ܡܬ̈ܠܐ ܐܬܘܖ̈ܝܐ

                                 ܫܡܝܪܡ ܕܘܝܕ ܦܘܪܝܐܢ

ܠ

܀ ܠܵܐ ܒܸܢܟܼܵܦܵܐ ܝܠܸܗ، ܠܵܐ ܒܸܬܝܵܟܵܐ ܝܠܸܗ.

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܠܚܲܕ݇ ܦܲܪܨܘܿܦܵܐ ܕܠܵܐ ܟܸܐ ܢܵܟܼܸܦ ܘܠܵܐ ܟܸܐ ܙܵܕܸܥ ܘܒܘܼܬ ܗܵܕܵܐ ܟܠ ܫܘܼܓܼ݇ܠܵܐ ܟܸܐ ܦܵܠܸܛ ܡܼܢ ܐܝܼܕܘܼܗܝ

܀ ܠܵܐ ܒܥܲܝܢܘܼܗܝ ܝܠܵܗܿ؛ ܠܵܐ ܒܓܒܼܝܼܢܘܼܗܝ.

ܦܘܼܫܵܩܵܐ: ܒܘܼܬ ܚܲܕ݇ ܐ݇ܢܵܫܵܐ ܝܠܸܗ ܕܠܸܐ ܡܲܫܟܸܪ ܡܼܢ ܛܵܒܼܵܬܸ̈ܐ ܕܐ݇ܚܸܖ̈݇ܢܸܐ ܘܠܸܐ ܚܵܦܸܛ ܕܥܵܒܼܸܕ ܛܵܒܼܬܵܐ ܒܢܵܘܒܵܐ ܕܓܵܢܸܗ

܀ ܠܸܐ ܝܠܸܗ ܦܸܩܚܵܐ ܕܡܲܡܘܼܚܸܐ.

ܦܘܼܫܵܩܵܐ: ܟܸܐ ܦܵܐܸܫ ܡܘܼܦܠܸܚܵܐ ܩܵܐ ܡܲܕܲܥܬܵܐ ܕܚܲܕ݇ ܐ݇ܢܵܫܵܐ ܕܠܸܐ ܝܠܸܗ ܪܵܒܵܐ ܥܸܠܵܝܵܐ ܘܐܝܼܬ ܠܸܗ ܪܵܒܵܐ ܒܘܼܨܵܖܸ̈ܐ ܗ.ܕ ܠܸܐ ܝܠܸܗ ܚܲܕ݇ ܐ݇ܢܵܫܵܐ ܕܲܩܪܵܢܵܐ.

܀ ܠܵܐ ܡܲܦܪܸܚܠܸܗ ܪܸܫܵܐ ܕܩܲܪܥܵܐ.

ܦܘܼܫܵܩܵܐ: ܟܸܐ ܐܵܡܪܝܼ ܝܠܸܗ ܩܵܐ ܚܲܕ݇ ܐ݇ܢܵܫܵܐ ܕܗܵܘܸܐ ܙܗܝܼܪܵܐ ܕܠܵܐ ܓܵܠܸܐ ܠܗܿܘ ܣܸܪ (ܐ݇ܪܵܙܵܐ) ܕܛܸܫܝܵܐ ܝܠܸܗ

܀ ܠܵܐ ܥܲܠ ܫܸܡܫܘܼܗܝ ܘܠܵܐ ܥܲܠ ܛܠܵܢܝܼܬܘܼܗܝ.

ܦܘܼܫܵܩܵܐ: ܒܘܼܬ ܚܲܕ݇ ܐ݇ܢܵܫܵܐ ܝܠܸܗ ܕܠܸܐ ܗܵܘܝܵܐ ܐ݇ܣܵܪܵܐ ܚܵܨܵܐ ܥܲܠܘܼܗܝ ܒܗܿܝ ܕܟܠ ܥܕܵܢܵܐ ܟܸܐ ܫܲܚܠܸܦ ܠܵܗܿ ܬܲܚܡܲܢܬܘܼܗܝ

܀ ܠܵܐ ܩܵܛܘܼ ܥܒܼܝܼܪܬܵܐ ܝܠܵܗܿ، ܠܵܐ ܙܝܵܢܵܐ ܥܒܼܝܼܕܬܵܐ.

ܦܘܼܫܵܩܵܐ: ܟܸܐ ܡܲܦܠܸܚܝܼ ܠܸܗ ܒܘܼܬ ܐܵܢܝܼ ܕܟܲܕ ܥܵܒܼܕܝܼ ܚܲܕ݇ ܫܘܼܓܼܠܵܐ ܚܸܠܛܵܐ ܝܲܢ ܡܵܚܝܼ ܙܝܵܢܵܐ ܠܐ݇ܚܸܖ̈݇ܢܸܐ، ܠܸܐ ܬܲܚܡܸܢܝܼ ܒܘܼܬ ܥܒܼܵܕܲܝܗܝ

܀ܠܚܲܕ݇ ܐ݇ܢܵܫܵܐ ܥܲܠ ܙܘܼܠܬܵܐ ܡܘܼܬܒܼܸ̈ܐ ܗ݇ܘܵܐ، ܗܿܘ ܐ݇ܚܸܪ݇ܢܵܐ ܐ݇ܡܸܪܸܗ݊ "ܡܘܼܕ ܬܲܩܵܬܲܩ ܝܠܵܗܿ؟" 

ܦܘܼܫܵܩܵܐ: ܒܘܼܬ ܐܵܢܝܼ ܝܠܸܗ ܕܠܸܐ ܦܵܠܚܝܼ ܘܠܸܐ ܓ̰ܲܢܓ̰ܸܪܝܼ ܠܵܗܿ ܓܵܢܲܝܗܝ ܐܝܼܢܵܐ ܟܸܐ ܗܵܘܝܼ ܛܲܪܛܘܼܡܸܐ ܒܸܫ ܙܵܘܕܵܐ ܡܼܢ ܐ݇ܚܸܖ̈݇ܢܸܐ

܀ ܠܵܚܘܿܡܬܵܐ ܕܫܲܗܖ̈ܵܘܵܬܸܐ!

ܦܘܼܫܵܩܵܐ: ܒܘܼܬ ܗܿܝ ܚܲܡܬܵܐ ܝܠܸܗ ܕܐܵܦܸܢ ܕܠܸܐ ܝܠܵܗܿ ܫܲܦܝܼܪܬܵܐ ܐܝܼܢܵܐ ܪܵܒܵܐ ܟܸܐ ܚܵܫܒܼܵܐ ܒܓܵܢܘܼܗܿ

܀ ܠܲܚܡܵܐ ܡܼܢ ܬ݇ܚܘܿܬ ܟܸܐܦܵܐ ܟܸܐ ܦܵܠܸܛ ܠܸܗ.

ܦܘܼܫܵܩܵܐ: ܒܘܼܬ ܚܲܕ݇ ܐ݇ܢܵܫܵܐ ܝܠܸܗ ܕܪܵܒܵܐ ܦܲܠܵܚܵܐ ܘܡܲܨܝܵܢܵܐ ܝܠܸܗ ܘܠܸܐ ܦܵܐܸܫ ܓܵܘ ܩܢܵܝܬܵܐ ܕܢܵܦܩܵܬܸ̈ܐ ܕܒܲܝܬܘܼܗܝ

܀ ܠܲܚܡܘܼܗܝ ܥܲܠ ܒܸܪܟܘܼܗܝ ܝܠܸܗ.

ܦܘܼܫܵܩܵܐ: ܒܘܼܬ ܗܿܘ ܝܠܸܗ ܕܠܸܐ ܝܵܕܥܸܐ ܨܦܵܝܘܼܬܵܐ ܘܟܠ ܛܵܒܼܬܵܐ ܕܥܵܒܼܕܝܼ ܩܵܬܘܼܗܝ ܠܸܐ ܛܵܥܸܢ ܡܸܢܬܵܐ

܀ ܠܟܠ ܡܸܢܕܝܼ ܕܬܵܪܕܸܬ، ܗܲܪ ܗܿܘ ܡܸܢܕܝܼ ܒܸܕ ܐܵܟܼܠܸܬ ܠܸܗ.

ܦܘܼܫܵܩܵܐ: ܩܵܐ ܡܲܕܲܥܬܵܐ ܕܐܵܗܵܐ ܝܠܸܗ ܕܟܠ ܚܲܕ݇ ܥܒܼܵܕܵܐ ܕܥܵܒܼܕܲܚ؛ ܐܸܢ ܨܦܵܝܝܼ ܝܲܢ ܚܸܪܒܵܐ ܦܠܵܛܘܼܗܝ ܗܲܪ ܗܵܕܵܟܼ ܒܸܕ ܗܵܘܸܐ ܩܵܐ ܓܵܢܲܢ.                         

ܡ

܀ ܡܐܲܝܟܼ ܟܲܠܵܐ ܕܬܸܫܖ̈ܝܼܸܐ ܫܘܼܪܫܝܼܵܐ ܝܘܸܢ.

ܦܘܼܫܵܩܵܐ: ܗܲܩܝܵܢܵܐ ܡܼܢ ܫܲܪܫܵܝܬܵܐ ܡܲܕܡܘܼܝܘܼܗܿ ܝܠܸܗ ܓܵܢܘܼܗܿ ܥܲܠ ܚܲܕ݇ ܟܲܠܵܐ ܒܗܿܝ ܕܒܐܲܩܡܵܐ ܕܬܸܫܖ̈ܝܼܸܐ (ܕܥܕܵܢܵܐ ܕܦܘܼܠܚܵܢܵܐ ܘܓ̰ܲܡܲܥܬܵܐ ܕܗܵܨܸܠ ܝܠܵܗܿ) ܟܲܠܸ̈ܐ ܪܵܒܵܐ ܟܸܐ ܗܵܘܝܼ ܫܘܼܖ̈ܫܝܼܸܐ ܡܼܢ ܩܸܫܝܘܼܬܵܐ ܕܦܘܼܠܚܵܢܵܐ.               

܀ ܡܐܲܝܟܼ ܣܸܐܡܵܐ ܨܲܚ (ܨܲܚܝܼܚܵܐ: ܣܵܠܵܡܵܬ) ܝܠܸܗ.

ܦܘܼܫܵܩܵܐ: ܟܸܐ ܡܲܦܠܸܚܝܼ ܠܸܗ ܐܵܗܵܐ ܡܲܬܠܵܐ ܒܘܼܬ ܡܲܕܲܥܬܵܐ ܕܕܲܪܓܼܵܐ ܕܚܘܼܠܡܵܢܵܐ ܕܚܲܕ݇ ܦܲܪܨܘܼܦܵܐ، ܒܗܿܝ ܕܣܸܐܡܵܐ ܚܲܕ݇ ܦܪܸܙܠܵܐ ܝܠܸܗ ܠܵܐ ܡܸܬܚܲܪܒܼܵܢܵܐ.       

܀ ܡܐܲܝܟܼ ܬܵܘܪܬܵܐ ܙܲܖ̈ܕܸܐ ܡܲܚܠܘܼܒܼܸܐ ܝܠܵܗܿ ܘܚܲܪܬܵܐ ܡܚܵܝܵܐ ܝܠܵܗܿ ܪܲܦܣܵܐ ܘܬܲܦܘܼܟܼܘܼܗܝ ܝܠܵܗܿ ܗܿܘ ܚܵܠܒܼܵܐ

ܦܘܼܫܵܩܵܐ: ܒܘܼܬ ܚܲܕ݇ ܦܲܪܨܘܼܦܵܐ ܝܠܸܗ ܕܩܲܕ݇ܡܵܝܬܵܐ ܟܸܐ ܥܵܒܼܸܕ ܫܘܼܓܼ݇ܠܵܢܸ̈ܐ ܛܵܒܼܸ̈ܐ ܐܝܼܢܵܐ ܟܲܕ ܟܵܪܸܒ، ܒܗܸܦܟܵܐ (ܬܲܪܨܵܐ) ܟܸܐ ܦܵܠܸܚ ܘܟܸܐ ܒܵܛܸܠ ܠܛܵܒܼܵܬܸ̈ܐ ܕܓܵܢܘܼܗܝ

܀ ܡܘܼܕ ܓܠܘܼܠܸ̈ܐ ܐܝܼܬܠܘܼܟܼ ܩܵܐ ܡܲܚܫܘܼܠܸܐ؟

ܦܘܼܫܵܩܵܐ: ܒܘܼܬ ܚܲܕ݇ ܐ݇ܢܵܫܵܐ ܝܠܸܗ ܕܒܚܲܕ݇ ܢܝܼܫܵܐ ܛܸܫܝܵܐ ܒܸܐܙܵܠܵܐ ܝܠܸܗ ܠܟܸܣ ܐ݇ܚܸܖ̈݇ܢܸܐ. ܡܲܥܢܵܝܵܐ ܕܡܲܬܠܵܐ ܐܵܗܵܐ ܝܠܸܗ: ܡܘܼܕܝ݇  ܐܸܢܝܲܬ ܐܝܼܬ ܠܘܼܟܼ ܒܠܸܒܘܼܟܼ.

܀ ܡܘܼܫܸܠܡܵܢܵܐ ܐܸܢ ܠܵܐ ܕܲܓܸܠ ܘܠܵܐ ܓܵܢܸܒܼ، ܝܵܘܡܘܼܗܝ ܠܸܐ ܥܵܒܼܸܪ.

ܦܘܼܫܵܩܵܐ: ܡܲܕܘܼܥܸܐ ܝܠܸܗ ܠܕܝܼܠܵܝܵܬܸ̈ܐ ܕܡܘܼܫܸܠܡܵܢܸ̈ܐ ܕܐܲܡܝܼܢܵܐܝܼܬ ܟܸܐ ܗܵܘܝܼ ܕܲܓܘܼܠܸ̈ܐ ܘܒܸܓܢܵܒܼܵܐ ܘܐܵܗܵܐ ܐܲܝܟܼ ܚܕܵܐ ܙܘܼܗܵܪܵܐ ܝܠܵܗܿ ܩܵܐ ܫܲܡܥܵܢܵܐ ܕܠܵܐ ܗܵܘܸܐ ܠܸܗ ܬܘܼܟܼܠܵܢܵܐ ܥܲܠ ܚܲܕ݇ ܡܘܼܫܸܠܡܵܢܵܐ

܀ ܡܝܼܵ̈ܐ ܕܬ݇ܚܘܿܬ ܬܸܒܼܢܸ̈ܐ ܝܠܸܗ.

ܦܘܼܫܵܩܵܐ: ܒܘܼܬ ܚܲܕ݇ ܐ݇ܢܵܫܵܐ ܝܠܸܗ ܢܵܟܼܘܿܠܵܐ (ܡܸܙܸܐ) ܕܡܼܢ ܦܲܐܬܵܐ ܠܸܐ ܡܲܕܥܸܐ ܠܢܝܼܫܸܗ ܐܝܼܢܵܐ ܒܛܸܫܘܵܐ ܟܸܐ ܦܵܠܸܚ ܠܸܙܝܵܢܵܐ ܕܐ݇ܢܵܫܵܐ؛ ܗܲܪ ܐܲܝܟܼ ܐܵܢܝ݇ ܡܝܼܵ̈ܐ ܕܗܵܘܝܼ ܦܝܼܫܸ̈ܐ ܬܚܘܿܬ ܬܸܒܼܢܵܐ ܕܠܸܐ ܦܵܝܫܝܼ ܚܸܙܝܸ̈ܐ ܐܝܼܢܵܐ ܟܸܐ ܡܲܚܪܸܒܼܝܼ ܠܬܸܒܼܢܵܐ.    

܀ ܡܝܼܝܲܝ̈ܗܝ ܠܸܐ ܐܵܙܠ݇ܝܼ ܓܵܘ ܚܕܵܐ ܫܵܩܝܼܬܵܐ.

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܠܬܪܸܝܢ (ܝܲܢ ܒܸܫ ܙܵܘܕܵܐ) ܓܵܢܵܬܸ̈ܐ ܕܠܲܝܬܠܗ݇ܘܿܢ ܣܲܙܓܵܪܘܼܬܵܐ ܒܬܲܚܡܲܢܬܲܝܗܝ 

܀ ܡܸܠܘܼܗܿ ܪܦܝܼܬܵܐ ܝܠܵܗܿ.

 ܦܘܼܫܵܩܵܐ: ܒܘܼܬ ܚܕܵܐ ܢܸܩܒܼܵܐ ܝܠܸܗ ܕܒܐ݇ܣܵܢܵܝܘܼܬܵܐ ܟܸܐ ܐܵܬܝܵܐ ܠܣܲܙܓܲܪܬܵܐ. ܡܸܠܵܐ ܒܡܲܥܢܵܝܵܐ ܕܚܲܕ݇ ܕܵܢܵܐ ܕܙܩܘܼܪܵܐ ܝܠܵܗܿ ܕܐܸܢ ܟ̰ܲܪܬܵܐ ܡܼܢ ܩܲܛܘܵܐ، ܪܵܒܵܐ ܓ̰ܲܠܕܸܐ ܟܸܐ ܦܵܝܫܵܐ ܫܩܝܼܠܬܵܐ

܀ ܡܼܢ ܓܸܒܵܐ ܕܟܲܠܸ̈ܐ، ܥܲܪܵܒܵܢܵܐ (ܓܲܪܕܘܼܢ) ܟ̰ܲܪܟ̰ܘܼܪܸܐ ܝܠܵܗܿ.

ܦܘܼܫܵܩܵܐ: ܡܲܕܘܼܥܸܐ ܝܠܸܗ ܒܘܼܬ ܐܵܢܝܼ ܕܡܼܢ ܟܠܲܝܗܝ ܒܘܼܫ ܚܲܕ݇ܟ̰ܵܐ ܟܸܐ ܦܵܠܚܝܼ ܐܝܼܢܵܐ ܒܘܼܫ ܙܵܘܕܵܐ ܟܸܐ ܛܲܪܛܸܡܝܼ

܀ ܡܼܢ ܟܠܲܝܗܝ ܓܵܘ ܦܲܓܼܪܵܐ ܠܸܫܵܢܵܐ ܝܠܸܗ ܐܝܼܢܵܐ ܗܲܡ ܚܸܠܝܵܐ ܝܠܸܗ ܗܲܡ ܡܲܪܝܼܪܵܐ.

ܦܘܼܫܵܩܵܐ: ܡܲܕܘܼܥܸܐ ܝܠܸܗ ܕܒܲܪܢܵܫܵܐ ܟܸܐ ܡܵܨܸܐ ܩܵܢܸܐ ܝܘܼܬܪܵܢܵܐ ܐܸܢ ܡܲܦܠܸܚ ܠܗ݇ܘܿܢ ܟܲܟܖ̈ܘܼܗܝ ܒܐܘܼܪܚܵܐ ܬܪܝܼܨܬܵܐ؛ ܗܲܪ ܐܲܝܟܼ ܠܸܫܵܢܘܼܗܝ ܕܐܸܢ ܚܸܠܝܵܐ ܗܵܘܸܐ ܐ݇ܢܵܫܵܐ ܟܸܐ ܡܵܨܸܐ ܩܵܢܸܐ ܠܚܘܼܒܵܐ ܕܐ݇ܚܸܖ̈݇ܢܸܐ ܘܡܵܛܸܐ ܠܢܝܼܫܘܼܗܝ

܀ ܡܼܢ ܩܲܕ݇ܡ ܓ̰ܸܦܢܵܐ ܩܝܼܡܵܐ ܝܘܸܬ، ܪܸܫܘܼܟܼ ܡܪܵܥܝܵܐ ܝܠܸܗ.

ܦܘܼܫܵܩܵܐ: ܒܘܼܬ ܚܲܕ݇ ܐ݇ܢܵܫܵܐ ܝܠܸܗ ܕܠܸܐ ܝܠܵܗܿ ܗܘܼܫܘܼܗܝ ܒܪܸܫܘܼܗܝ ܘܠܸܐ ܝܠܸܗ ܒܝܼܕܵܥܵܐ ܡܘܼܕܝܼ ܐ݇ܡܵܪܵܐ ܝܠܸܗ؛ ܒܗܿܝ ܕܥܕܵܢܵܐ ܕܝܦܵܝܬܵܐ ܕܠܲܚܡܵܐ ܟܲܕ ܫܵܩܠܝܼ ܗ݇ܘܵܘ ܠܲܝܫܵܐ ܡܼܢ ܓܵܘ ܓ̰ܸܦܢܵܐ ܘܝܵܦܝܼ ܗ݇ܘܵܘ ܠܸܗ، ܬܸܢܵܐ ܕܬܲܢܘܼܪܵܐ ܟܸܐ ܕܵܒܼܸܩ ܗ݇ܘܵܐ ܠܗ݇ܘܿܢ ܘܪܸܫܲܝܗܝ ܟܸܐ ܡܵܪܥܸܐ ܗ݇ܘܵܐ

܀ ܡܼܢ ܩܲܕ݇ܡ ܡܸܛܪܵܐ ܬ݇ܚܘܿܬ ܕܵܠܘܿܦܸ̈ܐ.

ܦܘܼܫܵܩܵܐ: ܒܘܼܬ ܚܲܕ݇ ܦܲܪܨܘܿܦܵܐ ܝܠܸܗ ܕܡܼܢ ܚܕܵܐ ܐܲܝܟܵܢܵܝܘܼܬܵܐ ܠܵܐ ܨܦܵܝܝܼ ܒܸܥܪܵܩܵܐ ܝܠܸܗ ܐܝܼܢܵܐ ܒܸܢܦܵܠܵܐ ܝܠܸܗ ܒܚܕܵܐ ܐܲܝܟܵܢܵܝܘܼܬܵܐ ܒܸܫ ܚܸܪܒܵܐ

܀ ܡܼܢ ܪܸܚܩܵܐ ܥܲܝܢܸ̈ܐ ܕܐ݇ܚܸܖ̈݇ܢܸܐ ܦܲܠܘܼܛܲܝܗܝ ܝܠܸܗ ܘܡܼܢ ܩܘܼܪܒܵܐ ܕܓܵܢܘܼܗܝ. 

ܦܘܼܫܵܩܵܐ: ܒܘܼܬ ܚܲܕ݇ ܦܲܪܨܘܿܦܵܐ ܝܠܸܗ ܕܟܠܲܝܗܝ ܐ݇ܢܵܫܸ̈ܐ ܟܸܐ ܚܵܫܒܼܝܼ ܕܚܲܝܘܼܬܘܼܗܝ ܨܦܵܝܝܼ ܝܠܵܗܿ ܘܟܸܐ ܒܲܚܸܠܝܼ ܒܝܼܘܼܗܝ ܟܲܕ ܠܸܗ ܝܠܵܗܿ ܐܲܝܟܼ ܚܫܵܒܼܬܲܝܗܝ ܘܗܿܘ ܙܸܐ ܐܝܼܬ ܝܠܸܗ ܥܲܣܩܘܵܬܸ̈ܐ ܕܓܵܢܸܗ

܀ ܡܼܢ ܖ̈ܘܼܩܸܐ ܚܒܼܝܼܨܵܐ ܬܲܪܘܼܨܸܐ ܝܢܵܐ.

ܦܘܼܫܵܩܵܐ: ܒܘܼܬ ܚܲܕ݇ܟܡܵܐ ܐ݇ܢܵܫܸ̈ܐ ܩܡܝܼܢܸ̈ܐ (ܛܲܡܲܥܟܲܪ) ܝܠܸܗ ܕܒܵܥܝܼ ܕܠܵܐ ܚܲܪܲܓ̰ܬܵܐ ܕܙܘܼܙܸ̈ܐ ܥܵܒܼܕܝܼ ܠܸܗ ܚܲܕ݇ ܫܘܼܓܼ݇ܠܵܐ ܗܲܪ ܐܲܝܟܼ ܐܵܢܝܼ ܕܒܝܲܕ ܖ̈ܘܼܩܸܐ ܒܵܥܝܼ ܬܲܪܨܝܼ ܚܒܼܝܼܨܵܐ ܕܩܸܘܝܵܐ ܝܠܸܗ ܘܐܵܗܵܐ ܫܘܼܓܼ݇ܠܵܐ ܠܸܐ ܐܵܬܸܐ ܠܪܸܫܸܐ.

܀ ܡܼܢ ܪܸܫܵܐ ܕܣܲܝܦܘܼܗܝ ܕܸܡܵܐ ܫܲܪܫܘܼܪܸܐ ܝܠܸܗ.

ܦܘܼܫܵܩܵܐ: ܒܘܼܬ ܚܲܕ݇ ܐ݇ܢܵܫܵܐ ܝܠܸܗ ܟܪܝܼܒܵܐ ܘܡܸܠܝܵܐ ܡܼܢ ܚܸܡܬܵܐ ܕܗܕܝܼܪܵܐ ܝܠܸܗ ܩܵܐ ܦܠܵܫܵܐ

܀ ܡܼܢ ܫܲܪܫܲܪܬܵܐ ܕܡܝܼܵ̈ܐ ܝܕܸܥܠܝܼ ܡܲܣܲܠܵܐ (ܡܲܬܠܵܐ) ܡܘܼܕܝܼ ܝܠܵܗܿ.

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܠܐܵܗܵܐ ܕܬܲܢܝܵܢܵܐ ܒܡܸܨܥܵܝܘܼܬܵܐ ܕܚܲܕ݇ ܢܝܼܫܵܢܩܵܐ ܪܥܝܼܫܵܐ ܝܠܸܗ ܠܫܪܵܪܵܐ ܒܚܲܕ݇ ܫܲܪܒܵܐ. ܩܵܐ ܛܘܼܦ̰ܣܵܐ ܡܼܢ ܦܸܨܠܵܐ ܕܗܿܘ ܐ݇ܢܵܫܵܐ ܝܕܸܥܝܵܐ ܝܠܸܗ ܕܡܘܼܕܝܼ ܬܲܚܡܘܼܢܸܐ ܝܠܸܗ

܀ ܡܸܢܕܝܼ ܕܐ݇ܢܵܫܸ̈ܐ، ܗܲܠ ܒܸܝܬ݇ ܖ̈ܲܡܫܸܐ.

ܦܘܼܫܵܩܵܐ: ܡܲܕܘܼܥܸܐ ܝܠܸܗ ܕܠܵܙܸܡ ܝܠܵܗܿ ܕܕܲܝܢܵܐ ܦܵܐܸܫ ܦܘܼܪܸܥܝܵܐ ܟ̰ܸܡ ܒܓ̰ܲܠܕܘܼܬܵܐ ܘܐܸܢ ܠܵܐ ܒܸܕ ܒܵܪܸܐ ܕܘܼܖ̈ܵܫܸܐ ܘܒܸܕ ܗܵܘܸܐ ܥܸܠܬܵܐ ܕܦܝܵܫܬܵܐ ܕܠܸܒܵܐ

܀ ܡܲܣܬܵܐ ܐ݇ܟܘܼܡܬܵܐ ܝܠܵܗܿ.

ܦܘܼܫܵܩܵܐ: ܡܲܕܘܼܥܸܐ ܝܠܸܗ ܠܚܲܕ݇ ܐ݇ܢܵܫܵܐ ܕܪܸܩܝܵܢܵܐ ܝܠܸܗ ܘܟܲܕ ܐܵܡܸܪ ܚܲܕ݇ ܚܲܒܪܵܐ ܠܸܐ ܕܵܝܸܪ ܡܸܢܸܗ   

܀ ܡܲܣܬܵܐ ܥܲܠ ܦܘܼܡܵܐ ܕܩܵܛܘܼ ܠܵܐ ܡܛܸܐ ܠܵܗܿ، ܐ݇ܡܸܪܵܗ: ܟܘܼܡܬܵܐ ܝܠܵܗܿ.

ܦܘܼܫܵܩܵܐ: ܡܲܕܘܼܥܸܐ ܝܠܸܗ ܠܚܲܕ݇ ܐ݇ܢܵܫܵܐ ܕܟܲܕ ܠܸܐ ܝܠܸܗ ܡܨܵܝܵܐ ܕܡܵܛܸܐ ܠܚܲܕ݇ ܡܸܢܕܝܼ، ܒܸܣܢܵܝܘܼܗܝ ܝܠܸܗ 

܀ ܡܲܣܬܵܐ ܣܘܼܦܝܘܼܗܿ ܝܢܵܐ ܒܩܵܛܘܼ.

ܦܘܼܫܵܩܵܐ: ܡܸܢܕܝܼ ܣܘܼܦܝܘܼܗܝ ܝܢܵܐ ܒܐܝܼܕܵܐ ܕܚܲܕ݇ ܐ݇ܢܵܫܵܐ ܠܵܐ ܡܗܘܼܡܢܵܐ ܒܗܿܝ ܕܐܸܢ ܡܲܣܬܵܐ ܦܵܝܫܵܐ ܣܘܼܦܝܼܬܵܐ ܒܩܵܛܘܼ، ܗܿܝ ܒܸܕ ܐܵܟܼܠܵܐ ܠܵܗܿ

܀ ܡܲܣܬܵܐ ܩܫܝܼܬܵܐ ܓܵܘ ܫܵܩܝܼܬܵܐ.

ܦܘܼܫܵܩܵܐ: ܒܘܼܬ ܚܲܕ݇ ܫܘܼܓܼ݇ܠܵܐ ܚܸܠܛܵܐ ܝܠܸܗ ܕܦܠܵܛܵܐ ܠܲܝܬܠܸܗ. ܩܵܐ ܛܘܼܦ̰ܣܵܐ: ܡܲܣܬܵܐ ܩܫܝܼܬܵܐ ܐܸܢ ܕܵܪܝܼ ܠܵܗܿ ܓܵܘ ܫܵܩܝܼܬܵܐ، ܒܸܕ ܓܵܪܫܵܐ ܡܝܼܵ̈ܐ ܠܓܵܢܘܼܗܿ ܘܒܸܕ ܚܵܪܒܼܵܐ.

܀ ܡܵܝܥܬܵܐ ܡܼܢ ܐܸܫܬܘܼܗܿ ܒܸܡܥܵܝܘܼܗܿ ܝܠܸܗ.

ܦܘܼܫܵܩܵܐ: ܡܲܕܘܼܥܸܐ ܝܠܸܗ ܠܚܲܕ݇ ܐ݇ܢܵܫܵܐ ܕܫܘܼܓܼ݇ܠܵܐ ܬܲܪܨܵܐ ܥܒܼܵܕܘܼܗܝ ܝܠܸܗ ܘܠܸܐ ܗܵܘܸܐܠܸܗ ܚܲܕ݇ ܦܠܵܛܵܐ، ܒܗܿܝ ܕܐܸܢ ܡܵܝܥܬܵܐ ܡܼܢ ܗܵܘ ܪܸܫܘܼܗܿ ܐ݇ܚܸܪ݇ܢܵܐ ܡܵܝܥܝܼ ܠܵܗܿ ܟܲܪܥܵܐ ܠܸܐ ܦܵܠܸܛ ܡܼܢ ܕܲܘܥܸ̈ܐ

܀ ܡܵܪܲܢ ܥܒܼܸܪܸܗ، ܬܲܪܥܵܐ ܕܒܼܸܪܸܗ.

ܦܘܼܫܵܩܵܐ: ܚܲܕ݇ ܫܘܼܓܼ݇ܠܵܐ ܗ݇ܘܝܼܵܐ ܝܠܸܗ ܘܩܸܨܲܬ ܦܪܝܼܩܬܵܐ ܝܠܵܗܿ ܐ݇ܚܸܪ݇ܢܵܐ ܘܠܸܐ ܗܵܘܝܵܐ ܪ݇ܚܵܫܵܐ ܒܵܬ݇ܪܘܼܗܝ

܀ ܡܸܫܚܵܐ ܕܓܵܢܲܢ ܒܪܸܫܵܐ ܕܓܵܢܲܢ.

ܦܘܼܫܵܩܵܐ: ܓܵܘ ܚܲܕ݇ ܡܲܥܡܠܵܐ، ܠܵܐ ܩܸܢܝܸ̈ܐ ܝܘܲܚ ܘܠܵܐ ܙܸܐ ܙܝܵܢܵܐ ܩܘܼܒܠܸ̈ܐ ܝܘܲܚ، ܐܸܠܵܐ ܗܲܪ ܗܿܘ ܡܸܢܕܝܼ ܕܐܝܼܬ ܗ݇ܘܵܐ ܠܲܢ ܦܝܼܫܵܐ ܝܠܸܗ ܩܵܬܲܢ

ܐܩܦܬܐ ܒܡܢܝܢܐ ܕܥܬܝܕ