(ܣܘܪܝܐ ܩܠܣܝܩܝܐ )

(ܣܘܪܝܐ ܩܠܣܝܩܝܐ )

ܫܡܥܘܢ ܒܝܬ ܐܝܫܘ

ܫܡܝܪܡ ܕܘܝܕܦܘܪܝܐܢ

ܒܡܲܠܦܵܢܘܼܬܵܐ ܕܠܸܫܵܢܵܐ ܣܘܼܪܵܝܵܐ ܩܠܵܣܝܼܩܵܝܵܐ ܩܵܐ ܝܵܠܸ̈ܐ ܘܒܢܵܬܸ̈ܐ ܕܐܘܼܡܬܲܢ ܡܲܒܝܘܼܢܸܐ ܝܢܵܐ ܚܲܕ݇ܟܡܵܐ ܩܸܛܖܸ̈ܐ ܓܵܘ ܗܘܼܓܵܝܵܐ؛ ܕܐܲܡܝܼܢܵܐܝܼܬ ܦܝܵܫܵܐ ܝܢܵܐ ܬܸܢܝܸ̈ܐ ܒܐܵܗܵܐ ܪܲܗܛܵܐ. ܡܲܠܦܵܢܘܼܬܵܐ ܕܠܸܫܵܢܵܐ ܣܘܼܪܵܝܵܐ ܩܠܵܣܝܼܩܵܝܵܐ؛ ܫܘܼܪܸܐ ܠܵܗܿ ܡܼܢ ܫܘܼܪܵܝܵܐ ܕܕܵܪܵܐ 19 ܠܡܵܪܲܢ.ܘܐܵܗܵܐ ܙܸܐ ܐ݇ܬܸܐ ܠܵܗܿ ܡܼܢ ܫܲܬܐܲܣܬܵܐ ܕܥܸܕܵܬܸ̈ܐ ܡܫܲܚܠܦܸ̈ܐ ܕܬܵܘܕܝܼܬܵܐ؛ ܩܲܕ ܒܸܫ ܙܵܘܕܵܐ ܢܝܼܫܲܝܗܝ ܗ݇ܘܵܐ ܡܲܦܪܲܣܬܵܐ ܕܗܲܝܡܵܢܘܼܬܲܝܗܝ ܒܥܵܠܡܵܐ ܣܘܼܪܵܝܵܐ. ܟܲܕ  ܕܡܼܢ ܩܵܕ݇ܡ ܕܗܿܝ؛ ܟܠܲܝܗܝ ܣܝܵܡܸ̈ܐ ܒܐܘܼܡܬܲܢ ܒܠܸܫܵܢܵܐ ܥܲܬܝܼܩܵܐ ܗ݇ܘܵܘ.             

ܟܲܕ ܐܵܕܝܼܵܐ ܡܼܢ ܒܵܬ݇ܪ ܬܪܸܝܢ ܕܵܖܸ̈ܐ ܗܵܠܵܐ ܩܸܛܖܸ̈ܐ ܕܗܘܼܓܵܝܵܐ ܠܸܐ ܝܢܵܐ ܐ݇ܬܝܼܸܐ ܠܬܘܼܪܵܣܵܐ. ܘܐܵܗܵܐ ܗ݇ܘܵܝܵܐ ܝܠܵܗܿ ܥܸܠܬܵܐ  ܕܚܲܕ݇ܟܡܵܐ ܚܵܫܒܼܝܼ ܕܠܸܫܵܢܵܐ ܣܘܼܪܵܝܵܐ ܩܠܵܣܝܼܩܵܝܵܐ ܚܲܕ݇ ܠܸܫܵܢܵܐ ܝܠܸܗ ܥܲܣܩܵܐ ܘܒܸܫ ܨܦܵܝܝܼ ܝܠܵܗܿ ܕܩܵܪܝܼ ܘܝܵܠܦܝܼ ܠܠܸܫܵܢܸ̈ܐ ܐ݇ܚܸܖ̈݇ܢܸܐ ܐܲܝܟܼ ܐܸܢܓܠܸܣ ܕܐܝܼܬ ܓܵܘܸܗ ܠܲܚܡܵܐ. ܘܵܠܸܐ ܠܲܢ ܕܐܵܡܪܲܚ ܕܥܸܠܬܵܐ ܫܸܪܫܵܝܬܵܐ ܕܐܵܗܵܐ ܩܸܛܪܵܐ ܠܸܐ ܝܠܵܗܿ ܥܲܣܩܘܼܬܵܐ ܕܠܸܫܲܢܲܢ ܐܸܠܵܐ ܠܵܐ 

ܝܕܵܥܬܵܐ ܕܩܵܢܘܿܢܸܐ ܕܬܘܼܪܵܨ ܡܲܡܠܠܸܗ ܘܠܲܝܬܵܝܘܼܬܵܐ ܕܡܗܝܼܪܘܼܬܵܐ ܕܡܲܠܦܵܢܸ̈ܐ ܥܲܠ ܠܸܫܵܢܵܢ ܝܠܵـܗܿ.                                                    

ܠܲܐܟܼܵܐ ܒܸــܕ ܗܒܼܲܚ ܚܕܵܐ ܡܵܘܕܥܵܢܘܼܬܵܐ ܟܪܝܼܬܵܐ ܥܲܠ ܥܸܩܪܵܐ ܕܡܸܠܵܠܸ̈ܐ ܕܠܸܫܵܢܵܐ ܩܠܵܣܝܼܩܵܝܵܐ. ܣܘܼܪܝܵܝܵܐ ܐܲܝـܟܼ ܕܡܘܼܢܗܸܪܵܐ ܝܠܸـܗ ܡܲܠܦܵܢܵــܐ ܪܲܒܵــܐ ܢܸܡܪܘܼܕ ܣܝܼـܡܘܿܢــܘܿ ܒܟܬܵܒܼܘܼܗܝ ܛܝܼܡܵܢܵܐ: ܬܘܼܪܵܨ ـ ܡܲܡܠܠܵܐ ܒܠܸܫܵܢܵܐ ܐ݇ܣܘܼܪܵܝܵܐ ܣܘܵܕܵܝܵܐ ܘܦܪܝܼܫܵܐܝܼܬ ܡܸܠܬܵܐ ܘܦܸܖ̈ܥܘܼܗܿ: ܠܸܫܵܢܵܐ ܣܘܵܕܵܝܵܐ ܐ݇ܣܝܼܪܵܐ ܝܠܸܗ ܥܲܠ ܥܸܩܪܵܐ ܕܡܸܠܬܵܐ ܘܡܼܢ ܥܸܩܪܵܐ ܒܸܢܒܼܵܥܵܐ ܘܒܸܦܪܵܥܵܐ ܝܢܵܐ ܣܘܼܟܵܠܸ̈ܐ ܘܚܲܫܚܵܬܸ̈ܐ ܡܸܠܬܵܢܵܝܸ̈ܐ. ܘܒܸܬܪܵܨܵܐ ܝܢܵܐ ܙܸܐ ܚܲܒܖܸ̈ܐ ܘܫܸܡܵܢܸ̈ܐ. ܒܘܼܬ ܐܵܗܵܐ ܝܠܵܗܿ ܕܒܠܵܐ ܝܠܵܦܬܵܐ ܕܩܵܢܘܿܢܸ̈ܐ ܕܡܸܠܬܵܐ ܟܸܐ ܗܵܘܲܚ ܒܸܚܠܵܛܵܐ ܒܪܫܵܡܬܵܐ ܕܙܵܘܥܸ̈ܐ (ܙܩܵܦܸ̈ܐ ܘܙܠܵܡܸ̈ܐ).ܩܵܐ ܛܘܼܦ̰ܣܵܐ ܪܵܒܵܐ ܡܼܢ ܝܵܕܥܵܢܸ̈ܐ ܟܸܐ ܟܵܬܒܼܝܼ( ܟܲܬܘܿܒܼܵܐ ܕܐܵܗܵܐ ܟܬܵܒܼܵܐ) ܘܗܵܕܟܼܵܐ ܒܸܚܠܵܛܵܐ ܝܢܵܐ ܒܗܿܝ ܕܟܲܬ  ܒܸܢܒܼܵܥܵܐ ܝܠܸܗ ܡܼܢ ܥܸܩܪܵܐ ܟܵܬܸܒܼ ܝܲܥܢܸܐ ܙܩܝܼܦܘܼܬ ܪܸܫܵܐ ܘܟܠܲܝܗܝ ܚܲܒܖ̈ܵܢܸܐ ܘܚܲܫܚܵܬܸ̈ܐ ܦܠܝܼܛܸ̈ܐ ܡܼܢ ܥܸܩܪܵܐ ܟܵܬܸܒܼ ܒܸܕ ܫܵܩܠܝܼ ܙܩܵܦܵܐ.  ܒܠܸܫܵܢܵܐ ܣܘܼܪܵܝܵܐ ܡܸܠܬܵܐ ܐܝܼܬܠܵܗܿ ܚܲܡܫܵܐ ܟܝܘܼܠܸ̈ܐ. ܬܪܸܝܢ ܟܝܘܼܠܸ̈ܐ ܩܲܕ݇ܡܵܝܸܐ ܝܼܢܵܐ:ܦܥܠ ܙܩܵܦܵܐ(ܦܵܥܸܠ) ܘܦܥܠ ܦܬܵܚܵܐ(ܦܲܥܸܠ)؛ ܘܐܵܢܝܼ ܬܠܵܬ݇ ܟܝܘܼܠܸ̈ܐ ܐ݇ܚܸܖ̈݇ܢܸܐ ܒܸܐܬܵܝܵܐ ܝܢܵܐ ܡܼܢ ܡܲܙܝܲܕܬܵܐ ܕ(ܡܲ)ܘ(ܫܲ) ܘ(ܫܬܲ) ܥܲܠ ܟܝܘܼܠܵܐ ܕ(ܦܥܠ) ܗ.ܕ ܡܲܦܥܸܠ؛ ܫܲܦܥܸܠ ܘܫܬܲܦܥܸܠ.        

ܛܘܼܦ̰ܣܵܐ ܐ ܡܼܢ ܦܵܥܸܠ: ܦܵܪܸܩ؛ ܦܪܵܩܵܐ ـ ܫܵܩܸܠ؛ ܫܩܵܠܵܐ ـ ܬܵܩܸܠ؛ ܬܩܵܠܵܐ ـ ܙܵܡܸܪ؛ܙܡܵܪܵܐ. ܘܼܦ̰ܣܵܐ ܒ ܡܼܢ ܦܲܥܸܠ: ܒܲܩܸܪ؛ ܒܲܩܘܼܪܸܐ ـ ܓܲܫܸܩ؛ ܓܲܫܘܼܩܸܐ ـ ܙܲܒܸܢ؛ ܙܲܒܘܼܢܸܐ ـ ܬܲܢܸܐ؛ ܬܲܢܘܼܝܸܐ ܘܫܪ.             

 ܙܢܵܐ ܠܵܐ ܡܬܲܚܡܵܐ(مصدر) ܒܬܪܸܝܢ ܟܝܘܼܠܸܐ ܦܵܥܸܠ ܘܦܲܥܸܠ ܦܖ̈ܝܼܫܸܐ ܝܢܵܐ:ܒܟܝܘܼܠܵܐ ܦܵܥܸܠ ܝܠܸܗ: ܦܥܵܠܵܐ ܘܒܟܝܘܼܠܵܐ ܦܲܥܸܠ ܝܠܸܗ:ܦܲܥܘܼܠܸܐ.  ܐܝܼܬ ܠܲܢ ܚܲܕ݇ܟܡܵܐ ܥܸܩܖܸ̈ܐ ܕܡܸܠܵܠܸ̈ܐ ܩܲܕ ܐܲܬܘܵܬܲܝܗܝ ܡܐܲܝܟܼ ܐܘܼܕܵܠܸ̈ܐ ܝܢܵܐ ܐܝܼܢܵܐ ܒܐܲܬܘܼܬܵܐ ܩܲܕ݇ܡܵܝܬܵܐ ܦܖ̈ܝܼܫܸܐ ܝܢܵܐ ܡܐܘܼܕܵܠܸܐ. ܛܘܼܦ̰ܣܵܐ: ܫܲܪܸܐ(آغاز کند)؛ ܫܵܪܸܐ(باز کند) ـ ܒܵܫܸܠ(پخته شود)؛ ܒܲܫܸܠ(بپزد) ـ ܕܵܪܸܐ(بریزد)؛ ܕܲܪܸܐ(باد دهد) ـ ܫܵܢܸܐ(غش کند)؛        ܫܲܢܸܐ(جابجا شود)ܛܵܠܸܩ(گم شود)؛ ܛܲܠܸܩ(گم کند) ـܦܵܫܸܪ(ذوب شود)؛ ܦܲܫܸܪ(ذوب کند) ܘܫܪ.                                                       

ܒܘܼܬ ܐܵܗܵܐ ܝܠܵܗܿ ܕܟܸܐ ܚܵܠܛܝܼ ܝܵܠܘܿܦܸ̈ܐ ܒܸܫ ܙܵܘܕܵܐ ܓܵܘ ܟܝܘܼܠܵܐ ܩܲܕ݇ܡܵܝܵܐ ܘܬܪܝܼܵܢܵܐ. ܩܵܐ ܛܘܼܦ̰ܣܵܐ: ܐܝܼܡܲܢ ܟܵܬܒܼܲܚ ܫܵܪܝܼ ܘܐܝܼܡܲܢ ܫܲܪܝܼ؟ ܐܲܝܟܼ ܝܘܼܠܦܵܢܵܐ ܕܫܩܝܼܠܸܐ ܝܘܲܚ؛ ܐܝܼܡܲܢ ܕܢܝܼܫܵܐ ܦܬܵܚܬܵܐ ܕܚܲܕ݇ ܟܸܬܪܵܐ ܝܲܢ ܫܩܵܠܬܵܐ ܕܚܲܕ݇ ܕܘܼܟܵܐ ܗܵܘܝܵܐ؛ ܥܸܩܪܵܐ ܫܵܪܸܐ ܝܠܸܗ ܕܐܵܬܘܼܬܵܐ ܒ ܟܸܐ ܫܵܩܸܠ ܘܟܸܐ ܟܵܬܒܼܲܚ ܒܸܫܪܵܝܵܐ. ܐܝܼܢܵܐ ܐܝܼܡܲܢ ܕܢܝܼܫܵܐ ܡܼܢ ܐܵܗܵܐ ܡܸܠܬܵܐ ܫܩܵܠܬܵܐ ܕܦܵܣܘܿܥܬܵܐ ܩܵܐ ܚܲܕ݇ ܥܒܼܵܕܵܐ ܗܵܘܸܐ؛ ܒܸܕ ܟܵܬܒܼܲܚ ܫܲܪܸܐ.  ܐܝܼܢܵܐ ܟܸܬܪܵܐ ܠܲܐܟܼܵܐ ܝܠܸـܗ ܕܒܚܲܕ݇ܟܡܵܐ ܬܘܼܪܲܨ ܡܲܡܠܠܸــܐ ܒܸܬܦܵܩܵـܐ ܝܘܲܚ ܒܐܵܗܵܐ ܕܥܸܩܪܵܐ ܕܡܸܠܬܵܐ(ܟܝܘܼܠܵܐ ܩܲܕ݇ܡܵܝܵܐ ܘܬܪܸܝܵܢܵܐ) ܒܚܲܕ݇ ܦܸܨܠܵܐ ܦܝܵܫܵܐ ܝܠܸܗ ܟܬܝܼܒܼܵܐ ܘܐܲܚܟ̰ܝܼ ܓܵܘ ܣܘܼܪܥܵܦܵܐ ܦܪܵܫܲܝܗܝ ܝܢܵܐ ܡܐܘܼܕܵܠܸܐ.                               

ܩܵܐ ܛܘܼܦ̰ܣܵܐ ܥܸܩܪܵܐ:ܫܵܪܸܐ. ܘܡܼܢ ܐܵܗܵܐ ܒܸܢܒܼܵܥܵܐ ܝܢܵܐ ܬܪܸܝܢ ܦܸܨܠܸ̈ܐ ܕܙܢܵܐ ܠܵܐ ܡܬܲܚܡܵܐ: ܒܸܫܪܵܝܵܐ ܘܫܲܪܘܼܝܸܐ.                       ܢܸܡܪܘܼܕ ܣܝܼܡܘܿܢܘܿ ܓܵܘ ܟܬܵܒܼܸܗ:ܡܸܠܬܵܐ ܘܦܸܖ̈ܥܘܿܗܿ ܡܲܕܟܼܘܼܪܵܐ ܝܠܸܗ ܕܡܸܠܵܠܸܐ ܕܒܸܢܒܼܵܥܵܐ ܝܢܵܐ ܡܼܢ ܟܝܘܼܠܵܐ ܦܲܥܸܠ ܫܸܪܫܵܐܝܼܬ ܝܼܢܵܐ ܡܦܲܥܸܠ  ܗܲܪ ܐܲܝܟܼ ܠܸܫܵܢܵܐ ܣܸܦܪܵܝܵܐ. ܩܵܐ ܛܘܼܦ̰ܣܵܐ. ܡܒܲܩܸܪ(ܒܲܩܸܪ) ـ ܡܒܲܪܸܟܼ(ܒܲܪܸܟܼ) ـ ܡܒܲܣܸܡ(ܒܲܣܸܡ) ܘܫܪ.ܟܲܕ ܐܵܬܘܼܪܵܝܸܐ ܥܝܼܪܵܩܢܵܝܸܐ ܗܵܕܟܼܵܐ ܟܸܐ ܗܲܡܙܸܡܝܼ ܘܒܟܬܝܼܒܼܝܵܬܸ̈ܐ ܕܝܵܘܣܸܦ ܒܸܝܬ ܩܸܠܵܝܬܵܐ ܙܸܐ ܐܵܗܵܐ ܦܸܨܠܵܐ ܕܟܬܝܼܒܼܬܵܐ ܒܸܚܙܵܝܘܼܗܿ ܝܘܲܚ؛ ܐܝܼܢܵܐ   ܐܵܬܘܼܪܵܝܸܐ ܕܐܝܼܪܵܢ ܕܡܘܼܢܦܸܠܸܐ ܝܢܵܐ ܠܐܵܗܵܐ ܡ ܡܼܢ  ܩܲܕ݇ܡ ܚܲܒܪܵܐ ܒܸܬܦܵܩܵܐ ܝܢܵܐ ܒܥܲܣܩܘܼܬܵܐ ܥܗܝܼܕܬܵܐ.    ܒܟܠܲܝܗܝ ܐܲܢܸܐ؛ ܐܘܼܪܚܵܐ ܕܦܠܵܛܵܐ ܦܝܼܫܬܵܐ ܝܠܵܗܿ ܡܘܼܚܙܝܼܬܵܐ ܒܝܲܕ ܢܸܡܪܘܼܕ ܣܝܼܡܘܿܢܘܿ ܘܐܵܗܵܐ ܝܠܵܗܿ: ܐܝܼܡܲܢ ܕܙܢܵܐ ܠܵܐ ܡܬܲܚܡܵܐ ܗܵܘܸܐ ܦܥܵܠܵܐ ܥܸܩܪܵܐ ܒܙܩܵܦܵܐ ܝܠܸܗ(ܫܩܵܠܵܐ ـ ܫܵܩܸܠ) ܘܐܝܼܡܲܢ ܕܗܵܘܸܐ ܦܲܥܘܼܠܸܐ ܥܸܩܪܵܐ ܒܦܬܵܚܵܐ ܝܠܸܗ(ܒܲܩܘܼܪܸܐ ـ ܒܲܩܸܪ).                                                                          

   ܐܝܼܢܵܐ ܟܸܬܪܵܐ ܬܪܝܼܵܢܵܐ ܐܵܗܵܐ ܝܠܸܗ ܕܒܪܵܒܵܐ ܡܼܢ ܡܲܕܪܵܫܝܵܬܸܐ ܕܦܝܵܫܵܐ ܝܢܵــܐ ܡܘܼܚܕܸܖܸ̈ܐ ܒܐܘܼܡܬܲܢ ܐܲܢܸܐ ܩܵܢܘܼܢܸ̈ܐ ܠܸܐ ܝܢܵــܐ ܦܝܵܫܵـܐ  ܡܘܼܩܖ̈ܝܼܸܐ ܩܵـܐ ܝܵܠܘܿܦܸ̈ܐ ܘܥܸܠܬܵܐ ܙܸܐ ܐܵܗܵܐ ܝܠܵܗܿ ܕܐܘܼܦ ܡܲܠܦܵܢܲܢ ܠܸܐ ܝܢܵܐ ܩܸܖ̈ܝܸܐ ܡܸܠܝܵܐܝܼܬ ܘܠܸܐ ܝܵܕܥܝܼ ܠܐܲܢܸܐ ܩܵܢܘܿܢܸ̈ܐ ܕܬܘܼܪܲܨ ܡܲܡܠܠܵܐ.  ܒܡܸܢܝܵܢܵܐ ܕܲܥܬܝܼܕ ܒܸܕ ܗܲܓܲܚ ܒܡܸܠܝܘܼܬܵܐ ܒܘܼܬ ܟܝܘܼܠܸ̈ܐ 3؛4 ܘ5.