ܒܘܠܒܘܠܐ

ܒܘܠܒܘܠܐ

   ܚܲܕ݇ ܥܕܵܢܵܐ؛ ܒܚܲܕ݇ ܐܲܬܪܵܐ ܓܘܼܪܵܐ ܒܡܲܕܸܢܚܵܐ؛ ܗܲܟܘܼܡܸܐ ܗ݇ܘܵܐ ܚܲܕ݇ ܡܲܠܟܵܐ ܕܐܝܼܬ ܗ݇ܘܵܐ ܠܸܗ ܚܕܵܐ ܒܪܵܬܵܐ ܫܸܡܘܼܗܿ ܠܲܝܠܸܐ(ܪܲܡܫܵܐ). ܡܲܠܟܵܐ ܟܸܐ ܡܲܚܸܒ ܗ݇ܘܵܐ ܠܵܗܿ ܒܪܵܬܸܗ ܒܸܫ ܙܵܘܕܵܐ ܡܼܢ ܟܠ ܚܲܕ݇ ܡܸܢܕܝܼ ܐ݇ܚܸܪ݇ܢܵܐ ܒܕܘܼܢܝܸܐ. ܠܲܝܠܸܐ ܗܿܝ ܚܲܡܬܵܐ ܗ݇ܘܵܐ ܟ̰ܸܡ ܫܲܦܝܼܪܬܵܐ ܘܗܿܝ ܒܸܫ ܫܠܝܼܬܵܐ ܘܗܵܘܢܲܢܬܵܐ ܒܗܿܘ ܐܲܬܪܵܐ.                                             

   ܐܝܼܢܵܐ ܚܲܕ݇ ܝܵܘܡܵܐ ܩܘܼܘܼܡܠܸܗ ܚܲܕ݇ ܝܲܒܼܫܵܢܵܐ(ܒܸܪܙܵܐ) ܚܲܝܠܵܢܵܐ ܒܐܲܬܪܵܐ ܘܠܵܐ ܦܝܼܫܠܗ݇ܘܿܢ ܡܝܼܵ̈ܐ ܒܢܲܗܪܵܘܵܬܸ̈ܐ ܘܠܵܐ ܙܸܐ ܒܓܵܘ ܡܲܚܙܵܢܸ̈ܐ. ܩܲܕ݇ܡܵܝܬܵܐ ܐܝܼܠܵܢܸ̈ܐ ܘܥܸܣܒܸ̈ܐ(ܓܸܠܵܠܸ̈ܐ) ܫܘܼܪܸܐ ܠܗ݇ܘܿܢ ܒܪܵܙܵܐ. ܗܵܝܓܵܗ ܩܸܢܝܵܢܸ̈ܐ؛ ܥܸܖ̈ܒܸܐ؛ ܣܘܼܣܸ̈ܐ؛ ܛܲܝܖܸ̈ܐ، ܘܒܐ݇ܚܵܪܬܵܐ ܐ݇ܢܵܫܸ̈ܐ ܒܸܡܝܵܬܵܐ ܗ݇ܘܵܘ ܡܼܢ ܨܲܗܘܲܝܗܝ. ܡܲܠܟܵܐ ܪܵܒܵܐ ܚܲܫܵܢܵܐ ܗ݇ܘܵܐ. ܩܸܪܝܲܝܠܸܗ ܟܠܲܝܗܝ ܚܲܟܝܼܡܸ̈ܐ ܕܐܲܬܪܸܗ ܩܵܐ ܕܫܵܩܸܠ ܡܸܠܟܵܐ ܡܸܢܲܝܗܝ. ܐܝܼܢܵܐ ܟ̰ܘܼ ܚܲܕ݇ ܠܸܐ ܗ݇ܘܵܐ ܒܝܼܕܵܥܵܐ ܕܵܐܟܼܝܼ ܒܸܕ ܐܵܬܸܐ ܠܚܘܼܬܵܡܵܐ ܐܵܗܵܐ ܓܘܼܢܚܵܐ.                             

    ܗܵܝܓܵܗ ܡܛܸܐ ܠܸܗ ܚܲܕ݇ ܚܵܙܘܿܩܵܐ ܢܘܼܟܼܪܵܝܵܐ. ܗܿܘ ܡܼܢ ܐܲܬܪܵܐ ܕܡܸܨܪܸܝܢ ܗ݇ܘܵܐ ܘܡܗܝܼܪܵܐ ܒܝܘܼܠܦܵܢܵܐ ܕܐܵܫܘܿܦܘܼܬܵܐ(ܚܲܪܵܫܘܼܬܵܐ). ܩܪܸܐ ܠܸܗ ܡܲܠܟܵܐ ܩܵܬܸܗ ܘܛܠܸܒܠܸܗ ܡܸܢܸܗ ܕܒܲܛܸܠܵܗܿ ܗܿܝ ܠܵܘܛܬܵܐ ܕܢܦܝܼܠܬܵܐ ܝܗ݇ܘܵܐ ܥܲܠ ܐܲܬܪܸܗ. ܡܸܨܪܵܝܵܐ ܓܘܼܫܸܩܠܸܗ ܥܲܠ ܠܲܟܵܐ ܕܕܝܘܼܬܵܐ ܘܗܵܝܓܵܗ ܢܦܸܠܸܗ ܪܓܘܼܕܵܐ ܠܦܲܓܼܪܸܗ ܡܼܢ ܙܕܘܿܥܬܸܗ ܘܠܵܐ ܗܘܼܡܙܸܡܠܵܗ ܐ݇ܚܸܪ݇ܢܵܐ.                        

   ܐ݇ܡܸܪܸܗ ܡܲܠܟܵܐ ܩܵܬܸܗ: ـ ܗܲܡܙܸܡ! ܐܸܢ ܗܲܡܙܸܡܸܬ ܒܸܕ ܥܵܒܼܕܸܢܘܼܟܼ ܗܿܘ ܟ̰ܸܡ ܥܲܬܝܼܪܵܐ ܒܐܵܗܵܐ ܐܲܬܪܵܐ. ܐܝܼܢܵܐ ܓܲܒܼܪܵܐ ܢܘܼܟܼܪܵܝܵܐ ܒܪܸܟܠܸܗ ܘܐ݇ܡܸܪܸܗ: ـ ܡܵܪܝܼ! ܫܒܼܘܿܩ ܠܝܼ ܕܐܵܙܸܠ݇ܢ ܘܠܵܐ ܛܠܘܿܒ ܡܸܢܝܼ ܕܓܲܠܸܢܸܗ ܐܵܗܵܐ ܪܵܐܙܵܐ ܩܵܬܘܼܟܼ. ܗܵܝܓܵܗ ܚܘܼܡܬܸܢܸܗ(ܟܪܸܒܠܸܗ) ܡܲܠܟܵܐ ܘܐ݇ܡܸܪܸܗ ܩܵܐ ܡܸܨܪܵܝܵܐ: ܗܲܡܙܸܡ ܐܸܠܵܐ ܒܸܕ ܦܲܪܩܸܢܸܗ ܫܘܼܠܘܼܟܼ.ܢܵܓܘܿܕܸ̈ܐ(جلادان) ܕܒܼܸܩܠܗ݇ܘܿܢ ܩܵܬܸܗ ܘܓܪܸܫܠܗ݇ܘܿܢ ܠܣܲܝܦܲܝܗܝ ܡܼܢ ܓܵܘ ܚܘܼܠܕܵܐ(غلاف) ܩܵܐ ܦܪܵܡܬܵܐ ܕܩܕܵܠܸܗ. ܗܵܝܓܵܗ ܓܲܒܼܪܵܐ ܢܘܼܟܼܪܵܝܵܐ ܩܘܼܘܸܚܠܸܗ ܒܩܵܠܵܐ ܪܵܡܵܐ: ـ ܚܡܘܿܠ. ܒܸܕ ܐܵܡܪܸܢܸܗ ܪܵܐܙܵܐ ܕܐܵܗܵܐ ܠܵܘܛܬܵܐ ܩܵܬܘܼܟܼ. ܐܝܼܢܵܐ ܝܵܕܥܸܬ ܩܲܕ ܐܲܢ݇ܬ ܦܝܼܫܵܐ ܝܘܸܬ ܠܝܼܛܵܐ. ܘܡܘܼܙܝܸܕܠܸܗ ܒܵܬ݇ܪ ܗܵܕܵܐ :ـ ܐܵܪܵܐ ܟܡܵܐ ܥܕܵܢܵܐ ܡܼܢ ܩܵܕ݇ܡ ܐܵܕܝܼܵܐ ܠܸܐ ܝܘܸܬ ܗ݇ܘܵܐ ܬܘܼܥܠܸܡܵܐ ܠܚܲܕ݇ ܓܲܒܼܪܵܐ ܒܘܼܬ ܓܢܵܒܼܬܵܐ ܕܕܲܗܒܼܸ̈ܐ ܕܚܲܕ݇ ܬܲܓܵܪܵܐ؟ ܡܲܠܟܵܐ ܐ݇ܡܸܪܸܗ:ـ ܗܸܐ؛ ܗܵܕܟܼܵܐ ܗ݇ܘܵܐ. ܒܗܿܝ ܕܗܿܘ ܚܲܕ݇ ܓܲܢܵܒܼܵܐ ܗ݇ܘܵܐ. ܗܵܝܓܵܗ ܡܸܨܪܵܝܵܐ ܐ݇ܡܸܪܸܗ: ـ ܐܝܼܢܵܐ ܝܵܕܥܸܬ ܕܗܿܘ ܓܲܢܵܒܼܵܐ ܠܲܝܬ ܗ݇ܘܵܐ ܠܸܗ ܟ̰ܘܼ ܚܕܵܐ ܓܢܵܗܵܐ ܘܕܸܖ̈ܝܸܐ ܗ݇ܘܵܘ ܙܸܛܡܸ̈ܐ(ܒܘܼܚܬܵܢ) ܥܲܠܿܘܼܗܝ. ܗܿܘ ܠܝܼܛܠܸܗ ܩܵܬܘܼܟܼ ܘܫܘܼܕܸܪܸܗ ܠܐܵܗ ܝܲܒܼܫܵܢܵܐ ܠܐܲܬܪܘܼܟܼ ܒܗܿܝ ܕܚܲܪܵܫܵܐ ܗ݇ܘܵܐ ܘܚܲܒܼܪܵܐ ܕܣܵܛܵܢܵܐ.                                                                     

   ܒܘܼܩܸܪܸܗ ܡܲܠܟܵܐ:ـ ܡܘܼܕܝܼ ܟܸܐ ܗܵܘܝܵܐ ܥܒܼܵܕܵܐ ܩܵܐ ܡܲܟܠܵܝܬܵܐ ܕܐܵܗܵܐ ܠܵܘܛܬܵܐ؟ ܡܸܨܪܵܝܵܐ ܓܘܼܫܸܩܠܸܗ ܓܵܘ ܥܲܝܢܸ̈ܐ ܕܡܲܠܟܵܐ ܘܐ݇ܡܸܪܸܗ: ـ ܐܝܼܬ ܐܲܚܟ̰ܝܼ ܚܕܵܐ ܐܘܼܪܚܵܐ ܩܵܐ ܦܠܵܛܵܐ ܘܗܿܝ ܐܵܗܵܐ ܝܠܵܗܿ ܕܥܵܒܼܕܸܬ ܠܵܗܿ ܕܸܒܼܚܵܐ ܒܪܵܬܘܼܟܼ ܝܲܟܲܢܬܵܐ ܕܟܸܐ ܡܲܚܸܒܸܬ ܠܵܗܿ ܒܸܫ ܙܵܘܕܵܐ ܡܼܢ ܟܠ ܚܲܕ݇ ܡܸܢܕܝܼ. ܙܸܠ݇ ܥܒܼܘܼܕ ܠܵܗܿ ܡܸܐܟܼܘܿܠܬܵܐ ܩܵܐ ܕܵܒܸ̈ܐ(ܚܲܝܘܵܬܸ̈ܐ ܦܵܖ̈ܘܿܛܸܐ) ܕܓܵܘ ܥܵܒܼܵܐ ܩܲܕ ܦܵܪܸܩ ܒܸܪܙܵܐ ܕܦܪܝܼܣܵܐ ܝܠܸܗ ܒܐܲܬܪܘܼܟܼ.                                                                         

    ܗܵܝܓܵܗ ܡܲܠܟܵܐ ܫܘܼܪܸܐܠܸܗ ܠܸܒܟܼܵܝܵܐ ܘܒܘܼܪܒܸܪܸܗ ܡܼܢ ܚܲܫܵܐ ܘܟܸܐܒܼܵܐ ܕܓܼܠܝܼܒܸ̈ܐ ܗ݇ܘܵܘ ܥܲܠܸܗ. ܐܝܼܢܵܐ ܪܘܼܦܸܐ ܠܸܗ ܠܓܲܒܼܪܵܐ ܡܸܨܪܵܝܵܐ ܒܗܿܝ ܕܚܲܕ݇ ܓܲܒܼܪܵܐ ܗ݇ܘܵܐ ܫܲܪܝܼܪܵܐ .ܒܫܡܵܥܬܵܐ ܕܐܵܗܵܐ ܩܲܘܲܡܬܵܐ ܟܠܲܝܗܝ ܒܢܲܝ ܐܲܬܪܵܐ ܙܸܐ ܒܟܼܸܐ ܠܗ݇ܘܿܢ ܟܲܕ ܪܵܒܵܐ ܟܸܐ ܡܲܚܸܒܝܼ ܗ݇ܘܵܘ ܠܵܗܿ ܠܲܝܠܸܐ  ܒܪܵܬܵܐ ܕܡܲܠܟܲܝܗܝ. ܐܵܗܵܐ ܕܸܒܼܚܵܐ ܟ̰ܸܡ ܐܲܢܲܢܩܵܝܵܐ ܗ݇ܘܵܐ ܘܡܲܠܟܵܐ ܩܸܛܸܠܸܗ ܒܠܸܒܸܗ ܕܠܲܒܸܠܵܗܿ ܒܪܵܬܸܗ ܠܥܵܒܼܵܐ ܘܥܵܒܼܸܕܠܵܗܿ ܡܸܐܟܼܘܼܠܬܵܐ ܩܵܐ ܕܵܒܸ̈ܐ.                                                               

   ܐܝܼܢܵܐ ܐܝܼܬ ܗ݇ܘܵܐ ܒܗܿܘ ܐܲܬܪܵܐ ܚܲܕ݇ ܥܠܲܝܡܵܐ ܕܟܸܐ ܡܲܚܸܒ ܗ݇ܘܵܐ ܠܵܗܿ ܠܲܝܠܸܐ ܒܸܫ ܙܵܘܕܵܐ ܡܼܢ ܟܠ ܚܲܕ݇ ܘܟܸܐ ܒܵܥܸܐ ܗ݇ܘܵܐ ܕܦܵܪܸܩ ܗ݇ܘܵܐ ܠܵܗܿ ܡܼܢ ܐܵܗܵܐ ܒܸܫ ܓܲܕܘܼܬܵܐ. ܗܿܘ ܐܝܼܬ ܗ݇ܘܵܐ ܠܸܗ ܚܕܵܐ ܥܸܙܲܩܬܵܐ ܕܟܸܐ ܡܵܨܝܵܐ ܗ݇ܘܵܐ ܡܲܚܕܸܪܵܐ ܗ݇ܘܵܐ ܠܸܗ ܡܵܪܘܼܗܿ ܥܲܠ ܚܲܕ݇ ܚܲܝܘܵܐ(ܗܲܝܘܵܢ).ܐܝܼܢܵܐ ܐܸܢ ܩܲܘܸܡ ܗ݇ܘܵܐ ܐܵܗܵܐ ܓܸܕܫܵܐ؛ ܗܿܘ ܐ݇ܚܸܪ݇ܢܵܐ ܟ̰ܘܼ ܓܵܗ ܠܸܐ ܡܵܨܸܐ ܗ݇ܘܵܐ ܕܵܝܸܪ ܗ݇ܘܵܐ ܠܗܿܘ ܐܸܣܟܝܼܡܘܼܗܝ(ܦܸܨܠܘܼܗܝ) ܩܲܕ݇ܡܵܝܵܐ ܘܠܵܐ ܡܵܝܘܼܬܵܐ.                                                         

   ܡܛܸܐ ܠܸܗ ܡܲܠܟܵܐ ܒܒܸܝܬ ܦܲܠܓܵܐ ܕܥܵܒܼܵܐ ܘܡܘܼܨܠܝܼܵܐ ܠܸܗ ܠܲܝܠܸܐ ܡܼܢ ܥܲܠ ܚܲܨܵܐ ܕܣܘܼܣܵܐ ܘܝܣܝܼܪܵܐ ܠܸܗ ܥܲܠ ܚܲܕ݇ ܐܝܼܠܵܢܵܐ. ܗܵܝܓܵܗ ܒܒܸܟܼܝܵܐ ܘܒܕܸܡܥܸ̈ܐ ܕܥܲܝܢܸ̈ܐ؛ ܕܸܪܸܗ ܘܫܒܼܝܼܩܵܐ ܠܸܗ ܒܪܵܬܸܗ ܟܲܕ ܒܸܫܡܵܥܵܐ ܗ݇ܘܵܐ ܠܩܵܠܵܐ ܕܒܲܪܒܲܪܬܵܐ ܕܚܲܝܘܵܬܸ̈ܐ ܦܵܖ̈ܘܼܛܸܐ ܕܩܲܪܒܘܼܢܸܐ ܗ݇ܘܵܘ ܐܸܠܘܼܗܿ.                                                                   

   ܟܲܕ ܠܲܝܠܸܐ ܝܣܝܼܪܬܵܐ ܗ݇ܘܵܐ ܥܲܠ ܐܝܼܠܵܢܵܐ؛ ܒܸܪܓܵܕܵܐ ܗ݇ܘܵܘ ܡܼܢ ܙܕܘܼܥܬܘܼܗܿ ܘܒܸܩܪܵܝܘܼܗܝ ܗ݇ܘܵܐ ܒܵܒܘܼܗܿ ܕܗܲܝܸܪܵܗܿ. ܒܚܲܕ݇ ܓܵܗ ܚܙܸܐ ܠܵܗܿ ܕܚܲܕ݇ ܕܸܐܒܼܵܐ ܓܘܼܪܵܐ ܩܲܪܒܘܼܢܸܐ ܝܠܸܗ ܐܸܠܘܼܗܿ ܟܲܕ ܥܲܝܢܘܼ̈ܗܝ ܡܲܒܪܘܼܩܸܐ ܗ݇ܘܵܘ ܓܵܘ ܚܸܫܟܵܐ ܕܠܲܝܠܸܐ. ܗܵܝܓܵܗ ܡܸܢܫܸܠܬܵܢܸܐ ܦܪܸܣܠܸܗ ܚܲܕ݇ ܩܵܠܵܐ ܕܡܘܼܣܝܼܩܝܼ  ܒܥܵܒܼܵܐ. ܐܵܗܵܐ ܢܥܸܡܬܵܐ(ܩܝܼܢܬܵܐ)  ܗܵܕܟܼܵܐ ܫܲܦܝܼܪܬܵܐ ܗ݇ܘܵܐ ܕܦܘܼܪܸܩܠܵܗܿ ܠܙܕܘܼܥܬܵܐ ܕܠܲܝܠܸܐ ܘܟܠܸܐ ܠܗ݇ܘܿܢ ܟܠܲܝܗܝ ܚܲܝܘܵܬܸ̈ܐ ܕܥܵܒܼܵܐ ܠܫܡܵܥܬܘܼܗܿ.ܦܪܸܣܠܸܗ ܩܵܠܵܐ ܫܡܲܝܵܢܵܐ ܒܟܠܵܗܿ ܥܵܒܼܵܐ ܘܥܲܡ ܫܡܵܥܬܸܗ ܟܠܲܝܗܝ ܚܲܝܘܵܬܸ̈ܐ ܦܵܖ̈ܘܛܸܐ ܒܸܕܡܵܟܼܵܐ ܗ݇ܘܵܘ ܥܲܠ ܐܲܪܥܵܐ ܘܒܸܫܠܵܝܵܐ ܗ݇ܘܵܘ ܡܼܢ ܙܵܘܥܵܐ.                                           

   ܠܲܝܠܸܐ ܙܸܐ ܦܝܼܫܬܵܐ ܗ݇ܘܵܐ ܚܘܼܪܸܫܬܵܐ ܒܝܲܕ ܗܿܘ ܩܵܠܵܐ ܘܪܵܒܵܐ ܓ̰ܲܠܕܸܐ ܫܸܪܝܲܝܗܝ ܠܵܗܿ ܩܵܘܕܘܼܗܿ ܘܪܚܸܫܠܵܗܿ ܩܲܕ ܦܵܠܛܵܐ ܡܼܢ ܥܵܒܼܵܐ. ܐܝܼܢܵܐ ܒܸܥܒܼܵܪܬܘܼܗ ܡܼܢ ܓܵܘ ܥܵܒܼܵܐ ܒܸܪܓܼܵܫܵܐ ܗ݇ܘܵܐ ܕܚܲܕ݇ ܡܘܼܙܝܼܩܘܼܪܵܐ ܠܵܐ ܡܸܬܚܵܙܝܵܢܵܐ ܟܲܕ ܛܸܫܝܵܐ ܒܸܝܠ ܛܲܖ̈ܦܸܐ ܘܦܲܥܘܵܢܸ̈ܐ ܕܐܝܼܠܵܢܸ̈ܐ؛ ܒܸܐܬܵܝܵܐ ܗ݇ܘܵܐ ܒܵܬ݇ܪܵܐ ܒܵܬ݇ܪܘܼܗܿ. ܚܲܝܘܵܬܸ̈ܐ ܦܵܖ̈ܘܿܛܸܐ ܙܸܐ ܝܖ̈ܝܼܟܼܸܐ ܗ݇ܘܵܘ ܠܡܲܪܙܵܐ ܕܐܘܼܪܚܵܐ ܘܒܸܠܟܲܚܲܝܗܝ ܗ݇ܘܵܘ ܐܝܼܕܵܬܸ̈ܐ ܕܠܲܝܠܸܐ. ܗܵܝܓܵܗ ܗܿܝ ܟܲܕ ܗܠܝܼܟܼܬܵܐ ܗ݇ܘܵܐ(ܐܘܼܪܚܵܐ ܪ݇ܚܝܼܫܬܵܐ ܗ݇ܘܵܐ) ܟܠܸܗ ܡܸܬܚܵܐ ܕܠܲܝܠܸܐ ܘܩܵܠܵܐ ܕܡܘܼܣܝܼܩܝܼ ܒܸܐܬܵܝܵܐ ܗ݇ܘܵܐ ܥܲܡܘܼܗܿ؛ ܡܛܸܐ ܠܵܗܿ ܠܩܲܨܪܵܐ ܕܒܵܒܘܼܗܿ ܘܕܪܸܐ ܠܵܗܿ ܩܵܠܸܐ ܒܝܼܸܗ.                                       

    ܪܵܒܵܐ ܚܸܕܝܸ̈ܐ ܗ݇ܘܵܘ ܐ݇ܢܵܫܸ̈ܐ ܒܚܙܵܝܬܘܼܗܿ ܒܗܿܝ ܕܪܵܒܵܐ ܟܸܐ ܡܲܚܸܒܝܼ ܗ݇ܘܵܘ ܠܵܗܿ ܠܲܝܠܸܐ ܘܟ̰ܘܼ ܚܲܕ݇ ܠܵܐ ܚܙܸܐ ܠܸܗ ܠܗܿܘ ܛܲܝܪܵܐ ܙܥܘܿܪܵܐ ܕܒܸܢܕܵܝܵܐ ܗ݇ܘܵܐ ܡܼܢ ܥܲܠ ܚܲܕ݇ ܦܲܥܘܵܐ ܠܗܿܘ ܦܲܥܘܵܐ ܐ݇ܚܸܪ݇ܢܵܐ. ܘܗܲܪ ܒܗܿܝ ܥܕܵܢܵܐ ܫܘܼܪܸܐ ܠܵܗܿ ܡܸܛܪܵܐ ܒܸܪܥܵܝܵܐ ܡܼܢ ܫܡܲܝܵܐ. ܘܗܿܘ ܛܲܝܪܵܐ ܙܥܘܿܪܵܐ: ܒܘܼܠܒܘܼܠܵܐ؛ ܠܸـܐ ܗ݇ܘܵܐ ܒܸܫܠܝܵܐ ܡܼܢ ܙܡܵܪܵܐ ܬܚܘܿܬ ܡܸܛܪܵܐ؛ ܒܗܿܝ  ܕܦܘܼܪܩܵܐ ܗ݇ܘܵܐ ܠܚܲܝܸ̈ܐ ܕܒܪܵܬ ܡܲܠܟܵܐ ܕܟܸܐ ܡܲܚܸܒ ܗ݇ܘܵܐ ܠܵܗܿ ܪܵܒܵܐ. ܘܟܲܕ ܠܸܐ ܡܵܨܸܐ ܗ݇ܘܵܐ ܕܕܵܝܸܪ ܗ݇ܘܵܐ ܠܦܸܨܠܸܗ ܩܲܕ݇ܡܵܝܵܐ؛ ܟܸܐ ܐܵܬܸܐ ܗ݇ܘܵܐ ܟܠ ܠܲܝܠܸܐ ܘܟܸܐ ܝܵܬܸܒܼ ܗ݇ܘܵܐ ܥܲܠ ܚܲܕ݇ ܦܲܥܘܵܐ ܕܗܿܘ ܐܝܼܠܵܢܵܐ ܕܝܼܗ݇ܘܵܐ ܩܘܼܪܒܵܐ ܠܟܵܘܬܵܐ ܕܬܵܘܵܢܵܐ ܕܠܲܝܠܸܐ ܘܟܸܐ ܙܵܡܸܪ ܗ݇ܘܵܐ ܠܵܗܿ ܩܵܬܘܼܗܿ ܗܿܝ ܙܡܵܪܬܘܼܗܝ ܟ̰ܸܡ ܫܲܦܝܼܪܬܵܐ.                                                                                 

   ܗܵܕܟܼܵܐ ܗܘܼܩܝܸ̈ܐ ܝܢܵܐ ܕܒܪܵܬ ܡܲܠܟܵܐ ܚܕܸܪܵܗܿ ܥܲܠ ܚܲܕ݇ ܛܲܝܪܵܐ ܘܙܘܼܘܸܓܠܵܗܿ ܥܲܡ ܒܘܼܠܒܘܼܠܵܐ ܘܙܡܸܖ̈ܗ݇ܘܿܢ ܡܸܚܕܵܕܸܐ ܓܵܘ ܥܵܒܼܵܐ ܘܓܵܘ ܟܲܪܡܵܐ ܗܲܠ ܐܲܒܲܕ ܐܲܒܲܕܝܼܢ.                                                                   

                

                   ܫܩܝܼܠܬܵܐ ܡܼܢ ܟܬܵܒܼܵܐ:

Desert

J.M.G Le Clezio

                                ܦܘܼܫܵܩܵܐ ܠܦܵܪܣܸܕ: ܐܵܙܝܼܬܵܐ ܗܲܡܦܵܪܬܝܼܸܢ

                                  » ܠܣܘܼܪܸܕ: ܫܲܡܝܼܪܵܡ ܕ.ܦܘܼܪܝܵܐܢ