ܐܢܚܝܕܘܐܢܐ

ܡܚܘܪܬܐ ܩܕ݇ܡܝܬܐ ܒܒܪܝܬܐ

                            ܫܡܝܪܡ ܕ.ܦܘܪܝܐܢ

   ܓܵܘ ܬܲܫܥܝܼܬܵܐ ܕܒܪܝܼܬܵܐ ܐܝܼܬ ܚܲܕ݇ ܡܸܢܝܵܢܵܐ ܪܲܒܵܐ ܕܢܸܫܸ̈ܐ ܡܫܲܡܗܸ̈ܐ ܕܡܘܼܬܒܼܸ̈ܐ ܝܢܵܐ ܚܕܵܐ ܡܲܥܒܼܕܵܢܘܼܬܵܐ ܚܲܝܠܬܵܢܝܼܬܵܐ ܥܲܠ ܚܲܝܘܼܬܵܐ ܕܥܵܡܖ̈ܵܢܘܼܗܿ ܘܡܸܢܲܝܗܝ ܝܢܵܐ ܫܲܡܝܼܪܵܡ ܡܲܠܟܬܵܐ ܕܐܵܫܘܼܪ ܘܒܵܒܼܸܝܠ، ܟܠܝܼܘܿܦܵܛܪܵܐ ܡܲܠܟܬܵܐ ܕܡܸܨܪܸܝܢ، ܘܝܼܟܬܘܿܪܝܼܵܐ ܡܲܠܟܬܵܐ ܕܐܝܼܢܓܠܵܢܕ ܘܫܪ. ܐܝܼܢܵܐ ܚܕܵܐ ܡܼܢ ܐܲܢܸܐ ܢܸܫܸ̈ܐ ܕܟ̰ܸܡ ܚܲܕ݇ܟ̰ܵܐ ܦܝܼܫܸ̈ܐ ܝܢܵܐ ܝܕܸܥܝܸ̈ܐ ܗܲܠ ܐܸܕܝܘܿܡ ܐܹܢܚܹܝܕܘܼܐܲܢܵܐ ܝܠܵܗܿ ܕܡܵܪܵܐ ܕܚܲܕ݇ ܫܵܘܦܵܐ ܥܸܠܵܝܵܐ ܝܠܵܗܿ ܒܚܲܩܠܵܐ ܕܐܘܼܡܵܢܘܼܬܵܐ ܘܣܸܦܪܵܝܘܼܬܵܐ.

   

   ܐܸܢܚܹܝܕܘܼܐܲܢܵܐ ܟܸܐ ܚܵܝܵܐ ܗ݇ܘܵܐ ܒܐܲܠܦܵܝܵܐ ܬܠܝܼܬܵܝܵܐ ܩܲܕ݇ܡ ܡܵܪܲܢ (2250 ـ 2285 ܩ. ܡ.) ܘܗܿܝ ܡܵܚܘܿܪܬܵܐ ܘܣܵܝܘܿܡܬܵܐ ܩܲܕ݇ܡܵܝܬܵܐ ܗ݇ܘܵܐ ܒܒܪܝܼܬܵܐ. ܗܿܝ ܒܪܵܬܵܐ ܕܣܲܪܓܘܿܢ ܡܲܠܟܵܐ ܐܲܟܵܕܵܝܵܐ ܝܗ݇ܘܵܐ ܘܒܵܗ ܒܥܕܵܢܵܐ (ܗܲܪ ܒܗܿܝ ܥܕܵܢܵܐ) ܟܘܼܡܸܪܬܵܐ (ܟܲܗܢܬܵܐ) ܪܲܒܬܵܐ ܕܗܲܝܟܠܵܐ ܕܢܵܢܵܐ (ܐܲܠܵܗܵܐ ܕܣܲܗܪܵܐ) ܒܡܕܝܼܢ݇ܬܵܐ ܕܐܘܼܪ ܗ݇ܘܵܐ ܘܐܘܼܪ ܗܿܝ ܡܕܝܼܢ݇ܬܵܐ ܗ݇ܘܵܐ ܟ̰ܸܡ ܓܘܼܪܬܵܐ ܒܐܸܡܦܪܵܛܘܼܪܘܼܬܵܐ ܕܣܲܪܓܘܿܢ. ܫܸܕܬܵܐ ܕܟܲܗܢܘܼܬܵܐ ܕܗܲܝܟܠܵܐ ܕܢܵܢܵܐ ܒܐܘܼܪ ܟ̰ܸܡ ܐܵܢܲܢܩܵܝܬܵܐ ܗ݇ܘܵܐ ܒܫܘܼܡܝܼܪ ܘܐܲܚܟ̰ܝܼ ܥܠܲܝܡܵܬܸ̈ܐ ܕܬܪܲܥ ܡܲܠܟܵܝܵܐ ܟܸܐ ܡܵܛܝܼ ܗ݇ܘܵܘ ܥܲܠ ܐܵܗܵܐ ܕܲܪܓܼܵܐ.

   ܣܲܪܓܘܿܢ ܐܝܼܬ ܗ݇ܘܵܐ ܠܸܗ ܬܘܼܟܼܠܵܢܵܐ ܪܲܒܵܐ ܒܐܸܢܚܹܝܕܘܼܐܲܢܵܐ ܘܣܝܼܡܘܼܗܿ ܗ݇ܘܵܐ ܠܕܲܪܓܼܵܐ ܕܟܲܗܢܘܼܬܵܐ ܕܗܲܝܟܠܵܐ ܕܫܘܼܡܝܼܪ ܘܒܐܵܗܵܐ ܥܒܼܵܕܸܗ ܡܨܸܐ ܠܸܐ ܕܡܲܩܘܸܐ ܘܡܫܲܪܸܪ ܠܡܟܲܬܪܘܼܬܵܐ (ثبات) ܕܐܸܡܦܪܵܛܘܼܪܘܼܬܸܗ ܒܗܿܝ ܕܐܸܢܚܹܝܕܘܼܐܲܢܵܐ ܡܨܸܐܠܵܗܿ ܕܡܚܲܝܸܕܵܐ ܠܡܕܝܼܢܵܬܸ̈ܐ ܦܖ̈ܝܼܫܸܐ ܕܐܸܡܦܪܵܛܘܼܪܘܼܬܵܐ ܒܡܸܨܥܵܝܘܼܬܵܐ ܕܡܲܪܲܡܬܵܐ ܕܐܲܠܲܗܬܵܐ ܐܝܼܢܵܢܵܐ ܠܥܸܠ ܡܼܢ ܟܠܲܝܗܝ ܐܲܠܵܗܸ̈ܐ ܐ݇ܚܸܖ̈݇ܢܸܐ ܕܒܸܝܬ ܢܵܗܖܸ̈ܝܢ ܒܗܿܘ ܙܲܒܼܢܵܐ.

   ܕܘܼܖܸ̈ܓܸܐ ܕܐܸܢܚܹܝܕܘܼܐܲܢܵܐ ܗ݇ܘܝܼܸܐ ܝܢܵܐ ܛܘܼܦ̰ܣܵܐ ܩܵܐ ܨܠܵܘܵܬܸ̈ܐ ܟܼܘܼܫܵܦܵܝܸ̈ܐ ܕܒܵܒܼܠܵܝܸ̈ܐ ܘܐܵܦ ܡܘܼܬܸܒܼܠܗ݇ܘܿܢ ܡܲܥܒܼܕܵܢܘܼܬܵܐ ܥܲܠ ܨܠܵܘܵܬܸ̈ܐ ܘܡܲܙܡܘܼܖܸ̈ܐ ܕܐܘܼܪܵܝܬܵܐ ܘܕܘܼܖܸ̈ܓܸܐ ܗܘܿܡܹܝܖ̈ܵܝܸܐ ܕܓܪܝܼܣܝܼܵܐ  ܘܐܵܦ ܥܲܠ ܕܘܼܖܸ̈ܓܸܐ ܕܥܸܕܬܵܐ ܒܟܼܝܼܪܵܝܬܵܐ (ܩܲܕ݇ܡܵܝܬܵܐ) ܕܡܫܝܼܚܵܐ.

   ܣܲܪܓܘܿܢ ܓܲܢ݇ܒܵܪܵܐ ܡܫܘܼܡܗܵܐ ܠܸܗ ܒܪܵܬܸܗ ܒܫܸܡܵܐ ܕܐܸܢܚܸܕܘܼܐܲܢܵܐ ܟܲܕ ܗܿܝ ܕܐ݇ܬܝܼܬܵܐ ܗ݇ܘܵܐ ܡܼܢ ܓܲܪܒܝܼܵܐ ܕܐܵܟܲܕ؛ ܕܠܵܐ ܦܘܼܫܵܟܼܵܐ ܐܝܼܬ ܗ݇ܘܵܐ ܠܵܗܿ ܚܲܕ݇ ܫܸܡܵܐ ܫܝܼܡܵܝܵܐ ܘܒܵܬ݇ܪ ܡܲܪܲܡܬܘܼܗܿ ܠܕܲܪܓܼܵܐ ܕܟܘܼܡܸܪܬܵܐ (ܟܲܗܢܬܵܐ) ܕܗܲܝܟܠܵܐ ܕܢܵܢܵܐ ܘܫܲܢܵܝܬܘܼܗܿ ܠܐܘܼܪ ܕܝܼܗ݇ܘܵܐ ܩܸܢܛܪܘܿܢ ܕܣܵܦܪܵܝܘܼܬܵܐ ܫܘܼܡܝܼܪܵܝܬܵܐ، ܐܵܢܲܢܩܵܝܬܵܐ ܗ݇ܘܵܐ ܕܫܵܩܠܵܐ ܚܲܕ݇ ܫܸܡܵܐ ܡܠܲܚܡܵܐ ܠܕܲܪܓܘܼܗܿ ܥܸܠܵܝܵܐ. ܦܘܼܫܵܩܵܐ ܕܫܸܡܵܐ ܕܐܸܢܚܹܝܕܘܼܐܲܢܵܐ ܝܠܸܗ: ܟܲܗܢܬܵܐ ܪܲܒܬܵܐ ܘܡܪܲܟܒܼܵܐ ܝܠܸܗ ܡܼܢ ܬܠܵܬܵܐ ܡܢܵܬܸ̈ܐ: ܐ: ܐܸܢ ܕܝܼܠܸܗ ܟܘܼܡܸܪܬܵܐ ܪܲܒܬܵܐ؛ ܒ: ܚܸܝܕܘܼ ܕܝܼܠܸܗ ܙܘܼܠܵܦܵܐ (ܣܸܩܠܵܐ)  ܘܓ: ܐܲܢܵܐ ܕܝܼܠܸܗ: ܫܡܲܝܵܐ.

   ܗܿܝ ܐܝܼܬ ܗ݇ܘܵܐ ܠܵܗܿ ܡܸܫܬܲܐܠܵܢܘܼܬܵܐ ܕܡܬܲܓܒܪܵܢܘܼܬܵܐ ܕܗܲܝܟܠܸ̈ܐ ܕܡܕܝܼܢ݇ܬܵܐ ܕܐܘܼܪ ܘܒܙܲܒܼܢܵܐ ܕܡܲܠܟܘܼܬܵܐ ܕܪܝܼܡܘܼܫ ܐܲܚܘܼܢܘܼܗܿ ܟܠܸܐ ܠܵܗܿ ܒܲܪܩܘܼܒܼܠ ܕܡܲܪܘܿܕܘܼܬܵܐ ܕܒܥܸܠܕܒܼܵܒܼܘܼܗܿ ܠܘܼܓܵܠ ـ ܐܲܢܹܝ ܕܫܘܼܕܪܵܐ ܠܸܗ ܠܓܵܠܘܼܬܵܐ. ܐܸܢܚܹܝܕܘܼܐܲܢܵܐ ܡܲܠܚܘܼܡܸܐ ܝܠܵܗܿ ܚܕܵܐ ܟܘܼܫܵܦܵܐ (ܛܠܵܒܬܵܐ) ܩܵܐ ܐܝܼܢܵܢܵܐ ܘܒܸܛܠܵܒܵܐ ܝܠܵܗܿ ܕܗܿܝ ܡܟܼܲܫܦܵܐ (ܢܵܘܢܝܼܵܐ) ܠܟܸܣ ܐܲܠܵܗܵܐ ܐܵܢ (ܐܵܢܘܼ) ܕܡܥܲܕܸܪܠܵܗܿ (ܗܲܝܸܪܠܵܗܿ). ܟܲܕ ܐܝܼܢܵܢܵܐ ܒܸܫܡܵܥܵܐ ܝܠܵܗܿ ܠܨܠܘܼܬܘܼܗܿ، ܗܲܝܘܼܪܘܼܗܿ ܝܠܵܗܿ ܘܒܡܸܨܥܵܝܘܼܬܵܐ ܕܐܲܠܵܗܸ̈ܐ ܡܥܲܕܖ̈ܵܢܸܐ ܐܸܢܚܹܝܕܘܼܐܲܢܵܐ ܡܛܵܝܵܐ ܝܠܵܗܿ ܠܫܸܕܬܵܐ ܫܲܪܝܼܪܬܵܐ ܕܓܵܢܘܼܗܿ ܐܸܠܵܐ ܒܵܬ݇ܪ ܡܵܘܬܵܐ ܕܪܝܼܡܘܼܫ ܐܲܚܘܼܢܘܼܗܿ. ܗܵܕܟܼܵܐ ܐܸܢܚܹܝܕܘܼܐܲܢܵܐ ܗܿܝ ܩܲܕ݇ܡܵܝܬܵܐ ܝܠܵܗܿ ܒܢܸܫܸ̈ܐ ܕܒܪܝܼܬܵܐ ܕܡܛܵܝܵܐ ܝܠܵܗܿ ܠܕܲܪܓܼܵܐ ܥܸܠܵܝܵܐ ܕܪܲܒ ܟܲܗܢܘܼܬܵܐ ܘܗ݇ܘܵܝܵܐ ܝܠܵܗܿ ܚܕܵܐ ܬܲܚܘܝܼܬܵܐ (ܛܘܼܦ̰ܣܵܐ) ܩܵܐ ܬܵܘܠܕܵܬܸ̈ܐ ܐܵܬܘܿܝܸ̈ܐ ܘܒܡܸܬܚܵܐ ܕܐܲܪܒܥܝܼܢ ܫܸܢܸ̈ܐ ܦܝܵܫܵܐ ܝܠܵܗܿ ܒܕܲܪܓܼܵܐ ܕܟܘܼܡܸܪܬܵܐ ܪܲܒܬܵܐ ܕܗܲܝܟܠܵܐ ܕܐܝܼܢܵܢܵܐ. ܗܿܝ ܐܵܦ ܐܝܼܬ ܗ݇ܘܵܐ ܠܵܗܿ ܓܲܪܵܐ ܕܣܵܝܘܿܡܬܵܐ ܘܡܵܫܘܿܚܬܵܐ ܘܐܲܝܟܼ ܡܕܲܒܪܵܢܬܵܐ ܕܦܘܿܠܝܼܛܝܼܩܝܼ ܕܐܲܬܪܵܐ ܗ݇ܘܵܐ ܒܐܘܼܪܚܵܐ ܕܡܙܵܓܼܬܵܐ ܘܡܚܲܝܲܕܬܵܐ ܕܬܵܘܕܝܼܬܵܐ ܐܲܟܵܕܲܝܬܵܐ ܥܲܡ ܫܘܼܡܝܼܪܲܝܬܵܐ ܒܢܝܼܫܵܐ ܕܒܪܵܝܬܵܐ ܕܚܲܕ݇ ܐܲܬܪܵܐ ܡܚܲܝܕܵܐ ܘܚܕܵܐ ܐܸܡܦܪܵܛܘܼܪܘܼܬܵܐ ܚܲܝܠܵܢܝܼܬܵܐ.

   ܣܝܵܡܸ̈ܐ ܕܐܸܢܚܸܝܕܘܼܐܲܢܵܐ ܒܸܚܒܼܵܫܵܐ ܝܢܵܐ ܡܼܢ ܫܸܡܵܢܸ̈ܐ ܕܐܲܠܵܗܸ̈ܐ ܕܒܸܝܬ ܢܲܗܖܹ̈ܝܢ (ܕܦܝܼܫܸ̈ܐ ܝܢܵܐ ܣܓܼܝܼܕܸ̈ܐ ܒܝܲܕ ܥܲܡܖ̈ܵܢܘܼܗܿ) ܘܐܵܦ ܠܕܘܼܟܬܵܐ ܕܗܲܝܟܠܸ̈ܐ ܐܵܢܲܢܩܵܝܸ̈ܐ. ܐܝܼܢܵܐ ܨܠܵܘܵܬܘܼܗܿ ܗܲܩܘܼܝܸ̈ܐ ܝܢܵܐ ܒܘܼܬ ܣܲܒܼܖܸ̈ܐ ܘܕܸܚܸܠܝܵܬܸ̈ܐ ܕܟܠ ܚܲܕ݇ ܐܝܼܬܝܵܐ ܡܵܝܘܿܬܵܐ.

   ܐܲܪܒܥܝܼܢ ܣܝܵܡܸ̈ܐ ܕܐܸܢܚܸܝܕܘܼܐܲܢܵܐ ܦܝܼܫܸ̈ܐ ܝܢܵܐ ܢܣܝܼܚܸ̈ܐ ܗܲܠ 2000 ܫܸܢܸ̈ܐ ܒܵܬ݇ܪ ܢܝܵܚܬܘܼܗܿ ܘܐܵܗܵܐ ܡܫܲܪܘܼܪܸܐ ܝܠܵܗܿ ܠܥܸܠܵܝܘܼܬܵܐ ܕܣܸܦܪܵܝܘܼܬܘܼܗܿ ܘܐܘܼܡܵܢܘܼܬܘܼܗܿ ܘܒܘܼܬ ܐܵܗܵܐ ܫܩܝܼܠܬܵܐ ܝܠܵܗܿ ܟܘܼܢܵܝܵܐ ܕܫܹܝܟܣܦܝܼܪ ܕܙܲܒܼܢܘܼܗܿ.

   ܒܚܕܵܐ ܡܼܢ ܡܘܼܫܚܵܬܘܼܗܿ ܗܵܕܟܼܵܐ ܐ݇ܡܵܪܵܐ ܝܠܵܗܿ ܐܸܢܚܹܝܕܘܼܐܲܢܵܐ:

ܚܕܵܐ ܢܸܫܵܐ ܕܗܵܘܝܵܐ ܡܵܪܵܐ ܕܚܕܵܐ ܚܸܟܼܡܬܵܐ ܪܲܒܬܵܐ ܟܸܐ ܡܲܦܠܸܚܵܐ ܠܚܕܵܐ ܠܘܼܚܵܐ ܕܠܵܥܘܿܙܘܲܪܕܵܐ، ܗܿܝ ܟܸܐ ܝܵܗܒܼܵܐ ܡܘܼܠܟܵܢܵܐ ܠܟܠܲܝܗܝ ܐܲܬܖ̈ܵܘܵܬܸܐ... ܟܸܐ ܡܵܫܚܵܐ (ܟܸܐ ܟܵܝܠܵܐ) ܠܫܡܲܝܸ̈ܐ، ܟܸܐ ܡܲܬܒܼܵܐ ܠܚܲܒܼܠܵܐ ܕܡܘܼܫܵܚܵܐ ܥܲܠ ܐܲܪܥܵܐ...

   ܒܗܿܝ ܡܫܘܼܚܬܘܼܗܿ ܩܲܕ݇ܡܵܝܬܵܐ ܩܵܐ ܐܝܼܢܵܢܵܐ ܗܵܕܟܼܵܐ ܝܠܵܗܿ ܒܸܐܡܵܪܵܐ: ܡܵܪܬܵܐ ܕܟܠܲܝܗܝ ܥܘܼܫܢܸ̈ܐ ܐܲܠܵܗܵܝܸ̈ܐ، ܒܲܗܪܵܐ ܨܲܡܘܼܚܬܵܢܵܐ، ܐܲܢ݇ܬܬܵܐ ܙܲܕܝܼܩܬܵܐ ܠܒܼܝܼܫܬܵܐ ܒܙܲܠܝܼܩܸ̈ܐ، ܡܘܼܚܸܒܬܵܐ ܕܐܵܢ ܘܐܘܼܪܵܫ! ܚܲܒܝܼܒܼܬܵܐ ܕܫܡܲܝܵܐ، ܒܲܟܠܝܼܠܵܐ ܪܲܒܵܐ، ܕܟܸܐ ܡܲܚܸܒܵܗܿ ܠܬܘܼܩܵܝܬܵܐ ܫܲܦܝܼܪܬܵܐ، ܚܫܝܼܚܬܵܐ ܠܬܸܫܡܸܫܬܵܐ ܕܐܵܢ، ܕܡܐܘܼܚܸܕܬܵܐ ܝܠܵܗܿ ܠܟܠܲܝܗܝ ܫܲܒܼܥܵܐ ܥܘܼܫܢܸ̈ܐ ܐܲܠܵܗܵܝܸ̈ܐ. ܡܵܪܬܝܼ، ܐܲܢ݇ܬܝ ܝܘܲܬܝ ܢܵܛܘܿܪܬܵܐ ܕܟܠܲܝܗܝ ܚܲܝܠܵܘܵܬܸ̈ܐ ܪܲܒܸ̈ܐ ܐܲܠܵܗܵܝܸ̈ܐ. ܐܲܢ݇ܬܝ ܫܩܝܼܠܬܵܐ ܝܘܲܬܝ ܠܚܲܝܠܵܘܵܬܸ̈ܐ ܐܲܠܵܗܵܝܸ̈ܐ. ܐܲܢ݇ܬܝ ܕܘܼܢܕܸܠܬܵܐ ܝܘܲܬܝ ܠܚܲܝܠܵܘܵܬܸ̈ܐ ܐܲܠܵܗܵܝܸ̈ܐ ܡܼܢ ܐܝܼܕܵܟܼܝ̈....

....ܚܲܒܝܼܒܼܬܵܐ، ܐܲܢ݇ܬܝ ܦܐܝܼܬܵܐ ܝܘܲܬܝ، ܠܲܝܬ ܚܲܕ݇ ܕܡܗܲܠܸܟܼ ܩܲܕܡܵܟܼܝ. ܐܲܢ݇ܬܝ ܒܸܥܡܵܪܵܐ ܝܘܲܬܝ ܥܲܡ ܐܵܢ (ܐܵܢܘܼ) ܪܲܒܵܐ ܒܒܹܝܬ ܢܝܵܚܵܐ ܡܩܘܼܕܫܵܐ. ܐܲܝܢܝܼ ܐܲܠܵܗܵܐ ܒܲܕܡܘܼܬܵܟܼܝ ܝܠܸܗ ܒܲܟܢܘܼܫܝܵܐ ܕܫܡܲܝܵܐ ܘܐܲܪܥܵܐ؟ ܐܲܢ݇ܬܝ ܦܐܝܼܬܵܐ ܝܘܲܬܝ، ܫܒܼܝܼܚܵܐ ܝܠܸܗ ܫܸܡܵܟܼ، ܐܲܢ݇ܬܝ ܠܚܘܼܕܵܟܼܝ ܦܐܝܼܬܵܐ ܝܘܲܬܝ.

   ܘܒܚܕܵܐ ܡܫܘܿܚܬܵܐ ܐ݇ܚܸܪ݇ܬܵܐ ܕܡܘܼܩܪܸܒܼܬܘܼܗܿ ܝܠܵܗܿ ܩܵܐ ܐܝܼܢܵܢܵܐ ܗܵܕܟܼܵܐ ܝܠܵܗܿ ܒܸܐܡܵܪܵܐ:

   ܡܲܪܬܵܐ ܩܲܕ݇ܡܵܝܬܵܐ ܕܬܵܘܵܢ ـ ܟܘܼܪܣܝܵܐ ܡܩܘܼܒܸܠܬܘܼܗܿ ܝܠܵܗܿ ܙܡܝܼܪܬܵܐ ܕܐܸܢܚܹܝܕܘܼܐܲܢܵܐ. ܐܝܼܢܵܢܵܐ ܡܲܚܘܼܒܘܼܗܿ ܝܠܵܗܿ ܡܸܢ݇ܕܪܸܫ݇. ܝܵܘܡܵܐ ܫܲܦܝܼܪܵܐ ܗ݇ܘܵܐ ܩܵܐ ܐܸܢܚܹܝܕܘܼܐܲܢܵܐ ܒܗܿܝ ܕܗܿܝ ܠܒܼܝܼܫܬܵܐ ܗ݇ܘܵܐ ܒܡܲܖ̈ܓܵܢܸܐ. ܗܿܝ ܠܒܼܝܼܫܬܵܐ ܗ݇ܘܵܐ ܒܫܘܼܦܪܵܐ ܐܲܢ݇ܬܬܵܝܵܐ ܒܲܕܡܘܼܬ ܙܲܗܪܝܼܖܸ̈ܐ ܩܲܕ݇ܡܵܝܸ̈ܐ ܕܣܲܗܪܵܐ ܠܥܸܠ ܡܼܢ ܐܘܼܦܩܵܐ. ܟܡܵܐ ܓܲܐܝܵܐܝܼܬ ܠܒܼܝܼܫܬܵܐ ܗ݇ܘܵܐ ܗܿܝ ܐܝܼܡܲܢ ܕܥܒܼܸܪܸܗ ܢܵܢܵܐ ܐܲܒܼܵܐ ܕܐܝܼܢܵܢܵܐ. ܩܲܨܪܵܐ ܫܘܼܒܸܚܠܵܗܿ ܠܝܸܡܵܐ ܕܐܝܼܢܵܢܵܐ: ܢܝܼܢܓܵܠ. ܡܼܢ ܩܲܕ݇ܡ ܐܸܣܟܘܼܦܬܵܐ ܕܫܡܲܝܵܐ ܐ݇ܬܸܐܠܸܗ ܩܵܠܵܐ ܕ:ܒܫܲܝܢܵܐ.

ܚܒܖ̈ܢܐ ܥܣܩ̈ܐ

ܥܘܼܫܢܵܐ: ܚܲܝܠܵܐ

ܬܘܼܩܵܝܬܵܐ: ܣܲܩܲܠܬܵܐ ܕܪܸܫܵܐ

ܡܐܘܼܚܸܕܬܵܐ ܝܠܵܗܿ: ܫܩܝܼܠܬܵܐ ܝܠܵܗܿ، ܡܵܪܵܐ ܦܠܝܼܛܬܵܐ ܝܠܵܗܿ

ܕܘܼܢܕܸܠܬܵܐ: ܟ̰ܘܼܢܒܸܠܬܵܐ

ܦܐܝܼܬܵܐ: ܡܵܪܵܐ ܕܚܲܕ݇ ܫܘܼܦܪܵܐ ܥܸܠܵܝܵܐ

ܡܒܘܥ̈ܐ:

1 - http://www.transoxiana.org/0108/roberts-enheduana, Daughter of king Sargon                                    

2 -http://womenshistory.about.com/od/women

3 -https://en.wikipedia.org/wiki/Enheduanna