ܠܥܘܗܕܢܐ ܕܚܕ݇ ܓܢ݇ܒܪܐ

ܠܥܘܗܕܢܐ ܕܚܕ݇ ܓܢ݇ܒܪܐ

                      ܫܡܝܪܡ ܕ.ܦܘܪܝܐܢ

  

   ܒܚܲܩܠܵܐ ܕܦܘܼܠܚܵܢܵܐ ܐܘܼܡܬܵܢܵܝܵܐ ܒܟܠ ܚܕܵܐ ܐܘܼܡܬܵܐ ܐܝܼܬ ܪܵܒܵܐ ܦܲܖ̈ܨܘܿܦܸܐ ܕܟܸܐ ܫܵܩܠܝܼ ܠܚܕܵܐ ܡܢܵܬܵܐ ܡܼܢ ܝܘܼܩܪܵܐ ܕܗܵܘ ܦܘܼܠܚܵܢܵܐ ܘܟܸܐ ܡܲܓܡܸܪܝܼ ܠܸܗ ܗܵܘ ܥܒܼܵܕܵܐ ܐܲܝܟܼ ܡܨܵܝܬܲܝܗܝ. ܐܝܼܢܵܐ ܒܚܲܕ݇ܟܡܵܐ ܛܵܘܚܸ̈ܐ (ܥܕܵܢܵܬܸ̈ܐ) ܒܸܬܦܵܩܵܐ ܝܘܲܚ ܒܦܲܖ̈ܨܘܿܦܸܐ ܕܠܸܐ ܝܢܵܐ ܚܲܕ݇ ܥܵܒܼܘܿܕܵܐ ܥܝܵܕܵܝܵܐ ܘܒܸܫܩܵܠܵܐ ܝܢܵܐ ܚܲܕ݇ܟܡܵܐ ܦܵܣܘܿܥܝܵܬܸ̈ܐ ܡܘܿܬܖ̈ܵܢܸܐ ܕܒܸܢܩܵܪܘܼܗܝ ܝܢܵܐ ܫܸܡܲܝܗܝ ܓܵܘ ܬܲܫܥܝܼܬܵܐ ܕܐܘܼܡܬܵܐ.

   ܥܝܼܣܵܐ ܒܸܢܝܵܡܝܼܢ ܕܫܘܼܢܸܐ ܠܸܗ ܡܼܢ ܐܵܗܵܐ ܥܵܠܡܵܐ ܒܫܘܼܪܵܝܵܐ ܕܐܵܗܵܐ ܫܸܢ݇ܬܵܐ، ܚܲܕ݇ ܗܵܕܟܼܵܐ ܦܵܪܨܘܿܦܵܐ ܗ݇ܘܵܐ. ܗܵܘ ܚܲܕ݇ ܝܲܠܝܼܦܵܐ ܒܠܸܫܵܢܵܐ ܣܘܼܪܝܵܝܵܐ، ܚܲܕ݇ ܣܵܝܘܿܡܵܐ، ܚܲܕ݇ ܓܸܠܝܵܢܘܿܪܵܐ (ܓ̣ܘܼܪܢܵܠܝܼܣܬ)، ܚܲܕ݇ ܐܘܼܡܵܢܵܐ ܒܚܲܩܠܵܐ ܕܫܲܦܝܼܪܘܼܬ ܟܬܝܼܒܼܬܵܐ ܘܚܲܕ݇ ܥܵܒܼܘܿܕܵܐ ܐܘܼܡܬܵܢܵܝܵܐ ܗ݇ܘܵܐ. ܥܝܼܣܵܐ ܦܝܼܫܵܐ ܗ݇ܘܵܐ ܝܠܝܼܕܵܐ ܒܫܸܢ݇ܬܵܐ 1924 ܒܡܕܝܼܢ݇ܬܵܐ ܕܬܲܒܼܪܝܼܙ ܓܵܘ ܚܕܵܐ ܒܲܝܬܘܼܬܵܐ ܣܦܝܼܪܬܵܐ . ܒܵܒܸܗ ܡܝܼܪܙܵܐ ܒܸܢܝܵܡܝܼܢ ܟܲܠܕܵܢܝܼ ܚܲܕ݇ ܦܲܪܨܘܿܦܵܐ ܗ݇ܘܵܐ ܝܲܠܝܼܦܵܐ ܕܣܝܼܡܵܐ ܗ݇ܘܵܐ ܪܵܒܵܐ ܟܬܵܒܼܸ̈ܐ. ܥܝܼܣܵܐ ܒܸܢܝܵܡܝܼܢ ܡܼܢ ܙܲܒܼܢܵܐ ܕܥܠܲܝܡܘܼܬܸܗ ܝܠܝܼܦܵܐ ܗ݇ܘܵܐ ܠܸܫܵܢܵܐ ܝܸܡܵܝܵܐ ܡܼܢ ܒܵܒܸܗ؛ ܐܵܦ ܫܩܝܼܠܵܐ ܗ݇ܘܵܐ ܬܘܼܠܡܵܕܵܐ ܒܚܲܩܠܵܐ ܕܐܘܼܡܵܢܘܼܬܵܐ ܕܫܲܦܝܼܪܘܼܬ ܟܬܝܼܒܼܬܵܐ ܡܼܢ ܡܵܪܝ ܗܵܒܼܝܼܠ ܙܲܝܥܵܐ ܐܵܦܸܣܩܘܼܦܵܐ ܕܐܘܼܪܡܝܼ ܘܣܲܠܲܡܵܣ..

   ܪܵܒܵܐ ܓ̰ܲܠܕܸܐ ܥܝܼܣܵܐ ܥܒܼܸܪܸܗ ܒܚܲܩܠܵـܐ ܕܥܒܼܵܕܵܐ ܐܘܼܡܬܵܢܵܝܵܐ. ܒܫܸܢ݇ܬܵܐ (1951) ܗܵܘ ܦܪܸܣܠܸܗ ܠܡܓܼܲܠܬܵܐ ܕܲܥܬܝܼܕ ܒܲܗܪܵܢܵܐ ܒܬܪܸܝܢ ܠܸܫܵܢܸ̈ܐ: ܐܵܬܘܼܪܵܝܵܐ ܘܦܵܪܣܵܝܵܐ. ܒܫܸܢ݇ܬܵܐ 1951 ܡܫܘܼܬܐܸܣܠܗ݇ܘܿܢ؛ ܥܝܼܣܵܐ ܥܲܡ ܚܲܕ݇ܟܡܵܐ ܖ̈ܵܚܡܘܼܗ̈ܝ ܟܲܫܝܼܖܸ̈ܐ ܐܲܝܟܼ ܪܵܒܝܼ ܟܘܼܪܸܫ ܒܸܢܝܵܡܝܼܢ، ܕܵܟܬܸܪ ܐܸܠܝܼܵܐ ܡܵܪܝ ܝܵܘܣܸܦ، ܕܵܟܬܸܪ ܐܵܫܘܼܪ ܡܘܼܪܵܕܚܵܐܢ ܘܕܵܟܬܸܪ ܘܸܠܣܘܿܢ ܒܸܝܬ ܡܲܢܨܘܼܪ ܠܫܵܘܬܵܦܘܼܬܵܐ ܕܣܝܼܥܬܵܐ ܣܵܦܪܵܝܬܵܐ ܕܥܠܲܝܡܸ̈ܐ ܐܵܬܘܼܖ̈ܵܝܸܐ ܕܒܡܸܬܚܵܐ ܕܦܘܼܠܚܵܢܘܼܗܿ ܫܩܸܠܵܗܿ ܪܵܒܵܐ ܦܵܣܘܿܥܝܵܬܸ̈ܐ ܫܲܦܝܼܖܸ̈ܐ ܒܚܲܩܠܵܐ ܕܣܸܦܪܵܝܘܼܬܵܐ ܐܵܬܘܼܪܵܝܬܵܐ. ܫܒܼܘܿܩ ܡܼܢ ܐܵܗܵܐ ܗܵܘ ܒܘܼܨܡܸܢܵܐ ܘܦܪܝܼܣܵܐ ܗ݇ܘܵܐ ܪܵܒܵܐ ܟܬܵܒܼܸ̈ܐ: ܚܲܕ݇ ܟܬܵܒܼܵܐ ܒܘܼܬ ܪܵܒܝܼ ܠܘܼܐܝܼܙ ܐܘܼܪܫܵܢ ܒܠܸܫܵܢܵܐ ܦܵܪܣܵܝܵܐ ܘܚܲܕ݇ܟܡܵܐ ܡܼܢ ܟܬܵܒܼ̈ܐ ܕܒܵܒܸܗ ܘܕܣܵܝܘܿܡܵܐ ܡܫܲܡܗܵܐ ܒܸܢܝܵܡܝܼܢ ܐܲܪܣܵܢܘܿܣ، ܐܵܦ ܚܕܵܐ ܦܸܢܩܝܼܬܵܐ ܩܵܐ ܡܲܠܲܦܬܵܐ ܕܫܲܦܝܼܪܘܼܬ ܟܬܝܼܒܼܬܵܐ. ܒܡܸܬܚܵܐ ܕܟܡܵܐ ܕܵܘܖܸ̈ܐ؛ ܡܼܢ ܒܵܬ݇ܪ ܫܘܼܚܠܵܦܵܐ ܕܫܘܼܠܛܵܢܵܐ ܕܐܲܬܪܲܢ؛ ܗܵܘ ܗܲܕܵܡܵܐ ܕܣܝܼܥܬܵܐ ܡܕܲܒܪܵܢܬܵܐ ܕܡܵܘܬܒܼܵܐ ܕܐܵܬܘܼܖ̈ܵܝܸܐ ܕܛܲܗܪܵܢ، ܐܵܦ ܪܸܫ ܣܵܝܘܿܡܘܼܬܵܐ ܘܬܲܓܒܸܪܵܢܵܐ ܕܣܲܗܡܵܐ ܣܘܼܪܝܵܝܵܐ ܕܣܦܵܪ ܙܲܒܼܢܵܐ ܕܐܸܫܛܵܪ ܗ݇ܘܵܐ (1983 ـ 1981).

   ܐܝܼܢܵܐ ܡܼܢ ܟܠܲܝܗܝ ܐܲܢܸܐ ܒܸܫ ܥܸܠܸܠ ܦܘܼܠܚܵܢܵܐ ܐܘܼܡܵܢܵܝܵܐ ܕܥܝܼܣܵܐ ܗ݇ܘܵܐ. ܗܵܘ ܡܘܼܚܝܸܐ ܠܸܗ ܠܐܘܼܡܵܢܘܼܬܵܐ ܕܫܲܦܝܼܪܘܼܬ ܟܬܝܼܒܼܬܵܐ ܘܦܘܼܠܛܵܐܠܸܗ ܩܲܕ݇ܡ ܒܲܗܪܵܐ. ܐܵܗܵܐ ܐܘܼܡܵܢܘܼܬܵܐ ܒܐܲܠܦܸ̈ܐ ܫܸܢܸ̈ܐ ܓܵܘ ܐܝܼܕܵܐ ܕܪܲܒܵܢܸ̈ܐ ܘܟܵܗܢܸ̈ܐ ܗ݇ܘܵܐ ܕܟܸܐ ܢܵܣܚܝܼ ܗ݇ܘܵܘ ܠܟܬܵܒܼܸ̈ܐ ܩܲܕܝܼܫܸ̈ܐ ܘܪܵܒܵܐ ܡܸܢܲܝܗܝ ܡܐܲܝܟܼ ܡܵܪܝ ܝܵܘܣܸܦ ܚܢܵܢܝܼܫܘܿܥ ܖܸ̈ܫܵܝܸܐ ܗ݇ܘܵܘ ܒܐܘܼܡܵܢܘܼܬܲܝܗܝ. ܐܝܼܢܵܐ ܥܝܼܣܵܐ ܒܸܢܝܵܡܝܼܢ ܡܘܼܪܸܡܠܸܗ ܠܐܵܗܵܐ ܐܘܼܡܵܢܘܼܬܵܐ ܠܚܲܕ݇ ܕܲܪܓܼܵܐ ܟ̰ܸܡ ܥܸܠܵܝܵܐ ܘܒܒܪܵܝܬܵܐ ܕܨܘܼܖ̈ܝܵܬܸܐ ܕܡܝܼܖܸ̈ܐ ܦܪܝܼܣܵܐ ܠܸܗ ܘܩܢܸܐ ܠܸܗ ܡܫܲܡܗܘܼܬܵܐ ܘܛܒܼܝܼܒܼܘܼܬܵܐ ܩܵܐ ܐܘܼܡܬܵܐ ܐܵܬܘܼܪܵܝܬܵܐ ܒܬܸܒܼܸܝܠ. ܥܝܼܣܵܐ ܒܸܢܝܵܡܝܼܢ ܠܸܐ ܗ݇ܘܵܐ ܐܲܚܟ̰ܝܼ ܚܲܕ݇ ܐܘܼܡܵܢܵܐ ܥܝܵܕܵܝܵܐ؛ ܐܸܠܵܐ ܗܵܘ ܚܲܕ݇ ܐܘܼܡܵܢܵܐ ܒܲܪܝܵܢܵܐ ܗ݇ܘܵܐ ܘܡܘܼܙܝܸܕܠܸܗ ܠܗܵܘ ܡܸܢܕܝܼ ܕܝܠܝܼܦܘܼܗܝ ܗ݇ܘܵܐ ܡܼܢ ܡܲܠܦܵܢܘܼܗ̈ܝ ܘܡܼܢ ܐܘܼܡܵܢܸ̈ܐ ܕܩܲܕ݇ܡ ܕܝܼܸܗ. ܗܵܘ ܫܩܸܠܸܗ ܚܕܵܐ ܦܵܣܘܿܥܬܵܐ ܪܵܒܵܐ ܐܵܢܲܢܩܵܝܬܵܐ ܘܒܪܸܐ ܠܸܗ ܠܟܝܘܼܠܸ̈ܐ ܘܒܐܵܗܵܐ ܒܪܵܝܬܸܗ ܝܗܸܒܼܠܸܗ ܚܲܕ݇ ܪܸܐܙܵܐ ܠܐܵܗܵܐ ܐܘܼܡܵܢܘܼܬܵܐ. ܗܵܕܟܼܵܐ ܗ݇ܘܵܐ ܕܐܝܼܡܲܢ ܕܬܪܸܝܢ ܨܘܼܖ̈ܝܵܬܘܼܗܝ ܦܝܼܫܠܗ݇ܘܿܢ ܒܘܼܨܡܸܢܸ̈ܐ ܒܚܲܕ݇ ܟܬܵܒܼܵܐ ܒܠܸܫܵܢܵܐ ܦܪܵܢܣܵܝܵܐ (1993) ܫܸܡܸܗ ܦܪܸܣܠܸܗ ܒܟܠܵܗܿ ܬܸܒܼܸܝܠ ܘܡܘܼܪܸܡܠܸܗ ܠܫܸܡܵܐ ܕܐܘܼܡܬܲܢ ܘܡܘܼܬܸܒܼܠܸܗ ܒܣܸܕܪܵܐ ܕܐܸܡܘܵܬܸ̈ܐ ܓܘܼܖܸ̈ܐ ܕܒܪܝܼܬܵܐ. ܗܵܕܟܼܵܐ ܗܵܘ ܚܕܵܐ ܓܵܗܵܐ ܐ݇ܚܸܪ݇ܬܵܐ ܡܘܼܚܝܸܐ ܠܸܗ ܠܐܵܬܘܼܪ. ܕܟܼܵܪܸܗ ܚܸܠܝܵܐ ܘܫܸܡܸܗ ܦܵܝܫܵܢܵܐ ܝܠܸܗ ܗܲܠ ܐܲܒܲܕ.