ܥܝܼܣܵܐ ܒܸܢܝܵܡܝܼܢ

ܥܝܼܣܵܐ ܒܸܢܝܵܡܝܼܢ

                         ܡܘܼܕܝܼ ܒܸܐܡܵܪܵܐ ܝܠܸܗ؟

   ܒܐܵܗܵܐ ܦܲܐܬܵܐ ܒܸܕ ܡܲܩܪܸܒܼܲܚ ܠܚܕܵܐ ܟܬܝܼܒܼܬܵܐ ܡܼܢ ܣܘܼܪܓܵܕܵܐ ܕܫܸܢ݇ܬܵܐ 1982 ܕܦܝܼܫܵܐ ܗ݇ܘܵܐ ܗܘܼܕܪܵܐ ܒܝܲܕ ܨܲܢܕܘܼܩܵܐ ܕܡܲܪܕܘܼܬܵܐ ܘܐܘܼܡܵܢܘܼܬܵܐ ܕܐܵܬܘܼܖ̈ܵܝܸܐ. ܫܲܬܐܸܣܵܢܸ̈ܐ ܕܐܵܗܵܐ ܨܲܢܕܘܼܩܵܐ ܡܝܲܩܲܪܬܵܐ ܡܲܚܵܪܬܵܐ ܠܘܿܪܵܝܢ ܕܵܝܒܼܝܼܣ ܘܡܝܲܩܲܪܬܵܐ ܕܵܟܬܸܪ ܡܵܕܠܵܝܢ ܕܵܝܒܼܝܼܣ ܗ݇ܘܵܘ. ܒܐܵܗܵܐ ܡܩܲܒܠܵܢܘܼܬܵܐ ܡܢܵܚܵܐ ܕܥܝܼܣܵܐ ܒܸܢܝܵܡܝܼܢ ܓ̰ܘܼܘܸܒܵܐ ܝܠܸܗ ܠܚܲܕ݇ܟܡܵܐ ܫܘܼܐܵܠܸ̈ܐ ܘܡܘܼܕܸܥܵܐ ܝܠܸܗ ܠܬܲܚܡܲܢܝܵܬܘܼܗ̈ܝ ܠܦܘܼܬ ܐܘܼܡܬܲܢ.                                                                                   

ܫ: ܢܝܼܫܵܐ ܕܦܸܠܚܵܢܵܘܟܼܘܿܢ ܡܘܼܕܝܼ ܝܠܸܗ؟                                                      

ܦ: ܙܵܘܕܵܐ ܡܼܢ 40 ܫܸܢܸ̈ܐ ܝܠܵܗܿ ܕܗ݇ܘܝܼܝܼ ܝܠܸܗ ܥܵܒܼܘܼܕܘܵܬܸ̈ܐ ܦܖ̈ܝܼܫܸܐ ܓܵܘ ܫܵܘܬܵܦܘܼܬܵܐ. ܩܵܐ ܟܬܵܒܼܬܵܐ ܕܐܵܬܘܵܬܲܢ ܓ̰ܘܼܪܒܵܐ ܝܘܸܢ ܕܡܲܫ݇ܟ̰ܚܸܢ ܚܲܕ݇ܟܡܵܐ ܟܝܘܼܠܸ̈ܐ ܘܩܵܢܘܿܢܸ̈ܐ؛ ܒܐܵܗܵܐ ܦܘܼܠܚܵܢܝܼ ܐܘܼܦ ܡܸܛܝܵܐ ܝܘܸܢ ܠܚܕܵܐ ܐܵܠܲܦ ܒܸܝܬ ܕܟܸܐ ܡܵܨܝܵܐ ܫܵܪܝܵܐ ܠܗ݇ܘܿܢ ܟܠܵܝ ܟܸܬܖܸ̈ܐ ܕܒܲܨܡܲܢ. ܒܫܘܼܓܼܠܵܢܝܼ ܐܘܼܡܵܢܵܝܸ̈ܐ ܗ.ܕ. ܨܲܝܵܪܘܼܬܵܐ ܒܝܼ ܐܵܬܘܵܬܸ̈ܐ ܘܟܵܠܸܓܪܵܦ̰ܝܼ، ܒܸܥܝܵܐ ܝܘܸܢ ܡܲܚܙܸܢ ܠܡܲܪܕܘܼܬܵܐ ܕܐܵܬܘܼܪ ܥܲܬܝܼܩܬܵܐ ܘܠܕܲܪܓܼܘܼܗܿ ܥܸܠܵܝܵܐ ܓܵܘ ܫܡܲܝܵܐ ܕܝܘܼܠܦܵܢܵܐ. ܐܵܕܝܼܵܐ ܐܝܼܬ ܠܝܼ ܙܵܘܕܵܐ ܡܼܢ 40 ܬܵܒܠܘܿܝܸ̈ܐ ܕܟܠܵܝ ܦܝܼܫܸ̈ܐ ܝܢܵܐ ܦܠܝܼܚܸ̈ܐ ܥܲܠ ܓܸܠܕܵܐ؛ ܗܲܡܘܼܢܸܐ ܝܘܸܢ ܡܲܫ݇ܟ̰ܚܸܢ ܚܕܵܐ ܐܘܼܪܚܵܐ ܠܵܚܘܿܡܬܵܐ ܩܵܐ ܡܲܚܙܵܝܬܵܝ ܠܒܢܲܝ̈ ܐܘܼܡܬܝܼ ܡܘܼܚܸܒܸ̈ܐ.                                                                          

ܩܲܕ݇ܡ ܚܲܕ݇ܟܡܵܐ ܫܸܢܸ̈ܐ ܐܝܼܬ ܗ݇ܘܵܐ ܠܝܼ ܚܕܵܐ ܟ̰ܝܵܕܬܵܐ ܡܼܢ ܦܵܪܸܣ ܩܵܐ ܠܲܒܲܠܬܵܐ ܘܡܲܚܙܵܝܬܵܐ ܕܫـܘܼܓܼܠܵܢــܝܼ̈، ܐܝܼـܢܵـܐ ܦـܫܵـܡܵـܐ ܝܘܸܢ ܕܐܲܗܘܵܠܵـܬܸ̈ܐ ܘܫܘܼܚܠܵـܦܸ̈ܐ ܕܩܘܼܘܸܡـܠـܗ݇ܘܿܢ ܠܵܐ ܝܗܸܒܼܠܗ݇ܘܿܢ ܦܣܵܣܵܐ؛ ܬܵܡܵܢ ܟܸܐ ܓܲܫܩܝܼ ܥܲܠ ܫܘܼܓܼܠܵܢ̈ܝܼ ܒܚܕܵܐ ܥܲܝܢܵܐ ܕܐܝܼܩܵܪܵܐ؛ ܦܫܵܡܵܐ ܝܘܸܢ ܕܬܲܢܸܢ ܕܢܘܼܟܼܖ̈ܵܝܸܐ ܒܘܼܫ ܟܸܐ ܡܝܲܩܪܝܼܠܗ݇ܘܿܢ ܫܘܼܓܼܠܵـܢ̈ܝܼ ܗܲܠ ܐ݇ܢܵܫܸ̈ܐ ܕܓܵܢܲܢ ܐܝܼܢܵܐ ܟ̰ܸܡ ܚܵܬܸܪܓ̰ܲܡ ܝܘܸܢ ܕܟܸܢܫܵܐ ܕܓܵܢܲܢ ܙܸܐ ܚܲܕ݇ ܝܵܘܡܵܐ ܒܸܕ ܓܼܵܠܸܒܠܵܗܿ ܒܘܼܕܵܠܘܼܬܵܐ ܘܠܵܐ ܣܦܝܼܪܘܼܬܵܐ؛ ܘܒܸܕ ܚܵܙܸܐ ܐܲܝܟܼ ܡܸܠܲܬܸ̈ܐ ܡܘܼܪܕܸܢܸ̈ܐ ܕܐܸܕܝܘܿܡ ܒܸܚܙܵܝܵܐ ܝܢܵܐ.                                     

ܫ: ܚܘܼܪܙܵܐ ܕܦܘܼܠܚܵܢܵܘܟܼܘܿܢ ܡܘܼܕܝܼ ܝܠܸܗ؟                                                    

ܦ: ܗܘܼܕܪܵܐ ܝܘܸܢ ܬܲܪܬܸܝܢ ܟܬܵܒܼܸ̈ܐ ܕܒܘܼܫ ܙܵܘܕܵܐ ܐܘܼܡܵܢܵܝܸ̈ܐ ܝܢܵܐ ܘܐܵܕܝܼܵܐ ܟ̰ܲܠܘܼܫܵܐ ܝܘܸܢ ܩܵܐ ܒܲܳܨܡܵܢܬܵܝ. ܒܸܪܝܵܐ ܝܘܸܢ ܪܵܒܵܐ ܡܸܢܕܝܵܢܸ̈ܐ ܚܲܕ݇ܬܸ̈ܐ ܓܵܘ ܚܲܩܠܵܐ ܕܟܬܝܼܒܼܬܵܐ؛ ܘܒܸܚܫܵܒܼܵܐ ܝܘܸܢ ܒܕܲܥܬܝܼܕ ܒܸܕ ܗܵܘܷܝܼ ܪܵܒܵܐ ܝܘܼܬܖ̈ܵܢܸܐ ܩܵܐ ܡܸܠܲܬܲܢ.ܗܵܘ ܝܵܘܡܵܐ ܕܐܝܼܕܵܐ ܓܪܸܫܠܲܢ ܡܼܢ ܡܚܵܝܬܵܐ ܕܓܵܘ ܪܸܫܵܐ ܕܐܘܼܕܵܠܸ̈ܐ ܘܢܦܸܠܲܢ ܒܵܬ݇ܪ ܫܘܼܓܼܠܵܢܸ̈ܐ ܝܘܼܬܖ̈ܵܢܵܝܸܐ ܒܸܕ ܗܵܘܝܼ ܠܵܙܝܼܡܲܢ.                                                 

   ܒܲܩܘܼܪܸܐ ܝܬܘܿܢ ܒܕܲܥܬܝܼܕ ܡܘܼܕܝܼܠܸܗ ܚܘܼܪܙܝܼ؟ ܐܲܚܟ̰ܝܼ ܟܸܐ ܡܵܨܸܝܢ ܬܲܢܸܢ؛ ܦܸܠܚܵܢܵܐ ܩܵܐ ܐܘܼܡܬܝܼ ܒܟܠ ܐܘܼܪܚܵܐ ܕܡܵܨܸܢ ܗܲܠ ܡܵܘܬܝܼ؛ ܐܵܗܵܐ ܘܵܠܝܼܬܵܐ ܕܟܠ ܐܵܬܘܼܪܵܝܵܐ ܝܠܵܗܿ؛ ܣܲܒܲܒ ܐܸܢ ܐܵܢܵܐ ܦܵܠܚܸܢ ܘܐܲܢ݇ܬ ܕܵܒܼܚܸܬ ܘܗܵܘܲܚ ܣܩܝܼܠܸ̈ܐ ܒܪܘܼܚܵܐ ܕܚܘܼܒܵܐ ܘܫܲܪܝܼܪܘܼܬܵܐ، ܕܠܵܐ ܫܸܟ ܚܲܕ݇ ܝܵܘܡܵܐ ܡܸܠܲܬܲܢ ܒܸܕ ܟܵܠܝܵܐ ܠܐܲܩܠܘܼ̈ܗܿ ܘܒܸܕ ܛܵܪܝܵܐ ܘܦܵܫܛܵܐ ܠܵܩܲܕ݇ܡܵܐ ܓܵܘ ܚܲܩܠܵܐ ܕܡܲܪܕܘܼܬܵܐ ܬܸܒܼܸܝܠܵܝܬܵܐ. ܐܵܕܝܼܵܐ ܦܸܠܚܵܢܵܐ ܝܘܸܢ ܥܲܠ ܡܲܓܡܲܪܬܵܐ ܕܐܵܠܲܦ ܒܸܝܬ ܘܐܝܼܬ ܠܝܼ ܗܸܒܼܝܼ ܕܡܵܨܸܢ ܡܲܟܠܸܢܸܗ ܠܕܸܦܢܵܐ ܕܐܵܠܲܦ ܒܸܝܬܸ̈ܐ ܡܫܲܡܗܸ̈ܐ ܘܓܡܝܼܖܸ̈ܐ ܕܕܘܼܢܝܸ̈ܐ.                                                          

                    ܝܠܘܿܦ ܘܡܲܠܸܦ ܠܸܫܵܢܵܐ ܕܝܸܡܘܼܟܼ                    

                    ܐܸܢ ܠܸـܐ ܒܵܥܸܬ ܬܵܠܸـܩ ܫܸܡܘܼܟܼ