ܥܒ݂ܘܕܘܬܐ ܐܘܡܬܢܝܬܐ

ܕܟܬܪ ܡܕܠܝܢ ܕܝܒ݂ܣ ܡܘܪܕܚܢ

ܪܵܒܵܐ ܓܵܗܹ̈ܐ ܬܦܝܼܩܬܵܐ ܝܘܵܢ ܘܚܙܝܼܬܵܐ ܝܘܵܢ ܠܐܲܒ݂ܵܗܹ̈ܐ ܪܵܒܵܐ ܥܵܒ݂ܘܿܕܹ̈ܐ ܘܚܲܦܝܼܛܹ̈ܐ ܒܦܘܼܠܚܵܢܵܐ ܐܘܼܡܬܵܢܵܝܵܐ. ܐܵܢܝܼ ܟܹܐ ܒܲܨܡܸܢܝܼ ܠܟܬܵܒ݂ܹ̈ܐ ܒܘܼܬ ܐܵܬܘܿܖ̈ܵܝܹܐ ܝܲܢ ܟܹܐ ܡܲܪܝܸܙܝܼ ܠܣܸܕܖܸ̈ܐ (ܟܠܵܣܹ̈ܐ) ܠܡܲܠܲܦܬܵܐ ܕܠܸܫܵܢܲܢ. ܐܵܢܝܼ ܐܵܦ ܟܹܐ ܡܲܪܝܸܙܝܼ ܠܬܦܵܩܝܵܬܹ̈ܐ ܘܡܸܫܬܘܼܝܵܬܹ̈ܐ ܩܵܐ ܕܥܠܲܝܡܹ̈ܐ ܐܵܬܘܼܖ̈ܵܝܹܐ ܡܵܨܝܼ ܬܵܦܩܝܼ ܒܐܸܚܕܵܕܸܐ ܩܵܐ ܕܢܵܦܠܝܼ ܒܚܘܼܒܵܐ ܘܓܵܒ݂ܪܝܼ ܡ̣ܢ ܒܢܲܝ̈ ܐܘܼܡܬܲܢ.

ܐܝܼܢܵܐ ܠܹܐ ܚܵܙܝܵܢ ܠܝܵܠܹ̈ܐ ܕܐܲܢܹܐ ܓܵܢܵܬܹ̈ܐ ܓܵܘ ܟ̰ܘܼ ܚܕܵܐ ܡ̣ܢ ܥܵܒ݂ܘܿܕܘܵܬܹ̈ܐ ܕܐܲܒ݂ܵܗܵܝ ܡܲܪܝܘܼܙܹܐ ܝܢܵܐ: ܘܡ̣ܢ ܒܵܬܲܪ ܟܹܐ ܫܵܡܥܵܢ ܕܝܵܠܵܝ̈ ܠܹܐ ܝܵܕܥܝܼ ܕܡܨܲܘܸܬܝܼ ܒܠܸܫܵܢܲܢ ܘܓܒ݂ܝܼܖܸ̈ܐ ܝܢܵܐ ܠܢܘܼܟ݂ܖ̈ܵܝܹܐ! ܘܟܹܐ ܦܵܝܫܵܢ ܒܥܘܼܓ̰ܵܒܵܐ ܕܡܘܼܕܝܼ ܝܠܹܗ ܢܝܼܫܵܐ ܕܗܲܕܟ݂ܵܐ ܓܵܢܵܬܹ̈ܐ ܕܲܓܵܠܹ̈ܐ ܘܡܵܪܹܐ ܬܲܪܬܹܝܢ ܦܵܬܘܵܬܹ̈ܐ ܡ̣ܢ ܥܵܒ݂ܘܿܕܘܼܬܵܝ ܐܘܼܡܬܵܢܵܝܬܵܐ. ܒܵܥܝܼ ܡܲܚܙܝܼ ܠܓܵܢܵܝ؟ ܒܵܥܝܼ ܡܲܚܫܸܒ݂ܝܼ ܕܪܵܒܵܐ ܐܘܼܡܬܵܢܵܝܹ̈ܐ ܝܢܵܐ؟ ܒܵܥܝܼ ܕܐ݇ܚܹܖ̈݇ܢܹܐ ܗܵܘܝܼ ܐܘܼܡܬܵܢܵܝܹ̈ܐ ܫܲܪܝܼܖܸ̈ܐ ܟܲܕ ܐܵܢܝܼ ܒܓܵܢܵܝ ܡܲܚܸܒܵܢܹ̈ܐ ܕܢܘܼܟ݂ܖ̈ܵܝܸܐ ܝܢܵܐ؟ ܡܲܒܝܘܼܢܹܐ ܐܵܢܝܼ ܚܫܵܒ݂ܵܐ ܝܢܵܐ ܕܐ݇ܢܵܫܹ̈ܐ ܣܲܟ݂ܠܹ̈ܐ ܝܢܵܐ ܘܠܹܐ ܝܢܵܐ ܦܲܪܡܘܼܝܹܐ ܘܠܹܐ ܝܢܵܐ ܚܙܵܝܵܐ ܠܕܘܼܓܠܵܝ̈؟

ܦܫܝܼܛܬܵܐ ܝܠܵܗ̇ ܠܟܠ ܐ݇ܢܵܫܵܐ ܕܡ̣ܢ ܐܲܒ݂ܵܗܹ̈ܐ ܫܲܪܝܼܖܸ̈ܐ ܘܐܘܼܡܬܵܢܵܝܹ̈ܐ ܟܹܐ ܩܵܝܡܝܼ ܙܲܖ̈ܥܹܐ ܫܲܪܝܼܖܸ̈ܐ ܘܐܘܼܡܬܵܢܵܝܹ̈ܐ. ܥܵܒ݂ܘܿܕܘܼܬܵܐ ܐܘܼܡܬܵܢܵܝܬܵܐ ܫܲܪܝܼܪܬܵܐ ܟܹܐ ܫܲܪܝܵܐ ܡ̣ܢ ܓܵܘ ܒܲܝܬܵܐ. ܐܸܢ ܚܲܕ ܦܲܪܨܘܿܦܵܐ ܠܲܝܬ ܠܹܗ ܡܨܵܝܬܵܐ ܘܒܲܫܲܪܬܵܐ ܕܡܲܠܸܦ ܘܡܗܲܕܹܐ ܠܝܵܠܹ̈ܐ ܕܓܵܢܘܼܗܝ ܕܗܵܐ ܡ̣ܢ ܙܥܘܼܪܘܼܬܵܝ ܥܲܡܘܼܗܝ ܝܢܵܐ؛ ܕܐܲܟ݂ܝܼ ܡܵܨܹܐ ܡܗܲܕܹܐ ܠܥܠܲܝܡܹ̈ܐ ܘܠܙܲܖ̈ܥܹܐ ܕܐ݇ܚܹܖܸ̈ܢܹܐ؟

ܒܲܣ ܠܹܐ ܝܠܵܗ̇ ܡܲܥܓ̰ܸܒܵܢܬܵܐ ܐܹܢ ܥܠܲܝܡܹ̈ܐ ܫܲܪܝܼܖܸ̈ܐ ܘܐܘܼܡܬܵܢܵܝܹ̈ܐ ܡܲܣܚܘܼܪܹܐ ܝܢܵܐ ܒܫܵܘܬܵܦܘܵܬܲܢ ܘܒܡܲܖ̈ܚܸܛܵܢܵܝ ܘܥܪܵܩܵܐ ܝܢܵܐ ܡ̣ܢ ܥܵܒ݂ܘܿܕܘܵܬܵܝ. ܐܵܢܝܼ ܦܫܝܼܛܵܐܝܼܬ ܚܙܵܝܵܐ ܝܢܵܐ ܕܒܘܼܫܵܝܘܼܬܵܐ ܕܐܵܢܝܼ ܕܩܪܵܝܘܼܗ̇ ܝܢܵܐ ܓܵܢܵܝ "ܐܘܼܡܬܵܢܵܝܹ̈ܐ"، ܕܲܓܵܠܹ̈ܐ ܝܢܵܐ ܘܐܲܚܟ̰ܝܼ ܩܵܐ ܡܲܫܠܵܝܬܵܐ ܕܐܸܢܝܵܬܵܝ ܘܩܵܐ ܡܲܥܒ݂ܲܪܬܵܐ ܕܥܸܕܵܢܵܝ ܘܩܲܒܲܠܬܵܐ ܕܒܘܼܣܵܡܵܐ ܦܲܪܨܘܿܦܵܝܵܐ ܦܠܵܚܵܐ ܝܢܵܐ ܓܵܘ ܫܵܘܬܵܦܘܵܬܲܢ. ܡ̣ܢ ܓܹܒܵܐ ܕܝܵܬܒ݂ܝܼ ܓܵܘ ܒܲܝܬܵܐ ܘܒܲܓ̰ܪܝܼ ܠܙܲܖ̈ܥܵܝ ܒܚܲܕ ܪܘܼܚܵܐ ܐܘܼܡܬܵܢܵܝܬܵܐ ܘܡܲܠܦܝܼ ܠܗܘܿܢ ܠܸܫܵܢܲܢ: ܐܵܢܝܼ ܫܒ݂ܵܩܵܐ ܝܢܵܐ ܠܝܵܠܵܝ̈ ܕܪܲܚܡܘܼܬܵܐ ܥܵܒ݂ܕܝܼ ܥܲܡ ܡܵܢ ܕܒܵܥܝܼ ܘܠܲܝܬ ܠܗ݇ܘܿܢ ܫܘܼܓ݂݇ܠܵܐ ܝܵܠܵܝ̈ ܐܲܝܟܵܐ ܒܸܕ ܐܵܙܠܝܼ ܘܡܘܼܕܝܼ ܒܸܕ ܥܵܒ݂ܕܝܼ. ܐܝܼܬܵܐ ܐܵܢܝܼ ܨܒܵܪܵܐ ܝܢܵܐ ܕܐ݇ܢܵܫܹ̈ܐ ܟ̰ܲܦܹ̈ܐ ܡܵܚܝܼ ܩܵܬܵܝ ܘܚܲܩܪܝܼ ܠܗܘܿܢ ܘܡܝܲܩܪܝܼ ܠܗܘܿܢ ܘܡܲܬܒ݂ܝܼ ܠܗܘܿܢ ܥܲܠ ܪܸܫܵܝ!

ܒܲܓ̰ܲܪܬܵܐ ܕܐܵܬܘܿܖ̈ܵܝܹܐ ܫܲܪܝܼܖܸ̈ܐ ܘܐܘܼܡܬܵܢܵܝܹ̈ܐ ܕܡܵܨܝܼ ܗܲܡܙܸܡܝܼ ܒܠܸܫܵܢܲܢ ܘܕܠܵܐ ܫܵܒ݂ܩܝܼ ܠܹܗ ܕܡܵܝܸܬ، ܘܐܵܢܝܼ ܕܓܵܒ݂ܪܝܼ ܡ̣ܢ ܒܢܲܝ̈ ܐܘܼܡܬܲܢ ܘܡܲܙܝܸܕܝܼ ܠܡܸܢܝܵܢܲܢ، ܝܼܠܵܗ̇ ܥܵܒ݂ܘܿܕܘܼܬܵܐ ܐܘܼܡܬܵܢܵܝܬܵܐ ܫܲܪܝܼܪܬܵܐ ܘܡܵܪܹܐ ܐܝܼܩܵܪܵܐ ܕܚܫܝܼܚܬܵܐ ܝܠܵܗ̇ ܕܦܵܝܫܵܐ ܚܩܝܼܪܬܵܐ.