ܒܗܠܘܠ ܝܕܘܥܐ

               ܚܕܵܐ ܗܘܼܩܝܼܬܵܐ ܕܐܵܒܼܵܗܵܬܸ̈ܐ                    

 ܚܲܕ݇ ܥܕܵܢܵܐ ܒܐܵܗܵܐ ܐܲܬܪܵܐ ܐܝܼܬ ܗ݇ܘܵܐ ܚܲܕ݇ ܡܲܠܟܵܐ ܕܐܲܝܟܼ ܟܠܲܝܗܝ ܡܲܠܟܸ̈ܐ ܟܸܐ ܗܲܟܸܡ ܗ݇ܘܵܐ ܠܐܲܬܪܸܗ ܨܦܵܝܝܼ ܝܲܢ ܣܸܪܝܵܐ. ܐܝܼܢܵܐ ܗܵܘ ܐܝܼܬ ܗ݇ܘܵܐ ܠܸܗ ܚܲܕ݇ ܐܲܚܘܿܢܵܐ ܒܫܸܡܵܐ ܕܒܲܗܠܘܼܠ. ܒܲܗܠܘܼܠ ܠܸܐ ܕܵܡܸܐ ܗ݇ܘܵܐ ܕܗܵܘܸܐ ܐܲܚܘܿܢܵܐ ܕܡܲܠܟܵܐ ܒܗܿܝ ܕܥܒܼܵܕܘܼ̈ܗܝ ܘܫܘܼܓܼ݇ܠܵܢܘܼ̈ܗܝ ܠܸܐ ܗ݇ܘܵܘ ܒܸܕܡܵܝܵܐ ܥܲܠ ܚܲܕ݇ ܦܲܪܨܘܿܦܵܐ ܡܼܢ ܒܲܝܬܵܐ ܡܲܠܟܵܝܵܐ. ܗܵܘ ܠܸܐ ܚܵܝܸܐ ܗ݇ܘܵܐ ܓܵܘ ܩܲܨܪܵܐ ܐܸܠܵܐ ܐܲܝܟܼ ܟܠܸܗ ܥܵܠܡܵܐ ܐܝܼܬ ܗ݇ܘܵܐ ܠܸܗ ܒܲܝܬܵܐ ܕܓܵܢܸܗ ܘܟܸܐ ܚܵܝܸܐ ܗ݇ܘܵܐ ܒܦܫܝܼܛܘܼܬܵܐ ܘܕܠܵܐ ܟ̰ܘܼ ܚܲܕ݇ ܗܸܕܪܵܐ ܘܫܘܼܒܼܗܵܪܵܐ. ܐ݇ܢܵܫܸ̈ܐ ܟܸܐ ܩܵܖ̈ܝܼ ܗ݇ܘܵܘ ܠܸܗ ܒܲܗܠܘܼܠ ܫܸܐܕܵܢܵܐ ܒܗܵܝ ܕܟܸܐ ܡܲܕܥܸܐ ܗ݇ܘܵܐ ܠܬܲܚܡܲܢܝܵܬܘܼܗܝ ܕܠܵܐ ܟ̰ܘܼ ܙܕܘܿܥܬܵܐ ܘܡܲܫܦܲܪܬܵܐ. ܚܲܕ݇ܟܡܵܐ ܙܸܐ ܟܸܐ ܚܵܫܒܼܝܼ ܗ݇ܘܵܘ ܕܚܲܒܖ̈ܵܢܘܼܗܝ ܡܼܢ ܗܵܘܢܸܗ ܝܢܵܐ ܘܠܸܐ ܝܠܸܗ ܣܲܟܼܠܵܐ.                                              

   ܗܵܕܟܼܵܐ ܗܘܼܩܝܸ̈ܐ ܝܢܵܐ ܒܵܒܲܢ ܘܣܵܒܼܲܢ ܕܚܲܕ݇ ܝܵܘܡܵܐ ܒܲܗܠܘܼܠ ܝܬܝܼܒܼܵܐ ܗ݇ܘܵܐ ܩܲܕ݇ܡ ܩܲܨܪܵܐ ܕܡܲܠܟܵܐ ܘܛܲܐܘܼܠܸܐ ܗ݇ܘܵܐ ܒܚܲܕ݇ ܩܘܼܚܵܐ ܕܩܸܛܡܵܐ ܘܦܲܠܘܼܥܘܼܗܝ ܗ݇ܘܵܐ ܠܬܠܵܬ݇ ܩܸܛܥܵܛܸ̈ܐ. ܗܲܪ ܒܗܿܝ ܥܕܵܢܵܐ ܟܲܕ ܘܲܙܝܼܪܵܐ ܒܸܥܒܼܵܪܵܐ ܗ݇ܘܵܐ ܡܼܢ ܬܵܡܵܐ ܚܙܸܐ ܠܸܗ ܠܒܲܗܠܘܼܠ ܘܒܘܼܩܸܪܸܗ ܡܸܢܸܗ ܕܡܘܼܕܝܼ ܝܠܸܗ ܒܸܥܒܼܵܕܵܐ ܘܩܵܐ ܡܘܼܕܝܼ ܛܲܐܘܼܠܸܐ ܝܠܸܗ ܒܩܸܛܡܵܐ. ܓ̰ܘܼܘܸܒܠܸܗ ܒܲܗܠܘܼܠ: ـ ܐܵܗܵܐ ܫܘܼܓܼ݇ܠܵܐ ܐܝܼܬ ܠܸܗ ܚܲܕ݇ ܦܘܼܫܵܩܵܐ.                                                                              

ܡܸܢ݇ܕܪܸܫ݇ ܒܘܼܩܸܪܸܗ ܘܲܙܝܼܪܵܐ: ܡܘܼܕܝܼ ܝܠܸܗ ܦܘܼܫܵܩܸܗ؟ ܘܓ̰ܘܼܘܸܒܠܸܗ ܒܲܗܠܘܼܠ: ـ ܦܘܼܫܵܩܸܗ ܩܲܕ݇ܡܵܝܵܐ ܐܵܗܵܐ ܝܠܸܗ: ܐܵܗܵܐ ܩܸܛܡܵܐ ܒܪܸܫܵܐ ܕܗܿܘ ܐ݇ܢܵܫܵܐ ܕܝܵܣܸܪܸܗ ܚܵܨܸܗ ܒܡܲܠܟܘܼܬܵܐ ܘܡܐܲܝܟܼ ܕܝܼܘܼܟܼ ܐ݇ܢܵܫܸ̈ܐ. ܕܬܪܸܝܢ: ܒܪܸܫܵܐ ܕܗܿܘ ܕܬܲܢܸܐ ܠܸܗ ܚܲܒܪܸܗ ܩܵܐ ܒܲܟܼܬܸܗ. ܘܕܬܠܵܬ݇ ܒܪܸܫܵܐ ܕܗܵܘ ܕܫܵܒܼܸܩܠܗ݇ܘܿܢ ܚܸܙܡܵܢܸ̈ܐ ܕܓܵܢܸܗ ܘܕܵܒܼܸܩܠܗ݇ܘܿܢ ܢܘܼܟܼܖ̈ܵܝܸܐ. ܐ݇ܡܸܪܸܗ ܘܲܙܝܼܪܵܐ: ܗܵܘܸܬ ܒܲܣܝܼܡܵܐ ܩܵܐ ܐܲܢܸ̈ܐ ܚܲܒܖ̈ܵܢܘܼܟܼ. ܒܲܗܠܘܼܠ ܓ̰ܘܼܘܼܒܠܸܗ: ܐܵܢܵܐ ܐ݇ܡܵܪܵܐ ܝܘܸܢ ܩܵܬܘܼܟܼ ܪ݇ܚܘܼܫ ܓ̰ܵܪܸܒܠܗ݇ܘܿܢ ܚܲܒܖ̈ܵܢܝܼ.                          

ܟܲܕ ܪܘܼܚܩܸܢܸܗ ܘܲܙܝܼܪܵܐ ܡܼܢ ܬܵܡܵܐ ܥܒܼܸܪܸܗ ܒܬܲܚܡܲܢܬܵܐ. ܟܸܐ ܝܵܕܸܥ ܗ݇ܘܵܐ ܕܚܲܒܖ̈ܵܢܸܐ ܕܒܲܗܠܘܼܠ ܠܸܐ ܝܢܵܐ ܒܲܛܝܼܠܸ̈ܐ. ܐܘܼܦ ܗܲܡܘܼܢܸܐ ܗ݇ܘܵܐ ܕܡܲܠܟܵܐ ܟܸܐ ܡܲܚܸܒܠܸܗ ܪܵܒܵܐ ܘܒܲܟܼܬܸܗ ܙܸܐ ܪܵܒܵܐ ܨܦܵܝܝܼ ܘܗܵܘܢܵܢܬܵܐ ܝܠܵܗܿ. ܐܝܼܢܵܐ ܡܘܼܕܝܼ ܗ݇ܘܵܐ ܢܝܼܫܵܐ ܕܒܲܗܠܘܼܠ؟ ܗܵܝܓܵܗܿ ܫܘܼܪܸܐ ܠܸܗ ܠܬܲܚܡܘܼܢܸܐ ܕܡܲܫܟ̰ܸܚ ܚܕܵܐ ܐܘܼܪܚܵܐ ܩܵܐ ܓ̰ܲܪܲܒܬܵܐ ܕܚܲܒܖ̈ܵܢܸܐ ܕܒܲܗܠܘܼܠ ܘܡܵܛܸܐ ܠܫܪܵܪܵܐ. ܡܼܢ ܒܵܬ݇ܪ ܪܵܒܵܐ ܬܲܚܡܲܢܝܵܬܸܐ؛ ܕܟܼܸܪܸܗ ܕܡܲܠܟܵܐ ܐܝܼܬ ܗ݇ܘܵܐ ܠܸܗ ܚܲܕ݇ ܒܪܘܿܢܵܐ ܕܚܵܬܵܐ ܕܪܵܒܵܐ ܗܵܘܢܵܢܵܐ ܗ݇ܘܵܐ ܘܚܫܝܼܚܵܐ؛ ܘܡܲܠܟܵܐ ܟܸܐ ܡܲܚܸܒ ܗ݇ܘܵܐ ܠܸܗ ܪܵܒܵܐ. ܐܵܦ ܐܵܗܵܐ ܥܠܲܝܡܵܐ ܟܸܐ ܡܲܚܸܒ ܗ݇ܘܵܐ ܠܘܲܙܝܼܪܵܐ. ܗܵܝܓܵܗܿ ܓܪܸܫܠܸܗ ܚܲܕ݇ ܢܲܩܫܵܐ ܘܐ݇ܙܸܠܸܗ ܠܟܸܣ ܒܪܘܿܢ ܚܵܬܵܐ ܕܡܲܠܟܵܐ. ܡܛܸܐ ܠܸܗ ܬܵܡܵܐ ܘܐ݇ܡܸܪܸܗ ܩܵܬܸܗ: ܐܝܼܬ ܠܝܼ ܚܲܕ݇ ܫܘܼܓܼ݇ܠܵܐ ܡܸܢܘܼܟܼ. ܐܝܼܢܵܐ ܟ̰ܘܼ ܐ݇ܢܵܫܵܐ ܠܵܐ ܝܵܕܸܥ ܒܐܵܗܵܐ ܡܸܢܕܝܼ ܐܵܦ ܡܲܠܟܵܐ. ܘܵܠܸܐ ܕܐܵܙܸܠ݇ܬ ܐܲܢ݇ܬ ܩܵܐ ܬܪܸܝܢ؛ ܬܠܵܬ݇ ܝܵܘܡܵܢܸ̈ܐ ܠܚܲܕ݇ ܚܙܘܼܩܝܵܐ ܘܒܵܬ݇ܪ ܦܪܵܩܬܵܐ ܕܐܵܗܵܐ ܚܙܘܼܩܝܵܐ ܒܸܕ ܡܲܚܒܸܪܲܚܠܸܗ ܡܲܠܟܵܐ.ܟܲܕ ܩܘܼܒܸܠܸܗ ܒܪܘܿܢ ܚܵܬܵܐ ܕܡܲܠܟܵܐ ܠܐܵܗܵܐ ܦܘܼܩܕܵܢܵܐ؛ ܗܘܼܕܸܪܸܗ ܘܲܙܝܼܪܵܐ ܠܟܠ ܡܸܢܕܝܼ ܐܲܢܲܢܩܵܝܵܐ ܘܡܘܼܦܫܸܛܠܸܗ ܩܵܬܸܗ ܠܐܘܼܪܚܵܐ.                                                                                    

ܗܵܝܓܵܗܿ ܘܲܙܝܼܪܵܐ ܕܸܪܸܗ ܠܒܲܝܬܸܗ ܚܘܼܠܩܵܢܵܐ ܘܚܲܫܵܢܵܐ. ܒܲܟܼܬܸܗ ܒܘܼܩܸܪܵܗܿ ܡܸܢܸܗ: ܓܲܒܼܪܵܐ ܩܵܡܘܼܕܝܼ ܚܲܫܵܢܵܐ ܝܘܸܬ؟ ܘܲܙܝܼܪܵܐ ܓ̰ܘܼܘܼܒܠܸܗ: ܡܘܼ ܬܲܢܸܝܢ؟ ܡܸܢ݇ܕܪܸܫ݇ ܒܘܼܩܸܪܵܗܿ ܒܲܟܼܬܵܐ:ـ ܕܵܐܟܼܝܼ ܡܘܼܕ݇ ܬܲܢܸܝܬ؟ ܐܵܢܵܐ ܒܲܟܼܬܘܼܟܼ ܝܘܵܢ ܘܒܵܥܝܵܢ ܝܵܕܥܵܢ ܡܘܼ ܩܘܼܘܸܡܵܐ ܝܠܸܗ. ܐ݇ܡܸܪܸܗ ܘܲܙܝܼܪܵܐ: ܒܲܟܼܬܵܐ ܪܸܫܝܼ ܒܸܕ ܐܵܙܸܠ؛ ܒܸܙܕܵܥܵܐ ܝܘܸܢ ܕܦܵܠܸܛ ܚܲܒܪܵܐ. ܡܸܢ݇ܕܪܸܫ݇ ܒܘܼܩܸܪܵܗܿ ܒܲܟܼܬܵܐ: ܡܼܢ ܡܵܢܝܼ ܒܸܙܕܵܥܵܐ ܝܘܸܬ؟ ܡܸܢܝܼ؟ ܐܲܢܸܐ ܟܡܵܐ ܫܸܢܸ̈ܐ ܒܲܟܼܬܘܼܟܼ ܝܘܵܢ ܐܝܼܢܵܐ ܐܲܢ݇ܬ ܠܸܐ ܒܵܥܸܬ ܕܬܲܢܸܝܬ ܠܸܗ ܚܲܒܪܘܼܟܼ ܩܵܬܝܼ. ܗܵܝܓܵܗܿ ܐ݇ܡܸܪܸܗ ܘܲܙܝܼܪܵܐ:ܡܘܼܕ݇ ܬܲܢܸܝܢ؟ ܡܓܸܕܫܵܐ ܡܚܸܐ ܠܝܼ ܘܩܛܸܠܝܼ ܠܒܪܘܿܢ ܚܵܬܵܐ ܕܡܲܠܟܵܐ ܘܗܲܕܝܼܵܐ ܫܠܲܕܘܼܗܝ ܓܵܘ ܐܲܩܠܝܼܪܵܐ(ܙܝܼܪܙܲܡܝܼܢ) ܝܠܵܗܿ. ܐܸܢ ܝܵܕܥܸܐ ܡܲܠܟܵܐ ܒܐܵܗܵܐ ܡܸܢܕܝܼ ܕܠܵܐ ܫܸܟ ܒܸܕ ܐܵܙܸܠ ܪܸܫܝܼ.                                                              

  ܟܲܕ ܥܒܼܵܪܵܐ ܗ݇ܘܵܘ ܝܵܘܡܵܢܸ̈ܐ؛ ܚܘܼܠܩܵܐ ܕܘܲܙܝܼܪܵܐ ܒܸܫ ܒܸܙܝܵܕܵܐ ܗ݇ܘܵܐ ܘܥܲܓ̰ܘܼܙܘܼܗܿ ܗ݇ܘܵܐ ܒܲܟܼܬܸܗ ܒܟܠ ܥܕܵܢܵܐ. ܡܼܢ ܒܵܬ݇ܪ ܬܪܸܝܢ ـ ܬܠܵܬ݇ ܝܲܖ̈ܚܸܐ ܚܙܸܐ ܠܵܗܿ ܒܲܟܼܬܵܐ ܕܚܲܝܘܼܬܘܼܗܿ ܟ̰ܸܡ ܫܘܼܚܠܵܦܬܵܐ ܝܠܵܗܿ؛ ܘܟܡܵܐ ܕܗܵܝ ܚܲܦܘܼܛܸܐ ܝܠܵܗܿ ܕܒܡܲܟܝܼܟܼܘܼܬܵܐ ܘܚܘܼܒܵܐ ܬܵܦܩܵܐ ܒܓܲܒܼܪܘܼܗܿ ܐܝܼܢܵܐ ܗܵܘ ܡܸܢ݇ܕܪܸܫ݇ ܠܸܐ ܝܠܸܗ ܒܸܓܪܵܫܵܐ ܐܝܼܕܵܐ ܡܼܢ ܚܘܼܠܩܘܼܗܝ ܘܡܼܢ ܥܵܓ̰ܵܙܝܵܬܘܼܗܝ. ܗܵܝܓܵܗܿ ܡܛܸܐ ܠܵܗܿ ܠܓܵܢܘܼܗܿ ܘܐ݇ܙܸܠܵܗܿ ܠܟܸܣ ܡܲܠܟܵܐ.                                                                   

 ܡܼܢ ܕܗܵܘ ܓܸܒܵܐ ܐ݇ܚܸܪ݇ܢܵܐ ܡܲܠܟܵܐ ܟܲܕ ܒܸܚܙܵܝܵܐ ܗ݇ܘܵܐ ܕܠܸܐ ܝܠܸܗ ܡܲܒܝܘܼܢܸܐ ܒܪܘܿܢ ܚܵܬܸܗ ܘܟܡܵܐ ܕܒܲܩܘܼܪܸܐ ܝܠܸܗ ܠܸܐ ܝܠܸܗ ܦܠܵܛܵܐ ܠܒܲܗܪܵܐ؛ ܥܒܼܝܼܪܵܐ ܗ݇ܘܵܐ ܒܚܲܫܵܐ. ܒܲܟܼܬܵܐ ܕܘܲܙܝܼܪܵܐ ܟܲܕ ܡܛܸܐ ܠܵܗܿ ܠܟܸܣ ܡܲܠܟܵܐ ܡܘܼܟܸܦܠܵܗܿ ܪܸܫܵܐ ܕܐܝܼܩܵܪܵܐ ܩܵܬܘܼܗܝ ܘܐ݇ܡܸܪܵܗܿ: ܡܲܠܟܵܐ ܕܗܵܘܸܬ ܒܲܣܝܼܡܵܐ ܐܝܼܬ ܠܝܼ ܚܲܕ݇ ܚܲܒܪܵܐ ܩܵܬܘܼܟܼ. ܟܸܐ ܝܵܕܥܵܢ ܕܒܪܘܿܢ ܚܵܬܘܼܟܼ ܐܲܝܟܵܐ ܝܠܸܗ. ܚܓ̰ܸܠܸܗ ܡܲܠܟܵܐ ܒܫܡܵܥܬܵܐ ܕܐܵܗ ܚܲܒܪܵܐ ܘܐ݇ܡܸܪܸܗ: ܐܲܝܟܵܐ ܝܠܸܗ؛ܓ̰ܲܠܕܸܐ ܓܠܝܼ. ܓ̰ܘܼܘܸܒܠܵܗܿ ܒܲܟܼܬܵܐ: ܓܵܘ ܐܲܩܠܝܼܪܵܐ ܕܒܲܝܬܲܢ ܝܠܸܗ؛ ܩܛܝܼܠܘܼܗܝ ܝܢܵܐ ܘܫܠܲܕܘܼܗܝ ܦܝܼܫܬܵܐ ܝܠܵܗ ܬܵܡܵܐ. ܒܘܼܩܸܪܸܗ ܡܲܠܟܵܐ: ـ ܡܵܢܝܼ ܩܛܝܼܠܘܼܗܝ ܩܵܛܘܿܠܵܐ؟ܓ̰ܘܼܘܸܒܠܵܗܿ ܒܲܟܼܬܵܐ: ـ ܘܲܙܝܼܪܘܼܟܼ ܝܠܸܗ ܩܛܝܼܠܘܼܗܝ. ܗܲܪ ܒܗܵܝ ܥܕܵܢܵܐ ܡܲܠܟܵܐ ܫܘܼܕܸܪܸܗ ܦܩܝܼܕܸ̈ܐ ܩܵܐ ܕܕܵܒܼܩܝܼܠܸܗ ܘܲܙܝܼܪܵܐ ܘܪܲܦܝܼ ܠܸܗ ܓܵܘ ܒܸܝܬ ܚܒܼܘܼܫܝܵܐ. ܗܵܕܟܼܵܐ ܩܵܐ ܚܲܕ݇ ܡܸܬܚܵܐ ܝܲܪܝܼܟܼܵܐ ܘܲܙܝܼܪܵܐ ܦܝܼܫܠܸܗ ܓܵܘ ܒܸܝܬ ܐܲܣܝܼܖܸ̈ܐ. ܡܼܢ ܕܗܵܘ ܓܸܒܵܐ ܐ݇ܚܸܪ݇ܢܵܐ ܟܡܵܐ ܕܛܘܼܥܸܐ ܠܗ݇ܘܿܢ ܒܵܬ݇ܪ ܫܠܲܕܵܐ ܠܵܐ ܡܨܸܐ ܠܗ݇ܘܿܢ ܕܡܲܫܟ̰ܚܝܼ ܠܵܗܿ ܫܠܲܕܵܐ ܘܟܲܕ ܒܘܼܩܸܪܗ݇ܘܿܢ ܡܼܢ ܘܲܙܝܼܪܵܐ ܐ݇ܡܸܪܸܗ: ܚܲܪܬܵܐ ܒܸܕ ܝܵܕܥܝܼܬܘܿܢ.                       

 ܦܪܸܣܠܸܗ ܚܲܒܪܵܐ ܓܵܘ ܟܠܸܗ ܐܲܬܪܵܐ ܘܡܛܸܐ ܠܸܗ ܠܚܸܙܡܵܢܸ̈ܐ ܕܘܲܙܝܼܪܵܐ ܟܲܕ ܗܵܘ ܓܵܘ ܒܸܝܬ ܐܲܣܝܼܖܸ̈ܐ ܝܠܸܗ ܘܒܸܕ ܦܵܐܸܫ ܩܛܝܼܠܵܐ. ܟܠܲܝܗܝ ܚܸܙܡܵܢܘܼܗܝ ܦܝܼܫܠܗ݇ܘܿܢ ܒܕܘܼܡܵܪܐ ܘܒܬܲܗܪܵܐ(حیرت) ܒܐܵܗܵܐ ܚܲܒܪܵܐ. ܓ̰ܡܸܥܠܗ݇ܘܿܢ ܘܪ݇ܚܸܫܠܗ݇ܘܿܢ ܟܸܣ ܡܲܠܟܵܐ ܘܛܠܸܒܠܗ݇ܘܿܢ ܡܸܢܸܗ  ܕܠܵــܐ   ܩܵܛܸܠܸܗ ܘܲܙܝܼܪܵܐ. ܟܲܕ ܚܙܸܐ ܠܸܗ ܡܲܠܟܵܐ ܠܐܵܗ ܡܸܢܕܝܼ ܦܘܼܩܸܕܠܸܗ  ܕܗܵܘܝܵܐ ܕܝܵܢܬܵܐ ܥܲܠ ܘܲܙܝܼܪܵܐ. ܩܪܸܐ ܠܗ݇ܘܿܢ ܠܘܲܙܝܼܪܵܐ ܘܒܘܼܩܸܪܗ݇ܘܿܢ ܡܸܢܸܗ ܕܡܘܼܕܝܼ ܝܠܵܗܿ ܥܸܠܬܵܐ ܕܩܛܝܼܠܵܐ ܝܠܸܗ ܠܒܪܘܿܢ ܚܵܬܵܐ ܕܡܲܠܟܵܐ. ܓ̰ܘܼܘܸܒܠܸܗ ܘܲܙܝܼܪܵܐ ܕܗܲܠ ܕܠܵܐ ܡܲܝܬ݇ܝܼ ܠܵܗܿ ܫܠܲܕܵܐ ܠܸܐ ܗܲܡܙܸܡ ܐܘܼܦ ܚܲܕ݇ ܚܲܒܪܵܐ ܘܡܘܼܕܸܥܠܸܗ ܠܢܝܼܫܵܢܩܵܐ ܕܚܲܕ݇ ܨܲܢܕܘܼܩܵܐ ܓܵܘ

ܐܲܩܠܝܼܪܵܐܕܒܲܝܬܸܗ.                                                                               

ܫܠܲܕܵܐ ܓܵܘ ܨܲܢܕܘܼܩܵܐ. ܕܸܪܗ݇ܘܿܢ ܠܩܲܨܪܵܐ ܘܗܘܼܩܸܐ ܠܗ݇ܘܿܢ ܠܟܠ ܚܲܕ݇ ܡܸܢܕܝܼ ܕܚܸܙܝܸ̈ܐ ܗ݇ܘܵܘ ܬܵܡܵܐ. ܟܪܸܒܠܸܗ ܡܲܠܟܵܐ ܒܫܡܵܥܬܵܐ ܕܚܲܒܖ̈ܵܢܸܐ ܕܢܵܛܘܿܖܸ̈ܐ ܘܐ݇ܡܸܪܸܗ ܩܵܐ ܘܲܙܝܼܪܵܐ: ܐܵܗܵܐ ܡܘܼܕ ܛܲܐܲܠܬܵܐ ܝܠܵܗܿ ܕܛܲܐܘܼܠܘܼܗܿ ܝܘܸܬ ܥܲܡܝܼ؟ ܩܵܡܘܼ ܒܓܸܚܟܵܐ ܝܘܸܬ ܒܝܼܝܼ؟ ܘܲܙܝܼܪܵܐ ܐ݇ܡܸܪܸܗ: ܡܲܠܟܵܐ ܕܗܵܘܸܬ ܒܲܣܝܼܡܵܐ؛ ܐܵܢܵܐ ܠܸܐ ܝܘܸܢ ܓܚܝܼܟܵܐ ܒܝܼܘܼܟܼ. ܐܵܢܵܐ ܪܵܒܵܐ ܫܸܢܸ̈ܐ ܦܠܝܼܚܵܐ ܝܘܸܢ ܩܵܬܘܼܟܼ ܒܡܗܘܼܡܢܘܼܬܵܐ. ܐܝܼܢܵܐ ܡܘܼܕ݇ ܩܢܸܐ ܠܝܼ؟ ܟܲܕ ܐܲܢ݇ܬ ܕܠܵܐ ܨܲܚܨܵܝܬܵܐ ܘܕܠܵܐ ܚܙܵܝܬܵܐ ܕܫܠܲܕܵܐ؛ ܕܒܼܸܩܠܘܼܟܼ ܘܝܣܸܪܠܘܼܟܼ ܩܵܬܝܼ. ܬܪܘܼܨܵܐ ܗ݇ܘܵܐ ܐ݇ܡܵܪܵܐ ܒܲܗܠܘܼܠ. ܒܲܣ ܩܸܛܡܵܐ ܩܲܕ݇ܡܵܝܵܐ ܒܪܸܫܵܐ ܕܓܵܢܝܼ! ܩܸܛܡܵܐ ܕܬܪܸܝܢ ܙܸܐ ܒܪܸܫܝܼ ܒܐܵܗܵܐ ܒܲܟܼܬܝܼ  ܩܲܕ ܒܟܠܲܝܗܝ ܫܸܢܸ̈ܐ ܕܚܲܝܘܼܬܲܢ ܡܸܚܕܵܕܸܐ ܒܚܘܼܒܵܐ ܝܘܲܚ ܗ݇ܘܵܐ ܒܸܚܵܝܵܐ ܐܝܼܢܵܐ ܟܲܕ ܡܪܸܥܠܝܼ ܘܫܘܼܪܸܐ ܠܝܼ ܠܥܲܓ̰ܘܼܙܘܼܗܿ ܓ̰ܲܠܕܸܐ ܣܘܼܦܸܐ ܠܵܗܿ ܩܵܬܝܼ. ܩܸܛܡܵܐ ܕܬܠܵܬ݇ ܙܸܐ ܒܪܸܫܵܐ ܕܓܵܢܝܼ ܕܒܡܸܬܚܵܐ ܕܚܲܡܫܲܥܣܲܪ ܫܸܢܸ̈ܐ ܘܲܙܝܼܪܵܐ ܝܘܸܢ ܗ݇ܘܵܐ ܘܪܵܒܵܐ ܦܠܸܚܠܝܼ ܘܪܵܒܵܐ ܕܘܼܟܵܢܸ̈ܐ ܡܘܼܥܡܸܪܲܝܗܝ ܠܝܼ ܘܩܵܐ ܒܢܲܝ̈ ܡܵܬܝܼ ܘܚܸܙܡܵܢܸ̈ܐ ܕܓܵܢܝܼ ܠܵܐ ܥܒܼܸܕܠܝܼ ܚܲܕ݇ ܫܘܼܓܼ݇ܠܵܐ ܛܵܒܼܵܐ. ܐܝܼܢܵܐ ܐܵܢܝܼ ܠܵܐ ܬܘܼܚܡܸܢܗ݇ܘܿܢ ܠܐܵܗܵܐ ܡܸܢܕܝܼ ܘܐ݇ܬܸܐ ܠܗ݇ܘܿܢ ܠܦܲܪܲܩܬܝܼ ܘܐܵܢܵܐ ܠܸܐ ܝ݇ܘ݇ܢ ܗ݇ܘܵܐ ܪܥܝܼܫܵܐ ܠܐܵܗ ܚܘܼܒܲܝܗܝ ܫܲܪܝܼܪܵܐ. ܬܪܘܼܨܵܐ ܐ݇ܡܵܪܵܐ ܝܘܸܬ ܝܵܐ ܡܲܠܟܵܐ ܚܩܝܼܪܵܐ. ܥܕܵܢܵܐ ܝܠܵܗܿ ܕܓܵܪܫܸܢ ܐܝܼܕܵܐ ܡܼܢ ܫܘܼܓܼ݇ܠܵܐ ܘܐܲܢ݇ܬ ܦܵܪܫܸܬ ܠܘܼܟܼ ܚܲܕ݇ ܘܲܙܝܼܪܵܐ ܐ݇ܚܸܪ݇ܢܵܐ. ܒܪܘܿܢܵܐ ܕܚܵܬܘܼܟܼ ܙܸܐ ܨܲܚܝܼܚܵܐ ܘܣܲܠܵܡܲܬ ܝܠܸܗ ܘܒܸܕ ܐܵܬܸܐ ܒܓ̰ܲܠܕܘܼܬܵܐ ܠܲܐܟܼܵܐ. ܐܵܢܵܐ ܐܲܚܟ̰ܝܼ ܒܥܸܠܝܼ ܕܓ̰ܲܪܒܸܢ ܗ݇ܘܵܐ ܠܗ݇ܘܿܢ ܚܲܒܖ̈ܵܢܸܐ ܕܒܲܗܠܘܼܠ. ܟܲܕ ܟܠܲܝܗܝ ܐ݇ܢܵܫܸ̈ܐ ܟܸܐ ܚܵܫܒܼܝܼ ܠܸܗ ܫܸܐܕܵܢܵܐ ܐܝܼܢܵܐ ܐܸܕܝܘܿܡ ܐܵܢܵܐ ܝܕܸܥܠܝܼ ܕܪܵܒܵܐ ܗܵܘܢܵܢܵܐ ܝܠܸܗ.                                               

   ܗܵܝܓܵܗܿ ܟܪܸܒܠܸܗ ܡܲܠܟܵܐ ܥܲܠ ܐܲܚܘܿܢܸܗ ܒܲܗܠܘܼܠ ܕܗ݇ܘܝܼܵܐ ܗ݇ܘܵܐ ܥܸܠܬܵܐ ܕܒܪܵܝܬܵܐ ܕܚܲܕ݇ ܗܵܕܟܼܵܐ ܫܓܼܘܼܫܝܵܐ ܓܘܼܪܵܐ. ܐܝܼܢܵܐ ܒܲܗܠܘܼܠ ܕܪܵܒܵܐ ܚܸܕܝܵܐ ܗ݇ܘܵܐ ܡܼܢ ܦܠܵܛܵܐ ܕܚܲܒܖ̈ܵܢܘܼܗܝ ܦܠܸܛܠܸܗ ܡܼܢ ܓܵܘ ܩܲܨܪܵܐ ܟܲܕ ܐ݇ܡܵܪܵܐ ܗ݇ܘܵܐ ܒܚܲܕܘܼܬܵܐ: ܐܵܢܵܐ ܥܒܼܸܕܠܝܼ ܫܘܼܓܼ݇ܠܵܐ ܕܓܵܢܝܼ!           

                                     

                         ܗܘܼܩܝܼܬܵܐ ܒܝܲܕ: ܘܝܘܿܠܸܝܬ ܣܲܪܓܝܼܙ 

                       ܡܘܼܪܝܸܙܬܵܐ ܒܝܲܕ: ܫܲܡܝܼܪܵܡ ܕ.ܦܘܼܪܝܵܐܢ