܠܵܐ ܡܲܪܥܸܐ ܒܨܠܵܘܵܬܸ̈ܐ ܕܟܘܼܠܠܘܼ ܣܵܗܕܸ̈ܐ ܘܡܵܘܕܝܵܢܸ̈ܐ

       ܕܸܕܡܘܼܟܼ ܢܲܢܸܐ ܢܲܢܸܐ.

ܡܚܘܼܫܟܵܐ: ܚܸܫܟܵܐ

ܬܘܼ: ܩܵܐ

ܣܸܗܪܵܐ: ܣܲܗܪܵܐ

ܒܲܗܘܼܪܵܐ: ܝܵܗܒܼܵܢܵܐ ܕܒܲܗܪܵܐ

ܕܘܼܟܬܼܝܼܵܗ: ܕܘܼܟܬܘܼܗܿ

ܡܩܲܢܕܸܠ: ܡܲܓܕܸܠ

ܠܵܐ ܦܸܢܸܐ: ܠܵܐ ܛܵܠܸܩ

ܟܘܼܠܠܘܼ: ܟܠܲܝܗܝ

ܝܲܬܼܢܵܢܸ̈ܐ: ܩܸܢܝܵܢܸ̈ܐ

ܘܲܥܢܵܐ: ܥܸܪܒܵܐ ܢܸܩܒܼܵܐ

ܠܸܐ ܡܲܪܕܸܐ: ܠܸܐ ܡܲܪܥܸܐ

2 ـ

       ܒܵܒܝܼ ܘܝܸܡܝܼ

       ܒܢܵܨܒܼܵܢ ܛܵܠܘܼܟܼ ܚܲܕ݇ ܕܵܘܕܝܼܵܐ ܒܸܝܢܝܼ ܥܲܩܪܵܐ ܘܥܲܡܵܕܝܼܵܐ

       ܬܲܕ ܕܡܵܚܸܐ ܒܓܵܘܵܗܿ ܦܵܘܚܵܐ ܩܲܪܝܼܪܵܐ ܕܛܘܼܪܵܐ ܘܒܲܪܝܼܵܐ

       ܢܵܛܸܪܘܼܟܼ ܡܘܼܫܸܐ ܢܒܼܝܼܵܐ ܘܗܿܘ ܩܲܕܝܼܫܵܐ ܡܵܪܝ ܐܸܠܝܼܵܐ

       ܘܡܵܪܝ ܝܘܼܚܵܢܵܐ ܡܲܥܡܕܵܢܵܐ ܕܥܵܝܸܫ ܒܒܲܪܝܼܵܐ

       ܫܵܖ̈ܝܼ ܐܸܠܘܼܟܼ ܨܠܵܘܵܬܵܐ ܕܩܲܕܝܼܫܬܵܐ ܬܪܝܼܙܝܼܵܐ

                          ܀܀܀

ܒܢܵܨܒܼܵܢ: ܒܸܕ ܡܲܬܒܼܲܢ

ܛܵܠܘܼܟܼ: ܩܵܬܘܼܟܼ

ܕܵܘܕܝܼܵܐ: ܕܲܪܓܘܼܫܬܵܐ

 ܒܸܝܢܝܼ: ܒܸܝܠ

 ܥܲܩܪܵܐ ܘܥܲܡܵܕܝܼܵܐ: ܬܪܸܝܢ ܡܕܝܼܢܵܬܸ̈ܐ ܒܥܸܪܵܩ

 ܬܲܕ: ܩܲܕ

 ܥܵܝܸܫ: ܚܵܝܸܐ

3 ـ

       ܒܢܵܨܒܼܵܢ ܛܵܠܘܼܟܼ ܪܸܫ ܣܦܝܼܢ ܬܪܸܝܢ ܩܘܼܦܖ̈ܵܢܸܐ

       ܚܲܕ݇ ܕܸܕܘܲܖ̈ܕܸܐ ܘܚܲܕ݇ ܕܖ̈ܝܼܗܵܢܸܐ

       ܬܲܕ ܡܵܚܸܐ ܒܓܵܘܘܼܗܝ ܦܵܘܚܵܐ ܩܲܪܝܼܪܵܐ ܕܛܘܼܖ̈ܵܢܸܐ

       ܕܵܡܟܼܝܼ ܒܓܵܘܘܼܗܝ ܡܘܿܚܘܵܬܼܵܟܼܝ ܙܥܘܿܖ̈ܲܟܵܢܸܐ

       ܢܵܛܪܵܐܠܘܼܟܼ ܡܲܪܝܲܡ ܥܲܕܼܪܵܐ ܡܼܢ ܟܘܼܠܲܝܗܝ ܥܵܘܩܵܢܸ̈ܐ

       ܕܸܕܡܘܼܟܼ ܢܲܢܸܐ ܢܲܢܸܐ

                         ܀܀܀

ܣܦܝܼܢ: ܫܸܡܵܐ ܕܚܲܕ݇ ܛܘܼܪܵܐ

ܩܘܼܦܖ̈ܵܢܸܐ: ܐ݇ܓܵܖ̈ܵܘܵܬܸܐ ܕܩܲܝܣܵܐ

ܡܘܿܚܘܵܬܼܵܟܼܝ: ܐܵܢܝܼ ܕܡܐܲܝܟܼ ܕܝܼܘܼܟܼ ܝܢܵܐ

ܙܥܘܿܖ̈ܵܟܵܢܸܐ: ܙܥܘܿܖ̈ܘܼܢܸܐ

ܡܲܪܝܲܡ ܥܲܕܼܪܵܐ: ܡܲܪܝܲܡ ܒܬܘܼܠܬܵܐ

4 ـ

        ܥܲܙܝܼܙܵܐ ܕܕܵܝܸܐ

        ܡܸܩܵܐ ܐܝܼܬܸܢ ܡܗܲܓ̰ܗܸܓ̰ܝܼ ܒܕܸܫܬܼܵܬܼܵܐ

        ܘܡܸܩܵܐ ܥܖ̈ܝܼܩܸܐ ܠܐܲܬܼܖ̈ܵܘܵܬܼܵܐ

        ܘܐܵܢܝ݇ ܩܛܝܼܠܸ̈ܐ ܡܘܼܢܕܝܸ̈ܐ ܠܐܘܼܖ̈ܚܵܬܼܵܐ

        ܘܐܵܢܝ݇ ܕܲܠܵܠܸ̈ܐ ܡܣܘܼܟܖܸ̈ܐ ܒܫܲܖ̈ܵܬܼܵܐ

        ܐܝܼܡܲܢ ܒܸܕ ܐܵܝܝܼ ܠܡܵܬܼܵܐ

        ܦܵܨܚܝܼ ܒܓܵܘܘܼܗܿ ܝܸܡܵܐ ܘܚܵܬܼܵܐ

        ܝܸܡܘܼܗܝ ܟܡܲܓ̰ܪܝܼܵܐ ܕܸܡܥ݇ܝܵܬܼܵܐ

        ܒܸܕ ܡܵܝܬܼܵܐ ܛܵܠܘܼܗܝ ܒܗܲܣܖ̈ܲܬܼܵܐ

        ܘܬܵܐ ܐܵܢܝ݇ ܚܖ̈ܝܼܩܸܐ ܒܓܘܼ ܝܲܡܵܬܵܐ

                          ܀܀܀

ܡܸܩܵܐ: ܚܲܕ݇ܟܡܵܐ

ܡܗܲܓ̰ܸܓ̰ܝܼ: ܥܵܪܩܝܼ

ܕܲܠܵܠܸ̈ܐ: ܥܲܙܝܼܙܸ̈ܐ

ܡܘܼܢܕܝܼܸ̈ܐ: ܡܪܘܼܦܝܸ̈ܐ

ܡܣܘܼܟܖܸ̈ܐ: ܕܒܼܝܼܩܸ̈ܐ ܒܐܲܣܝܼܪܘܼܬܵܐ

ܫܲܖ̈ܵܬܸܐ: ܦܠܵܫܸ̈ܐ

ܐܵܝܝܼ: ܐܵܬܝܼ

5 ـ

      ܚܠܵܦܵܟܼܝ ܕܵܝܸܐ

       ܕܲܪܓܘܼܫܬܵܟܼܝ ܕܸܕܚܲܝܠܵܦܵܐ

       ܟܐܵܙܵܠ݇ܐ ܘܟܐܵܬܼܝܵܐ ܛܝܵܦܵܐ ܛܝܵܦܵܐ

       ܢܵܛܪܝܼ ܠܵܟܼܝ ܨܠܵܘܵܬܸ̈ܐ ܕܡܵܪܝ ܦܵܦܵܐ

                         ܀܀܀

6 ـ

       ܕܲܪܓܘܼܫܬܵܟܼܝ ܩܲܝܣܵܐ ܢܣܝܼܪܵܐ

       ܗܲܪܵܟܵܗܿ ܓܲܪܡܵܐ ܕܦܝܼܠܵܐ

       ܡܵܐ ܕܫܵܥܫܝܼܠܵܗܿ ܘܗܝܼܙܝܼܠܵܗܿ

       ܒܸܕ ܡܒܲܣܡܵܐ ܠܸܗ ܠܸܒܵܐ ܬܒܼܝܼܪܵܐ

                         ܀܀܀

ܗܲܪܵܟܵܐ: ܩܲܬܬܵܐ

ܗܝܼܙܝܼܠܵܗܿ: ܡܲܓ̰ܘܸܓ̰ܝܼ ܠܵܗܿ 

7 ـ

       ܕܸܕܡܘܼܟܼ ܠܵܐܝܸܐ ܠܵܐܝܸܐ

       ܟܛܵܠܒܵܢܘܼܟܼ ܡܼܢ ܡܲܪܝܲܡ ܕܵܝܸܐ

       ܠܵܐ ܒܵܟܼܸܬ ܐܲܢ݇ܬ ܡܲܪ ܒܵܟܼܝ ܝܲܠܵܕ݇ܐ ܕܒܲܕܘܵܝܸ̈ܐ

       ܟܥܵܝܫܝܼ ܒܚܲܝܡܵܬܼܵܐ ܒܕܲܫܬܵܐ ܘܒܲܖ̈ܵܝܸܐ

       ܪܸܫܘܼܗܝ ܫܠܝܼܚܵܐ ܘܐܲܩܠܵܬܼܘܼܗܝ ܚܲܦܝܵܝܸ̈ܐ

       ܢܵܛܪܝܼܠܘܼܟܼ ܨܠܵܘܵܬܸ̈ܐ ܕܩܲܕܝܼܫܬܵܐ ܝܸܡܵܐ ܕܚܵܝܸ̈ܐ

       ܫܵܖ̈ܝܼ ܐܸܠܘܼܟܼ ܖ̈ܵܚܡܸܐ ܕܒܬܼܘܼܠܬܼܵܐ ܝܸܡܵܐ ܕܚܵܝܸ̈ܐ

       ܢܵܛܪܵܐܠܘܼܟܼ ܡܼܢ ܟܘܼܠܠܘܼ ܕܲܖ̈ܕܸܐ ܘܒܲܠܵܝܸ̈ܐ

       ܒܵܒܝܼ ܘܝܸܡܝܼ! ܝܗ݇ܝܼܒܼܵܠܘܼܟܼ ܝܲܖ̈ܝܼܟܼܸܐ ܚܲܝܸ̈ܐ

       ܡܸܩܵܐ ܚܲܙ ܟܥܵܒܼܕܵܢ ܐܵܬܝܼ ܠܒܵܬܘܼܘ ܓܼܲܖ̈ܝܼܒܸܐ ܘܢܘܼܟܼܖ̈ܵܝܸܐ

       ܕܟܣܵܦܪܝܼ ܠܘܼ ܚܵܬܼܘܵܬܼܵܐ ܘܒܵܒܵܐ ܘܕܵܝܸܐ

                         ܀܀܀

ܡܲܪ: ܡܘܼܪ

ܒܲܕܘܵܝܸ̈ܐ: ܥܵܖ̈ܵܒܵܝܸܐ ܕܟܸܐ ܚܵܝܝܼ ܒܒܲܪܝܼܵܐ

ܚܲܝܡܵܬܼܵܐ: ܡܲܫܟܢܸ̈ܐ

ܒܲܖ̈ܵܝܸܐ: ܒܲܖ̈ܝܼܸܐ

ܒܲܠܵܝܸ̈ܐ: ܩܲܕܸ̈ܐ ܘܒܲܠܸ̈ܐ

ܡܸܩܵܐ: ܟܡܵܐ

ܚܲܙ ܟܥܵܒܼܕܵܢ: ܟܸܐ ܡܲܗܢܝܼܵܢ

8 ـ

       ܕܸܕܡܘܼܟܼ ܘܪܸܫܘܼܟܼ ܥܲܠ ܕܲܪܓܘܼܫܬܵܐ

       ܥܲܠ ܕܵܝܸܐ ܠܵܐ ܐܵܪܸܬ ܚܘܼܫܬܵܐ

       ܢܵܛܪܝܼܠܵܟܼܝ ܨܠܵܘܵܬܸ̈ܐ ܕܒܲܪܒܵܪܵܐ ܩܲܕܝܼܫܬܵܐ

       ܘܡܵܪ݇ܬܝ ܫܡܘܼܢܝܼ ܘܫܒܼܲܥ ܒܢܘܼܢܵܗܿ ܕܦܝܼܫܠܵܗܿ ܩܛܝܼܠܬܵܐ

       ܢܵܛܪܝܼܠܘܼܟܼ ܡܼܢ ܥܲܝܢܵܐ ܒܝܼܫܬܵܐ

                          ܀܀܀

ܠܵܐ ܐܵܪܸܬ ܚܘܼܫܬܵܐ: ܠܵܐ ܕܵܒܼܩܸܬ ܡܵܗܵܢܵܐ

9 ـ

       ܫܲܝܟܼ ܡܲܬܸܐ ܡܛܘܼܪܵܐ ܝܬܼܸܐܠܸܗ

       ܘܡܵܪܝ ܒܲܗܢܵܡ ܡܢܲܡܪܘܼܕ ܚܕܸܪܸܗ

       ܬܵܡܵܐ ܒܪܸܟܠܸܗ ܘܡܨܘܿܠܸܐܠܸܗ

       ܥܲܟܣܬܲܝܸܗ ܒܐܲܪܥܵܐ ܡܚܸܐܠܸܗ

       ܥܲܝܢܵܐ ܕܡܝܼܵ̈ܐ ܡܘܼܓ̰ܪܸܐܠܸܗ

       ܘܚܵܬܼܵܐ ܕܒܲܗܢܵܡ ܡܘܼܨܚܸܐ ܠܸܗ

       ܚܵܬܼܝܼܵܐ ܣܲܪܵܐ ܓܲܪܘܵܢܝܼܬܼܵܐ

       ܦܠܸܛܠܵܗܿ ܡܐܲܝܟܼ ܕܝܼܗ݇ܘܵܐ ܨܦܝܼܬܼܵܐ

                          ܀܀܀

ܫܲܝܟܼ ܡܲܬܸܐ: ܡܲܢܲܝ ܣܵܒܼܵܐ، شیخ متی

ܢܲܡܪܘܼܕ: ܚܕܵܐ ܡܕܝܼܢ݇ܬܵܐ ܥܲܬܝܼܩܬܵܐ ܓܵܘ ܥܸܪܵܩ 

ܥܲܟܣܬܲܝܸܗ: ܟܘܿܦܵܠܬܸܗ

ܡܘܼܨܚܸܐܠܸܗ: ܡܘܼܣܚܸܐܠܸܗ

ܓܲܪܘܵܢܝܼܬܵܐ: ܓܲܪܒܼܵܢܬܵܐ

         

ܡܒܘܼܥ̈ܐ:

1 ـ ܡܝܘܼܩܸܪܬܵܐ ܡܵܪܝܼܵܐ ܠܵܥܵܙܲܪܝܵܐܢ ܡܼܢ ܐܘܼܪܡܝܼ

2 ـ ܟܬܵܒܼܵܐ ܕ "لمحه عن تلریخ عنکاوه، ماضیها و حاضرها" ܒܝܲܕ: حنا عبدالاحد روفو

3 ـ ܐܸܢܬܹܝܪܢܹܝܬ