ܢܸܫܸ̈ܐܘܥܢܘܦܝܐ

ܫܡܝܪܡ ܕ.ܦܘܪܝܐܢ

ܥܢܘܼܦܝܵܐ (ܩܲܪܣܘܼܬܵܐ، ܩܲܫܝܘܼܬܵܐ) ܚܲܕ݇ ܡܼܢ ܟܸܬܖܸ̈ܐ ܫܸܖ̈ܫܵܝܸܐ ܝܠܸܗ ܓܵܘ ܚܲܝܘܼܬܵܐ ܕܢܸܫܸ̈ܐ ܒܟܠܵܗܿ ܒܪܝܼܬܵܐ. ܦܘܼܓܖ̈ܵܦܸܐ (ܐܵܢܦܘܼܖܸ̈ܐ) ܕܫܘܼܬܐܵܣܵܐ ܕܐܸܡܘܵܬܸ̈ܐ ܡܚܲܝܕܸ̈ܐ ܡܫܲܪܘܼܖܸ̈ܐ ܝܢܵܐ ܕܬܘܼܠܬܵܐ (ܚܲܕ݇ ܬܠܝܼܬܵܝܵܐ) ܕܩܘܼܛܢܵܐ ܕܢܸܫܸ̈ܐ ܕܒܪܝܼܬܵܐ ܩܲܒܘܼܠܸܐ ܝܢܵܐ ܒܘܼܣܪܵܢܵܐ ܘܥܢܘܼܦܝܵܐ ܦܲܓܼܪܵܢܵܝܵܐ ܝܵܢ ܢܲܦ̰ܫܵܝܵܐ ܒܡܸܬܚܵܐ ܕܚܲܝܘܼܬܲܝܗܝ. ܐܲܝܟܼ ܣܵܗܕܘܼܬܵܐ ܕܐܲܢܸܐ ܦܘܼܓܖ̈ܵܦܸܐ ܠܲܝܬ ܟ̰ܘܼ ܚܲܕ݇ ܐܘܼܚܕܵܢܵܐ  ܓܵܘ ܒܪܝܼܬܵܐ، ܕܢܸܫܸ̈ܐ ܠܵܐ ܦܵܝܫܝܼ ܡܒܘܼܣܖܸ̈ܐ ܘܙܖ̈ܝܼܒܼܸܐ (ܡܸܚܝܸ̈ܐ) ܬܵܡܵܐ ܘܒܘܼܫܵܝܘܼܬܵܐ ܕܐܲܢܸܐ ܓܸܕܫܸ̈ܐ ܨܵܘܵܢܸ̈ܐ ܩܲܘܘܼܡܸ̈ܐ ܝܢܵܐ ܒܝܲܕ ܓܲܒܼܪܵܐ ܝܵܢ ܚܲܕ݇ ܡܼܢ ܐܘܼܖ̈ܙܸܐ ܕܒܲܝܬܵܐ.

ܟܲܝܠܵܐ ܕܥܢܘܼܦܝܵܐ ܒܐܲܬܖ̈ܵܘܵܬܸܐ ܕܐܵܣܝܵܐ ܘܐܵܦܪܝܼܟܵܐ ܝܲܬܝܼܪ ܝܠܸܗ ܡܼܢ ܐܲܬܖ̈ܵܘܵܬܸܐ ܡܲܥܖ̈ܒܼܵܝܸܐ. ܩܵܐ ܛܘܼܦ̰ܣܵܐ ܓܵܘ ܓ̰ܵܦܵܢ 15% ܕܢܸܫܸ̈ܐ ܘܓܵܘ ܐܹܝܬܝܘܿܦܝܼܵܐ 71% ܕܢܸܫܸ̈ܐ ܩܲܒܘܼܠܸܐ ܝܢܵܐ ܥܢܘܼܦܝܵܐ. ܚܲܕ݇ ܦܘܼܓܪܵܦܵܐ ܒܫܸܢ݇ܬܵܐ ܕ2013 ܡܘܼܚܙܸܐ ܠܸܗ ܕܬܘܼܠܬܵܐ ܕܢܸܫܸ̈ܐ ܒܐܲܬܪܵܐ ܕܐܵܣܬܪܹܝܠܝܵܐ ܢܘܼܣܝܸ̈ܐ (ܓ̰ܘܼܖ̈ܒܸܐ) ܝܢܵܐ ܠܥܢܘܼܦܝܵܐ ܦܲܓܼܪܵܢܵܝܵܐ ܒܡܸܬܚܵܐ ܕܚܲܝܘܼܬܲܝܗܝ ܘܗܲܪ ܒܗܿܝ ܥܕܵܢܵܐ 93% ـ 28% ܡܸܢܲܝܗܝ ܐܝܼܬ ܗ݇ܘܵܘ ܠܗ݇ܘܿܢ ܢܸܣܝܵܢܵܐ ܕܣܘܼܓܼܦܵܢܵܐ ܓܸܢܣܵܝܵܐ ܝܵܢ ܢܲܦ̰ܫܵܝܵܐ. ܒܫܸܢ݇ܬܵܐ 1999، ܓܵܘ ܐܲܬܪܵܐ ܕܪܘܼܣܝܼܵܐ 14000 ܢܸܫܸ̈ܐ ܦܝܼܫܸ̈ܐ ܗ݇ܘܵܘ ܩܛܝܼܠܸ̈ܐ ܒܝܲܕ ܚܲܕ݇ ܡܼܢ ܚܝܵܢܲܝܗܝ ܘܒܐܵܡܹܝܪܝܼܟܵܐ %30 ܗܲܠ %35 ܡܼܢ ܢܸܫܸ̈ܐ ܦܝܵܫܵܐ ܝܢܵܐ ܡܥܘܼܕܸܒܸ̈ܐ (ܡܥܘܼܓ̰ܸܙܸ̈ܐ).

ܥܢܘܼܦܝܵܐ ܒܲܪܩܘܼܒܼܠ ܢܸܫܸ̈ܐ ܟܸܐ ܡܲܒܝܸܢ ܒܐܲܪܒܥܵܐ ܐܲܕܫܸ̈ܐ ܗ.ܕ. ܦܲܓܼܪܵܢܵܝܵܐ (ܡܐܲܝܟܼ ܡܚܵܝܬܵܐ، ܚܒܼܵܫܬܵܐ ܓܵܘ ܒܲܝܬܵܐ، ܟܲܡܲܪܬܵܐ ܡܼܢ ܒܲܝܬܵܐ ܘܫܪ.)، ܢܲܦ̰ܫܵܝܵܐ (ܡܐܲܝܟܼ ܡܲܣܠܵܝܬܵܐ، ܙܥܵܩܬܵܐ ܝܵܢ ܡܲܩܘܲܚܬܵܐ ܒܩܵܠܵܐ ܪܵܡܵܐ، ܨܲܥܲܪܬܵܐ، ܡܲܣܚܲܪܬܵܐ، ܡܲܙܕܵܥܬܵܐ، ܟ̰ܝܵܪܬܵܐ، ܫܩܵܠܬܵܐ ܕܐܝܼܩܵܪܵܐ ܘܫܪ.)، ܐܸܩܢܘܼܡܝܵܝܵܐ (ܡܐܲܝܟܼ ܓܠܵܙܬܵܐ ܕܥܘܼܬܪܵܐ ܕܒܲܟܼܬܵܐ، ܡܲܟܠܵܝܬܵܐ ܕܒܲܟܼܬܵܐ ܡܼܢ ܦܘܼܠܚܵܢܵܐ ܠܒܲܪ ܡܼܢ ܒܲܝܬܵܐ، ܚܣܵܟܼܵܐ ܡܼܢ ܝܵܗܒܼܵܠܬܵܐ ܕܢܲܦܩܵܬܸ̈ܐ ܘܫܪ.)، ܘܓܸܢܣܵܝܵܐ (ܡܐܲܝܟܼ ܫܩܵܠܬܵܐ ܕܒܘܼܣܵܡܵܐ ܡܼܢ ܒܲܟܼܬܵܐ ܕܠܵܐ ܨܸܒܼܝܵܢܘܼܗܿ).

ܐܝܼܢܵܐ ܩܵܐ ܚܕܵܐ ܒܲܟܼܬܵܐ، ܦܠܵܛܵܐ ܕܥܢܘܼܦܝܵܐ ܒܟܠ ܚܲܕ݇ ܦܸܨܠܵܐ ܕܗܵܘܸܐ، ܝܠܸܗ ܐܲܕܫܸ̈ܐ ܕܟܘܼܖ̈ܗܵܢܸܐ ܦܲܓܼܖ̈ܵܢܵܝܸܐ ܡܐܲܝܟܼ ܡܲܪܥܵܐ ܕܣܵܪܘܿܫܵܐ ܝܵܢ ܟܵܢܣܹܝܪ ܘܡܲܪܥܵܐ ܕܐܲܝܕܙ ܕܚܲܕ݇ܟܡܵܐ ܡܲܖ̈ܥܸܐ ܝܢܵܐ ܩܵܛܘܿܠܸ̈ܐ. ܘܛܘܼܦ̰ܣܵܐ ܕܟܘܼܖ̈ܗܵܢܸܐ ܢܲܦ̰ܫܵܝܸܐ، ܩܛܝܼܦܘܼܬ ܪܘܼܚܵܐ ܝܠܵܗܿ ܕܟܸܐ ܡܵܨܝܵܐ ܚܵܬܡܵܐ ܠܩܛܲܠ ܢܲܦ̰ܫܵܐ. ܥܲܡ ܟܘܼܪܗܵܢܵܐ ܕܚܕܵܐ ܒܲܟܼܬܵܐ، ܟܠܲܝܗܝ ܗܲܕܵܡܸ̈ܐ ܕܒܲܝܬܘܼܗܿ ܙܸܐ ܦܝܵܫܵܐ ܝܢܵܐ ܡܚܘܼܙܕܸܓܸ̈ܐ ܘܩܲܒܘܼܠܸܐ ܝܢܵܐ ܣܘܼܓܼܦܵܢܵܐ (ܙܝܵܢܵܐ) ܕܐܵܗܵܐ ܒܓܵܢܘܼܗܿ ܗ݇ܘܵܝܵܐ ܝܠܵܗܿ ܥܸܠܬܵܐ ܕܚܘܼܙܕܵܓܵܐ ܕܟܠܵܗܿ ܫܵܘܬܵܦܘܼܬܵܐ.

ܒܘܼܨܵܝܸ̈ܐ ܡܲܚܙܘܼܝܸ̈ܐ ܝܢܵܐ ܕܥܸܠܬܵܐ ܫܸܪܫܵܝܬܵܐ ܕܥܢܘܼܦܝܵܐ ܘܩܲܫܝܘܼܬܵܐ ܒܲܪܩܘܼܒܼܠ ܢܸܫܸ̈ܐ، ܠܵܐ ܣܦܝܼܪܘܼܬܵܐ ܝܵܢ  ܒܲܨܘܿܪܘܼܬܵܐ ܕܕܲܪܓܼܵܐ ܕܣܦܝܼܪܘܼܬܵܐ ܕܐܘܼܖ̈ܙܸܐ ܐܵܘ ܟܠܵܗܿ ܫܵܘܬܵܦܘܼܬܵܐ ܝܠܵܗܿ. ܡܸܬܥܲܝܕܵܢܘܼܬܵܐ (اعتیاد) ܠܡܲܦܠܲܚܬܵܐ ܕܫܲܚܪܵܐ (ܐܲܠܟܵܗܘܿܠ) ܥܸܠܬܵܐ ܬܪܝܼܵܢܝܼܬܵܐ ܝܠܵܗܿ ܘܒܵܬ݇ܪ ܗܵܕܵܐ ܟܘܼܖ̈ܗܵܢܸܐ ܢܲܦ̰ܫܵܝܸ̈ܐ ܝܢܵܐ.

ܒܫܲܢ݇ܬܵܐ 1981 ܚܲܕ݇ܟܡܵܐ ܥܵܒܼܘܿܕܸ̈ܐ ܕܒܪܝܼܬܵܐ ܪܫܝܼܡܠܗ݇ܘܿܢ ܠܝܵܘܡܵܐ ܕ25 ܒܟܵܢܘܿܢ ܐ ܐܲܝܟܼ ܝܵܘܡܵܐ ܕܥܛܵܝܵܐ (ܫܝܵܦܬܵܐ) ܕܥܢܘܼܦܝܵܐ ܒܲܪܩܘܼܒܼܠ ܢܸܫܸ̈ܐ، ܒܗܿܝ ܕܝܼܗ݇ܘܵܐ ܝܵܘܡܵܐ ܕܩܸܛܠܵܐ ܕܬܠܵܬ݇ ܚܵܬܘܵܬܸ̈ܐ ܒܛܘܿܗܡܵܐ ܕܡܝܼܪܵܒܵܠ ܕܫܸܡܲܝܗܝ ܝܗ݇ܘܵܐ ܦܵܬܪܝܼܫܝܼܵܐ ܡܹܝܪܣܸܝܕܹܝܣ، ܡܵܪܝܼܵܐ ܐܵܪܓ̰ܹܝܢܬܝܼܢܵܐ ܘܐܵܢܛܘܿܢܝܼܵܐ ܡܵܪܝܼܵܐ ܬܹܝܪܹܝܣܵܐ. ܬܠܵܬ ܚܵܬܘܵܬܸ̈ܐ ܕܡܝܼܪܵܒܵܠ ܥܲܡ ܒܢܲܝ̈ ܙܲܘܓܲܝܗܝ ܟܸܐ ܦܵܠܚܝܼ ܗ݇ܘܵܘ ܒܲܪܩܘܼܒܼܠ ܪܵܦ̰ܵܐܹܝܠ ܬܪܘܼܚܝܼܠܘܿ ܕܝܼܗ݇ܘܵܐ ܗܸܓܼܡܘܿܢܵܐ ܛܪܘܼܢܵܐ (حاکم دیکتاتور) ܕܐܲܬܪܵܐ ܕܕܘܿܡܝܼܢܝܼܟܵܢ. ܐܵܢܝܼ ܬܠܵܬ ܚܵܬܘܵܬܸ̈ܐ ܦܝܼܫܠܗ݇ܘܿܢ ܩܛܝܼܠܸ̈ܐ ܒܦܘܼܩܕܵܢܵܐ ܕܬܪܘܼܚܝܼܠܘܼ ܟܲܕ ܐܲܣܝܼܖܸ̈ܐ ܗ݇ܘܵܘ ܓܵܘ ܒܹܝܬ ܚܒܼܘܼܫܝܵܐ .

ܒܫܲܢ݇ܬܵܐ 1999 ܟܢܘܼܫܝܵܐ ܓܵܘܵܢܵܝܵܐ ܕܫܘܼܬܐܵܣܵܐ ܕܐܸܡܘܵܬܸ̈ܐ ܡܚܲܝܕܸ̈ܐ ܡܫܘܼܪܸܪܠܸܗ ܠܐܵܗܵܐ ܝܵܘܡܵܐ ܐܲܝܟܼ ܚܲܕ݇ ܝܵܘܡܵܐ ܬܸܒܼܝܼܠܵܝܵܐ. ܒܝܵܘܡܵܐ ܕ25 ܒܟܵܢܘܿܢ ܩܲܕ݇ܡܵܝܵܐ 2012 ܒܵܢܟܝܼ ܡܘܿܢ، ܢܵܛܸܪ ܪܹܝܙܵܐ ܕܫܘܼܬܐܵܣܵܐ ܕܐܸܡܘܵܬܸ̈ܐ ܡܚܲܝܕܸ̈ܐ ܛܠܝܼܒܠܸܗ ܡܼܢ ܫܘܼܠܛܵܢܸ̈ܐ ܕܟܠܲܝܗܝ ܐܲܬܖ̈ܵܘܵܬܸܐ ܕܒܪܝܼܬܵܐ ܕܚܵܦܛܝܼ ܩܵܐ ܡܚܲܬܲܡܬܵܐ ܕܟܠ ܚܲܕ݇ ܐܲܕܫܵܐ ܕܥܢܘܼܦܝܵܐ ܒܲܪܩܘܼܒܼܠ ܢܸܫܸ̈ܐ.

ܡܼܢ ܐܘܼܖ̈ܚܵܬܸܐ ܡܲܥܒܼܕܵܢܸ̈ܐ ܩܵܐ ܡܥܲܛܲܝܬܵܐ ܕܥܢܘܼܦܝܵܐ ܒܲܪܩܘܼܒܼܠ ܢܸܫܸ̈ܐ ܡܵܨܲܚ ܪܵܡܙܲܚ ܥܲܠ ܡܲܪܘܲܚܬܵܐ ܕܝܘܼܠܦܵܢܵܐ ܓܵܘ ܟܠ ܚܲܕ݇ ܐܲܬܪܵܐ، ܡܫܲܪܲܪܬܵܐ ܕܢܵܡܘܿܣܸ̈ܐ ܩܲܫܝܸ̈ܐ ܒܲܪܩܘܼܒܼܠ ܐܵܢܝܼ ܕܡܥܲܕܘܼܒܸ̈ܐ ܝܵܢ ܡܣܲܓܼܦܘܼܢܸ̈ܐ ܝܢܵܐ ܠܢܸܫܸ̈ܐ، ܗܲܝܲܪܬܵܐ ܕܐܵܢܝܼ ܢܸܫܸ̈ܐ ܕܡܣܘܼܓܼܦܸܢܸ̈ܐ ܝܢܵܐ ܒܝܲܕ ܚܲܕ݇ ܐܘܼܪܙܵܐ ܘܗܲܕܲܪܬܵܐ ܕܚܲܕ݇ܟܡܵܐ ܒܹܝܬ ܓܵܘܣܸ̈ܐ ܩܵܬܲܝܗܝ ܘܫܪ.