ܠܝܠܐ ܕܝܠܕܐ

ܠܝܠܐ ܕܝܠܕܐ 

                   ܫܡܥܘܢ ܒܝܬ ܐܝܫܘܥ                      

                              

    ܒـܬܸܫــܖ̈ܝܼܸـܐ، ܚܲــܕ݇ ܒܵـܬ݇ܪ ܕܗܵܘ ܐ݇ܚܸـܪ݇ܢܵــܐ ܒܸܟـܪܵܝܵܐ ܗ݇ܘܵܘ ܝܵـܘܡܵـܢܸ̈ܐ

    ܫܸـܡـܫܵـܐ ܟـܠܝـܘܿܡ ܡܲـܒܝـܘܼܢܸـܐ ܗ݇ܘܵܐ ܕܒـܘܼܫ ܓ̰ܲܠـܕܸܐ ܒܵܥܸـܐ ܓܵـܢܸـܐ

    ܚܲܩܠܵܢܸ̈ܐ ܬܘܼܠܩܘܼܗܝ ܗ݇ܘܵܘ ܫܘܼܦܪܲܝܗܝ، ܬܦܝܼܚܸ̈ܐ ܛܲܖ̈ܦܸܐ ܕܐܝܼܠܵܢܸ̈ܐ  

    ܚܸܫܟܵـܐ ܘܩܲـܪܬܵܐ ܒܫܸܢـܬܵܐ ܕܡܵـܘܬܵܐ ܡܲܛܠـܘܼܝܲܝܗܝ ܗ݇ܘܵܘ ܐܝܼـܠܵـܢܸ̈ܐ

   ܐܵܗܵܐ ܗ݇ܘܵܐ ܚܕܵܐ ܥܘܼܢܝܼܬܵܐ ܡܼܢ ܐܲܪܒܲܥܣܲܪ ܥܘܼܢܝܵܬܸ̈ܐ ܕܫܸܥܖܸ̈ܐ ܡܘܼܠܚܸܡܸ̈ܐ ܒܝܲܕ ܡܢܵܚܵܐ ܪܵܒܝܼ ܐܲܕܵܝ ܐܲܠܚܵܐܨ ܒܫܸܢ݇ܬܵܐ 1952 ܡܸܢܝܵܢܵܐ 8 ܕܡܓܼܲܠܬܵܐ ܕܓܸܠܓܵܡܸܫ. ܪܵܒܝܼ ܒܐܵܗܵܐ ܡܲܠܚܲܡܬܸܗ ܗܘܼܡܵܣܵܝܬܵܐ ܒܸܡܛܵܝܵܐ ܝܠܸܗ ܬܵܡܵܐ ܩܲܕ ܕܘܼܢܝܸܐ ܫܘܼܪܝܼܬܵܐ ܗ݇ܘܵܐ ܒܸܛܡܵܪܵܐ ܓܵܘ ܚܸܫܟܵܐ ܘܥܲܡܛܵܢܵܐ ܗ.ܕ ܫܸܡܫܵܐ ܡܲܟܘܼܣܘܼܗܿ ܗ݇ܘܵܐ ܦܲܐܬܘܼܗܿ ܡܼܢ ܥܲܠ ܦܲܠܝܼܛܵܐ ܕܝܼܲܢ: ܐܲܪܥܵܐ.    

 ܚܲـܕ݇ܟـܡܵܐ ܡܼܢ ܡܓܼـܘܼܫܸ̈ܐ ܟܲܠـܕܵܝܸ̈ܐ ܒܚܲـܕ݇ ܡܼܢ ܕܐܵܢـܝ݇ ܠܲܝـܠܵـܘܵܬܸ̈ܐ                                       

     ܒܫܲـܗܲܪܬܵܐ ܝـܬܝܼܒܼܸ̈ܐ ܘܚܲܫـܒـܘܼܢܸ̈ܐ، ܬܲܚـܡـܘܼܢܸ̈ܐ ܠܸܚـܪܵܒܼܵܐ ܕܐܵܬܸܐ

     ܡܸܢܫܸܠܬܵܢܸܐ ܚܕܸܐ ܠܸܗ ܠܸܒܲܝܗܝ ܕܚܙܸܐ ܠܗ݇ܘܿܢ ܒܲܗܪܵܐ ܒܟܵܘܵܬܸ̈ܐ

      ܫܸܡܫܵـܐ ܡܼܢ ܝܵܘܡܵـܐ ܕܩܲـܕ݇ܡ ܡܸܢܸـܗ، ܓ̰ܲܠܕܸܐ ܡـܘܼܒܝܸܢܵـܗ ܦܲܐܬܸܗ    

   ܠܲܐܟܼܵܐ ܐ݇ܢܵܫܵܐ ܒܸܢܦܵܠܵܐ ܝܠܸܗ ܒܬܲܚܡܲܢܬܵܐ. ܟܝܵܢܵܐ ܗ.ܕ ܐܲܪܥܵܐ ܘܫܡܲܝ ـ ܫܡܲܝܸ̈ܐ، ܟܠܲܝܗܝ ܦܝܼܫܸ̈ܐ ܝܢܵܐ ܬܘܼܩܢܸܩܸ̈ܐ ܒܚܲܕ݇ ܚܲܝܠܵܐ ܥܸܠܵܝܵܐ ܘܩܵܬܲܝܗܝ ܦܝܼܫܵܐ ܝܠܸܗ ܪܫܝܼܡܵܐ ܚܲܕ݇ ܪܘܼܫܡܵܐ ܠܵܐ ܡܸܫܬܲܚܠܦܵܢܵܐ ܐܲܡܝܼܢܵܝܵܐ ܘܐܲܒܲܕܝܼܢܵܝܵܐ ܕܝܼܠܵܗܿ ܦܠܝܼܚܬܵܐ ܥܲܠܸܗ ܚܕܵܐ ܐܝܼܕܵܐ ܕܥܸܠܵܝܵܐ ܫܘܼܒܼܚܵܐ ܠܫܸܡܸܗ. ܒܸܐܡܵܪܵܐ ܝܘܲܚ: ـ ܠܵܐ ܡܸܫܬܲܚܠܦܵܢܵܐ ܝܲܥܢܸܐ ܐܸܢ ܚܲܕ݇ ܐܲܝܟܼ ܐܸܦܣܝܼܠܘܿܢܵܐ ܐܵܗܵܐ ܛܲܟܼܣܵܐ ܟܝܵܢܵܝܵܐ ܐܲܡܝܼܢܵܝܵܐ ܘܐܲܒܲܕܝܼܢܵܝܵܐ ܦܲܪܬܸܠ ܐܵܘ ܥܲܪܩܸܠ، ܟܠܲܝܗܝ ܖ̈ܵܡܸܐ ܟܘܼܦܸ̈ܐ ܕܬܗܘܿܡܸ̈ܐ ܒܸܕ ܦܲܪܓܸܙܝܼ ܘܠܸܐ ܦܵܐܸܫ ܟ̰ܘܼ ܚܲܕ݇ ܡܸܢܕܝܼ ܐܸܠܵܐ ܩܝܵܡܲܬ ܘܬܝܵܡܲܬ.  ܐܲܢܸܐ ܬܲܚܡܲܢܝܵܬܸ̈ܐ ܫܘܿܥܝܼܬܵܢܵܝܸ̈ܐ ܒܘܼܬ ܠܲܝܠܸܐ ܕܝܲܠܕܵܐ ܝܲܢ ܐ݇ܚܸܖ̈݇ܢܸܐ ܕܝܼܢܵܐ ܠܒܲܪܵܐ (ܠܒܼܲܕܲܪ) ܡܼܢ ܢܵܡܘܿܣܵܐ ܟܝܵܢܵܝܵܐ، ܟܠܲܝܗܝ ܝܢܵܐ ܗܲܩܝܵܬܸ̈ܐ ܕܥܲܠ ܡܲܖ̈ܙܵܢܸܐ ܕܬܲܢܘܼܖܸ̈ܐ (ܚܸܣܦܵܐ) ܕܣܸܬܘܵܐ ܗ.ܕ ܕܐ݇ܢܵܫܸ̈ܐ ܒܘܼܕܵܠܸ̈ܐ.         

   ܡܘܼܕܟܼܸܪܝܼ ܕܐܸܢ ܚܲܕ݇ ܐܸܦܣܝܼܠܘܿܢܵܐ ܡܼܢ ܟܝܵܢܵܐ (ܐܲܪܥܵܐ ܘܫܡܲܝܵܐ) ܦܵܐܸܫ ܢܬܝܼܪܵܐ، ܠܵܐ ܕܘܼܢܝܸܐ ܒܸܕ ܦܵܝܫܵܐ، ܠܵܐ ܠܲܝܠܸܐ ܘܠܵܐ ܙܸܐ ܝܵܘܡܵܐ. ܐܝܼܬ ܗ݇ܘܵܐ ܠܲܢ ܚܲܕ݇ ܦܲܥܠܵܐ ܪܵܒܵܐ ܣܵܒܼܵܐ ܐ݇ܬܝܼܵܐ ܗ݇ܘܵܐ ܡܼܢ ܡܵܬܘܵܬܸ̈ܐ ܕܐܸܠܬܸܚܬ݇ ܩܲܕ ܦܵܠܸܚ ܗ݇ܘܵܐ ܫܘܼܓܼ݇ܠܵܐ ܕܡܸܐܪܵܐ ܕܝܼܠܸܗ ܚܲܕ݇ ܫܘܼܓܼܠܵܐ ܥܲܣܩܵܐ ܘܝܵܩܘܿܪܵܐ، ܐܵܦ ܗܵܘ ܙܸܐ ܩܵܐ ܚܲܕ݇ ܐ݇ܢܵܫܵܐ ܣܵܒܼܵܐ ܥܒܼܝܼܪܵܐ ܒܫܸܢܸ̈ܐ؛ ܐܝܼܢܵܐ ܐܵܗܵܐ ܡܼܢ ܥܸܨܝܘܼܬܸܗ ܗ݇ܘܵܐ. ܥܲܡܸܗ ܙܸܐ ܐܝܼܬ ܗ݇ܘܵܐ ܚܲܕ݇ ܛܲܠܝܵܐ ܕ11 ܝܲܢ 12 ܫܸܢܸ̈ܐ. ܣܵܒܼܵܐ ܛܠܸܒܠܸܗ ܡܼܢ ܒܢܲܝ̈ ܡܵܬܵܐ ܕܡܲܦܠܸܚܝܼܠܸܗ ܒܚܲܕ݇ ܗܲܩܵܐ ܡܸܠܝܵܐ ܕܬܪܸܝܢ ܩܵܐ ܚܲܕ݇ ܗ.ܕ ܩܵܐ ܓܵܢܸܗ ܘܒܪܘܿܢܸܗ ܗܲܩܵܐ ܕܚܲܕ݇ ܓܲܒܼܪܵܐ ܝܵܗܒܼܝܼ.                                          

  ܐܝܼܬܵܐ ܐܵܗܵܐ ܝܵܠܘܿܢܵܐ ܡܸܣܟܸܢܵܐ ܟܸܐ ܗܵܘܸܐ ܗ݇ܘܵܐ ܒܲܩܘܼܪܸܐ ܫܘܼܐܵܠܸ̈ܐ ܡܼܢ ܒܵܒܸܗ؛ ܗܵܘ ܟܡܵܐ ܕܝܼܗ݇ܘܵܐ ܚܲܝܠܵܐ ܕܡܘܼܚܸܗ ܟܸܐ ܓ̰ܲܘܸܒ ܗ݇ܘܵܐ ܠܸܗ. ܝܵܠܘܿܢܵܐ ܙܸܐ ܟܠܲܝܗܝ ܐܲܢܸܐ ܦܘܼܢܵܝܸ̈ܐ ܕܐܵܒܼܘܼܗܝ ܟܸܐ ܫܵܩܸܠ ܗ݇ܘܵܐ ܠܗ݇ܘܿܢ ܒܐܝܼܩܵܪܵܐ. ܗܵܘ ܝܵܘܡܵܐ ܒܠܲܝܠܸܐ ܣܲܗܪܵܐ ܒܲܕܪܝܼ ܗ݇ܘܵܐ ܘܫܸܡܫܝܼ ܣܲܗܪܵܐ ܒܲܠܒܘܼܨܸܐ ܗ݇ܘܵܐ ܗܲܪ ܟ̰ܸܡ ܐܲܝܟܼ ܒܲܗܪܵܐ ܕܫܸܡܫܵܐ ܒܬܸܫܖ̈ܝܼܸܐ. ܝܵܠܘܿܢܵܐ ܒܘܼܩܸܪܸܗ ܡܼܢ ܐܵܒܼܘܼܗܝ: ـ ܒܵܒܝܼ! ܐ݇ܡܸܪܸܗ: ـ ܒܸܗ݇ܢܵܐ ܒܪܘܿܢܝܼ. ܐ݇ܡܸܪܸܗ: ـ ܐܲܢܸܐ ܣܲܗܖܸ̈ܐ ܓܘܼܖܸ̈ܐ ܥܲܬܩܘܼܢܸܐ ܝܢܵܐ ܘܒܸܚܲܪܬܵܐ ܣܲܗܖܸ̈ܐ ܚܲܕ݇ܬܸ̈ܐ ܡܲܓ̰ܝܘܼܢܸܐ ܝܢܵܐ، ܒܲܣ ܐܵܢܝܼ ܥܲܬܝܼܩܸ̈ܐ ܡܘܼܕ݇ ܟܸܐ ܥܵܒܼܕܝܼܠܗ݇ܘܿܢ؟ ܣܵܒܼܵܐ ܐ݇ܡܸܪܸܗ: ـ ܒܪܘܿܢܝܼ! ܐܲܢܸܐ ܣܲܗܖܸ̈ܐ ܓܘܼܖܸ̈ܐ ܟܸܐ ܓ̰ܲܡܥܝܼܠܗ݇ܘܿܢ ܓܵܘ ܚܕܵܐ ܩܸܪܛܵܠܵܐ ܘܟܸܐ ܫܵܩܠܝܼ ܚܲܕ݇ ܚܲܕ݇ ܟܸܐ ܕܵܝܩܝܼ ܠܗ݇ܘܿܢ ܒܡܲܕܝܼܩܬܵܐ(ܣܲܬܵܐ؛ ܗܵܘܲܢܓ). ܗܵܝܓܵܗ ܟܸܐ ܒܲܙܩܝܼܠܗ݇ܘܿܢ ܓܵܘ ܫܡܲܝܵܐ ܘܟܸܐ ܗܵܘܝܼ ܟܵܘܟܼܒܼܸ̈ܐ. ܝܵܠܘܿܢܵܐ ܒܪܸܫܸܗ ܝܗܸܒܼܠܸܗ ܬܘܼܟܼܠܵܢܵܐ ܘܐ݇ܡܸܪܵܗ: ܦܘܼܪܡܸܠܝܼ.                                                    

   ܐܵܗܵܐ ܡܫܘܼܚܬܵܐ ܕ14 ܥܘܼܢܝܵܬܸ̈ܐ ܕܪܵܒܝܼ، ܟܸܐ ܗܵܘܝܵܐ ܕܗܵܕܟܼܵܐ ܦܲܫܘܼܩܘܼܗܿ: ܒܡܸܠܝܘܼܢܸ̈ܐ ܫܸܢܸ̈ܐ ܚܲܝܘܼܬܵܐ ܕܒܲܪܢܵܫܵܐ ܥܲܠ ܦܲܐܬܵܐ ܕܐܵܗܵܐ ܦܲܠܝܼܛܵܐ ܥܲܦܪܵܢܵܐ، ܗܲܪ ܗܵܕܵܐ ܝܠܵܗܿ ܗ݇ܘܝܼܬܵܐ ܘܗܲܪ ܗܵܕܵܐ ܙܸܐ ܒܸܕ ܗܵܘܝܵܐ، ܠܵܐ ܒܸܕ ܙܵܝܕܵܐ ܘܠܵܐ ܙܸܐ ܒܸܕ ܒܲܨܪܵܐ. ܗ.ܕ ܡܼܢ ܚܘܼܬܵܡܵܐ ܕܐܵܕܵܖܸ̈ܐ، ܠܲܝܠܸܐ ܘܝܵܘܡܵܐ ܟܠ ܚܲܕ݇ ܒܸܕ ܗܵܘܝܼ 12 ܣܵܥܵܬܸ̈ܐ ܝܲܥܢܸܐ ܫܲܘܝܸ̈ܐ (ܒܲܪܵܒܲܪ). ܡܼܢ ܬܵܡܵܐ ܩܵܐ ܗܲܠ ܚܘܼܬܵܡܵܐ ܕܬܸܫܖ̈ܝܼܸܐ ܟܠ ܝܵܘܡܵܐ ܚܲܕ݇ ܕܲܩܝܼܩܵܐ ܡܼܢ ܙܪܵܩܵܐ ܠܸܓܢܵܝܵܐ ܒܸܕ ܗܵܘܸܐ ܒܨܵܪܵܐ. ܗܲܠ ܕܩܲܕ ܚܲܕ݇ ܡܼܢ ܠܲܝܠܵܘܵܬܸ̈ܐ ܕܬܸܫܖ̈ܝܼܸܐ ܗܵܘܸܐ ܗܵܘ ܠܲܝܠܸܐ ܟ̰ܸܡ ܝܲܪܝܼܟܼܵܐ ܕܫܸܢ݇ܬܵܐ ܕܟܸܐ ܐܵܡܪܲܚܠܸܗ ܠܲܝܠܸܐ ܕܝܲܠܕܵܐ؛ ܗܲܠܒܲܬ ܕܠܵܐ ܦܲܟܲܪܬܵܐ ܕܥܲܠ ܣܘܼܪܓܵܕܵܐ ܓܪܝܼܓܘܿܪܵܝܵܐ ܘܣܘܼܪܓܵܕܵܐ ܓ̰ܲܠܵܠܵܝܵܐ (تقویم جلالی) ܕܐܝܼܬ ܠܸܗ ܚܲܕܥܣܲܪ ܝܵܘܡܵܢܸ̈ܐ ܙܵܘܕܵܐ ܒܲܨܘܿܪܵܐ.          

   ܡܫܲܡܗܘܼܬܵܐ ܕܠܲܝܠܸܐ ܐ݇ܚܲܪܵܝܵܐ ܕܬܸܫܖ̈ܝܼܸܐ (ܠܲܝܠܸܐ ܕܝܲܠܕܵܐ) ܦܝܼܫܬܵܐ ܝܠܵܗܿ  ܩܵܐ ܒܲܪܢܵܫܵܐ ܡܼܢ ܕܗܵܘ ܙܲܒܼܢܵܐ ܕܩܲܕ ܐܵܒܼܵܗܵܬܲܢ ܐܵܬܘܼܪ ـ ܟܲܠܕܵܝܸ̈ܐ ܗܵܠܵܐ ܠܸܐ ܗ݇ܘܵܐ ܡܘܼܫܟ̰ܚܘܼܗܝ ܫܒܼܷܝܼܠܵܐ ܕܬܲܪܲܨܬܵܐ ܕܙܓܼܵܓܼܵܐ (ܫܘܼܫܵܐ) ܝܲܢ ܒܸܪܘܼܠܵܐ (ܟܪܝܼܣܬܵܐܠ) ܩܲܕ ܒܝܼܸܗ ܬܲܩܢܸܩܝܼ ܗ݇ܘܵܘ ܠܵܗܿ ܬܸܠܸܣܩܘܿܦܵܐ ܕܗܲܓܝܼ ܗ݇ܘܵܘ ܥܲܠ ܟܪܘܼܟܼܝܵܐ (ܚܕܵܪܵܐ) ܕܦܲܠܝܼܛܸ̈ܐ. ܠܲܝܠܸܐ ܕܝܲܠܕܵܐ ܒܡܲܥܢܵܝܵܐ ܕܗܲܨܲܠܬܵܐ ܕܚܲܕ݇ ܝܵܘܡܵܐ ܝܲܪܝܼܟܼܵܐ ܡܼܢ ܓܵܘ ܒܲܛܢܵܐ ܕܚܲܕ݇ ܠܲܝܠܸܐ ܝܲܪܝܼܟܼܵܐ ܝܠܸܗ. ܐܝܼܢܵܐ ܦܘܼܢܵܝܵܐ ܩܵܐ ܣܘܼܟܵܠܵܐ ܕܠܷܲܝܠܸܐ ܕܝܲܠܕܵܐ ܠܸܐ ܝܠܸܗ ܩܲـܕ ܕܘܼܢܝܸـܐ ܒܸܚܪܵܒܼܵـܐ ܗ݇ܘܵܐ ܘܐܲܠܵܗܵܐ ܪܚܸܡܠܸـܗ ܥܲܠܲܢ ܘܡܘܼܠܸܕܲܚܠܸܗ ܚܲܕ݇ ܝܵܘܡܵܐ ܕܒܘܼܫ ܓ̰ܲܠܕܸܐ ܙܪܸܩܠܸܗ ܡܼܢ ܝܵܘܡܵܐ ܐ݇ܚܸܪ݇ܢܵܐ.       ܟܠܲܝܗܝ ܦܘܼܫܵܩܸ̈ܐ ܕܒܲܪܢܵܫܵܐ ܝܘܼܗܒܼܲܝܗܝ ܝܠܸܗ ܩܵܐ ܐܲܢܸܐ ܓܸܕܫܸ̈ܐ ܟܝܵܢܵܝܸ̈ܐ ܐܲܝܟܼ ܫܘܼܚܠܵܦܵܐ ܕܐܲܩܡܸ̈ܐ، ܩܲܘܲܡܬܵܐ ܕܛܘܿܦܵܢܸ̈ܐ ܘܥܲܠܥܵܠܸ̈ܐ ܘܫܘܼܚܠܵܦܵܐ ܕܡܸܬܚܵܐ ܕܠܲܝܠܸܐ ܘܝܵܘܡܵܐ، ܟܠܲܝܗ ܐܲܢܸܐ ܗ݇ܘܝܼܸܐ ܝܢܵܐ ܒܥܸܠܬܵܐ ܕܒܲܨܘܼܪܘܼܬܵܐ ܕܝܘܼܠܦܵܢܵܐ ܕܒܲܪܢܵܫܵܐ ܩܲܕ݇ܡܵܝܵܐ. ܒܲܪܼܢܵܫܵܐ ܩܲܕ݇ܡܵܝܵܐ ܩܵܐ ܦܲܪܡܵܝܵܬܵܐ ܕܓܸܕܫܸ̈ܐ ܘܩܲܘܲܡܝܵܬܸ̈ܐ ܕܟܝܵܢܵܐ ܬܘܼܚܡܸܢܵܐ ܘܒܸܪܝܵܐ ܝܠܸܗ ܚܲܕ݇ܟܡܵܐ ܦܘܼܫܵܩܸ̈ܐ ܕܒܸܕܒܼܵܩܵܐ ܗ݇ܘܵܐ ܥܲܡ ܝܕܵܥܬܸܗ ܘܝܘܼܠܦܵܢܸܗ. ܐܝܼܢܵܐ ܐܸܕܝܘܿܡ ܟܸܐ ܝܵܕܥܲܚ ܕܟܠܲܝܗܝ ܐܲܢܸܐ ܩܲܘܲܡܝܵܬܸ̈ܐ ܬܲܒܥܵܐ ܝܢܵܐ ܥܲܠ ܩܵܢܘܿܢܸ̈ܐ ܕܟܝܵܢܵܐ. ܘܐܲܢܸܐ ܩܵܢܘܿܢܸ̈ܐ ܗܵܕܟܼܵܐ ܚܲܝܠܵܢܸ̈ܐ ܝܢܵܐ ܕܒܲܪܢܵܫܵܐ   ܒܟܠܵܗܿ ܚܲܪܝܼܦܘܼܬܵܐ ܕܗܵܘܢܸܗ ܗܵܠܵܐ ܠܸܐ ܝܠܸܗ ܡܸܨܝܵܐ ܕܫܲܚܠܸܦ ܠܛܲܟܼܣܵܐ ܕܟܝܵܢܵܐ ܗ.ܕ ܐܲܪܥܵܐ ܟܸܐ ܚܵܕܪܵܐ ܚܕܵܪܵܐ ܕܫܸܡܫܵܐ ܘܟ̰ܘܼ ܚܲܕ݇ ܐ݇ܢܵܫܵܐ ܪܵܡܵܐ ܝܲܢ ܟܘܼܦܵܐ ܠܸܐ ܡܵܨܸܐ ܕܚܲܕ݇ ܪܦܵܦܘܿܢܵܐ ܡܲܟܠܸܐ ܠܫܸܡܫܵܐ ܡܼܢ ܓܢܵܝܬܵܐ.                                    ܐܝܼܢܵܐ ܐܲܚـܢܲܢ ܐܵܬܘܼܖ̈ܵܝܸܐ ܩܲܕ ܬܵܘܕܝܼـܬܵܐ ܡܫܝܼܚܵܝـܬܵܐ ܐܲܝܟܼ ܚـܕܵܐ ܣـܘܼܕܪܵܐ ܩܲܕܝܼܫܬܵܐ ܩܛܝܼܒܼܘܼܗܿ ܝܘܲܚ ܥܲܠ ܦܲܓܼܪܲܢ ܘܪܘܼܚܲܢ، ܟܸܐ ܗܲܡܸܢܲܚ ܩܲܕ ܝܼܫܘܿܥ ܡܫܝܼܚܵܐ ܒܲܪ ܡܲܪܝܲܡ ܒܲܪ ܐܲܠܵܗܵܐ؛ ܦܝܼܫܠܸܗ ܝܠܝܼܕܵܐ ܒܒܸܝܬ ܠܚܸܡ ܕܝܗܘܼܕܵܐ. ܝܠܝܼܕܘܼܬܸܗ ܩܲܕܝܼܫܬܵܐ ܒܸܟܠܵܝܵܐ ܝܠܵܗܿ ܒܝܵܘܡܵܢܸ̈ܐ ܕܩܲܕ݇ܡ ܝܲܢ ܒܵܬ݇ܪܵܐ ܕܠܲܝܠܸܐ ܕܝܲܠܕܵܐ ܘܡܼܢ ܗܵܕܵܐ ܝܠܵܗܿ ܕܗܵܠܵܐ ܐܵܗܵܐ ܠܲܝܠܸܐ ܝܲܪܝܼܟܼܵܐ ܕܫܸܢ݇ܬܵܐ ܟܸܐ ܡܫܲܡܗܲܚܠܸܗ ܝܲܠܕܵܐ ܕܡܵܪܲܢ.                             

ܩܲܕܝܼܫܬܵܐ ܩܛܝܼܒܼܘܼܗܿ ܝܘܲܚ ܥܲܠ ܦܲܓܼܪܲܢ ܘܪܘܼܚܲܢ، ܟܸܐ ܗܲܡܸܢܲܚ ܩܲܕ ܝܼܫܘܿܥ ܡܫܝܼܚܵܐ ܒܲܪ ܡܲܪܝܲܡ ܒܲܪ ܐܲܠܵܗܵܐ؛ ܦܝܼܫܠܸܗ ܝܠܝܼܕܵܐ ܒܒܸܝܬ ܠܚܸܡ ܕܝܗܘܼܕܵܐ. ܝܠܝܼܕܘܼܬܸܗ ܩܲܕܝܼܫܬܵܐ ܒܸܟܠܵܝܵܐ ܝܠܵܗܿ ܒܝܵܘܡܵܢܸ̈ܐ ܕܩܲܕ݇ܡ ܝܲܢ ܒܵܬ݇ܪܵܐ ܕܠܲܝܠܸܐ ܕܝܲܠܕܵܐ ܘܡܼܢ ܗܵܕܵܐ ܝܠܵܗܿ ܕܗܵܠܵܐ ܐܵܗܵܐ ܠܲܝܠܸܐ ܝܲܪܝܼܟܼܵܐ ܕܫܸܢ݇ܬܵܐ ܟܸܐ ܡܫܲܡܗܲܚܠܸܗ ܝܲܠܕܵܐ ܕܡܵܪܲܢ.

                                              

    ܩܘܼܡـܘܼܢ ܬܲܩܬܸܩܘܼܢ ܠܬܲܖ̈ܥܵܢܸܐ، ܘܟܠ ܚܲـܕ݇ ܩܵــܐ ܫܒܼܵܒܼܸܗ ܬܲܢܸـܐ

    ܙܪܸܩܠܸـܗ ܫܸܡܫܵܐ ܕܙܲܕܝܼܩܘܼܬܵܐ، ܠܵܐ ܙܕܸܥܡـܘܿܢ ܐ݇ܚܸܪ݇ܢ ܠܸܐ ܓܵܢܸـܐ  

    ܒܝܼـܫܸ̈ــܐ ܐܵܦܸــܢ ܕܕܵܪܝܼ ܓܸــܐܖܸ̈ܐ، ܐܵܦ ܚܲــܕ݇ ܠـܢـܝܼـܫܸــܗ ܠܸـܐ ܚܵܢܸـܐ

    ܒܸـܬ ܬܲܠܸܚܠܗ݇ܘܿܢ ܩܲܨܖܸ̈ܐ ܕܫܘܼܩܪܵܐ، ܠܫܵܘܦܵܝ ܚܘܼܒܵـܐ ܒܸܕ ܒܵܢܸـܐ

    ܥܸܐܕܵܐ ܕܝܵܠܕܵܐ ܗ݇ܘܸܐ ܠܸܗ ܠܟـܠܲܢ ܚܲܕ݇ ܝܵܘܡܵـܐ ܚܸܕܝܵـܐ ܘܦܨܝܼܚܵـܐ

    ܬܲܢܲـܚ ܟـܠܲـܢ ܚܲـܕ݇ ܩܵــܐ ܚܲـܒܼـܪܸܗ:  ܥܸـܐܕܵܘܟܼـܘܿܢ ܗܵܘܸܐ ܒܪܝܼـܟܼܵـܐ