ܒܒܐ ܘܬܠܬܐ ܒܢ̈ܬܘܗܝ

ܚܕܐ ܗܘܩܝܬܐ ܕܐܒܼܗܬ̈ܐ

   ܐܝܼܬ ܗ݇ܘܵܐ، ܠܲܝܬ ܗ݇ܘܵܐ، ܐܝܼܬ ܗ݇ܘܵܐ ܚܲܕ݇ ܐ݇ܢܵܫܵܐ ܕܐܝܼܬ ܗ݇ܘܵܐ ܠܸܗ ܬܠܵܬ݇ ܒܢܵܬܸ̈ܐ ܪܵܒܵܐ ܫܲܦܝܼܖܸ̈ܐ ܕܡܸܛܝܸ̈ܐ ܗ݇ܘܵܘ ܠܥܕܵܢܵܐ ܕܓܒܼܵܪܵܐ. ܐܲܢܸ̈ܐ ܬܠܵܬ݇ ܒܢܵܬܸ̈ܐ ܠܲܝܬ ܗ݇ܘܵܘ ܠܗ݇ܘܿܢ ܝܸܡܵܐ ܒܗܵܝ ܕܝܸܡܲܝܗܝ ܫܘܼܢܝܼܬܵܐ ܗ݇ܘܵܐ ܡܼܢ ܐܵܗܵܐ ܥܵܠܡܵܐ ܟܲܕ ܐܵܢܝܼ ܙܥܘܿܖܸ̈ܐ ܗ݇ܘܵܘ.

   ܚܲܕ݇ ܝܵܘܡܵܐ ܚܲܕ݇ ܓ̰ܘܲܢܩܵܐ ܒܸܐܬܵܝܵܐ ܝܠܸܗ ܠܛܵܠܝܼܒܘܼܬܵܐ ܕܗܵܝ ܒܪܵܬܵܐ ܓܘܼܪܬܵܐ ܕܫܸܡܘܼܗܿ ܣܲܡܪܝܼܕܵܐ ܗ݇ܘܵܐ. ܒܵܒܵܐ ܕܒܢܵܬܸ̈ܐ ܐ݇ܡܵܪܵܐ ܝܠܸܗ ܩܵܐ ܛܲܠܵܒܵܐ: ـ ܒܫܲܝܢܵܐ ܐ݇ܬܝܼܵܐ ܝܘܸܬ ܥܲܠ ܥܲܝ̈ܢܲܢ. ܐܵܢܵܐ ܠܲܝܬ ܠܝܼ ܚܲܕ݇ ܚܲܒܪܵܐ ܒܘܼܬ ܒܵܥܘܼܬܘܼܟܼ، ܐܝܼܢܵܐ ܐܝܼܬ ܠܝܼ ܚܲܕ݇ ܥܝܵܕܵܐ (ܥܵܕܲܬ) ܕܡܼܢ ܩܲܕ݇ܡܬܵܐ ܒܸܕ ܡܲܕܥܸܢܗ݇ܘܿܢ ܕܘܼܒܵܖܸ̈ܐ (ܚܲܨ̈ܝܵܬܸܐ) ܕܒܢܵܬܝܼ ܩܵܐ ܕܒܸܐ݇ܚܲܪܬܵܐ ܠܵܐ ܗܵܘܝܵܐ ܟ̰ܘܼ ܩܒܼܵܠܬܵܐ. ܐܵܗܵܐ ܒܪܵܬܝܼ ܓܘܼܪܬܵܐ ܐܝܼܬ ܠܵܗܿ ܚܲܕ݇ ܠܸܫܵܢܵܐ ܝܲܪܝܼܟܼܵܐ ܘܡܼܢ ܟ̰ܘܼ ܚܲܕ݇ ܐ݇ܢܵܫܵܐ ܐܘܼܪܚܵܐ ܠܸܐ ܐܵܙܵܠ݇ܐ. ܐܵܦܸܢ ܕܫܲܦܝܼܪܬܵܐ ܘܢܲܓ̰ܝܼܒ ܝܠܵܗܿ ܐܝܼܢܵܐ ܠܸܫܵܢܘܼܗܿ ܪܵܒܵܐ ܡܲܪܝܼܪܵܐ ܝܠܸܗ ܘܟܸܐ ܓ̰ܲܘܸܒܵܐ ܠܟܠ ܕܗܲܡܙܸܡ ܥܲܠܘܼܗܿ. ܐܸܢ ܐܵܢܵܐ ܗܵܘܸܝܢ ܡܼܢ ܓܸܒܘܼܟܼ ܠܸܐ ܓܵܒܼܪܸܢܵܗܿ، ܐܝܼܢܵܐ ܐܸܢ ܒܵܥܸܝܬ، ܡܵܨܸܝܬ ܓܵܒܼܪܸܬ ܠܵܗܿ ܗܵܝ ܒܪܵܬܝܼ ܕܬܪܸܝܢ. ܓ̰ܘܲܢܩܵܐ ܙܸܐ ܩܲܒܘܼܠܸܐ ܝܠܸܗ ܘܒܸܓܒܼܵܪܘܼܗܿ ܝܠܸܗ ܫܲܡܪܵܝܬܵܐ ܕܝܼܗ݇ܘܵܐ ܗܵܝ ܒܪܵܬܵܐ ܕܬܪܸܝܢ ܘܠܲܒܘܼܠܘܼܗܿ ܝܠܸܗ ܠܒܲܝܬܘܼܗܝ. ܣܲܡܪܝܼܕܵܐ ܙܸܐ ܪܵܒܵܐ ܒܸܟܪܵܒܵܐ ܝܠܵܗܿ ܡܼܢ ܐܝܼܕܵܐ ܕܒܵܒܘܼܗܿ ܐܝܼܢܵܐ ܟ̰ܘܼ ܫܘܼܓܼ݇ܠܵܐ ܠܸܐ ܝܠܸܗ ܦܠܵܛܵܐ ܡܼܢ ܐܝܼܕܘܼܗܿ.

   ܥܒܼܵܪܵܐ ܝܠܵܗܿ ܟܡܵܐ ܥܕܵܢܵܐ ܘܚܲܕ݇ ܛܲܠܵܒܵܐ ܐ݇ܚܸܪ݇ܢܵܐ ܒܸܐܬܵܝܵܐ ܝܠܸܗ ܩܵܐ ܣܲܡܪܝܼܕܵܐ. ܡܸܢ݇ܕܪܸܫ݇ ܒܵܒܘܼܗܿ ܐ݇ܡܵܪܵܐ ܝܠܸܗ: ـ ܒܫܲܝܢܵܐ ܐ݇ܬܝܼܵܐ ܝܘܸܬ ܥܲܠ ܥܲܝ̈ܢܲܢ. ܐܝܼܢܵܐ ܐܵܢܵܐ ܐܝܼܬ ܠܝܼ ܚܲܕ݇ ܥܝܵܕܵܐ ܕܟܠ ܡܸܢܕܝܼ ܒܕܘܼܙܘܼܬܵܐ ܟܸܐ ܐܵܡܪܸܢܸܗ ܩܵܐ ܛܲܠܵܒܸ̈ܐ. ܒܪܵܬܝܼ ܣܲܡܪܝܼܕܵܐ ܕܐ݇ܬܝܼܵܐ ܝܘܸܬ ܠܛܵܠܝܼܒܘܼܬܘܼܗܿ ܪܵܒܵܐ ܟܵܪܘܿܒܬܵܐ ܝܠܵܗܿ ܘܐܝܼܬ ܠܵܗܿ ܚܲܕ݇ ܠܸܫܵܢܵܐ ܝܲܪܝܼܟܼܵܐ ܘܡܲܪܝܼܪܵܐ. ܐܸܢ ܗܵܘܸܝܢ ܡܼܢ ܓܸܒܘܼܟܼ ܠܸܐ ܓܵܒܼܪܸܢܵܗܿ؛ ܐܝܼܢܵܐ ܡܵܨܸܝܬ ܗܵܝ ܙܥܘܿܪܬܵܐ ܓܵܒܼܪܸܬ ܠܵܗܿ. ܛܲܠܵܒܵܐ ܙܸܐ ܩܲܒܘܼܠܸܐ ܝܠܸܗ ܘܒܸܓܒܼܵܪܘܼܗܿ ܝܠܸܗ ܢܘܼܪܵܐ ܕܝܼܗ݇ܘܵܐ ܗܵܝ ܒܪܵܬܵܐ ܕܬܠܵܬ݇؛ ܘܠܲܒܘܼܠܘܼܗܿ ܝܠܸܗ ܠܒܲܝܬܸܗ. ܒܐܵܗܵܐ ܓܵܗܵܐ ܒܘܼܫ ܒܸܙܝܵܕܵܐ ܝܠܸܗ ܟܲܪܒܵܐ ܕܣܲܡܪܝܼܕܵܐ ܐܝܼܢܵܐ ܚܲܕ݇ ܡܸܢܕܝܼ ܠܸܐ ܝܠܵܗܿ ܡܨܵܝܵܐ ܕܥܵܒܼܕܵܐ.

   ܥܒܼܵܪܵܐ ܝܠܵܗܿ ܥܕܵܢܵܐ ܘܒܵܬ݇ܪ ܚܲܕ݇ ܡܸܬܚܵܐ ܒܸܐܬܵܝܵܐ ܝܠܸܗ ܚܲܕ݇ ܛܲܠܵܒܵܐ ܐ݇ܚܸܪ݇ܢܵܐ ܠܒܲܝܬܲܝܗܝ. ܡܸܢ݇ܕܪܸܫ݇ ܒܵܒܵܐ ܫܲܪܘܼܝܸܐ ܝܠܸܗ ܠܩܸܨܲܬܸܗ ܘܗܲܪ ܐܵܢܝܼ ܚܲܒܖ̈ܵܢܸܐ ܕܩܲܕ݇ܡܬܵܐ ܐ݇ܡܵܪܲܝܗܝ ܠܸܗ. ܐܝܼܢܵܐ ܛܲܠܵܒܵܐ ܓ̰ܲܘܘܼܒܵܐ ܝܠܸܗ: ـ ܐܵܢܵܐ ܒܸܕ ܓܵܒܼܪܸܢܵܗܿ ܒܪܵܬܘܼܟܼ ܒܟܠܲܝܗܝ ܐܵܢܝܼ ܥܝܵܕܘܼܗܿ ܕܐܝܼܬ ܠܵܗܿ. ܒܵܒܵܐ ܙܸܐ ܒܝܵܗܒܼܘܼܗܿ ܝܠܸܗ ܒܪܵܬܘܼܗܝ ܘܓ̰ܘܵܢܩܵܐ ܐ݇ܡܵܪܵܐ ܝܠܸܗ: ـ ܒܲܣ ܐܵܢܵܐ ܒܸܕ ܠܲܒܠܸܢܵܗܿ ܣܲܡܪܝܼܕܵܐ ܠܡܕܝܼܢ݇ܬܵܐ ܕܓܵܢܝܼ. ܗܵܝܓܵܗ ܡܲܬܘܼܒܼܵܐ ܝܠܸܗ ܢܝܼܫܵܢܩܵܐ ܥܲܠ ܒܪܵܬܵܐ ܘܒܸܐܙܵܠܵܐ ܝܠܸܗ ܠܡܕܝܼܢ݇ܬܵܐ ܕܓܵܢܸܗ ܗܲܠ ܝܵܘܡܵܐ ܕܚܲܕ݇ܒܼܫܲܒܵܐ.

   ܒܝܵܘܡܵܐ ܕܚܲܕ݇ܒܸܫܲܒܵܐ ܚܸܬܢܵܐ ܒܸܐܬܵܝܵܐ ܝܠܸܗ ܘܥܲܡܘܼܗܝ ܡܲܐܬ݇ܝܵܐ ܝܠܸܗ ܚܲܕ݇ ܣܘܼܣܵܐ ܩܵܐ ܓܵܢܸܗ ܘܚܲܕ݇ ܐ݇ܚܸܪ݇ܢܵܐ ܩܵܐ ܒܲܟܼܬܸܗ ܘܚܲܕ݇ ܟܲܠܒܵܐ ܙܥܘܿܪܵܐ. ܟܠܲܝܗܝ ܒܸܐܙܵܠܵܐ ܝܢܵܐ ܠܥܘܼܡܪܵܐ ܩܵܐ ܒܘܼܪܵܟܼܵܐ. ܟܲܕ ܦܪܵܩܵܐ ܝܠܸܗ ܛܲܟܼܣܵܐ ܕܒܘܼܪܵܟܼܵܐ ܚܸܬܢܵܐ ܒܸܛܠܵܒܵܐ ܝܠܸܗ ܡܼܢ ܚܲܡܝܵܢܸܗ ܕܝܵܗܒܼܸܠܗ݇ܘܿܢ ܦܣܵܣܵܐ ܕܐܵܙܠ݇ܝܼ ܠܒܲܝܬܵܐ ܕܓܵܢܲܝܗܝ.

   ܗܵܝܓܵܗ ܡܲܬܘܼܒܼܘܼܗܿ ܝܠܸܗ ܒܪܵܬܵܐ ܥܲܠ ܚܵܨܵܐ ܕܣܘܼܣܵܐ ܘܒܸܬܪܵܥܵܐ ܝܢܵܐ ܠܓܸܒܵܐ ܕܒܲܝܬܲܝܗܝ. ܟܲܕ ܒܸܐܙܵܠܵܐ ܝܢܵܐ ܠܐܘܼܪܚܵܐ، ܒܸܢܦܵܠܵܐ ܝܠܵܗܿ ܕܲܣܬܵܐ  ܕܘܲܪܕܸ̈ܐ ܕܣܲܡܪܝܼܕܵܐ ܡܼܢ ܐܝܼܕܘܼܗܿ. ܓ̰ܘܵܢܩܵܐ ܦܲܩܘܼܕܸܐ ܝܠܸܗ ܩܵܐ ܟܲܠܒܵܐ ܕܐܵܙܸܠ ܘܡܲܝܸܬ݇ܐ ܠܵܗܿ ܕܲܣܬܵܐ ܕܘܲܪܕܸ̈ܐ. ܐܝܼܢܵܐ ܟܲܠܒܵܐ ܕܠܸܐ ܝܠܸܗ ܦܲܪܡܘܼܝܸܐ ܠܚܲܒܪܸܗ ܒܸܟܠܵܝܵܐ ܝܠܸܗ ܒܫܵܘܦܸܗ ܘܠܸܐ ܝܠܸܗ ܒܸܓ̰ܘܵܓ̰ܵܐ. ܗܵܝܓܵܗ ܓ̰ܘܵܢܩܵܐ ܡܚܵܝܵܐ ܝܠܸܗ ܚܕܵܐ ܓܠܘܼܠܬܵܐ ܓܵܘ ܩܸܨܵܐ ܕܟܲܠܒܵܐ ܘܒܸܩܛܵܠܸܗ ܝܠܸܗ. ܣܲܡܪܝܼܕܵܐ ܒܚܙܵܝܬܵܐ ܕܐܵܗܵܐ ܒܸܪܓܵܕܵܐ ܝܠܵܗܿ ܡܼܢ ܙܕܘܼܥܬܘܼܗܿ. ܟܲܕ ܡܛܵܝܵܐ ܝܢܵܐ ܠܒܲܝܬܵܐ، ܒܲܩܘܼܪܸܐ ܝܠܵܗܿ ܡܼܢ ܓܲܒܼܪܘܼܗܿ: ـ ܐܲܢ݇ܬ ܐ݇ܡܸܪܘܼܟܼ ܕܟܸܐ ܡܲܚܸܒܸܬ ܠܸܗ ܐܵܗܵܐ ܟܲܠܒܵܐ ܒܘܼܫ ܙܵܘܕܵܐ ܡܼܢ ܓܵܢܘܼܟܼ. ܓ̰ܘܲܢܩܵܐ ܓ̰ܘܼܘܸܒܠܸܗ: ـ ܗܸܐ ܟܸܐ ܒܵܥܸܝܢ ܗ݇ܘܵܐ ܠܸܗ ܐܝܼܢܵܐ ܒܵܬ݇ܪ ܕܠܵܐ ܡܘܼܨܝܸܬܠܸܗ ܥܲܠܝܼ ܠܵܙܸܡ ܗ݇ܘܵܐ ܕܡܵܐܸܬ ܗ݇ܘܵܐ. ܒܵܬ݇ܪ ܗܵܕܵܐ ܒܓܵܢܸܗ ܒܸܫܩܵܠܘܼܗܿ ܝܠܸܗ ܕܲܣܬܵܐ ܕܘܲܖ̈ܕܸܐ ܕܒܪܵܬܵܐ ܘܒܝܵܗܒܼܘܼܗܿ ܝܠܸܗ ܠܐܝܼܕܘܼܗܿ.

   ܡܸܢ݇ܕܪܸܫ݇ ܒܸܐܙܵܠܵܐ ܝܢܵܐ ܠܵܩܲܕ݇ܡܵܐ ܘܡܛܵܝܵܐ ܝܢܵܐ ܥܲܠ ܚܕܵܐ ܢܲܗܪܵܐ ܩܘܼܪܒܵܐ ܠܒܲܝܬܲܝܗܝ. ܓ̰ܘܵܢܩܵܐ ܦܲܩܘܼܕܸܐ ܝܠܸܗ ܩܵܐ ܣܘܼܣܵܐ ܕܒܪܵܬܵܐ: ـ ܗܵܕܟܼܵܐ ܒܸܕ ܡܲܥܒܼܸܪܸܬ ܠܵܗܿ ܟܵܠܘܼ ܡܼܢ ܓܵܘ ܢܲܗܪܵܐ ܕܟ̰ܘܼ ܚܕܵܐ ܢܵܛܘܿܦܬܵܐ ܕܡܝܼܵ̈ܐ ܠܵܐ ܢܵܕܝܵܐ ܥܲܠ ܓ̰ܘܼܠܘܼܗܿ. ܣܘܼܣܵܐ ܥܒܼܵܪܵܐ ܝܠܸܗ ܡܼܢ ܢܲܗܪܵܐ ܘܒܪܵܬܵܐ ܗܲܠ ܒܸܪܟܘܼܗܿ ܒܸܬܪܵܝܵܐ ܝܠܵܗܿ. ܓ̰ܘܵܢܩܵܐ ܟܲܕ ܒܸܚܙܵܝܘܼܗܝ ܝܠܸܗ ܐܵܗ ܡܸܢܕܝܼ ܡܲܬܘܼܒܼܸܐ ܝܠܸܗ ܚܕܵܐ ܓܠܘܼܠܬܵܐ ܓܵܘ ܩܸܨܵܐ ܕܣܘܼܣܵܐ ܘܒܸܩܛܵܠܘܼܗܝ ܝܠܸܗ. ܣܲܡܪܝܼܕܵܐ ܒܲܩܘܼܪܸܐ ܝܠܵܗܿ: ـ ܩܵܡܘܼ ܠܵܐ ܐ݇ܡܸܪܘܼܟܼ ܕܐܵܗܵܐ ܗܵܘ ܒܘܼܫ ܨܦܵܝܝܼ ܣܘܼܣܵܐ ܝܠܸܗ ܓܵܘ ܡܕܝܼܢ݇ܬܘܼܟܼ؟ ܓ̰ܘܲܢܩܵܐ ܓ̰ܲܘܘܼܒܸܐ ܝܠܸܗ: ـ ܗܸܐ ܐܝܼܢܵܐ ܐܵܢܵܐ ܚܲܒܪܵܐ ܚܕܵܐ ܓܵܗܵܐ ܟܸܐ ܐܵܡܪܸܢܸܗ. ܒܪܵܬܵܐ ܒܸܪܓܵܕܵܐ ܝܠܵܗܿ ܡܼܢ ܙܕܘܿܥܬܘܼܗܿ ܘܐ݇ܚܸܪ݇ܢܵܐ ܠܸܐ ܝܠܵܗܿ ܐ݇ܡܵܪܵܐ ܟ̰ܘܼ ܚܲܕ݇ ܡܸܢܕܝܼ.

   ܒܸܩܝܵܡܵܐ ܝܠܸܗ ܓ̰ܘܵܢܩܵܐ ܘܚܲܕ݇ ܩܲܕܪܵܐ ܡܼܢ ܙܘܵܕܸ̈ܐ ܡܲܬܘܼܒܼܲܝܗܝ ܝܠܸܗ ܥܲܠ ܚܵܨܵܐ ܕܒܪܵܬܵܐ ܘܦܵܝܫܵܢܸ̈ܐ ܙܸܐ ܒܸܛܥܵܢܲܝܗܝ ܝܠܸܗ ܒܓܵܢܸܗ ܘܒܸܐܙܵܠܵܐ ܝܢܵܐ ܢܝܼܚܵܐܝܼܬ ܗܲܠ ܕܡܛܵܝܵܐ ܝܢܵܐ ܠܒܲܝܬܵܐ. ܬܵܡܵܐ ܓܵܘ ܒܲܝܬܵܐ ܓܲܒܼܪܵܐ ܐ݇ܡܵܪܵܐ ܝܠܸܗ ܩܵܐ ܒܲܟܼܬܸܗ: ـ ܡܼܢ ܐܸܕܝܘܿܡ ܐܲܢ݇ܬܝ ܒܲܟܼܬܵܐ ܕܒܲܝܬܵܐ ܒܸܕ ܗܵܘܝܵܬܝ.

   ܗܵܕܟܼܵܐ ܥܒܼܵܖ̈ܵܐ ܝܢܵܐ ܬܠܵܬ݇ ܝܲܖ̈ܚܸܐ ܡܼܢ ܓܒܼܵܪܲܝܗܝ. ܚܲܕ݇ ܝܵܘܡܵܐ ܓܲܒܼܪܵܐ ܒܸܐܬܵܝܵܐ ܝܠܸܗ ܠܒܲܝܬܵܐ ܘܐ݇ܡܵܪܵܐ ܝܠܸܗ ܩܵܐ ܒܲܟܼܬܸܗ: ـ ܠܸܐ ܒܵܥܝܵܬܝ ܐܵܙܵܠ݇ܬܝ ܠܒܲܝܬܵܐ ܕܒܵܒܵܟܼܝ ܩܵܐ ܚܙܵܝܬܲܝܗܝ؟ ܣܲܡܪܝܼܕܵܐ ܐ݇ܡܵܪܵܐ ܝܠܵܗܿ:ـ ܗܸܐ ܒܐܲܠܵܗܵܐ. ܗܵܝܓܵܗ ܓܲܒܼܪܵܐ ܦܲܩܘܼܕܘܼܗܿ ܝܠܸܗ ܕܓܵܘ ܚܲܡܫܵܐ ܕܲܩܝܼܩܸ̈ܐ ܗܲܕܪܵܐ ܠܵܗܿ ܓܵܢܘܼܗܿ. ܟܲܕ ܥܒܼܵܪܵܐ ܝܢܵܐ ܚܲܡܫܵܐ ܕܲܩܝܼܩܸ̈ܐ ܗܵܘ ܒܸܚܙܵܝܵܐ ܝܠܸܗ ܕܠܸܐ ܝܠܵܗܿ ܗܕܝܼܪܬܵܐ. ܐ݇ܡܵܪܵܐ ܝܠܸܗ: ـ ܐ݇ܚܸܪ݇ܢܵܐ ܕܸܪܲܢܓ ܗ݇ܘܝܼܬܵܐ ܝܠܵܗܿ؛ ܦܵܝܫܵܐ ܩܵܐ ܚܲܕ݇ ܥܕܵܢܵܐ ܐ݇ܚܸܪ݇ܬܵܐ.

   ܒܵܬ݇ܪ ܚܲܕ݇ ܝܲܪܚܵܐ ܡܸܢ݇ܕܪܸܫ݇ ܐ݇ܡܵܪܵܐ ܝܠܸܗ ܩܵܐ ܒܲܟܼܬܸܗ: ـ ܚܲܡܫܵܐ ܕܲܩܝܼܩܸ̈ܐ ܐܝܼܬ ܠܵܟܼܝ ܥܕܵܢܵܐ ܩܵܐ ܕܗܲܕܪܵܬܝ ܠܵܗܿ ܓܵܢܵܟܼܝ ܕܐܵܙܲܠ݇ܚ ܠܒܲܝܬܵܐ ܕܒܵܒܵܟܼܝ. ܒܐܵܗܵܐ ܓܵܗܵܐ ܓܵܘ ܬܠܵܬܵܐ ܕܲܩܝܼܩܸ̈ܐ ܗܲܕܘܼܪܸܐ ܝܠܵܗܿ ܘܡܲܬܘܼܒܼܘܼܗܝ ܝܠܵܗܿ ܟܠ ܚܲܕ݇ ܡܸܢܕܝܼ ܓܵܘ ܡܲܪܟܲܒܼܬܵܐ. ܟܲܕ ܒܸܐܬܵܝܵܐ ܝܠܵܗܿ ܕܝܵܬܒܼܵܐ ܓܵܘ ܡܲܪܟܲܒܼܬܵܐ ܒܸܚܙܵܝܵܐ ܝܠܵܗܿ ܕܚܲܕ݇ ܝܸܠܚܵܐ ܕܥܸܖ̈ܒܸܐ ܒܸܐܬܵܝܵܐ ܝܠܵܗܿ ܡܼܢ ܪܸܚܩܵܐ. ܓ̰ܘܵܢܩܵܐ ܐ݇ܡܵܪܵܐ ܝܠܸܗ: ـ ܚܙܝܼ ܡܘܼܕ ܝܸܠܚܵܐ ܕܕܸܐܒܼܸ̈ܐܒܸܐܬܵܝܵܐ ܝܠܵܗܿ! ܒܲܟܼܬܵܐ ܓ̰ܲܘܘܼܒܸܐ ܝܠܵܗܿ: ـ ܠܵܐ، ܥܸܖ̈ܒܸܐ ܝܢܵܐ، ܠܸܐ ܝܢܵܐ ܕܸܐܒܼܸ̈ܐ. ܓܲܒܼܪܵܐ ܓܲܫܘܼܩܸܐ ܝܠܸܗ ܓܵܘ ܗܵܘܵܐ ܘܐ݇ܡܵܪܵܐ ܝܠܸܗ: ـ ܒܸܚܫܵܒܼܵܐ ܝܘܸܢ ܐܸܕܝܘܿܡ ܡܸܛܪܵܐ ܒܸܕ ܥܵܪܝܵܐ؛ ܒܘܼܫ ܨܦܵܝܝܼ ܝܠܵܗܿ ܕܵܝܪܲܚ ܠܒܲܝܬܵܐ. ܗܵܝܓܵܗ ܒܸܕܝܵܪܵܐ ܝܢܵܐ ܠܒܲܝܬܵܐ.

   ܒܵܬ݇ܪ ܚܲܕ݇ ܝܲܪܚܵܐ ܐ݇ܚܸܖ̈݇ܢܸܐ ܓܲܒܼܪܵܐ ܐ݇ܡܵܪܵܐ ܝܠܸܗ: ـ ܐܸܢ ܒܵܥܝܵܬܝ ܐܵܙܵܠ݇ܬܝ ܠܒܲܝܬܵܐ ܕܒܵܒܵܟܼܝ ܩܵܐ ܚܲܡܫܵܐ ܕܲܩܝܼܩܸ̈ܐ ܐ݇ܚܸܖ̈݇ܢܸܐ ܗܲܕܸܪܵܗܿ ܓܵܢܵܟܼܝ. ܒܲܟܼܬܵܐ ܒܵܬ݇ܪ ܬܪܸܝܢ ܕܲܩܝܼܩܸ̈ܐ ܗܲܕܘܼܪܸܐ ܝܠܵܗܿ. ܦܠܵܛܵܐ ܝܢܵܐ ܠܐܘܼܪܚܵܐ ܘܟܲܕ ܒܸܐܙܵܠܵܐ ܝܢܵܐ ܒܸܚܙܵܝܵܐ ܝܢܵܐ ܠܚܲܕ݇ܟܡܵܐ ܛܲܝܖܸ̈ܐ ܕܦܪܵܚܵܐ ܝܢܵܐ ܓܵܘ ܫܡܲܝܵܐ. ܓ̰ܘܵܢܩܵܐ ܐ݇ܡܵܪܵܐ ܝܠܸܗ: ـ ܚܙܝܼ ܟܡܵܐ ܢܸܫܖܸ̈ܐ ܦܪܵܚܵܐ ܝܢܵܐ ܓܵܘ ܫܡܲܝܵܐ. ܒܲܟܼܬܵܐ ܓ̰ܲܘܘܼܒܸܐ ܝܠܵܗܿ: ـ ܠܸܐ ܝܢܵܐ ܢܸܫܖܸ̈ܐ، ܝܵܘܢܵܬܸ̈ܐ ܝܢܵܐ. ܡܸܢ݇ܕܪܸܫ݇ ܓܲܒܼܪܵܐ ܐ݇ܡܵܪܵܐ ܝܠܸܗ: ـ ܒܸܚܫܵܒܼܵܐ ܝܘܸܢ ܕܡܸܛܪܵܐ ܒܸܕ ܥܵܪܝܵܐ، ܕܵܝܪܲܚ ܠܒܲܝܬܵܐ. ܡܸܢ݇ܕܪܸܫ݇ ܒܸܕܝܵܪܵܐ ܝܢܵܐ ܡܼܢ ܐܘܼܪܚܵܐ.

   ܒܵܬ݇ܪ ܚܲܕ݇ ܝܲܪܚܵܐ ܐ݇ܚܸܪ݇ܢܵܐ ܓܲܒܼܪܵܐ ܡܸܢ݇ܕܪܸܫ݇ ܐ݇ܡܵܪܵܐ ܝܠܸܗ ܕܗܵܕܪܵܐ ܩܵܐ ܪ݇ܚܵܫܬܵܐ ܠܒܲܝܬܵܐ ܕܒܵܒܘܼܗܿ ܘܟܲܕ ܦܠܵܛܵܐ ܝܢܵܐ ܓܵܘ ܐܘܼܪܚܵܐ، ܒܸܬܦܵܩܵܐ ܝܢܵܐ ܒܚܲܕ݇ ܒܸܩܪܵܐ. ܓܲܒܼܪܵܐ ܐ݇ܡܵܪܵܐ ܝܠܸܗ: ـ ܟܡܵܐ ܫܲܦܝܼܖܸ̈ܐ ܥܸܖ̈ܒܸܐ ܝܢܵܐ! ܒܲܟܼܬܵܐ ܙܸܐ ܐ݇ܡܵܪܵܐ ܝܠܵܗܿ: ـ ܗܸܐ، ܪܵܒܵܐ ܫܲܦܝܼܖܸ̈ܐ ܝܢܵܐ. ܡܸܢ݇ܕܪܸܫ݇ ܒܸܐܙܵܠܵܐ ܝܢܵܐ ܠܵܩܲܕ݇ܡܵܐ ܗܲܠ ܕܡܛܵܝܵܐ ܝܢܵܐ ܠܒܲܝܬ ܒܵܒܵܐ ܕܣܲܡܪܝܼܕܵܐ.

   ܓܵܘ ܒܲܝܬܵܐ ܕܒܵܒܵܐ ܕܣܲܡܪܝܼܕܵܐ ܒܫܲܝܢܵܐ ܩܲܒܘܼܠܲܝܗܝ ܝܢܵܐ ܘܒܵܒܵܐ ܫܲܕܘܼܪܸܐ ܝܠܸܗ ܒܵܬ݇ܪ ܐܵܢܝܼ ܬܪܸܝܢ ܒܢܵܬܘܼܗܝ ܐ݇ܚܸܖ̈݇ܢܸܐ ܥܲܡ ܚܸܬܢܵܘܵܬܘܼܗܝ. ܐܝܼܡܲܢ ܕܒܸܓ̰ܡܵܥܵܐ ܝܢܵܐ ܟܠܘܿܢܬܲܝܗܝ ܬܵܡܵܐ، ܐ݇ܡܵܪܵܐ ܝܠܸܗ ܩܵܬܲܝܗܝ: ـ ܐܲܚܬܘܿܢ ܩܘܼܪܒܵܐ ܥܲܠ ܬܪܸܝܢ ܫܸܢܸܵ̈ܐ ܓܒܼܝܼܖܸ̈ܐ ܝܬܘܿܢ. ܒܵܥܝܸܢ ܝܵܕܥܸܢ ܕܐܲܝܢܝܼ ܡܸܢܵܘܟܼܘܿܢ ܒܘܼܫ ܙܵܘܕܵܐ ܚܸܕܝܵܐ ܝܠܸܗ ܒܚܲܝܘܼܬܸܗ. ܟܠ ܚܲܕ݇ ܕܩܵܪܸܡ ܠܸܗ ܐܵܗܵܐ ܡܘܼܪܵܝܵܐ (مسابقه)، ܚܕܵܐ ܙܵܘܘܼܪܬܵܐ ܕܕܲܗܒܼܵܐ ܒܸܕ ܩܲܒܸܠ ܕܲܫܢܵܐ ܡܸܢܝܼ.

   ܒܫܘܼܪܵܝܵܐ ܩܵܐ ܚܸܬܢܵܐ ܓܘܼܪܵܐ ܐ݇ܡܵܪܵܐ ܝܠܸܗ: ـ ܐܸܢ ܐܲܢ݇ܬ ܩܵܪܸܝܬ ܠܵܗܿ ܒܲܟܼܬܘܼܟܼ، ܒܸܚܫܵܒܼܸܬ ܓܵܘ ܟܡܵܐ ܕܲܩܝܼܩܸ̈ܐ ܒܸܕ ܐܵܬܝܵܐ؟ ܗܵܘ ܓ̰ܲܘܘܼܒܸܐ ܝܠܸܗ ܓܵܘ ܚܲܕ݇ ܕܲܩܝܼܩܵܐ. ܒܵܒܵܐ ܐ݇ܡܵܪܵܐ ܝܠܸܗ: ـ ܒܲܣ ܩܪܸܐ ܠܵܗܿ ܚܲܙܲܚ ܟܡܵܐ ܒܓܵܪܫܵܗܿ ܗܲܠ ܕܐܵܬܝܵܐ. ܗܵܝܓܵܗ ܚܸܬܢܵܐ ܒܸܕܪܵܝܵܐ ܝܠܸܗ ܩܵܠܸ̈ܐ ܒܒܲܟܼܬܸܗ. ܗܵܝ ܙܸܐ ܓ̰ܲܘܘܼܒܸܐ ܝܠܵܗܿ: ـ ܐܵܕܝܼܵܐ ܒܸܕ ܐܵܬܝܵܢ. ܐܝܼܢܵܐ ܚܲܡܫܵܐ ܕܲܩܝܼܩܸ̈ܐ ܒܸܓܪܵܫܵܐ ܝܠܵܗܿ ܗܲܠ ܕܡܛܵܝܵܐ ܝܠܵܗܿ ܟܸܣܠܲܝܗܝ.

   ܡܼܢ ܚܸܬܢܵܐ ܕܬܪܸܝܢ ܙܸܐ ܗܲܪ ܗܵܘ ܒܘܼܩܵܪܵܐ ܒܲܩܘܼܪܘܼܗܝ ܝܠܸܗ ܘܗܵܘ ܓ̰ܲܘܘܼܒܸܐ ܝܠܸܗ: ـ ܓܵܘ ܚܲܕ݇ ܕܲܩܝܼܩܵܐ. ܐܝܼܢܵܐ ܟܲܕ ܒܸܩܪܵܝܵܐ ܝܠܸܗ ܠܒܲܟܼܬܸܗ ܗܵܝ ܙܸܐ ܡܼܢ ܒܵܬ݇ܪ ܐܸܫܬܵܐ ܕܲܩܝܼܩܸ̈ܐ ܡܛܵܝܵܐ ܝܠܵܗܿ ܠܟܸܣܠܲܝܗܝ.

  ܡܼܢ ܚܸܬܢܵܐ ܐ݇ܚܲܪܵܝܵܐ ܙܸܐ ܒܲܩܘܼܪܸܐ ܝܠܸܗ: ـ ܐܲܢ݇ܬ ܡܘܼܕ݇ ܒܸܚܫܵܒܼܵܐ ܝܘܸܬ؟ ܗܵܘ ܓ̰ܲܘܘܼܒܸܐ ܝܠܸܗ: ـ ܚܙܝܼ ܓܵܘ ܟܡܵܐ ܕܲܩܝܼܩܸ̈ܐ ܒܸܕ ܡܵܛܝܵܐ ܠܲܐܟܼܵܐ! ܘܒܸܩܪܵܝܵܐ ܝܠܸܗ ܠܒܲܟܼܬܸܗ. ܒܫܡܵܥܬܵܐ ܕܩܵܠܵܐ ܕܓܲܒܼܪܘܼܗܿ ܣܲܡܪܝܼܕܵܐ ܪܲܦܘܼܝܘܼܗܝ ܝܠܵܗܿ ܡܵܐܢܵܐ ܕܓܵܘ ܐܝܼܕܘܼܗܿ ܘܒܸܪܚܵܛܵܐ ܡܲܡܛܘܼܝܘܼܗܿ ܝܠܵܗܿ ܓܵܢܘܼܗܿ ܬܵܡܵܐ.

   ܒܵܒܵܐ ܐ݇ܡܵܪܵܐ ܝܠܸܗ: ـ ܐܲܢܬ݇ ܩܪܸܡܠܘܼܟܼ. ܙܵܘܘܼܪܬܵܐ ܕܕܲܗܒܼܵܐ ܙܸܐ ܕܝܼܘܼܟܼ ܝܠܵܗܿ. ܐܝܼܢܵܐ ܐ݇ܡܘܼܪܝܼ ܕܵܐܟܼܝܼ ܒܪܵܬܝܼ ܚܲܕ݇ ܗܵܕܟܼܵܐ ܫܘܼܚܠܸܦܬܵܐ ܝܠܵܗܿ؟ ܚܸܬܢܵܐ ܐ݇ܡܵܪܵܐ ܝܠܸܗ: ـ ܟܠ ܚܲܕ݇ ܓܲܒܼܪܵܐ ܓܵܪܵܓ ܝܵܕܥܸܐ ܕܵܐܟܼܝܼ ܚܲܡܸܐ ܠܵܗܿ ܒܲܟܼܬܸܗ. ܚܙܝܼ ܡܼܢ ܗܵܝ ܒܪܵܬܵܐ ܕܐ݇ܡܸܪܘܼܟܼ ܪܵܒܵܐ ܠܸܫܵܢܵܢܬܵܐ ܝܠܵܗܿ، ܡܘܼܕ ܒܲܟܼܬܵܐ ܒܘܼܓ̰ܪܵܐ ܝܘܸܢ. ܐܲܝܟܼ ܚܕܵܐ ܡܲܠܟܬܵܐ ܟܸܐ ܚܵܕܪܵܐ ܘܗܲܠ ܐܸܕܝܘܿܡ ܙܸܐ ܟ̰ܘܼ ܐ݇ܢܵܫܵܐ ܩܵܠܘܼܗܿ ܠܸܐ ܝܠܸܗ ܫܡܝܼܥܘܼܗܝ.

   ܗܵܝܓܵܗ ܒܵܒܵܐ ܓ̰ܲܘܘܼܒܸܐ ܝܠܸܗ: ـ ܟ̰ܲܝܒܘܼ ܩܵܬܘܼܟܼ. ܘܙܵܘܘܼܪܬܵܐ ܕܕܲܗܒܼܵܐ ܒܝܵܗܒܼܘܼܗܿ ܝܠܸܗ ܩܵܬܘܼܗܝ. ܗܵܝܓܵܗ ܫܲܪܘܼܝܸܐ ܝܠܵܗܿ ܡܸܫܬܘܼܬܵܐ ܘܟܠܘܿܢܬܲܝܗܝ ܒܸܐܟܼܵܠܵܐ ܘܒܸܫܬܵܝܵܐ ܝܢܵܐ ܒܚܲܕܘܼܬܵܐ.