ܡܬܠ̈ܐܐܬܘܖ̈ܝܐ

 ܫܡܝܪܡ ܕܘܝܕܦܘܪܝܐܢ

 

ܝ

܀ ܝܵܘܡܲܢ ܟܝܼܡܠܸܗ.

ܦܘܼܫܵܩܵܐ: ܐܝܼܡܲܢ ܕܚܕܵܐ ܩܲܘܲܡܬܵܐ ܩܲܘܸܡܵܐ ܕܒܸܕ ܡܲܡܛܸܝܵܐ ܙܝܵܢܵܐ ܒܕܲܥܬܝܼܕ ܥܲܠ ܚܲܝܘܼܬܵܐ ܝܲܢ ܫܘܼܓܼ݇ܠܵܐ ܕܐ݇ܢܵܫܸ̈ܐ ܒܕܲܥܬܝܼܕ، ܟܸܐ ܡܲܦܠܸܚܝܼ ܠܸܗ ܐܵܗܵܐ ܡܲܬܠܵܐ. 

܀ ܝܘܼܪܟܼܘܼܟܼ ܦܸܬܘܘܼܟܼ ܚܲܕ݇ ܒܸܕ ܥܵܒܼܸܕܠܗ݇ܘܿܢ.

ܦܘܼܫܵܩܵܐ: ܚܲܕ݇ ܗܵܕܟܼܵܐ ܒܸܕ ܡܵܚܸܐ ܠܘܼܟܼ ܕܦܸܨܠܘܼܟܼ ܫܲܚܠܸܦ ܘܠܵܐ ܝܵܕܥܸܐ ܠܘܼܟܼ ܥܵܠܡܵܐ. ܐܵܗܵܐ ܡܲܬܠܵܐ ܟܸܐ ܦܵܐܸܫ ܡܘܼܦܠܸܚܵܐ ܩܵܐ ܡܲܙܕܲܥܬܵܐ ܕܐ݇ܢܵܫܸ̈ܐ

܀ ܝܲܠܵܕ݇ܐ ܙܥܘܿܪܵܐ ܗܲܠ ܕܠܵܐ ܒܵܟܼܸܐ، ܝܸܡܵܐ ܒܸܙܵܐ ܠܸܐ ܝܵܗܒܼܵܐ ܠܸܗ.

ܦܘܼܫܵܩܵܐ: ܩܵܐ ܡܛܵܝܬܵܐ ܠܚܕܵܐ ܒܵܥܘܼܬܵܐ ܠܵܙܸܡ ܝܠܵܗܿ ܕܛܵܠܒܲܚ ܠܵܗܿ ܗܵܝ ܒܵܥܘܼܬܲܢ ܡܼܢ ܡܸܫܬܲܐܠܵܢܸ̈ܐ ܘܚܵܦܛܲܚ ܩܵܐ ܩܢܵܝܬܘܼܗܿ، ܐܸܢ ܠܵܐ ܟ̰ܘܼ ܚܲܕ݇ ܠܸܐ ܝܵܕܥܸܐ ܕܡܘܼܕܝܼ ܝܠܵܗܿ ܣܢܝܼܩܘܼܬܲܢ 

܀ ܝܲܡܵܐ ܟܸܐ ܒܵܪܙܵܐ ܩܲܕ݇ܡܘܼܗܝ.

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܠܚܲܕ݇ ܐ݇ܢܵܫܵܐ ܕܟ̰ܘܼ ܫܘܼܓܼ݇ܠܵܐ ܠܸܐ ܦܵܠܸܛ ܡܼܢ ܐܝܼܕܘܼܗܝ ܘܠܸܐ ܡܲܢܬܸܐ ܒܡܲܓܡܲܪܬܵܐ ܕܟ̰ܘܼ ܚܲܕ݇ ܫܘܼܓܼ݇ܠܵܐ

܀ ܝܸܡܵܐ ܕܐܲܒܘܿܢܵܐ ܚܸܙܝܵܐ ܠܲܢ.

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܥܲܠ ܟܸܦܢܵܐ ܕܐܵܢܝܼ ܕܪܵܒܵܐ ܨܒܝܼܖܸ̈ܐ ܝܢܵܐ ܠܐ݇ܟܼܵܠܵܐ

܀ ܝܸܡܘܼܟܼ ܒܸܕ ܡܲܒܟܼܸܢܵܗܿ.

ܦܘܼܫܵܩܵܐ: ܗܵܕܟܼܵܐ ܒܸܕ ܥܲܓ̰ܸܙܸܢܘܼܟܼ ܕܝܸܡܘܼܟܼ ܒܵܟܼܝܵܐ ܥܲܠ ܐܲܗܘܵܠܘܼܟܼ. ܐܵܗܵܐ ܡܲܬܠܵܐ ܙܸܐ ܟܸܐ ܦܵܐܸܫ ܡܘܼܦܠܸܚܵܐ ܩܵܐ ܡܲܙܕܵܥܬܵܐ ܕܐ݇ܢܵܫܸ̈ܐ

܀ ܝܵܬܘܿܡܵܐ ܥܲܠ ܚܵܨܵܐ ܕܓܘܼܡܠܵܐ ܙܸܐ ܗܵܘܸܐ ܥܲܩܸܪܒܼܵܐ ܟܸܐ ܢܵܗܣܵܐ ܠܸܗ.

ܦܘܼܫܵܩܵܐ: ܡܲܕܘܼܥܵܐ ܝܠܸܗ ܠܚܲܕ݇ ܐ݇ܢܵܫܵܐ ܒܝܼܫܓܲܕܵܐ ܕܒܟܠ ܚܕܵܐ ܐܲܝܟܵܢܵܝܘܼܬܵܐ ܕܗܵܘܸܐ، ܟܸܐ ܬܵܦܸܩ ܒܩܲܘܲܡܝܵܬܸ̈ܐ ܡܵܪܲܝ ܩܸܢܛܵܐ.                            

ܟ

܀ ܟܸܐ ܒܵܥܸܐ ܠܸܒܵܐ ܕܡܵܚܸܐ ܠܕܸܒܸܐ.

ܦܘܼܫܵܩܵܐ: ܩܵܐ ܡܲܓܡܲܪܬܵܐ ܕܚܲܕ݇ ܫܘܼܓܼ݇ܠܵܐ ܓܘܼܪܵܐ ܘܵܠܸܐ ܝܠܵܗܿ ܕܐ݇ܢܵܫܵܐ ܗܵܘܸܐ ܠܸܒܵܢܵܐ ܘܠܵܐ ܙܵܕܸܥ ܡܼܢ ܥܲܣܩܘܵܬܸ̈ܐ 

܀ ܟܸܐ ܥܵܒܼܪܝܼ ܒܬܘܿܢܸ̈ܐ، ܟܸܐ ܦܵܠܛܝܼ ܒܡܸܬܼܩܵܠܸ̈ܐ (ܒܡܸܣܩܵܠܸ̈ܐ).

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܠܚܲܫܸ̈ܐ ܘܚܲܡܸ̈ܐ ܕܟܸܐ ܡܲܫ݇ܟ̰ܚܝܼ ܒܦܸܪܝܘܼܬܵܐ ܐܝܼܢܵܐ ܠܸܐ ܦܵܠܛܝܼ ܒܐ݇ܣܵܢܵܝܘܼܬܵܐ ܡܼܢ ܓܵܘ ܠܸܒܵܐ ܕܐ݇ܢܵܫܵܐ

܀ ܟ̰ܘܿܡܵܚܬܘܼܗܿ ܛܘܼܫܝܬܘܼܗܿ ܝܠܵܗܿ.

ܦܘܼܫܵܩܵܐ: ܓܵܢܘܼܗܿ ܨܦܵܝܝܼ ܘܡܲܟܝܼܟܼܬܵܐ ܡܲܚܙܘܼܝܘܼܗܿ ܝܠܵܗܿ ܟܲܕ ܠܸܐ ܝܠܸܗ ܗܵܕܟܼܵܐ ܘܗܿܝܓܵܗ ܕܟܵܪܒܵܐ ܒܸܕ ܡܲܚܙܝܼܵܐ ܟܲܪܒܵܐ ܘܩܲܪܣܘܼܬܵܐ..

܀ ܟܘܼܪܵܐ ܩܵܐ ܟܘܼܪܵܐ ܐ݇ܡܵܪܵܐ ܝܠܸܗ: ܓ̰ܵܝܪܸܢ ܓܵܘ ܥܲܝܢܘܼܟܼ.

ܦܘܼܫܵܩܵܐ: ܒܘܼܬ ܚܲܕ݇ ܐ݇ܢܵܫܵܐ ܝܠܸܗ ܕܡܲܕܟܼܘܼܪܸܐ ܝܠܸܗ ܒܘܼܬ ܒܘܼܨܵܖܸ̈ܐ ܕܐ݇ܚܸܖ̈ܢܸܐ ܟܲܕ ܒܓܵܢܘܼܗܝ ܐܝܼܬ ܠܸܗ ܗܲܪ ܐܵܢܝܼ ܒܘܼܨܵܖܸ̈ܐ

܀ ܟܘܼܪܵܟܼܘܼܗܝ ܦܪܸܛܠܸܗ.

ܦܘܼܫܵܩܵܐ: ܒܘܼܬ ܚܲܕ݇ ܐ݇ܢܵܫܵܐ ܝܠܵܗܿ ܕܒܣܝܼܡܵܐ ܝܠܸܗ ܡܼܢ ܡܲܪܥܵܐ ܘܦܪܝܼܩܵܐ ܝܠܸܗ ܡܼܢ ܡܵܘܬܵܐ.

܀ ܟܘܼܪܬܵܐ ܥܒܼܝܼܕܘܼܗܿ ܝܠܸܗ ܬܪܸܝܢ ܩܸܛܥܸ̈ܐ.

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܥܲܠ ܚܲܕ݇ ܐ݇ܢܵܫܵܐ ܕܪܵܒܵܐ ܒܸܚܫܵܒܼܵܐ ܝܠܸܗ ܒܓܵܢܘܼܗܝ ܘܟܠ ܚܲܕ݇ ܫܘܼܓܼ݇ܠܵܐ ܕܥܒܼܵܕܘܼܗܝ ܝܠܸܗ ܪܵܒܵܐ ܓܲܪܘܘܼܣܘܼܗܿ ܝܠܸܗ 

܀ ܟܸܟܘܼܗܝ ܒܸܢܝܲܝܗܝ ܝܢܵܐ.

ܦܘܼܫܵܩܵܐ: ܟܸܐ ܝܵܕܥܝܼ ܠܕܝܼܠܵܝܵܬܘܼܗܝ (ܠܚܲܨܝܵܬܘܼܗܝ) ܘܠܸܐ ܙܵܕܥܝܼ ܡܸܢܘܼܗܝ ܒܗܿܝ ܕܡܲܟܝܼܟܼܵܐ ܝܠܸܗ ܘܕܠܵܐ ܐܝܼܕܵܐ ـ ܐܲܩܠܸ̈ܐ.

܀ ܟܠ ܕܘܼܟܵܐ ܕܩܵܛܥܵܐ، ܚܘܼܫ ܩܵܛܥܵܐ.

ܦܘܼܫܵܩܵܐ: ܟܠ ܚܲܕ݇ ܦܠܵܛܵܐ ܗܵܘܸܐ ܠܸܗ ܐܵܗܵܐ ܫܘܼܓܼ݇ܠܵܐ ܒܸܕ ܩܲܒܠܲܚ ܠܸܗ ܘܠܸܐ ܟܲܠܲܚ ܡܼܢ ܡܲܓܡܲܪܬܘܼܗܝ.

܀ ܟܠ ܝܵܘܡܵܐ ܢܲܗܪܵܐ ܓܘܼܓ̰ܵܐ ܠܸܐ ܡܲܬ݇ܝܵܐ.

ܦܘܼܫܵܩܵܐ: ܕܘܼܢܝܸܐ ܟܠ ܥܕܵܢܵܐ ܠܸܗ ܚܵܕܪܵܐ ܐܲܝܟܼ ܨܸܒܼܝܵܢܵܐ ܕܐ݇ܢܵܫܵܐ ܘܪܵܒܵܐ ܥܕܵܢܵܬܸ̈ܐ ܟܸܐ ܒܵܪܝܼ ܥܲܣܩܘܵܬܸ̈ܐ ܒܚܲܝܘܼܬܵܐ                           

܀ ܟܠ ܕܥܵܩܸܪ ܩܘܼܢܝܵܐ ܩܵܐ ܐ݇ܚܸܖ̈݇ܢܸܐ، ܒܓܵܢܘܼܗܝ ܒܸܕ ܢܵܦܸܠ ܓܵܘܘܼܗܝ.

ܦܘܼܫܵܩܵܐ: ܟܠ ܚܲܕ݇ ܐ݇ܢܵܫܵܐ ܕܚܵܦܸܛ ܩܵܐ ܡܚܵܝܬܵܐ ܕܙܝܵܢܵܐ ܥܲܠ ܐ݇ܚܸܖ̈݇ܢܸܐ ܒܓܵܢܘܼܗܝ ܙܸܐ ܒܸܕ ܩܵܒܸܠ ܙܝܵܢܵܐ܀ ܟܠ ܡܸܢܕܝܼ ܕܙܵܪܥܸܬ، ܗܲܪ ܗܿܘ ܒܸܕ ܚܵܨܕܸܬ ܠܸܗ.

ܦܘܼܫܵܩܵܐ: ܟܠ ܚܲܕ݇ ܫܘܼܓܼ݇ܠܵܐ ܥܵܒܼܸܕ ܐ݇ܢܵܫܵܐ، ܐܸܢ ܨܦܵܝܝܼ ܝܲܢ ܚܸܪܒܵܐ ܒܸܕ ܬܵܦܸܩ ܒܦܠܵܛܘܼܗܝ. ܐܝܼܬ ܚܲܕ݇ ܡܲܬܠܵܐ ܐ݇ܚܸܪ݇ܢܵܐ ܒܐܵܗܵܐ ܦܘܼܫܵܩܵܐ ܕܐ݇ܡܵܪܵܐ ܝܠܸܗ: ܐܸܢ ܦܵܘܚܵܐ ܙܵܪܥܸܬ ܓܲܪܕܵܒܘܼܠܸܐ ܒܸܕ ܚܵܨܕܸܬ.                          

܀ ܟܠ ܡܸܢܕܝܼ ܡܼܢ ܟܵܢܘܼܫܬܵܐ ܘܗܲܠ ܪܘܼܫܬܵܐ (ܪܲܦ̰ܫܬܵܐ).

ܦܘܼܫܵܩܵܐ: ܡܲܕܘܼܥܸܐ ܝܠܸܗ ܕܚܲܕ݇ ܫܘܼܠܵܐ ܦܝܼܫܵܐ ܝܠܸܗ ܥܒܼܝܼܕܵܐ ܒܓܡܝܼܪܘܼܬܵܐ ܘܠܲܝܬ ܚܲܕ݇ ܒܘܼܨܵܪܵܐ ܒܝܼܸܗ. ܐܵܗܵܐ ܡܲܬܠܵܐ ܟܸܐ ܡܲܦܠܸܚܝܼ ܠܸܗ ܒܘܼܫ ܙܵܘܕܵܐ ܩܵܐ ܐܵܢܝܼ ܕܒܸܓܒܼܵܪܵܐ ܝܢܵܐ ܘܗܲܕܘܼܖܸ̈ܐ ܝܢܵܐ ܠܡܵܐܢܸ̈ܐ (ܡܸܢܕܝܼܸܐ) ܕܒܲܝܬܵܐ.           

܀ ܟܠ ܦܸܨܠܵܐ ܕܬܲܚܡܸܢܸܬ، ܦܵܢܵܒܵܕ ܥܸܣܪܵܐ ܫܵܗܝܼܸ̈ܐ ܝܠܸܗ.

ܦܘܼܫܵܩܵܐ: ܡܲܕܘܼܥܸܐ ܝܠܸܗ ܕܬܲܚܡܲܢܬܵܐ ܪܵܒܵܐ ܠܲܝܬ ܠܵܗܿ ܝܘܼܬܪܵܢܵܐ ܘܟܡܵܐ ܕܬܲܚܡܸܢ ܘܚܲܫܒܸܢ ܡܸܢ݇ܕܪܸܫ݇ ܒܸܕ ܡܵܛܸܐ ܠܗܿܘ ܦܠܵܛܵܐ ܩܲܕ݇ܡܵܝܵܐ 

ܢܘܼܗܵܪܵܐ: ܦܵܢܵܒܵܐܕ ܚܲܕ݇ ܐܲܕܫܵܐ ܕܙܘܼܙܵܐ ܗ݇ܘܵܐ ܕܡܼܢ ܩܲܕ݇ܡ ܫܵܐܗܝܼ ܟܸܐ ܦܵܐܸܫ ܗ݇ܘܵܐ ܡܘܼܦܠܸܚܵܐ ܒܐܝܼܪܵܢ

܀ ܟܲܠܸ̈ܐ ܕܚܲܕ݇ ܟ̰ܝܼܡܲܢ (ܡܲܪܓܵܐ) ܝܢܵܐ.

ܦܘܼܫܵܩܵܐ: ܒܘܼܬ ܬܪܸܝܢ ܦܲܖ̈ܨܘܿܦܸܐ ܕܡܐܲܝܟܼ ܐܘܼܕܵܠܸܐ ܝܢܵܐ ܘܠܲܝܬܠܗ݇ܘܿܢ ܚܲܕ݇ ܦܘܼܪܫܘܼܢܝܵܐ ܓܘܼܪܵܐ ܓܵܘ ܕܘܼܒܵܪܲܝܗܝ

܀ ܟܲܠܒܵܐ ܒܸܣܪܵܐ ܕܟܲܠܒܵܐ ܠܸܐ ܐܵܟܼܸܠܸܗ.

ܦܘܼܫܵܩܵܐ: ܐܵܢܝܼ ܐ݇ܢܵܫܸ̈ܐ ܕܐܝܼܬ ܠܗ݇ܘܿܢ ܚܝܵܢܘܼܬܵܐ (ܚܸܙܡܵܝܘܼܬܵܐ) ܝܲܢ ܚܲܕ݇ ܐ݇ܣܘܼܪܵܐ ܡܸܚܕܵܕܸܐ، ܠܸܐ ܫܵܒܼܩܝܼ ܒܢܲܦ̰ܫܲܝܗܝ ܚܲܕ݇ ܠܗܿܘ ܐ݇ܚܸܪ݇ܢܵܐ ܓܵܘ ܥܲܣܩܘܼܬܵܐ

܀ ܟܲܠܒܵܐ ܚܘܵܪܵܐ ܡܼܢ ܐ݇ܟܘܼܡܵܐ ܡܘܼܕ ܬܵܦܵܘܘܼܬ ܐܝܼܬܠܗ݇ܘܿܢ؟

ܦܘܼܫܵܩܵܐ: ܐܵܢܝܼ ܕܡܼܢ ܚܲܕ݇ ܫܸܪܫܵܐ (ܐܲܨܠܵܐ) ܝܢܵܐ ܟܸܐ ܗܵܘܸܐ ܠܗ݇ܘܿܢ ܕܡܘܼܬܵܐ ܚܲܝܠܵܢܬܵܐ، ܗܵܕܟܼܵܐ ܕܐܵܦ ܫܘܼܓܼ݇ܠܵܢܲܝܗܝ ܟܸܐ ܕܵܡܝܼ ܠܐܘܼܕܵܠܸܐ 

܀ ܟܲܠܒܵܐ ܟܸܐ ܝܵܕܸܥ ܕܡܘܼܕܝܼ ܐܝܼܬ ܓܵܘ ܡܙܝܼܕܵܐ.

ܦܘܼܫܵܩܵܐ: ܓܵܘ ܡܵܬܵܐ ܚܲܕ݇ܟܡܵܐ ܐ݇ܢܵܫܸ̈ܐ ܟܸܐ ܡܵܬܒܼܝܼ ܗ݇ܘܵܘ ܚܲܕ݇ ܟܸܐܦܵܐ ܓܵܘ ܡܙܝܼܕܵܐ ܕܝܼܠܵܗܿ ܚܕܵܐ ܟܝܼܣܬܵܐ ܡܼܢ ܓܸܠܕܵܐ ܘܟܸܐ ܟ̰ܲܡܟ̰ܸܡܝܼ ܗ݇ܘܵܘ ܠܵܗܿ ܠܓܸܒܵܐ ܕܟܲܠܒܵܐ. ܘܟܲܕ ܟܲܠܒܵܐ ܘܲܣܘܸܣ ܗ݇ܘܵܐ  ܐܵܢܝܼ ܕܠܲܝܬ ܗ݇ܘܵܘ ܠܗ݇ܘܿܢ ܚܲܒܪܵܐ ܡܼܢ ܓܵܘܘܼܗܿ ܟܸܐ ܚܵܫܒܼܝܼ ܗ݇ܘܵܘ ܕܠܸܐ ܝܠܵܗܿ ܡܲܡܪܝܼܵܢܬܵܐ ܘܟܸܐ ܥܵܓ̰ܒܝܼ ܕܩܵܡܘܼ ܟܲܠܒܵܐ ܘܲܣܘܘܼܣܸܐ ܝܠܸܗ. ܐܝܼܢܵܐ ܐܵܢܝܼ ܕܟܸܐ ܝܵܕܥܝܼ ܗ݇ܘܵܘ ܒܘܼܬ ܟܸܐܦܵܐ ܟܸܐ ܬܲܢܝܼ ܗ݇ܘܵܐ ܠܸܗ ܡܲܬܠܵܐ ܕܥܸܠܸܠ. ܐܵܗܵܐ ܟܸܐ ܡܲܦܠܸܚܝܼ ܠܸܗ ܐܝܼܡܲܢ ܕܒܵܥܝܼ ܬܲܢܝܼ ܕܩܸܨܲܬ ܠܸܐ ܝܠܵܗܿ ܐܲܝܟܼ ܕܡܲܒܝܲܢܬܘܼܗܿ ܐܸܠܵܐ ܗܿܘ ܕܩܲܝܣܵܐ ܒܸܐܟܼܵܠܘܼܗܝ ܝܠܸܗ ܟܸܐ ܝܵܕܥܸܐ ܠܫܪܵܪܵܐ

܀ ܟܲܠܒܵܐ ܡܼܢ ܓܲܪܡܵܐ ܠܸܐ ܥܵܪܸܩ.

ܦܘܼܫܵܩܵܐ: ܗܲܪ ܐܲܝܟܼ ܕܟܲܠܒܵܐ ܟܸܐ ܡܲܚܸܒ ܠܓܲܪܡܵܐ ܘܠܸܐ ܡܵܨܸܐ ܐܝܼܕܵܐ ܓܵܪܸܫ ܡܸܢܸܗ ܐܵܦ ܒܲܪܢܵܫܵܐ ܠܸܐ ܡܵܨܸܐ ܫܵܒܼܸܩ ܠܗܿܘ ܡܸܢܕܝܼ ܕܟܸܐ ܡܲܚܸܒ ܠܸܗ ܘܠܝܘܼܬܪܵܢܸܗ ܝܠܸܗ

܀ ܟܲܠܘܼܗܝ ܚܲܕ݇ܟ̰ܵܐ ܒܸܥܪܵܩܵܐ ܝܠܸܗ.

ܦܘܼܫܵܩܵܐ: ܠܸܐ ܝܠܸܗ ܡܲܚܘܼܒܸܐ ܠܚܲܕ݇ ܐ݇ܢܵܫܵܐ ܝܲܢ ܚܲܕ݇ ܟܸܢܫܵܐ ܘܓܵܢܘܼܗܝ ܒܸܓܪܵܫܘܼܗܿ ܝܠܸܗ ܠܡܲܪܙܵܐ ܗܲܪ ܐܲܝܟܼ ܟܲܠܵܐ ܕܒܥܕܵܢܵܐ ܦܘܼܠܚܵܢܵܐ ܟܸܐ ܓܵܪܸܫ ܠܵܗܿ ܓܵܢܘܼܗܿ ܠܡܲܪܙܵܐ ܘܟܸܐ ܦܵܠܸܛ ܡܼܢ ܐܘܼܪܚܵܐ ܬܪܘܼܨܬܵܐ (ܕܘܼܙ)

܀ ܟܠܵܡܸ̈ܐ ܒܸܫܡܵܛܵܐ ܝܠܸܗ.

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܠܚܲܕ݇ ܐ݇ܢܵܫܵܐ ܕܒܸܚܫܵܒܼܵܐ ܝܠܸܗ ܪܵܒܵܐ ܫܘܼܓܼ݇ܠܵܐ ܓܘܼܪܵܐ ܥܒܼܵܕܵܐ ܝܠܸܗ ܟܲܕ ܠܸܐ ܝܠܵܗܿ ܗܵܕܟܼܵܐ. ܐܵܗܵܐ ܡܲܬܠܵܐ ܟܸܐ ܐܵܡܪܝܼ ܠܸܗ ܩܵܐ ܡܲܣܚܵܪܘܼܬܵܐ ܘܓܚܵܟܬܵܐ ܒܗܿܘ ܐ݇ܢܵܫܵܐ 

܀ ܟ̰ܲܡܟ̰ܵܐ ܕܟܠ ܒܘܼܫܵܠܵܐ ܝܠܸܗ.

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܠܗܿܘ ܕܒܸܚܒܼܵܛܵܐ ܝܠܸܗ ܓܵܘ ܫܘܼܓܼ݇ܠܵܐ ܕܐ݇ܚܸܖ̈݇ܢܸܐ.

܀ ܟ̰ܲܡܟ̰ܵܐ ܕܠܵܐ ܚܲܠܘܼܠܸܐ ܝܠܸܗ.

ܦܘܼܫܵܩܵܐ: ܗܲܪ ܐܲܝܟܼ ܡܲܬܠܵܐ ܕܥܸܠܸܠ ܝܠܸܗ.

܀ ܟܲܪ݇ܣܵܐ ܨܒܼܝܼܥܬܵܐ ܠܸܐ ܗܵܘܸܐ ܠܵܗܿ ܚܲܒܪܵܐ ܡܼܢ ܟܲܪ݇ܣܵܐ ܟܦܝܼܢܬܵܐ.

ܦܘܼܫܵܩܵܐ: ܐ݇ܢܵܫܵܐ ܥܲܬܝܼܪܵܐ ܠܸܐ ܝܵܕܸܥ ܕܚܲܝܘܼܬܵܐ ܕܡܸܣܟܸܢܵܐ ܕܵܐܟܼܝܼ ܟܸܐ ܥܒܼܵܪܵܐ.