ܐܢܐ ܘܒܥܒܐ
ܫܡܝܪܡ ܕ.ܦܘܪܝܐܢ

   ܪܵܒܵܐ ܫܸܢܸ̈ܐ ܥܒܼܝܼܖܸ̈ܐ ܝܢܵܐ ܡܼܢ ܗܵܘ ܝܵܘܡܵܐ ܕܫܩܸܠܝܼ ܩܲܢܝܵܐ ܒܐܝܼܕܝܼ ܘܫܘܼܪܸܐ ܠܝܼ ܠܸܟܬܵܒܼܵܐ ܫܸܥܖܸ̈ܐ ܘܗܲܩܝܵܬܸ̈ܐ ܒܠܸܫܵܢܵܐ ܝܸܡܵܝܵܐ. ܒܐܵܗ ܡܸܬܚܵܐ ܝܲܪܝܼܟܼܵܐ، ܟܲܕ ܥܠܲܝܡܘܼܬܝܼ ܫܘܼܪܝܼܬܵܐ ܝܠܵܗܿ ܢܝܼܚܵܐܝܼܬ ܒܸܛܠܵܩܵܐ؛ ܬܦܝܼܩܬܵܐ ܝܘܵܢ ܒܪܵܒܵܐ ܩܲܘܲܡܝܵܬܸ̈ܐ ܐܸܢ ܨܦܵܝܝܼ ܝܲܢ ܚܸܪܒܵܐ؛ ܡܲܦܫܸܡܵܢܸܐ ܝܲܢ ܡܲܚܕܝܼܵܢܸ̈ܐ ܒܟܠܲܝܗܝ ܓܸܒܵܢܸ̈ܐ ܕܚܲܝܘܼܬܝܼ ܦܲܪܨܘܼܦܵܝܬܵܐ. ܐܝܼܢܵܐ ܐܲܝܟܼ ܚܕܵܐ ܡܵܫܘܿܚܬܵܐ ܝܲܢ ܣܵܝܘܿܡܬܵܐ ܙܸܐ ܪܵܒܵܐ ܥܕܵܢܵܬܸ̈ܐ ܬܦܝܼܩܬܵܐ ܝܘܵܢ ܒܚܲܕ݇ܟܡܵܐ ܗܘܼܦܵܟܼܸܐ ܠܵܐ ܒܲܣܝܼܡܸ̈ܐ ܘܡܲܡܪܸܝܵܢܸ̈ܐ. ܚܲܕ݇ܟܡܵܐ ܥܕܵܢܵܬܸ̈ܐ ܫܡܝܼܥܬܵܐ ܝܘܵܢ ܕܐ݇ܡܝܼܖܸ̈ܐ ܝܢܵܐ: ܡܘܼܕ ܣܵܘܕܵܐ ܐܝܼܬ ܠܵܟܼܝ؟ ܡܘܼܕ݇ ܒܸܕ ܦܵܠܸܛ ܡܼܢ ܠܸܫܵܢܵܐ ܣܘܼܪܝܵܝܵܐ؟ ܝܲܢ ܐ݇ܡܝܼܖܸ̈ܐ ܝܢܵܐ: ܒܸܚܫܵܒܼܵܐ ܝܘܵܬܝ ܡܘܼܕ ܫܘܼܓܼ݇ܠܵܐ ܓܘܼܪܵܐ ܩܵܐ ܐܵܗܵܐ ܐܘܼܡܬܵܐ ܥܒܼܝܼܕܬܵܐ ܝܘܵܬܝ ܘܫܪ.                                                                    

    ܟ̰ܸܡ ܨܦܵܝܝܼ ܟܸܐ ܝܵܕܥܝܼܬܘܿܢ ܕܚܲܕ݇ ܦܲܪܨܘܼܦܵـܐ ܕܐܝܼܬ ܠܸܗ ܥܵܒܼܘܿܕܘܼܬܵܐ ܒܚܲܩܠܵܐ ܕܐܘܼܡܵܢܘܼܬܵܐ ܚܲܕ݇ܟ̰ܵܐ ܒܘܼܫ ܡܪܲܓܼܫܵܢܵܐ ܝܠܸܗ ܡܼܢ ܛܝܘܼܦܸ̈ܐ ܐ݇ܚܸܖ̈݇ܢܸ݇ܐ ܕܐܘܼܡܬܵܐ. ܪܵܒܵܐ ܓܵܗܸ̈ܐ ܗܵܕܟܼܵܐ ܚܲܒܖ̈ܵܢܸܐ ܫܡܝܼܛܘܼܗܝ ܝܢܵܐ ܠܸܒܝܼ ܘܡܘܼܣܩܸܕܘܼܗܿ ܝܢܵܐ ܪܘܼܚܝܼ. ܪܵܒܵܐ ܥܕܵܢܵܬܸ̈ܐ ܟܸܐ ܬܲܚܡܸܢܲܢ ܗ݇ܘܵܐ ܕܩܵܐ ܡܵܢܝܼ ܘܡܘܼܕܝܼ ܓ̰ܲܢܓ̰ܘܼܪܘܼܗܿ ܝܘܵܢ ܓܵܢܝܼ ܘܡܘܼܕ ܫܘܼܓܼ݇ܠܵܐ ܝܠܸܗ  ܕܕܵܒܼܚܵܢܗ݇ܘܿܢ ܥܕܵܢܵܬܝܼ ܕܲܩܖ̈ܵܢܸܐ ܘܛܝܼܡܵܢܸܗܐ ܟܲܕ ܩܢܵܝܬܝܼ ܝܠܵܗܿ ܚܲܒܖ̈ܵܢܸܐ   ܣܸܟܖ̈ܵܢܸܐ ܘܩܸܫܝܸ̈ܐ؛ ܚܲܕ݇ܟܡܵܐ ܥܕܵܢܵܬܸ̈ܐ ܙܸܐ ܠܘܼܚܵܫܸ̈ܐ(ܒܘܼܚܬܵܢܸ̈ܐ) ܘܨܘܼܥܵܖܸ̈ܐ؟ ܐܝܼܢܵܐ ܚܲܕ݇ ܝܵܘܡܵܐ ܬܦܸܩܠܝܼ ܒܚܕܵܐ ܟܬܝܼܒܼܬܵܐ ܡܥܲܓ̰ܒܵܢܬܵܐ ܒܟܬܵܒܼܵܐ ܕܬܲܫܥܝܼܬܵܐ ܕܣܸܦܪܵܝܘܼܬܵܐ(ܒܝܲܕ ܦܸܐܪܵܐ ܣܲܪܡܲܣ) ܕܡܘܼܬܸܒܼܠܵܗܿ ܚܕܵܐ ܡܲܥܒܼܕܵܢܘܼܬܵܐ ܚܲܝܠܵܢܬܵܐ ܥܲܠܝܼ.                                                                     

   ܐܲܝܟܼ ܕܟܬܝܼܒܼܵܐ ܝܠܸܗ ܦܸܐܪܵܐ ܣܲܪܡܲܣ؛ ܒܲܥܒܵܐ ܕܟܵܘܣܸܐ (ܕܠܸܐ ܝܘܵܢ ܒܝܼܕܵܥܵܐ ܩܵܡܘܼܕܝܼ ܒܲܥܒܵܐ ܝܠܸܗ ܘܠܵܐ ܒܵܒܵܐ)؛ ܚܲܕ݇ ܦܲܪܨܘܿܦܵܐ ܡܵܪܵܐ ܕܟܲܟܪܵܐ ܗ݇ܘܵܐ. ܗܵܘ ܟܲܕ ܚܲܕ݇ ܝܲܠܵܕ݇ܐ ܙܥܘܿܪܵܐ ܗ݇ܘܵܐ ܫܘܼܕܵܪܬܘܼܗܝ ܠܵܗ ܝܸܡܘܼܗܝ ܠܡܲܕܪܲܫܬܵܐ ܕܡܵܬܵܐ ܕܣܝܼܪܸܐ(ܒܐܘܼܪܡܝܼ)؛ ܐܝܼܢܵܐ ܗܵܘ ܠܸܐ ܝܠܸܗ ܡܘܼܚܸܒܵܐ ܠܐܵܗ ܡܸܢܕܝܼ ܘܒܸܥܪܵܩܵܐ ܝܠܸܗ ܡܼܢ ܡܲܕܪܲܫܬܵܐ. ܐܝܼܢܵܐ ܡܼܢ ܒܝܼܫ ܓܲܕܘܼܬܘܼܗܝ ܡܲܫܟ̰ܘܼܚܘܼܗܝ ܝܢܵܐ ܘܡܲܕܘܼܪܘܼܗܝ ܝܢܵܐ ܠܒܲܝܬܵܐ ܘܝܸܡܘܼܗܝ ܡܸܢ݇ܕܪܸܫ݇ ܫܲܕܘܼܪܘܼܗܝ ܝܠܵܗ ܠܡܲܕܪܲܫܬܵܐ. ܒܵܬ݇ܪ ܚܲܕ݇ ܡܸܬܚܵܐ ܚܕܵܐ ܓܵܗܵܐ ܐ݇ܚܸܪ݇ܬܵܐ ܒܸܥܪܵܩܵܐ ܝܠܸܗ ܡܼܢ ܓܵܘ ܛܘܼܖ̈ܵܢܸܐ ܕܟܘܼܪܕܸܣܬܵܢ(ܩܘܼܪܕܸܣܬܵܢ)؛ ܟܲܕ ܒܝܵܘܡܵܢܸ̈ܐ ܗ݇ܘܵܝܵܐ ܝܠܸܐ ܒܐܘܼܪܚܵܐ ܘܒܸܓܪܵܫܵܐ ܝܠܸܗ ܟܸܦܢܵܐ ܘܨܲܗܘܵܐ ܗܲܠ ܕܡܛܵܝܵܐ ܝܠܸܗ ܠܘܵܐܢ ܓܵܘ ܬܘܼܪܟܝܼܵܐ. ܒܡܕܝܼܢ݇ܬܵܐ ܕܘܵܐܢ ܒܸܓܒܼܵܝܵܐ ܝܠܸܗ ܡܸܐܟܼܘܿܠܬܵܐ ܘܟ̰ܲܪܘܼܚܸ̈ܐ ܡܼܢ ܓܵܘ ܡܵܬܘܵܬܸ̈ܐ ܕܩܘܼܖ̈ܕܵܝܸܐ ܘܒܸܐܙܵܠܵܐ ܘܦܠܵܛܵܐ ܝܠܸܗ ܠܬܸܦܠܝܼܣ ܓܵܘ ܓܘܼܪܓ̰ܸܣܬܵܢ(ܓ̰ܘܿܪܓ̰ܝܼܵܐ) ܟܲܕ ܟܠܵܗܿ ܐܘܼܪܚܵܐ ܒܐܲܩܠܘܼܗܝ ܒܸܪܚܵܫܘܼܗܿ ܝܠܸܗ. ܓܵܘ ܬܸܦܠܝܼܣ ܡܲܫܟ̰ܘܼܚܸܐ ܝܠܸܗ ܠܚܲܕ݇ܟܡܵܐ ܒܢܲܝ̈ ܟܘܿܣܸܐ ܘܐܵܢܝܼ ܠܲܒܘܼܠܘܼܗܝ ܝܢܵܐ ܥܲܡܲܝܗܝ ܠܐܲܬܪܵܐ.                         

      ܒܵܬ݇ܪ ܕܝܵܪܬܵܐ ܠܐܘܼܪܡܝܼ ܡܸܢ݇ܕܪܸܫ݇ ܝܸܡܘܼܗܝ ܫܲܕܘܼܪܘܼܗܝ ܝܠܵܗܿ  ܠܡܲܕܪܲܫܬܵܐ ܕܣܝܼܪܸܐ. ܒܐܵܗܵܐ ܓܵܗܵܐ ܐܝܼܢܵܐ ܡܲܟܘܼܦܘܼܗܝ ܝܠܸܗ ܪܸܫܘܼܗܝ ܘܒܸܩܪܵܝܲܝܗܝ ܝܠܸܗ ܕܲܖ̈ܣܘܼܗܝ ܒܚܘܼܦܵܛܵܐ. ܒܵܬ݇ܪ ܦܪܵܩܬܵܐ ܕܩܪܵܝܬܘܼܗܝ؛ ܦܠܵܚܵܐ ܝܠܸܗ ܒܡܸܬܚܵܐ ܕܫܲܒܼܥܵܐ ܫܸܢܸ̈ܐ ܘܓ̰ܲܡܘܼܥܲܝܗܝ ܝܠܸܗ ܡܲܬܠܸ̈ܐ ܕܒܢܲܝ̈ ܐܘܼܡܬܲܢ ܘܗܲܕܘܼܪܸܐ ܝܠܸܗ ܚܲܕ݇ ܟܬܵܒܼܵܐ ܕܠܸܟܣܝܼܩܘܼܢ ܡܼܢ ܠܸܫܵܢܵܐ ܣܘܼܪܝܵܝܵܐ ܣܘܵܕܵܝܵܐ ܥܲܠ ܠܸܫܵܢܵܐ ܕܐܸܢܓܠܝܼܣ ܘܦܵܪܣܸܬ؛ ܕܐܲܝܟܼ ܕܬܘܼܢܝܸ̈ܐ ܝܢܵܐ ܗ݇ܘܝܼܵܐ ܝܠܸܗ ܚܲܕ݇ ܟܬܵܒܼܵܐ ܛܝܼܡܵܢܵܐ ܘܡܵܘܬܪܵܢܵܐ ܩܵܐ ܢܛܵܪܬܵܐ ܕܠܸܫܵܢܲܢ. ܟܲܕ ܦܪܝܼܩܵܐ ܗ݇ܘܵܐ ܡܼܢ ܗܲܕܲܪܬܵܐ ܕܟܬܵܒܼܵܐ ܩܵܐ ܛܒܼܵܥܬܵܐ؛ ܐܝܼܢܵܐ ܒܚܲܕ݇ܟܡܵܐ ܥܸܠܵܠܸ̈ܐ(ܐܲܝܟܼ ܕܟܬܝܼܒܼܸ̈ܐ ܝܠܸܗ ܦܸܐܪܵܐ ܣܲܪܡܲܣ: ܒܐܝܼܕܵܐ ܕܚܲܕ݇ܟܡܵܐ ܥܸܕܵܬܸ̈ܐ) ܦܝܵܫܵܐ ܝܠܸܗ ܡܘܼܟܠܝܼܵܐ! ܒܵܬ݇ܪ ܐܵܗܵܐ ܡܸܙܕܲܟܼܝܵܢܘܼܢܵܐ (ܡܲܩܪܲܡܬܵܐ) ܒܸܐܙܵܠܵܐ ܝܠܸܗ ܠܐܲܡܸܝܪܝܼܟܵܐ ܒܢܝܼܫܵܐ ܕܛܒܼܵܥܬܵܐ ܕܟܬܵܒܼܘܼܗܝ. ܬܵܡܵܐ ܙܸܐ ܬܪܸܝܢ  ܡܸܣܬܝܼܖܸ̈ܐ ܠܸܐ ܝܢܵܐ ܒܸܫܒܼܵܩܵܐ ܕܡܵܛܸܐ ܠܢܝܼܫܘܼܗܝ!                                                   

    ܒܫܸܢ݇ܬܵܐ 1906 ܒܸܕܝܵܪܵܐ ܝܠܸܗ ܠܬܸܦܠܝܼܣ ܘܬܵܡܵܐ ܒܸܛܠܵܒܵܐ ܝܠܸܗ ܡܼܢ ܐܵܬܘܼܖ̈ܵܝܸܐ ܕܬܸܦܠܝܼܣ ܕܗܲܝܸܪܝܼܠܸܗ ܩܵܐ ܛܒܼܵܥܬܵܐ ܕܟܬܵܒܼܸܗ. ܗܵܝܓܵܗܿ ܓ̰ܲܡܘܼܥܸܐ ܝܢܵܐ 2000 ܡܢܵܬܸ̈ܐ(ܙܘܼܙܵܐ ܕܪܘܼܣܝܼܵܐ) ܕܒܗܵܘ ܙܲܒܼܢܵܐ ܚܕܵܐ ܟܡܵܝܘܼܬܵܐ ܓܘܼܪܬܵܐ ܗ݇ܘܵܐ. ܐܝܼܢܵܐ ܐܲܢܸܐ ܙܘܼܙܸ̈ܐ ܠܸܐ ܝܢܵܐ ܦܝܵܫܵܐ ܡܘܼܦܠܸܚܸ̈ܐ ܩܵܐ ܛܒܼܵܥܬܵܐ ܕܟܬܵܒܼܵܐ ܐܸܠܵܐ ܐܲܝܟܼ ܕܟܬܝܼܒܼܸܐ ܝܠܸܗ ܓܵܘ ܟܬܵܒܼܵܐ ܦܝܵܫܵܐ ܝܢܵܐ ܦܘܼܫܖܸ̈ܐ(ܕܵܐܟܼܝܼ ܟܸܐ ܦܵܫܖ̈ܝܼ ܙܘܼܙܸ̈ܐ؟)! ܒܚܲܪܬܵܐ ܟܲܕ ܒܸܩܛܵܥܵܐ ܝܠܵܗܿ ܗܸܒܼܝܼܘܼܗܝ ܡܼܢ ܟܠ ܚܲܕ݇ ܕܘܼܟܵܐ ܘܡܼܢ ܟܠ ܚܲܕ݇ ܐ݇ܢܵܫܵܐ؛ ܒܸܫܓܼܵܫܵܐ ܝܠܸܗ ܫܲܡܵܫܵܐ ܒܲܥܒܵܐ ܘܡܝܵܬܵܐ ܝܠܸܗ ܡܼܢ ܚܲܫܘܼܗܝ. ܡܸܣܟܸܢܵܐ ܘܫ̰ܵܪܸܐ ܫܲܡܵܫܵܐ ܒܲܥܒܵܐ ܕܟܘܿܣܸܐ! ܠܸܒܝܼ ܝܩܸܕܠܸܗ ܪܵܒܵܐ ܒܩܪܵܝܬܵܐ ܕܐܵܗܵܐ ܣܝܵܡܵܐ.  

ܡܘܼܕ݇ ܐ݇ܬܝܼܬܵܐ ܝܠܵܗܿ  ܒܪܸܫܵܐ ܕܚܲܕ݇ ܥܠܲܝܡܵܐ ܡܵܪܵܐ ܕܟܲܟܪܵܐ ܘܡܸܠܝܵܐ ܡܼܢ ܠܗܝܼܩܘܼܬܵܐ ܩܵܐ ܟܬܵܒܼܬܵܐ ܘܒܪܵܝܬܵܐ ܕܚܲܕ݇ ܡܲܒܘܼܥܵܐ ܩܵܐ ܡܲܠܦܵܢܘܼܬܵܐ ܕܠܸܫܵܢܵܐܣܘܼܪܵܝܵܐ؟ ܟܠܲܝܗܝ ܡܠܘܼܐܸ̈ܐ ܕܒܪܝܼܬܵܐ ܚܕܝܼܖܸ̈ܐ ܝܢܵܐ ܒܲܪܩܘܼܒܼܠܸܗ ܘܗܵܘ ܗܲܠ ܥܕܵܢܵܐ ܕܡܵܬܘܼܗܝ ܠܸܐ ܝܠܸܗ ܫܸܠܝܵܐ ܡܼܢ ܚܘܼܦܵܛ̈ܘܼܗܝ!                                                                               

 ܗܵܕܟܼܵܐ ܗ݇ܘܵܐ ܕܪܓܼܸܫܠܝܼ ܕܠܵܐ ܐܲܚܟ̰ܝܼ ܐܵܢܵܐ ܐܸܠܵܐ ܟܠܲܝܗܝ ܐܵܢܝܼ ܐܵܬܘܼܖ̈ܵܝܸܐ ܕܒܸܪܚܵܫܵܐ ܝܢܵܐ ܒܵܬ݇ܪ ܪܸܓܼܫܲܝܗܝ ܘܐܘܼܡܵܢܘܼܬܲܝܗܝ؛ ܒܸܥܒܼܵܪܵܐ ܝܢܵܐ ܓܵܘ ܚܲܕ݇ ܐܵܓܼܘܼܢܵܐ ܕܠܵܐ ܣܵܟܼܵܐ ܘܩܲܛܠܵܢܵܐ. ܪܥܸܫܠܝܼ ܕܥܒܼܵܪܬܵܐ ܒܐܵܗܵܐ ܐܵܓܼܘܼܢܵܐ ܣܢܝܼܩܬܵܐ ܝܠܵܗܿ ܥܲܠ ܚܲܕ݇ ܠܸܒܵܐ ܓܘܼܪܵܐ ܘܚܕܵܐ ܪܘܼܚܵܐ ܚܲܝܠܵܢܬܵܐ ܘܣܩܠܝܼܬܵܐ ܒܕܒܼܝܼܚܘܼܬ ܢܲܦ̰ܫܵܐ. ܪܥܸܫܠܝܼ ܕܐܘܼܡܵܢܸ̈ܐ ܕܐܘܼܡܬܲܢ ܟܸܐ ܦܵܝܫܝܼ ܡܝܘܼܩܖܸ̈ܐ ܐܲܚܟ̰ܝܼ ܡܼܢ ܒܵܬ݇ܪ ܡܵܘܬܲܝܗܝ ܒܝܲܕ ܐܵܢܝܼ ܕܓܵܘ ܟܠܵܗܿ ܡܸܬܚܵܐ ܕܚܲܝܘܼܬܲܝܗܝ ܟܸܐ ܗܵܘܝܼ ܡܲܣܠܘܼܝܲܝܗܝ. ܐܝܼܢܵܐ ܐܵܦ ܪܓܼܸܫܠܝܼ ܕܐܘܼܡܵܢܘܼܬܵܐ ܫܲܪܝܼܪܬܵܐ ܠܸܐ ܒܵܪܝܵܐ ܒܚܲܝܠܵܐ ܕܙܘܼܙܸ̈ܐ ܘܡܲܫܦܲܪܬܵܐ؛ ܘܐܘܼܡܵܢܵܐ ܫܲܪܝܼܪܵܐ ܠܸܐ ܝܠܸܗ ܣܢܝܼܩܵܐ ܥܲܠ ܥܘܼܬܪܵܐ ܘܚܸܩܪܵܐ ܘܕܲܫܢܸ̈ܐ ܛܝܼܡܵܢܸ̈ܐ. ܐܸܠܵܐ ܗܵܝ ܒܸܕ ܒܵܪܝܵܐ ܘܡܲܚܙܝܼܵܐ ܠܵܗܿ ܓܵܢܘܼܗܿ ܐܵܦ ܐܸܢ ܗܵܘܝܵܐ ܟܒܼܝܼܫܬܵܐ(ܚܘܼܪܕܝܼܬܵܐ) ܒܝܲܕ ܣܢܝܼܩܘܼܬܵܐ ܘܒܣܢܵܝܬܵܐ ܘܕܲܠܩܘܼܒܼܠܵܝܘܼܬܵܐ ܘܦܲܝܫܵܢܬܵܐ ܝܠܵܗܿ ܠܐܲܒܲܕ ܐܲܒܲܕܝܼܢ.