ܦܘܬܚܐ

ܫܡܝܪܡ ܕ. ܦܘܪܝܐܢ

   ܟܲܕ ܬܲܚܡܘܼܢܸܐ ܝܘܲܚ ܠܐܲܝܟܵܢܵܝܘܼܬܵܐ ܕܩܵܐܸܡ ܕܒܢܲܝ̈ ܐܘܼܡܬܲܢ ܒܬܸܒܼܹܝܠ ܘܦܪܝܼܫܵܐܝܼܬ ܒܒܹܝܬ ܢܵܗܖܸ̈ܝܢ، ܡܠܵܝܵܐ ܝܠܵܗܿ ܪܘܼܚܲܢ ܡܼܢ ܚܲܫܵܐ ܘܦܣܝܼܩܘܼܬ ܣܲܒܼܪܵܐ ܘܗܲܪ ܒܗܿܝ ܥܕܵܢܵܐ ܒܪܵܝܵܐ ܝܢܵܐ ܚܲܕ݇ܟܡܵܐ ܒܘܼܩܵܖܸ̈ܐ ܐܵܢܲܢܩܵܝܸ̈ܐ ܒܘܼܬ ܕܲܥܬܝܼܕ ܕܐܘܼܡܬܲܢ.                                                                    

   ܫܲܪܝܼܪܵܐܝܼܬ ܠܸܐ ܗܵܘܝܵܐ ܓ̰ܲܘܘܼܒܸܐ ܠܐܲܢܸܐ ܒܘܼܩܵܖܸ̈ܐ ܒܐܵܗܵܐ ܙܲܒܼܢܵܐ  ܕܢܘܼܪܵܐ ܕܦܠܵܫܵܐ ܒܸܠܗܵܝܵܐ ܝܠܸܗ ܒܒܹܝܬ ܢܵܗܖܸ̈ܝܢ ܘܡܲܠܲܐܟܼܵܐ ܕܡܵܘܬܵܐ ܗܲܟܘܼܡܸܐ ܝܠܸܗ ܬܵܡܵܐ ܒܐܘܼܪܚܵܐ ܕܪܗܝܼܒܼܵܝܘܼܬܵܐ ܘܩܸܛܠܵܐ. ܕܠܵܐ ܫܸܟ ܪܵܒܵܐ ܡܸܢܲܢ ܒܲܩܘܼܪܸܐ ܝܘܲܚ ܡܼܢ ܓܵܢܲܢ ܕܡܘܼܕܝ ܒܸܕ ܗܵܘܸܐ ܕܲܥܬܝܼܕ ܕܐܘܼܡܬܲܢ؟ ܘܐܵܪܵܐ ܗܸܫ ܦܝܵܫܵܐ ܝܢܵܐ ܐܵܢܝܼ ܣܲܒܼܖܸ̈ܐ ܕܒܸܖ̈ܝܸܐ ܗ݇ܘܵܘ ܒܠܸܒܵܘܵܬܸ̈ܐ ܕܒܢܲܝ̈ ܐܘܼܡܬܲܢ ܩܵܐ ܡܛܵܝܬܵܐ ܠܚܸܐܪܘܼܬܵܐ ܘܫܩܵܠܬܵܐ ܕܫܘܼܠܛܵܢܵܐ ܝܵܬܵܝܵܐ ܒܕܲܫܬܵܐ ܕܢܝܼܢܘܸܐ ܘܢܛܵܪܬܵܐ ܕܐܝܼܬܘܼܬܲܢ ܘܗܝܼܵܝܘܼܬܲܢ؟      

    ܐܲܢܸܐ ܒܘܼܩܵܖܸ̈ܐ ܪܵܒܵܐ ܐܵܢܲܢܩܵܝܸ̈ܐ ܝܢܵܐ ܒܗܿܝ ܕܟܠ ܚܕܵܐ ܦܵܣܘܿܥܬܵܐ ܕܒܵܥܲܚ ܫܵܩܠܲܚ ܒܪܲܗܛܵܐ ܕܦܘܼܠܚܵܢܵܐ ܐܘܼܡܬܵܢܵܝܵܐ ܬܠܝܼܬܵܐ ܝܠܵܗܿ ܥܲܠ ܦܘܼܢܵܝܸ̈ܐ ܕܒܸܕ ܦܵܝܫܝܼ ܝܗܝܼܒܼܸܐ ܩܵܬܲܝܗܝ.                                                   

   ܐܝܼܬ ܚܲܕ݇ܟܡܵܐ ܕܒܸܚܫܵܒܼܵܐ ܝܢܵܐ ܕܦܪܝܼܩܵܐ ܝܠܸܗ ܟܠ ܡܸܢܕܝܼ ܘܠܲܝܬ ܦܝܵܫܵܐ ܚܕܵܐ ܐܘܼܪܚܵܐ ܕܦܘܼܪܩܵܢܵܐ ܩܵܐ ܐܘܼܡܬܲܢ ܘܫܩܵܠܬܵܐ ܕܟܠ ܚܕܵܐ ܦܵܣܘܿܥܬܵܐ ܗܲܒܲܣ ܝܠܵܗܿ ܘܕܠܵܐ ܝܘܼܬܪܵܢܵܐ. ܦܪܝܼܫܵܐܝܼܬ ܒܐܲܢܸ̈ܐ ܓܘܼܢܚܸ̈ܐ ܕܩܘܼܘܸܡܠܗ݇ܘܿܢ ܒܫܸܢܸ̈ܐ ܐ݇ܚܲܖ̈ܵܝܸܐ ܡܐܲܝܟܼ ܥܪܵܩܵܐ ܘܡܲܫܚܲܛܬܵܐ ܘܫܒܼܵܩܬܵܐ ܕܡܕܝܼܢܵܬܸ̈ܐ ܘܡܵܬܘܵܬܸ̈ܐ ܘܒܨܵܪܬܵܐ ܕܡܸܢܝܵܢܵܐ ܕܥܲܡܲܢ ܒܐܲܬܪܵܐ ܕܐܲܒܼܵܗܵܬܸ̈ܐ.  ܘܐܝܼܬ ܚܲܕ݇ܟܡܵܐ ܕܠܸܒܲܝܗܝ ܠܸܐ ܩܵܐܸܫ ܘܒܟܠ ܚܕܵܐ ܐܲܝܟܵܢܵܝܘܼܬܵܐ ܠܸܐ ܟܵܠܝܼ ܡܼܢ ܦܘܼܠܚܵܢܵܐ ܘܕܒܼܵܚܬܵܐ ܒܐܘܼܪܚܵܐ ܕܐܘܼܡܬܵܐ. ܐܲܢܸܐ ܦܲܖ̈ܨܘܿܦܸܐ ܐܵܢܝܼ ܝܢܵܐ ܕܐܝܼܬ ܠܗ݇ܘܿܢ ܗܲܝܡܵܢܘܼܬܵܐ ܠܩܝܵܡܬܵܐ ܕܐܵܬܘܿܪ، ܗܿܝ ܕܚܘܼܛܪܵܐ ܕܐܝܼܕܵܐ ܕܡܵܪܝܵܐ ܝܠܵܗܿ.                                  

   ܒܐܲܝܟܵܢܵܝܘܼܬܵܐ ܩܲܕ݇ܡܵܝܬܵܐ ܩܵܘܡܵܐ ܕܥܵܒܼܘܿܕܸ̈ܐ ܟܵܠܝܼ ܡܼܢ ܦܘܼܠܚܵܢܲܝܗܝ ܐܘܼܡܬܵܢܵܝܵܐ ܘܬܲܚܡܸܢܝܼ ܕܠܲܝܬ ܝܘܼܬܪܵܢܵܐ ܡܼܢ ܕܒܼܵܚܬܵܐ ܕܥܕܵܢܵܐ ܘܥܘܼܬܪܵܐ ܘܒܸܫ ܨܦܵܝܝܼ ܝܠܵܗܿ ܕܠܵܐ ܛܵܠܩܲܚ ܥܕܵܢܵܬܲܢ ܘܠܵܐ ܐܵܣܪܲܚ ܠܸܒܵܐ ܒܚܲܕ݇ ܣܲܒܼܪܵܐ ܒܲܛܝܼܠܵܐ.                                                                      ܐܝܼܢܵܐ ܟܲܕ ܠܸܐ ܡܵܨܸܐ ܒܲܪܢܵܫܵܐ ܕܚܵܝܸܐ ܕܠܵܐ ܣܲܒܼܪܵܐ ܒܐܵܗܵܐ ܒܪܝܼܬܵܐ ܘܟܲܕ ܦܲܖ̈ܨܘܿܦܸܐ ܥܵܒܼܘܿܕܸ̈ܐ ܙܸܐ ܠܸܐ ܡܵܨܝܼ ܕܟܵܠܝܼ ܡܼܢ ܥܵܒܼܘܿܕܘܼܬܵܐ ܒܐܘܼܪܚܵܐ ܕܦܘܼܪܩܵܢܵܐ ܕܐܘܼܡܬܲܝܗܝ ܘܟܲܕ ܕܘܼܢܝܸܐ ܠܸܐ ܝܠܵܗܿ ܟܠ ܥܕܵܢܵܐ ܒܚܕܵܐ ܐܲܝܟܵܢܵܝܘܼܬܵܐ ܘܩܵܘܡܵܐ ܕܒܕܲܥܬܝܼܕ ܒܵܖ̈ܝܼ ܩܲܘܲܡܝܵܬܸ̈ܐ ܛܵܒܼܸ̈ܐ ܘܠܝܘܼܬܪܵܢܵܐ ܕܥܲܡܲܢ ܘܐܘܼܡܬܲܢ ܥܲܠ ܗܵܕܵܐ ܠܸܐ ܡܵܨܲܚ ܟܵܠܲܚ ܘܡܲܬܒܼܲܚ ܐܝܼܕܵܐ ܠܐܝܼܕܵܐ ܘܠܵܐ ܦܵܠܚܲܚ ܩܵܐ ܫܘܼܘܫܵܛܵܐ ܘܡܲܢܬܵܝܬܵܐ ܕܐܘܼܡܬܲܢ.                                                              

   ܐܸܕܝܘܿܡ ܝܵܘܡܵܐ ܐܘܼܡܬܲܢ ܒܸܫ ܙܵܘܕܵܐ ܡܼܢ ܟܠ ܚܕܵܐ ܥܕܵܢܵܐ ܐ݇ܚܸܪ݇ܬܵܐ ܣܢܝܼܩܬܵܐ ܝܠܵܗܿ ܕܢܵܛܪܲܚ ܠܵܗܿ ܘܒܲܣܡܲܚ ܠܗ݇ܘܿܢ ܕܲܖ̈ܒܵܬܘܼܗܿ. ܚܘܼܦܵܛܸ̈ܐ ܕܒܢܲܝ̈ ܐܘܼܡܬܲܢ ܡܼܢ ܐܲܬܖ̈ܵܘܵܬܸܐ ܦܖ̈ܝܼܫܸܐ ܕܒܪܝܼܬܵܐ ܩܵܐ ܗܲܝܲܪܬܵܐ ܠܐܵܢܝܼ ܕܫܒܼܝܼܩܸ̈ܐ ܝܢܵܐ ܠܟܠܵܗܿ ܚܲܝܘܼܬܲܝܗܝ ܘܥܖ̈ܝܼܩܸܐ ܝܢܵܐ ܡܼܢ ܡܵܘܬܵܐ ܚܲܕ݇ ܛܘܼܦ̰ܣܵܐ ܝܠܸܗ ܡܼܢ ܦܘܼܠܚܵܢܵܐ ܐܘܼܡܬܵܢܵܝܵܐ. ܐܝܼܢܵܐ ܒܸܫ ܙܵܘܕܵܐ ܡܼܢ ܐܵܗܵܐ ܥܸܨܝܸ̈ܐ ܝܘܲܚ ܕܚܲܝܠܸܢܲܚ ܠܵܗܿ ܓܵܢܲܢ ܘܟ̰ܲܟܒܸܢܲܚ ܩܵܐ ܢܛܵܪܬܵܐ ܕܐܝܼܬܘܼܬܲܢ ܘܗܝܼܵܝܘܼܬܲܢ. ܘܗܲܪ ܗܵܕܟܼܵܐ ܡܲܩܘܲܚ ܠܗ݇ܘܿܢ ܐ݇ܣܘܼܖ̈ܲܢ ܥܲܡ ܒܢܲܝ̈ ܐܘܼܡܬܲܢ ܘܒܸܫ ܐܵܢܲܢܩܵܝܬܵܐ ܡܼܢ ܟܠܲܝܗܝ ܐܲܢܸܐ، ܢܵܛܪܲܚ ܠܸܗ ܠܸܫܵܢܲܢ ܝܸܡܵܝܵܐ. ܘܕܠܵܐ ܫܸܟ ܡܲܚܦܲܠܬܵܐ ܒܐܲܢܸܐ ܐܘܼܖ̈ܚܵܬܸܐ ܒܸܕ ܠܲܒܠܵܐ ܠܲܢ ܠܐܵܒܼܕܵܢܵܐ

.