ܝܵܘܡܵܐ ܬܹܝܒܼܝܼܠܵܝܵܐ ܕܢܸܫܸ̈ܐ ܗܵܘܸܐ ܒܪܝܼܟܼܵܐ

ܒܝܬ ܢܗܖ̈ܝܢ ܕܪܓܘܫܬܐ ܕܡܕܝܢܝܘܬܐ

                                         ܝܘܼܐܵܪܵܫ ܗܵܝܕܘܼ

   ܒܒܹܝܬ ܢܲܗܖ̈ܝܼܢ ܨܡܸܚܠܸܗ ܫܲܦܪܵܐ (ܨܲܦܪܵܐ) ܕܲܡܕܝܼܢܵܝܘܼܬܵܐ ܩܲܕܡܵܝܬܵܐ ܒܥܵܠܡܵܐ: ܘܥܲܠ ܣܝܼܦܸ̈ܐ ܫܲܡܝܼܖܸ̈ܐ ܕܕܸܩܠܲܬ ܘܲܦܪܵܬ ܦܝܼܫܠܗ݇ܘܿܢ ܒܸܢܝܸ̈ܐ ܡܕܝܼܢܵܬܸ̈ܐ ܩܲܕܡܵܝܵܬܸ̈ܐ. ܘܲܒܼܫܸܛܚܸ̈ܐ ܟܲܗܝܼܢܸ̈ܐ ܕܒܹܝܬ ܢܲܗܖ̈ܝܼܢ ܦܣܸܥܠܸܗ ܒܲܪܢܵܫܵܐ ܩܲܕܡܵܝܵܐ ܠܐܲܦܲܝ̈ ܫܘܼܘܫܵܛܵܐ ܘܡܲܪܕܘܼܬܵܐ. ܘܒܹܝܬ ܗܵܠܹܝܢ ܬܪܹܝܢ ܢܲܗܖ̈ܵܘܵܬܸܐ ܦܝܼܫܠܵܗܿ ܫܟܼܝܼܚܬܵܐ ܟܬܝܼܒܼܬܵܐ (ܟܵܬܘܿܒܼܘܼܬܵܐ). ܒܗܿܘ ܐܲܬܪܵܐ ܟܲܗܝܼܢܵܐ ܘܥܲܬܝܼܪܵܐ ܩܝܼܡܠܗ݇ܘܿܢ ܡܲܠܟܸ̈ܐ ܓܲܢ݇ܒܵܖܸ̈ܐ ܘܲܩܖ̈ܵܒܼܬܵܢܸܐ ܘܚܲܟܝܼܡܸ̈ܐ. ܬܵܡܵܐ ܦܝܼܫܠܗ݇ܘܿܢ ܣܝܼܡܸ̈ܐ ܢܵܡܘܿܣܸ̈ܐ (ܩܵܢܘܿܢܸ̈ܐ) ܡܫܲܡܠܝܸ̈ܐ ܩܲܕܡܵܝܸ̈ܐ ܠܲܡܛܲܟܲܣܬܵܐ ܕܚܲܝܘܼܬܵܐ ܟܢܘܼܫܝܵܝܬܵܐ. ܬܵܡܵܐ ܦܝܼܫܠܸܗ ܟܬܝܼܒܼܵܐ ܗܘܼܡܵܣܵܐ ܦܘܿܐܹܝܛܵܝܵܐ ܩܲܕܡܵܝܵܐ: ܗ.ܕ. ܗܘܼܡܵܣܵܐ ܕ"ܓܸܠܓܵܡܸܫ" ܥܵܠܡܝܼܢܵܝܵܐ (ܡܬܘܿܡܵܝܵܐ) ܬܡܝܼܗܵܐ ܘܫܘܿܥܝܼܬܵܐ ܕܲܒܪܝܼܬܵܐ. ܬܵܡܵܐ ܥܲܠ ܣܦܵܖܸ̈ܐ (ܣܝܼܦܸ̈ܐ) ܕܢܲܗܖ̈ܵܘܵܬܸܐ ܥܕܹܢܵܝܸ̈ܐ (ܦܲܖ̈ܕܲܝܣܵܝܸܐ) ܦܝܼܫܠܗ݇ܘܿܢ ܚܸܙܝܸ̈ܐ ܐܸܣܛܘܼܟܼܣܸ̈ܐ ܫܵܖ̈ܘܵܝܸܐ ܕܝܘܼܠܦܵܢܵܐ ܘܐܵܣܝܘܼܬܵܐ ܘܐܘܼܡܵܢܘܼܬܵܐ. ܬܵܡܵܐ ܘܲܒܙܲܒܼܢܵܐ ܕܫܘܼܠܛܵܢܘܼܬܵܐ "ܐܵܬܘܼܪܵܝܬܵܐ" ܦܝܼܫܠܸܗ ܡܛܘܼܟܣܵܐ ܚܲܝܠܵܐ ܥܲܣܟܲܪܵܝܵܐ (ܓܲܝܣܵܐ) ܚܲܝܠܬܵܢܵܐ ܡܣܲܕܪܵܐ ܒܚܲܕ݇ ܙܢܵܐ ܡܬܲܩܢܵܐ ܕܲܡܨܸܐܠܸܗ ܕܲܡܫܲܬܐܸܣ ܐܸܡܦܪܵܛܘܿܪܘܼܬܵܐ ܪܘܝܼܚܬܵܐ ܘܥܲܫܝܼܢܬܵܐ. 

   ܘܲܒܙܲܒܼܢܵܐ ܕܐܵܬܘܿܖ̈ܵܝܸܐ ܡܛܸܐܠܸܗ ܐܲܡܢܵܐ ܕܓܵܠܘܿܦܘܼܬܵܐ ܠܲܡܖ̈ܵܘܡܸܐ ܥܸܠܵܝܸ̈ܐ: ܗܿܘ ܕܦܝܼܫܠܸܗ ܡܓܲܫܡܵܐ ܒܓܲܠܝܼܦܸ̈ܐ ܡܫܲܚܠܦܸ̈ܐ ܘܝܲܬܝܼܪܵܐܝܼܬ ܒܬܵܘܖܸ̈ܐ ܓܸܠܦܵܢܵܝܸ̈ܐ ܡܲܪܲܝ ـ ܪܸܫܸ̈ܐ ܐ݇ܢܵܫܵܝܸ̈ܐ ܕܟܸܐ ܡܣܲܩܠܝܼ ܗ݇ܘܵܘ ܠܡܲܥܠܵܢܸ̈ܐ ܕܩܲܨܖܸ̈ܐ ܘܦܵܠܵܛܝܼܢܸ̈ܐ ܕܡܲܠܟܸ̈ܐ ܘܟܸܐ ܪܵܡܙܝܼ ܗ݇ܘܵܘ ܠܬܘܼܦܩܵܐ (ܚܲܝܠܵܐ) ܘܩܲܠܝܼܠܘܼܬܵܐ ܘܚܸܟܼܡܬܵܐ. ܘܲܒܐܵܬܘܿܪ ܦܝܼܫܠܸܗ ܥܒܼܝܼܕܵܐ ܓܝܼܓܼܠܵܐ ܩܲܕܡܵܝܵܐ ܘܬܵܡܵܐ ܗ݇ܘܸܐܠܸܗ ܚܘܼܫܵܚܵܐ (ܡܲܦܠܲܚܬܵܐ) ܕܡܲܪܟܲܒܼܬܵܐ ܩܪܵܒܼܵܝܬܵܐ ܩܲܕܡܵܝܬܵܐ ܡܵܪܲܬ ܬܪܹܝܢ ܓܝܼܓܼܠܸ̈ܐ: ܘܟܸܒܼܫܵܐ ܩܪܵܒܼܵܝܵܐ ܘܣܵܚܘܿܦܵܐ ܕܫܘܼܖܸ̈ܐ ܖ̈ܵܡܸܐ ܘܚܲܣܝܼܢܸ̈ܐ. ܘܲܒܝܲܕ ܐܲܟܵܖܸ̈ܐ ܐܵܬܘܿܖ̈ܵܝܸܐ ܦܝܼܫܠܸܗ ܡܬܲܩܢܵܐ (ܡܬܘܼܪܨܵܐ) ܢܵܥܘܿܪܵܐ ܩܲܕܡܵܝܵܐ ܠܫܸܩܝܵܐ ܕܐܲܖ̈ܥܵܬܸܐ ܘܓܲܢܸ̈ܐ ܘܒܘܼܣܬܵܢܸ̈ܐ.

   ܘܐܵܦ ܒܐܘܼܡܵܢܘܼܬ ܩܲܝܢܵܝܘܼܬܵܐ ܘܲܚܫܵܠܵܐ ܕܕܲܗܒܼܵܐ ܘܲܕܣܸܐܡܵܐ ܘܟܸܐܦܸ̈ܐ ܝܲܩܝܼܖ̈ܵܬܸܐ، ܐܵܬܘܿܖ̈ܵܝܸܐ ܠܲܝܬ ܗ݇ܘܵܘ ܠܗ݇ܘܿܢ ܒܲܪܦܸܚܡܵܐ ܦܵܣܘܿܩܵܐܝܼܬ. ܘܥܲܠ ܗܵܢܵܐ ܫܪܵܪܵܐ ܣܵܗܸܕ "ܓܲܙܵܐ ܕܢܸܡܪܘܼܕ" ܬܡܝܼܗܵܐ ܗܿܘ ܕܦܝܼܫܠܸܗ ܡܘܼܫܟܚܵܐ ܒܝܲܕ ܡܥܲܩܒܼܵܢܸ̈ܐ (ܐܲܖ̈ܟܝܘܿܠܘܿܓܼܝܵܝܸܐ) ܠܐܲܦܲܝ̈ ܫܘܼܠܵܡ ܕܵܪܵܐ ܕܥܸܣܖܹ̈ܝܢ ܒܚܲܖ̈ܒܼܵܬܸܐ ܕ(ܟܵܠܚܘܿ)، ܚܕܵܐ ܡܼܢ ܡܕܝܼܢܵܬܸ̈ܐ ܐܲܖ̈ܫܟܼܵܝܵܬܸܐ ܕܐܵܬܘܿܖ̈ܵܝܸܐ. ܘܡܿܢ ܝܼܠܸܗ ܕܠܵܐ ܫܡܸܥܠܸܗ ܥܲܠ ܛܸܒܸ̈ܐ ܕ"ܓܲܢܸ̈ܐ ܬܲܠܝܵܬܵܐ" ܕܫܲܡܝܼܪܵܡ ܛܒܼܝܼܒܼܬܵܐ ܡܲܠܟܬܵܐ ܕܐܵܬܘܿܪ ܘܒܵܒܸܠ ܕܦܝܼܫܸ̈ܐ ܝܢܵܐ ܚܫܝܼܒܼܸ̈ܐ ܚܕܵܐ ܡܼܢ ܫܒܼܲܥ ܬܸܕܡܖ̈ܵܬܵܐ ܕܥܵܠܡܵܐ ܥܲܬܝܼܩܵܐ؟!  

   ܐܸܠܵܐ ܗܿܘ ܡܸܢܕܝܼ ܒܘܼܫ ܝܲܩܝܼܪܵܐ ܕܠܲܝܬܠܸܗ ܒܲܪܕܘܼܡܝܵܐ ܒܡܲܣܲܐܬܵܐ ܕܡܲܪܕܘܼܬܵܐ ܕܲܡܕܝܼܢܵܝܘܼܬܵܐ، ܝܼܠܸܗ ܒܹܝܬ ܐܲܖ̈ܟܸܐ (ܒܹܝܬ ܓܲܙܵܐ ܕܲܟܬܵܒܼܸ̈ܐ) ܕܐܵܫܘܿܪ ܒܵܢܝܼܦܵܠ ܬܲܩܝܼܦܵܐ ܘܲܡܗܵܘܢܵܐ ܘܲܡܗܝܼܪܵܐ ܒܐܘܼܡܵܢܘܼܬ ܟܵܬܘܿܒܼܘܼܬܵܐ. ܐܵܗܵܐ ܡܲܠܟܵܐ ܓܲܢ݇ܒܵܪܵܐ ܕܦܝܼܫܠܸܗ ܕܟܼܝܼܪܵܐ ܒܲܟܬܵܒܼܵܐ ܩܲܕܝܼܫܵܐ ܐܲܝܟܼ "ܐܘܼܣܢܲܦܵܪ ܡܲܠܟܵܐ ܪܲܒܵܐ ܘܝܲܩܝܼܪܵܐ" ܡܛܘܼܟܸܣܠܸܗ ܚܲܕ݇ ܒܹܝܬ ܐܲܖ̈ܟܸܐ ܪܲܒܵܐ ܒܲܡܕܝܼܢ݇ܬܵܐ ܕܢܝܼܢܘܸܐ ܒܸܚܒܼܵܫܵܐ ܝܲܬܝܼܪ ܡܼܢ ܥܸܣܪܝܼܢ ܘܚܲܡܫܵܐ ܐܲܠܦܸ̈ܐ ܛܒܸܠܝܵܬܸ̈ܐ (ܠܘܼܚܸ̈ܐ) ܛܝܼܢܵܝܸ̈ܐ ܟܬܝܼܒܼܸ̈ܐ ܒܩܲܢܝܵܐ (ܟܬܝܼܒܼܬܵܐ) ܨܸܨܵܝܵܐ ܘܲܒܡܲܡܠܠܵܐ ܐܵܬܘܿܪܵܝܵܐ ܥܲܠ ܟܠܲܝܗܝ ܣܘܼܥܖ̈ܵܢܸܐ ܝܘܼܠܦܵܢܵܝܸ̈ܐ ܘܣܸܦܖ̈ܵܝܸܐ ܘܡܲܖ̈ܕܘܼܬܵܢܵܝܸܐ ܕܒܹܝܬ ܢܲܗܖ̈ܝܼܢ. ܐܵܗܵܐ ܒܹܝܬ ܐܲܖ̈ܟܸܐ ܦܝܼܫܠܸܗ ܡܘܼܫܟܚܵܐ ܒܝܲܕ ܡܥܲܩܒܼܵܢܸ̈ܐ ܒܦܸܠܓܵܐ ܕܕܵܪܵܐ ܬܫܲܥܣܝܼܪܵܝܵܐ ܘܟܸܐ ܦܵܐܸܫ ܢܛܝܼܪܵܐ ܒܒܹܝܬ ܥܸܬܩܸ̈ܐ ܒܪܝܼܬܵܢܵܝܵܐ ܒܲܡܕܝܼܢ݇ܬܵܐ ܐܵܪܸܫܟܼܵܝܬܵܐ ܠܲܢܕܲܢ. ܝܼܕܵܥܬܵܐ ܕܥܵܠܡܵܐ ܥܲܠ ܫܲܪܒܵܐ ܘܬܲܫܥܝܼܬܵܐ ܕܐܵܬܘܿܖ̈ܵܝܸܐ ܦܪܝܼܫܵܐܝܼܬ ܘܒܹܝܬ ܢܲܗܖ̈ܝܼܢ ܓܵܘܵܢܵܐܝܼܬ، ܚܲܣܝܼܪܬܵܐ (ܒܨܝܼܪܬܵܐ) ܗ݇ܘܵܬ ܡܼܢ ܩܕܵܡ ܡܲܫܟܲܚܬܵܐ ܕܒܹܝܬ ܐܲܖ̈ܟܸܐ ܕܐܵܫܘܿܪ ܒܵܢܝܼܦܵܠ ܘܲܒܢܝܼܬܵܐ ܗ݇ܘܵܬ ܥܲܠ ܡܲܒܘܼܥܸ̈ܐ ܝܵܘܢܵܝܸ̈ܐ ܕܲܠܝܼܠܸ̈ܐ (ܒܲܨܘܿܖܸ̈ܐ) ܘܥܲܠ ܚܲܕ݇ܟܡܵܐ ܣܸܦܖܸ̈ܐ ܕܲܟܬܵܒܼܵܐ ܩܲܕܝܼܫܵܐ. ܐܝܼܢܵܐ ܡܼܢ ܒܵܬ݇ܪ ܡܲܫܟ̰ܲܚܬܵܐ ܕܐܵܗܵܐ ܓܲܙܵܐ ܛܝܼܡܵܢܵܐ، ܘܲܫܪܵܝܵܐ ܘܦܘܼܫܵܩܵܐ ܕܲܟܬܝܼܒܼܘܼܬ ܨܸܨܸ̈ܐ ܘܲܨܚܵܚܸ̈ܐ ܥܲܠ ܠܘܼܚܸ̈ܐ ܘܐܵܓܼܘܿܖܸ̈ܐ ܕܒܹܝܬ ܐܲܖ̈ܟܸܐ ܒܝܲܕ ܝܵܕܘܿܥܬܵܢܸ̈ܐ ܐܸܘܖ̈ܘܿܦܵܝܸܐ ܡܢܲܦܩܸ̈ܐ، ܡܨܸܐܠܸܗ ܥܵܠܡܵܐ ܕܩܵܪܸܐ ܠܗܿܝ ܬܲܫܥܝܼܬܵܐ ܫܒܼܝܼܚܬܵܐ ܘܨܲܡܘܼܚܬܵܢܝܼܬܵܐ ܕܒܹܝܬ ܢܲܗܖ̈ܝܼܢ ܡܲܠܝܵܐܝܼܬ ܘܢܲܗܝܼܪܵܐܝܼܬ. 

ܦܘܼܫܵܩ ـ ܡܸܠܸ̈ܐ

ܫܸܛܚܵܐ: ܦܸܬܝܘܼܬܵܐ، ܕܲܫܬܵܐ                 ܢܵܥܘܿܪܵܐ: چرخ آبیاری

ܠܐܲܦܲܝ̈: ܠܓܸܒܵܐ                           ܫܩܵܝܵܐ: ܫܬܵܝܵܐ

ܗܵܠܝܼܢ: ܐܵܢܝܼ                             ܩܲܝܢܵܝܘܼܬܵܐ: ܦܘܼܠܚܵܢܵܐ ܥܲܠ ܦܲܪܙܠܵܐ

ܒܹܝܬ: ܒܹܝܬ ܦܲܠܓܵܐ                       ܝܲܩܝܼܖ̈ܵܬܵܐ: ܝܲܩܝܼܖ̈ܵܬܸܐ: ܛܝܼܡܵܢܸ̈ܐ

ܫܚܝܼܟܼܵܐ: ܡܟ̰ܝܼܚܵܐ                         ܒܲܪ ܦܸܚܡܵܐ: ܕܲܡܝܵܢܵܐ

ܡܫܲܡܠܝܵܐ: ܟܡܝܼܠܵܐ، ܓܡܝܼܪܵܐ                ܦܵܣܘܿܩܵܐܝܼܬ: ܟܸܪܝܵܐܝܼܬ، به اختصار

ܡܛܲܟܲܣܬܵܐ: ܡܲܪܝܲܙܬܵܐ                     ܛܒܼܝܼܒܼܬܵܐ: ܡܫܲܡܲܗܬܵܐ

ܡܣܲܕܪܵܐ: ܡܘܼܪܝܸܙܵܐ                        ܬܸܕܡܖ̈ܵܬܵܐ: ܬܸܕܡܘܼܖ̈ܝܵܬܸܐ، معجزه‌ها

ܐܲܡܢܵܐ: ܐܘܼܡܵܢܘܼܬܵܐ                        ܬܲܩܝܼܦܵܐ: ܚܲܝܠܵܢܵܐ

ܓܵܠܘܿܦܘܼܬܵܐ: ܬܲܪܲܨܬܵܐ ܕܨܲܠܡܸ̈ܐ              ܣܸܦܖܸ̈ܐ: ܟܬܝܼܒܼܝܵܬܸ̈ܐ

ܡܓܲܫܡܵܐ: ܡܵܪܵܐ ܕܓܘܼܫܡܵܐ                  ܨܚܵܚܸ̈ܐ: ܢܘܼܣܟܼܸ̈ܐ

ܡܲܥܠܵܢܸ̈ܐ: ܐܘܼܖ̈ܚܵܬܸܐ، ܕܘܼܟܵܢܸ̈ܐ ܕܥܒܼܵܪܵܐ         ܡܣܲܐܬܵܐ: ܒܹܝܬ ܦܲܠܓܵܐ

ܦܵܠܵܛܝܼܢܸ̈ܐ: ܩܲܨܖܸ̈ܐ                        ܚܲܣܝܼܢܸ̈ܐ: ܩܸܘܝܸ̈ܐ

ܟܸܒܼܫܸ̈ܐ: ܣܲܕܸ̈ܐ، ܡܲܟܠܵܝܵܬܸ̈ܐ                   ܗ݇ܘܵܬ: ܗ݇ܘܵܐ (ܢܸܩܒܬܵܢܵܝܬܵܐ)

ܩܖ̈ܵܒܼܵܝܸܐ: ܕܝܼ ܦܠܵܫܵܐ                      ܡܢܲܦܩܸ̈ܐ: ܡܲܦܖ̈ܣܵܢܸܐ ܕܣܝܵܡܸ̈ܐ

ܐܓܪܬܐ ܩܐ ܝܡܝ

     ܡܲܚܢܘܼܝܸܐ ܝܘܸܢ ܡܼܢ ܠܲܚܡܵܐ ܘܡܹܐܟܼܘܼܠܬܵܐ ܕܝܸܡܝܼ

     ܘܡܼܢ ܡܲܓܝܲܫܬܵܐ ܕܦܵܬܘܵܬܝܼ̈ ܒܐܝܼܕܵܬܵܗܿ ܖ̈ܲܟܝܼܟܼܵܬܸܐ

     ܒܵܥܹܝܢ ܕܲܡܥܲܪܩܸܠܸܢ ܟܠܲܝܗܝ ܝܵܘܡܵܢܸ̈ܐ ܕܚܲܝܝܼ̈

     ܒܥܘܼܡܪܵܐ ܕܚܲܕ݇ ܝܲܠܘܼܕܵܐ ܥܲܠ ܨܲܕܪܵܗܿ،

     ܒܗܿܝ ܕܐܸܢ ܡܝܼܬܠܝܼ

     ܒܸܬ ܢܵܟܼܦܸܢ ܡܵܐ ܕܫܵܚܠܝܼ ܕܸܡܥܸ̈ܐ ܕܥܲܝ̈ܢܵܗܿ ܥܲܠܝܼ.

                    ܀܀܀

     ܝܸܡܝܼ! ܐܸܢ ܕܥܝܼܪܝܼ ܚܲܕ݇ ܝܵܘܡܵܐ

     ܥܒܼܘܼܕ ܠܝܼ ܡܲܥܛܦܵܐ ܠܬܸܡܖܸ̈ܐ ܕܥܲܝܢܵܟܼܝ̈

     ܘܲܡܟܵܣܲܝ ܠܗ݇ܘܿܢ ܓܲܖ̈ܡܝܼ

     ܒܓܸܠܵܐ ܕܲܥܡܝܼܕ ܠܸܗ ܒܕܲܟܼܝܘܼܬܵܐ ܕܥܸܩܒܵܬܵܟܼܝ̈.

     ܘܐ݇ܣܘܼܪܝ ܠܗ݇ܘܿܢ ܐܝܼܕܵܬܝܼ̈ ܒܨܘܼܨܝܵܬܵܟܼܝ̈

     ܐܵܘ ܒܚܲܕ ܓܸܕܵܐ ܦܠܝܼܛܵܐ ܡܼܢ ܫܦܘܼܠܸ̈ܐ ܕܣܘܼܕܪܵܟܼܝ

     ܟܒܲܪ ܕܦܵܝܫܸܢ ܡܩܘܼܕܫܵܐ

     ܐܸܢ ܡܨܸܐܠܝܼ ܕܡܵܛܹܝܢ ܠܥܘܼܡܩܸ̈ܐ ܕܠܸܒܵܟܼܝ.

     ܘܐܸܢ ܕܥܝܼܪܝܼ ܒܚܲܕ ܡܼܢ ܝܵܘܡܵܢܸ̈ܐ

     ܥܵܒܼܕܲܬܝ ܠܝܼ ܝܘܼܩܕܵܢܵܐ ܠܬܲܢܘܼܪܵܟܼܝ

     ܐܵܘ ܚܲܒܼܠܵܐ ܕܥܲܠ ܐ݇ܓܵܪܵܟܼܝ

     ܕܥܲܠܸܗ ܟܸܐ ܫܵܛܚܲܬܝ ܠܒܼܘܼܫܸ̈ܐ ܕܡܵܣܝܲܬܝ ܠܗ݇ܘܿܢ.

                    ܀܀܀

     ܣܩܝܼܕ ܠܝܼ! ܟܲܕ ܐܵܢܵܐ ܟܸܠܝܵܐ ܥܲܠ ܐܲܩܠܵܬܝܼ̈

     ܘܠܵܐ ܫܡܵܥܸܗ ܩܵܠܵܐ ܕܲܨܠܵܘܵܬܵܟܼܝ̈ ܒܥܸܕܵܢ ܪܲܡܫܵܐ.

                    ܀܀܀

     ܣܝܼܒܼܠܝܼ! ܡܲܕܥܸܪܝ ܠܵܗܿ ܚܲܕܘܼܬܵܐ ܕܫܲܒܼܪܘܼܬܝܼ

     ܟܲܕ ܐܵܢܵܐ ܒܐܘܼܪܚܝܼ ܕܥܵܪܵܐ ܠܩܸܢܵܟܼܝ

     ܕܲܡܫܲܪܟܸܢ ܒܲܚܙܘܼܩܝܝܼ݂ ܠܨܸܦܖܸ̈ܐ ܙܥܘܿܖ̈ܘܿܢܸܐ

     ܠܐܲܬܪܵܐ ܕܓܵܘܸܗ ܣܒܵܪܝܼ ܝܘܲܬܝ.

ܬܘܼܪܓܵܡܵܐ ܒܝܲܕ ܕܵܢܝܼܐܸܝܠ ܕܵܘܝܼܕ ܕܒܸܝܬ ܒܸܢܝܵܡܝܼܢ

ܡܼܢ ܡܫܘܼܚܬܵܐ ܕܐܵܡܘܿܪܵܐ (ܫܵܥܸܪ) ܦܵܠܲܣܛܝܼܢܵܝܵܐ ܡܫܲܡܗܵܐ: ܡܲܚܡܘܼܕ ܕܲܪܘܝܼܫ

ܫܩܝܼܠܬܵܐ ܡܼܢ ܡܓܼܲܠܬܵܐ: ܗܸܖ̈ܓܸܐ ܐܵܟܵܕܝܼܡܵܝܸ̈ܐ ܐܵܬܘܿܪܵܝܸܐ، ܕܘܼܒܵܩܵܐ 23، ܡܸܢܝܵܢܵܐ 1، 2009

ܦܘܼܫܵܩ ܡܸܠܸ̈ܐ ܕܡܫܘܼܚܬܵܐ "ܐܸܓܵܪܬܵܐ ܩܵܐ ܝܸܡܝܼ"

ܡܲܓܝܲܫܬܵܐ: ܕܩܵܪܬܵܐ، لمس کردن

ܖ̈ܲܟܝܼܟܼܵܬܸܐ: ܢܸܩܒܬܵܢܵܝܵܐ ܕܖ̈ܲܟܝܼܟܼܸܐ

ܒܥܘܼܡܪܵܐ ܕܚܲܕ݇ ܝܲܠܘܼܕܵܐ: ܒܫܸܢܸ̈ܐ ܕܚܲܕ݇ ܝܲܠܘܼܕܵܐ

ܨܲܕܪܵܗܿ: ܨܲܕܪܘܼܗܿ

ܫܵܚܠܝܼ: ܓ̰ܵܪܝܼ

ܕܥܝܼܪܝܼ: ܕܸܪܝܼ

ܡܲܥܛܦܵܐ: ܝܵܠܸܚܬܵܐ، ܫܲܪܦܵܐ

ܬܸܡܖܸ̈ܐ: ܬܸܠܦܵܦܸ̈ܐ

ܡܟܵܣܲܝ ܠܗ݇ܘܿܢ: ܡܲܟܣܝܼ ܠܗ݇ܘܿܢ

ܥܸܩܒܵܬܵܟܼܝ̈: ܐܸܟ̰ܟܵܬܵܟܼܝ، پاشنه‌هایت

ܐܵܘ: ܝܲܢ

ܟܒܲܪ: ܩܵܘܡܵܐ، ܒܲܠܟܸܕ

ܝܘܼܩܕܵܢܵܐ: ܝܲܩܕܵܢܵܐ، سوخت

ܫܵܛܚܲܬܝ: ܫܵܬܚܲܬܝ

ܠܒܼܘܼܫܸ̈ܐ: ܠܒܼܝܼܫܝܵܬܸ̈ܐ، ܓ̰ܘܼܠܸ̈ܐ

ܡܫܲܪܟܸܢ: ܫܲܪܸܟܸܢ

ܝܘܒܒܼܐ ܕܚܡܫܝܢ

ܫܡܥܘܢ ܒܝܬ ܐܝܫܘ

    

ܨܘܪܬܐ ܕܪܒܝ ܫܡܥܘܢ ܥܡ         ܨܘܪܬܐ ܕܪܒܝ ܫܡܥܘܢ ܥܡ           

ܒܪܬ ܙܘܓܗ ܐܢܝܙ ܒܫܢܬ      ܒܪܬ ܙܘܓܗ ܐܢܝܙ ܒܫܢܬ   2015                   1960

      
ܚܲܡܫܝܼ ܚܲܡܫܵܐ ܡܸܢܲܢ ܕܘܼܝܢܵܐ ܥܒܼܸܖ̈ܗ݇ܘܿܢ

     ܡܼܢ ܚܠܘܼܠܲܢ، ܓܢܘܼܢܲܢ، ܡܼܢ ܓܒܼܵܪܲܢ ܥܒܼܸܖ̈ܗ݇ܘܿܢ

     ܚܲܡܝܼ̈، ܚܲܫܝܼ̈ ܥܲܡ ܚܸܒܼܝܸ̈ܐ ܕܚܲܝܝܼ̈

     ܚܕܝܼܖܸ̈ܐ ܠܫܸܡܫܵܐ؛ ܚܕܝܼܖܸ̈ܐ ܠܣܲܗܪܵܐ ܘܠܵܘܓ̰ܵܐ ܕܫܸܡܫܵܐ

     ܩܘܼܪܒܵܐ ܠܕܵܘܪܵܐ ܝܢܵܐ ܗܵܐ ܒܸܗ݇ܘܵܝܵܐ:

     ܠܝܵܘܡܵܢܸ̈ܐ ܕܥܒܼܸܖ̈ܗ݇ܘܿܢ، ܝܵܘܡܵܢܸ̈ܐ ܕܚܕܸܖ̈ܗ݇ܘܿܢ ܘܡܼܢ ܥܲܠܲܢ ܥܒܼܸܖ̈ܗ݇ܘܿܢ

     ܠܸܐ ܝܘܸܢ ܦܫܵܡܵܐ

     ܘܠܵܐ ܙܸܐ ܦܫܝܼܡܵܐ؛ ܡܼܢ ܥܒܼܵܪܬܵܐ ܕܚܲܡܫܝܼ ܚܲܡܫܵܐ ܕܥܲܠܲܢ ܥܒܼܸܖ̈ܗ݇ܘܿܢ

     ܠܵܐ ܙܸܐ ܬܒܼܝܼܪܵܐ؛ ܘܠܵܐ ܙܸܐ ܥܒܼܝܼܪܵܐ ܒܚܲܫܵܐ ܦܝܼܫܵܐ

     ܣܲܒܲܒ ܐܲܢ݇ܬܝ ܝܘܲܬܝ ܗ݇ܘܝܼܬܵܐ ܫܸܡܫܵܐ ܘܡܗܘܿܪܸܫܝܼ

     ܒܗܿܝ ܕܐܲܢ݇ܬܝ ܝܘܲܬܝ ܒܟܠܥܕܵܢ ܒܸܢܦܵܪ ܘܬܵܓܼܵܐ ܕܪܸܫܝܼ

     ܡܸܠܚܵܐ ܕܚܲܝܝܼ، ܢܲܛܵܪܵܐ ܕܓܵܢܝܼ

     ܐ݇ܟܼܵܠܝܼ؛ ܚܲܡܝܼ ܘܡܵܙܵܐ ܕܡܵܐܢܝܼ

     ܒܲܝܬܝܼ ܒܸܢܝܼ ܘܚܸܩܪܵܐ ܕܫܸܡܝܼ

     ܒܵܒܝܼ ܘܝܸܡܝܼ ܝܘܲܬܝ؛ ܙܵܓܼܬܝܼ ܙܲܝܬܝܼ؛ ܣܲܒܼܬܝܼ ܘܩܸܢܝܼ ܝܘܲܬܝ ܗ݇ܘܝܼܬܵܐ

                         ܀܀܀܀܀

     ܟܠ ܚܲܕ݇ ܟܲܪܒܵܟܼܝ ܥܲܡ ܕܗܿܝ ܣܢܵܝܬܵܟܼܝ؛ ܐܵܦܸܢ ܕܙܥܘܿܪܬܵܐ

     ܗܵܠܵܐ ܒܲܠܟܸܐ ܙܸܐ ܪܵܒܵܐ ܓܘܼܪܬܵܐ

     ܒܲܚܕܵܐ ܓܵܗܵܐ؛ ܒܲܚܕܵܐ ܒܲܪܣܲܡܬܵܟܼܝ؛ 

     ܟܠܵܗܿ ܓ̰ܲܠܕܸܐ ܡܼܢ ܒܵܠܝܼ ܝܠܵܗܿ ܥܒܼܝܼܪܬܵܐ.

                         ܀܀܀܀܀

     ܒܓܵܗܸ̈ܐ ܐܵܢܵܐ ܕܠܵܐ ܚܕܵܐ ܚܘܼܫܬܵܐ

     ܘܟܡܵܐ ܓܵܗܸ̈ܐ ܗܵܠܵܐ ܥܲܠ ܒܵܠܝܼ ܠܸܐ ܝܠܵܗܿ ܦܝܼܫܬܵܐ:

     ܠܒܼܲܕܲܪ ܡܼܢ ܒܲܝܬܵܐ ܦܝܼܫܵܐ؛ ܒܒܵܬܸ̈ܐ؛ ܒܥܵܠܘܿܠܵܢܸ̈ܐ ܝܲܢ ܓܵܘ ܕܸܫܬܵܐ

     ܚܸܡܬܵܐ؛ ܟܲܪܒܵܐ ܠܙܸܕܩܸ̈ܐ ܠܗܲܩܘܼܝܵܬܵܟܼܝ؛ ܩܵܬܵܟܼܝ ܝܘܸܢ ܝܗܝܼܒܼܲܝܗܝ

     ܐܝܼܢܵܐ ܚܲܪܬܵܐ؛ ܪܸܫܵܟܼܝ ܠܣܒܵܕܝܼܬܝܼ؛ ܓܵܢܵܟܼܝ ܠܘܵܬܝܼ

     ܢܲܦ̰ܫܵܟܼܝ ܓܵܘ ܢܵܬܝܼ؛ ܛܲܖ̈ܛܲܡܝܵܬܵܟܼܝ ܡܚܵܝܵܐ ܠܦܲܐܬܝܼ

     ܣܸܡܵܠܵܟܼܝ ܠܨܲܕܪܵܟܼܝ ܓ̰ܸܗܝܵܐ؛ ܒܝܲܡܝܼܢܵܟܼܝ ܝ݇ܘܲܬܝ ܛܘܼܠܸܙܬܝܼ

     ܦܘܼܚܸܠܬܝܼ ܘܣܘܼܙܓܸܪܬܝܼ

     ܐܵܢܵܐ ܐܲܝܟܼ ܚܲܕ݇ ܕܸܒܼܚܵܐ ܕܸܡܵܢܵܐ

     ܩܘܼܪܒܵܢܵܐ ܕܥܲܠ ܡܲܕܒܚܵܐ ܕܚܘܼܒܵܐ ܢܸܕܪܵܟܼܝ ܗ݇ܘܝܼܵܐ

     ܕܒܼܝܼܩܵܐ ܢܘܼܪܵܐ ܒܸܝܩܵܕܵܐ

                         ܀܀܀܀܀

     ܠܵܐ ܫܲܒܼܥܵܐ ܘܠܵܐ ܫܲܒܼܥܝܼ؛ ܙܵܘܕܵܐ ܝܢܵܐ ܗ݇ܘܝܼܸܐ ܡܼܢ ܓܵܗܵܐ ܕܬܡܵܢܝܼ

     ܡܘܼܥܒܼܸܪܬܲܝܗܝ؛ ܡܘܼܟܝܸܫܬܲܝܗܝ ܘܦܘܼܚܵܠܬܲܝܗܝ ܝ݇ܘܲܬܝ ܓܢܵܗ̈ܝܼ

     ܘܠܵܐ ܙܸܐ ܡܚܝܼܬܲܝܗܝ ܝ݇ܘܲܬܝ ܥܲܠ ܦܲܐܬܝܼ

     ܐܲܢ݇ܬܝ ܝ݇ܘܲܬܝ ܚܘܼܣܵܝܝܼ

                         ܀܀܀܀܀

     ܡܵܢܝܼ ܡܵܨܸܐ ܕܬܵܒܼܸܪ ܠܚܘܼܒܵܐ

     ܐܲܝܟܼ ܓܐܝܼܠܓܵܡܸܫ ܫܵܒܼܸܪ ܫܘܼܖܸ̈ܐ

     ܬܵܒܼܸܪ ܬܵܘܖܸ̈ܐ

     ܕܒܐܸܒܼܠܸ̈ܐ ܝܬܸܒܼܠܸܗ ܒܚܸܡܬܵܐ

     ܒܟܼܸܐܠܸܗ ܒܡܲܪܝܼܪܘܼܬܵܐ

     ܥܲܠ ܚܘܼܒܵܐ ܕܚܲܒܼܪܸܗ

     ܗܿܘ ܐܲܢܟܝܼܕܘܼ ܒܲܪ ـ ܪܸܥܝܵܢܸܗ.

     ܟܠܲܝܗܝ ܣܗܸܕܠܗ݇ܘܿܢ ܥܲܠ ܚܘܼܒܵܐ ܕܚܲܒܼܪܵܐ ܠܚܲܒܼܪܵܐ

     ܒܗܿܝ ܕ... ܡܵܢܝܼ ܡܵܨܸܐ ܡܼܢ ܚܲܒܼܪܵܐ ܥܒܼܵܪܵܐ؟

    ܐܵܢܝܸܙ ܓ̰ܵܢ

     ܚܲܡܫܵܐ ܥܲܠ ܚܲܡܫܝܼ ܡܥܲܠܲܢ ܥܒܼܸܖ̈ܗ݇ܘܿܢ

     ܚܵܫܒܼܸܢ ܕܐܸܬܡܲܠ ܝܗ݇ܘܵܐ ܕܩܵܬܲܢ ܐ݇ܡܸܖ̈ܗ݇ܘܿܢ:

     ܩܘܼܕܡܸܐ ܝܠܸܗ ܚܠܘܼܠܵܘܟܼܘܿܢ

     ܩܘܼܕܡܸܐ ܒܸܕ ܗܵܘܸܐ ܓܢܘܼܢܵܘܟܼܘܿܢ

                         ܀܀܀܀܀

     ܗܿܘ ܥܲܠܡܵܐ ܕܓܵܘ ܚܠܘܼܠܲܢ؛ ܐ݇ܢܵܫܸ̈ܐ ܕܫܵܘܕܵܐ

     ܡܼܢ ܫܪܵܪܵܐ ܝ݇ܗܘܵܘ ܚܸܕܝܸ̈ܐ ܝܲܢ ܡܼܢ ܦܵܘܕܵܐ؟

     ܩܵܐ ܦܝܼܠܡܵܐ ܗ݇ܘܵܐ؟ ܝܲܢ ܗܲܪ ܩܵܐ ܣܵܘܕܵܐ؟

     ܐܝܼܢܵܐ ܚܘܼܒܵܐ ܝܗ݇ܘܵܐ ܝܣܝܼܪܵܐ ܠܐܲܩܠܲܢ ܩܵܘܕܵܐ

     ܪܲܦ̰ܫܵܐ ܒܪܲܦ̰ܫܵܐ؛ ܐܝܼܕܵܐ ܒܐܝܼܕܵܐ ܝ݇ܘܲܚ ܗ݇ܘܵܐ ܐܵܢܵܐ ܘܐܲܢ݇ܬܝ

     ܥܵܠܡܵܐ ܓܵܘ ܪܸܩܕܵܐ ܗ݇ܘܵܐ ܘܫܘܵܪܵܐ؛

     ܐܲܝܟܼ ܡܲܠܲܐܟܼܸܐ ܝܘܲܚ ܗ݇ܘܵܐ ܐܲܚܢܲܢ ܒܸܦܪܵܚܵܐ

                          ܀܀܀܀܀

     ܐܸܬܡܲܠ ܗ݇ܘܸܐܠܸܗ ܓܢܘܼܢܲܢ؛ ܐܸܬܡܲܠ ܗ݇ܘܸܐܠܸܗ ܚܠܘܼܠܲܢ

     ܐܸܕܝܘܿܡ ܝܠܸܗ ܗ݇ܘܵܝܵܐ ܝܵܘܡܵܐ ܕܩܲܕ݇ܡܬܵܐ ܕܚܲܝܸ̈ܐ ܩܵܬܲܢ

     ܐܲܢ݇ܬܝ ܝܘܲܬܝ ܗܲܪ ܗܿܝ ܚܲܡܬܵܐ!

     ܒܸܣܡܵܐ ܕܦܲܟܲܖ̈ܝܵܬܝܼ ܠܝܲܠܡܵܟܼܝ ܚܸܠܝܵܐ

     ܕܘܼܝܘܸܢ ܐܵܢܵܐ ܐܲܝܟܼ ܚܲܕ݇ ܓ̰ܘܵܢܩܵܐ ܒܕܸܦܢܵܟܼܝ ܟܸܠܝܵܐ

     ܐܵܙܲܠ݇ܬܝ ܒܸܕ ܐܵܙܸܠ݇ܢ؛ ܟܵܠܝܲܬܝ؛ ܒܸܕ ܟܵܠܸܢ؛ ܒܚܵܕܘܼܬܵܟܼܝ ܒܸܕ ܚܵܕܸܢ

     ܘܐܸܢ ܟܵܪܒܲܬܝ، ܘܝܲܢ ܚܵܡܨܲܬܝ، ܡܸܢܵܟܼܝ ܗܸܟ̰ ܠܸܐ ܕܵܝܪܸܢ

                         ܀܀܀܀܀

     ܙܡܵܖ̈ܵܟܼܝ ܟܸܐ ܒܲܣܡܝܼ ܠܝܼ

     ܣܲܡܵܟܼܝ ܟܸܐ ܐܵܣܸܐܠܝܼ

     ܐܲܢ݇ܬܝ ܝܘܲܬܝ ܗܸܒܼܝܼ ܘܣܲܒܼܪܝܼ

      ܠܸܐ ܫܵܒܼܩܸܢܵܟܼܝ ܐܸܢ ܫܵܒܼܩܵܐܠܝܼ ܕܪܵܥܢܝܼ!