ܗܘܩܝܬܐ ܕܣܘܠܛܢ ܣܒܐ

ܚܘܢܘܬ̈ܐ ܕܓܪܝܡ

ܦܘܫܩܐ ܒܝܕ ܫܡܝܪܡ ܕ.ܦܘܪܝܐܢ

   ܐܝܼܬ ܗ݇ܘܵܐ، ܠܲܝܬ ܗ݇ܘܵܐ، ܐܝܼܬ ܗ݇ܘܵܐ ܚܲܕ݇ ܪܵܥܝܵܐ ܕܐܝܼܬ ܗ݇ܘܵܐ ܠܸܗ ܚܲܕ݇ ܟܲܠܒܵܐ ܡܗܘܼܡܢܵܐ ܫܸܡܸܗ ܣܘܼܠܛܵܢ ܕܪܵܒܵܐ ܣܝܼܒܼܵܐ ܗ݇ܘܵܐ ܘܬܦܝܼܟܼܸܐ ܗ݇ܘܵܘ ܟܠܲܝܗܝ ܟܲܟ̈ܘܼܗܝ. ܚܲܕ݇ ܝܵܘܡܵܐ ܟܲܕ ܪܵܥܝܵܐ ܥܲܡ ܒܲܟܼܬܸܗ ܟܸܠܝܸ̈ܐ ܗ݇ܘܵܘ ܡܐܸܚܕܵܕܸܐ ܩܲܕ݇ܡ ܬܲܪܥܵܐ، ܐ݇ܡܸܪܸܗ ܪܵܥܝܵܐ: ܩܘܼܕܡܸܐ ܒܨܲܦܪܵܐ ܒܸܕ ܡܵܚܸܢܸܗ ܣܘܼܠܛܵܢ ܒܝܲܕ ܓܘܼܠܠܵܐ ܒܗܿܝ ܕܐܵܕܝܼܵܐ ܠܲܝܬ ܠܸܗ ܟ̰ܘܼ ܚܲܕ݇ ܝܘܼܬܪܵܢܵܐ. ܐܝܼܢܵܐ ܒܲܟܼܬܸܗ ܐ݇ܡܸܪܵܗܿ: ܦܲܪܦܘܼܠܸܐ ܝܘܵܢ ܒܝܼܘܼܟܼ ܫܒܼܘܿܩ ܕܐܵܗܵܐ ܐܝܼܬܝܵܐ ܡܗܘܼܡܢܵܐ ܚܵܝܸܐ. ܗܿܘ ܦܠܝܼܚܵܐ ܝܠܸܗ ܩܵܬܲܢ ܪܵܒܵܐ ܨܦܵܝܝܼ ܩܵܐ ܡܸܬܚܵܐ ܕܟܡܵܐ ܫܸܢܸ̈ܐ ܘܐܲܚܢܲܢ ܘܵܠܸܐ ܕܝܵܗܒܼܲܚ ܠܸܗ ܚܕܵܐ ܚܲܝܘܼܬܵܐ ܩܵܐ ܦܲܝܫܵܢܸ̈ܐ ܕܚܲܝ̈ܘܼܗܝ. ܪܵܥܝܵܐ ܐ݇ܡܸܪܸܗ: ܐܝܼܢܵܐ ܐܲܚܢܲܢ ܡܘܼܕܝܼ ܟܸܐ ܡܵܨܲܚ ܥܲܒܼܕܲܚ ܒܝܼܸܗ؟ ܠܲܝܬ ܦܝܵܫܵܐ ܚܲܕ݇ ܟܲܟܵܐ ܓܵܘ ܦܘܼܡܸܗ ܘܓܸܢܵܒܼܸ̈ܐ ܣܵܟܼ ܠܸܐ ܚܵܫܒܼܝܼ ܠܸܗ. ܬܪܘܼܨܵܐ ܝܠܵܗܿ ܕܗܿܘ ܦܠܝܼܚܵܐ ܝܠܸܗ ܩܵܬܲܢ ܪܵܒܵܐ ܨܦܵܝܝܼ ܒܡܸܬܚܵܐ ܕܚܲܝܘܼܗܝ ܐܝܼܢܵܐ ܗܲܡܸܢ ܕܩܘܼܕܡܸܐ ܗܿܘ ܝܵܘܡܸܗ ܚܲܪܵܝܵܐ ܒܸܕ ܗܵܘܸܐ

   ܡܸܣܟܸܢܵܐ ܣܘܼܠܛܵܢ ܕܝܪܝܼܟܼܵܐ ܗ݇ܘܵܐ ܩܘܼܪܒܵܐ ܥܲܠܲܝܗܝ، ܫܡܝܼܥܲܝ ܠܸܗ ܟܠܲܝܗܝ ܐܵܢܝܼ ܚܲܒܖ̈ܵܢܸܐ ܕܪܵܥܝܵܐ ܘܒܲܟܼܬܸܗ ܐ݇ܡܝܼܪܲܝܗܝ ܠܗ݇ܘܿܢ ܠܐܸܚܕܵܕܸܐ؛ ܗܿܝܓܵܗ ܒܥܲܨܸܪܬܵܐ ܐ݇ܙܸܠܸܗ ܠܟܸܣ ܚܲܒܼܪܸܗ ܛܵܒܼܵܐ ܕܸܐܒܼܵܐ، ܕܟܸܐ ܚܵܝܸܐ ܗ݇ܘܵܐ ܒܡܲܝܫܵܐ، ܘܐ݇ܡܸܪܸܗ ܩܵܬܸܗ ܒܘܼܬ ܟܠܲܝܗܝ ܚܲܫ̈ܘܼܗܝ ܘܒܘܼܬ ܐܵܗܵܐ ܕܕܐܲܝܟܼܝܼ ܡܵܪܸܗ ܒܵܥܸܐ ܕܩܵܛܸܠܸܗ ܒܨܲܦܪܵܐ. ܕܸܐܒܼܵܐ ܐ݇ܡܸܪܸܗ: ܠܵܐ ܬܲܚܡܸܢܸܬ، ܐܵܢܵܐ ܒܸܕ ܝܵܗܒܼܸܢܘܼܟܼ ܚܲܕ݇ܟܡܵܐ ܡܸܠܟܸ̈ܐ ܛܵܒܼܸ̈ܐ. ܕܐܲܝܟܼܝܼ ܕܟܸܐ ܝܵܕܥܸܬ، ܒܟܠ ܨܲܦܪܵܐ ܡܵܪܘܼܟܼ ܟܸܐ ܦܵܠܸܛ ܪܵܒܵܐ ܓ̰ܲܠܕܸܐ ܠܚܲܩܠܵܐ ܥܲܡ ܒܲܟܼܬܸܗ ܘܟܸܐ ܫܵܩܠܝܼ ܠܛܲܠܝܲܝܗܝ ܥܲܡܲܝܗܝ؛ ܘܟܲܕ ܦܠܵܚܵܐ ܝܢܵܐ ܡܲܕܡܘܼܟܼܸܗ ܝܢܵܐ ܒܵܬ݇ܪ ܣܝܵܓܼܵܐ (ܟ̰ܲܦܲܪ) ܓܵܘ ܛܠܵܢܝܼܬܵܐ. ܐܲܢ݇ܬ ܒܸܕ ܕܵܡܟܼܸܬ ܩܘܼܪܒܵܐ ܠܛܲܠܝܵܐ ܘܗܵܕܟܼܵܐ ܡܲܕܸܥܸܝܬ ܕܒܸܢܛܵܪܸܗ ܝܘܸܬ ܘܐܵܢܵܐ ܒܸܕ ܦܵܠܛܸܢ ܡܼܢ ܓܵܘ ܡܲܝܫܵܐ ܘܒܸܕ ܫܵܩܠܸܢܸܗ ܘܒܸܕ ܥܲܪܩܸܢ ܥܲܡܸܗ. ܐܲܢ݇ܬ ܘܵܠܸܐ ܕܪܵܚܛܸܬ ܒܵܬ݇ܪܝܼ ܒܟܠܵܗܿ ܩܲܠܝܼܠܘܼܬܵܐ ܕܐܝܼܬ ܓܵܘ ܚܲܝܠܘܼܟܼ ܘܐܵܢܵܐ ܒܸܕ ܪܲܦܸܢܸܗ. ܗܿܝܓܵܗ ܘܵܠܸܐ ܕܐܲܢ݇ܬ ܡܲܕܸܪܸܬ ܠܸܗ ܘܐܵܢܝܼ ܒܸܕ ܗܵܘܝܼ ܪܵܒܵܐ ܛܲܥܢܵܢܸ̈ܐ ܕܡܸܢܬܵܐ ܡܸܢܘܼܟܼ ܗܵܕܟܼܵܐ ܕܒܸܕ ܢܵܛܪܝܼ ܠܘܼܟܼ ܩܵܐ ܟܠܲܝܗܝ ܚܲܝܘܼܟܼ. ܟܲܠܒܵܐ ܪܕܸܐ ܠܸܗ ܪܵܒܵܐ  ܠܢܲܩܫܵܐ ܘܡܘܼܪܝܸܙܠܗ݇ܘܿܢ ܐܲܝܟܼ ܕܕܸܐܒܼܵܐ ܐ݇ܡܝܼܪܵܐ ܗ݇ܘܵܐ

   ܪܚܸܛܠܸܗ ܕܸܐܒܼܵܐ ܥܲܡ ܛܲܠܝܵܐ ܚܲܕ݇ ܐܘܼܪܚܵܐ ܟܪܝܼܬܵܐ، ܪܵܥܝܵܐ ܘܒܲܟܼܬܸܗ ܡܘܼܩܘܸܚܠܗ݇ܘܿܢ. ܐܝܼܢܵܐ ܣܘܼܠܛܵܢ ܪܵܒܵܐ ܓ̰ܲܠܕܸܐ ܥܒܼܸܪܸܗ ܡܼܢ ܕܸܐܒܼܵܐ ܘܡܘܼܕܸܪܸܗ ܠܛܲܠܝܵܐ ܙܥܘܿܪܵܐ ܘܡܸܣܟܸܢܵܐ ܠܟܸܣ ܡܵܪܸܗ ܘܡܵܪܬܸܗ. ܗܿܝܓܵܗ ܪܵܥܝܵܐ ܓܪܝܼܫܵܐ ܠܸܗ ܐܝܼܕܸܗ ܒܚܘܼܒܵܐ ܥܲܠ ܪܸܫܵܐ ܕܣܘܼܠܛܵܢ ܘܐ݇ܡܸܪܸܗ: ܣܘܼܠܛܵܢ ܣܵܒܼܵܐ ܦܘܼܪܸܩܠܸܗ ܠܛܲܠܝܲܢ ܘܒܸܕ ܗܵܘܸܐ ܠܸܗ ܪܵܒܵܐ ܡܸܐܟܼܘܿܠܬܵܐ. ܒܲܟܼܬܵܐ، ܙܸܠ݇ ܠܒܲܝܬܵܐ ܘܗܲܒܼܠܸܗ ܚܲܕ݇ ܨܦܵܝܝܼ ܐ݇ܟܼܵܠܪܲܡܫܵܐ ܘܫܒܼܘܿܩܠܸܗ ܕܕܵܡܸܟܼ ܥܲܠ ܒܣܵܕܝܼܬܵܐ ܥܲܬܝܼܩܬܵܐ ܕܝܼܝܼ ܟܡܵܐ ܕܚܲܝܵܐ ܝܠܸܗ

  ܡܼܢ ܗܿܘ ܝܵܘܡܵܐ ܠܒܵܬ݇ܪܵܐ ܣܘܼܠܛܵܢ ܐܝܼܬ ܗ݇ܘܵܐ ܠܸܗ ܟܠ ܚܲܕ݇ ܡܸܢܕܝܼ ܕܠܸܒܸܗ ܛܵܠܸܒ ܗ݇ܘܵܐ. ܗܵܝܓܵܗܵܐ ܪܵܒܵܐ ܓ̰ܲܠܕܸܐ ܐ݇ܬܸܐ ܠܸܗ ܕܸܐܒܼܵܐ ܘܕܪܸܐ ܠܸܗ ܫܠܵܡܵܐ ܥܲܠܸܗ ܘܐ݇ܡܸܪܸܗ: ܐܵܕܝܼܵܐ ܚܲܒܼܪܝܼ ܫܲܪܝܼܪܵܐ ܠܵܐ ܗܲܡܙܸܡܸܬ ܐܵܦ ܚܲܕ݇ ܚܲܒܪܵܐ، ܐܝܼܡܵܢ ܕܐܵܢܵܐ ܒܵܥܝܸܢ ܐܵܟܼܠܸܢ ܠܸܗ ܚܲܕ݇ ܡܼܢ ܥܸܖ̈ܒܸܐ ܬܲܖ̈ܒܵܢܸܐ ܕܪܵܥܝܵܐ ܣܵܒܼܵܐ ܘܵܠܸܐ ܝܠܵܗܿ ܕܐܲܢ݇ܬ ܦܲܬܠܸܬ ܠܸܗ ܒܵܠܘܼܟܼ ܠܗܿܘ ܓܸܒܵܐ ܐ݇ܚܸܪ݇ܢܵܐ. ܣܘܼܠܛܵܢ ܐ݇ܡܸܪܸܗ: ܠܵܐ، ܐܵܢܵܐ ܡܗܘܼܡܢܵܐ ܝܘܸܢ ܠܟܸܣ ܡܵܪܝܼ 

  ܟܲܠܒܵܐ ܚܫܝܼܒܼܠܸܗ ܕܗܿܘ ܒܙܵܚܵܐ ܝܠܸܗ (ܡܲܣܚܘܼܪܵܐ ܝܠܸܗ) ܘܗܵܕܟܼܵܐ ܩܘܼܘܸܡܠܵܗܿ ܕܚܲܕ݇ ܠܲܝܠܸܐ ܕܸܐܒܼܵܐ ܐ݇ܬܸܐ ܠܸܗ ܕܐܵܟܼܸܠ ܠܸܗ ܗܿܘ ܩܸܨܝܵܐ (ܬܸܟܵܐ) ܛܲܥܡܵܢܵܐ. ܐܝܼܢܵܐ ܣܘܼܠܛܵܢ ܗܘܼܩܝܵܐ ܗ݇ܘܵܐ ܩܵܐ ܡܵܪܸܗ ܒܘܼܬ ܢܝܼܫܵܐ ܕܕܸܐܒܼܵܐ. ܡܵܕܝܼܢ (ܒܲܣ) ܗܿܘ ܝܪܝܼܟܼܠܸܗ ܘܣܒܸܪܸܗ ܥܲܠܸܗ ܒܵܬ݇ܪ ܬܲܪܥܵܐ ܕܦܵܓܵܐ ܘܐܝܼܡܲܢ ܕܕܸܐܒܼܵܐ ܒܠܝܼܓܵܐ ܗ݇ܘܵܐ ܠܡܲܨܝܘܼܕܸܐ ܠܚܲܕ݇ ܥܸܪܒܵܐ ܬܲܪܒܵܢܵܐ، ܪܵܥܝܵܐ ܕܐܝܼܬ ܗ݇ܘܵܐ ܠܸܗ ܚܲܕ݇ ܦܵܕܘܿܥܵܐ (ܟ̰ܘܿܡܵܚܬܵܐ) ܚܠܝܼܡܵܐ ܕܡܘܼܬܒܼܸܗ ܗ݇ܘܵܐ ܩܘܼܪܒܵܐ ܠܪܸܫܸܗ ܟ̰ܸܡ ܨܦܵܝܝܼ ܕܘܼܪܝܵܐ ܠܸܗ ܬܸܦܬܝܼܓܸܗ 

   ܗܿܝܓܵܗ ܕܸܐܒܼܵܐ ܪܵܒܵܐ ܟܪܝܼܒܠܸܗ ܘܩܪܸܐ ܠܸܗ ܩܵܐ ܣܘܼܠܛܵܢ "ܕܲܓܼܵܠܵܐ" ܘܝܡܸܐ ܠܸܗ ܕܒܸܕ ܫܵܩܸܠܸܗ ܬܘܼܠܸܗ ܡܸܢܸܗ. ܒܨܲܦܪܵܐ ܕܝܵܘܡܵܐ ܐ݇ܚܸܪ݇ܢܵܐ ܕܸܐܒܼܵܐ ܫܘܼܕܸܪܸܗ ܠܚܙܘܼܪܵܐ ܕܒܲܪܵܐ ܕܩܵܪܸܐ ܠܸܗ ܣܘܼܠܛܵܢ ܕܐܵܬܸܐ ܓܵܘ ܡܲܝܫܵܐ ܩܵܐ ܟܘܼܬܵܫܵܐ. ܐܵܕܝܼܵܐ ܣܘܼܠܛܵܢ ܠܲܝܬ ܗ݇ܘܵܐ ܠܸܗ ܚܲܕ݇ ܐ݇ܢܵܫܵܐ ܕܛܵܠܸܒ ܗ݇ܘܵܐ ܡܸܢܸܗ ܕܗܵܘܸܐ ܡܣܲܬܪܵܢܸܗ (ܢܵܛܘܿܪܸܗ) ܫܒܼܘܿܩ ܡܼܢ ܩܵܛܘܼ ܬܠܝܼܬܵܝ ܐܲܩܠܸ̈ܐ ܕܪܵܥܝܵܐ. ܗܿܝܓܵܗ ܫܩܝܼܠܵܐ ܠܸܗ ܩܵܛܘܼ ܥܲܡܸܗ ܘܟܲܕ ܗܿܝ ܡܸܣܟܝܼܢܬܵܐ ܠܲܢܓܘܼܢܸܐ ܗ݇ܘܵܐ ܒܥܲܣܩܘܼܬܵܐ، ܡܘܼܪܸܡܬܸܗ ܗ݇ܘܵܐ ܛܘܼܦܪܘܼܗܿ ܓܵܘ ܗܵܘܵܐ

   ܕܸܐܒܼܵܐ ܘܚܙܘܼܪܵܐ ܝܠܸܗ ܘܚܙܸܐ ܠܗ݇ܘܿܢ ܠܛܘܼܦܪܵܐ ܝܲܪܝܼܟܼܵܐ ܕܩܵܛܘܼ ܕܟܸܠܝܵܐ ܗ݇ܘܵܐ ܬܪܝܼܨܵܐܝܼܬ ܓܵܘ ܗܵܘܵܐ، ܚܫܸܒܼܠܗ݇ܘܿܢ ܕܗܿܝ ܡܐܲܬ݇ܝܵܐ ܝܠܵܗܿ ܚܲܕ݇ ܣܲܝܦܵܐ ܚܲܪܝܼܦܵܐ ܩܵܐ ܣܘܼܠܛܵܢ ܕܦܵܠܸܫ، ܘܟܠ ܥܕܵܢܵܐ ܕܗܿܝ ܠܲܢܓܘܼܢܸܐ ܗ݇ܘܵܐ ܐܵܢܝܼ ܒܸܚܫܵܒܼܵܐ ܗ݇ܘܵܘ ܕܒܸܫܩܵܠܵܐ ܝܠܵܗܿ ܚܲܕ݇ ܟܸܐܦܵܐ ܕܪܵܦܝܵܐ ܥܲܠܲܝܗܝ. ܗܿܝܓܵܗ ܐܵܢܝܼ ܐ݇ܡܸܪܗ݇ܘܿܢ ܕܠܸܐ ܝܠܵܗܿ ܒܣܵܡܲܝܗܝ ܐܵܗܵܐ ܐܲܕܫܵܐ ܕܦܠܵܫܵܐ ܘܚܙܘܼܪܵܐ ܕܒܲܪܵܐ ܝܪܸܟܼܠܸܗ ܒܵܬ݇ܪ ܚܕܵܐ ܐܝܼܠܬܵܐ ܘܕܸܐܒܼܵܐ ܢܕܸܐ ܠܸܗ ܓܵܘ ܚܲܕ݇ ܐܝܼܠܵܢܵܐ  

   ܣܘܼܠܛܵܢ ܘܩܵܛܘܼ ܡܛܸܐ ܠܗ݇ܘܿܢ ܓ̰ܲܠܕܸܐ ܘܓܘܼܫܸܩܠܗ݇ܘܿܢ ܠܚܲܕܸܖ̈ܘܵܢܲܝܗܝ ܘܥܘܼܓ̰ܸܒܠܗ݇ܘܿܢ ܕܟ̰ܘܼ ܚܲܕ݇ ܠܲܝܬ ܗ݇ܘܵܐ ܬܵܡܵܐ. ܐܝܼܢܵܐ ܚܙܘܼܪܵܐ ܕܒܲܪܵܐ ܠܸܐ ܗ݇ܘܵܐ ܛܘܼܫܝܘܼܗܿ ܓܵܢܸܗ ܟ̰ܸܡ ܨܦܵܝܝܼ ܒܗܿܝ ܕܢܵܬܝܵܬܘܼܗܝ ܦܠܝܼܛܸ̈ܐ ܗ݇ܘܵܘ ܡܼܢ ܓܵܘ ܐܝܼܠܬܵܐ ܘܐܝܼܡܲܢ ܕܡܘܼܓ̰ܘܸܓ̰ܵܐ ܠܸܗ ܚܕܵܐ ܡܸܢܲܝܗܝ، ܩܵܛܘܼ ܕܒܸܚܙܵܝܵܐ ܗ݇ܘܵܐ ܕܚܲܕ݇ ܡܸܢܕܝܼ ܒܸܓ̰ܘܵܓ̰ܵܐ ܝܠܸܗ ܘܒܸܚܫܵܒܼܵܐ ܗ݇ܘܵܐ ܕܥܘܿܩܸܒܪܵܐ ܝܠܸܗ، ܢܕܸܐ ܠܵܗܿ ܥܲܠܸܗ ܘܡܚܸܐ ܠܵܗܿ ܘܙܪܸܟ̰ܠܵܗܿ ܩܵܬܸܗ. ܒܘܼܬ ܐܵܗܵܐ ܚܙܘܼܪܵܐ ܕܒܲܪܵܐ ܢܕܸܐ ܠܸܗ ܘܚܘܼܪܚܸܪܸܗ ܘܥܪܸܩܠܸܗ ܟܲܕ ܒܲܪܒܘܿܪܸܐ ܗ݇ܘܵܐ: ܓܵܫܩܘܿܢ ܓܵܘ ܐܝܼܠܵܢܵܐ، ܬܵܡܵܐ ܝܠܸܗ ܝܬܝܼܒܼܵܐ ܗܿܘ ܕܚܫܝܼܚܵܐ ܝܠܸܗ ܠܸܠܝܵܡܵܐ 

   ܗܿܝܓܵܗ ܐܵܢܝܼ ܓܘܼܫܸܩܠܗ݇ܘܿܢ ܠܥܸܠܸܠ ܘܚܙܸܐ ܠܗ݇ܘܿܢ ܕܕܸܐܒܼܵܐ ܝܬܝܼܒܼܵܐ ܝܠܸܗ ܒܲܝܢܵܬ ܦܲܥܘܵܢܸ̈ܐ ܘܐܵܢܝܼ ܩܪܸܐ ܠܗ݇ܘܿܢ ܩܵܬܸܗ "ܣܲܡܘܼܪܵܐ ܙܵܕܘܿܥܵܐ" ܘܐ݇ܡܸܪܗ݇ܘܿܢ ܕܟܲܕ ܗܿܘ ܡܼܢ ܟܠܸܗ ܠܸܒܸܗ ܒܸܢܟܼܵܦܵܐ ܝܠܸܗ ܡܼܢ ܓܵܢܸܗ ܒܲܣ ܠܸܐ ܓ̰ܲܢܓ̰ܸܪܝܼ ܠܸܗ ܘܩܘܼܘܸܠܗ݇ܘܿܢ ܕܡܸܢ݇ܕܪܸܫ݇ ܒܸܕ ܗܵܘܝܼ ܚܲܒܼܖ̈ܵܘܵܬܸܐ ܛܵܒܼܸ̈ܐ ܥܲܡ ܣܘܼܠܛܵܢ