ܡܬܠ̈ܐ ܐܬܘܖ̈ܝܐ

ܫܡܝܪܡ ܕܘܝܕܦܘܪܝܐܢ

ܢ

܀ ܢܲܗܪܵܐ ܟܠ ܥܕܵܢܵܐ ܓܘܼܓ̰ܸ̈ܐ ܠܸܐ ܡܲܬ݇ܝܸܐ.

ܦܘܼܫܵܩܵܐ: ܚܲܝܘܼܬܵܐ ܟܠ ܥܕܵܢܵܐ ܠܸܐ ܗܵܘܝܵܐ ܐܲܝܟܼ ܨܸܒܼܝܵܢܲܢ. ܗܲܪ ܡܐܲܝܟܼ ܢܲܗܪܵܐ ܕܚܲܕ݇ܟܡܵܐ ܥܕܵܢܵܬܸ̈ܐ ܓܘܼܓ̰ܸ̈ܐ ܟܸܐ ܡܲܬ݇ܝܵܐ ܘܚܲܕ݇ܟܡܵܐ ܥܕܵܢܵܬܸ̈ܐ ܙܸܐ ܠܸܐ ܡܲܬ݇ܝܵܐ، ܒܚܲܝܘܼܬܵܐ ܙܸܐ ܐܝܼܬ ܥܕܵܢܵܬܸ̈ܐ ܨܦܵܝܝܼ ܘܗܲܪ ܗܵܕܟܼܵܐ ܐܝܼܬ ܥܕܵܢܵܬܸ̈ܐ ܕܥܵܘܩܵܢܵܐ. 

܀ ܢܲܚܝܼܪܵܐ ܡܼܢ ܦܲܐܬܵܐ ܠܸܐ ܩܵܛܥܝܼ ܠܸܗ.

ܦܘܼܫܵܩܵܐ: ܡܲܕܘܼܥܸܐ ܝܠܸܗ ܕܟܲܕ ܒܸܟܪܵܒܵܐ ܝܘܲܚ ܝܲܢ ܠܸܒܲܢ ܦܝܵܫܵܐ ܝܠܸܗ ܡܼܢ ܚܲܕ݇ ܦܲܪܨܘܿܦܵܐ، ܠܸܐ ܚܵܫܚܵܐ ܕܩܲܛܥܲܚ ܠܸܗ ܡܸܢܘܼܗܝ ܝܣܘܼܪܲܢ ܒܗܿܝ ܕܒܸܕ ܩܲܒܠܲܚ ܙܝܵܢܵܐ ܗܲܪ ܐܲܝܟܼ ܗܿܝ ܥܕܵܢܵܐ ܕܢܲܚܝܼܪܵܐ ܡܼܢ ܦܲܐܬܵܐ ܩܵܛܸܥ ܦܲܐܬܵܐ ܒܸܕ ܦܲܪܦܸܣܵܐ.

܀ ܢܝܼܪܘܼܗܝ ܪܵܒܵܐ ܝܲܩܘܼܪܵܐ ܝܠܸܗ.

ܦܘܼܫܵܩܵܐ: ܐܝܼܬ ܠܸܗ ܚܕܵܐ ܡܸܫܬܲܐܠܵܢܘܼܬܵܐ ܓܘܼܪܬܵܐ ܕܐܲܝܟܼ ܚܲܕ݇ ܛܲܥܢܵܐ ܝܲܩܘܼܪܵܐ ܝܠܸܗ ܒܸܩܕܵܠܘܼܗܝ

ܣ

܀ ܣܵܒܼܬܵܐ ܠܵܐ ܡܲܙܕܸܥ ܠܵܗܿ ܡܼܢ ܦܵܘܚܵܐ ܕܟܸܪ݇ܣܵܐ.

ܦܘܼܫܵܩܵܐ: ܠܸܐ ܗܵܘܝܵܐ ܡܲܙܕܘܼܥܸܐ ܠܚܲܕ݇ ܐ݇ܢܵܫܵܐ ܡܼܢ ܚܲܕ݇ ܡܸܢܕܝܼ ܕܓܵܢܘܼܗܝ ܚܒܝܼܪܵܐ ܝܠܸܗ ܓܵܘܘܼܗܝ. ܩܵܐ ܛܘܼܦ̰ܣܵܐ ܚܲܕ݇ ܐ݇ܢܵܫܵܐ ܦܲܠܵܫܵܐ ܠܸܐ ܙܵܕܸܥ ܡܼܢ ܦܠܵܫܵܐ

܀ ܣܘܝܼܢܸ̈ܐ ܥܒܼܸܖ̈ܗ݇ܘܿܢ ܓܵܘ ܠܸܒܝܼ.

ܦܘܼܫܵܩܵܐ: ܠܸܒܝܼ ܡܠܸܐ ܠܸܗ ܡܼܢ ܚܲܫܵܐ ܕܡܲܪܥܘܼܗܿ ܗܵܕܟܼܵܐ ܚܲܝܠܵܢܵܐ ܝܠܸܗ ܕܒܸܕܡܵܝܵܐ ܝܠܸܗ ܥܲܠ ܡܲܪܥܵܐ ܕܥܒܼܵܪܬܵܐ ܕܣܘܝܼܢܸ̈ܐ (ܣܬܘܼܢܸ̈ܐ) ܓܵܘ ܠܸܒܵܐ

܀ ܣܘܼܠܬܵܐ ܠܸܐ ܒܲܠܒܝܼ ܠܵܗܿ، ܪܲܝܚܘܼܗܿ ܒܸܕ ܐܵܬܸܐ.

ܦܘܼܫܵܩܵܐ: ܚܲܕ݇ ܦܸܨܠܵܐ ܙܘܼܗܵܪܵܐ ܝܠܸܗ ܩܲܕ ܪܵܒܵܐ ܠܵܐ ܐܵܙܠ݇ܝܼ ܒܵܬ݇ܪ ܚܲܒܪܵܐ ܒܗܿܝ ܕܒܸܕ ܓܵܠܸܐ ܟܠܸܗ ܗܿܘ ܡܸܢܕܝܼ ܕܛܸܫܝܵܐ ܗ݇ܘܵܐ

܀ ܣܘܼܣܬܵܐ ܡܼܢ ܬ݇ܚܘܼܬ ܡܵܪܘܼܗܿ ܟܸܐ ܗܲܪܗܸܪܵܐ.

ܦܘܼܫܵܩܵܐ: ܐܸܢ ܚܲܕ݇ ܐ݇ܢܵܫܵܐ ܡܲܫܟ̰ܘܼܚܸܐ ܝܠܸܗ ܠܒܼܝܼܒܘܼܬܵܐ (ܓ̰ܘܼܪܐܲܬ) ܕܐܲܩܠܘܼܗܝ ܦܵܫܸܛ ܠܵܗܿ ܒܸܫ ܙܵܘܕܵܐ ܡܼܢ ܦܪܝܼܣܬܘܼܗܝ ܟܸܐ ܡܲܦܠܸܚܝܼ ܠܸܗ ܐܵܗܵܐ ܡܲܬܠܵܐ ܩܵܐ ܕܡܲܕܥܝܼ ܕܐܝܼܬ ܚܲܕ݇ ܚܲܝܠܵܐ ܓܘܼܪܵܐ ܒܵܬ݇ܪ ܚܵܨܘܼܗܝ ܕܒܸܣܢܵܕܘܼܗܝ ܝܠܸܗ

܀ ܣܵܝܒܼܸܢ ܗ݇ܘܵܐ ܚܵܩܪܸܢ ܗ݇ܘܵܐ؛ ܡܵܝܬܸܢ ܗ݇ܘܵܐ ܚܵܠܸܝܢ ܗ݇ܘܵܐ.

ܦܘܼܫܵܩܵܐ: ܒܘܼܬ ܐ݇ܢܵܫܸ̈ܐ ܣܵܒܼܸ̈ܐ ܝܠܸܗ ܕܟܸܐ ܚܵܩܪܝܼ ܡܼܢ ܓܵܢܲܝܗܝ.

܀ ܣܸܟܬܘܼܗܝ ܡܸܚܝܘܼܗܿ ܝܢܵܐ.

ܦܘܼܫܵܩܵܐ: ܣܵܛܵܢܘܼܬܵܐ ܕܚܲܕ݇ ܐ݇ܢܵܫܵܐ ܥܒܼܝܼܕܘܼܗܿ ܝܢܵܐ ܘܒܘܼܬ ܗܵܕܵܐ ܫܘܼܓܼ݇ܠܘܼܗܝ ܚܪܝܼܒܼܵܐ ܝܠܸܗ

܀ ܚܡܵܛܝܼ ܒܪܸܫܝܼ ܝܠܵܗܿ.

ܦܘܼܫܵܩܵܐ: ܗܕܝܼܪܬܵܐ ܝܘܵܢ ܘܠܲܝܬ ܠܝܼ ܚܲܕ݇ ܡܲܟܠܵܝܬܵܐ ܩܵܐ ܫܩܵܠܬܵܐ ܕܚܕܵܐ ܦܵܣܘܿܥܬܵܐ ܝܲܢ ܥܒܼܵܕܬܵܐ ܕܚܲܕ݇ ܫܘܼܓܼ݇ܠܵܐ

ܥ

܀ ܥܸܐܕܵܐ ܙܥܘܿܪܵܐ ܟܸܐ ܐܵܬܸܐ ܡܼܢ ܩܲܕ݇ܡ ܥܸܐܕܵܐ ܓܘܼܪܵܐ.

ܦܘܼܫܵܩܵܐ: ܐܝܼܡܲܢ ܕܚܲܕ݇ ܝܲܠܵܕ݇ܐ ܝܲܢ ܒܪܵܬܵܐ ܓܵܒܼܪܝܼ ܡܼܢ ܩܲܕ݇ܡ ܐܲܚܘܿܢܲܝܗܝ ܝܲܢ ܚܵܬܲܝܗܝ ܒܘܼܫ ܓܘܼܖܸ̈ܐ، ܐ݇ܢܵܫܸ̈ܐ ܟܸܐ ܡܲܦܠܸܚܝܼ ܠܸܗ ܐܵܗܵܐ ܡܲܬܠܵܐ ܩܵܐ ܡܸܬܩܲܒܠܵܢܘܼܬܵܐ (ܡܲܩܒܲܠܬܵܐ) ܕܫܘܼܓܼ݇ܠܲܝܗܝ 

܀ ܥܒܼܘܿܕ ܐܸܪܘܵܢܵܐ ܩܵܐ ܟܲܠܒܵܐ ܓܸܪܒܼܢܵܐ.

ܦܘܼܫܵܩܵܐ: ܡܼܢ ܥܒܼܵܕܬܵܐ ܕܛܵܒܼܬܵܐ ܩܵܐ ܚܲܕ݇ ܐ݇ܢܵܫܵܐ ܣܸܪܝܵܐ ܠܲܝܬ ܚܲܕ݇ ܝܘܼܬܪܵܢܵܐ ܒܗܿܝ ܕܗܿܘ ܡܐܲܝܟܼ ܟܲܠܒܵܐ ܓܸܪܒܼܵܢܵܐ ܒܸܕ ܕܵܐܸܪ ܘܢܵܗܸܣ ܠܗܿܘ ܕܗܘܼܝܸܪܘܼܗܝ ܝܠܸܗ.

܀ ܥܘܼܡܪܵܐ ܚܲܝܠܵܢܵܐ ܬܪܸܝܢ، ܬܠܵܬ݇ ܓܵܗܸ̈ܐ ܟܸܐ ܐܵܙܠ݇ܝܼ ܠܙܝܵܪܬܘܼܗܝ.

ܦܘܼܫܵܩܵܐ: ܟܠ ܚܲܕ݇ ܕܚܲܝܠܵܢܵܐ ܐܵܬܸܐ ܩܲܕ݇ܡ ܐ݇ܚܸܖ̈݇ܢܸܐ، ܒܸܕ ܙܵܕܥܝܼ ܡܸܢܘܼܗܝ ܘܒܸܕ ܫܵܠܡܝܼ ܥܲܠܘܼܗܝ

܀ ܥܸܙܝܼܬܵܐ ܕܪܸܐ ܠܵܗܿ ܗܵܘܵܖܸ̈ܐ ܕܐܸܫܵܐ ܕܘܲܥܢܵܐ ܓܠܝܼܬܵܐ ܝܠܵܗܿ.

ܦܘܼܫܵܩܵܐ: ܚܲܕ݇ܟܡܵܐ ܐ݇ܢܵܫܸ̈ܐ ܟܸܐ ܗܲܡܙܸܡܝܼ ܒܘܼܬ ܒܘܼܨܵܖܸ̈ܐ ܕܐ݇ܚܸܖ̈݇ܢܸܐ ܟܲܕ ܒܘܼܨܵܖܸ̈ܐ ܕܓܵܢܲܝܗܝ ܒܸܫ ܪܵܒܵܐ ܝܢܵܐ  

܀ ܥܲܝܢܝܼ ܡܝܼܵ̈ܐ ܠܸܐ ܝܠܵܗܿ ܒܸܫܬܵܝܵܐ.

ܦܘܼܫܵܩܵܐ: ܠܲܝܬ ܠܝܼ ܗܸܒܼܝܼ ܕܦܸܠܵܢ ܫܘܼܓܼ݇ܠܵܐ ܐܵܬܸܐ ܒܪܸܫܵܐ.

܀ ܥܲܠ ܚܲܒܼܠܘܼܗܝ ܩܲܖ̈ܫܸܐ ܠܸܐ ܗܵܘܝܵܐ ܡܲܬܘܼܒܼܸܐ.

ܦܘܼܫܵܩܵܐ: ܠܸܐ ܗܵܘܝܵܐ ܚܵܨܵܐ ܝܣܵܪܵܐ ܠܦܸܠܵܢ ܐ݇ܢܵܫܵܐ ܒܗܿܝ ܕܠܸܐ ܝܠܸܗ ܡܗܘܼܡܢܵܐ ܘܩܵܘܡܵܐ ܕܫܵܒܼܸܩ ܠܸܐ ܐ݇ܢܵܫܵܐ ܒܝܸܬ ܦܲܠܓܵܐ ܕܐܘܼܪܚܵܐ  

܀ ܥܲܠ ܚܡܵܪܵܐ ܓܪܸܫܠܗ݇ܘܿܢ ܦܪܘܼܬܵܐ ܕܐܲܪܝܵܐ، ܟܠܲܝܗܝ ܚܲܝܘܵܬܸ̈ܐ ܙܕܸܥܠܗ݇ܘܿܢ ܡܸܢܘܼܗܝ ܘܓܪܸܫܠܗ݇ܘܿܢ ܠܡܲܪܙܵܐ؛ ܓܘܼܫܸܩܠܸܗ ܠܐܵܗ ܓܸܒܵܐ، ܠܗܿܘ ܓܸܒܵܐ ܘܙܘܼܪܙܸܪܸܗ  

ܦܘܼܫܵܩܵܐ: ܟܡܵܐ ܕܚܲܕ݇ ܐ݇ܢܵܫܵܐ ܡܲܚܙܸܐ ܠܵܗܿ ܓܵܢܘܼܗܝ ܒܸܫ ܥܸܠܵܝܵܐ ܘܒܸܫ ܫܲܦܝܼܪܵܐ ܡܼܢ ܗܿܘ ܕܝܼܠܸܗ ܫܲܪܝܼܪܵܐܝܼܬ، ܐܝܼܢܵܐ ܚܲܕ݇ ܝܵܘܡܵܐ ܐܝܼܕܘܼܗܝ ܒܸܕ ܦܵܝܫܵܐ ܕܒܼܝܼܩܬܵܐ ܘܒܸܕ ܦܵܐܸܫ ܓܸܠܝܵܐ ܫܪܵܪܘܼܗܝ

܀ ܥܲܠ ܢܵܬܵܐ ܕܢܘܼܢܵܐ ܠܸܐ ܝܘܲܚ ܕܡܝܼܟܼܸ̈ܐ.

ܦܘܼܫܵܩܵܐ: ܐܝܼܡܲܢ ܕܫܵܡܥܝܼ ܚܲܕ݇ ܚܲܒܪܵܐ ܚܲܕ݇ܬܵܐ ܟܸܐ ܡܲܦܠܸܚܝܼ ܠܸܗ ܐܵܗܵܐ ܡܲܬܠܵܐ ܩܵܐ ܡܲܕܲܥܬܵܐ ܕܥܘܼܓ̰ܵܒܲܝܗܝ ܒܘܼܬ ܐܵܗܵܐ ܕܕܵܐܟܼܝܼ ܗܲܠ ܗܿܝ ܥܕܵܢܵܐ ܠܸܗ ܝܢܵܐ ܫܡܝܼܥܘܼܗܝ ܗܿܘ ܚܲܒܪܵܐ

܀ ܥܸܠܸܠ ܠܲܝܬܠܗ݇ܘܿܢ ܕܘܼܟܵܐ، ܐܸܠܬܸܚܬ݇ ܙܸܐ ܠܸܐ ܝܵܬܒܼܝܼ.

ܦܘܼܫܵܩܵܐ: ܚܲܕ݇ܟܡܵܐ ܐ݇ܢܵܫܸ̈ܐ ܕܪܵܒܵܐ ܟܸܐ ܚܵܫܒܼܝܼ ܒܓܵܢܲܝܗܝ ܘܠܸܐ ܪܵܕܝܼ ܒܐ݇ܢܵܫܲܝܗܝ ܘܒܚܸܙܡܵܢܲܝܗܝ، ܐܝܼܢܵܐ ܟܲܕ ܠܸܐ ܝܢܵܐ ܪܵܒܵܐ ܦܖ̈ܝܼܫܸܐ ܡܸܢܲܝܗܝ ܠܸܐ ܦܵܝܫܝܼ ܩܘܼܒܠܸ̈ܐ ܒܐܵܢܝܼ ܒܸܫ ܥܸܠܵܝܸ̈ܐ ܘܗܵܕܟܼܵܐ ܡܼܢ ܬܪܸܝܢ ܓܸܒܵܢܸ̈ܐ ܟܸܐ ܦܵܝܫܝܼ ܛܖ̈ܝܼܕܸܐ

܀ ܥܲܦܪܵܐ ܓܵܘ ܦܘܼܡܝܼ، ܒܸܣܡܵܐ ܓܵܘ ܡܵܪܝ ܝܘܼܚܲܢܵܐ.

ܦܘܼܫܵܩܵܐ: ܠܲܝܬ ܚܲܕ݇ ܝܘܼܬܪܵܢܵܐ ܡܼܢ ܐܵܗܵܐ ܫܘܼܓܼ݇ܠܵܐ. ܐܵܗܵܐ ܟܸܐ ܡܲܦܠܸܚܝܼ ܠܸܗ ܐܝܼܡܲܢ ܕܚܲܕ݇ ܐ݇ܢܵܫܵܐ ܗܵܘܸܐ ܫܩܝܼܠܵܐ ܚܕܵܐ ܦܵܣܘܿܥܬܵܐ ـ ܩܵܐ ܛܘܼܦ̰ܣܵܐ ܗܵܘܸܐ ܗ݇ܘܝܼܵܐ ܫܲܪܝܼܟܵܐ ܥܲܡ ܚܲܕ݇ ܐ݇ܢܵܫܵܐ ـ ܐܝܼܢܵܐ ܠܵܐ ܡܵܨܸܐ ܕܫܵܩܸܠ ܝܘܼܬܪܵܢܵܐ ܡܸܢܘܼܗܿ. 

܀ ܥܲܩܘܼܒܪܵܐ ܠܸܐ ܗ݇ܘܵܐ ܥܒܼܵܪܵܐ ܒܒܸܙܥܵܐ، ܚܕܵܐ ܫܸܪܓܸܡܬܵܐ ܙܸܐ (ܫܸܠܓܸܡܬܵܐ) ܬܘܼܢܕܸܠܸܗ ܒܛܘܼܦܪܘܼܗܝ.

ܦܘܼܫܵܩܵܐ: ܟܸܐܡܲܦܠܸܚܝܼ ܠܸܗ ܐܵܗܵܐ ܡܲܬܠܵܐ ܐܝܼܡܲܢ ܕܚܲܕ݇ ܐ݇ܢܵܫܵܐ ܕܒܓܵܢܸܗ ܐܝܼܬ ܠܸܗ ܟܸܬܖܸ̈ܐ ܒܚܲܝܘܼܬܸܗ، ܚܵܦܸܛ ܕܫܵܩܸܠܸܗ ܝܘܼܩܪܵܐ ܕܐ݇ܚܸܖ̈݇ܢܸܐ ܙܸܐ 

܀ ܥܸܪܒܝܼܬܵܐ ܐܝܼܡܲܢ ܕܡܵܘܬܘܼܗܿ ܡܵܛܸܐ ܠܲܚܡܵܐ ܕܪܵܥܝܵܐ ܟܸܐ ܐܵܟܼܠܵܐܠܸܗ.

ܦܘܼܫܵܩܵܐ: ܡܲܕܘܼܥܸܐ ܝܠܸܗ ܕܦܸܠܵܢ ܐ݇ܢܵܫܵܐ ܚܲܕ݇ ܫܘܼܓܼ݇ܠܵܐ ܥܒܼܵܕܵܐ ܝܠܸܗ ܕܠܵܐ ܫܸܟ ܒܸܕ ܗܵܘܸܐ ܠܸܙܝܵܢܘܼܗܝ. ܚܲܕ݇ ܡܲܬܠܵܐ ܐ݇ܚܸܪ݇ܢܵܐ ܒܐܵܗܵܐ ܦܘܼܫܵܩܵܐ ܝܠܸܗ: ܪܸܫܘܼܗܝ ܒܸܚܝܵܟܵܐ ܝܠܸܗ 

܀ ܥܸܪܒܝܼܬܵܐ ܐܝܼܡܲܢ ܕܐܵܓ̰ܲܠܘܼܗܿ ܡܵܛܸܐ ܟܸܐ ܐܵܙܵܠ݇ܐ ܘܪܸܫܘܼܗܿ ܟܸܐ ܫܵܝܦܵܐ ܠܸܗ ܥܲܠ ܣܟܝܼܢܬܵܐ ܕܩܲܨܵܒܼܵܐ

ܦܘܼܫܵܩܵܐ: ܐܲܝܟܼ ܡܲܬܠܵܐ ܕܥܸܠܸܠ ܝܠܸܗ.

܀ ܥܲܪܲܩ ܘܚܲܡܪܵܐ ܠܡܲܖ̈ܙܵܢܝܼ، ܒܲܝܬܵܐ ܦܝܼܫܵܐ ܩܵܐ ܓܵܢܝܼ.

ܦܘܼܫܵܩܵܐ: ܬܲܢܝܵܢܵܐ ܡܲܕܘܼܥܸܐ ܝܠܸܗ ܕܟܠ ܡܸܢܕܝܼ ܐܲܝܟܼ ܠܸܒܘܼܗܝ ܝܠܸܗ ܘܠܲܝܬ ܠܸܗ ܟ̰ܘܼ ܒܘܼܨܵܪܵܐ

                                     ܥܩܦܬܐ ܒܡܢܝܢܐ ܕܥܬܝܼܕ