ܙܠܦ̈ܐ

ܙܠܦ̈ܐ

               ܐܢܛܘܢ ܟ̰ܝܚܘܦ̰

   ܠܸܐ ܝܘܸܢ ܣܢܝܼܩܵܐ ܠܚܲܕ݇ ܚܘܼܦܵܛܵܐ ܩܸܫܝܵܐ ܩܲܕ ܕܟܼܵܪܸܢ ܠܗܿܘ ܪܲܡܫܵܐ ܡܸܛܪܵܢܵܐ ܕܬܸܫܪܝܼܸܐ ܐܝܼܡܲܢ ܕܟܠܸܐܠܝܼ ܥܲܡ ܒܵܒܝܼ ܓܵܘ ܚܲܕ݇ ܡܼܢ ܥܵܠܘܿܠܵܢܸ̈ܐ ܥܡܝܼܖܸ̈ܐ (ܡܸܠܝܵܐ ܡܼܢ ܐ݇ܢܵܫܸ̈ܐ) ܕܡܘܿܣܟܘܵܐ ܘܪܓܼܸܫܠܝܼ ܕܡܕܲܪܓܼܵܐܝܼܬ (ܢܝܼܚܵܐܝܼܬ) ܦܝܵܫܵܐ ܝܘܸܢ ܓܼܠܝܼܒܵܐ ܒܝܲܕ ܚܲܕ݇ ܡܲܪܥܵܐ ܡܥܲܓ̰ܒܵܢܵܐ. ܠܲܝܬ ܗ݇ܘܵܐ ܠܝܼ ܟ̰ܘܼ ܚܲܕ݇ ܟܸܐܒܼܵܐ ܐܝܼܢܵܐ ܐܲܩܠܝܼ̈ ܒܸܪܦܵܝܵܐ ܗ݇ܘܵܐ، ܚܲܒܖ̈ܵܢܸܐ ܩܲܪܘܼܨܸܐ ܗ݇ܘܵܘ ܒܒܲܠܘܿܥܬܝܼ، ܪܸܫܝܼ ܟ̰ܲܢܒܘܼܠܸܐ ܗ݇ܘܵܐ ܠܚܲܕ݇ ܓܸܒܵܐ... ܓܵܘ ܚܲܕ݇ ܪܦܵܦܵܐ ܗܵܕܟܼܵܐ ܚܫܸܒܼܠܝܼ ܕܒܸܕ ܢܵܦܠܸܢ ܘܒܸܕ ܛܵܠܩܸܢ ܠܡܲܕܥܝܼ. ܐܸܢ ܒܗܿܘ ܪܦܵܦܵܐ ܗܵܘܝܼ ܗ݇ܘܵܘ ܠܘܼܒܠܝܼ ܠܒܸܝܬ ܟܖ̈ܝܼܗܸܐ، ܐܵܣܝܸ̈ܐ ܒܸܕ ܗܵܘܝܼ ܗ݇ܘܵܘ ܟܬܝܼܒܼܸ̈ܐ ܥܲܠ ܠܘܼܚܵܐ ܕܥܸܠܸܠ ܡܼܢ ܥܲܪܣܝܼ: ܟܸܦܢܵܐ    ܗ.ܕ ܚܲܕ݇ ܡܲܪܥܵܐ ܕܠܸܐ ܝܠܸܗ ܪܫܝܼܡܵܐ ܒܟ̰ܘܼ ܚܲܕ݇ ܟܬܵܒܼܵܐ ܕܐܵܣܝܘܼܬܵܐ

    ܠܕܸܦܢܝܼ ܥܲܠ ܪܨܝܼܦܵܐ، ܒܵܒܝܼ ܟܸܠܝܵܐ ܗ݇ܘܵܐ ܠܒܼܝܼܫܵܐ ܚܕܵܐ ܟܘܼܬܝܼܢܵܐ ܒܠܝܼܬܵܐ ܕܩܲܝܛܵܐ ܘܚܕܵܐ ܟܘܼܣܝܼܬܵܐ ܒܪܸܫܸܗ، ܩܲܕ ܚܲܕ݇ ܩܸܛܥܵܐ ܡܼܢ ܐܵܣܬܲܪܘܼܗܿ ܛܥܝܼܦܵܐ ܗ݇ܘܸܐ ܠܒܼܲܕܲܪ. ܐܲܩܠܘܼܗ̈ܝ ܓܵܘ ܚܲܕ݇ ܙܵܘܓܵܐ ܓܵܠܘܿܫܸ̈ܐ ܓܘܼܖܸ̈ܐ ܘܝܲܩܘܿܖܸ̈ܐ ܗ݇ܘܵܘ. ܐ݇ܢܵܫܵܐ ܒܘܼܕܵܠܵܐ ܟܲܕ ܒܸܙܕܵܥܵܐ ܗ݇ܘܵܐ ܕܐ݇ܢܵܫܸ̈ܐ ܚܵܙܝܼ ܠܗ݇ܘܿܢ ܐܲܩܠܘܼܗܝ ܚܸܦܝܵܝܸ̈ܐ ܓܵܘ ܓܵܠܘܿܫܸ̈ܐ، ܓܪܝܼܫܵܐ ܗ݇ܘܵܐ ܠܣܲܗܡܵܐ ܥܸܠܵܝܵܐ ܕܚܲܕ݇ܟܡܵܐ ܒܲܖ̈ܙܲܢܩܸ̈ܐ (ܦܘܼܬܝܼܢܸ̈ܐ) ܥܲܬܝܼܩܸ̈ܐ ܕܓܸܠܕܵܐ ܠܚܲܕܸܪܘܵܢܸ̈ܐ ܕܫܵܩܸ̈ܐ ܕܐܲܩܠܘܼܗ̈ܝ

   ܐܵܗܵܐ ܐܝܼܬܝܵܐ ܡܸܣܟܸܢܵܐ، ܣܲܟܼܠܵܐ ܘܡܥܲܓ̰ܒܵܢܵܐ ܩܲܕ ܟܡܵܐ ܕܒܸܫ ܪܵܒܵܐ ܟܸܐ ܡܲܚܸܒܸܢ ܗ݇ܘܵܐ ܠܸܗ، ܟܘܿܬܝܼܢܘܼܗܝ ܒܸܫ ܟܸܐ ܦܲܪܦܸܛܵܐ ܗ݇ܘܵܐ ܘܫܲܚܬܸܢܵܐ ܗ݇ܘܵܐ، ܚܲܡܫܵܐ ܝܲܖ̈ܚܸܐ ܡܼܢ ܩܲܕ݇ܡ ܐܵܕܝܼܵܐ ܐ݇ܬܝܼܵܐ ܗ݇ܘܵܐ ܠܡܘܿܣܟܘܵܐ ܠܡܲܫܟ̰ܘܼܚܸܐ ܚܲܕ݇ ܫܘܼܓܼ݇ܠܵܐ ܐܲܝܟܼ ܣܵܦܪܵܐ ܢܵܣܘܿܟܼܵܐ. ܒܡܸܬܚܵܐ ܕܐܵܢܝܼ ܚܲܡܫܵܐ ܝܲܖ̈ܚܸܐ، ܗ݇ܘܝܼܵܐ ܗ݇ܘܵܐ ܒܸܚܕܵܪܵܐ ܓܵܘ ܡܘܿܣܟܘܵܐ ܒܵܬ݇ܪ ܫܘܼܓܼ݇ܠܵܐ ܘܐܲܚܟ̰ܝܼ ܒܗܿܘ ܝܵܘܡܵܐ ܐ݇ܬܝܼܵܐ ܗ݇ܘܵܐ ܓܵܘ ܥܵܠܘܿܠܵܢܸ̈ܐ ܩܵܐ ܛܠܵܒܬܵܐ ܕܐܸܪܘܵܢܵܐ

   ܩܲܕ݇ܡ ܕܝܼܲܢ، ܐܝܼܬ ܗ݇ܘܵܐ ܚܲܕ݇ ܒܲܝܬܵܐ ܓܘܼܪܵܐ ܕܬܠܵܬܵܐ ܡܸܕܝܵܖܸ̈ܐ (ܛܲܒܲܩܸ̈ܐ)، ܣܘܼܩܠܵܐ ܒܚܲܕ݇ ܠܘܼܚܵܐ ܡܗܲܕܝܵܢܵܐ ܒܓܵܘܢܵܐ ܡܝܼܠܵܐ ܕܥܲܠܸܗ ܐܝܼܬ ܗ݇ܘܵܐ ܚܲܒܪܵܐ ܕ"ܒܸܝܬ ܐ݇ܟܼܵܠܵܐ". ܪܸܫܝܼ ܟ̰ܲܢܒܘܼܠܸܐ ܗ݇ܘܵܐ ܒܡܚܝܼܠܘܼܬܵܐ ܠܒܵܬ݇ܪܵܐ ܘܠܚܲܕ݇ ܓܸܒܵܐ، ܘܐܵܢܵܐ ܠܸܐ ܝܘܸܢ ܗ݇ܘܵܐ ܡܨܵܝܵܐ ܕܓܵܫܩܸܢ ܠܥܸܠܸܠ ܥܲܠ ܟܵܘܵܬܸ̈ܐ (ܦܲܢܓ̰ܵܖܸ̈ܐ) ܒܲܗܖ̈ܵܢܸܐ ܕܒܸܝܬ ܐ݇ܟܼܵܠܵܐ. ܚܲܕ݇ܟܡܵܐ ܐܸܣܟܹܝܡܸ̈ܐ ܐ݇ܢܵܫܵܝܸ̈ܐ ܒܣܘܼܪܗܵܒܼܵܐ ܒܸܓ̰ܘܵܓ̰ܵܐ ܗ݇ܘܵܘ ܓܵܘ ܟܵܘܵܬܸ̈ܐ. ܐܵܢܵܐ ܡܨܵܝܵܐ ܝܘܸܢ ܗ݇ܘܵܐ ܕܚܵܙܸܝܢ ܗ݇ܘܵܐ ܠܓܸܒܵܐ ܝܲܡܝܼܢܵܝܵܐ ܕܐܘܿܪܟܹܝܣܬܪܝܼܘܿܢ (ܚܕܵܐ ܣܩܸܘܵܐ ܝܲܢ ܡܵܫܝܼܢܵܐ ܩܵܐ ܡܵܘܠܕܵܢܘܼܬܵܐ ܕܩܵܠܵܐ ܕܐܘܿܪܟܹܝܣܬܪܵܐ)، ܬܪܸܝܢ ܫܸܟܠܸ̈ܐ ܡܓܵܘܢܸ̈ܐ، ܠܲܡܦܝܼܕܸ̈ܐ (ܠܵܡܦܸ̈ܐ) ܬܸܠܝܸ̈ܐ... . ܟܲܕ ܨܲܕܘܼܕܸܐ ܝܘܸܢ ܗ݇ܘܵܐ (ܥܲܝܢܝܼ̈ ܬܝܼܟܲܝܗܝ ܝܘܸܢ ܗ݇ܘܵܐ) ܥܲܠ ܚܕܵܐ ܟܵܘܬܵܐ، ܚܙܸܐܠܝܼ ܠܚܲܕ݇ ܥܲܪܲܝܬܵܐ ܚܘܵܪܬܵܐ ܘܕܠܵܐ ܙܵܘܥܵܐ ܩܲܕ ܣܸܖ̈ܛܘܼܗܿ ܐܲܖ̈ܝܼܟܼܢܵܝܸܐ ܟܸܠܝܸ̈ܐ ܗ݇ܘܵܘ ܒܲܪܩܘܼܒܼܠ ܐܪܲܥ ـ ܐܸܫܬܵܐ (ܨܘܼܪܬܵܐ ܕܒܵܬ݇ܪܵܐ ܝܲܢ زمینه) ܒܓܵܘܢܵܐ ܩܲܗܘܵܢܵܝܵܐ ܚܸܫܟܵܢܵܐ. ܐܵܢܵܐ ܓܘܼܫܸܩܠܝܼ ܒܩܲܛܝܼܢܘܼܬܵܐ (ܒܕܲܩܝܼܩܘܼܬܵܐ) ܘܦܘܼܠܸܛܠܝܼ ܡܼܢ ܗܿܝ ܥܲܪܲܝܬܵܐ ܠܚܲܕ݇ ܠܘܼܚܵܐ ܚܘܵܪܵܐ ܥܲܠ ܓܘܼܕܵܐ. ܚܲܕ݇ ܡܸܢܕܝܼ ܟܬܝܼܒܼܵܐ ܗ݇ܘܵܐ ܥܲܠܸܗ ܐܝܼܢܵܐ ܡܘܼܕܝܼ ܗ݇ܘܵܐ؟ ܠܸܐ ܝܘܸܢ ܗ݇ܘܵܐ ܡܨܵܝܵܐ ܕܚܵܙܸܝܢ

   ܩܵܐ ܦܲܠܓܵܐ ܕܫܵܥܬܵܐ ܥܲܝܢ̈ܝܼ ܬܝܼܟܵܝܠܝܼ ܥܲܠ ܠܘܼܚܵܐ. ܚܘܵܪܘܼܬܸܗ ܓܪܸܫܠܵܗܿ ܠܥܲܝܢ̈ܝܼ ܘܡܘܼܬܒܼܸܢܵܗܿ ܠܡܘܼܚܝܼ. ܚܘܼܦܸܛܠܝܼ ܕܩܵܪܸܢܸܗ ܐܝܼܢܵܐ ܚܘܼܦܵܛ̈ܝܼ ܣܖ̈ܝܼܩܸܐ ܗ݇ܘܵܘ. ܒܚܲܪܬܵܐ ܚܲܕ݇ ܡܲܪܥܵܐ ܡܥܲܓ̰ܒܵܢܵܐ ܓܼܠܸܒܠܸܗ ܥܲܠܝܼ

   ܩܵܠܵܐ ܘܩܵܘܓܼܵܐ ܕܡܲܖ̈ܟܲܒܼܝܵܬܸܐ ܫܘܼܪܸܐ ܠܸܗ ܒܸܕܡܵܝܵܐ ܥܲܠ ܪܲܥܡܵܐ، ܓܵܘ ܪܸܝܚܵܐ ܕܚܸܡܩܵܐ ܕܥܵܠܘܿܠܵܐ ܦܪܸܫܠܝܼ ܠܐܲܠܦܵܐ ܐܲܕܫܸ̈ܐ ܕܖܹ̈ܝܚܸܐ. ܒܲܗܖܸ̈ܐ ܕܒܸܝܬ ܐ݇ܟܼܵܠܵܐ ܘܠܲܡܦܹܝܕܸ̈ܐ ܡܚܸܐ ܠܗ݇ܘܿܢ ܠܥܲܝܢܝܼ ܡܐܲܝܟܼ ܒܲܪܩܵܐ. ܚܲܡܫܵܐ ܖܸ̈ܓܼܫܝܼ ܫܘܼܖ̈ܫܝܼܸܐ ܘܚܘܼܠܸܢܸ̈ܐ ܗ݇ܘܵܘ ܠܥܸܠ ܡܼܢ ܥܝܵܕܵܐ. ܫܘܼܪܸܐ ܠܝܼ ܒܸܚܙܵܝܵܐ ܠܚܲܕ݇ܟܡܵܐ ܡܸܢܕܝܵܢܸ̈ܐ ܕܠܸܐ ܝܘܸܢ ܗ݇ܘܵܐ ܚܸܙܝܲܝܗܝ ܡܩܲܕ݇ܡ ܥܕܵܢܵܐ

   ܡܨܸܐ ܠܝܼ ܕܚܵܙܸܢ ܠܚܲܒܪܵܐ ܕ"ܙܠܵܦܸ̈ܐ..." ܥܲܠ ܠܘܼܚܵܐ. ܚܲܕ݇ ܚܲܒܪܵܐ ܕܡܝܼܪܵܐ! ܐܵܢܵܐ ܚܝܼܵܐ ܝܘܸܢ ܗ݇ܘܵܐ ܠܡܸܬܚܵܐ ܕܬܡܲܢܝܵܐ ܫܸܢܸ̈ܐ ܘܬܠܵܬ ܝܲܖ̈ܚܸܐ ܓܵܘ ܒܪܝܼܬܵܐ، ܐܝܼܢܵܐ ܟ̰ܘܼ ܓܵܗ ܠܸܐ ܝܘܸܢ ܗ݇ܘܵܐ ܬܦܝܼܩܵܐ ܒܗܿܘ ܚܲܒܪܵܐ. ܡܘܼܕܝܼ ܗ݇ܘܵܐ ܦܘܼܫܵܩܸܗ؟ ܚܲܬܝܼܬܵܐܝܼܬ ܠܸܐ ܗ݇ܘܵܐ ܫܸܡܵܐ ܕܡܵܪܵܐ ܕܒܹܝܬ ܐ݇ܟܼܵܠܵܐ. ܐܝܼܢܵܐ ܠܘܼܚܸ̈ܐ ܡܲܗܲܕܝܵܢܸ̈ܐ ܒܚܲܕ݇ܟܡܵܐ ܫܸܡܵܢܸ̈ܐ ܥܲܠܲܝܗܝ ܟܠ ܥܕܵܢܵܐ ܟܸܐ ܦܵܝܫܝܼ ܬܸܠܝܸ̈ܐ ܠܒܲܕܲܪ ܘܠܵܐ ܥܲܠ ܓܘܼܕܵܢܸ̈ܐ ܓܵܘܵܝܸ̈ܐ

   ܚܘܼܦܸܛܠܝܼ ܕܡܲܦܬܸܠܸܢܵܗܿ ܦܲܐܬܝܼ ܠܓܸܒܵܐ ܕܒܵܒܝܼ ܘܒܘܼܩܸܪܝܼ ܒܚܲܕ݇ ܩܵܠܵܐ ܚܲܝܠܵܢܵܐ: ܦܵܦܵܐ، ܡܘܼܕܝܼ ܝܠܸܗ ܡܲܥܢܵܝܵܐ ܕ"ܙܠܵܦܸ̈ܐ"؟ ܒܵܒܝܼ ܠܵܐ ܫܡܸܥܠܸܗ. ܗܿܘ ܓܲܫܘܼܩܸܐ ܗ݇ܘܵܐ ܥܲܠ ܓ̰ܘܘܼܓ̰ܵܐ ܕܥܵܠܡܵܐ ܘܒܥܲܝܢܘܼܗ̈ܝ ܒܸܥܩܵܒܼܵܐ ܗ݇ܘܵܐ ܠܟܠ ܚܲܕ݇ ܥܵܒܼܘܿܪܵܐ... ܡܼܢ ܥܲܝܢܘܼܗܝ ܪܸܓܼ݇ܫܠܝܼ  ܕܒܵܥܸܐ ܬܲܢܸܐ ܚܲܕ݇ ܡܸܢܕܝܼ ܩܵܐ ܥܵܒܼܘܿܖܸ̈ܐ، ܐܝܼܢܵܐ ܗܿܘ ܚܲܒܪܵܐ ܩܲܛܠܵܢܵܐ ܟ̰ܘܼܢܒܸܠܵܐ ܗ݇ܘܵܐ ܐܲܝܟܼ ܚܲܕ݇ ܛܲܥܢܵܐ ܝܲܩܘܿܪܵܐ ܡܼܢ ܣܸܦܘܵܬܘܼܗܝ ܖ̈ܵܓܘܿܕܸܐ ܘܠܸܐ ܗ݇ܘܵܐ ܡܨܵܝܵܐ ܕ ܫܵܕܸܐ ܗ݇ܘܵܐ (ܦܵܐܸܫ ܗ݇ܘܵܐ ܟ̰ܘܼܡܟ̰ܸܡܵܐ) ܠܒܼܲܕܲܪ. ܗܿܘ ܐܵܦ ܫܩܸܠܸܗ ܚܕܵܐ ܦܵܣܘܿܥܬܵܐ ܒܵܬ݇ܪ ܚܲܕ݇ ܡܼܢ ܥܵܒܼܘܿܖܸ̈ܐ ܘܕܩܸܪܸܗ ܒܒܘܼܬܬܸܗ ܐܝܼܢܵܐ ܟܲܕ ܥܵܒܼܘܿܪܵܐ ܕܸܪܸܗ ܠܓܸܒܵܐ ܕܒܵܒܝܼ، ܒܵܒܝܼ ܐ݇ܡܸܪܸܗ: ܦܲܚܸܠܝܼ، ܒܗܿܝ ܕܓܘܼܫܸܢܵܐ ܗ݇ܘܵܐ ܘܒܬܘܝܼܗܘܼܬܵܐ ܕܸܪܸܗ ܠܒܵܬ݇ܪܵܐ

   ܐܵܢܵܐ ܬܢܸܐ ܠܝܼ "ܦܵܦܵܐ، ܡܘܼܕܝܼ ܝܠܸܗ ܦܘܼܫܵܩܵܐ ܕܙܠܵܦܸ̈ܐ؟" ܘܗܿܘ ܓ̰ܘܼܘܸܒܠܸܗ "ܚܲܕ݇ ܚܲܝܘܵܐ (ܗܲܝܘܵܢ) ܝܠܸܗ... ܕܟܸܐ ܚܵܝܸܐ ܓܵܘ ܝܲܡܵܐ." ܡܸܚܕܵܐ ܨܘܼܠܡܸܢܝܼ ܠܐܵܗ ܚܲܝܘܵܐ ܠܵܐ ܝܕܸܥܝܵܐ ܕܝܲܡܵܐ ܠܟܸܣ ܓܵܢܝܼ... ܚܫܸܒܼܠܝܼ ܕܕܒܸܕ ܗܵܘܸܐ ܚܲܕ݇ ܡܸܢܕܝܼ ܒܸܝܠ ܢܘܼܢܵܐ ܘܟܸܪܫ̰ܵܠܵܐ (ܩܸܪܓ̰ܵܠܵܐ). ܘܒܗܿܝ ܕܡܼܢ ܝܲܡܵܐ ܗ݇ܘܵܐ، ܕܠܵܐ ܫܸܟ ܒܘܼܫܠܸ̈ܐ ܗ݇ܘܵܘ ܚܕܵܐ ܫܘܼܪܒܼܵܐ ܚܲܡܝܼܡܬܵܐ ܕܢܘܼܢܵܐ ܒܝܲܕ ܦܸܠܦܸܠܵܐ ܘܛܲܖ̈ܦܸܐ ܕܥܵܪܵܐ (ܛܲܖ̈ܦܸܐ ܖ̈ܲܝܚܵܢܸ̈ܐ)، ܝܲܢ ܚܕܵܐ ܫܘܼܪܒܼܵܐ ܒܝܲܕ ܚܵܠܵܐ ܘܩܲܠܝܵܐ ܕܢܘܼܢܵܐ ܘܟܲܠܵܡܵܐ، ܝܲܢ ܚܕܵܐ ܟܲܣܟܲܣܬܵܐ ܕܩܲܪܫܵܠܵܐ، ܝܲܢ ܡܘܼܩܪܸܒܼܘܼܗܝ ܗ݇ܘܵܐ ܒܦܸܨܠܵܐ ܕܚܕܵܐ ܡܸܐܟܼܘܿܠܬܵܐ ܩܲܪܝܼܪܬܵܐ ܥܲܡ ܦܘܼܠܸ̈ܐ ܕܛܘܼܪܵܐ ܠܕܸܦܢܸܗ... ܐܵܢܵܐ ܓܲܠܝܵܐܝܼܬ ܨܘܼܠܡܸܢܝܼ ܠܡܲܬ݇ܝܲܝܬܸܗ ܡܼܢ ܫܘܼܩܵܐ، ܕܲܟܼܲܝܬܸܗ ܒܣܘܼܪܗܵܒܼܵܐ، ܡܲܬܲܒܼܬܸܗ ܓܵܘ ܩܘܼܣܲܪܬܵܐ ܒܣܘܼܪܗܵܒܼܵܐ، ܒܣܘܼܪܗܵܒܼܵܐ، ܒܣܘܼܪܗܵܒܼܵܐ، ܒܗܿܝ ܕܟܠܲܝܗܝ ܟܦܝܼܢܸ̈ܐ ܗ݇ܘܵܘ... ܚܲܕ݇ ܟܸܦܢܵܐ ܡܲܙܕܥܵܢܵܐ! ܡܼܢ ܒܸܝܬ ܐ݇ܟܼܵܠܵܐ ܩܸܡܠܸܗ ܪܸܝܚܵܐ ܕܢܘܼܢܵܐ ܫܲܚܝܼܢܬܵܐ ܘܫܘܼܪܒܼܵܐ ܕܟܲܪܫ̰ܵܠܵܐ!                     

   ܪܓܼܸܫܠܝܼ ܕܐܵܗܵܐ ܪܸܝܚܵܐ ܓܲܪܓܘܼܕܸܐ ܗ݇ܘܵܐ ܠܫܲܡܲܚܬܝܼ ܘܠܢܲܚܸܖ̈ܝܵܬܝܼ ܘܒܸܓܼܠܵܒܵܐ ܗ݇ܘܵܐ ܠܟܠܸܗ ܦܲܓܼܪܝܼ... ܒܸܝܬ ܐ݇ܟܼܵܠܵܐ، ܒܵܒܝܼ، ܠܘܼܚܵܐ ܚܘܵܪܵܐ ܘܒܘܼܬܵܬܝܼ... ܟܠܲܝܗܝ ܐܲܢܸܐ ܒܝܵܗܒܼܵܐ ܗ݇ܘܵܘ ܪܸܝܚܵܐ ܕܗܿܘ ܚܲܝܘܵܐ، ܚܲܕ݇ ܗܵܕܟܼܵܐ ܚܲܝܠܵܢܵܐ ܪܸܝܚܵܐ ܕܫܘܼܪܸܐ ܠܝܼ ܠܠܥܵܨܵܐ. ܡܘܼܓ̰ܘܸܓ̰ܲܗܝ ܠܝܼ ܦܲܟ̈ܝܼ ܘܒܠܸܥܠܝܼ ܟܲܕ ܒܸܚܫܵܒܼܵܐ ܕܫܲܪܝܼܪܵܐܝܼܬ ܐܝܼܬ ܗ݇ܘܵܐ ܚܲܕ݇ ܩܸܛܥܵܐ ܡܼܢ ܐܵܗܵܐ ܚܲܝܘܵܐ ܕܝܲܡܵܐ ܓܵܘ ܦܘܼܡܝܼ

   ܐܲܩ̈ܠܝܼ ܪܦܸܐ ܠܗ݇ܘܿܢ ܡܼܢ ܪܸܓܼܫܵܐ ܕܛܘܼܒܼܵܢܘܼܬܵܐ ܕܒܸܪܓܼܵܫܵܐ ܝܘܸܢ ܗ݇ܘܵܐ ܥܲܠܸܗ ܘܕܒܼܸܩܠܝܼ ܡܼܢ ܕܪܵܥܢܵܐ ܕܒܵܒܝܼ ܕܠܵܐ ܢܵܦܠܸܢ، ܘܣܢܸܕܠܝܼ ܥܲܠ ܟܘܿܬܝܼܢܸܗ ܬܲܠܝܼܠܬܵܐ. ܒܵܒܝܼ ܒܸܪܓܵܕܵܐ ܘܪܲܬܪܘܼܬܸܐ ܗ݇ܘܵܐ. ܗܿܘ ܚܲܒܘܼܠܸܐ ܗ݇ܘܵܐ

   ܒܘܼܩܸܪܝܼ "ܦܵܦܵܐ، ܙܠܵܦܸ̈ܐ ܚܲܕ݇ ܐ݇ܟܼܵܠܬܵܐ ܕܨܵܘܡܵܐ ܝܢܵܐ؟" ܒܵܒܝܼ ܐ݇ܡܸܪܸܗ "ܟܸܐ ܐܵܟܼܠܝܼ ܠܗ݇ܘܿܢ ܚܲܝܸ̈ܐ ܚܲܝܸ̈ܐ... ܐܵܢܝܼ ܙܸܐ ܡܐܲܝܟܼ ܩܖ̈ܵܝܸܐ ܓܵܘ ܩܠܵܦܬܵܐ ܝܢܵܐ، ܐܝܼܢܵܐܩܠܵܦܬܲܝܗܝ ܬܪܸܝܢ ܩܸܛܥܵܛܸ̈ܐ ܝܠܵܗܿ." 

   ܡܸܚܕܵܐ ܩܛܸܥܠܸܗ ܗܿܘ ܪܸܝܚܵܐ ܒܲܣܝܼܡܵܐ ܘܛܠܸܩܠܵܗܿ ܗܿܝ ܨܘܼܪܬܵܐ... ܐܵܕܝܼܵܐ ܦܘܼܪܡܝܼܵܐܠܝܼ ܟܠܵܗܿ ܩܸܨܲܬ. ܐܵܢܵܐ ܠܘܼܡܠܸܡܠܝܼ: ܟܡܵܐ ܓܲܢܓܸܙܵܢܬܵܐ! ܟܡܵܐ ܓܲܢܓܸܙܵܢܬܵܐ! ܒܲܣ ܐܵܗܵܐ ܝܠܸܗ ܦܘܼܫܵܩܵܐ ܕܙܠܵܦܸ̈ܐ! ܨܘܼܠܡܸܢܝܼ ܠܟܸܣ ܓܵܢܝܼ ܠܚܲܕ݇ ܐܝܼܬܝܵܐ ܐܲܝܟܼ ܦܸܩܵܐ. ܚܕܵܐ ܦܸܩܵܐ ܝܬܝܼܒܼܬܵܐ ܓܵܘ ܚܕܵ ܩܠܲܦܬܵܐ ܘܡܲܓ̰ܝܘܼܢܸܐ ܡܼܢ ܓܵܘܘܼܗܿ ܒܚܲܕ݇ܟܡܵܐ ܥܲܝܢܸ̈ܐ ܓܘܼܖܸ̈ܐ ܘܡܲܒܖ̈ܩܵܢܸܐ، ܘܡܲܓ̰ܘܘܼܓ̰ܸܐ ܠܦܲܟ̈ܘܼܗܿ ܡܸܬܬܙܝܼܥܵܢܸ̈ܐ. ܨܘܼܠܡܸܢܝܼ ܠܐܵܗܵܐ ܐܝܼܬܝܵܐ ܒܚܲܕ݇ܟܡܵܐ ܟ̰ܲܢܓܘܼܖ̈ܝܵܬܸܐ، ܥܲܝܢܸ̈ܐ ܡܲܒܖ̈ܩܵܢܸܐ ܘܚܲܕ݇ ܓܸܠܕܵܐ ܕܲܒܘܼܩܵܐ... ܡܲܝܬ݇ܘܼܝܸܐ ܡܼܢ ܫܘܼܩܵܐ... . ܐܝܼܡܵܢ ܕܒܲܫܠܵܢܵܐ ܒܚܲܕ݇ ܚܘܼܠܩܵܐ ܟ̰ܘܼܢܒܸܠܵܐ ܘܒܓܲܢܓܲܙܬܵܐ ܫܵܩܸܠ ܠܗܿܘ ܐܝܼܬܝܵܐ ܡܼܢ ܟ̰ܲܢܓܘܼܖ̈ܝܵܬܘܼܗܝ،  ܡܲܬܸܒܼ ܠܸܗ ܓܵܘ ܚܲܕ݇ ܡܵܐܢܵܐ ܘܠܲܒܸܠ ܠܸܗ ܓܵܘ ܬܵܘܵܢܵܐ ܕܐ݇ܟܼܵܠܵܐ، ܟܠܲܝܗܝ ܫܲܒܼܖܸ̈ܐ ܒܸܕ ܛܵܫܝܼ ܠܵܗܿ ܓܵܢܲܝܗܝ. ܓܘܼܖܸ̈ܐ ܒܸܕ ܫܵܩܠܝܼ ܘܐܵܟܼܠܝܼ ܠܸܗ ܚܲܝܵܐ ܒܥܲܝܢܘܼܗ̈ܝ، ܒܟܸܟܘܼܗ̈ܝ، ܒܐܲܩܠܘܼܗ̈ܝ! ܟܲܕ ܗܿܘ ܨܲܪܨܘܼܪܸܐ ܘܒܸܚܦܵܛܵܐ ܕܩܵܪܸܛ ܠܣܸܦܘܵܬܲܝܗ̈ܝ

   ܐܵܢܵܐ ܟ̰ܘܼܢܒܸܠܝܼ ܠܚܘܼܠܩܝܼ ܐܝܼܢܵܐ... ܩܵܡܘܼܕܝܼ ܟܸܟܝܼ̈ ܗܵܕܟܼܵܐ ܒܸܩܝܵܬܵܐ ܗ݇ܘܵܘ ܠܐܘܼܕܵܠܸܐ ܐܲܝܟܼ ܐܸܢ ܕܒܸܐܟܼܵܠܵܐ ܝܘܸܢ ܗ݇ܘܵܐ. ܗܿܘ ܐܝܼܬܝܵܐ، ܓܲܢܓܸܙܵܢܵܐ ܘܡܲܙܕܸܥܵܢܵܐ ܗ݇ܘܵܐ ܐܝܼܢܵܐ ܐܵܢܵܐ ܐ݇ܟܼܸܠܝܼ ܩܵܬܸܗ، ܐ݇ܟܼܸܠܝܼ ܩܵܬܸܗ ܒܝܲܥܢܘܼܬܵܐ، ܟܲܕ ܒܸܙܕܵܥܵܐ ܕܦܵܪܫܸܢ ܠܛܲܥܡܸܗ ܝܲܢ ܠܪܸܝܚܸܗ. ܟܲܕ ܐ݇ܟܼܝܼܠܵܐ ܝܘܸܢ ܗ݇ܘܵܐ ܠܚܲܕ݇، ܚܙܸܐ ܠܝܼ ܠܥܲܝܢܸ̈ܐ ܡܲܒܖ̈ܩܵܢܸܐ ܕܗܿܘ ܕܬܪܸܝܢ، ܕܬܠܵܬ݇... ܐܵܦ ܐܵܢܝܼ ܐ݇ܟܼܝܼܠܲܝܗܝ ܠܝܼ... ܒܚܲܪܬܵܐ ܐ݇ܟܼܸܠܝܼ ܠܣܘܼܦܪܵܐ، ܠܡܵܐܢܵܐ، ܠܓܵܠܘܿܫܸ̈ܐ ܕܒܵܒܝܼ، ܠܠܘܼܚܵܐ ܚܘܵܪܵܐ... ܐ݇ܟܼܸܠܝܼ ܠܟܠ ܡܸܢܕܝܼ ܕܩܲܕ݇ܡ ܥܲܝܢܝܼ ܗ݇ܘܵܐ ܒܗܿܝ ܕܪܓܼܸܫܠܝܼ ܕܟ̰ܘܼ ܡܸܢܕܝܼ ܫܒܼܘܿܩ ܡܼܢ ܐ݇ܟܼܵܠܬܵܐ ܠܸܐ ܡܵܨܸܐ ܕܡܲܪܚܸܩ ܠܡܲܪܥܝܼ. ܙܠܵܦܸ̈ܐ ܓܲܢܓܸܙܵܢܸ̈ܐ ܗ݇ܘܵܘ ܘܐܝܼܬ ܗ݇ܘܵܘ ܠܗ݇ܘܿܢ ܚܕܵܐ ܓܲܫܲܩܬܵܐ ܡܲܙܕܥܵܢܢܵܐ ܓܵܘ ܥܲܝܢܲܝܗܝ. ܪܓܸܕܠܝܼ ܡܼܢ ܬܲܚܡܲܢܬܵܐ ܕܕܝܼܝܲܗܝ، ܐܝܼܢܵܐ ܒܥܸܠܝܼ ܕܐܵܟܼܠܸܢ ܗ݇ܘܵܐ! ܐܵܟܼܠܸܢ ܗ݇ܘܵܐ! 

   ܩܘܼܘܸܚܠܝܼ "ܙܠܵܦܸ̈ܐ! ܗܲܒܼܠܝܼ ܚܲܕ݇ܟܡܵܐ ܙܠܵܦܸ̈ܐ!" ܘܡܘܼܪܝܸܟܼܵܐܠܝܼ ܐܝܼܕܝܼ. ܒܗܿܘ ܪܦܵܦܵܐ ܫܡܸܥܠܝܼ ܕܒܵܒܝܼ ܒܚܲܕ݇ ܩܵܠܵܐ ܡܚܝܼܠܵܐ ܘܪܵܓܘܼܕܵܐ ܐ݇ܡܵܪܵܐ ܝܠܸܗ "ܒܸܢܟܼܵܦܵܐ ܝܘܸܢ ܕܛܵܠܒܸܢ ... ܐܝܼܢܵܐ ܐ݇ܚܸܪ݇ܢ ܠܸܐ ܡܵܨܸܝܢ ܕܒܸܫ ܙܵܘܕܵܐ ܡܼܢ ܐܵܗܵܐ ܡܣܲܝܒܪܸܢ!"                                                              

   ܐܵܢܵܐ ܟܲܕ ܒܸܓܪܵܫܵܐ ܝܘܸܢ ܗ݇ܘܵܐ ܠܫܸܦܘܼܠܸ̈ܐ ܕܟܘܿܬܝܼܢܵܐ ܕܒܵܒܝܼ ܩܘܼܘܸܚܠܝܼ "ܙܠܵܦܸ̈ܐ!"  ܫܡܸܥܠܝܼ ܠܚܲܕ݇ ܩܵܠܵܐ ܕܓܸܚܟܵܐ ܟ̰ܸܡ ܩܘܼܪܒܵܐ ܥܲܠܝܼ ܕܒܸܐܡܵܪܵܐ ܗ݇ܘܵܐ "ܒܵܥܝܸܬ ܬܲܢܸܝܬ ܕܐܲܢ݇ܬ ܟܸܐ ܐܵܟܼܠܸܬ ܙܠܵܦܸ̈ܐ؟ ܚܲܕ݇ ܝܲܠܵܕ݇ܐ ܙܥܘܿܪܵܐ ܐܲܝܟܼ ܕܝܼܘܼܟܼ؟"                                                              

   ܬܪܸܝܢ ܦܲܖ̈ܨܘܿܦܸܐ ܛܲܖ̈ܩܸܐ ܒܟܘܼܣܝܵܬܸ̈ܐ ܖܸ̈ܫܵܝܸܐ، ܟܸܠܝܸ̈ܐ ܗ݇ܘܵܘ ܒܲܪܩܘܼܒܼܠܲܢ، ܓܲܫܘܼܩܸܐ ܗ݇ܘܵܘ ܓܵܘ ܦܲܐܬܝܼ ܘܒܸܓܚܵܟܵܐ ܗ݇ܘܵܘ. ܡܸܢ݇ܕܪܸܫ݇ ܒܘܼܩܸܪܗ݇ܘܿܢ "ܓ̰ܘܲܢܩܵܐ، ܡܸܓ̰ܸܕ ܟܸܐ ܐܵܟܼܠܸܬ ܙܠܵܦܸ̈ܐ؟ ܪܵܒܵܐ ܣܵܘܕܵܢܬܵܐ ܝܠܵܗܿ! ܕܵܐܟܼܝܼ ܟܸܐ ܐܵܟܼܠܸܬ ܠܗ݇ܘܿܢ؟"

ܒܸܕܟܼܵܪܵܐ ܝܘܸܢ ܕܚܕܵܐ ܐܝܼܕܵܐ ܚܲܝܠܵܢܬܵܐ ܓܪܸܫܠܵܗܿ ܩܵܬܝܼ ܠܓܵܘ ܒܸܝܬ ـ ܐ݇ܟܼܵܠܵܐ ܒܲܗܪܵܢܵܐ. ܒܵܬ݇ܪ ܚܲܕ݇ ܪܦܵܦܵܐ، ܚܲܕ݇ ܟܸܢܫܵܐ ܟܸܠܝܵܐ ܗ݇ܘܵܐ ܠܚܲܕܸܪܘܵܢܝܼ ܘܓܲܫܘܼܩܸܐ ܗ݇ܘܵܐ ܥܲܠܝܼ ܒܚܲܕ݇ ܬܲܦܬܲܫܬܵܐ (ܪܸܓܼܫܵܐ ܕܣܢܝܼܩܘܼܬܵܐ ܠܝܕܵܥܬܵܐ) ܘܒܘܼܣܵܡܵܐ. ܝܬܸܒܼܠܝܼ ܒܵܬ݇ܪ ܚܲܕ݇ ܦܵܬܘܿܪܵܐ ܘܐ݇ܟܼܸܠܝܼ ܚܲܕ݇ ܡܸܢܕܝܼ ܠܸܟ̰ܵܐ، ܡܸܠܚܵܢܵܐ ܘܒܚܲܕ݇ ܛܲܥܡܵܐ ܕܪܲܛܝܼܒܼܘܼܬܵܐ ܘܬܸܦܢܵܐ. ܐ݇ܟܼܸܠܝܼ ܒܝܲܥܢܘܼܬܵܐ ܘܕܠܵܐ ܠܥܵܣܬܵܐ، ܕܠܵܐ ܓܲܫܲܩܬܵܐ ܘܕܠܵܐ ܟ̰ܲܠܲܫܬܵܐ ܠܦܲܪܡܘܼܝܸܐ ܕܡܘܼܕܝܼ ܝܘܸܢ ܗ݇ܘܵܐ ܒܸܐܟܼܵܠܵܐ. ܒܸܚܫܵܒܼܵܐ ܝܘܸܢ ܗ݇ܘܵܐ ܕܐܸܢ ܦܵܬܚܸܢܗ݇ܘܿܢ ܥܲܝܢܝܼ ܒܸܕ ܚܵܙܸܝܢ ܠܥܲܝܢܸ̈ܐ ܡܲܒܖ̈ܩܵܢܸܐ، ܛܸܦܖ̈ܵܬܸܐ ܘܟܲܟܸ̈ܐ ܚܲܖ̈ܝܼܦܸܐ

   ܡܸܢܫܸܠܬܵܢܸܐ ܫܘܼܪܸܐ ܠܝܼ ܒܸܩܪܵܛܵܐ ܠܚܲܕ݇ ܡܸܢܕܝܼ ܩܸܘܝܵܐ ܘܐ݇ܬܸܐ ܠܸܗ ܩܵܠܵܐ ܕܩܲܪܡܲܫܬܵܐ. ܓܚܸܟܠܸܗ ܗܿܘ ܟܢܘܼܫܝܵܐ "ܗܵܐ، ܗܵܐ! ܒܸܐܟܼܵܠܵܐ ܝܠܸܗ ܠܩܠܲܦܬܵܐ. ܒܸܚܫܵܒܼܵܐ ܝܘܸܬ ܕܟܸܐ ܡܵܨܸܝܬ ܐܵܟܼܠܸܬ ܠܵܗܿ ܝܵܐ ܣܲܟܼܠܵܐ ܙܥܘܿܪܵܐ؟"

   ܒܵܬ݇ܪ ܗܵܕܵܐ ܒܸܕܟܼܵܪܵܐ ܝܘܸܢ ܠܚܲܕ݇ ܨܲܗܘܵܐ ܡܲܙܕܸܥܵܢܵܐ. ܝܪܝܼܟܼܵܐ ܝܘܸܢ ܗ݇ܘܵܐ ܥܲܠ ܬ݇ܫܘܝܼܬܝܼ ܘܡܼܢ ܩܝܘܼܕܵܐ ܕܣܛܘܼܡܟܝܼ ܘܚܲܕ݇ ܛܲܥܡܵܐ ܣܸܪܝܵܐ ܕܓܵܘ ܦܘܼܡܝܼ ܒܪܝܼܙܵܐ، ܠܸܐ ܝܘܸܢ ܗ݇ܘܵܐ ܡܨܵܝܵܐ ܕܕܵܡܟܼܸܢ ܗ݇ܘܵܐ. ܒܵܒܝܼ ܒܸܐܙܵܠܵܐ ܘܒܸܐܬܵܝܵܐ ܗ݇ܘܵܐ ܘܒܡܲܓ̰ܘܲܟ̰ܬܵܐ ܕܪܸܫܸܗ ܘܐܝܼܕܘܼܗ̈ܝ ܗܲܡܙܘܼܡܸܐ ܗ݇ܘܵܐ ܩܵܐ ܓܵܢܸܗ

   ܗܿܘ ܠܲܡܠܘܼܡܸܐ ܗ݇ܘܵܐ ܬܚܘܼܬ ܣܸܦܘܵܬܘܼܗܝ "ܒܸܚܫܵܒܼܵܐ ܝܘܸܢ ܕܩܲܪܬܵܐ ܡܚܝܼܬܝܼ ܝܠܵܗܿ. ܬܲܢܸܝܬ ܚܲܕ݇ ܐ݇ܢܵܫܵܐ ܝܬܝܼܒܼܵܐ ܝܠܸܗ ܥܲܠ ܪܸܫܝܼ... ܩܵܘܡܵܐ ܥܸܠܬܘܼܗܿ ܐܵܗܵܐ ܝܠܵܗܿ ܕܐܸܕܝܘܿܡ ܠܸܐ ܝܘܸܢ ܐ݇ܟܼܝܼܠܵܐ ܟ̰ܘܼ ܡܸܢܕܝܼ... ܡܸܓ̰ܸܕ ܚܲܕ݇ ܐܝܼܬܝܵܐ ܣܲܟܼܠܵܐ ܝܘܸܢ... ܚܸܙܝܲܝܗܝ ܠܝܼ ܐܵܢܝܼ ܐ݇ܢܵܫܸ̈ܐ ܛܲܖ̈ܩܸܐ ܕܦܘܼܪܸܥܠܗ݇ܘܿܢ ܥܸܣܪܵܐ ܪܘܼܒܠܸ̈ܐ ܩܵܐ ܙܠܵܦܸ̈ܐ. ܩܵܡܘܼܕܝܼ ܠܵܐ ܪ݇ܚܸܫܠܝܼ ܠܩܲܕ݇ܡܵܐ ܕܛܵܠܒܸܢ... ܕܝܵܗܒܼܝܼ ܠܝܼ ܚܲܕ݇ ܡܸܢܕܝܼ ܒܕܲܝܢܵܐ؟ ܐܵܢܝܼ ܒܸܕ ܗܵܘܝܼ ܗ݇ܘܵܘ ܝܘܼܗ݇ܒܼܸܐ ܚܲܕ݇ ܡܸܢܕܝܼ."

   ܩܘܼܪܒܵܐ ܠܨܲܦܪܵܐ، ܛܠܸܐ ܠܝܼ ܘܒܚܸܠܡܝܼ ܚܙܸܐ ܠܝܼ ܚܕܵܐ ܦܸܩܵܐ ܝܬܝܼܒܼܬܵܐ ܓܵܘ ܚܕܵܐ ܩܠܲܦܬܵܐ، ܡܲܓ̰ܘܘܼܓ̰ܸܐ ܠܥܲܝܢܘܼ̈ܗܿ. ܒܦܲܠܓܵܐ ܕܝܵܘܡܵܐ ܪܥܸܫܠܝܼ ܡܼܢ ܨܲܗܘܵܐ ܘܛܘܼܥܸܐܠܝܼ ܒܵܬ݇ܪ ܒܵܒܝܼ: ܗܵܘ ܗܵܠܵܐ ܒܸܐܣܵܩܵܐ ܘܒܸܨܠܵܝܵܐ ܗ݇ܘܵܐ ܘܗܲܡܙܘܼܡܸܐ ܗ݇ܘܵܐ ܩܵܐ ܓܵܢܸܗ 

            ܦܘܫܩܐ ܡܼܢ ܠܫܢܐ ܐܢܓܠܝܣܢܝܐ ܒܝܕ: ܫܡܝܪܡ ܕ.ܦܘܼܪܝܐܢ