ܡܢܘܫܐ

    ܡܢܘܫܐ

                 ܫܡܥܘܢ ܒܝܬ ܐܝܫܘ

   ܒܘܼܫܵܝܘܼܬܵܐ ܕܥܲܡܖ̈ܵܢܸܐ ܕܡܵܬܲܢ ܐܵܖܸ̈ܡܢܵܝܸܐ ܗ݇ܘܵܘ. ܡܲܚܲܒܬܵܐ؛ ܡܲܣܠܵܝܬܵܐ؛ ܝܗܵܒܼܵܐ ܫܩܵܠܵܐ ܕܐܝܼܬ ܗ݇ܘܵܐ ܠܲܢ ܥܲܡ ܚܕܵܕܸܐ ܘܓܒܼܵܪܵܐ ܡܲܓܘܘܼܪܸܐ ܕܒܸܝܠܲܢ ܙܸܐ ܚܕܵܐ ܕܝܼܠܵܝܬܵܐ ܥܝܵܕܵܝܬܵܐ ܗ݇ܘܵܐ. ܐܝܼܢܵܐ ܬܸܪܘܲܝܗܝ ܓܸܒܵܢܸ̈ܐ ܟܸܐ ܓ̰ܲܪܒܝܼ ܗ݇ܘܵܘ ܕܡܲܒܨܸܪܝܼ ܠܸܗ ܓܒܼܵܪܵܐ ܕܒܸܝܠ ܐܵܖܸ̈ܡܢܵܝܸܐ ܘܐܵܬܘܼܖ̈ܵܝܸܐ. ܒܗܿܝ ܕܒܸܒܪܵܝܵܐ ܗ݇ܘܵܐ ܚܲܕ݇ܟܡܵܐ ܬܲܖ̈ܩܲܠܝܵܬܸܐ ܠܵܐ ܒܲܣܝܼܡܸ̈ܐ ܕܐܘܼܡܬܵܢܵܝܸ̈ܐ ܘܬܵܘܕܝܼܬܵܢܵܝܸ̈ܐ. ܐܝܼܢܵܐ ܡܵܢܝܼ ܟܸܐ ܡܵܨܸܐ ܕܡܲܟܠܸܐ ܠܸܗ ܚܲܝܠܵܐ ܕܚܘܼܒܵܐ؟                 

   ܡܵܢܘܿܫܵܐ؛ ܒܸܡܗܝܼܪܘܼܬܵܐ ܐܝܼܬ ܗ݇ܘܵܐ ܠܵܗܿ ܫܘܼܠܛܵܢܵܐ ܠܬܸܪܘܲܝܗܝ ܠܸܫܵܢܸ̈ܐ ܕܐܲܖܸ̈ܡܢܵܝܸܐ ܘܐܵܬܘܼܖ̈ܵܝܸܐ ܒܗܿܝ ܕܩܲܕ ܝܸܡܘܼܗܿ ܘܝܸܡܵܐ ܕܒܵܒܘܼܗܿ ܐܵܬܘܼܖ̈ܵܝܸܐ ܗ݇ܘܵܘ؛ ܗܿܝ  ܟܸܐ ܗܲܡܙܸܡܵܐ ܗ݇ܘܵܐ ܥܲܡ ܝܸܡܘܼܗܿ ܐܵܬܘܼܪܵܐܝܼܬ ܘܥܲܡ ܒܵܒܘܼܗܿ ܒܠܸܫܵܢܵܐ ܐܵܪܸܡܢܵܝܵܐ.ܐܵܢܵܐ ܘܡܵܢܘܿܫܵܐ ܐܝܼܬ ܗ݇ܘܵܐ ܠܲܢ ܚܕܵܐ ܚܝܵܢܘܼܬܵܐ ܠܟܸܣ ܐܘܼܕܵܠܸܐ ܐܵܦܸܢ ܕܒܲܝܬܘܵܬܲܢ ܪܸܚܩܵܐ ܗ݇ܘܵܘ ܐܝܼܢܵܐ ܬܦܵܩܝܵܬܲܢ ܒܸܫ ܙܵܘܕܵܐ ܟܸܐ ܗܵܘܝܼ ܗ݇ܘܵܘ ܡܵܢܘܿܫܵܐ ܠܵܐ ܐܲܚܟ̰ܝܼ ܚܠܝܼܬܵܐ ܗ݇ܘܵܐ ܒܦܲܐܬܵܐ ܘܒܩܘܼܡܬܵܐ؛ ܐܝܼܢܵܐ ܪܵܒܵܐ  ܙܸܐ ܗܵܘܢܵܢـܬܵܐ ܗ݇ܘܵܐ ܘܡܵـܪ ܡܝܼܵܐ ܕܐܝܼـܕܸ̈ܐ. ܘܗܲܪ ܒـܗܿܝ ܥܕܵܢܵــܐ ܚܲܦܛܵܢܬܵܐ ܠܕܲܖ̈ܣܵܬܘܼܗܿ. ܪܵܒܵܐ ܥܕܵܢܵܬܸ̈ܐ ܡܐܘܼܕܵܠܸܐ ܟܸܐ ܗܲܓܲܚ ܗ݇ܘܵܐ ܥܲܠ ܟܬܵܒܼܸ̈ܐ.  

ܡܵܢܘܿ ܪܵܒܵܐ ܟܸܐ ܚܵܠܝܵܐ ܗ݇ܘܵܐ ܒܠܸܒܝܼ. ܘܟܸܐ ܪܵܥܫܸܢ ܗ݇ܘܵܐ ܥܲܠ ܣܘܼܡܦܵܬܝܼܘܼܗܿ ܠܟܸܣܠܝܼ. ܐܲܚܢܲܢ ܟܸܐ ܩܵܪܲܚ ܗ݇ܘܵܐ ܠܵܗܿ ܡܵܢܘܿ. ܟܸܐ ܒܵܣܸܡ ܗ݇ܘܵܐ ܠܵܗܿ ܐܵܗ ܫܸܡܵܐ ܪܵܒܵܐ.                                                                                              

   ܚܲܕ݇ ܝܵܘܡܵܐ ܚܙܸܐ ܠܲܢ ܐܝܼܢܵܐ ܠܚܲܕ݇ ܓ̰ܘܲܢܩܵܐ ܐܲܪܸܡܢܵܝܵܐ ܫܸܡܘܼܗܝ ܣܲܪܟܝܼܣ ܕܨܸܠܝܵܐ ܗ݇ܘܵܐ ܡܼܢ ܡܕܝܼܢ݇ܬܵܐ ܕܡܘܼܫ ܕܝܼܠܵܗܿ ܒܬܘܼܪܟܝܼܵܐ ܘܫܸܪܝܵܐ ܗ݇ܘܵܐ ܒܡܵܬܲܢ ܒܵܒܵܪܝܼ .ܐܵܗܵܐ ܐ݇ܢܵܫܵܐ ܠܵܐ ܙܘܼܙܵܐ ܐܝܼܬ ܗ݇ܘܵܐ ܠܸܗ ܘܠܵܐ ܙܸܐ ܚܲܕ݇ ܡܸܢܕܝܼ ܩܵܐ ܚܲܝܘܼܬܵܐ. ܪܵܒܝܼ ܐܵܪܣܸܝܢ ܒܵܒܵܐ ܕܡܵܢܘܿ ܕܝܼܗ݇ܘܵܐ ܚܲܕ݇ ܐ݇ܢܵܫܵܐ ܡܝܲܩܪܵܐ ܘܡܝܲܬܪܵܐ؛ ܡܵܪܵܐ ܕܟܲܖ̈ܡܵܢܸܐ ܘܐܲܖ̈ܥܵܬܸܐ؛ ܩܵܕ݇ܡ ܗܲܝܸܪܸܗ ܪܵܒܵܐ. ܐܵܗܵܐ ܣܲܪܟܝܼܣ ܐܝܼܬ ܗ݇ܘܵܐ ܠܸܗ ܚܲܕ݇ ܩܵܠܵܐ ܒܲܣܝܼܡܵܐ؛ ܟܸܐ ܙܵܡܸܪ ܗ݇ܘܵܐ؛ ܐܵܦ ܟܸܐ ܡܵܚܸܐ ܗ݇ܘܵܐ ܫܲܒܝܼܒܵܐ.                                                                                               

 ܗܿܝ ܫܸܢ݇ܬܵܐ ܪܵܒܝܼ ܐܵܪܣܸܝܢ ܥܒܼܸܕܠܸܗ ܡܲܚܫܲܚܬܵܐ ܩܲܕ ܡܲܪܥܵܝܬܵܐ ܕܒܸܩܪܵܐ ܕܡܵܬܵܐ ܦܵܝܫܵܐ ܡܣܘܼܦܝܼܬܵܐ ܠܚܲܡܘܼܗܝ؛ ܘܒܓܵܢܸܗ ܙܸܐ ܩܘܼܒܠܵܐ ܠܸܗ ܥܲܪܵܒܼܬܘܼܗܝ(ضمانت) ܘܒܢܸܐ ܠܗ݇ܘܿܢ ܩܵܬܸܗ ܚܕܵܐ ܟܘܼܠܘܼܚܬܵܐ ܠܡܲܪܙܵܐ ܕܡܵܬܵܐ. ܗܿܘ ܠܵܐ ܐܲܚܟ̰ܝܼ ܡܘܼܦܠܸܚܠܸܗ ܡܗܝܼܪܘܼܬܵܐ ܠܚܲܡܵܝܬܵܐ ܘܡܲܪܥܵܝܬܵܐ ܕܩܸܢܝܵܢܸ̈ܐ؛ ܐܸܠܵܐ ܒܖܸ̈ܓܼܫܘܼܗܝ ܒܲܣܝܼܡܸܐ ܩܸܢܝܘܼܗܝ ܗ݇ܘܵܐ ܠܸܒܵܐ ܕܥܵܠܡܵܐ ܕܡܵܬܵܐ.                                               

   ܚܲܕ݇ ܡܼܢ ܝܵܘܡܵܢܸ̈ܐ ܕܝܲܪܚܵܐ ܕܛܲܒܲܚ ܛܠܸܒܠܸܗ ܡܸܢܝܼ ܪܵܒܝܼ ܐܵܪܣܸܝܢ ܕܗܲܝܸܪܸܢܸܗ ܒܕܸܫܬܵܐ ܩܵܐ ܡܲܫܬܵܝܬܵܐ ܕܚܲܩܠܵܐ  ܕܣܦܵܣܬܸܗ(ܝܘܿܢܓ̰ܸܗ) ܕܝܼܗ݇ܘܵܐ 

 ܥܲܠ ܠܲܚܦܵܐ ܕܪܘܼܡܬܵܐ؛ ܩܲܕ ܚܕܵܐ ܚܲܩܠܵܐ ܗ݇ܘܵܐ ܪܵܒܵܐ ܪܘܝܼܚܬܵܐ ܕܒܸܕ ܓܵܪܫܵܐ ܗ݇ܘܵܐ ܡܲܫܬܵܝܬܘܼܗܿ ܙܵܘܕܵܐ ܡܼܢ ܬܠܵܬ݇ ܝܵܘܡܵܢܸ̈ܐ. ܘܩܘܼܒܸܠܝܼ ܐܵܢܵܐ ܪܵܒܵܐ ܒܚܲܕܘܼܬܵܐ.                                                                                                 

   ܫܩܸܠܲܢ ܠܡܸܐܪܲܢ ܘܠܫܲܪܟܵܐ ܕܐܵܢܝ݇ ܟ̰ܲܟܸ̈ܐ ܕܦܘܼܠܚܵܢܲܢ ܘܐ݇ܙܸܠܲܢ ܥܲܠ ܡܝܼܵܐ ܘܐ݇ܣܸܪܲܢ ܘܡܚܸܐ ܠܲܢ ܡܝܼܵܐ ܥܲܠ ܚܲܩܠܵܐ. ܨܠܝܼܬܵܐ ܗ݇ܘܵܐ ܫܸܡܫܵܐ ܘܩܲܪܒܘܼܢܸܐ ܗ݇ܘܵܐ ܥܲܠ ܨܲܕܖ̈ܵܢܸܐ ܕܚܲܩܠܵܐ ܕܣܦܲܣܬܵܐ. ܐܲܚܢܲܢ ܒܠܝܼ̈ܓܸܐ ܒܗܲܩܵܝܬܵܐ ܘܬܲܢܵܝܬܵܐ ܡܼܢ ܟܠ ܓܸܒܵܐ؛ ܚܙܸܐ ܠܲܢ ܐܝܼܢܵܐ ܡܵܢܘܿܫܵܐ ܫܩܝܼܠܬܵܐ ܠܚܕܵܐ ܐܵܦܵܝܬܵܐ(ܣܘܼܦܪܵܐ) ܩܵܐ ܡܸܐܟܼܘܼܠܬܵܐ ܕܪܲܡܫܲܢ ܘܒܸܐܬܵܝܵܐ ܠܓܸܒܲܢ؛ ܐܝܼܢܵܐ ܠܵܐ ܡܛܵܝܵܐ ܥܲܠܲܢ ܟܲܕ ܗܿܝ ܒܵܠܘܼܗܿ ܠܓܸܒܵܐ ܕܝܼܲܢ؛ ܟܠܝܼܬܵܐ ܗܲܡܙܘܼܡܸܐ ܥܲܡ ܚܲܕ݇ ܐܘܼܪܙܵܐ. ܐܝܼܢܵܐ ܐܵܗܵܐ ܟܠܵܝܬܵܐ ܓܪܸܫܠܵܗܿ ܠܵܐ ܒܵܨܘܿܪܬܵܐ ܡܼܢ ܚܲܕ݇ ܪܘܼܒܥܵܐ ܕܣܵܥܲܬ. ܚܲܪܬܵܐ ܫܒܼܸܩܠܵܗܿ ܘܣܛܸܐ ܠܵܗܿ ܒܣܘܼܪܗܵܒܼܵܐ(ܒܩܲܘܪܵܓܼܘܼܬܵܐ) ܠܓܸܒܲܢ. ܟܲܕ ܐܵܢܵܐ ܠܵܐ ܡܨܸܐ ܠܝܼ ܕܝܵܕܥܸܢܸܗ ܕܡܵܢܝܼ ܗ݇ܘܵܐ ܗܿܘ ܐܘܼܪܙܵܐ؛ ܒܗܿܝ ܕܪܸܚܩܵܐ ܗ݇ܘܵܐ ܘܐܵܢܝܼ ܟܸܠܝܸ̈ܐ ܗ݇ܘܵܘ ܒܛܸܠܸ̈ܐ ܕܐܝܼܠܵܢܸ̈ܐ.                                                                                                  

   ܡܵܢܘܿ ܡܛܸܐ ܠܵܗܿ ܠܟܸܣܠܲܢ؛ ܫܸܪܝܵܐ ܠܵܗܿ ܐܵܦܵܝܬܵܐ ܘܡܘܼܬܒܼܵܐ ܠܵܗܿ ܥܲܠ ܐܲܪܥܵܐ.ܝܬܸܒܼܠܵܗܿ ܠܟܸܣܠܝܼ ܥܲܠ ܚܕܵܐ ܒܵܘܵܐ؛ ܐܲܩܠܘܼܗܿ ܓܵܘ ܡܝܼܵܐ ܕܡܲܫܬܵܝܬܵܐ ܘܓܸܠܝܸ̈ܐ ܗܲܠ ܒܸܪܟܘܼܗܿ. ܒܸܓܢܵܝܬܵܐ ܕܝܵܘܡܵܐ؛ ܦܲܪܨܘܼܢܸܐ ܘܨܲܡܚܘܼܢܸܐ ܗ݇ܘܵܐ ܗܿܘ ܝܲܠܡܘܼܗܿ ܚܘܵܪܵܐ ܣܡܘܿܩܢܵܝܵܐ؛ ܘܙܲܗܪܝܼܖܸ̈ܐ ܕܫܸܡܫܵܐ

ܠܲܓ̰ܠܘܼܓ̰ܸܐ ܗ݇ܘܵܘ ܓܵܘ ܚܲܩܠܵܐ ܕܒܸܣܟܘܼ̈ܗܿ ܕܲܗܒܼܵܢܵܝܸ̈ܐ. ܘܒܚܲܕ݇ ܝܲܠܡܵܐ ܒܘܼܪܣܸܡܵܐ(ܓܵܚܘܿܟܵܐ) ܗܲܩܘܼܝܸܐ ܗ݇ܘܵܐ ܡܼܢ ܦܠܵܫܵܐ ܕܡܵܪܵܠ ܥܲܡ ܐܲܢܩܸܝܢ؛ ܬܪܸܝܢ ܐܲܖ̈ܡܸܠܝܵܬܸܐ ܕܡܵܬܵܐ؛ ܘܡܼܢ ܨܲܥܵܖ̈ܝܵܬܸܐ ܨܵܘܵܢܸ̈ܐ ܕܝܼܗ݇ܘܵܐ ܨܲܥܘܼܪܸܐ. ܐܵܢܵܐ ܒܚܕܵܐ ܠܗܝܼܩܘܼܬܵܐ ܕܒܼܝܼܩܵܐ ܢܵܬܵܐ ܠܚܲܒܪܵܢܘܼܗܿ؛ ܦܪܝܼܫܵܐܝܼܬ ܦܲܟܘܼܪܵܐ ܝܘܸܢ ܗ݇ܘܵܐ ܥܲܠ ܡܲܓ̰ܘܲܓ̰ܬܵܐ ܕܐܝܼܕܵܬܘܼܗܿ ܘܪܸܫܘܼܗܿ ܘܪܲܦ̰ܫܵܢܘܼܗܿ؛ ܟܲܕ ܚܲܕ݇ܟܡܵܐ ܓܵܗܸ̈ܐ ܒܸܩܛܵܠܵܐ ܠܒܲܩܝܵܬܸ̈ܐ ܕܝܼܗ݇ܘܵܘ ܒܸܢܗܵܣܵܐ ܠܐܲܩܠܘܼ̈ܗܿ ܘܐܝܼܕܘܼ̈ܗܿ ܓܸܠܝܸ̈ܐ.

    ܠܲܝܬ ܗ݇ܘܵܐ ܦܝܵܫܵܐ ܪܵܒܵܐ ܩܵܐ ܓܢܵܝܬܵܐ ܕܫܸܡܫܵܐ ܘܚܫܘܼܟܼܝܵܐ(ܚܸܫܟܵܐ)؛ܐܝܼܢܵܐ ܐܲܚܢܲܢ ܩܸܠܝܸ̈ܐ ܒܡܲܚܟܵܝܬܵܐ (ܗܲܡܙܲܡܬܵܐ) ܥܲܡܚܕܵܕܸܐ. ܪܵܒܝܼ ܐܵܪܣܸܝܢ ܡܸܐܪܵܐ ܠܪܲܦ̰ܫܵܢܘܼܗܝ ܒܸܐܬܵܝܵܐ ܗ݇ܘܵܘ ܡܼܢ ܕܗܿܘ ܪܸܫܵܐ ܠܓܸܒܲܢ؛ ܐܝܼܢܵܐ ܦܲܪܘܼܓ̰ܲܢ ܗ݇ܘܵܐ ܒܚܲܡܚܘܵܪܘܼܬܵܐ(ܕܸܩܲܬ). ܠܵܐ ܡܛܵܝܵܐ ܥܲܠܲܢ؛ ܕܪܸܐ ܠܸܗ ܩܵܠܸ̈ܐ ܘܡܘܼܠܝܸܙܵܐ ܠܸܗ ܒܪܵܬܘܼܗܝ ܕܠܵܐ ܦܵܝܫܵܐ ܠܕܸܪܲܢܓ ܒܗܿܝ ܕܚܲܫܟܘܼܢܵܐ ܗ݇ܘܵܐ ܗܵܘܵܐ.ܐܝܼܢܵܐ ܪܵܒܝܼ ܐܵܪܣܸܝܢ ܒܚܲܕ݇ ܝܲܠܡܵܐ ܡܵܠܘܿܚܵܐ ܒܸܓܚܵܟܵܐ ܗ݇ܘܵܐ ܬ݇ܚܘܿܬ ܣܸܢܒܝܼܠܵܠܘܼܗܝ ܘܦܲܟܘܼܪܵܐ ܗ݇ܘܵܐ ܒܕܲܩܝܼܩܘܼܬܵܐ ܥܲܠܲܢ ܕܟܡܵܐ ܩܸܠܝܸ̈ܐ ܝܘܲܚ ܗ݇ܘܵܐ ܓܵܘ ܥܸܢܝܵܢܲܢ(ܨܘܿܗܒܲܬܲܢ) ܘܟܡܵܐ ܡܵܪ ܣܘܼܟܵܠܵܐ ܗ݇ܘܵܘ ܦܲܟܲܖ̈ܝܵܬܲܢ.ܗܵܝܓܵܗ ܡܵܢܘܿ ܫܩܸܠܵܗܿ ܠܕܲܪܙܵܐ ܕܓܸܠܵܐ ܚܨܝܼܕܵܐ ܠܚܵܨܘܼܗܿ ܘܐ݇ܙܸܠܵܗܿ. ܟܲܕ ܗܿܝ ܒܸܐܙܵܠܵܐ ܘܐܵܢܵܐ ܦܲܪܘܼܓ̰ܵܐ ܝܘܸܢ ܗ݇ܘܵܐ ܒܠܗܝܼܩܘܼܬܵܐ ܒܵܬ݇ܪܘܼܗܿ ܘܗܿܝ ܙܸܐ ܟܠ ܟܡܵܐ ܓܵܗ ܦܬܵܠܵܐ ܘܓܲܫܘܼܩܸܐ ܥܲܠܲܢ ܗܲܠ     ܕܥܒܼܸܪܵܗܿ ܒܵܬ݇ܪ ܓܘܼܕܵܐ ܕܟܲܖ̈ܡܵܢܸܐ ܘܓܢܸܐ ܠܵܗܿ ܡܼܢ ܩܵܕ݇ܡ ܥܲܝܢܝܼ.       

   ܡܼܢ ܒܵܬ݇ܪ ܕܐ݇ܟܼܸܠܲܢ ܘܩܘܼܪܩܸܙܠܲܢ؛ ܝܬܸܒܼܠܲܢ ܠܡܲܪܙܵܐ ܕܚܲܩܠܵܐ ܘܐܵܢܵܐ ܫܩܸܠܝܼ ܫܸܓܼ݇ܪܝܼ ܢܘܼܪܵܐ ܩܵܐ ܡܲܢܘܲܪܬܵܐ ܕܒܲܩܝܵܬܸ̈ܐ ܒܬܸܢܵܐ. ܗܿܘ ܙܸܐ ܬܘܼܦܝܵܐ ܠܸܗ ܟ̰ܘܼܒܘܼܓܼܘܼܗܝ ܘܐ݇ܡܸܪܸܗ: ـ ܢܝܼܢܘܿܣ ܒܪܘܿܢܝܼ! ܓ̰ܘܼܘܸܒܠܝܼ: ܒܸܗ݇ܢܵܐ(ܒܝܼܢܵܐ) ܪܵܒܝܼ. ܒܘܼܩܸܪܸܗ:ܪܵܒܵܐ ܟܸܐ ܒܵܥܸܬ ܠܵܗܿ ܡܵܢܘܿܫܵܩ ܒܪܵܬܝܼ؟ܐܵܢܵܐ ܣܡܸܩܠܝܼ؛ ܬܒܼܸܢܝܼ ܘܛܠܸܩܠܵܗܿ ܥܲܠܝܼ.ܐ݇ܡܸܪܝܼ ܒܠܸܒܝܼ: ـ ܝܵܐ ܡܵܪܝܼ ܘܐܲܠܵܗܝܼ! ܐܵܗ ܡܘܼܕ ܒܘܼܩܵܪܵܐ ܝܠܸܗ ܒܲܩܘܼܪܘܼܗܝ ܠܸܗ ܐܵܗ ܐ݇ܢܵܫܵܐ؟...ܐܝܼܢܵܐ ܓ̰ܲܠܕܸܐ ܬܥܸܪܝܼ ܠܓܵܢܝܼ...ܐ݇ܡܸܪܝܼ: ـ ܟܠܲܢ ܟܸܐ  ܒܵܥܲܚ ܠܵܗܿ. ܡܵܢܝܼ ܠܸܐ ܒܵܥܸܐ ܠܵܗܿ؟                                                        

   ܒܐܵܗܵܐ ܡܸܨܥܵܝܵܐ ܩܵܕ݇ܡ ܡܲܦܬܸܠܸܢܸܗ ܡܼܢ ܕܗܿܘ ܢܝܼܫܵܐ ܕܐܝܼܬ ܗ݇ܘܵܐ ܠܸܗ.ܐܝܼܢܵܐ ܡܼܢ ܓܸܒܵܐ ܐ݇ܚܸܪ݇ܢܵܐ ܡܵܢܘܿ ܥܕܵܢܵܐ ܕܓܒܼܵܪܘܼܗܿ ܗ݇ܘܵܐ ܘܐܵܢܵܐ ܩܵܕܸܐ ܠܵܐ ܦܪܝܼܩܵܐ ܡܼܢ ܩܪܵܝܬـܝܼ ܘܐܝܼܕܝܼ ܣܦܝܼܩܬܵܐ؛ܚܲܕ݇ ܐܸܣܟܘܼܠܵܝܵܐ(ܝܵܠܘܿܦܵܐ) ܝܘܸܢ ܗ݇ܘܵܐ ܥܲܠ ܡܸܢܬܵܐ ܕܒܵܒܵܐ. ܐܝܼܬܵܐ؛ ܐܝܼܡܲܢ ܕܐܵܢܵܐ ܒܚܲܕ݇ ܦܲܪܨܘܼܦܵܐ ܫܸܠܝܵܐ ܡܓ̰ܘܼܘܸܒܠܝܼ ܐܸܠܸܗ: ـ ܡܵܢܝܼ ܠܸܐ ܒܵܥܸܐ ܠܵܗܿ ܡܵܢܘܿ؟ ܚܕܵܐ ܟܡܵܝܘܼܬܵܐ ܩܘܼܠܩܸܠܲܝܗܝ ܠܝܼ ܚܫܝܼܒܼܝܵܬܸ̈ܐ ܕܪܵܒܝܼ ܐܵܪܣܸܝܢ.            

    ܟܲܕ ܐܵܢܵܐ ܪܸܫܝܼ ܬܝܼܟܘܼܗܝ ܠܨܲܕܪܝܼ ܘܒܨܸܒܥܝܼ ܦܲܠܬܘܼܫܸܐ ܓܵܘ ܥܸܩܪܵܐ ܕܓܸܠܵܠܸ̈ܐ؛ ܪܵܒܝܼ ܐܵܪܣܸܝܢ ܝܬܸܒܸܠܸܗ ܩܘܼܪܒܝܼ؛ ܐܝܼܕܸܗ ܡܘܼܬܒܼܵܠܸܗ ܥܲܠ ܪܲܦ̰ܫܝܼ ܘܐ݇ܡܸܪܸܗ: ـ ܢܝܼܢܘܼܣ ܒܪܘܿܢܝܼ؛ ܚܲܕ݇ ܠܲܝܠܸܐ ܝܲܪܝܼܟܼܵܐ ܐܝܼܬ ܠܲܢ    ܠܩܲܕ݇ܡܵܐ. ܒܲܣ ܫܒܼܘܿܩ ܗܲܩܸܢܘܼܟܼ ܚܕܵܐ ܗܲܩܝܲܬ ܕܪܵܒܵܐ ܥܕܵܢܵܐ ܡܼܢ ܩܵܕ݇ܡ  

  ܐܵܕܝܼܵܐ ܩܸܪܝܘܼܗܿ ܝܘܸܢ ܒܚܲܕ݇ ܟܬܵܒܼܵܐ ܥܲܬܝܼܩܵܐ ܕܐܲܪܸܡܢܵܝܸܐ.ܗܵܝܓܵܗ ܦܘܼܠܸܛܠܸܗ ܦܘܼܪܬܸܠܵܠܸܗ ܦܵܦܝܼܪܘܿܙܘܼܗܝ؛ ܫܓܼ݇ܝܼܪܵܐ ܠܸܗ ܘܗܵܕܟܼܵܐ ܐ݇ܡܸܪܵܗ:

    ـ  ܐܝܼܬ ܗ݇ܘܵܐ ܚܲܕ݇ ܐ݇ܢܵܫܵܐ ܥܲܬܝܼܪܵܐ ܒܫܸܡܵܐ ܕܠܲܥܵܙܲܪܝܵܢ ܕܡܵܪܵܐ ܕܚܕܵܐ ܡܵܬܵܐ ܗ݇ܘܵܐ ܒܗܵܝܵܣܬܵܢ(ܐܲܪܡܝܼܢܝܼܵܐ). ܒܓܵܢܸܗ ܙܸܐ ܟܸܐ ܥܵܡܸܪ ܗ݇ܘܵܐ ܗܲܪ ܒܗܿܝ ܡܵܬܵܐ. ܐܝܼܬ ܗ݇ܘܵܐ ܠܸܗ ܐܲܚܟ̰ܝܼ ܚܕܵܐ ܒܪܵܬܵܐ ܒܫܸܡܵܐ ܕܙܵܢܵܙܵܢ ܕܪܵܒܵܐ ܫܲܦܝܼܪܬܵܐ ܘܗܵܘܢܵܢܬܵܐ ܗ݇ܘܵܐ. ܐܝܼܬ ܗ݇ܘܵܐ ܚܕܵܐ ܝܲܬܘܼܡܵܐ ܡܸܣܟܸܢܵܐ ܡܼܢ ܚܕܵܐ ܡܵܬܵܐ ܐ݇ܚܸܪ݇ܬܵܐ ܕܪܸܚܩܵܐ ܗ݇ܘܵܐ ܡܸܢܲܝܗܝ. ܗܿܘ ܟܸܐ ܡܵܣܸܩ ܗ݇ܘܵܐ ܠܗ݇ܘܿܢ ܥܸܖ̈ܒܸܐ ܕܡܵܬܵܐ ܥܲܠ ܛܘܼܪܵܐ ܩܵܐ ܡܲܪܥܵܝܬܵܐ. ܫܸܡܸܗ ܝܗ݇ܘܵܐ ܐܵܩܘܿܦ.ܟܠܲܝܗܝ ܒܢܲܝ ܡܵܬܵܐ ܟܸܐ ܡܲܚܸܒܝܼ ܗ݇ܘܵܘ ܠܸܗ. ܝܵܠܸ̈ܐ ܘܒܢܵܬܸ̈ܐ ܒܥܕܵܢܵܐ ܕܥܵܨܸܪܬܵܐ ܕܥܸܖ̈ܒܲܝܗܝ ܨܲܠܝܼ ܗ݇ܘܵܘ ܠܓܘܼܡܸ̈ܐ؛ ܒܕܲܠܘܲܝܗܝ(ܣܲܛܠܲܝܗܝ)ܟܸܐ ܐܵܣܩܝܼ ܗ݇ܘܵܘ ܠܓܘܼܡܵܐ ܥܲܡܲܝܗܝ ܩܵܐ ܕܒܵܪܝܼܠܗܘܿܢ ܘܲܥܢܸܐ ܩܵܐ ܚܠܵܒܼܬܵܐ. ܐܵܩܘܿ ܙܸܐ ܟܸܐ ܗܵܘܸܐ ܗ݇ܘܵܐ ܒܪܝܼܟܵܐ ܩܵܕ݇ܡ ܟܠܘܼܚܬܘܼܗܝ ܦܲܟܘܼܪܸܐ ܠܝܵܠܕ݇ܬܵܬܸܐ ܘܒܸܢܦܵܚܵܐ ܒܫܲܒܝܼܒܸܗ. ܟܠܲܝܗܝ ܐ݇ܢܵܫܸ̈ܐ ܒܐܘܼܖ̈ܚܵܬܸܐ ܦܖ̈ܝܼܫܸܐ ܦܖ̈ܝܼܫܸܐ ܟܸܐ ܡܵܛܝܼ ܗ݇ܘܵܘ ܥܲܠܘܼܗܝ ܘܟܸܐ ܗܲܝܸܪܝܼ ܗ݇ܘܵܘ ܠܸܗ ܘܙܵܢܵܙܵܢ ܒܘܼܫ ܙܵܘܕܵܐ ܡܼܢ ܟܠܲܝܗܝ ܟܸܐ ܡܲܣܸܡܵܐ ܗ݇ܘܵܐ ܒܵܠܵܐ ܥܲܠܸܗ. ܐܝܼܢܵܐ ܐܵܩܘܿܦ ܟܸܐ ܫܵܩܸܠ ܗ݇ܘܵܘ ܠܗ݇ܘܿܢ ܕܸܒܼܚܸ̈ܐ ܕܙܵܢܵܙܵܢ ܒܚܲܕ݇ ܦܲܪܨܘܿܦܵܐ ܡܵܪ ܐܝܼܩܵܪܵܐ ܘܚܫܝܼܚܵܐ ܠܸܬܢܵܝܬܵܐ.  ܒܪܵܬܵܐ ܕܪܵܒܘܿܢܵܐ(ܐܲܪܒܵܒ) ܢܝܼܚܵܐ ܢܝܼܚܵܐ ܡܲܫܟ̰ܘܼܚܸܐ ܗ݇ܘܵܐ ܠܗܝܼܩܘܼܬܵܐ ܥܲـܠ ܐܵܩܘܿܦ.ܐܝܼܢܵܐ ܗܿܝ ܠܸــܐ ܗ݇ܘܵܐ ܒܕܲܪܓܼܵܐ ܕܒܢܵܬ ܡܵܬܵܐ ܕܓܵܠܝܵــܐ ܗ݇ܘܵܐ    

ܠܗ݇ܘܿܢ ܐ݇ܖ̈ܵܙܘܼܗܿ ܩܵܐ ܝܲܠܕ݇ܬܵܬܸܐ ܐ݇ܚܸܖ̈݇ܢܸܐ ܐܲܝܟܼ ܕܝܼܠܸܗ ܥܝܵܕܵܐ ܒܡܵܬܘܵܬܸ̈ܐ. ܦܪܝܼܫܵܐܝܼܬ ܡܼܢ ܙܕܘܼܥܬܵܐ ܕܒܵܒܘܼܗܿ ܗܿܝ ܚܘܼܡܝܼܬܲܝܗܝ ܗ݇ܘܵܐ ܟܠܲܝܗܝ ܐܲܢܸܐ ܓܵܘ ܠܸܒܘܼܗܿ. ܐܝܼܢܵܐ ܐܲܝܟܼ ܕܟܸܐ ܐܵܡܖ̈ܝܼ: (ܓܸܕܝܵܐ ܠܸܐ ܦܵܐܸܫ ܬ݇ܚܘܿܬ ܩܸܪܛܵܠܵܐ)؛ ܚܲܒܪܵܐ ܕܚܘܼܒܵܐ ܦܪܸܣܠܸܗ ܓܵܘ ܡܵܬܵܐ ܒܘܼܬ ܣܘܼܘܵܚܵܐ ܕܪܸܓܵܐ ܥܲܡ ܡܲܠܸܟܬܵܐ. ܐܵܗܵܐ ܗ݇ܘܸܐ ܠܵܗܿ ܥܸܠܬܵܐ ܕܐܵܩܘܿܦ ܦܵܐܸܫ ܟܘܼܡܪܵܐ ܡܼܢ ܡܵܬܵܐ.                                               

   ܒܵܬ݇ܪ ܟܡܵܐ ܥܕܵܢܵܐ ܦܠܸܛܠܸܗ ܚܲܒܪܵܐ ܒܟܠܵܗܿ ܗܿܝ ܦܢܝܼܬܵܐ: ـ ܒܪܵܬܵܐ ܝܲܟܲܢܬܵܐ ܕܐܲܪܒܵܒ ܠܲܥܵܙܲܪܝܵܢ ܦܝܼܫܬܵܐ ܝܠܵܗܿ ܡܘܼܛܠܸܒܬܵܐ ܠܡܕܝܼܢ݇ܬܵܐ ܩܵܐ ܒܪܘܿܢܵܐ ܕܚܲܕ݇ ܬܲܓܵܪܵܐ ܡܫܲܡܗܵܐ.ܟܠ ܡܸܢܕܝܼ ܠܵܚܘܿܡܵܐ ܗ݇ܘܵܐ ܘܫܲܦܝܼܪܵܐ. ܪ݇ܚܵܫܬܵܐ ـ ܐ݇ܬܵܝܬܵܐ؛ ܐܲܪܚܘܼܝܵܬܸܐ؛ ܕܲܫܢܸ̈ܐ؛ ܫܘܼܟܵܢܸ̈ܐ؛ ܐ݇ܟܼܵܠܬܵܐ ـ ܫܬܵܝܬܵܐ ܘܫܲܪܟܵܐ ܕܐܲܪܚܘܼܝܵܬܸܐ ܕܛܵܠܝܼܒܘܼܬܵܐ؛ ܢܝܼܫܵܢܩܵܐ ܘܢܸܓܕܵܐ ܘܫܪ.ܒܟܠ ܚܕܵܐ ܙܲܪܝܼܦܘܼܬܵܐ ܦܝܵܫܵܐ ܗ݇ܘܵܐ ܡܘܼܟܡܸܠܸ̈ܐ. ܘܟܠܲܝܗܝ ܐ݇ܢܵܫܸ̈ܐ ܒܸܣܒܵܪܵܐ ܗ݇ܘܵܘ ܠܬܸܫܖ̈ܝܼܸܐ ܕܒܸܕ ܗܵܘܝܼ ܠܗ݇ܘܿܢ ܚܲܕ݇ ܚܠܘܼܠܵܐ ܒܲܣܝܼܡܵܐ. ܥܠܲܝ̈ܡܸܐ ܘܥܠܲܝܡܵܬܸ̈ܐ ܙܸܐ ܫܘܼܖ̈ܝܸܐ ܗ݇ܘܵܘ ܠܗܲܕܘܼܖܸ̈ܐ ܠܒܼܝܼܫܝܵܬܸ̈ܐ ܫܲܦܝܼܖܸ̈ܐ ܕܡܲܪܕܝܼܠܵܗܿ ܓܵܢܲܝܗܝ ܩܵܐ ܐܲܬܝܵܢܸ̈ܐ ܕܒܵܬ݇ܪ ܟܵܠܘܼ.                                                                                       

        ܡܛܸــܐ ܠــܗ݇ܘܿܢ ܟ̰ܸܪܝܵــܘܵܬܸܐ(ܬܸܫܖ̈ܝܼܸܐ) ܘܩܝܵܫــܝܵܬܸ̈ܐ ܕܗܵܘܵܐ ܘܦܵܘܚܸ̈ــܐ ܒܸܛܪܵܦܵܐ.ܚܲܕ݇ ܝܵܘܡܵܐ ܡܩܵܕ݇ܡ ܚܲܕ݇ܒܫܸܒܵܐ ܕܝܼܗ݇ܘܵܐ ܝܵܘܡܵܐ ܕܚܠܘܼܠܵܐ؛ ܟܵܠܘܼ ܙܵܢܵܙܵܢ ܦܠܵܛܵܐ ܗ݇ܘܵܐ ܡܼܢ ܒܸܝܬ ܚܝܵܦܵܐ. ܒܥܸܐ ܠܵܗܿ ܕܫܵܬܝܵܐ ܚܲܕ݇ܟ̰ܵܐ ܡܝܼܵܐ ܐܝܼܢܵܐ ܚܙܸܐ ܠܵܗܿ ܕܠܲܝܬ ܗ݇ܘܵܐ ܦܝܵܫܵܐ ܓܵܘ ܒܲܝܬܵܐ ܡܝܼܵܐ ܩܲܪܝܼܖܸ̈ܐ. ܗܲܪ ܒܐܵܢܝ݇ ܒܸܣܟܘܼܗܿ ܬܲܠܝܼܠܸ̈ܐ ܫܩܸܠܵܗܿ ܬܲܠܡܵܐ ܘܐ݇ܙܸܠܵܗܿ ܠܥܲܝܢܵܐ ܕܡܝܼܵܐ.ܒܢܵܬܸ̈ܐ ܕܡܵܬܵܐ ܚܘܼܪܕܝܼܵܐ ܠܗ݇ܘܿܢ؛ ܫܘܼܪܸܐ ܠܗ݇ܘܿܢ ܒܲܩܘܼܖܸ̈ܐ ܒܘܼܩܵܖܸ̈ܐ؛ ܒܸܚܩܵܪܘܼܗܿ؛ ܛܲܠܘܼܙܘܼܗܿ. ܚܲܕ݇ܟܡܵܐ ܡܸܢܲܝܗܝ ܒܸܫܩܵܠܵܐ ܠܐܝܼܕܘܼܗܿ ܘܒܸܫܝܵܦܵܐ ܠܪܸܫܲܝܗܝ.ܡܸܢܲܝܗܝ ܒܸܣܢܵܕܘܼܗܿ ܒܸܙܡܵܖ̈ܝܵܬܸܐ ܘܡܸܢܲܝܗܝ ܙܸܐ ܗܲܪ ܒܲܩܘܼܪܸܐ ܒܘܼܬ ܛܠܝܼܒܘܼܗܿ ܘܒܘܼܬ ܪܵܐܙܸܐ ܓܢܝܼ̈ܙܸܐ ܕܐܝܼܬ ܒܸܝܠ ܛܠܝܼܒܵܐ ܘܛܠܝܼܒܬܵܐ..                                                       

   ܒܕܲܢܸܐ ܥܲܪܩܲܠܝܵܬܸܐ ܕܠܒܲܕܲܪ ܡܼܢ ܒܲܝܬܵܐ؛ ܟܲܕ ܬܵܙܵܐ ܦܠܝܼܛܬܵܐ ܡܼܢ ܒܸܝܬ ܚܝܵܦܵܐ ܒܪܸܫܵܐ ܬܲܠܝܼܠܵܐ ܘܩܲܪܵܬܸܐ ܕܬܸܫܖ̈ܝܼܸܐ؛ ܩܲܪܬܵܐ ܩܪܸܡܠܵܗܿ ܠܖ̈ܲܦ̰ܫܵܢܸܐ ܕܟܵܠܘܼ. ܗܲܪ ܒܗܿܘ ܠܲܝܠܸܐ ܙܵܢܵܙܵܢ ܢܦܸܠܵܗܿ ܒܫܵܬܵܐ (ܚܲܡܚܲܡܬܵܐ)ܘܫܘܼܪܸܐ ܠܵܗܿ ܒܸܙܝܵܕܵܐ ܚܲܡܚܲܡܬܘܼܗܿ ܘܠܵܐ ܒܸܫܡܵܛܵܐ.ܚܲܕ݇ ܬܪܸܝܢ ܗ݇ܘܸܐ ܠܗ݇ܘܿܢ ܐܲܪܒܥܵܐ ܝܵܘܡܵܢܸ̈ܐ. ܠܵܐ ܡܘܼܒܝܸܢܸܗ ܢܝܼܫܵܢܩܵܐ ܡܼܢ ܨܲܠܝܼܠܘܼܬܵܐ(ܒܣܵܡܬܵܐ). ܐܝܼܡܲܢ ܕܚܸܬܢܵܐ ܒܝܲܠܙܘܼܝ ܡܛܸܐ ܠܸܗ ܒܦܵܝܛܘܼܢ(درشکه) ܠܡܵܬܵܐ؛ ܟܲܕ ܥܲܡܸܗ ܐܝܼܬ ܗ݇ܘܵܘ ܬܪܸܝܢ ܐܵܣܝܼܸ̈ܐ(ܗܲܟܝܼܡܸ̈ܐ) ܐܝܼܢܵܐ ܦܝܼܫܠܵܗܿ ܡܘܼܕܥܝܼܬܵܐ ܕܖ̈ܵܐܵܬܸܐ(ریه ها) ܕܒܪܵܬܵܐ ܠܒܼܝܼܟܼܸܐ ܝܢܵܐ ܘܒܣܵܡܬܲܝܗܝ ܠܸܐ ܝܠܵܗܿ ܡܸܬܗܵܘܝܵܢܬܵܐ. ܡܸܣܟܸܢܬܵܐ ܒܪܵܬܵܐ ܟܵܠܘܼ؛ ܫܘܼܪܸܐ ܠܵܗܿ ܝܵܘܡܵܐ ܠܚܲܒܼܪܸܗ ܒܸܢܘܵܠܵܐ. ܗܲܪ ܐܲܝܟܼ ܕܗܿܝ ܫܪܵܓܼܵܐ ܕܒܲܙܪܘܼܗܿ ܫܲܪܸܐ ܒܸܚܬܵܡܵܐ؛ ܢܝܼܚܵܐ ܢܝܼܚܵܐ ܫܘܼܪܸܐ ܠܵܗܿ ܒܸܫܠܵܝܵܐ؛  ܟ̰ܡܸܗ ܠܵܗܿ ܓܵܘ ܕܖ̈ܵܥܢܵܢܸܐ ܕܡܸܣܟܸܢܵܐ ܚܸܬܢܵܐ.             

 ܟܠܵـܗܿ ܡܵܬܵܐ ܠܒܼܸܫܠܵـܗܿ ܐ݇ܟܘܼܡܵــܐ. ܡܘܼܠܒܼܸܫܵــܐ ܠـܗ݇ܘܿܢ ܙܵܢܵܙܵܢ ܓ̰ܘܼܠܸ̈ܐ ܚܘܵܖܸ̈ܐ ܕܟܵܠܘܼܬܘܼܗܿ. ܬܵܓܼܵܐ ܥܲܠ ܩܸܨܘܼܗܿ؛ ܡܘܼܪܝܸܟܼܵܐ ܠܗ݇ܘܿܢ ܓܵܘ ܚܲܕ݇ ܨܲܢܕܘܼܩܵܐ ܡܼܢ ܩܲܝܣܵܐ ܕܓܵܘܙܵܐ؛ ܥܲܠ ܖ̈ܲܦ̰ܫܵܢܸܐ ܕܓ̰ܘܲܢܩܸ̈ܐ ܒܒܸܟܼܝܵܐ ܘܘܲܠܘܲܠܝܵܬܸ̈ܐ. ܠܘܼܒܸܠܗ݇ܘܿܢ ܨܲܢܕܘܼܩܵܐ ܠܥܘܼܡܪܵܐ؛ ܕܠܩܘܼܕܡܝܼܘܼܗܿ ܕܝܼܗ݇ܘܵܐ ܚܲܕ݇ܒܫܸܒܵܐ ܥܵܒܼܕܝܼܠܵܗܿ ܬܸܫܡܸܫܬܘܼܗܿ. ܦܝܼܫܠܵܗܿ ܛܠܝܼܒܬܵܐ ܡܼܢ ܚܲܕ݇ ܡܼܢ ܫܲܡܵܫܸ̈ܐ ܕܥܵܒܼܸܕ ܠܵܗܿ ܣܵܥܘܿܪܘܼܬܵܐ(نگهبانی) ܕܐܲܪ݇ܣܵܐ(جنازه)؛ ܠܵܐ ܗܵܘܝܵܐ ܕܩܲܘܸܡܝܼ ܕܩܵܖ̈ܝܵܬܸܐ ܣܸܖ̈ܝܸܐ ܥܲܠ ܐܲܪ݇ܣܵܐ؛ ܐܲܝܟܼ ܕܪܵܒܵܐ ܓܵܗܸ̈ܐ ܟܸܐ ܦܵܝܫܵܐ ܗ݇ܘܵܐ ܚܙܝܼܬܵܐ. ܐܝܼܢܵܐ ܐܵܩܘܿ ܛܪܝܼܕܵܐ ܫܡܸܛܠܸܗ ܠܦܘܼܩܕܵܢܵܐ ܕܐܲܪܒܵܒ ܠܲܥܵܙܲܪܝܵܢ. ܨܸܠܝܵܐ ܗ݇ܘܵܐ ܠܡܵܬܵܐ ܘܝܬܝܼܒܼܵܐ ܒܒܲܝܬܵܐ ܚܘܼܪܒܵܐ(ܚܲܪܵܒܵܐ) ܘܚܸܫܟܵܢܵܐ ܕܓܵܢܸܗ؛ ܒܸܟܼܝܵܐ ܘܒܸܠܝܵܝܵܐ ܒܡܲܪܝܼܪܘܼܬܵܐ ܥܲܠ ܚܘܼܒܵܐ ܕܠܸܒܸܗ ܝܩܝܼܕܵܐ.          

   ܪܲܡܫܵܐ ܗ݇ܘܵܐ؛ ܫܸܡܫܝܼ ܣܲܗܪܵܐ ܕܬܸܫܖ̈ܝܼܸܐ. ܐܝܼܕܲܩܠܸ̈ܐ ܓܖ̈ܝܼܫܸܐ؛ ܫܸܬܩܵܐ ܗܲܟܘܼܡܸܐ ܥܲܠ ܡܵܬܵܐ. ܐܵܩܘܿ ܩܝܼܡܠܸܗ ܐ݇ܙܸܠܸܗ ܩܵܕ݇ܡ ܬܲܪܥܵܐ ܕܥܘܼܡܪܵܐ ܕܝܼܗ݇ܘܵܐ ܚܲܕ݇ܟ̰ܵܐ ܪܸܚܩܵܐ ܡܼܢ ܡܵܬܵܐ. ܒܨܲܦܠܲܦܬܵܐ ܘܢܵܘܢܵܝܬܵܐ ܦܘܼܪܦܸܠܸܗ ܒܫܲܡܵܫܵܐ ܕܣܵܦܸܐ ܠܵܗܿ ܢܵܛܘܼܪܘܼܬܵܐ ܩܵܬܸܗ. ܝܩܸܕܠܸܗ ܠܸܒܘܼܗܝ ܫܲܡܵܫܵܐ؛ ܩܝܼܡܠܸܗ ܦܠܸܛܠܸܗ ܘܫܒܼܸܩܠܸܗ ܩܕܝܼܠܵܐ ܩܵܬܸܗ.                                                                       

   ܐܵܩܘܿ؛ ܕܪܸܐ ܠܸܗ ܕܲܒܼܪܵܐ ܒܬܲܪܥܵܐ ܕܥܘܼܡܪܵܐ؛ ܫܩܸܠܸܗ ܡܘܼܣܢܸܕܠܸܗ ܨܲܢܕܘܼܩܵܐ ܕܙܵܢܵܙܵܢ ܥܲܠ ܓܘܼܕܵܐ ܠܕܸܦܢܵܐ ܕܩܵܡܝܼܢܵܐ(ܒܘܼܚܵܪܝܼ).ܓܘܼܠܸܐ ܠܸܗ ܠܦܲܐܬܵܐ ܕܨܲܢܕܘܼܩܵܐ ܘܫܓܼ݇ܝܼܪܵܐ ܠܸܗ ܩܵܡܝܼܢܵܐ ܒܩܲܝܣܸ̈ܐ ܕܬܘܼܬܵܐ. ܫܚܸܢܸـܗ  ܥܘܼܡܪܵܐ.ܗܵܝܓܵܗ ܒܪܸܟܠܸـܗ ܩܵܕ݇ܡ ܨܲܢܕܘܼܩܵܐ ܩܵܕ݇ܡ ܒܲــܗܪܵܐ ܕܦܘܼܢܕܸ̈ܐ      

ܒܸܠܗܵܝܵܐ ܠܝܲܡܝܼܢܵܐ ܘܠܣܸܡܵܠܵܐ ܕܪܸܫܵܐ ܕܨܲܢܕܘܼܩܵܐ. ܫܘܼܪܸܐ ܠܸܗ ܒܗܲܣܪܲܬܸܐ ܦܲܟܘܼܪܸܐ ܠܗܿܘ ܝܲܠܡܵܐ ܟ̰ܡܝܼܗܵܐ ܡܼܢ ܚܲܝܸ̈ܐ.ܘܒܟܡܵܝܘܼܬܵܐ ܕܝܘܼܠܦܵܢܸܗ؛ ܫܘܼܪܸܐ ܠܸܗ ܒܘܲܠܘܲܠܬܵܐ ܘܦܲܪܦܲܠܬܵܐ ܒܡܵܪܝܵܐ ܕܟ̰ܵܝܸܕ ܠܵܗܿ ܠܡܲܠܟܘܼܬܘܼܗܝ ܘܫܲܬܐܸܦܠܵܗܿ ܒܣܸܕܪܵܐ ܕܙܡܝܼܢܘܼܗ̈ܝ(ܐܲܖ̈ܚܘܼܗܝ).ܐܘܼܚܟ̰ܵܐ ܦܘܼܪܦܸܠܸܗ ܒܸܩܝܘܼܕܵܐ ܕܠܸܒܵܐ ܘܨܲܦܠܲܦܬܵܐ ܗܲܠ ܕܥܒܼܸܪܸܗ ܠܕܘܼܢܝܸܐ ܕܖ̈ܘܼܚܵܬܸܐ. ܐܵܩܘܿ ܒܚܸܙܘܵܐ ܗ݇ܘܵܐ: ܐܝܼܢܵܐ ܟܲܕ ܕܒܼܝܼܩܵܐ ܡܼܢ ܐܝܼܕܵܐ ܕܙܵܢܵܙܵܢ ܒܸܥܒܼܵܪܵܐ ܡܼܢ ܬܲܪܥܵܐ ܕܥܘܼܡܪܵܐ ܕܦܵܝܫܝܼ ܡܒܘܼܪܟܼܸܐ ܒܝܲܕ ܟܵܗܢܵܐ. ܗܲܪ ܒܐܵܗ ܬܲܚܡܲܢܬܵܐ ܗ݇ܘܵܐ ܫܡܸܥܠܸܗ ܐܝܼܢܵܐ ܩܵܠܵܐ ܚܸܠܝܵܐ ܕܙܵܢܵܙܵܢ ܗܵܐ ܙܲܢܓܘܼܪܸܐ ܒܢܵܬܝܵܬܘܼܗܝ. ܐܵܗܵܐ ܩܵܠܵܐ ܥܒܼܸܕܠܸܗ ܬܢܵܝܬܵܐ ܟܡܵܐ ܓܵܗܸ̈ܐ. ܐܝܼܢܵܐ ܐܵܩܘܿ ܓܵܘ ܕܘܼܢܝܸܐ ܕܚܘܼܠܵܣܵܐ (خلسه)ܒܸܬܢܵܝܵܐ ܥܲܠ ܠܝܼܬܵܢܝܼܘܼܗܝ(ذکر تسبیح). ܩܵܠܵܐ ܕܩܪܵܝܬܵܐ ܕܫܸܡܵܐ ܚܬܸܡܠܸܗ. ܚܲܕ݇ ܩܵܠܵܐ ܐ݇ܚܸܪ݇ܢܵܐ ܐ݇ܡܸܪܸܗ: ـ ܕܒܼܘܼܩܠܵܗܿ ܐܝܼܕܝܼ. ܐܵܩܘܿ ܦܬܝܼܚܲܝܠܸܗ ܥܲܝܢܘܼܗ̈ܝ ܫܸܢܬܵܢܸ̈ܐ(ܟܲܕ ܩܘܼܪܒܵܐ ܠܩܪܵܝܬܵܐ ܕܩܵܪܘܼܘܵܐ ܗ݇ܘܵܐ) ܘܚܸܪܸܗ ܠܦܲܐܬܵܐ ܕܐܲܪ݇ܣܵܐ...ܐ݇ܡܸܪܸܗ ܬ݇ܚܘܿܬ ܣܸܦܘܵܬܘܼܗܝ: ـ ܠܵܐ؛ ܠܵܐ ܗܵܠܵܐ ܙܸܐ ܓܵܘ ܫܸܢܬܵܐ ܝܘܸܢ؛ ܓܵܘ ܚܸܠܡܵܐ ܝܘܸܢ ܐܵܢܵܐ. ܡܸܢ݇ܕܪܸܫ݇ ܕܒܼܝܼܪܲܝܗܝ ܠܸܗ ܥܲܝܢܘܼܗܝ ܘܗ݇ܘܸܐ ܠܸܗ ܢܵܘܢܘܼܝܸܐ ܒܡܵܪܝܵܐ ܘܒܸܐܡܵܪܵܐ: ـ ܦܬܘܼܚܠܗ݇ܘܿܢ  ܬܲܖ̈ܥܵܢܸܐ ܕܦܲܪܕܲܝܣܘܼܟܼ ܝܵܐ ܡܵܪܝܼ؛ ܡܪܝܼܥܬܵܐ ܕܡܲܚܲܒܬܵܐ ܝܠܵܗܿ ܘܲܥܢܝܼ.ܩܵܠܵܐ ܢܸܙܘܵܢܵܐ ܐܲܝܟܼ ܚܡܵܛܵܐ ܗ݇ܘܸܐ ܠܸܗ ܒܸܟ̰ܪܵܙܵܐ ܒܢܵܬܝܵܬܘܼܗܝ: ـ ܪܥܘܿܫ ܐܵܩܘܿ ܪܥܘܿܫ!                                                       ܐܵܩܘܿ ܚܓ̰ܸܠܸܗ ܡܼܢ ܓܵــܘ ܕܘܼܢܝܸــܐ ܕܚܘܼܠܵܣܵܐ ܘܐ݇ܡܸܪܸܗ: ـ ܠܵܐ؛ ܠܸܐ ܝܠܸܗ ܐܵܗܵܐ ܚܲܕ݇ ܚܸܠܡܵܐ.ܒܲܣ ܡܘܼܕܝܼܠܸܗ؟ ܚܸܠܡܵܐ ܝܠܸܗ؟ ܚܸܙܘܵܐ ܝܠܸܗ؟ ܒܲܣ ܩܵܡܘܼ ܠܸܐ ܝܘܸܢ ܒܸܪܥܵܫܵܐ؟ ܠܵܐ؛ ܪܥܝܼܫܵܐ ܝܘܸܢ ܐܵܢܵܐ. ܙܵܢܵܙܵܢ ܙܸܐ ܠܸܐ ܝܠܵܗܿ ܡܝܼܬܬܵܐ. ܐܵܢܵܐ ܒܚܘܼܠܡܵܐ ܝܘܸܢ. ܐܝܼܢܵܐ ܡܸܢ݇ܕܪܸܫ݇ ܐܵܢܝܼ ܩܵܠܸ̈ܐ ܗܲܪ ܒܸܩܪܵܝܘܼܗܝ ܗ݇ܘܵܘ. ܗܵܝܓܵܗ ܐ݇ܡܸܪܸܗ: ـ ܠܵܐ؛ ܪܥܝܼܫܵܐ ܝܘܸܢ. ܠܵܐ؛ ܐܸܢ ܗܵܘܸܢ ܪܥܝܼܫܵܐ ܘܠܵܐ ܗܵܘܸܢ ܒܚܸܠܡܵܐ ܪܵܒܵܐ ܒܙܵܕܥܸܢ...ܐܸܢ ܚܸܠܡܵܐ ܠܸܐ ܝܠܸܗ ܫܒܼܘܿܩ ܩܵܝܡܸܢ.ܐܵܢܵܐ ܓ̰ܘܵܢܩܵܐ ܝܘܸܢ ܘܥܠܲܝܡܵܐ؛ ܩܵܡܘܼ ܙܵܕܥܸܢ؟ ܒܸܕ ܩܵܝܡܸܢ ܠܐܲܩܠܝܼ...ܗܸܐ. ܟܸܐ ܗܵܘܝܵܐ ܩܲܕ ܡܝܼܬܵܐ ܚܵܝܸܐ؟ ܐܵܩܘܿ ܬܒܼܝܼܢܵܐ ܒܦܲܓܼܪܸܗ؛ ܐܝܼܢܵܐ ܥܲܝܢܘܼܗܝ ܒܸܚܙܵܝܵܐ ܘܢܵܬܝܵܬܘܼܗܝ ܒܸܫܡܵܥܵܐ؛ ܐܝܼܢܵܐ ܡܘܼܚܸܗ ܟܸܠܝܵܐ...ܚܙܸܐ ܠܸܗ ܕܙܵܢܵܙܵܢ ܒܟܘܼܪܵܚܘܼܗܿ ܓ̰ܲܘܘܼܕܸܐ ܝܠܵܗܿ ܕܦܵܠܛܵܐ ܡܼܢ ܓܵܘ ܨܲܢܕܘܼܩܵܐ ܕܡܝܼܬܸ̈ܐ. ܫܘܼܪܸܐ ܠܸܗ ܒܕܵܝܵܐ(هذیان گفتن): ـ  ـܐܲܠܵܗـܝܼ؛ ܐܵܗܵܐ ܚܸܠܡܵܐ ܝܠܸܗ ܕܝܼܘܸܢ ܒܸܚܠܵܡܘܼܗܝ؟ ܡܢܵܓܸܣܬܲܢ ܚܲܕ݇ ܟ̰ܵܦܘܼܠܵܐ ܡܵܪ ܒܵܒܵܐ ܝܸܡܵܐ ܫܘܼܪܩܸܐ ܠܸܗ ܥܲܠ ܦܲܐܬܘܼܗܝ ܕܣܸܡܵܠܵܐ (ܡܝܼܬܵܐ ܡܢܲܚܘܼܡܸܐ ܝܠܸܗ ܠܚܲܝܵܐ). ܐܵܩܘܿ ܪܥܸܫܠܸܗ. ܗܿܘ ܒܚܲܕ݇ ܩܵܠܵܐ ܚܲܝܠܵܢܵܐ ܡܼܢ ܚܲܕ݇ ܒܵܠܘܿܥܵܐ ܟܬܝܼܪܵܐ ܐ݇ܡܸܪܸܗ: ـ ܘܵܐܝ! ܒܲܣ ܠܸܐ ܝܠܸܗ ܚܸܠܡܵܐ؟                                    ܠܵܐ ܠܸܐ ܝܠܸܗ ܚܸܠܡܵܐ ܐܵܩܘܿ! ܐܵܢܵܐ ܝܘܵܢ ܙܵܢܵܙܵܢ. ܬܵܐ ܫܩܘܿܠܝܼ. ܪܵܒܵܐ ܫܘܼܪܫܝܼܬܵܐ ܝܘܵܢ.ܚܲܕ݇ܟ̰ܵܐ ܙܸܐ ܚܲܒܘܼܠܸܐ ܝܘܵܢ.                     

 ܡܼܢ ܒܵܬ݇ܪ ܚܲܕ݇ܟܡܵܐ ܥܸܢܝܵܢܸ̈ܐ ܥܲܡ ܚܕܵܕܸ̈ܐ؛ ܦܼܲܪܡܵܝܬܵܐ ܘܡܲܦܪܲܡܬܵܐ    ܕܐܘܼܕܵܠܸܐ؛ ܫܡܸܥܠܗ݇ܘܿܢ ܠܩܵܠܵܐ ܕܩܵܪܘܼܘܵܐ ܕܝܼܗ݇ܘܵܐ ܒܸܩܪܵܝܵܐ. ܕܒܼܝܼܩܵܐ ܠܸܗ

   ܐܵܩܘܿ ܐܝܼܕܵܐ ܕܟܵܠܘܼ؛ ܘܡܼܢ ܒܸܝܬ݇ܦܲܠܓܵܐ ܕܢܫܵܖ̈ܝܵܬܸܐ ܘܢܒܼܵܚܝܵܬܸ̈ܐ ܕܟܲܠܒܸ̈ܐ ܕܡܵܬܵܐ ܡܘܼܡܛܝܼܵܐ ܠܗ݇ܘܿܢ ܓܵܢܲܝܗܝ ܩܵܕ݇ܡ ܬܲܪܥܵܐ ܕܪܵܒܘܿܢܵܐ (ܐܲܪܒܵܒ) ܠܲܥܵܙܲܪܝܵܢ. ܡܚܸܐ ܠܗ݇ܘܿܢ ܢܵܩܘܿܫܵܐ ܥܲܠ ܬܲܪܥܵܐ. ܡܛܸܐ ܠܵܗܿ ܝܸܡܵܐ ܠܬܲܪܥܵܐ: ـ ܡܵܢܝܼ ܝܠܸܗ؟                                 

ـ ܐܵܢܵܐ ܝܘܸܢ ܪܸܓܵܘܟܼܘܿܢ ܐܵܩܘܿܒ.                                                                                 

   ܐܲܪܒܵܒ ܠܲܥܵܙܲܪܝܵܢ ܒܫܡܵܥܬܵܐ ܕܩܵܠܵܐ ܕܐܵܩܘܿ ܐ݇ܡܸܪܸܗ: ـ ܒܲܟܼܬܵܐ ܦܬܘܿܚ ܕܐܵܬܸܐ. ܐܘܼܦ ܗܿܘ ܗܲܪ ܐܲܝܟܼ ܕܝܼܲܢ ܙܠܝܼܥܵܐ ܝܠܸܗ ܠܸܒܘܼܗܝ. ܠܵܐ ܚܕܵܐ ܓܵܗܵܐ؛ ܐܸܠܵܐ ܬܪܸܝܢ ܓܵܗܸ̈ܐ. ܐܝܼܢܵܐ ܐܵܩܘܿܦ ܠܸܐ ܗ݇ܘܵܐ ܠܚܘܼܕܸܗ(ܒܢܲܦ̰ܫܸܗ). ܙܵܢܵܙܵܢ ܙܸܐ ܥܲܡܸܗ ܗ݇ܘܵܐ. ܕܒܼܝܼܩܵܐ ܡܼܢ ܬ݇ܚܘܼܬ ܫܚܵܬܵܘܼܗܿ(ܚܵܟ̰ܵܘܗܿ) ܡܘܼܬܒܼܵܐ ܠܸܗ ܐܝܼܕܘܼܗܿ ܓܵܘ ܐܝܼܕܵܐ ܕܝܸܡܘܼܗܿ ܘܣܘܼܦܝܵܐ ܠܸܗ ܒܐܵܒܼܵܗܘܼܗܿ.                                                        

   ܒܒܲܝܬܵܐ ܕܠܲܥܵܙܲܪܝܵܢ ܟܠܵܗܿ ܗܿܝ ܫܝܼܘܵܢ(ܬܵܙܝܼ) ܚܕܸܪܵܗܿ ܠܚܲܕܘܼܬܵܐ. ܟܠܲܝܗܝ ܒܢܲܝ ܡܵܬܵܐ ܥܒܼܸܕܠܗ݇ܘܿܢ ܫܲܗܲܪܬܵܐ(ܝܬܵܒܼܬܵܐ ܟܠܸܗ ܠܲܝܠܸܐ) ܗܲܠ ܕܙܪܸܩܠܸܗ ܝܵܘܡܵܐ ܕܚܲܕ݇ܒܼܫܸܒܵܐ. ܦܘܼܩܸܕܠܸܗ ܐܲܪܒܵܒ ܠܲܥܵܙܲܪܝܵܢ ܕܨܵܠܸܐ ܟܵܗܢܵܐ ܠܥܘܼܡܪܵܐ ܘܫܲܚܠܸܦܠܵܗܿ ܬܸܫܡܸܫܬܵܐ ܠܒܘܼܪܵܟܼܵܐ. ܐܵܩܘܿܦ ܗ݇ܘܸܐ ܠܸܗ ܚܸܬܢܵܐ

ܟܵܠܘܼ ܙܵܢܵܙܵܢ.ܪܵܥܝܵܐ ܕܘܲܥܢܸ̈ܐ ܦܝܼܫܠܸܗ ܐܲܪܒܵܒ ܕܡܵܬܵܐ.

   ܩܝܼܡܠܝܼ ܠܐܲܩܠܝܼ. ܢܫܝܼܩܵܠܝܼ ܐܝܼܕܵܐ ܕܪܵܒܝܝܼ: ܪܵܒܝܼ ܐܵܪܣܸܝܢ ܘܐ݇ܡܸܪܝܼ ܐܸܠܸܗ: ـ ܪܵܒܝܼ؛ ܟܸܐ ܐܵܡܪܝܼ ܕܬܲܫܥܝܼܬܵܐ ܟܸܐ ܥܵܒܼܕܵܐ ܬܢܵܝܬܵܐ. ܗܵܐ ܕܘܼܝܘܸܢ ܒܸܚܙܵܝܘܼܗܿ.  ܡܵܢܘܿܫܵܐ ܛܠܝܼܒܵܐ ܠܗ݇ܘܿܢ ܝܲܢ ܒܘܼܫ ܫܲܦܝܼܪܬܵܐ ܬܲܢܲܚ؛ ܝܗܝܼܒܼܵܐ ܠܗ݇ܘܿܢ ܩܵܐ ܣܲܪܟܝܼܣ ܡܲܪܥܝܵܢܵܐ ܕܒܸܩܪܵܐ ܕܡܵܬܲܢ. ܗܸܐ. ܗܿܘ ܚܲܕ݇ ܥܠܲܝܡܵܐ ܗ݇ܘܵܐ ܚܲܝܠܵܢܵܐ ܘܦܲܠܵܚܵܐ ܘܡܨܸܐ ܠܸܗ ܕܢܵܛܸܪܗ݇ܘܿܢ ܘܒܲܓ̰ܸܪܗ݇ܘܿܢ ܐܲܖ̈ܥܵܬܸܐ ܘܚܲܩܠܵܢܸ̈ܐ ܕܪܵܒܝܼ ܐܵܪܣܸܝܢ؛ ܟܲܕ ܒܢܘܿܢܸ̈ܐ ܕܐܵܪܣܸܝܢ ܠܸܐ ܗ݇ܘܵܘ ܡܲܨܝܸܬܵܢܸ̈ܐ ܥܲܠܸܗ. ܫܠܡ