ܥܩܪܒܼܐ ܘܚܒܼܖ̈ܘܬܘܗܝ

                                  ܫܡܝܪܡ ܕܘܝܕܦܘܪܝܐܢ

   ܐܝܼܬ ܗ݇ܘܵܐ؛ ܠܲܝܬ ܗ݇ܘܵܐ؛ ܚܲܕ݇ ܥܕܵܢܵܐ ܒܚܲܕ݇ ܥܵܒܼܵܐ ܐܝܼܬ ܗ݇ܘܵܐ ܚܲܕ݇ ܟܸܢܫܵܐ ܕܚܲܝܘܵܬܸ̈ܐ ܕܟܸܐ ܚܵܝܝܼ ܗ݇ܘܵܘ ܒܚܲܕܘܼܬܵܐ ܡܸܚܕܵܕܸܐ. ܦܝܼܠܵܐ؛ ܝܵܘܢܵܐ، ܣܲܡܘܼܪܵܐ؛ ܕܸܒܵܐ؛ ܢܸܡܪܵܐ؛ ܙܲܪܵܦܵܐ؛ ܛܲܘܣܵܐ؛ ܐܲܪܢܒܼܵܐ (ܟܸܪܘܝܼܫ) ܬܲܥܠܵܐ؛ ܐܲܪܝܵܐ؛ ܩܘܿܦܵܐ (ܡܲܝܡܘܼܢ) ܘܟܡܵܐ ܐ݇ܚܸܖ̈݇ܢܸܐ ܬܵܡܵܐ ܒܠܝܼܓܸ̈ܐ ܗ݇ܘܵܘ ܒܚܲܝܘܼܬܲܝܗܝ ܘܡܼܢ ܨܲܦܪܵܐ ܗܲܠ ܪܲܡܫܵܐ ܟܸܐ ܚܵܦܛܝܼ ܗ݇ܘܵܘ ܩܵܐ ܩܢܵܝܬܵܐ ܕܚܲܕ݇ ܣܵܦܵܐ ܕܠܲܚܡܵܐ ܣܘܼܢܩܵܢܵܐ. ܐܝܼܢܵܐ ܒܟܠ ܚܕܵܐ ܐܲܝܟܵܢܵܝܘܼܬܵܐ ܐܸܢ ܨܦܵܝܝܼ ܘܐܸܢ ܚܸܪܒܵܐ؛ ܚܸܕܝܸ̈ܐ ܗ݇ܘܵܘ ܒܚܲܝܘܼܬܲܝܗܝ ܕܝܼܗ݇ܘܵܐ ܪܵܒܵܐ ܒܲܝܣܼܡܬܵܐ ܒܗܿܝ ܕܘܼܟܬܵܐ ܥܵܡܘܿܪܬܵܐ.                  

   ܚܲܕ݇ ܝܵܘܡܵܐ ܡܼܢ ܝܵܘܡܵܢܸ̈ܐ ܚܲܕ݇ ܥܲܩܸܼܪܒܼܵܐ ܙܥܘܿܪܵܐ ܐ݇ܬܸܐ ܠܸܗ ܠܥܵܒܼܵܐ ܘܛܠܸܒܠܸܗ ܗܲܝܲܪܬܵܐ ܡܸܢܲܝܗܝ. ܗܿܘ ܐ݇ܡܸܪܸܗ ܕܝܲܬܘܼܡܵܐ ܝܠܸܗ ܘܠܲܝܬ ܠܸܗ ܟ̰ܘܼ ܚܲܕ݇ ܚܸܙܡܵܐ ܘܪܵܚܡܵܐ ܘܛܠܸܒܠܸܗ ܕܝܵܗܒܼܝܼ ܠܸܗ ܦܣܵܣܵܐ ܕܚܵܝܸܐ ܬܵܡܵܐ ܥܲܡܲܝܗܝ ܘܩܘܼܘܸܠܸܗ ܕܒܸܕ ܗܵܘܸܐ ܗܲܝܸܪܵܢܵܐ ܩܵܬܲܝܗܝ.                            

    ܟܠܲܝܗܝ ܚܲܝܘܵܬܸ̈ܐ ܓ̰ܡܸܥܠܗ݇ܘܿܢ ܠܸܚܕܵܕܸܐ ܘܢܣܸܒܼܠܗ݇ܘܿܢ ܡܸܠܟܵܐ ܒܘܼܬ ܩܲܒܲܠܬܸܗ ܒܲܝܢܵܬ ܓܵܢܲܝܗܝ. ܦܝܼܠܵܐ ܐ݇ܡܸܪܸܗ "ܠܲܝܬ ܚܲܕ݇ ܙܝܵܢܵܐ ܒܐܵܗܵܐ ܡܸܢܕܝܼ. ܗܿܘ ܙܥܘܿܪܵܐ ܝܠܸܗ ܘܪܵܒܵܐ ܡܚܝܼܠܵܐ؛ ܘܘܵܠܸܐ ܝܠܵܗܿ ܥܲܠܲܢ ܕܗܲܝܸܪܲܚ ܠܸܗ." ܐܲܪܢܒܼܵܐ (ܟܸܪܘܝܼܫ) ܐ݇ܡܸܪܵܗܿ "ܡܸܣܟܸܢܵܐ ܠܲܝܬ ܠܸܗ ܟ̰ܘܼ ܐ݇ܢܵܫܵܐ؛ ܐܲܚܢܲܢ ܟܸܐ ܡܵܨܲܚ ܗܵܘܲܚ ܒܫܵܘܦܵܐ ܕܚܸܙܡܵܢܸܗ." ܬܲܥܠܵܐ ܙܸܐ ܐ݇ܡܸܪܸܗ "ܠܸܐ ܝܠܵܗܿ ܡܼܢ ܗܵܘܢܵܐ ܕܠܵܐ ܨܲܚܨܵܝܬܵܐ ܩܲܒܠܲܚܠܸܗ ܓܵܘ ܟܸܢܫܲܢ. ܡܐܲܝܟܵܐ ܝܵܕܥܲܚ ܕܠܲܝܬ ܠܸܗ ܚܲܕ݇ ܢܝܼܫܵܐ ܒܝܼܫܵܐ؟" ܗܵܝܓܵܗ ܛܲܘܣܵܐ ܐ݇ܡܸܪܵܗܿ "ܡܘܼܕ݇ ܒܸܕ ܗܵܘܝܵܐ. ܫ̰ܵܪܸܐ ܙܥܘܿܪܵܐ ܝܠܸܗ ܘܣܢܝܼܩܵܐ ܝܠܸܗ ܠܗܲܝܲܪܬܵܐ." ܐܝܼܢܵܐ ܝܵܘܢܵܐ ܓ̰ܘܼܘܸܒܠܵܗܿ "ܐܵܢܵܐ ܠܸܐ ܝܘܵܢ ܒܸܚܫܵܒܼܵܐ ܕܫܲܪܝܼܪܵܐ ܗܵܘܸܐ ܒܗܲܡܙܲܡܝܵܬܘܼ̈ܗܝ. ܒܘܼܫ ܨܦܵܝܝܼ ܝܠܵܗܿ ܕܩܲܕ݇ܡܵܝܬܵܐ ܦܵܐܸܫ ܨܘܼܚܨܝܼܵܐ ܕܗܵܘܲܚ ܚܲܬܝܼܬܸ̈ܐ (ܚܵܬܸܪܓ̰ܲܡܥ) ܒܝܼܸܗ.                                   

ܒܚܲܪܬܵܐ ܐܲܪܝܵܐ ܕܝܼܗ݇ܘܵܐ ܪܸܫܵܢܵܐ ܕܗܵܘ ܟܸܢܫܵܐ ܐ݇ܡܸܪܸܗ "ܐܵܢܵܐ ܡܲܚܫܘܼܚܸܐ ܝܘܸܢ ܕܫܵܒܼܩܲܚ ܦܵܐܸܫ ܠܟܸܣܠܲܢ ܩܵܐ ܚܲܕ݇ ܡܸܬܚܵܐ ܘܚܵܝܸܐ ܥܲܡܲܢ ܕܚܵܙܲܚ ܕܵܐܟܼܝܼ ܒܸܕ ܗܵܘܝܵܐ. ܐܸܢ ܚܙܸܐ ܠܲܢ ܕܠܸܐ ܝܠܸܗ ܡܙܲܡܝܵܢܵܐ (ܙܝܵܢܵܢܵܐ) ܒܸܕ ܩܲܒܠܲܚܠܸܗ ܐܲܝܟܼ ܚܲܕ݇ ܗܲܕܵܡܵܐ ܕܟܸܢܫܲܢ." ܟܠܲܝܗܝ ܚܲܝܘܵܬܸ̈ܐ ܕܗܿܘ ܟܸܢܫܵܐ ܩܘܼܒܸܠܗ݇ܘܿܢ ܠܐܵܗܵܐ ܚܲܒܪܵܐ ܘܝܗܸܒܼܠܗ݇ܘܿܢ ܦܣܵܣܵܐ ܩܵܐ ܥܲܩܸܪܒܼܵܐ ܙܥܘܿܪܵܐ ܕܚܵܝܸܐ ܥܲܡܲܝܗܝ ܘܗܵܘܸܐ ܗܲܕܵܡܵܐ ܕܟܸܢܫܲܝܗܝ.                                                 

   ܥܒܼܸܖ̈ܗ݇ܘܿܢ ܪܵܒܵܐ ܝܵܘܡܵܢܸ̈ܐ ܘܟܠܲܝܗܝ ܚܲܝܘܵܬܸ̈ܐ ܡܘܼܚܸܒܠܗ݇ܘܿܢ ܠܥܲܩܸܪܒܼܵܐ ܒܗܿܝ ܕܙܥܘܿܪܵܐ ܗ݇ܘܵܐ ܘܩܘܼܒܸܠܗ݇ܘܿܢ ܩܵܬܸܗ ܐܲܝܟܼ ܚܲܕ݇ ܗܲܕܵܡܵܐ ܒܓܵܘ ܟܸܢܫܲܝܗܝ. ܥܲܩܸܪܒܼܵܐ ܐܝܼܬ ܗ݇ܘܵܐ ܠܸܗ ܚܲܕ݇ ܠܸܫܵܢܵܐ ܚܸܠܝܵܐ ܘܡܲܫܦܸܪܵܢܵܐ ܘܒܟܠ ܦܸܨܠܵܐ  ܕܗܵܘܸܐ ܗ݇ܘܵܐ ܟܸܐ ܫܵܩܸܠ ܗ݇ܘܵܐ ܠܸܗ ܠܸܒܵܐ ܕܚܲܝܘܵܬܸ̈ܐ. ܘܐܵܢܝܼ ܙܸܐ ܟܸܐ ܡܲܚܸܒܝܼ ܗ݇ܘܵܘ ܠܸܗ ܪܵܒܵܐ ܒܗܿܝ ܕܟܸܐ ܡܝܲܩܸܪ ܗ݇ܘܵܐ ܠܗ݇ܘܿܢ ܘܟܠ ܥܕܵܢܵܐ ܟܸܐ ܐܵܡܸܪ ܗ݇ܘܵܐ ܕܫܒܼܘܿܩ ܡܸܢܲܝܗܝ ܠܲܝܬ ܠܸܗ ܟ̰ܘܼ ܐ݇ܢܵܫܵܐ. ܒܘܼܬ ܐܵܗܵܐ ܪܵܒܵܐ ܡܼܢ ܡܸܫܬܲܐܠܵܢܘܵܬܸ̈ܐ ܕܗܿܘ ܟܸܢܫܵܐ ܣܘܼܦܝܲܝܗܝ ܗ݇ܘܵܘ ܒܝܼܸܗ. ܥܲܩܸܪܒܼܵܐ ܙܸܐ ܒܙܪܝܼܙܘܼܬܵܐ (ܙܸܪܲܢܓܘܼܬܵܐ) ܟܸܐ ܪܵܚܸܛ ܗ݇ܘܵܐ ܘܟܸܐ ܡܲܓܡܸܪ ܗ݇ܘܵܐ ܠܗ݇ܘܿܢ ܐܵܢܝܼ ܫܘܼܓ݇ܠܵܢܸ̈ܐ. ܒܘܼܬ ܐܵܗܵܐ ܢܨܸܒܼܠܗ݇ܘܿܢ ܩܵܬܸܗ ܐܲܝܟܼ ܢܵܛܘܿܪܵܐ ܕܥܵܒܼܵܐ. ܥܵܩܸܪܒܼܵܐ ܟܲܕ ܪܵܒܵܐ ܦܨܝܼܚܵܐ ܗ݇ܘܵܐ ܒܘܼܬ ܩܢܵܝܬܵܐ ܕܕܲܪܓܼܸܗ ܒܟܠܸܗ ܚܲܝܠܸܗ ܒܸܚܦܵܛܵܐ ܗ݇ܘܵܐ ܒܫܘܼܓܼ݇ܠܵܢܘܼܗܝ. ܗܵܕܟܼܵܐ ܥܒܼܵܪܵܐ ܗ݇ܘܵܐ ܙܲܒܼܢܵܐ ܘܟܠܲܝܗܝ ܚܲܝܘܵܬܸ̈ܐ ܟܸܐ ܡܲܚܸܒܝܼ ܗ݇ܘܵܘ ܠܸܗ ܒܘܼܬ ܦܘܼܠܚܵܢܘܼ̈ܗܝ ܠܟܸܣ ܟܸܢܫܲܝܗܝ ܘܟܸܐ ܗܲܡܸܢܝܼ ܗ݇ܘܵܘ ܒܝܼܸܗ ܘܒܚܘܼܒܵܐ ܕܐܝܼܬ ܗ݇ܘܵܐ ܠܸܗ ܠܟܸܣܠܲܝܗܝ.                                             

    ܚܲܕ݇ ܝܵܘܡܵܐ ܟܲܕ ܟܠܲܝܗܝ ܚܲܝܘܵܬܸ̈ܐ ܒܠܝܼܓܸ̈ܐ ܗ݇ܘܵܘ ܒܚܲܝܘܼܬܲܝܗܝ ܝܵܘܡܵܝܬܵܐ ܦܠܸܛܠܸܗ ܚܲܒܪܵܐ ܕܥܲܩܸܪܒܼܵܐ ܢܗ݇ܝܼܣܵܐ ܝܠܸܗ ܠܙܲܪܵܦܵܐ. ܓ̰ܡܸܥܠܗ݇ܘܿܢ ܚܲܝܘܵܬܸ̈ܐ ܒܸܝܬ ܦܲܠܓܵܐ ܕܥܵܒܼܵܐ (ܐܲܝܟܼ ܕܝܼܗ݇ܘܵܐ ܥܝܵܕܲܝܗܝ) ܩܵܐ ܕܕܵܪܫܝܼ ܒܘܼܬ ܐܵܗܵܐ ܓܸܕܫܵܐ. ܟܲܕ ܓ̰ܡܸܥܠܗ݇ܘܿܢ ܟܠܲܝܗܝ ܚܲܝܘܵܬܸ̈ܐ؛ ܒܘܼܩܸܪܗ݇ܘܿܢ ܒܘܼܬ ܕܵܐܟܼܝܘܼܬܵܐ ܕܗܵܘ ܓܸܕܫܵܐ. ܗܵܝܓܵܗ ܥܲܩܸܪܒܼܵܐ ܒܚܲܕ݇ ܠܸܫܵܢܵܐ ܚܸܠܝܵܐ ܘܡܲܟܝܼܟܼܵܐ ܐ݇ܡܸܪܸܗ ܕܗܿܘ ܠܸܐ ܝܠܸܗ ܚܲܛܵܝܵܐ ܐܸܠܵܐ ܐܝܼܩܵܪܸܗ ܦܝܼܫܵܐ ܝܠܸܗ ܫܩܝܼܠܵܐ ܒܝܲܕ ܙܲܪܵܦܵܐ ܒܗܿܝ ܕܙܲܪܵܦܵܐ ܠܸܐ ܝܠܵܗܿ ܟܝܼܦܬܵܐ ܩܲܕ݇ܡ ܐܲܩܠܘܼ̈ܗܝ ܩܵܐ ܕܪܵܝܬܵܐ ܕܫܠܵܡܵܐ ܟܲܕ ܗܿܘ (ܥܲܩܸܪܒܼܵܐ) ܐܲܝܟܼ ܚܲܕ݇ ܢܵܛܘܿܪܵܐ ܕܥܵܒܼܵܐ ܐܝܼܬ ܝܠܸܗ ܚܲܕ݇ ܕܲܪܓܼܵܐ ܥܸܠܵܝܵܐ.              

   ܗܵܝܓܵܗ ܝܵܘܢܵܐ ܕܗܵܘܢܵܢܬܵܐ ܗ݇ܘܵܐ ܘܚܕܝܼܪܬܲܝܗܝ ܗ݇ܘܵܐ ܪܵܒܵܐ ܦܸܢܝܵܬܸ̈ܐ ܕܒܪܝܼܬܵܐ؛ ܐ݇ܡܸܪܵܗܿ "ܖ̈ܵܚܡܝܼ ܡܘܼܚܸܒܸ̈ܐ؛ ܐܵܢܵܐ ܒܸܚܫܵܒܼܵܐ ܝܘܵܢ ܕܒܸܚܠܵܛܵܐ ܝ݇ܬܘܿܢ" ܘܡܘܼܙܝܸܕܠܵܗܿ ܒܚܲܒܖ̈ܵܢܘܼܗܿ ܕܙܲܪܵܦܵܐ ܠܲܝܬ ܠܵܗܿ ܟ̰ܘܼ ܓܢܵܗܵܐ ܒܗܿܝ ܕܒܗܿܘ ܩܕܵܠܘܼܗܿ ܝܲܪܝܼܟܼܵܐ ܠܸܐ ܡܵܨܝܵܐ ܕܟܵܝܦܵܐ ܩܵܕ݇ܡ ܐܲܩܠܵܐ ܕܥܲܩܸܪܒܼܵܐ. ܐܝܼܢܵܐ ܚܲܝܘܵܬܸ̈ܐ ܠܵܐ ܩܘܼܒܸܠܗ݇ܘܿܢ ܘܣܸܢܝܵܐ ܠܗ݇ܘܿܢ ܙܲܪܵܦܵܐ ܘܛܪܝܼܕܵܐ ܠܗ݇ܘܿܢ ܡܼܢ ܓܵܘ ܟܸܢܫܲܝܗܝ.  

    ܕܸܪܗ݇ܘܿܢ ܟܠܲܝܗܝ ܚܲܝܘܵܬܸ̈ܐ ܕܥܵܒܼܵܐ ܠܫܘܼܓܼ݇ܠܲܝܗܝ ܘܠܚܲܝܘܼܬܲܝܗܝ ܘܥܲܩܸܪܒܼܵܐ ܙܸܐ ܐܲܝܟܼ ܟܠ ܥܕܵܢܵܐ ܒܠܸܓܠܸܗ ܒܡܲܓܡܲܪܬܵܐ ܕܘܵܠܝܼܵܬܸ̈ܐ ܕܐܝܼܬ ܗ݇ܘܵܐ ܠܸܗ ܒܥܵܒܼܵܐ. ܗܵܕܟܼܵܐ ܒܵܬ݇ܪ ܚܲܕ݇ ܡܸܬܚܵܐ ܝܲܪܝܼܟܼܵܐ ܡܛܸܐ ܠܸܗ ܠܕܲܪܓܼܵܐ ܕܢܵܛܸܪ ܐܵܘܨܖܸ̈ܐ (ܐܲܢܒܵܖܸ̈ܐ). ܡܸܢ݇ܕܪܸܫ݇ ܥܲܩܸܪܒܼܵܐ ܒܸܪܚܵܛܵܐ ܘܒܸܚܦܵܛܵܐ ܗ݇ܘܵܐ ܩܵܐ ܡܲܓܡܲܪܬܵܐ ܕܘܵܠܝܵܬܘܼܗܝ ܐܝܼܢܵܐ ܐ݇ܚܸܪ݇ܢܵܐ ܠܸܐ ܗ݇ܘܵܐ ܡܲܟܝܼܟܼܵܐ ܐܲܝܟܼ ܝܵܘܡܵܢܸ̈ܐ ܩܲܕ݇ܡܵܝܸ̈ܐ.                                                   

   ܥܒܼܸܪܗ݇ܘܿܢ ܪܵܒܵܐ ܫܲܒܵܬܸ̈ܐ ܘܡܸܢ݇ܕܪܸܫ݇ ܚܲܕ݇ ܝܵܘܡܵܐ ܐ݇ܬܸܐ ܠܸܗ ܚܲܒܪܵܐ ܕܥܲܩܸܪܒܼܵܐ ܢܗ݇ܝܼܣܵܐ ܝܠܸܗ ܠܣܲܡܘܼܪܵܐ. ܚܕܵܐ ܓܵܗܵܐ ܐ݇ܚܸܪ݇ܬܵܐ ܓ̰ܡܸܥܠܗ݇ܘܿܢ ܟܠܲܝܗܝ ܚܲܝܘܵܬܸ̈ܐ ܒܥܵܒܼܵܐ ܘܫܘܼܪܸܐܠܗ݇ܘܿܢ ܗܲܓܘܼܝܸܐ ܥܲܠ ܐܵܗܵܐ ܩܲܘܲܡܬܵܐ. ܥܲܩܸܪܒܼܵܐ ܝ݇ܣܸܩܠܸܗ ܠܒܸܐܡܵܐ ܘܒܣܸܟܪܵܢܘܼܬܵܐ ܐ݇ܡܸܪܸܗ ܕܠܸܐ ܝܠܸܗ ܚܠܝܼܛܵܐ ܒܫܘܼܓܼ݇ܠܸܗ ܘܣܲܡܘܼܪܵܐ ܚܲܛܵܝܵܐ ܝܠܸܗ ܘܡܘܼܙܝܸܕܠܸܗ ܕܣܲܡܘܼܪܵܐ ܠܸܐ ܝܠܸܗ ܡܗܘܼܡܢܵܐ ܠܗܿܘ ܟܸܢܫܵܐ ܘܛܲܫܘܼܝܸܐ ܝܠܸܗ ܠܡܸܐܟܼܘܿܠܝܵܬܸ̈ܐ ܕܡܲܫ݇ܟ̰ܘܼܚܲܝܗܝ ܝܠܸܗ ܩܵܐ ܓܵܢܸܗ.         

     ܟܠܘܿܢܬܲܝܗܝ ܫܠܸܡܠܗ݇ܘܿܢ ܥܲܠ ܥܲܩܸܪܒܼܵܐ ܘܫܩܸܠܗ݇ܘܿܢ ܦܘܼܣܩܵܢܵܐ ܕܣܲܡܘܼܪܵܐ ܚܲܝܵܒܼܵܐ ܝܠܸܗ ܘܦܘܼܚܸܠܗ݇ܘܿܢ ܠܥܲܩܸܪܒܼܵܐ. ܡܸܢ݇ܕܪܸܫ݇ ܝܵܘܢܵܐ ܝܣܸܩܠܵܗܿ ܘܐ݇ܡܸܪܵܗܿ "ܡܘܼܚܸܒܝܼ ܠܵܐ ܡܲܠܝܸܙܘܼܢ ܓܵܘ ܕܝܵܢܬܵܘܟܼܘܼܢ. ܐܲܚܬܘܼܢ ܒܸܚܠܵܛܵܐ ܝܬܘܿܢ ܒܗܿܝ ܕܣܲܡܘܼܪܵܐ ܚܲܕ݇ ܗܲܕܵܡܵܐ ܫܲܪܝܼܪܵܐ ܗ݇ܘܝܼܵܐ ܝܠܸܗ ܗܲܠ ܐܸܕܝܘܿܡ ܝܵܘܡܵܐ ܩܵܐ ܐܵܗܵܐ ܟܸܢܫܵܐ ܘܐܸܢ ܛܘܼܫܝܵܐ ܝܠܸܗ ܠܡܸܐܟܼܘܿܠܝܵܬܸ̈ܐ، ܘܵܠܝܼܬܸܗ ܡܘܼܥܒܼܸܕܬܵܐ ܝܠܵܗܿ ܕܗܵܕܟܼܵܐ ܥܲܒܼܸܕ ܒܗܿܝ ܕܐܝܼܬ ܠܸܗ ܚܲܕ݇ ܢܸܣܝܵܢܵܐ ܪܲܒܵܐ ܒܫܘܼܓܼ݇ܠܵܐ ܕܓܵܢܸܗ ܘܢܝܼܫܸܗ ܠܸܐ ܝܠܸܗ ܕܡܵܚܸܐ ܙܝܵܢܵܐ ܠܐܵܗܵܐ ܟܸܢܫܵܐ."                     

  ܒܦܪܵܩܬܵܐ ܕܚܲܒܖ̈ܵܢܸܐ ܕܝܵܘܢܵܐ ܬܲܥܠܵܐ ܐ݇ܡܸܪܸܗ "ܖ̈ܵܚܡܝܼ ܫܲܪܝܼܖܸ̈ܐ ܩܵܐ ܓܵܗܵܐ ܬܪܝܼܵܢܝܼܬܵܐ ܐܵܗܵܐ ܡܸܢܕܝܼ ܩܲܘܘܼܡܵܐ ܝܠܸܗ ܒܟܸܢܫܲܢ. ܐܸܢ ܨܦܵܝܝܼ ܬܲܚܡܸܢܝܼܬܘܿܢ ܒܸܕ ܪܵܥܫܝܼܬܘܿܢ ܕܣܲܡܘܼܪܵܐ ܙܸܐ ܐܲܝܟܼ ܙܲܪܵܦܵܐ ܠܲܝܬ ܠܸܗ ܟ̰ܘܼ ܚܕܵܐ ܓܢܵܗܵܐ ܘܦܝܼܫܵܐ ܝܠܸܗ ܛܠܝܼܡܵܐ." ܐܝܼܢܵܐ ܡܸܢ݇ܕܪܼܸܫ݇ ܚܲܝܘܵܬܸ̈ܐ ܕܥܵܒܼܵܐ ܠܵܐ ܩܘܼܒܸܠܗ݇ܘܿܢ ܠܚܲܒܪܵܐ ܕܝܵܘܢܵܐ ܘܬܲܥܠܵܐ. ܕܸܒܵܐ ܐ݇ܡܸܪܵܗܿ "ܖ̈ܵܚܡܝܼ ܡܘܼܚܸܒܸ̈ܐ؛ ܐܵܢܵܐ ܠܸܐ ܝܘܵܢ ܒܸܚܫܵܒܼܵܐ ܕܐܲܢܸܐ ܚܲܒܖ̈ܵܢܸܐ ܫܪܵܪܵܐ ܗܵܘܝܼ. ܟܠ ܕܐܲܝܟܼ ܕܗܵܘܝܵܐ ܥܲܩܸܪܒܼܵܐ ܚܲܕ݇ ܗܲܕܵܡܵܐ ܡܵܪ ܕܲܪܓܼܵܐ ܘܡܵܪ ܐܝܼܩܵܪܵܐ ܝܠܸܗ ܘܐܲܠܨܵܝܬܵܐ ܝܠܵܗܿ ܕܐܲܚܢܲܢ  ܫܵܠܡܲܚ ܥܵܠܸܗ ܘܦܵܠܚܲܚ ܐܲܝܟܼ ܨܸܒܼܝܵܢܸܗ." ܗܵܝܓܵܗ ܫܩܸܠܗ݇ܘܿܢ ܦܘܼܣܩܵܢܵܐ ܕܣܲܡܘܼܪܵܐ ܙܸܐ ܦܵܐܸܫ ܬܘܼܥܠܸܡܵܐ ܘܛܪܝܼܕܵܐ ܡܼܢ ܟܸܢܫܲܝܗܝ.                              

    ܒܵܬ݇ܪ ܟܡܵܐ ܝܲܖ̈ܚܸܐ، ܥܲܩܸܪܒܼܵܐ ܡܸܛܝܵܐ ܗ݇ܘܵܐ ܠܕܲܪܓܼܵܐ ܕܪܲܒ ܥܵܒܼܵܐ ܒܟܸܢܫܵܐ ܕܚܲܝܘܵܬܸ̈ܐ ܘܟܸܐ ܡܬܲܓܒܸܪ ܗ݇ܘܵܐ ܠܟܠܲܝܗܝ ܫܘܼܓܼܠܵܢܸ̈ܐ ܕܟܸܢܫܵܐ. ܡܼܢ ܓ̰ܲܠܕܸܐ ܡܘܼܨܠܝܼܵܐ ܗ݇ܘܵܐ ܠܐܲܪܝܵܐ ܡܼܢ ܕܲܪܓܼܸܗ ܒܐܵܗܵܐ ܚܘܼܫܬܵܐ (ܡܵܗܵܢܵܐ) ܕܗܿܘ ܪܵܒܵܐ ܣܝܼܒܼܵܐ ܗ݇ܘܵܐ ܘܒܸܠܙܵܡܵܐ ܝܠܵܗܿ ܕܫܵܠܸܐ ܡܼܢ ܦܘܼܠܚܵܢܵܐ. ܗܵܝܓܵܗܿ ܒܓܵܢܸܗ ܝܬܝܼܒܼܵܐ ܗ݇ܘܵܐ ܒܫܵܘܦܸܗ ܘܗܲܟܘܼܡܸܐ ܗ݇ܘܵܐ ܠܟܸܢܫܵܐ ܘܟ̰ܘܼ ܚܲܕ݇ ܠܸܐ ܡܵܨܸܐ ܗ݇ܘܵܐ ܕܫܵܩܸܠ ܗ݇ܘܵܐ ܐܵܦ ܚܕܵܐ ܦܵܣܘܿܥܬܵܐ ܕܠܵܐ ܒܨܸܒܼܝܵܢܸܗ.                         

  ܐܝܼܢܵܐ ܡܸܢ݇ܕܪܸܫ݇ ܗܵܕܟܼܵܐ ܩܘܼܘܸܡܠܵܗܿ ܕܡܲܝܡܘܼܢ(ܩܘܿܦܵܐ) ܦܝܼܫܠܵܗܿ ܢܗ݇ܝܼܣܬܵܐ ܒܝܲܕ ܥܲܩܸܪܒܼܵܐ ܘܗܿܘ ܗܵܕܟܼܵܐ ܡܘܼܕܸܥܠܸܗ ܕܡܲܝܡܘܼܢ ܚܲܕ݇ ܗܲܕܵܡܬܵܐ ܡܲܚܪܸܒܼܵܢܬܵܐ ܝܠܵܗܿ ܩܵܐ ܗܿܘ ܟܸܢܫܵܐ ܒܗܵܝ ܕܪܵܒܵܐ ܗܲܡܙܘܼܡܸܐ ܝܠܵܗܿ ܘܒܸܓ̰ܘܵܓ̰ܵܐ ܝܠܵܗܿ ܕܠܵܐ ܦܣܵܣܵܐ ܕܝܼܸܗ ܘܗܵܕܟܼܵܐ ܒܸܕܪܵܝܵܐ ܝܠܵܗܿ ܫܓܼܘܼܫܝܵܐ ܓܵܘ ܟܸܢܫܲܝܗܝ ܘܚܲܙܕܘܼܓܸܐ ܝܠܵܗܿ ܠܚܘܼܝܵܕܵܐ ܕܒܸܝܠ ܚܲܝܘܵܬܸ̈ܐ. ܗܵܝܓܵܗ ܝܵܘܢܵܐ؛ ܬܲܥܠܵܐ ܘܐܲܪܢܒܼܵܐ (ܟܸܪܘܝܼܫ) ܩܝܼܡܠܗܘܿܢ ܘܐ݇ܡܸܪܗ݇ܘܿܢ ܒܩܵܠܵܐ ܪܵܡܵܐ ܕܡܲܝܡܘܼܢ ܠܲܝܬ ܠܵܗܿ ܟ̰ܘܼ ܓܢܵܗܵܐ ܘܟܝܵܢܘܼܗܿ ܡܲܥܒܼܘܼܕܸܐ ܝܠܸܗ ܕܗܲܡܙܸܡܵܗܿ ܪܵܒܵܐ. ܐܝܼܢܵܐ ܐܸܢ ܠܵܐ ܪܵܥܫܝܼ ܚܲܝܘܵܬܸ̈ܐ ܠܩܸܢܛܵܐ ܕܒܪܵܝܵܐ ܝܠܸܗ ܥܲܩܸܪܒܼܵܐ، ܒܓ̰ܲܠܕܘܼܬܵܐ ܟܸܢܫܲܝܗܝ ܒܸܕ ܢܵܘܸܠ ܘܒܸܕ ܦܲܪܦܸܣ.                                                   

    ܐܲܝܟܼ ܟܠ ܥܕܵܢܵܐ ܗܲܡܙܲܡܬܵܐ ܠܲܝܬ ܗ݇ܘܵܐ ܠܵܗܿ ܟ̰ܘܼ ܚܲܕ݇ ܝܘܼܬܪܵܢܵܐ ܘܟܠܘܿܢܬܲܝܗܝ ܡܫܘܼܪܸܪܗ݇ܘܿܢ ܕܡܲܝܡܘܼܢ ܒܸܕܪܵܝܵܐ ܝܠܵܗܿ ܦܘܼܠܵܓܼܵܐ ܒܥܵܒܼܵܐ ܘܥܒܼܝܼܕܠܗ݇ܘܿܢ ܕܝܵܢܬܵܐ ܒܲܪܩܘܿܒܼܠܘܼܗܿ. ܒܚܲܪܬܵܐ ܗܵܕܟܼܵܐ ܩܛܸܥܠܗ݇ܘܿܢ ܕܗܵܝ ܙܸܐ ܦܵܝܫܵܐ ܛܪܝܼܕܬܵܐ ܡܼܢ ܓܵܘ ܥܵܒܼܵܐ.                              

    ܗܵܕܟܼܵܐ ܟܠ ܟܡܵܐ ܥܕܵܢܵܐ ܥܲܩܸܪܒܼܵܐ ܗ݇ܘܸܐ ܠܸܗ ܒܸܢܗܵܣܵܐ ܠܚܲܕ݇ ܡܼܢ ܚܲܝܘܵܬܸ̈ܐ. ܐܝܼܢܵܐ ܐܵܢܝܼ ܚܲܝܘܵܬܸ̈ܐ ܐ݇ܚܸܖ̈݇ܢܸܐ ܒܸܓܪܵܫܘܼܗܿ ܗ݇ܘܵܘ ܓܵܢܲܝܗܝ ܘܐ݇ܡܵܪܵܐ ܗ݇ܘܵܘ ܕܠܸܐ ܒܵܥܝܼ ܚܵܒܼܛܝܼ ܓܵܘ ܐܵܗܵܐ ܫܘܼܓܼ݇ܠܵܐ ܘܐܵܢܝܼ ܕܦܝܼܫܸ̈ܐ ܝܢܵܐ ܢܗܝܼܣܸ̈ܐ ܒܓܵܢܲܝܗܝ ܡܵܪ ܓܢܵܗܵܐ ܝܢܵܐ. ܝܵܢ ܙܸܐ ܐ݇ܡܵܪܵܐ ܗ݇ܘܵܘ ܕܐܵܢܝܼ ܚܫܝܼܚܸ̈ܐ ܝܢܵܐ ܠܗܵܘ ܡܸܢܕܝܼ ܕܐ݇ܬܝܼܵܐ ܝܠܸܗ ܒܪܸܫܲܝܗܝ ܒܗܿܝ ܕܐܸܢ ܠܵܐ ܚܲܒܼܛܝܼ ܗ݇ܘܵܘ ܒܫܘܼܓܼ݇ܠܵܢܸ̈ܐ ܕܥܲܩܸܪܒܼܵܐ ܗܿܘ ܠܸܐ ܢܵܗܸܣ ܗ݇ܘܵܐ ܠܗ݇ܘܿܢ. ܚܲܕ݇ܟܡܵܐ ܙܸܐ ܐ݇ܡܵܪܵܐ ܗ݇ܘܵܘ ܕܡܘܼܕ ܫܘܼܓܼ݇ܠܵܐ ܝܠܸܗ! ܩܵܡܘܼܕܝܼ ܚܲܒܼܛܝܼ ܠܵܗܿ ܓܵܢܲܝܗܝ ܓܵܘ ܐܵܗܵܐ ܕܘܼܪܵܫܵܐ ܟܲܕ ܥܲܩܸܪܒܼܵܐ ܒܚܘܼܒܵܐ ܝܠܸܗ ܥܲܡܲܝܗܝ ܘܩܵܘܡܵܐ ܕܚܲܕ݇ ܝܵܘܡܵܐ ܗܵܘܝܼ ܣܢܝܼܩܸ̈ܐ ܠܗܲܝܲܪܬܸܗ!                                                                       

    ܥܒܼܸܖ̈ܗ݇ܘܿܢ ܟܡܵܐ ܫܸܢܸ̈ܐ ܒܐܵܗܵܐ ܙܢܵܐ (ܦܸܨܠܵܐ) ܘܒܚܲܪܬܵܐ ܡܛܸܐ ܠܸܗ ܚܲܕ݇ ܝܵܘܡܵܐ ܕܥܲܩܸܪܒܼܵܐ ܢܗ݇ܝܼܣܵܐ ܗ݇ܘܵܐ ܠܒܘܼܫܵܝܘܼܬܵܐ ܕܚܲܝܘܵܬܸ̈ܐ ܐܵܦ ܐܵܢܝܼ ܕܚܲܕ݇ ܝܵܘܡܵܐ ܖ̈ܲܚܡܘܼܗـܝ ܗ݇ܘܵܘ. ܘܟܸܢܫܲܝܗܝ ܦܘܼܪܦܸܣܵܐ ܗ݇ܘܵܘ ܒܗܿܝ ܕܪܵܒܵܐ ܡܸܢܲܝܗܝ ܥܪܝܼܩܸ̈ܐ ܗ݇ܘܵܘ ܝܲܢ ܦܝܼܫܸ̈ܐ ܗ݇ܘܵܘ ܛܖ̈ܝܼܕܸܐ ܡܼܢ ܥܵܒܼܵܐ ܘܥܲܩܸܪܒܼܵܐ ܡܘܼܚܪܸܒܼܵܐ ܗ݇ܘܵܐ ܠܩܸܢܸ̈ܐ ܕܦܵܝܫܵܢܸ̈ܐ. ܗܵܝܓܵܗ ܝܵܘܢܵܐ ܟܲܕ ܛܡܝܼܪܬܵܐ ܒܚܲܫܵܐ ܦܬܝܼܚܲܝܗܝ ܠܵܗܿ ܓܘܼܠܦܵܢܘܼ̈ܗܿ ܘܦܪܸܚܠܵܗܿ ܡܼܢ ܗܿܝ ܕܘܼܟܬܵܐ ܕܚܲܕ݇ ܝܵܘܡܵܐ ܫܲܡܝܼܢܬܵܐ ܗ݇ܘܵܐ ܘܥܵܡܘܿܪܬܵܐ ܘܐܵܕܝܼܵܐ ܚܕܝܼܪܬܵܐ ܗ݇ܘܵܐ ܠܚܕܵܐ ܚܲܪܵܒܝܼܵܐ. ܘܟܲܕ ܦܪܵܚܵܐ ܗ݇ܘܵܐ ܒܗܵܘܵܐ ܗܵܕܟܼܵܐ ܐ݇ܡܸܪܵܗܿ ܒܬܘܵܬܵܐ (ܒܗܲܣܪܲܬ) "ܐܸܢ ܗܵܘܲܚ ܗ݇ܘܵܐ ܕܝܼܢܸܐ ܒܟܸܐܢܘܼܬܵܐ ܘܣܵܢܕܲܚ ܗ݇ܘܵܐ ܠܸܚܕܵܕܐ ܘܠܵܐ ܚܵܕܲܚ ܗ݇ܘܵܐ ܡܼܢ ܢܦܵܠܬܵܐ ܕܖ̈ܵܚܡܲܢ ܘܫܒܼܵܒܼܲܢ ܐܸܕܝܘܿܡ ܠܸܐ ܗܵܘܸܐ ܗ݇ܘܵܐ ܦܘܼܪܦܸܣܵܐ ܩܸܢܲܢ ܘܠܸܐ ܗܵܘܲܚ ܗ݇ܘܵܐ ܥܸܨܝܸܐ ܕܫܵܒܼܩܲܚ ܠܸܗ ܒܲܝܬܲܢ ܘܒܸܢܲܢ ܘܐܵܙܲܠ݇ܚ ܠܕܘܼܟܵܢܸ̈ܐ ܪܸܚܩܵܐ ܘܚܵܝܲܚ ܒܢܘܼܟܼܪܵܝܘܼܬܵܐ."                    

                                                 ܐܲܒ 2012