ܛܟܼܣ̈ܐ ܕܐܒܼܗ̈ܬܐ

             ܛܟܼܣ̈ܐ ܕܐܒܼܗ̈ܬܐ             

ܒܪܵܝܬܵܐ ܕܝܵܠܸ̈ܐ ܙܥܘܿܖܸ̈ܐ: ܒܙܲܒܼܢܸ̈ܐ ܥܒܼܝܼܖܸ̈ܐ ܘܒܥܵܫܝܼܖ̈ܵܬܸܐ؛ ܟܲܕ ܗܲܨܠܵܐ ܗ݇ܘܵܐ ܒܲܟܼܬܵܐ؛ ܗܲܪ ܒܗܿܝ ܥܕܵܢܵܐ ܟܸܐ ܡܲܣܚܝܼ ܗ݇ܘܵܘ ܠܸܗ ܝܲܠܵܕ݇ܐ ܓܵܘ ܡܝܼܵܐ ܘܟܸܐ ܩܲܢܕܸܚܝܼ ܗ݇ܘܵܘ ܠܸܗ. ܐܸܢ ܗܵܘܸܐ ܗ݇ܘܵܐ ܒܪܘܿܢܵܐ ܒܸܫ ܡܲܚܕܝܼܵܢܬܵܐ ܗ݇ܘܵܐ ܩܵܐ ܐܵܒܼܵܗܘܼܗܝ ܘܐܸܢ ܗܵܘܝܼ ܗ݇ܘܵܘ ܛܠܝܼܒܘܼܗܝ ܡܼܢ ܥܘܼܡܖ̈ܵܢܸܐ ܐܲܝܟܼ ܪܲܒܵܢ ܗܘܼܪܡܸܙܕ؛ ܡܵܪܝ ܣܲܪܓܝܼܣ ܝܲܢ ܡܵܪܝ ܓܝܼܘܲܪܓܝܼܣ؛ ܚܲܕܘܼܬܲܝܗܝ ܪܵܒܵܐ ܒܸܫ ܓܘܼܪܬܵܐ ܟܸܐ ܗܵܘܝܵܐ ܗ݇ܘܵܐ. ܗܵܝܓܵܗ ܟܸܐ ܡܫܲܡܗـܝܼ ܗ݇ܘܵܘ ܠܸܗ ܝܲܠܵܕ݇ܐ ܒܫܸܡܵܐ ܕܗܵܘ ܩܲܕܝܼܫܵܐ.

   ܒܝܵܘܡܵܐ ܫܲܒܼܝܼܥܵܝܵܐ ܡܼܢ ܒܵܬ݇ܪ ܗ݇ܘܵܝܬܵܐ ܕܝܲܠܵܕ݇ܐ ܙܥܘܿܪܵܐ؛ ܟܸܐ ܡܲܥܡܸܕܝܼ ܗ݇ܘܵܘ ܠܸܗ. ܚܲܕ݇ ܝܵܘܡܵܐ ܡܼܢ ܩܵܕ݇ܡ ܡܲܥܡܘܿܕܝܼܬܵܐ؛ ܟܸܐ ܡܲܚܒܸܪܝܼ ܗ݇ܘܵܘ ܠܸܗ ܩܲܪܝܼܒܼܵܐ. ܩܲܪܝܼܒܼܵܐ ܙܸܐ ܟܸܐ ܐܵܙܸܠ ܗ݇ܘܵܐ ܠܒܲܝܬܵܐ ܕܗܲܨܠܵܢܬܵܐ ܘܥܲܡܘܼܗܝ ܟܸܐ ܠܲܒܸܠ ܗ݇ܘܵܐ ܚܲܕ݇ ܥܸܪܒܵܐ(ܐܸܢ ܗܵܘܸܐ ܗ݇ܘܵܐ ܥܲܬܝܼܪܵܐ). ܗܵܝܓܵܗ ܟܸܐ ܝܵܗܒܼܸܠ ܗ݇ܘܵܐ ܠܸܗ ܝܲܠܵܕܐ ܙܥܘܿܪܵܐ ܩܵܐ ܒܲܟܼܬܸܗ ܘܡܐܘܼܕܵܠܸܐ ܟܸܐ ܐܵܙܠ݇ܝܼ ܗ݇ܘܵܘ ܠܥܘܼܡܪܵܐ. ܘܟܸܐ ܛܵܠܸܒ ܗ݇ܘܵܐ ܡܼܢ ܩܵܫܵܐ ܕܡܲܥܡܸܕ ܠܸܗ ܝܲܠܵܕ݇ܐ. ܒܵܬ݇ܪ ܗܵܕܵܐ ܟܸܐ ܕܵܝܪܝܼ ܗ݇ܘܵܘ ܠܒܲܝܬܵܐ ܘܟܸܐ ܝܵܗܒܼܝܼ ܗ݇ܘܵܘ ܠܸܗ ܝܲܠܵܕ݇ܐ ܩܵܐ ܝܸܡܸܗ.ܗܵܝܓܵܗ ܟܸܐ ܡܲܐܟܼܠܝܼ ܗ݇ܘܵܘ ܟܵܘܸܬܪܵܐ ܩܵܐ ܟܠܲܝܗܝ ܐ݇ܢܵܫܸ̈ܐ ܕܓܵܘ ܒܲܝܬܵܐ.

   ܫܲܒܼܥܵܐ ܝܵܘܡܵܢܸ̈ܐ ܡܼܢ ܒܵܬ݇ܪ ܡܲܥܡܘܼܕܝܼܬܵܐ؛ܫܲܒܼܪܵܐ ܡܘܼܥܡܸܕܵܐ ܟܸܐ ܦܵܐܸܫ ܗ݇ܘܵܐ ܓܵܘ ܐܵܢܝܼ ܓ̰ܘܼܠܘܼܗܝ ܕܡܲܥܡܘܿܕܝܼܬܵܐ. ܘܒܝܵܘܡܵܐ ܕܬܡܵܢܝܵܐ ܩܲܪܝܼܒܼܵܐ ܓܵܘ ܚܲܕ݇ ܡܲܐܢܵܐ ܕܸܟܼܝܵܐ ܟܸܐ ܚܲܠܸܠ ܗ݇ܘܵܐ ܠܗ݇ܘܿܢ ܐܵܢܝܼ ܕܘܼܟܵܢܸ̈ܐ ܕܩܵܫܵܐ ܡܫܝܼܚܲܝܗܝ ܗ݇ܘܵܐ. ܡܝܼܵܐ ܙܸܐ ܠܸܐ ܬܲܦܚܝܼ ܗ݇ܘܵܘ ܠܗ݇ܘܿܢ ܓܵܘ ܥܵܠܘܼܠܵܐ؛ ܐܸܠܵܐ ܓܵܘ ܚܲܕ݇ ܢܲܗܪܵܐ ܝܲܢ ܓܵܘ ܚܕܵܐ ܕܘܼܟܬܵܐ ܕܟܼܝܼܬܵܐ. ܗܵܝܓܵܗ ܟܸܐ ܩܲܢܕܸܚܝܼ ܗ݇ܘܵܘ ܠܸܗ ܝܲܠܵܕ݇ܐ ܓܵܘ ܓ̰ܘܼܠܸ̈ܐ ܚܘܵܖܸ̈ܐ.                  

   ܡܼܢ ܒܵܬ݇ܪ ܗܲܨܲܠܬܵܐ؛ ܝܸܡܵܐ ܕܝܲܠܵܕ݇ܐ ܟܸܐ ܕܵܡܟܼܵܐ ܗ݇ܘܵܐ ܩܵܐ ܚܲܕ݇ ܡܸܬܚܵܐ ܝܲܪܝܼܟܼܵܐ ܥܲܠ ܬ݇ܫܘܝܼܬܵܐ ܘܠܸܐ ܦܵܠܛܵܐ ܗ݇ܘܵܐ ܡܼܢ ܒܲܝܬܵܐ. ܐܸܢ ܫܲܒܼܪܵܐ ܒܪܘܿܢܵܐ ܗ݇ܘܵܐ ܩܵܐ 40 ܝܵܘܡܵܢܸ̈ܐ ܘܐܸܢ ܒܪܵܬܵܐ ܗ݇ܘܵܐ ܩܵܐ 60 ܝܵܘܡܵܢܸܐ.ܒܐܵܗܵܐ ܡܸܬܚܵܐ ܒܢܲܦ̰ܫܘܼܗܿ ܟܸܐ ܐܵܟܼܠܵܐ ܗ݇ܘܵܐ ܠܲܚܡܵܐ ܘܠܸܐ ܕܵܩܪܵܐ ܗ݇ܘܵܐ ܒܟ̰ܘܼ ܡܸܢܕܝܼ ܒܗܿܝ ܕܟܸܐ ܚܵܫܒܼܝܼ ܗ݇ܘܵܘ ܠܵܗܿ ܛܲܡܐܵܐ(ܫܸܚܬܵܢܬܵܐ). ܡܼܢ ܒܵܬ݇ܪ ܐܵܗܵܐ ܡܸܬܚܵܐ ܟܸܐ ܚܵܝܦܵܐ ܗ݇ܘܵܐ؛ ܐܵܦ ܟܸܐ ܡܲܣܚܝܼܵܐ ܗ݇ܘܵܐ ܠܝܲܠܕ݇ܘܿܗܿ  ܘܟܸܐ ܠܲܒܠܵܐ ܗ݇ܘܵܐ ܠܸܗ ܠܥܘܼܡܪܵܐ ܘܚܲܕ݇ ܕܲܫܢܵܐ ܙܸܐ ܟܸܐ ܠܲܒܠܵܐ ܗ݇ܘܵܐ ܩܵܐ ܩܵܫܵܐ. ܕܲܫܢܵܐ ܟܸܐ ܗܵܘܸܐ ܗ݇ܘܵܐ ܚܲܕ݇ ܩܸܛܥܵܐ ܕܦܵܪܟ̰ܵܐ؛ ܒܸܣܡܵܐ ܝܲܢ ܙܘܼܙܸ̈ܐ. ܗܵܝܓܵܗ ܩܵܫܵܐ ܟܸܐ ܨܲܠܸܐ ܗ݇ܘܵܐ ܨܠܘܼܬܵܐ ܥܲܠܘܼܗܿ ܘܥܲܠ ܝܲܠܕ݇ܘܼܗܿ.

   ܟܲܕ ܒܲܟܼܬܵܐ ܗܲܨܠܵܢܬܵܐ ܗܵܘܝܵܐ ܗ݇ܘܵܐ ܕܡܝܼܟܼܬܵܐ ܒܬ݇ܫܘܝܼܬܵܐ ܕܗܲܨܲܠܬܵܐ ܟܸܐ ܒܲܫܠܝܼ ܗ݇ܘܵܐ ܠܵܗܿ ܗܲܨܝܼܕܵܐ ܝܲܢ ܣܦܝܼܪܵܐ ܕܝܼܗ݇ܘܵܘ ܡܸܐܟܼܘܼܠܝܵܬܸܐ ܚܲܝܠܵܢܸ̈ܐ ܘܡܵܪ ܩܘܼܘܲܬ. ܐܝܼܡܲܢ ܕܙܸܐ ܝܲܠܵܕ݇ܐ ܢܵܦܸܠ ܗ݇ܘܵܐ ܠܐܘܼܪܚܵܐ ܚܲܕ݇ ܩܲܕܪܵܐ ܟܸܫܡܝܼܫܸ̈ܐ ܘܦܸܢܕܸܩܸ̈ܐ ܩܘܼܠܝܸ̈ܐ ܟܸܐ ܕܵܪܝܼ ܗ݇ܘܵܘ ܒܪܸܫܸܗ.                                                  

                                            ܫܲܪܟܵܢܵܐ ܒܦܲܬ 30