ܐܘܿܫܘܿ

   ܐ݇ܢܵܫܵܐ ܒܝܼܫܵܐ ܟܸܐ ܡܲܢܬܸܐ ܪܵܒܵܐ، ܩܲܕ ܟܲܕ ܢܵܦܸܠ                          

            ܢܦܵܠܬܘܼܗܝ ܗܵܘܝܵܐ ܡܵܪ ܩܵܠܵܐ. (ܡܪܝ ܐܦܪܡ)

           

 ܐܟܪܐ ܣܒܼܐ ܒܪܩܘܒܼܠ ܐܠܗܐ

                                                      

ܐܘܿܫܘܿ

   ܚܲܕ݇ ܝܵܘܡܵܐ، ܚܲܕ݇ ܐܲܟܵܪܵܐ ܣܵܒܼܵܐ، ܡܢܲܣܝܵܐ (ܡܵܪ ܢܸܣܝܵܢܵܐ) ܘܡܗܝܼܪܵܐ؛ ܕܚܲܕ݇ ܙܲܕܝܼܩܵܐ ܓܘܼܪܵܐ ܗ݇ܘܵܐ، ܪܵܒܵܐ ܟܪܝܼܒܵܐ ܗ݇ܘܵܐ ܡܼܢ ܐܲܠܵܗܵܐ. ܒܸܨܠܘܼܬܸܗ ܕܨܲܦܪܵܐ ܐ݇ܡܸܪܸܗ ܩܵܐ ܐܲܠܵܗܵܐ: ܥܸܨܝܵܐ ܝܘܸܢ ܕܐܲܡܪܸܢܘܼܟܼ ܚܲܕ݇ ܫܪܵܪܵܐ. ܒܲܣܵܐ ܝܠܵܗܿ ܐ݇ܚܸܪ݇ܢܵܐ! ܐܲܢ݇ܬ ܠܸܐ ܝܵܕܥܸܬ ܐܵܦ ܠܐܵܠܲܦ ܘܒܸܝܬ ܕܐܲܟܵܪܘܼܬܵܐ! ܐܝܼܡܲܢ ܕܣܢܝܼܩܸ̈ܐ ܝܘܲܚ ܠܡܸܛܖ̈ܵܬܸܐ، ܠܲܝܬ ܟ̰ܘܼ ܚܲܕ݇ ܡܸܛܪܵܐ ܘܐܝܼܡܲܢ ܕܠܸܐ ܝܘܲܚ ܣܢܝܼܩܸ̈ܐ ܥܲܠܲܝܗܝ ܡܲܫܦܘܼܟܼܲܝܗܝ ܝܘܸܬ ܥܲܠܲܢ. ܡܘܼܕܝ݇ ܗܲܒܲܣ ܫܘܼܓܼ݇ܠܵܐ ܝܠܸܗ ܐܵܗܵܐ! ܐܸܢ ܐܲܢ݇ܬ ܠܸܐ ܝܘܸܬ ܒܝܼܕܵܥܵܐ ܐܲܟܵܪܘܼܬܵܐ، ܗܵܝܓܵܗ ܡܵܨܸܬ ܒܲܩܪܸܬ ܡܸܢܝܼ. ܐܵܢܵܐ ܕܒܼܝܼܚܘܼܗܿ ܝܘܸܢ ܟܠܵܗܿ ܚܲܝܘܼܬܝܼ ܩܵܐ ܐܵܗܵܐ ܫܘܼܓܼ݇ܠܵܐ. ܗܲܒܼܠܝܼ ܚܲܕ݇ ܦܘܼܪܣܵܐ ܕܒܐܲܩܡܵܐ ܕܲܥܬܝܼܕ ܐܵܢܵܐ ܫܵܩܠܸܢ ܦܘܼܣܩܵܢܵܐ ܘܚܵܙܲܚ ܕܡܘܼܕܝܼ ܒܸܕ ܩܲܘܸܡ.                        

   ܒܐܵܢܝܼ ܙܲܒܼܢܸ̈ܐ ܥܒܼܝܼܖܸ̈ܐ ܐ݇ܢܵܫܸ̈ܐ ܗܵܕܟܼܵܐ ܡܗܘܼܡܢܸܐ ܗ݇ܘܵܘ ܕܟܠܘܿܢܬܲܝܗܝ ܟܸܐ ܡܵܨܝܼ ܗ݇ܘܵܘ ܗܲܡܙܸܡܝܼ ܗ݇ܘܵܘ ܬܪܝܼܨܵܐܝܼܬ ܥܲܡ ܐܲܠܵܗܵܐ ܘܟܸܐ ܗܲܡܸܢܝܼ ܗ݇ܘܵܘ ܕܠܵܐ ܟ̰ܘܼ ܦܘܼܫܵܟܼܵܐ؛ ܒܡܵܛܝܼ ܠܦܘܼܢܵܝܵܐ. ܐܲܠܵܗܵܐ ܐ݇ܡܸܪܸܗ: ܨܦܵܝܝܼ. ܐܵܗܵܐ ܐܲܩܡܵܐ ܐܲܢ݇ܬ ܫܩܘܿܠ ܦܘܼܣܩܵܢܵܐ.                                         

   ܗܵܝܓܵܗ ܐܲܟܵܪܵܐ ܫܩܸܠܸܗ ܦܘܼܣܩܵܢܵܐ ܘܪܵܒܵܐ ܚܸܕܝܵܐ ܗ݇ܘܵܐ ܒܗܵܝ ܕܐܝܼܡܲܢ ܕܒܸܛܠܵܒܵܐ ܗ݇ܘܵܐ ܫܸܡܫܵܐ، ܫܸܡܫܵܐ ܦܠܵܛܵܐ ܗ݇ܘܵܐ، ܐܝܼܡܲܢ ܕܒܥܵܝܵܐ ܗ݇ܘܵܐ ܡܸܛܖ̈ܵܬܸܐ، ܡܸܛܖ̈ܵܬܸܐ ܒܸܥܪܵܝܵܐ ܗ݇ܘܵܘ ܘܐܝܼܡܲܢ ܕܒܸܛܠܵܒܵܐ ܗ݇ܘܵܐ ܥܲܝܒܼܵܬܸ̈ܐ، ܥܲܝܒܼܵܬܸ̈ܐ ܒܸܓ̰ܡܵܥܵܐ ܗ݇ܘܵܐ. ܘܗܵܘ ܒܸܚܣܵܟܼܵܐ (ܪܲܚܩܘܼܢܵܐ) ܗ݇ܘܵܐ ܡܼܢ ܟܠܲܝܗܝ ܩܸܢܛܸ̈ܐ ܕܡܵܨܝܼ ܗ݇ܘܵܘ ܡܲܚܪܸܒܼܝܼ ܗ݇ܘܵܘ ܠܥܠܲܠܬܸܗ (ܗܵܨܝܼܠܸܗ)؛ ܠܵܐ ܦܵܘܚܸ̈ܐ ܚܲܝܠܵܢܸ̈ܐ ܘܠܵܐ ܡܸܬܗܵܘܝܵܢܘܵܬܸ̈ܐ (ܡܸܢܕܝܼܵܢܸ̈ܐ ܕܡܵܨܝܼ ܩܲܘܸܡܝܼ) ܐ݇ܚܸܖ̈݇ܢܸܐ ܠܸܐ ܡܵܨܝܼ ܗ݇ܘܵܘ ܕܡܲܚܪܸܒܼܝܼ ܗ݇ܘܵܘ ܠܥܠܲܠܬܸܗ. ܗܵܝܓܵܗ ܚܸܛܘܼܗܝ̈ ܫܘܼܪܸܐ ܠܗ݇ܘܿܢ ܒܸܪܝܵܡܵܐ ܒܸܫ ܥܸܠܸܠ ܡܼܢ ܗܵܘ ܕܐ݇ܢܵܫܸ̈ܐ ܗܵܘܝܼ ܚܸܙܝܸ̈ܐ، ܪܵܡܘܼܬܲܝܗܝ ܒܘܼܫ ܙܵܘܕܵܐ ܗ݇ܘܵܐ ܡܼܢ ܝܘܼܪܟܼܵܐ ܕܒܲܪܢܵܫܵܐ. ܗܵܘ ܪܵܒܵܐ ܚܸܕܝܵܐ ܗ݇ܘܵܐ ܘܬܘܼܚܡܸܢܸܗ: ܐܵܕܝܼܵܐ ܒܸܕ ܡܲܚܙܸܢܸܗ.                        

                

   ܗܵܝܓܵܗ ܐܝܼܡܲܢ ܕܥܠܲܠܬܵܐ ܦܝܼܫܠܵܗܿ ܚܨܝܼܕܬܵܐ، ܗܵܘ ܪܵܒܵܐ ܬܗܝܼܪܵܐ (ܡܥܘܼܓ̰ܒܵܐ) ܗ݇ܘܵܐ. ܠܲܝܬ ܗ݇ܘܵܐ ܟ̰ܘܼ ܚܲܕ݇ ܡܸܢܕܝܼ ܫܒܼܘܿܩ ܡܼܢ ܚܲܕ݇ܟܡܵܐ ܩܲܠܦܸ̈ܐ ܣܦܝܼܩܸ̈ܐ ܕܠܵܐ ܚܲܕ݇ ܚܸܛܝܼܬܵܐ ܓܵܘܲܝܗܝ. ܡܘܼܕܝܼ ܩܘܼܘܸܡܵܐ ܗ݇ܘܵܐ؟ ܚܲܕ݇ ܗܵܕܟܼܵܐ ܝܵܥܝܼܵܬܸ̈ܐ (ܓܸܠܵܠܸ̈ܐ) ܓܘܼܖܸ̈ܐ، ܗܵܕܟܼܵܐ ܓܘܼܖܸ̈ܐ ܕܡܵܨܝܼ ܝܵܗܒܼܝܼ ܚܲܕ݇ܟܡܵܐ ܚܸܛܸ̈ܐ ܐܲܪܒܥܵܐ ܬܵܩܸ̈ܐ ܒܸܫ ܓܘܼܖܸ̈ܐ ܡܼܢ ܚܸܛܸ̈ܐ ܥܝܵܕܵܝܸ̈ܐ، ܐܝܼܢܵܐ ܠܲܝܬ ܗ݇ܘܵܐ ܟ̰ܘܼ ܚܕܵܐ ܚܸܛܝܼܬܵܐ.                                       

   ܡܸܢܫܸܠܬܵܢܸܐ ܗܵܘ ܫܡܸܥܠܸܗ ܩܵܠܵܐ ܕܓܘܼܚܟܵܐ ܡܼܢ ܓܵܘ ܥܲܝܒܼܵܬܸ̈ܐ. ܐܲܠܵܗܵܐ ܗ݇ܘܵܐ ܒܸܓܚܵܟܵܐ ܘܐ݇ܡܸܪܸܗ: ܐܵܕܝܼܵܐ ܡܘܼܕܝܼ ܒܸܕ ܐܵܡܪܸܬ؟ ܣܵܒܼܵܐ ܐ݇ܡܸܪܸܗ: ܐܵܢܵܐ ܬܗܝܼܪܵܐ ܝܘܸܢ ܒܗܵܝ ܕܠܲܝܬ ܗ݇ܘܵܐ ܟ̰ܘܼ ܚܕܵܐ ܡܸܬܗܵܘܝܵܢܘܼܬܵܐ ܕܚܵܪܒܼܵܐ ܥܠܲܠܬܵܐ ܘܟܠ ܚܲܕ݇ ܡܸܢܕܝܼ ܡܘܿܬܪܵܢܵܐ ܦܝܼܫܵܐ ܗ݇ܘܵܐ ܗܘܼܕܪܵܐ ܘܝܵܥܝܼܵܬܸ̈ܐ ܪܵܒܵܐ ܨܦܵܝܝܼ ܒܓ̰ܵܪܵܐ ܗ݇ܘܵܘ ܘܥܠܲܠܬܵܐ ܪܵܒܵܐ ܩܝܼܢܬܵܐ ܘܫܲܦܝܼܪܬܵܐ ܗ݇ܘܵܐ. ܡܘܼܕܝܼ ܩܘܼܘܸܡܠܸܗ ܥܲܠ ܚܸܛ̈ܝܼ؟                                      

   ܐܲܠܵܗܵܐ ܓ̰ܘܼܘܸܒܠܸܗ: ܒܗܵܝ ܕܠܲܝܬ ܗ݇ܘܵܐ ܟ̰ܘܼ ܚܲܕ݇ ܩܸܢܛܵܐ، ܐܲܢ݇ܬ ܡܘܼܪܚܸܩܲܝܠܘܼܟܼ ܟܠܲܝܗܝ ܩܸܢܛܸ̈ܐ، ܚܸܛܸ̈ܐ ܠܸܐ ܡܵܨܝܼ ܗ݇ܘܵܘ ܕܒܵܓ̰ܪܝܼ ܗ݇ܘܵܘ ܒܗܵܝ ܕܣܢܝܼܩܸ̈ܐ ܝܢܵܐ ܠܟܘܼܬܵܫܵܐ. ܟܘܼܬܵܫܸ̈ܐ ܡܲܬ݇ܝܵܐ ܝܢܵܐ ܓܡܝܼܪܘܼܬܵܐ؛ ܐܸܢ ܠܵܐ، ܒܲܪܢܵܫܵܐ ܒܸܕ ܦܵܐܸܫ ܣܦܝܼܩ ܗܵܘܢܵܐ ܘܫܪܝܼܩܵܐ. ܐܸܢ ܟܠܲܝܗܝ ܡܸܬܡܵܨܝܵܢܘܵܬܸ̈ܐ ( ܣܢܝܼܩܘܼܝܵܬܸ̈ܐ) ܦܵܝܫܝܼ ܗܘܼܕܖܸ̈ܐ ܩܵܬܘܼܟܼ ܘܠܵܐ ܦܵܐܸܫ ܚܲܕ݇ ܩܸܢܛܵܐ ܓܵܘ ܚܲܝܘܼܬܘܼܟܼ، ܐܲܢ݇ܬ ܒܸܕ ܦܵܝܫܸܬ ܣܦܝܼܩ ܗܵܘܢܵܐ ܘܫܪܝܼܩܵܐ. ܐܲܠܵܗܵܐ ܒܝܵܗܒܼܘܼܗܿ ܝܠܸܗ ܚܲܝܘܼܬܵܐ ܒܟܠܲܝܗܝ ܩܸܢܛܘܼܗܿ.      

     ܦܘܼܫܵܩܵܐ ܒܝܲܕ: ܒܝܲܕ ܫܲܡܝܼܪܵܡ ܕ.ܦܘܼܪܝܵܐܢ