ܕܐܟܼܝܠܐ ܡܝܬܠܝ!

ܫܡܥܘܢ ܒܝܬ ܐܝܼܫܘ

   ܒܵܒܝܼ ܚܲܕ݇ ܢܲܓܵܪܵܐ ܗ݇ܘܵܐ ܕܡܵܬܵܐ. ܐܝܼܡܲܢ ܕܦܪܝܼܩܠܲܢ ܡܼܢ ܡܲܕܪܲܫܬܵܐ ܕܡܵܬܵܐ، ܩܵܐ ܕܗܵܘܲܚ ܗ݇ܘܵܐ ܩܲܖ̈ܝܵܢܸܐ، ܠܘܼܒܠܲܚ ܠܸܗ ܠܡܕܝܼܢ݇ܬܵܐ ܕܩܵܪܲܚ ܒܡܲܕܪܲܫܬܵܐ ܡܸܨܥܵܝܬܵܐ. ܬܵܡܵܐ ܒܥܵܠܘܿܠܵܐ ܕܝܗܘܼܕܵܝܸ̈ܐ ܕܒܼܝܼܩܠܲܢ ܚܕܵܐ ܐܘܿܬܵܓܼ ܓܘܼܪܬܵܐ. ܫܘܼܘܸܐܠܲܢ ܟܡܵܐ ܗܲܣܝܼܖܸ̈ܐ ܥܲܡ ܚܕܵܐ ܦܪܝܼܣܬܵܐ ܥܲܬܝܼܩܬܵܐ ܠܐܲܪܥܵܐ ܕܐܘܿܬܵܓܼ ܘܩܵܐ ܕܡܵܟܼܬܲܢ ܙܸܐ ܟܡܵܐ ܬܲܚܬܸ̈ܐ ܩܕܝܼܚܲܝܗܝ ܠܸܗ ܒܵܒܝܼ ܠܸܚܕܵܕܸܐ ܘܬܘܼܪܸܨܠܸܗ ܚܕܵܐ ܩܵܪܵܘܵܬ ܕܬܪܸܝܢ ܛܲܒܵܩܸ̈ܐ، ܥܸܠܸܠ ܩܵܬܝܼ ܘܐܸܠܬܸܚܬ݇ ܩܵܐ ܐܵܚܘܿܢܝܼ. ܩܵܐ ܐ݇ܟܼܵܠܬܵܐ، ܫܬܵܝܬܵܐ، ܚܝܵܦܵܐ ܘܡܣܵܝܵܐ ܙܸܐ ܣܘܼܦܝܲܢ ܗ݇ܘܵܐ ܒܣܲܪܵܐ ܚܵܢܸܡ ܝܗܘܼܕܵܝܬܵܐ ܕܝܼܗ݇ܘܵܐ ܒܪܵܬܵܐ ܕܚܲܕ݇ ܡܼܢ ܖ̈ܵܚܡܘܼܗܝ ܕܚܝܼܸ̈ܐ ܗ݇ܘܵܘ ܡܸܚܕܵܕܸܐ ܒܐܘܼܪܘܼܣܸܬ (ܪܘܼܣܝܼܵܐ) ܘܬܸܦܠܝܼܣ ܕܓ̰ܘܿܪܓ̰ܝܼܵܐ.

   ܒܡܲܕܪܲܫܬܵܐ ܡܸܨܥܵܝܬܵܐ ܝܵܠܸ̈ܐ ܒܸܫ ܙܵܘܕܵܐ ܥܲܝܢܲܝܗܝ ܟܸܐ ܗܵܘܝܼ ܦܬܝܼܚܸ̈ܐ. ܝܵܠܸ̈ܐ ܕܐܘܼܪܡܝܼ ܙܸܐ ܥܲܝܢܵܐ ܕܐܲܠܵܗ ܥܲܠܲܝܗܝ، ܟܠ ܚܲܕ݇ ܡܼܢ ܒܲܝܬܵܐ ܦܠܝܼܛܸ̈ܐ ܠܵܐ ܦܠܝܼܛܸ̈ܐ، ܩܵܐ ܓܵܢܲܝܗܝ ܟܸܐ ܦܵܖ̈ܫܝܼ ܗ݇ܘܵܘ ܚܲܒܼܪܬܵܐ. ܐܝܼܢܵܐ ܐܲܚܢܲܢ ܡܸܤܟܸܢܸ̈ܐ ܡܼܢ ܡܵܬܵܐ ܦܠܝܼܛܸ̈ܐ، ܡܵܢܝܼ ܗ݇ܘܵܐ ܗܿܝ ܒܪܵܬܵܐ ܕܦܲܪܸܓ̰ܵܐ ܗ݇ܘܵܐ ܥܲܠܲܢ؟ ܐܵܢܵܐ ܘܚܘܼܢܝܼ ܙܸܐ ܒܟܠܲܝܗܝ ܕܲܖ̈ܣܵܬܲܢ ܐܲܚܟ̰ܝܼ ܡܼܢ ܛܘܼܦ̰ܣܸ̈ܐ ܪܸܫܵܐ ܟܸܐ  ܦܵܠܛܲܚ ܗ݇ܘܵܐ، ܠܵܐ ܡܼܢ ܐܸܢܓܠܸܣ ܘܠܵܐ ܙܸܐ ܡܼܢ ܥܸܠܡ ܕܟܝܵܢܵܐ. ܒܗܿܝ ܕܡܵܬܸܡܲܛܝܼܩܝܼ (ܚܸܫܒܘܼܢܵܐ) ܙܸܐ ܩܵܐ ܟܠܲܝܗܝ ܪܵܒܵܐ ܥܲܣܩܵܐ ܗ݇ܘܵܐ، ܚܲܕ݇ܟܡܵܐ ܝܵܠܸ̈ܐ ܟܸܐ ܒܵܥܝܼ ܗ݇ܘܵܘ ܡܸܢܲܢ ܕܗܲܝܸܪܲܚ ܗ݇ܘܵܐ ܠܗ݇ܘܿܢ. ܒܘܿܬ ܐܵܗܵܐ ܓ̰ܲܠܕܸܐ ܦܝܼܫܠܲܢ ܝܕܸܥܝܸ̈ܐ ܒܩܘܼܒܘܼܚܬܵܐ ܕܐܵܬܘܼܖ̈ܵܝܸܐ ܝܲܢ ܐܲܡܪܲܚ ܟܪܸܣܛܝܵܢܸ̈ܐ.

   ܣܝܼܪܘܿ ܩܵܐ ܕܒܵܒܘܼܗܿ ܚܲܕ݇ ܩܘܿܠܵܝܝ ܣܘܼܪܵܝܵܐ ܗ݇ܘܵܐ ܘܝܸܡܘܼܗܿ ܝܲܚܣܵܐ ܐܲܪܸܡܢܵܝܬܵܐ... ܚܕܵܐ ܒܪܵܬܵܐ ܗ݇ܘܵܐ ܒܲܠܒܵܛܵܐ. ܟܠܝܼܬܵܐ ܩܲܕ݇ܡ ܬܲܪܥܲܝܗܝ ܥܲܠ ܐܘܼܪܚܝܼ ܩܸܪܝܸܢܵܗܿ "ܝܵܠܵܐ ܗܵܝ ܬܵܐ ܚܵܙܝܵܢ...!" ܐ݇ܡܸܪܝܼ "ܦܲܩܸܕ!" ܫܘܼܪܸܐ ܠܵܗܿ ܒܠܸܫܵܢܵܐ ܐܵܪܸܡܢܵܝܵܐ ܣܸܦܪܵܝܵܐ ܗܲܡܙܘܼܡܸܐ. ܐ݇ܡܸܪܝܼ "ܢܸܗܪܝܼܪ[1] ܐܵܢܵܐ ܪܵܒܵܐ ܩܵܒܼܪܵܓܼ ܠܸܐ ܝܵܕܥܸܢܸܗ ܠܸܫܵܢܵܘܟܼܘܿܢ، ܐ݇ܡܘܼܪܝܼ ܒܐܵܣܘܿܪܸܐ ܝܲܢ ܒܬܘܼܪܟܸܐ." ܐ݇ܡܸܪܵܗܿ "ܠܸܐ ܝܘܸܬ ܐܵܪܸܡܢܵܝܵܐ؟" ܐ݇ܡܸܪܝܼ "ܠܵܐ، ܐܵܢܵܐ ܒܢܲܝ̈ ܒܵܒܵܪܝܼ ܝܘܸܢ." ܐ݇ܡܸܪܵܗܿ "ܒܵܒܵܪܝܼ!!" ܐ݇ܡܸܪܝܼ "ܗܸܐ... ܚܵܬܝܼ..." ܐ݇ܡܸܪܵܗܿ "ܠܲܝܬ ܠܝܼ ܫܘܼܓܼ݇ܠܵܐ. ܒܢܲܝ̈ ܕܐܲܝܢܝܼ ܓܸܗܲܢܵܐ ܝܘܸܬ، ܗ݇ܘܝܼ. ܚܙܝܼ ܠܗ݇ܘܿܢ ܐܲܢܸܐ ܬܪܸܝܢ، ܬܠܵܬ݇ ܒܲܪ ܦܸܚܡܘܼܝܵܬܸ̈ܐ (معادله) ܕܐܲܠܓ̰ܲܒܪ (جبر)، ܡܵܨܸܝܬ ܫܵܪܸܬ ܠܗ݇ܘܿܢ ܩܵܬܝܼ؟" ܐ݇ܡܸܪܝܼ "ܕܲܐܟܼܝܼ ܐܘܼܦ ܐܲܢ݇ܬܝ ܙܸܐ ܟܠܵܣ ܬܡܲܢܝܵܐ ܝܘܲܬܝ؟" ܐ݇ܡܸܪܵܗܿ "ܐ݇ܚܸܪ݇ܢ ܠܵܐ ܐ݇ܡܸܪܝܼ ܣܸܓ̰ܝܼܠܝܼ ܙܸܐ ܦܬܘܼܚܠܵܗܿ. ܕܸܐ ܫܪܝܼ ܠܗ݇ܘܿܢ ܚܵܙܝܵܢ! ܐܲܩܠܝܼ ܓܸܠܝܸ̈ܐ ܝܢܵܐ، ܚܲܒܘܼܠܸܐ ܝܢܵܐ ܥܲܠ ܩܲܦܩܵܦܸ̈ܐ".

ܐܵܢܵܐ ܡܘܼܓܕܸܠܝܼ ܒܫܵܘܦܝܼ. ܚܙܸܐܠܝܼ ܒܵܬ݇ܪ ܩܕܵܠܝܼ ܫܘܼܪܸܐ ܠܸܐ ܒܸܫܚܵܢܵܐ. ܐܘܿܗ... ܐ݇ܡܸܪܝܼ ܩܵܐ ܓܵܢܝܼ "ܝܵܠܵܐ ܡܘܼܕܝܼ ܝܘܸܬ ܒܸܥܒܼܵܕܵܐ؟" ܐܝܼܢܵܐ ܡܘܼܕ݇ ܐܵܡܪܸܢ، ܚܲܕ݇ܟ̰ܵܐ ܚܕܸܐܠܝܼ، ܚܲܕ݇ܟ̰ܵܐ ܦܫܸܡܠܝܼ، ܚܲܕ݇ܟ̰ܵܐ ܥܒܼܸܪܝܼ ܒܬܲܚܡܲܢܬܵܐ، ܚܲܕ݇ܟ̰ܵܐ ܒܕܘܼܡܵܪܵܐ... . ܫܡܸܥܠܝܼ ܠܩܵܠܵܐ ܕܙܸܓܵܐ ܕܥܘܼܡܪܵܐ ܕܩܵܬܘܿܠܝܼܩܵܝܸ̈ܐ ܒܣܵܥܲܬ ܫܲܒܼܥܵܐ ܕܪܲܡܫܵܐ. ܓ̰ܲܠܕܸܐ ܪܫܸܡܠܝܼ ܨܠܝܼܒܼܵܐ، ܚܲܡܫܵܐ ܫܠܵܡܵܠܵܟܼܝ ܡܲܪܝܲܡ، ܬܪܸܝܢ ܒܵܒܵܢ ܕܒܸܫܡܲܝܵܐ، ܛܠܸܒܠܝܼ ܕܐܲܠܵܗܵܐ ܥܵܒܼܸܪ ܡܼܢ ܚܛܝܼܵܬܝܼ. ܐܝܼܢܵܐ ܠܵܐ، ܐܵܗܵܐ ܡܲܣܲܠܵܐ ܝܪܸܟܼܠܵܗܿ، ܐܲܝܟܼ ܙܡܵܪܬܵܐ ܕܐܵܓܼܵܣܸܐ "ܗܿܝ ܥܸܣܪܸܝܢ ܫܩܸܠܵܗܿ، ܐܵܢܵܐ ܩܲܝܣܘܼܗܿ ܐ݇ܟܼܝܼܠܵܐܠܝܼ." ܩܵܬܝܼ ܝܘܸܬ ܐ݇ܡܵܪܵܐ، ܐܵܢܵܐ ܐܲܝܟܵܐ ܕܗ݇ܘܸܐܠܝܼ ܦܲܟܘܼܪܸܐ ܝܲܢ ܥܲܠ ܡܵܢܝܼ ܦܲܪܘܼܓ̰ܸܐ، ܗܲܪ ܗܿܝ ܨܘܼܪܬܵܐ ܡܵܠܘܿܚܬܵܐ ܕܣܝܼܪܘܿ ܟܠܸܐܠܵܗܿ ܩܲܕ݇ܡ ܥܲܝܢܝܼ̈.   

   ܐܘܼܦ ܣܲܪܵܐ ܚܵܢܸܡ ܝܗܘܼܕܵܝܬܵܐ ܙܸܐ ܗ݇ܘܸܐܠܵܗܿ ܩܵܬܝܼ ܣܝܼܪܘܿ. ܟܡܵܐ ܕܨܘܼܠܸܐܠܝܼ، ܟܡܵܐ ܘܲܪܕܝܼܵܐ ܠܲܝܬܵܢܝܼܵܐ ܠܚܲܕ݇ ܕܘܼܟܵܐ ܠܵܐ ܡܛܸܐܠܗ݇ܘܿܢ ܩܲܕ ܠܵܐ ܡܛܸܐܠܗ݇ܘܿܢ. ܗܲܠ ܕܩܲܕ ܚܲܕ݇ ܝܵܘܡܵܐ ܕܝܼܘܸܢ ܗ݇ܘܵܐ ܒܸܥܒܼܵܪܵܐ ܡܼܢ ܥܵܠܘܿܠܲܝܗܝ، ܝܸܡܘܼܗܿ ܝܲܚܣܵܐ ܩܸܪܝܸܢܵܗܿ. ܗܲܠ ܕܡܛܸܐܠܝܼ ܟܸܣܠܘܼܗܿ، ܐܝܼܕܐܲܩܠܝܼ ܫܘܼܪܸܐܠܗ݇ܘܿܢ ܒܸܪܓܵܕܵܐ. ܐ݇ܡܸܪܵܗܿ "ܝܵܠܵܐ ܗܵܘܢܵܢܵܐ، ܒܵܥܝܵܢ ܣܝܼܪܘܿ ܒܪܵܬܝܼ ܗܵܘܝܵܐ ܚܕܵܐ ܨܦܵܝܝܼ ܩܲܪܝܵܢܬܵܐ. ܐܝܼܬܵܐ ܒܸܛܠܵܒܵܐ ܝܘܵܢ ܡܸܢܘܼܟܼ ܕܐܵܬܝܼܬܸܢ ܟܸܣܠܲܢ ܚܲܕ݇ܟܡܵܐ ܓܵܗܸ̈ܐ، ܡܲܡܪܸܝܬ ܪܸܫܵܐ ܥܲܠ ܕܲܖ̈ܣܵܬܘܼܗܿ. ܗܲܠܒܲܬ ܠܸܐ ܦܵܝܫܵܐ ܟܸܣܠܲܢ." ܪܵܒܵܐ ܚܕܸܐܠܝܼ، ܫܘܼܪܸܐܠܝܼ ܒܝܵܘܡܵܢܸ̈ܐ ܕܥܪܘܼܒܼܬܵܐ ܐܲܪܒܥܵܒܼܫܲܒܵܐ ܕܟܠ ܫܲܒܬܵܐ ܡܼܢ ܒܵܬ݇ܪ ܡܲܕܪܲܫܬܵܐ ܝܵܬܒܼܸܢ ܠܟܸܣ ܣܝܼܪܘܿ ܘܡܲܠܦܸܢܗ݇ܘܿܢ ܕܲܖ̈ܣܵܬܘܼܗܿ.

   ܩܘܼܖ̈ܒܵܒܸܐ ܕܢܵܘܪܘܼܙ ܗ݇ܘܵܐ، ܐ݇ܡܸܪܝܼ ܩܵܐ ܛܝܼܟܝܼܢ ܝܲܚܣܵܐ "ܒܸܕ ܐܵܙܲܠ݇ܚ ܠܡܵܬܵܐ ܩܵܐ ܚܲܡܫܲܥܣܲܪ ܝܵܘܡܵܢܸ̈ܐ." ܐܝܼܬܵܐ ܚܙܸܐܠܝܼ ܡܘܼܬ݇ܝܵܐܠܵܗܿ ܚܕܵܐ ܟܘܿܬ ܕܲܡܝܵܢܬܵܐ ܠܓܸܠܕܵܐ ܘܓ̰ܘܼܪܒܵܐܠܵܗܿ ܥܲܠܝܼ. ܐ݇ܡܸܪܵܗ "ܝܵܠܵܐ ܗܵܘܢܵܢܵܐ؛ ܗܲܪ ܟ̰ܸܡ ܥܲܠ ܩܵܘܡܘܼܟܼ ܝܠܵܗܿ، ܠܒܼܘܼܫܠܵܗܿ. ܐܵܗܵܐ ܟܘܿܬܘܼܟܼ ܡܵܪ ـ ܥܲܪܵܝܬܵܐ ܝܠܵܗܿ. ܕܘܼܝܠܵܗܿ ܓܘܼܪܘܸܣܵܐ ܝܘܸܬ." ܚܕܵܐ ܣܲܥܲܪܬܵܐ ܒܠܸܫܵܢܵܐ ܕܪܘܼܣܢܵܝܸ̈ܐ ܙܸܐ ܣܘܼܥܸܪܵܗܿ ܩܵܐ ܒܵܒܝܼ. ܐ݇ܡܸܪܵܗܿ "ܓܵܘ ܬܸܦܠܝܼܣ ܪܵܒܵܐ ܟܸܐ ܚܵܙܝܵܢ ܗ݇ܘܵܐ ܠܸܗ. ܚܲܕ݇ ܐ݇ܢܵܫܵܐ ܝܠܸܗ ܩܢܝܼܡܵܐ! ܠܸܐ ܚܵܪܸܓ̰ ܪܵܒܵܐ."                                               

   ܥܒܼܸܪܗ݇ܘܿܢ ܝܵܘܡܵܢܸ̈ܐ. ܩܘܼܪܒܵܐ ܠܝܲܪܚܵܐ ܕܐ݇ܝܵܪ ܗ݇ܘܵܐ ܩܲܕ ܨܲܝܕܵܐ ܦܝܼܫܵܐ ܗ݇ܘܵܐ ܐ݇ܣܝܼܪܵܐ ܡܼܢ ܨܝܵܕܵܐ. ܣܝܼܪܘܿ ܐܝܼܬ ܗ݇ܘܵܐ ܠܵܗܿ ܬܪܸܝܢ ܚܘܼܢܵܘܵܬܸ̈ܐ ܓܲܢ݇ܒܵܖܸ̈ܐ. ܐܝܼܬ ܗ݇ܘܵܘ ܠܗ݇ܘܿܢ ܚܕܵܐ ܚܵܢܘܼܬܵܐ (ܕܘܼܟܵܢܵܐ) ܕܦܪܸܙܠܵܐ ܘܟܸܐ ܦܵܠܚܝܼ ܗ݇ܘܵܘ ܒܩܸܫܝܘܼܬܵܐ. ܒܲܝܬܵܐ ܕܣܝܼܪܘܿ ܕܵܢܝܼ ܠܚܕܵܐ ܩܘܼܢܓ̰ܝܼܬܵܐ ܕܥܵܠܘܿܠܵܐ ܗ݇ܘܵܐ، ܬܠܵܬ݇ ܛܲܒܵܩܸ̈ܐ. ܓܵܘ ܙܲܪܙܵܡܝܼܢܲܝܗܝ ܕܬܪܸܝܢ ܐܲܩܠܸ̈ܐ ܟܸܐ ܨܵܠܝܵܐ ܗ݇ܘܵܐ ܡܼܢ ܕܵܪܬܵܐ، ܬܪܸܝܢ ܚܘܼܢܵܘܵܬܸ̈ܐ ܘܚܕܵܐ ܚܵܬܵܐ ܡܼܢ ܟܘܿܣ ܐܵܒܼܵܐ ܟܸܐ ܚܵܝܝܼ ܗ݇ܘܵܘ. ܘܒܛܲܒܵܩܵܐ ܩܲܕ݇ܡܵܝܵܐ، ܟܸܐ ܥܵܡܪܝܼ ܗ݇ܘܵܘ ܬܪܸܝܢ ܚܵܬܘܵܬܸ̈ܐ ܥܲܡ ܐܲܚܘܿܢܲܝܗܝ ܡܼܢ ܡܵܬܵܐ ܕܙܲܝܥܵܐ ܕܡܵܪܝ ܢܘܼܚܵܐ. ܗܲܪ ܐܲܝܟܼ ܟܠܲܝܗܝ ܝܵܠܸ̈ܐ ܒܢܵܬܸ̈ܐ ܕܐܘܼܪܡܝܼ، ܐܵܢܝܼ ܐܸܫܬܵܐ ܓܵܢܵܬܸ̈ܐ ܡܼܢ ܓܸܒܵܐ ܕܩܪܵܝܬܵܐ، ܥܫܝܼܩܸ̈ܐ ܗ݇ܘܵܘ ܠܸܚܕܵܕܸܐ. ܒܛܲܒܵܩܵܐ ܥܸܠܵܝܵܐ ܙܸܐ ܣܝܼܪܘܿ ܘܝܸܡܘܼܗܿ ܥܲܡ ܬܪܸܝܢ ܚܘܼܢܵܘܵܬܘܼܗܿ ܩܕܵܠܲܝܗܝ ܚܠܝܼܡܵܐ ܒܸܚܵܝܵܐ ܗ݇ܘܵܘ.

ܐܵܢܝܼ ܬܵܡܵܐ ܐܝܼܬ ܗ݇ܘܵܘ ܠܗ݇ܘܿܢ ܬܪܸܝܢ ܐܘܿܬܵܓܼܸ̈ܐ، ܗܲܠܵܐ ܠܵܐ ܬܪܸܝܢ ܐܸܠܵܐ ܬܠܵܬ݇ ܐܘܿܬܵܓܼܸ̈ܐ. ܒܗܿܝ ܕܩܵܘܵܚܵܢܲܝܗܝ (ܨܘܿܦܵܝܗܝ) ܕܐܵܪܵܠܸܓܼ ܪܵܒܵܐ ܓܘܼܪܬܵܐ ܗ݇ܘܵܐ، ܒܲܢܲܝܬܲܝܗܝ ܘܒܲܫܲܠܬܲܝܗܝ ܬܵܡܵܐ ܟܸܐ ܗܵܘܝܵܐ ܗ݇ܘܵܐ، ܩܵܐ ܝܬܵܒܼܬܲܝܗܝ ܙܸܐ ܗܿܝ ܐܘܿܬܵܓܼ ܒܸܫ ܓܘܼܪܬܵܐ ܩܘܼܪܒܵܐ ܠܥܸܣܪܸܝܢ ܡܹܝܬܖܸ̈ܐ ܕܡܪܲܒܥܵܐ ܘܚܕܵܐ ܩܵܐ ܕܡܵܟܼܬܲܝܗܝ ܝܲܢ ܗܿܝ ܕܐܲܖ̈ܚܸܐ، ܐ݇ܚܸܪ݇ܢ ܠܸܐ ܝܢܵܐ ܦܝܼܫܸ̈ܐ ܠܒܵܠܝܼ.

   ܟܲܕ ܐܵܢܵܐ ܚܢܝܼܩܵܐ ܒܪܸܓܼܫܵܐ ܕܚܘܼܒܝܼ ܩܵܐ ܣܝܼܪܘܿ ܘܠܟܸܣ ܓܵܢܝܼ ܟܸܐ ܚܵܫܒܼܸܢ ܗ݇ܘܵܐ ܗܿܝ ܙܸܐ ܗܲܪ ܕܵܐܟܼܝܼ ܐܲܝܟܼ ܕܝܼܝܼ ܝܠܵܗܿ، ܐܝܼܢܵܐ ܩܵܐ ܕܠܵܐ ܛܲܡܫܸܢ ܗ݇ܘܵܐ ܓܵܘ ܚܛܝܼܬܵܐ!! ܟܸܐ ܗܵܘܸܝܢ ܗ݇ܘܵܐ، ܦܪܝܼܫܵܐܝܼܬ ܒܖ̈ܲܡܫܵܢܸܐ، ܒܵܠܝܼ ܠܡܲܕܢܚܵܐ ܨܲܠܘܼܝܸܐ "ܥܵܒܼܸܪ ܡܸܢܝܼ، ܨܲܠܝܼ ܡܼܢ ܓܸܒܝܼ..." ܐܝܼܢܵܐ ܡܝܼܵ̈ܐ ܕܢܲܗܖ̈ܵܘܵܬܸܐ ܕܚܘܼܒܵܐ ܐܘܼܚܟ̰ܵܐ ܙܲܖ̈ܒܵܢܸܐ ܝܢܵܐ ܩܲܕ ܟܠ ܚܲܕ݇ ܟܸܐܦܵܐ ܘܓܲܢܕܘܼܠܵܐ ܕܗܵܘܸܐ، ܒܟܵܢܸܫ ܘܒܸܕ ܠܲܒܸܠܗ݇ܘܿܢ؛ ܘܲܖ̈ܕܝܼܸܐ ܠܲܝܬܵܢܝܼܸ̈ܐ، ܙܸܐ ܠܸܐ ܡܵܨܝܼ ܡܲܟܠܝܼ ܠܗ݇ܘܿܢ ܡܼܢ ܓ̰ܪܵܝܵܐ.

   ܚܲܕ݇ ܝܵܘܡܵܐ ܗ݇ܘܵܐ ܕܫܘܼܢܵܝܵܐ ܕܢܝܼܣܵܢ ܝܲܪܚܵܐ. ܣܝܼܪܘܿ ܕܒܼܝܼܩܵܐܠܵܗܿ ܐܝܼܕܝܼ ܐ݇ܡܸܪܵܗܿ "ܝܸܡܝܼ ܠܲܝܬ. ܚܘܼܢܵܘܵܬܝܼ ܐ݇ܙܸܠܗ݇ܘܿܢ ܠܨܲܝܕܵܐ، ܬܵܐ ܥܒܼܘܿܪ ܠܒܝܼܲܢ (ܠܒܲܝܬܲܢ)." ܥܒܼܸܪܝܼ ܘܝܬܸܒܼܠܲܢ ܥܲܡ ܚܕܵܕܸܐ ܠܚܘܼܕܲܢ ܓܵܘ ܕܗܿܝ ܐܘܿܬܵܓܼ ܓܘܼܪܬܵܐ، ܬܲܢܘܼܝܸܐ ܘܓܸܚܟܵܐ، ܒܪܵܟܵܐ ܠܒܸܪܟܲܢ، ܐܝܼܕܲܢ ܓܵܘ ܐܝܼܕܵܐ ܕܐܘܼܕܵܠܸܐ. ܒܥܸܠܝܼ ܕܦܵܬܝܼ ܩܲܪܒܸܢܸܢܵܗܿ ܠܦܵܬܘܼܗܿ. ܗܲܠܵܐ ܗܸܟ̰ ܡܸܢܕܝܼ ܠܵܐ ܥܒܼܵܕܵܐ، ܩܕܝܼܠܵܐ ܚܕܸܪܸܗ ܒܕܲܒܼܪܵܐ ܕܬܲܪܥܵܐ ܕܕܵܪܬܵܐ، ܬܲܪܥܵܐ ܚܕܸܪܸܗ ܠܕܵܒܵܢܘܼܗܝ. ܟ̰ܘܼܪܟ̰ܸܪܵܗܿ ܣܝܼܪܘܿ ܘܐ݇ܡܸܪܵܗܿ "ܟܼܘܿܠ ܚܲܡ! ܚܘܼܢܵܘܵܬܝܼ ܝܢܵܐ." ܫܘܼܪܸܐ ܠܝܼ ܒܸܪܓܵܕܵܐ ܘܒܸܬܒܼܵܢܵܐ ܦܲܓܼܪܝܼ. ܩܵܠܵܐ ܕܐܲܩܠܸ̈ܐ ܒܸܐܣܵܩܵܐ ܡܼܢ ܦܲܠܲܟܵܢܸ̈ܐ ܡܛܵܝܵܐ ܩܲܕ݇ܡ ܬܲܪܥܵܐ ܕܐܘܿܬܵܓܼ. ܐܵܢܵܐ ܙܸܐ ܒܸܪܓܵܕܵܐ ܦܲܪܦܘܼܠܸܐ ܒܐܲܠܵܗܵܐ "ܥܵܒܼܸܪ ܡܸܢܝܼ ܐܵܗ ܟܵܣܵܐ."

  ܦܲܢܓ̰ܵܪܵܐ ܕܓܵܘ ܥܵܠܘܿܠܵܐ ܕܗܿܝ ܐܘܿܬܵܓܼ ܦܬܝܼܚܬܵܐ ܗ݇ܘܵܐ. ܐܝܼܡܲܢ ܕܗܿܘ ܚܘܼܢܵܐ ܓܘܼܪܵܐ ܬܘܼܦܲܢܓ ܕܨܲܝܕܵܐ ܠܪܲܦ̰ܫܸܗ ܦܬܸܚܠܸܗ ܠܬܲܪܥܵܐ، ܐܵܢܵܐ ܒܣܘܼܪܗܵܒܼܵܐ ܡܘܼܡܛܝܼܵܐܠܝܼ ܓܵܢܝܼ ܠܦܲܢܓ̰ܵܪܵܐ ܕܐܘܿܬܵܓܼ ܕܥܵܠܘܿܠܵܐ، ܢܝܼܚܘܼܢܬܵܐ ܪܘܼܦܵܐܠܝܼ ܓܵܢܝܼ ܕܢܵܦܠܸܢ ܥܲܠ ܐܲܪܥܵܐ ܕܥܵܠܘܿܠܵܐ. ܢܦܸܠܝܼ ܪܵܒܵܐ ܒܚܲܝܠܘܼܬܵܐ. ܩܟ̰ܸܥܠܸܗ ܪܲܦ̰ܫܝܼ ܡܼܢ ܚܲܝܠܵܐ ܕܡܲܪܥܵܐ ܕܫܸܡܛܵܐ ܐܵܦ ܪܸܫܝܼ ܙܸܐ

   ܥܲܝܢܝܼ̈ ܦܬܝܼܚܲܝܗܝ ܠܝܼ ܐܝܼܢܵܐ ܐܲܚܘܿܢܝܼ ܦܪܲܝܕܘܼܢ ܒܪܝܼܟܵܐ ܬ݇ܚܘܿܬ ܪܸܫܝܼ ܐ݇ܡܸܪܸܗ "ܩܘܼܡ ܚܘܼܢܝܼ ܦܝܼܫܸ̈ܐ ܝܘܲܚ ܒܫܸܢܬܵܐ. ܩܘܼܡ ܐܵܟܼܠܲܚ ܚܲܕ݇ ܬܸܟܵܐ ܕܠܲܚܡܵܐ ܓܘܼܒܬܵܐ ܘܢܝܼܦܘܼܚܬܵܐ ܘܐܵܙܲܠ݇ܚ ܠܡܲܕܪܲܫܬܵܐ. ܐܸܕܝܘܿܡ ܐܵܢܵܐ ܐܝܼܬܠܝܼ ܨܲܚܨܵܝܬܵܐ ܕܡܘܼܠܵܝܵܐ." ܓܘܼܫܸܩܠܝܼ ܠܚܲܕܸܖ̈ܘܵܢܝܼ ܘܠܵܐ ܝܕܸܥܠܝܼ ܕܵܐܟܼܝܼ ܡܼܢ ܕܗܿܝ ܪܵܡܘܼܬܵܐ ܢܦܸܠܝܼ ܐܝܼܢܵܐ ܠܵܐ ܡܝܼܬ ܠܝܼ!

---

[1]
                [1] ܦܲܚܲܠܬܵܐ (ܒܠܸܫܵܢܵܐ ܐܵܪܸܡܢܵܝܵܐ)