ܡܢܝ ܝܠܗ ܡܫܬܐܠܢܐ

              ܕܟܬܪ ܡܕܠܝܢ ܕܒܝܣ

   ܒܐܵܗܵܐ ܙܲܒܼܢܵܐ ܚܲܕ݇ ܒܘܼܠܒܵܠܵܐ ܡܥܲܓ̰ܒܵܢܵܐ ܘܡܲܚܪܸܒܼܵܢܵܐ ܢܦܝܼܠܵܐ ܝܠܸܗ ܒܐܘܼܡܬܲܢ؛ ܘܐܲܝܟܼ ܕܡܲܒܝܘܼܢܸܐ ܝܠܵܗܿ ܠܲܝܬ ܐܵܦܠܵܐ ܚܲܕ݇ ܐ݇ܢܵܫܵܐ ܕܡܵܨܸܐ ܫܵܩܸܠ ܠܦܵܨܘܿܥܝܵܬܸ̈ܐ ܡܵܘܬܖ̈ܵܢܸܐ، ܝܲܢ ܡܲܫ݇ܟ̰ܸܚ ܠܚܲܕ݇ ܬܘܼܪܵܨܵܐ.                  

   ܐܵܢܝܼ ܡܼܢ ܒܢܲܝ̈ ܐܘܼܡܬܲܢ ܕܚܵܝܵܐ ܝܢܵܐ ܒܐܲܬܖ̈ܵܘܵܬܸܐ ܡܲܥܖ̈ܒܼܵܝܸܐ، ܒܠܝܼܓܸ̈ܐ ܝܢܵܐ ܒܚܲܝܸ̈ܐ ܝܵܘܡܵܝܸ̈ܐ ܘܡܲܢܬܵܝܵܬܸ̈ܐ ܦܲܖ̈ܨܵܘܦܵܝܸܐ ܘܠܸܐ ܝܢܵܐ ܐ݇ܟܼܵܠܵܐ ܚܲܡ ܕܐܘܼܡܬܲܢ. ܐܝܼܡܲܢ ܕܒܲܩܘܼܪܸܐ ܝܘܲܚ ܡܸܢܵܝ "ܒܲܣ ܡܘܼܕܝܼ ܒܸܬ ܐܵܬܸܐ ܒܪܸܫܵܐ ܕܐܘܼܡܬܲܢ ܐܸܢ ܐܲܚܬܘܿܢ ܠܵܐ ܚܵܦܛܝܼܬܘܿܢ ܘܠܵܐ ܢܵܛܪܝܼܬܘܿܢ ܠܐܝܼܬܘܼܬܲܢ؟" ܦܘܼܢܵܝܵܝ ܐܵܗܵܐ ܝܠܸܗ "ܠܲܐܟܼܵܐ ܓܵܘ ܕܐܲܢܸܐ ܐܲܬܖ̈ܵܘܵܬܸܐ ܠܲܝܬ ܠܲܢ ܥܕܵܢܵܐ ܕܢܵܛܪܲܚ ܠܐܝܼܬܘܼܬܲܢ. ܪ݇ܚܘܿܫ ܐܲܚܘܿܢܘܵܬܲܢ ܓܵܘ ܐܲܬܖ̈ܵܘܵܬܸܐ ܕܡܲܕܢܚܵܐ ܢܵܛܪܝܼ ܠܐܝܼܬܘܼܬܲܢ."              

   ܐܝܼܢܵܐ ܟܲܕ ܨܲܚܨܘܼܝܸܐ ܝܘܲܚ ܠܚܲܝܸ̈ܐ ܕܒܢܲܝ̈ ܐܘܼܡܬܲܢ ܒܐܲܬܖ̈ܵܘܵܬܸܐ ܡܲܕܢܚܵܝܸ̈ܐ

ܚܙܵܝܵܐ ܝܘܲܚ ܕܐܵܢܝܼ ܒܥܲܣܩܘܵܬܸ̈ܐ ܒܘܼܫ ܓܘܼܖܸ̈ܐ ܘܒܓܘܼܢܚܸ̈ܐ ܒܘܼܫ ܡܲܪܝܼܖܸ̈ܐ ܢܦܝܼܠܸ̈ܐ ܝܢܵܐ ܘܠܸܐ ܝܢܵܐ ܡܨܵܝܵܐ ܕܢܵܛܪܝܼ ܠܐܝܼܬܘܼܬܲܢ ܐܘܼܡܬܵܢܵܝܬܵܐ.            ܐܵܦ ܐܵܢܝܼ ܕܐܝܼܬ ܠܗ݇ܘܿܢ ܚܲܕ݇ ܩܸܢܵܐ ܘܚܲܕ݇ ܦܘܼܠܚܵܢܵܐ ܝܵܘܡܵܝܵܐ ܠܸܐ ܝܢܵܐ ܬܲܚܡܘܼܢܸܐ ܒܘܼܬ ܢܛܵܪܬܵܐ ܕܐܝܼܬܘܼܬܲܢ ܘܐ݇ܡܵܪܵܐ ܝܢܵܐ "ܐܲܚܢܲܢ ܠܲܐܟܼܵܐ ܓܵܘ ܢܘܼܪܵܐ ܝܘܲܚ ܟܲܕ ܐܲܚܘܿܢܘܵܬܲܢ ܓܵܘ ܡܲܥܪܒܼܵܐ ܚܵܝܵܐ ܝܢܵܐ ܓܵܘ ܫܠܵܡܵܐ ܘܚܸܐܪܘܼܬܵܐ. ܐܵܢܲܢܩܵܝܬܵܐ ܝܠܵܗܿ ܕܐܵܢܝܼ ܢܵܛܪܝܼ ܠܐܝܼܬܘܼܬܲܢ ܒܗܵܝ ܕܐܵܢܝܼ ܐܝܼܬ ܠܗ݇ܘܿܢ ܟܠ ܚܲܕ݇ ܡܸܨܥܵܝܵܐ ܠܡܲܢܬܵܝܬܵܐ ܘܬܲܡܲܡܬܵܐ ܕܟܠ ܥܵܒܼܘܿܕܘܼܬܵܐ. ܐܵܢܝܼ ܐܝܼܬ ܠܗ݇ܘܿܢ ܚܸܐܪܘܼܬܵܐ ܟܲܕ ܐܲܚܢܲܢ ܠܲܐܟܼܵܐ ܐܝܼܕܲܢ ܘܐܲܩܠܲܢ ܝܣܝܼܖܸ̈ܐ ܝܢܵܐ، ܡܘܼܕܝܼ ܟܸܐ ܡܵܨܲܚ ܥܵܒܼܕܲܚ؟"   

   ܐܝܼܡܲܢ ܡܼܢ ܐܲܒܼܵܗܵܬܸ̈ܐ ܕܝܵܠܵܝ ܠܸܐ ܝܢܵܐ ܡܨܵܝܵܐ ܕܡܣܲܘܸܬܝܼ ܒܠܸܫܵܢܲܢ ܒܲܩܘܼܪܸܐ ܝܘܲܚ "ܩܵܡܘܼ ܝܵܠܵܘܟܼܘܿܢ ܠܸܐ ܝ݇ܬܘܿܢ ܡܲܠܘܼܦܵܝ ܕܡܣܲܘܸܬܝܼ ܒܠܸܫܵܢܲܢ؟" ܐܵܢܝܼ ܐ݇ܡܵܪܵܐ ܝܢܵܐ "ܐܵܢܝܼ ܠܲܝܬ ܠܗ݇ܘܿܢ ܥܸܕܵܢܵܐ! ܗܲܪ ܠܸܐ ܚܵܙܲܚ ܠܝܵܠܲܢ ܕܡܵܨܲܚ ܕܗܲܡܙܸܡܲܚ ܥܲܡܵܝ! ܘܵܠܝܼܬܵܐ ܕܥܘܼܡܖ̈ܵܢܸܐ ܘܫܵܘܬܵܦܘܼܝܵܬܸ̈ܐ ܝܠܵܗܿ ܕܡܲܪܝܸܙܝܼ ܣܸܕܖܸ̈ܐ ܩܵܐ ܡܲܠܲܦܬܵܐ ܕܠܸܫܵܢܲܢ؛ ܐܲܚܢܲܢ ܐܵܦ ܠܲܝܬ ܠܲܢ ܥܸܕܵܢܵܐ ܕܡܲܩܪܲܚܠܗ݇ܘܿܢ ܠܸܫܵܢܵܐ ܕܓܵܢܲܢ!"

   ܐܝܼܢܵܐ ܐܝܼܡܲܢ ܕܡܼܢ ܡܸܫܬܲܐܠܵܢܸܐ ܕܫܵܘܬܵܦܘܵܬܸ̈ܐ ܒܲܩܘܼܪܸܐ ܝܘܲܚ ܕܩܵܡܘܼ ܠܲܝܬ ܠܗ݇ܘܿܢ ܚܘܼܖ̈ܙܸܐ ܘܣܸܕܖܸ̈ܐ ܩܵܐ ܝܵܠܸ̈ܐ ܙܥܘܿܖܸ̈ܐ ܘܥܠܲܝܡܸ̈ܐ، ܐܵܢܝܼ ܩܒܼܵܠܵܐ ܝܢܵܐ ܡܼܢ ܐܲܒܼܵܗܵܬܸ̈ܐ ܘܐ݇ܡܵܪܵܐ ܝܢܵܐ "ܐܲܚܢܲܢ ܡܲܪܝܘܼܙܸܐ ܝܘܲܚ ܠܣܸܕܖܸ̈ܐ ܘܠܚܘܼܖ̈ܙܸܐ ܦܖ̈ܝܼܫܸܐ، ܡܲܠܦܵܢܸ̈ܐ ܙܸܐ ܐ݇ܬܵܝܵܐ ܝܢܵܐ ܘܥܕܵܢܵܝ ܕܒܼܵܚܘܼܗܿ ܝܢܵܐ ܕܠܵܐ ܦܘܼܪܥܵܢܵܐ، ܐܝܼܢܵܐ ܡܸܢܝܵܢܵܐ ܕܝܵܠܘܿܦܸ̈ܐ ܟ̰ܸܡ ܒܲܨܘܿܪܵܐ ܝܠܸܗ. ܐܲܒܼܵܗܵܬܸ̈ܐ ܠܸܐ ܝܢܵܐ ܡܲܝܬ݇ܘܼܝܸܐ ܠܝܵܠܵܝ ܠܵܐ ܥܲܠ ܚܘܼܖ̈ܙܲܢ ܘܠܵܐ ܥܲܠ ܣܸܕܖ̈ܲܢ! ܘܡܼܢ ܒܵܬܲܪ ܚܲܕ݇ܟ̰ܵܐ ܥܕܵܢܵܐ ܠܸܒܵܐ ܕܟܠܲܢ ܩܝܵܫܵܐ ܝܠܸܗ ܘܡܲܟܠܘܼܝܸܐ ܝܘܲܚ ܠܥܵܒܼܘܿܕܘܵܬܲܢ."                              

   ܒܲܣ ܠܲܐܟܼܵܐ ܡܵܢܝܼ ܝܠܸܗ ܡܸܫܬܲܐܠܵܢܵܐ ܕܐܵܗܵܐ ܐܲܝܟܵܢܵܝܘܼܬܵܐ ܘܡܵܢܝܼ ܝܠܸܗ ܡܸܫܬܲܐܠܵܢܵܐ ܕܢܛܵܪܬܵܐ ܕܐܝܼܬܘܼܬܲܢ ܐܘܼܡܬܵܢܵܝܬܵܐ؟ ܠܪܸܥܝܵܢܝܼ ܟܠ ܚܲܕ݇ ܡܸܢܲܢ ܡܸܫܬܲܐܠܵܢܵܐ ܝܠܸܗ؛ ܘܐܵܢܲܢܩܵܝܬܵܐ ܝܠܵܗܿ ܕܟܠ ܚܲܕ݇ ܡܸܢܲܢ ܬܲܡܸܡ ܠܘܵܠܝܼܬܸܗ ܠܟܸܣ ܐܲܒܼܵܗܵܬܲܢ؛ ܐܵܢܝܼ ܕܐܵܦܸܢ ܓܵܘ ܢܘܼܪܵܐ ܘܦܠܵܫܵܐ ܘܦܸܬܢܸ̈ܐ ܚܵܝܵܐ ܗ݇ܘܵܘ ܠܵܐ ܡܘܼܗܡܸܐ ܠܗ݇ܘܿܢ ܘܢܛܸܪܠܗ݇ܘܿܢ ܠܐܝܼܬܘܼܬܲܢ ܘܣܘܼܦܝܵܐ ܠܗ݇ܘܿܢ ܒܐܝܼܕܲܢ. ܕܵܐܟܼܝܼ ܡܵܨܲܚ ܢܵܫܲܚܠܗ݇ܘܿܢ ܘܫܵܒܼܩܲܚ ܕܐܵܗܵܐ ܝܵܪܬܘܼܬܵܐ ܡܵܝܬܵܐ ܒܐܝܼܕܵܬܲܢ؟ ܐܸܢ ܟܠ ܚܲܕ݇ ܡܸܢܲܢ ܥܵܒܼܸܪ ܡܼܢ ܒܲܣܝܼܡܘܼܝܵܬܸ̈ܐ ܦܲܖ̈ܨܘܿܦܵܝܸܐ؛ ܓܵܒܼܸܪ ܘܗܵܘܸܐ ܠܸܗ ܝܵܠܸ̈ܐ ܙܥܘܿܖܸ̈ܐ، ܐܸܢ ܟܠ ܚܲܕ݇ ܡܸܢܲܢ ܚܵܦܸܛ ܘܓܵܘ ܒܲܝܬܵܐ ܡܣܲܘܸܬ ܒܠܸܫܵܢܵܐ ܕܓܵܢܲܢ ܘܐܸܢ ܟܠ ܚܲܕ݇ ܡܸܢܲܢ ܡܲܠܸܦ ܠܝܵܠܘܼܗܝ ܕܢܵܛܪܝܼ ܠܐܝܼܬܘܼܬܵܝ؛ ܗܵܝܓܵܗܵܐ ܐܘܼܡܬܲܢ ܠܸܐ ܡܵܝܬܵܐ ܘܒܸܬ ܚܵܝܵܐ.                                                 

   ܐܲܝܟܼ ܕܐ݇ܡܵܪܵܐ ܝܠܸܗ ܚܲܕ݇ ܙܲܡܵܪܵܐ ܒܙܡܝܼܪܬܸܗ "ܐܸܢ ܒܵܥܲܚ ܕܡܫܲܚܠܸܦܲܚ ܠܥܵܠܡܵܐ ܐܵܢܲܢܩܵܝܬܵܐ ܝܠܵܗܿ ܕܡܫܲܚܠܸܦܲܚ ܠܪܸܥܝܵܢܵܐ ܘܠܦܘܼܠܚܵܢܵܐ ܕܗܵܘ ܐ݇ܢܵܫܵܐ ܕܟܸܐ ܚܵܙܲܚܠܸܗ ܓܵܘ ܢܵܘܪܵܐ." ܠܸܐ ܗܵܘܸܐ ܠܲܢ ܨܒܵܪܬܵܐ ܡܼܢ ܐ݇ܚܸܖ̈݇ܢܸܐ ܕܐܵܢܝܼ ܦܵܠܚܝܼ ܠܢܝܼܫܵܐ ܕܢܛܵܪܬܵܐ ܕܐܝܼܬܘܼܬܲܢ ܐܸܠܵܐ ܗܵܘܸܐ ܠܲܢ ܨܒܵܪܬܵܐ ܡܼܢ ܕܗܵܘ ܕܓܵܘ ܢܵܘܪܵܐ ܝܠܸܗ؛ ܗ.ܕ. ܡܼܢ ܓܵܢܲܢ ܕܥܵܒܼܕܲܚ ܠܗܵܘ ܦܘܼܠܚܵܢܵܐ ܕܒܵܥܲܚ ܕܐ݇ܚܸܖ̈݇ܢܸܐ ܬܲܡܸܡܝܼ ܠܸܗ.                                                           

   ܐܵܢܵܐ ܝܘܵܢ ܡܸܫܬܲܐܠܵܢܬܵܐ ܘܐܲܢ݇ܬ. ܝܵܐ ܩܲܪܝܵܢܵܐ ܡܘܼܚܸܒܵܐ، ܐܲܢ݇ܬ ܝܘܸܬ ܡܸܫܬܲܐܠܵܢܵܐ. ܠܲܝܬ ܦܝܼܫܵܐ ܚܲܕ݇ ܐ݇ܢܵܫܵܐ ܐ݇ܚܵܪ݇ܢܵܐ، ܐܲܚܢܲܢ ܐܵܢܝܼ ܐ݇ܚܲܖ̈ܵܝܸܐ ܝܘܲܚ؛ ܐܸܢ ܐܲܚܢܲܢ ܠܵܐ ܥܵܒܼܕܲܚ ܒܲܣ ܡܵܢܝܼ؟                                   

ܦܘܫܩ ܡܠ̈ܐ   

܀ ܕܠܵܐ ܦܘܼܪܥܵܢܵܐ: ܚܘܿܪܵܝ، ܡܲܓܵܢ

܀ ܣܸܕܪܵܐ: ܟܠܵܣ

܀ ܝܵܪܬܘܼܬܵܐ: ܡܝܼܪܵܬܵܐ

܀ ܡܲܗܡܵܝܬܵܐ: ܡܲܚܦܲܠܬܵܐ