ܡܬܠ̈ܐ ܐܬܘܖ̈ܝܐ

                                 ܫܡܝܪܡ ܕܘܝܕܦܘܪܝܐܢ

                    

܀ ܕܸܐܒܼܵܐ ܐ݇ܬܵܐ ܐ݇ܟܼܘܿܠܝܼ!

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܠܐܵܢܝܼ ܕܠܸܐ ܬܲܚܡܸܢܝܼ ܒܘܼܬ ܦܠܵܛܵܐ ܕܥܒܼܵܕܲܝܗܝ ܘܟܸܐ ܫܵܩܠܝܼ ܚܲܕ݇ܟܡܵܐ ܦܵܣܘܿܥܝܵܬܸ̈ܐ ܡܵܖ̈ܲܝ ܩܸܢܛܵܐ.  

܀ ܕܸܐܒܼܵܐ ܒܵܬ݇ܪ ܐܲܝܢܝܼ ܛܘܼܪܵܐ ܡܝܼܬܵܐ ܝܠܸܗ؟

ܦܘܼܫܵܩܵܐ: ܡܲܕܲܥܬܵܐ ܕܥܘܼܓ̰ܵܒܵܐ ܝܠܵܗܿ ܒܘܼܬ ܚܕܵܐ ܩܲܘܲܡܬܵܐ ܕܠܸܐ ܩܲܘܸܡܵܐ ܥܝܵܕܵܐܝܼܬ.

܀ ܕܲܗܒܼܵܐ ܙܸܐ ܙܥܘܿܪܵܐ ܝܠܸܗ.

ܦܘܼܫܵܩܵܐ: ܟܸܪܝܘܼܬܵܐ ܕܩܘܼܡܬܵܐ ܠܸܐ ܡܲܒܣܸܪܵܐ ܡܼܢ ܛܝܼܡܵܐ ܕܐ݇ܢܵܫܵܐ.

܀ ܕܘܼܢܝܸܐ ܐܸܢ ܚܲܕ݇ ܟܵܕܵܐ ܗܵܘܝܵܐ ܐܲܚܟ̰ܝܼ ܚܲܕ݇ ܩܸܛܥܘܼܗܝ ܩܵܐ ܐ݇ܢܵܫܵܐ ܒܸܕ ܡܵܛܸܐ.

ܦܘܼܫܵܩܵܐ: ܐ݇ܢܵܫܵܐ ܠܵܐ ܓܵܪܵܓ ܗܵܘܸܐ ܠܸܗ ܣܒܵܪܬܵܐ ܪܵܒܵܐ ܡܼܢ ܚܲܝܘܼܬܵܐ ܣܲܒܲܒ ܟܠ ܐ݇ܢܵܫܵܐ ܒܸܚܵܝܵܐ ܝܠܸܗ ܒܚܕܵܐ ܐܲܝܟܵܢܵܝܘܼܬܵܐ ܦܪܝܼܫܬܵܐ ܘܐܝܼܬ ܠܸܗ ܚܲܕ݇ܟܡܵܐ ܦܘܼܖ̈ܣܸܐ ܦܖ̈ܝܼܫܸܐ.

܀ ܕܘܼܢܝܸܐ ܕܵܐܟܼܝܼ ܕܵܒܼܩܸܬ ܠܵܗܿ ܗܲܪ ܗܵܕܵܟܼ ܙܸܐ ܟܸܐ ܥܵܒܼܪܵܐ.

ܦܘܼܫܵܩܵܐ: ܠܸܐ ܝܠܵܗܿ ܠܵܙܸܡ ܕܟܠ ܡܸܢܕܝܼ ܗܵܘܸܐ ܒܓܡܝܼܪܘܼܬܵܐ ܐܸܠܵܐ ܟܸܐ ܡܵܨܲܚ ܕܬܵܦܩܲܚ ܒܟܠ ܚܲܕ݇ ܡܸܢܕܝܼ ܒܐ݇ܣܵܢܵܝܘܼܬܵܐ ܩܲܕ ܚܲܝܲ̈ܢ ܒܚܵܕܘܼܬܵܐ ܥܵܒܼܪܝܼ. 

܀ ܕܸܡܵܐ ܠܡܝܼܵ̈ܐ ܠܸܐ ܚܵܕܸܪ.

ܦܘܼܫܵܩܵܐ: ܒܘܼܬ ܡܩܵܘܝܵܢܘܼܬܵܐ ܕܚܸܙܡܵܝܘܼܬܵܐ ܝܠܸܗ ܘܡܲܢܗܘܼܪܵܐ ܝܠܸܗ ܕܝܣܘܼܪܵܐ ܕܒܸܝܠ

ܐܵܢܝܼ ܕܡܼܢ ܚܲܕ݇ ܕܸܡܵܐ ܝܢܵܐ ܠܸܐ ܦܵܐܸܫ ܢܸܫܝܵܐ.

܀ ܕܵܥܬܘܼܗܝ ܡܘܼܩܪܸܡܘܼܗܿ ܝܠܸܗ.

ܦܘܼܫܵܩܵܐ: ܢܦܝܼܠܵܐ ܝܠܸܗ ܬ݇ܚܘܿܬ ܟܵܐܪ ܕܚܲܕ݇ ܐ݇ܢܵܫܵܐ ܝܲܢ ܚܲܕ݇ ܡܸܢܕܝܼ.

܀ ܕܸܪܝܘܼܗܝ ܝܢܵܐ ܥܲܠ ܡܝܼܵ̈ܐ ܕܙܸܠܦܸ̈ܐ.

ܦܘܼܫܵܩܵܐ: ܐܲܗܘܵܠܵܬܸ̈ܐ ܕܦܸܠܵܢ ܐ݇ܢܵܫܵܐ ܪܵܒܵܐ ܚܸܪܒܵܐ ܝܢܵܐ.

܀ ܗܸܒܼܝܼܲܢ ܡܵܫܸ̈ܐ ܐ݇ܟܘܼܡܸ̈ܐ.

ܦܘܼܫܵܩܵܐ: ܠܲܝܬ ܚܕܵܐ ܗܸܒܼܝܼ ܚܲܝܠܵܢܬܵܐ ܩܵܐ ܡܛܵܝܬܵܐ ܠܢܝܼܫܵܐ.

܀ ܗܵܕܟܼܵܐ ܠܸܐ ܦܵܝܫܵܐ، ܕܘܼܢܝܸܐ ܛܘܼܦܪܘܼܗܿ ܝܲܪܝܼܟܼܵܐ ܝܠܸܗ

ܦܘܼܫܵܩܵܐ: ܒܸܕ ܐܵܬܸܐ ܫܘܼܚܠܵܦܵܐ ܘܚܲܕ݇ ܝܵܘܡܵܐ ܫܘܼܓܼ݇ܠܵܐ ܒܸܕ ܗܵܘܸܐ ܒܠܸܒܲܢ.

ܗܵܘ ܚܠܘܼܠܵܐ ܕܐܵܢܵܐ ܠܵܐ ܪܵܩܕܸܢ،  ܫܒܼܘܿܩ ܚܡܵܖܸ̈ܐ ܙܲܪܙܸܖ̈ܝܼ ܓܵܘܘܼܗܝ.

ܦܘܼܫܵܩܵܐ: ܐܸܢ ܚܲܕ݇ ܡܸܢܕܝܼ ܩܵܬܝܼ ܠܸܐ ܡܵܛܸܐ ܒܘܼܫ ܨܦܵܝܝܼ ܝܠܵܗܿ ܕܗܲܪ ܠܵܐ ܗܵܘܸܐ.

܀ ܗܵܝ ܥܲܝܢܵܐ ܕܥܲܠ ܐܝܼܕܵܐ ܕܦܸܠܵܢ ܐ݇ܢܵܫܵܐ ܗܵܘܝܵܐ ܟܘܼܪܸܐ ܗܵܘܝܵܐ.

ܦܘܼܫܵܩܵܐ: ܡܼܢ ܦܸܠܵܢ ܐ݇ܢܵܫܵܐ ܕܝܼܠܸܗ ܛܲܡܲܥܟܵܐܪ ܘܩܡܝܼܢܵܐ، ܠܸܐ ܡܵܛܸܐ ܚܲܕ݇ ܝܘܼܬܪܵܢܵܐ 

  ܘܟܠ ܚܲܕ݇ ܕܗܵܘܸܐ ܒܗܸܒܼܝܼ ܕܛܵܒܼܬܘܼܗܝ ܒܸܕ ܣܵܒܸܪ ܚܲܕ݇ ܡܸܬܚܵܐ ܝܲܪܝܼܟܼܵܐ

܀ ܗܵܘ ܕܚܘܼܘܸܐ ܗܵܘܸܐ ܢܗܝܼܣܘܼܗܝ، ܡܼܢ ܚܲܒܼܠܵܐ ܒܲܠܩܵܐ ܟܸܐ ܙܵܕܸܥ.

ܦܘܼܫܵܩܵܐ: ܚܲܕ݇ ܐ݇ܢܵܫܵܐ ܕܩܲܒܸܠ ܙܝܵܢܵܐ ܡܼܢ ܚܲܕ݇ ܡܸܢܕܝܼ ܗܲܠ ܐ݇ܚܲܪܬܵܐ ܒܸܕ ܙܵܕܸܥ ܡܼܢ ܟܠ ܡܸܢܕܝܼ ܐ݇ܚܸܪ݇ܢܵܐ ܕܲܡܝܵܢܵܐ ܥܲܠܘܼܗܝ.

܀ ܗܵܘ ܩܵܪܘܼܨܵܐ ܒܵܒܵܐ ܕܗܵܘ ܦܵܓܵܐ ܝܠܸܗ

ܦܘܼܫܵܩܵܐ: ܬܸܖ̈ܘܲܝܗܝ (ܓܲܒܼܪܵܐ ܘܒܲܟܼܬܵܐ) ܠܚܝܼܡܸ̈ܐ ܝܢܵܐ ܩܵܐ ܐܘܼܕܵܠܸܐ.

܀ ܗܵܘܝܵܐ ܒܪܝܼܟܼܬܵܐ، ܠܵܐ ܟܪܝܼܬܵܐ ܘܠܵܐ ܝܲܪܝܼܟܼܬܵܐ.

ܦܘܼܫܵܩܵܐ: ܚܲܕ݇ ܡܸܐܡܪܵܐ ܣܩܝܼܠܵܐ ܝܠܸܗ ܩܵܐ ܡܲܡܛܵܝܬܵܐ ܕܪܸܓܼܫܵܐ ܕܚܵܕܘܼܬܵܐ ܠܚܲܕ݇ ܦܲܪܨܘܿܦܵܐ ܐ݇ܚܸܪ݇ܢܵܐ.

܀ ܗܵܘ ܕܓܵܘ ܡܝܼܵ̈ܐ ܥܵܒܼܸܪ ܓ̰ܘܼܠܘܼܗܝ ܟܸܐ ܬܵܪܝܼ.

ܦܘܼܫܵܩܵܐ: ܐܝܼܡܲܢ ܕܫܲܪܲܚܠܸܗ ܚܲܕ݇ ܫܘܼܓܼ݇ܠܵܐ، ܓܵܪܵܓ ܗܲܕܪܲܚܠܵܗܿ ܓܵܢܲܢ ܕܬܵܦܩܲܚ ܒܪܵܒܵܐ ܩܸܨܸ̈ܐ (عواقب).

܀ ܗܵܘ ܕܠܦܵܘܚܵܐ ܙܵܪܸܥ ܠܓܲܪܕܲܒܘܼܠܸܐ ܒܸܕ ܚܵܨܸܕ.

ܦܘܼܫܵܩܵܐ: ܟܠ ܚܲܕ݇ ܥܒܼܵܕܵܐ ܐܝܼܬ ܠܸܗ ܚܲܕ݇ ܗܘܼܦܵܟܼ ܥܒܼܵܕܵܐ (عکس العمل) ܘܒܲܪܢܵܫܵܐ ܘܵܠܸܐ ܝܠܵܗܿ ܕܗܵܘܸܐ ܙܗܝܼܪܵܐ ܡܼܢ ܦܠܵܛܵܐ ܕܥܒܼܵܕܘܼܗܝ ܕܠܵܐ ܕܵܝܖ̈ܝܼ ܒܲܪܩܘܼܒܼܠܘܼܗܝ. 

܀ ܗܵܘ ܠܸܐ ܕܵܡܸܟܼ ܚܲܕ݇ ܕܘܼܟܬܵܐ ܕܦܵܠܛܝܼ ܡܝܼܵ̈ܐ ܬ݇ܚܘܼܬܘܼܗܝ

ܦܘܼܫܵܩܵܐ: ܗܵܘ ܐ݇ܢܵܫܵܐ ܪܵܒܵܐ ܗܵܘܢܵܢܵܐ ܝܠܸܗ ܘܠܸܐ ܥܵܒܼܸܕ ܚܲܕ݇ ܫܘܼܓܼ݇ܠܵܐ ܕܗܵܘܸܐ ܠܸܙܝܵܢܘܼܗܝ.

܀ ܗܵܘ ܡܸܢܕܝܼ ܕܒܲܟܼܬܵܐ ܥܵܒܼܕܵܐ ܠܸܗ ܐܘܼܦ ܟܲܠܸ̈ܐ ܘܟܘܼܬܲܢ ܠܸܐ ܥܵܒܼܕܝܼ ܠܸܗ.

ܦܘܼܫܵܩܵܐ: ܒܲܟܼܬܵܐ ܪܵܒܵܐ ܡܲܥܒܼܕܵܢܬܵܐ (ܡܵܪ ܟܵܐܪ) ܝܠܵܗܿ ܒܚܲܝܘܼܬܵܐ ܕܚܕܵܐ ܒܲܝܬܘܼܬܵܐ ܘܠܸܐ ܗܵܘܝܵܐ ܕܠܵܐ ܦܵܝܫܵܐ ܚܫܝܼܒܼܬܵܐ.

܀ ܗܘܿܫܵܪܵܐ ܐܸܢ ܓܵܘ ܒܲܝܬܘܼܟܼ ܥܵܒܼܸܪ ܩܲܕ݇ܡܵܝܬܵܐ ܥܲܝܢܘܼܗܝ ܥܲܠ ܡܸܢܕܝܼܘܼܟܼ ܒܸܕ ܢܵܦܠܵܐ ܘܐܝܼܬܵܐ ܥܲܠ ܒܲܟܼܬܘܼܟܼ.  

ܦܘܼܫܵܩܵܐ: ܠܵܐ ܗܵܘܸܐ ܠܘܼܟܼ ܬܘܼܟܼܠܵܢܵܐ ܥܲܠ ܚܲܕ݇ ܗܘܿܫܵܪܵܐ ܒܚܲܝܘܼܬܘܼܟܼ ܒܗܵܝ ܕܠܵܐ ܥܲܝܢܘܼܗܝ ܕܟܼܝܼܬܵܐ ܝܠܵܗܿ ܘܠܵܐ ܙܸܐ ܐܝܼܕܘܼܗܝ.  

܀ ܗܘܿܫܵܪܵܐ ܐܸܢ ܕܲܗܒܼܵܐ ܙܸܐ ܗܵܘܸܐ ܓܵܘ ܓ̰ܝܼܒܘܼܟܼ ܠܵܐ ܕܵܪܸܬ ܠܸܗ.

ܦܘܼܫܵܩܵܐ: ܗܲܪ ܐܲܝܟܼ ܡܲܬܠܵܐ ܕܥܸܠܸܠ ܝܠܵܗܿ.

܀ ܗܵܝ ܩܘܼܣܲܪܬܵܐ ܕܬܸܪܬܸܝܢ ܒܲܫܠܵܢܝܵܬܸ̈ܐ ܗܵܘܸܐ ܠܵܗܿ ܟܸܐ ܨܵܝܢܵܐ.

ܦܘܼܫܵܩܵܐ: ܟܠ ܚܲܕ݇ ܫܘܼܓܼܠܵܐ ܠܵܙܸܡ ܝܠܵܗܿ ܕܗܵܘܸܐ ܬ݇ܚܘܿܬ ܚܕܵܐ ܡܕܲܒܪܵܢܘܼܬܵܐ ܩܲܕ ܟܠ ܡܸܢܕܝܼ ܗܵܘܸܐ ܒܪܸܐܙܵܐ ܐܸܢ ܠܵܐ ܗܵܘ ܫܘܼܓܼ݇ܠܵܐ ܠܸܐ ܐܵܬܸܐ ܒܪܸܫܵܐ. 

܀ ܗܲܠ ܕܚܕܵܐ ܡܸܫܡܸܫܬܵܐ ܢܵܬܪܵܐ، ܐܸܡܵܐܐ ܟ̰ܲܩܵܠܸ̈ܐ ܟܸܐ ܢܵܬܪܝܼ.

ܦܘܼܫܵܩܵܐ: ܐܵܢܝܼ ܕܓܡܝܼܖܸ̈ܐ ܝܢܵܐ ܘܡܵܪ ܢܸܣܝܵܢܵܐ ܐܵܦܸܢ ܕܗܵܘܝܼ ܒܫܸܢܸ̈ܐ، ܒܘܼܫ ܙܵܘܕܵܐ ܡܩܵܘܝܵܢܸ̈ܐ ܝܢܵܐ ܡܼܢ ܐܵܢܝܼ ܕܓ̰ܵܗܵܠ ܝܢܵܐ ܐܝܼܢܵܐ ܠܲܝܬ ܠܗ݇ܘܿܢ ܢܸܣܝܵܢܵܐ . 

܀ ܗܲܠ ܚܸܨܕܵܐ ܕܣܲܥܖܸ̈ܐ.

ܦܘܼܫܵܩܵܐ: ܒܸܪܡܵܙܵܐ ܝܠܸܗ ܥܲܠ ܚܕܵܐ ܘܲܥܕܵܐ ܕܠܸܐ ܝܠܸܗ ܒܓ̰ܲܠܕܘܼܬܵܐ.

܀ ܗܲܪ ܐܲܝܟܼ ܓܵܘܙܸ̈ܐ ܒܪܸܫܵܐ ܕܓܘܼܢܒܲܙ.

ܦܘܼܫܵܩܵܐ: ܗܲܡܙܲܡܬܵܐ ܥܲܡ ܦܸܠܵܢ ܐ݇ܢܵܫܵܐ ܠܲܝܬ ܠܵܗܿ ܝܘܼܬܪܵܢܵܐ ܘܗܵܘ ܠܸܐ ܩܲܒܸܠ ܠܚܲܒܪܵܐ ܕܐ݇ܚܸܖ̈݇ܢܸܐ.

                                                

ܥܩܦܬܐ ܒܡܢܝܢܐ ܕܥܬܝܕ