ܚܝܠܐ ܕܨܠܘ̈ܬܐ

                        ܘܝܘܠܝܬ ܣܪܓܝܙܝ

   ܪܵܒܵܐ ܒܲܨܘܼܖܸ̈ܐ ܝܢܵܐ ܐ݇ܢܵܫܸ̈ܐ ܕܟܸܐ ܚܵܝܝܼ ܒܐܲܬܪܵܐ ܕܦܵܟܸܣܬܵܢ ܘܕܠܸܐ ܝܢܵܐ ܫܡܝܼܥܘܼܗܝ ܫܸܡܵܐ ܕܐܵܣܝܵܐ ܐܝܼܫܵܢ. ܗܿܘ ܚܲܕ݇ ܐܵܣܝܵܐ ܝܠܸܗ ܝܠܝܼܦܵܐ ܒܦܲܥܘܵܐ ܕܡܡܲܠܠܘܼܬ ܓܝܵܕܸ̈ܐ (ܢܘܼܪܘܿܠܘܿܓ̰ܝܼܵܐ) ܘܡܫܲܡܗܵܐ ܒܟܠܵܗܿ ܒܪܝܼܬܵܐ ܘܪܵܒܵܐ ܡܼܢ ܒܹܝܬ ܟܖ̈ܝܼܗܸܐ ܕܐܸܘܪܘܿܦܵܐ ܘܐܵܡܹܝܪܝܼܟܵܐ ܛܠܝܼܒܸ̈ܐ ܗ݇ܘܵܘ ܕܦܵܠܸܚ ܩܵܬܲܝܗܝ ܐܝܼܢܵܐ ܗܿܘ ܠܸܐ ܗ݇ܘܵܐ ܩܘܼܒܠܵܐ ܠܒܵܥܘܼܬܲܝܗܝ ܡܣܲܒܲܒ ܕܟܠܸܗ ܥܕܵܢܘܼܗܝ ܕܒܼܝܼܚܘܼܗܿ ܝܠܸܗ ܩܵܐ ܐܲܬܪܘܼܗܝ. ܒܘܼܬ ܐܵܗܵܐ ܖܸ̈ܫܵܢܸܐ ܕܘܲܙܝܼܪܘܼܬܵܐ ܕܚܘܼܠܡܵܢܵܐ ܡܘܼܪܝܸܙܸ̈ܐ ܗ݇ܘܵܘ ܕܣܵܝܡܝܼ ܚܕܵܐ ܡܸܫܬܘܼܬܵܐ ܓܵܘ ܡܕܝܼܢ݇ܬܵܐ ܕܐܸܣܠܵܡܐܵܒܵܕ ܥܲܠ ܐܝܼܩܵܪܘܼܗܝ.

   ܟܲܕ ܐܵܣܝܵܐ ܐܝܼܫܵܢ ܪܵܒܵܐ ܒܠܝܼܓܵܐ ܗ݇ܘܵܐ ܒܗܿܘ ܝܵܘܡܵܐ، ܬܪܸܝܢ ܣܵܥܵܬܸ̈ܐ ܡܼܢ ܩܲܕ݇ܡ ܫܲܪܲܝܬܵܐ ܕܚܘܼܪܙܵܐ ܡܛܸܐܠܸܗ ܠܒܸܝܬ ܛܵܘܣܵܐ ܘܝܬܸܒܼܠܸܗ ܓܵܘ ܛܵܝܘܿܣܬܵܐ ܕܦܪܵܚܵܐ ܗ݇ܘܵܐ ܠܓܸܒܵܐ ܕܐܸܣܠܵܡܐܵܒܵܕ

   ܠܸܐ ܗ݇ܘܵܘ ܥܒܼܝܼܖܸ̈ܐ ܙܵܘܕܵܐ ܡܼܢ ܟܡܵܐ ܕܲܩܝܼܩܸ̈ܐ ܡܼܢ ܦܪܵܚܬܵܐ ܕܛܵܝܘܿܣܬܵܐ ܕܡܙܲܡܢܵܢܸ̈ܐ ܡܘܼܚܒܸܖ̈ܗ݇ܘܿܢ ܕܒܥܸܠܬܵܐ ܕܒܝܼܫܘܼܬ ܗܵܘܵܐ ܘܚܲܝܠܵܢܘܼܬ ܡܸܛܪܵܐ ܘܟܠܵܝܬܵܐ ܕܚܕܵܐ ܡܼܢ ܡܵܛܘܿܖܸ̈ܐ ܕܛܵܝܘܿܣܬܵܐ ܥܸܨܝܸ̈ܐ ܝܢܵܐ ܕܨܵܠܝܼ ܓܵܘ ܚܕܵܐ ܡܕܝܼܢ݇ܬܵܐ ܐ݇ܚܸܪ݇ܬܵܐ. ܒܵܬ݇ܪ ܝܬܵܒܼܬܵܐ ܕܛܵܝܘܿܣܬܵܐ ܠܐܲܪܥܵܐ ܘܓܲܫܲܩܬܵܐ ܥܲܠ ܡܵܛܘܿܪܘܼܗܿ ܡܘܼܚܒܸܪܗ݇ܘܿܢ ܕܠܸܐ ܡܵܨܝܼ ܕܬܲܪܨܝܼ ܠܵܗܿ ܗܲܠ ܩܘܼܕܡܸܐ

   ܗܿܝܓܵܗ ܐܵܣܝܵܐ ܐܝܼܫܵܢ ܕܣܩܝܼܕܵܐ ܗ݇ܘܵܐ ܡܼܢ ܐܵܗܵܐ ܩܲܘܲܡܬܵܐ، ܪ݇ܚܸܫܠܸܗ ܠܟܸܣ ܡܕܲܒܪܵܢܵܐ ܕܒܹܝܬ ܛܵܘܣܵܐ ܘܐ݇ܡܸܪܵܗ ܩܵܬܘܼܗܝ "ܐܵܢܵܐ ܐܸܕܝܘܿܡ ܓܵܪܲܓ ܗܵܘܸܝܢ ܓܵܘ ܐܸܣܠܵܡܐܵܒܵܕ ܒܗܿܝ ܕܦܝܼܫܵܐ ܝܘܸܢ ܟ̰ܝܼܕܵܐ ܕܫܲܪܸܟܸܢ ܓܵܘ ܚܲܕ݇ ܚܘܼܪܙܵܐ ܐܵܢܲܢܩܵܝܵܐ". ܡܕܲܒܪܵܢܵܐ ܕܒܹܝܬ ܛܵܘܣܵܐ ܟܲܕ ܝܕܸܥܠܸܗ ܩܵܬܘܼܗܝ ܩܝܼܡܠܸܗ ܡܼܢ ܫܵܘܦܘܼܗܝ ܘܒܡܲܚܙܵܝܬܵܐ ܕܚܲܕ݇ ܐܝܼܩܵܪܵܐ ܓܘܼܪܵܐ ܐ݇ܡܸܪܸܗ "ܡܼܢ ܠܲܐܟܼܵܐ ܗܲܠ ܐܸܣܠܵܡܐܵܒܵܕ ܬܪܸܝܢ ܣܵܥܵܬܸ̈ܐ ܐܘܼܪܚܵܐ ܝܠܵܗܿ ܘܐܵܢܵܐ ܗܲܪ ܐܵܕܝܼܵܐ ܒܸܕ ܗܲܕܪܸܢ ܚܕܵܐ ܪܵܕܝܼܬܵܐ ܒܚܲܕ݇ ܛܲܪܝܵܢܵܐ ܪܵܒܵܐ ܪܸܫܵܝܵܐ ܕܡܲܡܛܸܐ ܠܘܼܟܼ ܬܵܡܵܐ"

   ܐܵܣܝܵܐ ܐܝܼܫܵܢ ܛܥܸܢܸܗ ܡܸܢܬܵܐ ܡܼܢ ܡܕܲܒܪܵܢܵܐ ܘܝܬܸܒܼܠܸܗ ܓܵܘ ܪܵܕܝܼܬܵܐ ܘܪܚܸܫܠܸܗ ܠܓܸܒܵܐ ܕܐܸܣܠܵܡܐܵܒܵܕ. ܠܸܐ ܗ݇ܘܵܘ ܖ̈݇ܚܝܼܫܸܐ ܒܘܼܫ ܙܵܘܕܵܐ ܡܼܢ ܚܕܵܐ ܣܵܥܲܬ ܕܪܵܕܝܼܬܵܐ ܟ̰ܡܸܗܠܵܗܿ ܘܟܠܸܐ ܠܵܗܿ ܡܼܢ ܪܕܵܝܵܐ ܘܐܵܦܸܢ ܕܛܲܪܝܵܢܵܐ ܪܵܒܵܐ ܒܚܝܼܪܵܐ ܗ݇ܘܵܐ ܒܫܘܼܓܼ݇ܠܸܗ ܐܝܼܢܵܐ ܟܡܵܐ ܕܚܘܼܦܸܛܠܸܗ ܠܵܐ ܡܨܸܐ ܠܸܗ ܕܬܲܪܸܨܠܵܗܿ. ܗܿܝܓܵܗ ܒܕܘܼܡܵܪܵܐ ܐ݇ܡܸܪܸܗ ܩܵܐ ܐܵܣܝܵܐ ܐܝܼܫܵܢ "ܐܵܢܵܐ ܦܝܼܫܵܐ ܝܘܸܢ ܒܥܘܼܓ̰ܵܒܵܐ ܕܐܵܗܵܐ ܡܘܼܕ ܩܲܘܲܡܬܵܐ ܝܠܵܗܿ ܒܗܿܝ ܕܐܵܗܵܐ ܪܵܕܝܼܬܵܐ ܟ̰ܸܡ ܚܲܕ݇ܬܬܵܐ ܝܠܵܗܿ ܘܠܸܐ ܝܘܸܢ ܒܝܼܕܵܥܵܐ ܕܩܵܐ ܡܘܼܕܝܼ ܚܪܸܒܼܠܵܗܿ"

  ܒܗܿܝ ܥܕܵܢܵܐ ܪܵܒܵܐ ܣܩܸܕܠܸܗ ܐܵܣܝܵܐ ܐܝܼܫܵܢ ܘܟܲܕ ܛܲܪܝܵܢܵܐ ܚܙܸܐܠܸܗ ܕܣܩܝܼܕܵܐ ܝܠܸܗ، ܐ݇ܡܸܪܸܗ ܩܵܬܘܼܗܝ "ܡܼܢ ܠܐܲܟܼܵܐ ܗܲܠ ܐܸܣܠܵܡܐܵܒܵܕ ܐܝܼܬ ܦܝܵܫܵܐ ܚܕܵܐ ܣܵܥܲܬ ܘܐܲܢ݇ܬ ܡܵܨܸܝܬ ܐܵܙܸܠ݇ܬ ܠܵܗܿ ܐܘܼܪܚܵܐ ܒܐܲܩܠܘܼܟܼ"

   ܐܵܣܝܵܐ ܐܝܼܫܵܢ ܦܝܼܫܠܸܗ ܥܸܨܝܵܐ ܕܩܲܒܸܠܵܗܿ ܡܲܚܫܲܚܬܵܐ ܕܛܲܪܝܵܢܵܐ ܘܫܘܼܪܸܐܠܸܗ ܒܸܐܙܵܠܵܐ ܒܐܘܼܪܚܵܐ. ܟܲܕ ܐܘܼܪܚܵܐ ܥܒܼܵܪܵܐ ܗ݇ܘܵܐ ܡܼܢ ܓܵܘ ܕܸܫܬܵܐ ܘܗܵܘܵܐ ܙܸܐ ܫܘܼܪܝܵܐ ܗ݇ܘܵܐ ܚܲܫܟܘܼܢܸܐ ܛܘܼܠܩܵܐ ܠܸܗ ܐܘܼܪܚܵܐ. ܒܵܬ݇ܪ ܚܲܕ݇ ܡܸܬܚܵܐ ܕܒܸܓ̰ܘܵܓ̰ܵܐ ܗ݇ܘܵܐ ܓܵܘ ܚܸܫܟܵܐ، ܚܙܸܐܠܸܗ ܠܚܲܕ݇ ܒܲܗܪܵܐ. ܪ݇ܚܸܫܠܸܗ ܠܓܸܒܵܐ ܕܒܲܗܪܵܐ ܘܚܙܸܐܠܸܗ ܚܲܕ݇ ܒܲܝܬܵܐ ܡܐܲܝܟܼ ܚܕܵܐ ܟܘܼܠܘܼܚܬܵܐ 

   ܩܘܼܪܒܸܢܸܗ ܘܬܘܼܩܬܸܩܠܸܗ ܠܬܲܪܥܵܐ ܘܫܡܸܥܠܸܗ ܠܚܲܕ݇ ܩܵܠܵܐ ܕܐ݇ܡܵܪܵܐ ܗ݇ܘܵܐ "ܦܲܩܸܕ ܓܵܘܵܝ". ܐܝܼܡܲܢ ܕܥܒܼܸܪܸܗ ܐܵܣܝܵܐ ܐܝܼܫܵܢ ܓܵܘ ܒܲܝܬܵܐ ܚܙܸܐܠܸܗ ܚܕܵܐ ܒܲܟܼܬܵܐ ܣܵܒܼܬܵܐ ܬܵܡܵܐ. ܕܪܸܐܠܸܗ ܫܠܵܡܵܐ ܥܲܠܘܼܗܿ ܘܐ݇ܡܸܪܸܗ "ܐܵܢܵܐ ܛܘܼܠܩܘܼܗܿ ܝܘܸܢ ܐܘܼܪܚܝܼ ܘܒܵܥܝܸܢ ܐܵܙܸܠ݇ܢ ܠܐܸܣܠܵܡܐܵܒܵܕ ܐܝܼܢܵܐ ܠܸܐ ܝܘܸܢ ܒܝܼܕܵܥܵܐ ܕܵܐܟܼܝܼ ܐܵܙܸܠ݇ܢ". 

   ܒܲܟܼܬܵܐ ܓ̰ܘܼܘܸܒܠܵܗܿ "ܐܲܢ݇ܬ ܠܸܐ ܡܵܨܸܝܬ ܐܵܙܸܠ݇ܬ ܠܵܗܿ ܐܵܗܵܐ ܐܘܼܪܚܵܐ ܒܐܲܩܠܘܼܟܼ. ܐܝܼܢܵܐ ܐܸܢ ܚܕܵܐ ܣܵܥܲܬ ܚܵܡܠܸܬ ܒܸܕ ܡܵܛܸܐ ܚܲܕ݇ ܡܼܢ ܒܢܲܝ̈ ܡܵܬܵܐ ܕܒܸܕ ܡܲܝܬ݇ܝܸܐ ܕܲܪܡܵܢܵܐ ܩܵܐ ܢܲܘܸܓܝܼ ܘܐܵܢܵܐ ܒܸܕ ܛܵܠܒܵܢ ܡܸܢܸܗ ܕܡܲܡܛܸܐܠܘܼܟܼ ܠܐܸܣܠܵܡܐܵܒܵܕ ܒܝܲܕ ܡܙܝܼܓܼܠܘܼܗܝ (ܡܘܿܬܘܿܪ ܣܝܼܟܠܵܝܬܘܼܗܝ). ܐܵܕܝܼܵܐ ܟܼܘܿܠ ܠܲܚܡܵܐ ܘܫܬܝܼ ܟ̰ܵܐܝ ܩܲܕ ܫܲܪܫܵܝܬܵܐ ܦܵܠܛܵܐ ܡܼܢ ܦܲܓܼܪܘܿܟܼ".                           

   ܣܵܒܼܬܵܐ ܟܲܕ ܐ݇ܡܝܼܪܲܝܗܝ ܠܵܗܿ ܐܲܢܸܐ ܚܲܒܖ̈ܵܢܸܐ ܡܘܼܪܸܡܠܵܗܿ ܪܸܫܘܼܗܿ ܘܓܘܼܫܸܩܠܵܗܿ ܥܲܠ ܫܡܲܝܵܐ ܘܐ݇ܡܸܪܵܗܿ "ܐܲܠܵܗܝܼ ܡܸܢܬܵܐ ܝܠܵܗܿ ܡܸܢܘܼܟܼ ܒܗܿܝ ܕܠܵܐ ܫܒܼܸܩܠܘܼܟܼ ܐܵܕܠܲܝܠܸܐ ܙܸܐ ܒܲܝܬܝܼ ܦܵܐܸܫ ܕܠܵܐ ܐܲܖ̈ܚܸܐ"

   ܐܵܣܝܵܐ ܐܝܼܫܵܢ ܟܲܕ ܫܘܼܪܝܵܐ ܗ݇ܘܵܐ ܐ݇ܟܼܵܠܵܐ ܠܲܚܡܵܐ، ܥܲܝܢܘܼܗܝ ܩܝܼܬܠܵܗܿ ܥܲܠ ܩܘܼܢܓ̰ܝܼܬܵܐ ܕܒܲܝܬܵܐ ܘܚܙܸܐܠܸܗ ܕܚܲܕ݇ ܝܲܠܵܕ݇ܐ ܙܥܘܿܪܵܐ ܕܡܝܼܟܼܵܐ ܝܠܸܗ ܬܵܡܵܐ. ܗܿܝܓܵܗ ܐ݇ܡܸܪܸܗ ܩܵܐ ܒܲܟܼܬܵܐ "ܒܐܵܗܵܐ ܠܸܒܵܐ ܓܘܼܪܵܐ ܕܐܝܼܬ ܠܵܟܼܝ ܐܲܢ݇ܬܝ ܓܵܪܲܓ ܪܵܒܵܐ ܡܗܘܼܡܸܢܬܵܐ ܗܵܘܝܲܬܝ ܒܲܣ ܩܵܬܝܼ ܙܸܐ ܨܲܠܝܼ ܨܠܘܼܬܵܐ"

   ܣܲܒܼܬܵܐ ܫܘܼܪܸܐܠܵܗܿ ܒܟܼܵܝܵܐ ܘܐ݇ܡܸܪܵܗܿ "ܬܪܘܼܨܵܐ ܝܘܸܬ ܒܸܐܡܵܪܵܐ ܒܪܘܿܢܝܼ. ܟܠܲܝܗܝ ܨܠܵܘܵܬܝܼ ܒܘܼܬ ܐ݇ܢܵܫܸ̈ܐ ܩܲܕ݇ܡ ܐܲܠܵܗܵܐ ܟܸܐ ܩܲܒܠܝܼ ܐܝܼܢܵܐ ܠܸܐ ܝܘܵܢ ܒܝܼܕܵܥܵܐ ܡܘܼܕ ܚܛܝܼܬܵܐ ܥܒܼܝܼܕܬܵܐ ܝܘܵܢ ܩܲܕ ܐܲܠܵܗܵܐ ܠܸܐ ܝܠܸܗ ܒܸܫܡܵܥܘܼܗܝ ܩܵܠܝܼ ܒܘܼܬ ܢܲܘܸܓܝܼ". ܘܡܘܼܙܝܸܕܠܵܗܿ "ܗܲܕܵܡܸ̈ܐ ܕܛܵܠܸܒܵܢ ܩܛܝܼܠܸ̈ܐ ܝܢܵܐ ܩܵܐ ܟܲܠܬܝܼ ܘܒܪܘܿܢܝܼ ܘܐܲܚܟ̰ܝܼ ܐܵܗܵܐ ܢܲܘܸܓܝܼ ܦܝܼܫܵܐ ܝܠܸܗ ܩܵܬܝܼ ܐܝܼܢܵܐ ܐܲܢܸܐ ܬܪܸܝܢ ܝܲܖ̈ܚܸܐ ܝܠܵܗܿ ܕܓܵܘ ܡܘܼܚܘܼܗܝ ܦܠܝܼܛܵܐ ܝܠܸܗ ܚܕܵܐ ܡܘܼܫܪܵܐ. ܠܘܼܒܸܠܬܘܼܗܝ ܝܘܵܢ ܟܸܣ ܟܡܵܐ ܐܵܣܝܸ̈ܐ ܠܲܐܟܼܵܐ ܐܝܼܢܵܐ ܟܠܲܝܗܝ ܐ݇ܡܝܼܖܸ̈ܐ ܝܢܵܐ ܕܐܲܚܟ̰ܝܼ ܐܵܣܝܵܐ ܐܝܼܫܵܢ ܟܸܐ ܡܵܨܸܐ ܕܒܲܣܸܡ ܠܸܗ ܘܐܵܢܵܐ ܟܠܝܘܿܡ ܨܲܠܘܼܝܸܐ ܝܘܵܢ ܨܠܘܿܬܵܐ ܕܐܲܠܵܗܵܐ ܡܲܬܦܸܩܠܝܼ ܒܐܵܣܝܵܐ ܐܝܼܫܵܢ"

   ܒܫܡܵܥܬܵܐ ܕܐܲܢܸܐ ܗܸܡܸܙܡܵܢܸ̈ܐ ܐܵܣܝܵܐ ܐܝܼܫܵܢ ܫܘܼܪܸܐܠܸܗ ܒܟܼܵܝܵܐ ܘܗܿܝܓܵܗ ܥܒܼܸܪܸܗ ܒܬܲܚܡܲܢܬܵܐ ܒܗܿܝ ܕܪܵܒܵܐ ܓ̰ܘܼܢܓ̰ܸܪܵܐ ܗ݇ܘܵܐ ܗܿܘ ܝܵܘܡܵܐ ܘܟܠܲܝܗܝ ܐܵܢܝܼ ܩܲܘܲܡܝܵܬܸܐ ܕܩܘܼܘܸܡܸ̈ܐ ܗ݇ܘܵܘ ܐ݇ܬܸܐܠܗ݇ܘܿܢ ܩܲܕ݇ܡ ܥܲܝܢܘܼܗ̈ܝ. ܘܟܲܕ ܒܟܼܵܝܵܐ ܗ݇ܘܵܐ ܐ݇ܡܸܪܸܗ ܩܵܐ ܒܲܟܼܬܵܐ ܣܵܒܼܬܵܐ "ܗܲܡܸܢ ܕܐܲܠܵܗܵܐ ܩܵܠܵܟܼܝ ܫܡܝܼܥܘܼܗܝ ܝܠܸܗ". ܗܿܝܓܵܗ ܥܲܝܢܘܼܗ̈ܝ ܥܟ̰ܝܼܡܲܝܗܝ ܠܸܗ ܘܬܘܼܚܡܸܢܠܸܗ ܕܵܐܟܼܝܼ ܡܵܨܸܐ ܒܲܣܸܡ ܠܗܿܘ ܝܲܠܵܕ݇ܐ ܘܡܼܢ ܢܵܓܸܣܬܵܢ ܫܡܸܥܠܸܗ ܩܵܠܵܐ ܕܚܕܵܐ ܪܵܕܝܼܬܵܐ ܘܒܵܬ݇ܪ ܟܡܵܐ ܖ̈ܦܵܦܸܐ ܥܒܼܸܪܸܗ ܛܲܪܝܵܢܵܐ ܕܗܿܝ ܪܵܕܝܼܬܵܐ ܕܚܪܝܼܒܼܬܵܐ ܗ݇ܘܵܐ ܒܐܘܼܪܚܵܐ ܡܼܢ ܬܲܪܥܵܐ

   ܗܿܝܓܵܗ ܫܩܸܠܸܗ ܠܣܵܒܼܬܵܐ ܘܠܢܲܘܸܓܘܼܗܿ ܘܪ݇ܚܸܫܠܗ݇ܘܿܢ ܠܓܸܒܵܐ ܕܐܸܣܠܵܡܐܵܒܵܕ. ܒܐܘܼܪܚܵܐ ܛܲܪܝܵܢܵܐ ܒܘܼܩܸܪܸܗ ܡܼܢ ܐܵܣܝܵܐ ܐܝܼܫܵܢ "ܡܝܲܩܪܵܐ ܐܵܣܝܵܐ ܗܲܡܘܼܢܸܐ ܝܘܸܬ ܕܪܵܕܝܼܬܵܐ ܬܪܸܨܠܵܗܿ؟" ܘܐܵܣܝܵܐ ܐܝܼܫܵܢ ܐ݇ܡܸܪܸܗ "ܗܸܐ ܗܲܡܘܼܢܸܐ ܝܘܸܢ. ܐܝܼܢܵܐ ܐܲܢ݇ܬ ܠܸܐ ܗܲܡܸܢܸܬ ܩܵܐ ܡܘܼܕܝܼ ܪܵܕܝܼܬܵܐ ܚܪܸܒܼܠܵܗܿ!" ܗܿܝܓܵܗ ܗܘܼܩܸܐܠܸܗ ܒܘܼܬ ܣܵܒܼܬܵܐ ܘܢܵܘܸܓܘܼܗܿ.                                                      

   ܗܵܕܟܼܵܐ ܐܵܣܝܵܐ ܐܝܼܫܵܢ ܠܵܐ ܡܛܸܐܠܸܗ ܠܡܸܫܬܘܼܬܵܐ ܕܡܘܼܪܝܸܙܘܼܗܿ ܗ݇ܘܵܐ ܩܵܬܘܼܗܝ ܐܝܼܢܵܐ ܦܘܼܪܸܩܠܸܗ ܠܢܲܘܸܓܵܐ ܕܗܿܝ ܒܲܟܼܬܵܐ ܣܲܒܼܬܵܐ ܕܨܠܘܿܬܘܼܗܿ ܩܒܝܼܠܬܵܐ ܗ݇ܘܵܐ ܟܸܣ ܐܲܠܵܗܵܐ.                                                  

ܫܩܝܠܬܐ ܘܦܘܫܩܬܐ ܡܼܢ ܐܢܬܝܪܢܝܬ

ܡܠܦܢܘܬܐ ܕܠܫܢܐ ܝܡܝܐ

ܒܫܘܬܦܘܬܐ ܕܢܫ̈ܐ ܐܬܘܖ̈ܝܐ ܕܫܡܝܪܡ

-----------------------------------   

 

ܡܲܠܲܦܬܵܐ ܘܡܲܪܘܲܚܬܵܐ ܕܠܸܫܵܢܵܐ ܝܸܡܵܝܵܐ ܟܠ ܥܕܵܢܵܐ ܗ݇ܘܝܼܬܵܐ ܝܠܵܗܿ ܚܲܕ݇ ܢܝܼܫܵܐ ܐܵܢܲܢܩܵܝܵܐ ܠܟܸܣ ܫܵܘܬܵܦܘܼܬܵܐ ܕܢܸܫܸ̈ܐ ܐܵܬܘܼܖ̈ܵܝܸܐ ܕܫܲܡܝܼܪܲܡ ܗܲܪ ܐܲܝܟܼ ܕܦܝܼܫܬܵܐ ܝܠܵܗܿ ܡܘܼܢܗܸܪܬܵܐ ܒܩܵܢܘܿܢܘܼܗܿ ܫܲܬܐܸܣܵܝܵܐ. ܥܲܠ ܗܵܕܵܐ ܒܡܸܬܚܵܐ ܕܬܡܲܢܝܵܐ ܫܸܢܸ̈ܐ ܕܥܒܼܝܼܖܸ̈ܐ ܝܢܵܐ ܡܼܢ ܦܘܼܠܚܵܢܘܼܗܿ ܐܘܼܡܬܵܢܵܝܵܐ ܘܣܸܦܪܵܝܵܐ، ܚܘܼܦܵܛܘܼܗܿ ܚܲܝܠܵܢܵܐ ܗ݇ܘܝܼܵܐ ܝܠܸܗ ܡܲܓܡܲܪܬܵܐ ܕܐܵܗܵܐ ܘܵܠܝܼܬܘܼܗܿ ܩܲܕܝܼܫܬܵܐ ܘܫܩܝܼܠܬܵܐ ܝܠܵܗܿ ܦܵܣܘܿܥܝܵܬܸ̈ܐ ܣܲܓܝܼܐܸ̈ܐ ܒܐܵܗܵܐ ܚܲܩܠܵܐ

   ܗܵܐ ܡܼܢ ܫܘܼܪܵܝܵܐ ܕܦܘܼܠܚܵܢܵܐ ܕܫܵܘܬܵܦܘܼܬܵܐ ܦܝܼܫܸ̈ܐ ܝܢܵܐ ܡܘܼܪܝܸܙܸܐ ܣܸܕܖܸ̈ܐ ܩܵܐ ܡܲܠܲܦܬܵܐ ܕܠܸܫܵܢܵܐ ܝܸܡܵܝܵܐ ܒܬܠܵܬܵܐ ܖ̈ܲܗܛܸܐ ܗ.ܕ. ܫܲܪܒܼܵܝܵܐ، ܡܸܨܥܵܝܵܐ ܘܥܸܠܵܝܵܐ ܕܟܬܝܼܖܸ̈ܐ ܝܢܵܐ ܐܲܡܝܼܢܵܐܝܼܬ ܕܠܵܐ ܡܲܪܩܲܠܬܵܐ ܘܫܠܵܝܬܵܐ. ܣܸܕܖܸ̈ܐ ܡܘܼܕܟܼܖܸ̈ܐ ܗ݇ܘܝܼܸܐ ܝܢܵܐ ܬܚܘܿܬ ܬܲܓܒܪܵܢܘܼܬܵܐ ܕܡܲܠܦܵܢܸ̈ܐ ܝܠܝܼܦܸ̈ܐ ܘܡܗܝܼܖܸ̈ܐ ܐܵܢܝܼ ܕܒܟܲܫܝܼܪܘܼܬܵܐ ܕܒܼܝܼܚܲܝܗܝ ܝܢܵܐ ܥܕܵܢܵܬܲܝܗܝ ܩܵܐ ܡܲܠܲܦܬܵܐ ܕܠܸܫܵܢܵܐ ܐܵܬܘܿܪܵܝܵܐ ܘܗܲܪ ܒܗܿܝ ܥܕܵܢܵܐ ܠܸܫܵܢܵܐ ܐܸܢܓܠܝܼܙܵܝܵܐ ܩܵܐ ܟܠ ܚܲܕ݇ ܕܗܵܘܸܐܠܸܗ ܚܘܼܒܵܐ ܕܠܸܫܵܢܵܐ ܝܸܡܵܝܵܐ

   ܣܸܕܖܸ̈ܐ ܥܗܝܼܕܸ̈ܐ ܦܝܼܫܸ̈ܐ ܝܢܵܐ ܡܘܼܪܚܸܛܸܐ ܩܵܐ ܟܠ ܚܲܕ݇ ܡܸܢܝܵܢܵܐ ـ ܐܵܦ ܐܸܢ ܚܲܕ݇ ܦܲܪܨܘܿܦܵܐ ـ ܕܛܵܠܒܝܼ ܠܝܘܼܠܦܵܢܵܐ ܘܒܟܠ ܚܲܕ݇ ܕܘܼܟܵܐ ܕܡܸܬܗܵܘܝܵܢܬܵܐ ܗ݇ܘܝܼܬܵܐ ܝܠܵܗܿ. ܒܐܵܗܵܐ ܪܲܗܛܵܐ ܐܝܼܬ ܠܲܢ ܩܘܼܒܲܠܛܲܝܒܘܼܬܵܐ ܡܼܢ ܡܥܲܠܝܘܼܬܸܗ ܡܵܪܝ ܢܲܪܣܲܝ ܒܸܢܝܵܡܝܼܢ ܐܵܦܸܣܩܘܿܦܵܐ ܕܥܸܕܬܵܐ ܕܡܲܕܢܚܵܐ ܘܣܝܼܥܬܵܐ ܕܥܸܕܬܵܐ ܕܟܠ ܥܕܵܢܵܐ ܣܢܝܼܕܸܐ ܝܢܵܐ ܩܵܬܲܢ ܒܐܘܼܪܚܵܐ ܕܗܲܕܲܪܬܵܐ ܕܕܘܼܟܬܵܐ ܕܣܸܕܖܸ̈ܐ. ܘܟܲܕ ܗ݇ܘܝܼܸܐ ܝܢܵܐ ܥܕܵܢܵܬܸ̈ܐ ܕܠܸܐ ܝܘܲܚ ܡܸܨܝܸ̈ܐ  ܕܗܲܕܪܲܚ ܚܕܵܐ ܕܘܼܟܬܵܐ، ܡܸܨܝܸܐ ܝܘܲܚ ܕܡܲܪܚܸܛܲܚ ܠܗ݇ܘܿܢ ܣܸܕܖܸ̈ܐ ܓܵܘ ܒܵܬܸ̈ܐ ܕܚܲܕ݇ܟܡܵܐ ܝܵܠܘܿܦܲܢ ܡܘܼܚܸܒܸ̈ܐ ܡܐܲܝܟܼ ܡܝܲܩܲܪܬܵܐ ܚܲܢܘܿ ܣܲܪܗܲܕ ܟ̰ܲܡܲܟܝܼ ܘܡܝܲܩܲܪܬܵܐ ܫ̃ܵܟܠܝܼܢ ܐܸܠܝܵܣܝܼ. ܗܵܕܟܼܵܐ ܒܸܛܥܵܢܵܐ ܝܘܲܚ ܡܸܢܬܵܐ ܡܸܢܲܝܗܝ، ܡܼܢ ܒܲܪ ܙܵܘܓܲܝܗܝ ܘܡܼܢ ܚܘܼܒܲܝܗܝ ܠܟܸܣ ܫܵܬܵܦܘܼܬܲܢ.

   ܒܡܸܬܚܵܐ ܕܬܡܵܢܝܵܐ ܫܸܢܸ̈ܐ ܕܲܥܒܼܲܪ ܡܲܠܦܵܢܸ̈ܐ ܘܡܲܠܦܵܢܝܵܬܸ̈ܐ ܝܲܠܝܼܦܸ̈ܐ ܘܡܗܝܼܖܸ̈ܐ ܡܘܼܚܕܸܪܸܐ ܝܢܵܐ ܠܣܸܕܖܸ̈ܐ ܕܠܸܫܵܢܵܐ ܝܸܡܵܝܵܐ ܘܡܸܢܲܝܗܝ ܝܢܵܐ: ܪܵܒܝܼ ܫܸܡܥܘܿܢ ܒܹܝܬ ܐܝܼܫܘܿ، ܡܲܕܠܹܝܢ ܣܛܹܝܦܵܢܣ ـ ܫܲܡܝܼܪܵܡ ܕܵܘܝܼܕܦܘܼܪܝܵܐܢ ܘܡܘܿܢܵܐ ܫܸܪܡܵܐ (ܡܲܠܦܵܢܬܵܐ ܕܠܸܫܵܢܵܐ ܐܸܢܓܠܝܼܙܵܝܵܐ.)

   ܒܚܘܼܬܵܡܵܐ ܕܒܹܝܬ ܢܝܼܣܵܢܸܐ ܗܲܕܵܡܸ̈ܐ ܕܣܸܕܪܵܐ ܫܬܝܼܬܵܝܵܐ ܕܠܸܫܵܢܵܐ ܝܸܡܵܝܵܐ ܕܒܸܚܒܼܵܫܵܐ ܝܢܵܐ ܡܼܢ ܘܝܘܿܠܹܝܬ ܣܲܪܓܝܼܙܝܼ، ܡܲܕܠܸܝܢ ܣܛܹܝܦܵܢܣ، ܫܲܡܝܼܪܵܡ ܐܵܬܵܢܘܼܣ، ܚܲܢܘܿ ܣܲܪܗܵܕ ܟ̰ܲܡܲܟܝܼ، ܪܘܿܡܝܼܢܵܐ ܕܵܘܝܼܕܦܘܼܪܝܵܐܢ، ܒܪܵܙܹܝܠܵܐ ܩܵܫܵܐ ܘܒܠܵܢܕܝܼܢܵܐ ܒܵܒܵܓ̰ܵܢܝܼ ܡܘܼܢܬܸܐ ܠܗ݇ܘܿܢ ܠܦܲܪܲܩܬܵܐ ܕܣܸܕܪܲܝܗܝ ܘܒܕܘܼܪܵܐ ܕܲܥܬܝܼܕ ܒܸܕ ܫܲܪܝܼ ܠܪܲܗܛܵܐ ܥܸܠܵܝܵܐ

   ܚܲܕ݇ ܡܼܢ ܦܠܵܛܸ̈ܐ ܡܵܘܬܖ̈ܵܢܸܐ ܕܐܲܢܸܐ ܣܸܕܖܸ̈ܐ ܐܵܗܵܐ ܝܠܸܗ ܕܝܵܠܘܿܦܸ̈ܐ ܫܘܼܖ̈ܝܸܐ ܝܢܵܐ ܠܸܟܬܵܒܼܵܐ ܡܲܬܠܸ̈ܐ ܘܗܲܩܝܵܬܸ̈ܐ ܒܠܸܫܵܢܵܐ ܐܵܬܘܼܪܵܝܵܐ ܘܐܵܗܵܐ ܚܲܕ݇ ܪܘܼܫܡܵܐ ܝܠܸܗ ܕܡܲܢܬܲܝܬܵܐ ܒܡܲܠܲܦܬܵܐ ܕܠܸܫܵܢܵܐ ܗܵܕܟܼܵܐ ܕܝܵܠܘܿܦܸ̈ܐ ܗܵܘܝܼ ܡܸܬܡܵܨܝܵܢܸ̈ܐ ܠܵܐ ܐܲܚܟ̰ܝܼ ܒܩܪܵܝܬܵܐ ܕܟܬܵܒܼܸ̈ܐ ܐܝܼܢܵܐ ܐܵܦ ܡܵܨܝܼ ܟܵܬܒܼܝܼ ܡܲܬܠܸ̈ܐ ܘܣܝܵܡܸ̈ܐ ܡܫܲܚܠܦܸ̈ܐ ܒܠܸܫܵܢܵܐ ܝܸܡܵܝܵܐ. ܒܣܲܒܼܪܵܐ ܝܘܲܚ ܕܟܠ ܚܲܕ݇ ܡܼܢ ܐܲܢܸ̈ܐ ܝܵܠܘܿܦܸ̈ܐ ܡܵܨܝܼ ܡܲܠܦܝܼ ܠܟܡܵܐ ܦܲܖ̈ܨܘܿܦܸܐ ܐ݇ܚܸܖ̈݇ܢܸܐ ܘܗܵܕܟܼܵܐ ܒܸܕ ܡܵܛܲܚ ܠܢܝܼܫܲܢ ܫܸܪܫܵܝܵܐ ܠܦܘܼܬ ܡܲܠܲܦܬܵܐ ܘܡܲܪܘܲܚܬܵܐ ܕܠܸܫܵܢܵܐ 

ܟܬܒܼܐ ܚܕ݇ܬܐ

ܫܡܝܪܡ ܕ.ܦܘܪܝܐܢ

   ܒܐܵܗܵܐ ܩܲܝܛܵܐ ܫܵܘܬܵܦܘܼܬܵܐ ܕܢܸܫܸ̈ܐ ܐܵܬܘܼܖ̈ܵܝܸܐ ܕܫܲܡܝܼܪܵܡ ܦܪܸܣܠܵܗܿ ܠܚܲܕ݇ ܟܬܵܒܼܘܿܢܵܐ ܒܫܸܡܵܐ ܕܙܡܝܼܖ̈ܝܵܬܸܐ ܕܓ̰ܵܐܢ ܓܘܼܠܘܼܡ ܒܠܸܫܵܢܵܐ ܐܵܬܘܼܪܵܝܵܐ. ܒܥܘܼܬܵܕܵܐ ܕܟܬܵܒܼܵܐ ܪܫܝܼܡܬܵܐ ܝܠܵܗܿ ܚܕܵܐ ܬܲܫܥܝܼܬܵܐ ܩܦܝܼܣܬܵܐ ܒܘܼܬ ܛܲܟܼܣܵܐ ܥܲܬܝܼܩܵܐ ܕܓ̰ܵܐܢ ܓܘܼܠܘܼܡ، ܐܲܝܢܝܼ ܕܐܲܒܼܵܗܵܬܲܢ ܟܸܐ ܫܵܩܠܝܼ ܗ݇ܘܵܘ ܒܘܼܣܵܡܵܐ ܡܸܢܸܗ ܒܝܵܘܡܵܢܸ̈ܐ ܕܒܸܝܬ ܢܝܼܣܵܢܸ̈ܐ. ܟܬܵܒܼܵܐ ܒܸܚܒܼܵܫܵܐ ܝܠܸܗ ܡܼܢ ܚܲܡܫܝܼܢ ܘܬܪܸܝܢ ܙܡܝܼܖ̈ܝܵܬܸܐ، ܕܚܲܡܫܝܼܢ ܡܸܢܲܝܗܝ ܦܝܼܫܸ̈ܐ ܝܢܵܐ ܡܘܼܠܚܸܡܸ̈ܐ ܒܝܲܕ ܕܵܟܬܸܪ ܫܲܡܝܼܪܵܡ ܕܵܘܝܼܕܦܘܼܪܝܵܐܢ ܘܬܪܸܝܢ ܥܘܼܢܝܵܬܸ̈ܐ ܙܸܐ ܡܘܼܕܟܼܸܖܸ̈ܐ ܝܢܵܐ ܒܝܲܕ ܡܢܵܚܬܵܐ ܪܲܒܩܵܐ ܓܘܼܠܙܵܪܝܼ. ܢܝܼܫܵܐ ܡܼܢ ܒܲܨܡܲܢܬܵܐ ܕܟܬܵܒܼܵܐ ܢܛܵܪܬܵܐ ܕܛܲܟܼܣܸ̈ܐ ܬܲܫܥܝܼܬܵܢܵܝܸ̈ܐ ܘܗܲܪ ܒܗܿܝ ܥܕܵܢܵܐ ܡܲܪܘܲܚܬܵܐ ܕܠܸܫܵܢܵܐ ܝܸܡܵܝܵܐ ܝܠܸܗ. ܒܣܲܒܼܪܵܐ ܝܘܲܚ ܕܗܵܘܸܐ ܡܵܘܬܪܵܢܵܐ ܩܵܐ ܟܠܲܝܗܝ ܐܵܢܝܼ ܕܐܝܼܬ ܠܗ݇ܘܿܢ ܚܘܼܒܵܐ ܕܠܸܫܵܢܵܐ ܐܵܬܘܼܪܵܝܵܐ ܘܦܵܐܸܫ ܡܘܼܦܠܸܚܵܐ ܒܝܵܘܡܵܢܸ̈ܐ ܕܟܵܠܘܼ ܣܘܼܠܵܩܵܐ ܒܝܲܕ ܥܠܲܝܡܲܢ ܘܥܠܲܝܡܵܬܲܢ

ܙܡܝܖ̈ܝܬܐ ܕ ܓ̰ܐܢ ܓܘܠܘܡ

   

ܒܝܕ

ܫܡܝܪܡ ܕܘܝܕܦܘܪܝܐܢ