ܦܘܬܚܐ

   ܟܠ ܫܸܢ݇ܬܵܐ ܒܐܵܗܵܐ ܲܐܲܩܡܵܐ ܥܲܡ ܫܘܼܚܠܵܦܵܐ ܕܟܝܵܢܵܐ ܘܥܲܡ ܦܵܘܚܸ̈ܐ ܘܡܸܛܖ̈ܵܬܸܐ ܕܡܲܚܙܘܼܝܘܼܗܿ ܝܢܵܐ ܓܵܢܲܝܗܝ ܐܲܝܟܼ ܪܘܼܫܡܵܐ ܕܬܸܫܖ̈ܝܼܸܐ ܒܸܚܙܵܝܵܐ ܝܘܲܚ ܠܝܵܠܲܕ݇̈ܢ ܘܒܢܵܬܲܢ؛ ܠܥܠܲܝܡܲܢ ܘܠܥܠܲܝܡܵܬܲܢ ܕܩܲܢܝܵܐ ܒܐܝܼܕܲܝܗܝ ܘܟ̰ܲܢܬܵܐ ܒܪܲܦ̰ܫܲܝܗܝ ܗܲܕܘܼܖܸ̈ܐ ܝܢܵܐ ܩܵܐ ܩܢܵܝܬܵܐ ܕܝܘܼܠܦܵܢܵܐ. ܐܵܦ ܒܸܚܙܵܝܵܐ ܝܘܲܚ ܠܡܲܠܦܵܢܸ̈ܐ ܘܠܡܲܠܦܵܢܝܵܬܸ̈ܐ ܕܗܲܕܘܼܖܸ̈ܐ ܝܢܵܐ ܩܵܐ ܡܲܪܒܵܝܬܵܐ ܘܒܲܓ̰ܲܪܬܵܐ ܕܚܲܕ݇ ܝܲܗܠܵܐ ܐ݇ܚܸܪ݇ܢܵܐ ܡܼܢ ܫܲܒܼܖܸ̈ܐ ܘܥܠܲܝܡܸ̈ܐ. ܘܗܲܪ ܒܐܵܗܵܐ ܐܲܩܡܵܐ ܟ̰ܸܡ ܚܫܝܼܚܬܵܐ ܝܠܵܗܿ ܠܡܲܕܟܼܘܼܖܸ̈ܐ ܒܘܼܬ ܡܲܠܦܵܢܸ̈ܐ ܪܲܒܸ̈ܐ ܕܐܘܼܡܬܲܢ؛ ܐܵܢܝܼ ܕܡܘܼܬܸܒܼܠܗ݇ܘܿܢ ܫܲܬܐܸܣܬܵܐ ܕܠܸܫܵܢܵܐ ܣܘܼܪܝܵܝܵܐ ܒܕܵܪܵܐ ܚܲܕ݇ܬܵܐ.                                                                    

   ܒܬܲܫܥܝܼܬܵܐ ܕܐܘܼܡܬܲܢ ܐܝܼܬ ܪܵܒܵܐ ܫܸܡܵܢܸ̈ܐ ܠܲܓ̰ܠܸܓ̰ܵܢܸܐ ܕܗܲܠ ܐܲܒܲܕ ܒܸܕ ܦܵܝܫܝܼ ܡܘܼܕܟܼܖܸ̈ܐ ܒܗܿܝ ܕܦܘܼܠܚܵܢܲܝܗܝ ܒܪܲܗܛܵܐ ܕܡܲܠܦܵܢܘܼܬܵܐ ܕܠܸܫܵܢܵܐ ܐܸܡܗܵܝܵܐ(ܝܸܡܵܝܵܐ) ܗ݇ܘܝܼܵܐ ܝܠܸܗ ܚܲܕ݇ ܥܒܼܵܕܵܐ ܕܕܒܼܝܼܚ ܢܲܦܫܘܼܬܵܐ. ܘܡܸܢܲܝܗܝ ܝܢܵܐ: ܦܘܿܠ ܒܲܝܓ̰ܵܢ؛ ܡܵܪܝ ܬܐܘܿܡܵܐ ܐܘܿܕܘܼ؛ ܐܲܕܲܝ ܫܝܼܪ؛ ܢܵܥܘܼܡ ܦ̰ܵܐܸܩ؛ ܢܸܡܪܘܼܕ ܣܝܼܡܘܿܢܘܿ؛ ܟܘܼܪܸܫ ܒܸܢܝܵܡܝܼܢ ܘܫܪ.                                                        ܐܸܢ ܒܐܵܗܵܐ ܙܲܒܼܢܵܐ ܗܸܫ ܦܝܵܫܵܐ ܝܠܸܗ ܚܲܕ݇ ܠܸܫܵܢܵܐ ܒܫܸܡܵܐ ܕܠܸܫܵܢܵܐ  ܣܘܼܪܝܵܝܵܐ؛ ܐܸܢ ܝܵܠܲܕ݇̈ܢ ܘܒܢܵܬܲܢ ܡܨܵܝܵܐ ܝܢܵܐ ܝܵܠܦܝܼ ܠܸܫܵܢܵܐ ܕܝܸܡܲܝܗܝ ܘܐܸܢ ܐܝܼܬ ܒܐܘܼܡܬܲܢ ܪܵܒܵܐ ܓܵܢܵܬܸ̈ܐ ܕܠܵܐ ܟ̰ܘܼ ܚܲܕ݇ ܩܢܵܝܬܵܐ ܡܲܩܪܘܼܝܸܐ ܘܡܲܠܘܼܦܸܐ ܝܢܵܐ ܠܐܵܗܵܐ ܠܸܫܵܢܵܐ؛ ܟܠܸܗ ܡܼܢ ܥܲܡܠܸ̈ܐ ܘܓ̰ܲܢܓ̰ܲܖ̈ܝܵܬܸܐ ܕܐܵܢܝܼ ܡܲܠܦܵܢܸ̈ܐ ܫܒܼܝܼܚܸ̈ܐ ܝܠܵܗܿ.                                                                             
  ܥܲܡ ܕܘܼܟܼܪܵܢܵܐ ܕܡܲܠܦܵܢܸ̈ܐ ܪܲܒܸ̈ܐ ܘܵܠܸܐ ܝܠܵܗܿ ܥܲܠܲܢ ܕܕܲܟܼܪܲܚ ܘܡܝܲܩܪܲܚ ܠܡܲܠܦܵܢܸ̈ܐ  ܕܐܵܗܵܐ ܙܲܒܼܢܵܐ ܕܐܵܦ ܐܵܢܝܼ ܒܸܕܒܼܵܚܵܐ ܝܢܵܐ ܠܥܕܵܢܵܬܲܝ̈ܗܝ ܘܠܚܲܝܲܝ̈ܗܝ ܘܠܒܘܼܣܵܡܲܝ̈ܗܝ ܒܢܝܼܫܵܐ ܕܡܲܠܲܦܬܵܐ ܕܐܵܠܲܦ ܘܒܸܝܬ ܩܵܐ ܒܢܲܝ̈ ܐܘܼܡܬܲܢ ܙܥܘܿܖܸ̈ܐ ܝܲܢ ܓܘܼܖܸ̈ܐ؛ ܥܠܲܝܡܸ̈ܐ ܝܲܢ ܣܵܒܼܸ̈ܐ. ܐܵܦ ܘܵܠܸܐ ܝܠܵܗܿ ܥܲܠܲܢ ܕܗܵܘܲܚ ܡܥܲܕܖ̈ܵܢܸܐ(ܗܲܝܸܖ̈ܵܢܸܐ) ܩܵܬܲܝܗܝ ܒܐܵܗܵܐ ܫܒܼܝܼܠܵܐ ܡܩܘܼܕܫܵܐ ܕܒܸܐܙܵܠܵܐ ܝܢܵܐ ܒܝܼܘܼܗܝ.         ܚܫܝܼܚܬܵܐ ܝܠܵܗܿ ܠܡܲܕܟܼܘܼܪܸܐ ܕܐܝܼܬ ܗ݇ܘܵܐ ܠܲܢ ܚܲܕ݇ ܡܸܢܝܵܢܵܐ ܓܘܼܪܵܐ ܕܡܲܠܦܵܢܝܵܬܸ̈ܐ ܪܲܒܸܐ ܐܲܝܟܼ ܪܵܒܝܼ ܨܘܿܦܝܵܐ  ܩܲܓ̰ܲܪܝܵܐܢ ܕܒܕܸܦܢܵܐ ܕܡܲܠܦܵܢܸ̈ܐ ܐ݇ܚܸܖ̈݇ܢܸܐ ܡܘܼܓܡܸܖܸ̈ܐ ܝܢܵܐ ܠܪܲܗܛܵܐ ܕܡܲܠܦܵܢܘܼܬܵܐ ܕܠܸܫܵܢܵܐ ܐܸܡܗܵܝܵܐ ܒܐܘܼܡܬܲܢ ܘܡܫܘܼܪܸܖܸ̈ܐ ܝܢܵܐ ܠܐܵܗ ܬܲܚܡܲܢܬܵܐ ܕܢܸܫܸ̈ܐ ܐܵܬܘܼܖ̈ܵܝܸܐ ܟܠ ܥܕܵܢܵܐ ܗ݇ܘܝܼܸܐ ܝܢܵܐ ܡܸܫܬܲܖ̈ܟܵܢܸܐ ܒܫܩܵܠܬܵܐ ܕܛܲܥܢܵܐ ܕܡܸܫܬܲܐܠܵܢܘܵܬܸ̈ܐ ܝܲܩܘܼܖܸ̈ܐ ܕܐܘܼܡܬܵܐ. ܒܸܛܠܵܒܵܐ ܝܘܲܚ ܡܼܢ ܡܵܪܝܵܐ ܚܘܼܠܡܵܢܵܐ ܩܵܬܲܝܗܝ ܘܒܣܲܒܼܪܵܐ ܝܘܲܚ ܕܥܠܲܝܡܲܢ ܘܥܠܲܝܡܵܬܲܢ ܒܸܕ ܦܲܪܥܝܼ ܠܥܲܡܠܲܝܗܝ ܒܝܠܵܦܬܵܐ ܘܡܲܦܠܲܚܬܵܐ ܕܠܸܫܵܢܵܐ ܕܝܸܡܵܐ ܗܵܕܟܼܵܐ ܕܐܵܦ ܐܵܢܝܼ ܐܵܙܠ݇ܝܼ ܒܐܵܗ ܫܒܼܝܼܠܵܐ ܘܚܵܦܛܝܼ ܠܡܲܠܲܦܬܵܐ ܘܡܲܪܘܲܚܬܵܐ ܕܠܸܫܵܢܵܐ ܣܘܼܪܝܵܝܵܐ.   ܫܠܡ.