ܘܪܩܐ

                            ܡܪܝܢܐ ܒܢܝܡܝܢ

   ܟܠܲܝܗܝ ܐܵܢܝ݇ ܓ̰ܲܖ̈ܓܝܼ ܡܠܸܐܠܗ݇ܘܿܢ ܡܼܢ ܡܫܘܼܚܝܵܬܵܟܼܝ  

   ܩܲܢܝܵܟܼܝ ܕܠܵܐ ܫܠܵܝܬܵܐ ܟܟ̰ܝܼܚ ܠܸܗ ܡܐܝܼܕܵܬܵܟܼܝ

   ܒܲܚܘܼܠܸܐ ܝ݇ܘ݇ܢ ܒܝܼܘܼܗـܝ ܕܓܢܝܼܒܼ ܠܸܗ ܠܖ̈ܥܵܫܝܵܬܵܟܼܝ

   ܘܐܵܢܵܐ ܘܲܪܵܩܵܐ...ܦܫܝܼܪܵܐ ܡܟܬܝܼ̈ܒܼܝܵܬܵܟܼܝ

                      ܀܀܀        

   ܚܲܒܖ̈ܵܢܵܟܼܝ ܕܚܘܼܒܵܐ ܥܲܠ ܦܲܐܬܝܼ ܦܪܝܼܣ ܠܗ݇ܘܿܢ

   ܚܲܕ݇ ܒܵܬ݇ܪ ܕܗܿܘ ܐ݇ܚܸܪ݇ܢܵܐ ܥܲܠ ܓ̰ܲܖ̈ܓܝܼ ܚܖܸ̈ܙܠܗ݇ܘܿܢ

   ܡܼܢ ܕܸܡܥܵܟܼܝ ܨܸܖ̈ܛܝܼ ܟܡܵܐ ܬܪܸܐ ܠܗ݇ܘܿܢ ܘܒܪܸܙܠܗ݇ܘܿܢ

   ܘܚܸܪܦܸܗ ܕܩܲܠܵܡܵܟܼܝ ܐܲܝܟܼ ܡܝܼܟܼܸ̈ܐ ܫܪܸܙܠܗ݇ܘܿܢ

                      ܀܀܀

   ܥܲܡ ܟܠ ܚܲܕ݇ ܫܸܥ݇ܪܵܐ ܕܕܲܖ̈ܕܸܐ ܝ݇ܘܸܝܢ ܓܪܝܼܫܵܐ

   ܙܘܼܪܙܸܛܬܵܐ ܝ݇ܘ݇ܬܝ ܦܲܐܬܝܼ ܘܡܸܢܵܟܼܝ ܠܸܐ ܝ݇ܘ݇ܝܢ ܕܪܝܼܫܵܐ

   ܦܝܼܫܵܐ ܝ݇ܘ݇ܢ ܩܘܼܪܡܸܛܵܐ ܘܬ݇ܚܘܿܬ ܐܲܩܠܵܟܼܝ ܕܝܼܫܵܐ

   ܐܲܚܟ̰ܝܼ ܕܡܫܘܼܚܝܵܬܵܟܼ̈ܝ ܡܵܛܝܼ ܠܚܲܕ݇ ܢܝܼܫܵܐ

                      ܀܀܀

   ܢܝܼܫܵܟܼܝ ܗ݇ܘܝܼܵܐ ܝܠܸܗ ܕܟܵܬܒܼܵܬـܝ ܩܵܐ ܕܝܼܘܸܢ

   ܘܐܵܢܵܐ ܒܸܦܫܵܪܵܐ ܩܵܐ ܕܒܫܵܘܦܘܼܗـܝ ܗܵܘܸܢ

   ܨܸܦܘܵܬܵܟܼܝ ܟܟ̰ܝܼܚܸ̈ܐ ܚܲܪܕܘܼܝܘܼܗـܝ ܝܼܘܸܢ

   ܐܝܼܢܵܐ ܡܟܬܝܼܒܼܝܵܬܵܟܼܝ ܐܵܢܵܐ ܟܸܐ ܪܵܘܸܝܢ

                      ܀܀܀

   ܣܲܒܲܒ ܘܲܪܵܩܵܐ ܝ݇ܘ݇ܢ ܠܸܐ ܝ݇ܘ݇ܬـܝ ܪܥܵܫܵܐ ܒܝܼܝܝܼ

   ܠܸܐ ܝܘܵܬܝ ܒܝܼܕܵܥܵܐ ܕܐܲܢ݇ܬـܝ ܝ݇ܘܵܬܝ ܗܸܒܼܝܼܝܝܼ

   ܐܝܼܡܲܢ ܕܐܝܼܕܵܬܵܟܼܝ ܟܸܐ ܩܵܝܬـܝܼ ܒܝܼܝܝܼ

   ܐܲܝܟܼ ܕܐܸܢ ܒܝܼ ܢܘܼܪܵܐ ܟܗܵܘܝܼ ܡܘܼܠܗܸܝܝܼ

                     ܀܀܀

   ܐܵܢܵܐ ܝܘܸܢ ܕܣܵܢܩܵܬـܝ ܥܲܠܘܼܗܝ ܒܟܬܝܼܒܼܝܵܬܵܟܼܝ

   ܩܵܬـܝܼ ܐܵܡܪܵܬܝ ܠܗ݇ܘܿܢ ܟܠܲܝܗـܝ ܖ̈ܥܵܫܝܵܬܵܟܼܝ

   ܠܸܐ ܝܠܸܗ ܡܘܼܚܸܒܵܟܼܝ ܕܚܫܝܼܚܵܐ ܝܠܸܗ ܩܵܬܵܟܼܝ

   ܐܵܢܵܐ ܝ݇ܘܸܢ ܕܫܲܕܘܼܢܵܐ ܡܫܘܼܦܪܵܐ ܕܐܵܬܘܵܬܵܟܼܝ

                     ܀܀܀

   ܥܲܠܝܼ ܝ݇ܠܵܗܿ ܟܬܝܼܒܼܬܵܐ ܬܵܐܪܝܼܚ ܘܬܲܫܥܝܼܬܵܐ

   ܘܟܠ ܩܸܨܲܬ ܕܚܘܼܒܵܐ ܕܠܕܘܼܢܝܸܐ ܝ݇ܠܵܗܿ ܐ݇ܬܝܼܬܵܐ

   ܡܼܢ ܓܵܘܵܐ ܕܛܲܖ̈ܦܝܼ ܦܝܼܫ ܠܵܗܿ ܗܘܼܩܝܼܬܵܐ

   ܘܗܲܕܝܼܵܐ ܠܖܸ̈ܓܼܫܝܼ ܦܝܵܫܵܐ ܝܘ݇ܬ݇ܝ ܡܘܼܣܠܝܼܬܵܐ

                     ܀܀܀

   ܐܵܢܵܐ ܚܲܝܵܐ ܝ݇ܘܸܢ ܠܸܐ ܝ݇ܘ݇ܢ ܡܸܢܕܝܼ ܡܝܼܬܵܐ

   ܕܒܼܝܼܩܬـܝܼ ܝ݇ܘ݇ܬܝ ܓܵܘ ܐܝܼܕܵܟܼܝ ܘܥܲܠ ܒܸܐܡܵܐ ܟܠܝܼܬܵܐ

   ܡܫܘܼܚܬܵܟܼܝ ܡܥܲܠ ܚܵܨܝܼ ܦܝܵܫܵܐ ܝܠܵܗܿ ܩܪܝܼܬܵܐ

   ܘܐܸܢ ܠܲܝܬܸܢ ܐܵܢܵܐ؛ ܠܸܐ ܦܵܝܫܵܐ ܫܡܝܼܥܬܵܐ

                    ܀܀܀

   ܠܵܐ ܕܒܼܘܿܩܝ ܠܝܼ ܒܐܝܼܕܵܟܼܝ ܘܗܲܒܲܣ ܡܲܣܒܸܪܝܼ

   ܡܼܢ ܦܲܐܬܵܐ ܠܦܲܐܬܵܐ ܐܲܢ݇ܬܸܢ ܡܲܚܕܸܪܝܼ

   ܫܒܼܘܿܩܝ ܒܸܝܠ ܨܸܒܥܵܬܵܟܼܝ ܛܲܖ̈ܦܝܼ ܬܲܢܬܸܪܝܼ

   ܝܲܢ ܚܠܘܿܨܝ ܠܝܼ ܠܨܲܕܪܵܟܼܝ ܘܠܕܲܥܒܼܲܪ ܡܲܕܸܪܝܼ

                     ܀܀܀

   ܐܵܢܵܐ ܠܕܐܵܗ ܕܘܼܢܝܸܐ ܡܓ̰ܲܠܕܸܐ ܝ݇ܘܸܢ ܐ݇ܬܝܼܵܐ

   ܡܼܢ ܕܲܥܒܼܲܪ ܠܩܵܐܸܡ ܬܵܐܪܝܼܚ ܝ݇ܘܸܢ ܡܘܼܬ݇ܝܵܐ

   ܘܡܼܢ ܐܝܼܕܵܐ ܠܐܝܼܕܵܐ ܕܟܵܬܘܿܒܼܸ̈ܐ ܝ݇ܘ݇ܢ ܗ݇ܘܝܼܵܐ

   ܐܲܚܟ̰ܝܼ ܩܵܐ ܕܝܼܵܟܼܝ ܐܵܢܵܐ ܝܘܸܢ ܒܥܝܼܵܐ

                      ܀܀܀

   ܕܘܼܪ ܩܪܝܼܠܗ݇ܘܿܢ ܫܸܥܖ̈ܵܟܼܝ ܚܙܝܼ ܡܘܼܕܝܼ ܝ݇ܘ݇ܬܝ ܟܬܝܼܒܼܬܵܐ

   ܘܓܲܫܸܩ ܗܵܘ ܚܘܼܒܵܟܼܝ ܠܡܵܢܝܼ ܝ݇ܘ݇ܬܝ ܡܘܼܩܪܸܒܼܬܵܐ

   ܒܸܕ ܚܵܙܝܵܬـܝ ܓܵܢܵܟܼܝ ܕܓܵܘ ܠܸܒܘܼܗܝ ܝ݇ܘ݇ܬܝ ܝܬܝܼܒܼܬܵܐ

   ܒܝܵܕܥܵܬـܝ ܩܵܐ ܕܝܼܵܟܼܝ ܨܝܼܡ ܠܝܼ ܒܵܥܘܼܬܵܐ

                     ܀܀܀

   ܠܵܐ؛ ܨܵܘܡܝܼ ܠܸܐ ܝܠܸܗ ܡܼܢ ܐ݇ܟܼܵܠܬܵܐ ܘܫܬܵܝܬܵܐ

   ܘܠܵܐ ܙܸܐ ܣܢܝܼܩܵܐ ܝܘܸܢ ܠܚܲܡܪܵܐ ܕܡܲܪܘܵܝܬܵܐ

   ܝܼܠܸܗ ܩܲܠܵܡܵܟܼܝ ܕܠܸܐ ܐܵܬܸܐ ܠܫܠܵܝܬܵܐ

   ܘܕܩܵܬܘܼܗـܝ ܓܵܪܫܸܢܵܗܿ ܢܲܦܲܣ ܚܲܪܵܝܬܵܐ

                     ܀܀܀

   ܝ݇ܕܝܼܥ݇ ܩܵܐ ܟܬܝܼܒܼܝܵܬܵܟܼܝ ܐܵܢܵܐ ܝ݇ܘ݇ܢ ܒܸܚܵܝܵܐ

   ܡܩܪܵܝܬܵܐ ܕܚܲܒܖ̈ܵܢܵܟܼܝ ܛܲܖ̈ܦܝܼ ܒܸܪܘܵܝܵܐ

   ܡܼܢ ܚܬܵܡܬܵܐ ܕܡܫܘܼܚܬܵܟܼܝ ܟܗܵܘܸܢ ܒܸܙܕܵܥܵܐ

   ܕܠܵܐ ܡܸܢ݇ܕܪܸܫ݇ ܕܵܝܪܸܢ ܠܚܘܼܒܵܟܼܝ ܒܸܓܒܼܵܝܵܐ

                                 ܡܪܝܢܐ ܒܢܝܡܝܢ

܀ ܡܵܪܝܼܢܵܐ ܒܸܢܝܵܡܝܼܢ ܚܕܵܐ ܥܠܲܝܡܬܵܐ ܝܠܵܗܿ ܡܵܫܘܿܚܬܵܐ ܕܟܸܐ ܚܵܝܵܐ ܒܐܲܡܸܝܪܝܼܟܵܐ ܘܟܸܐ ܡܲܠܚܸܡܵܐ ܡܘܼܫܚܵܬܸ̈ܐ ܣܩܝܼ̈ܠܸܐ ܘܫܲܦܝܼܖܸ̈ܐ. ܟܲܕ ܐܵܗܵܐ ܡܫܘܼܚܬܵܐ ܦܝܼܫܬܵܐ ܗ݇ܘܵܐ ܟܬܝܼܒܼܬܵܐ ܒܚܲܕ݇ ܠܸܥܙܵܐ ܦܪܝܼܫܵܐ ܕܒܸܕ ܒܵܪܸܐ ܗ݇ܘܵܐ ܥܲܣܩܘܼܬܵܐ ܒܩܪܵܝܬܘܼܗܿ؛ ܦܝܼܫܠܵܗܿ ܡܘܼܪܝܸܙܬܵܐ ܗܵܕܟܼܵܐ ܕܗܵܘܝܵܐ ܡܸܬܦܲܪܡܝܼܵܢܬܵܐ ܩܵܐ ܒܢܲܝ̈ ܐܘܼܡܬܲܢ ܒܐܝܼܪܵܢ. ܥܲܠ ܗܵܕܵܐ ܒܸܛܠܵܒܵܐ ܝܘܲܚ ܦܘܼܚܵܠܵܐ ܡܼܢ ܡܵܫܘܿܚܬܵܐ ܝܲܕܝܼܕܬܵܐ ܡܵܪܝܼܢܵܐ ܒܸܢܝܵܡܝܼܢ ܘܒܣܲܒܼܪܵܐ ܝܘܲܚ ܕܗܵܘܝܵܐ ܡܲܢܬܝܼܵܢܬܵܐ ܒܪܲܗܛܵܐ ܕܦܘܼܠܚܵܢܘܼܗܿ ܐܘܼܡܵܢܵܝܵܐ.