ܒܪܦܦܐ

ܐܚܡܕ ܫܐܡܠܘ

ܦܘܫܩܐ: ܫܡܝܪܡ ܕ.ܦܘܪܝܐܢ

               ܓܪܵܫܵܐ ܝܘܸܢ ܐܝܼܕܵܐ ܥܲܠܵܟܼܝ

               ܘܪܓܼܵܫܵܐ ܝܘܸܢ ܠܲܒܪܝܼܬܵܐ

               ܗܕܵܣܵܐ ܝܘܸܢ ܒܝܼܵܟܼܝ

               ܘܓܝܵܫܵܐ ܝܘܸܢ ܠܙܲܒܼܢܵܐ

               ܬܸܠܝܵܐ ܘܕܠܵܐ ܣܵܟܼܵܐ

               ܥܲܪܝܵܐ

               ܢܫܵܒܼܵܐ ܝܘܸܝܢ

               ܥܪܵܝܵܐ ܝܘܸܝܢ

               ܨܡܵܚܵܐ ܝܘܸܝܢ.

               ܫܡܲܝܵܐ ܝܘܸܝܢ

               ܘܟܵܘܟܼܒܼܸ̈ܐ ܘܐܲܪܥܵܐ

               ܘܚܸܛܸ̈ܐ ܥܸܛܖ̈ܵܢܸܐ ܕܝܣܵܪܵܐ ܝܢܵܐ ܒܘܼܠܵܐ

               ܪܵܩܘܿܕܵܐ ܓܵܘ ܓܵܢܝܼ ܩܝܼܢܬܵܐ

               ܥܒܼܵܪܵܐ ܝܘܸܢ ܡܸܢܵܟܼܝ

               ܒܲܕܡܘܼܬ ܚܲܕ݇ ܪܲܥܡܵܐ ܕܠܸܠܝܵܐ

               ܨܡܵܚܵܐ ܝܘܸܢ

               ܘܬܠܵܚܵܐ ܝܘܸܢ

----------------------------------------------------

ܚܒܖ̈ܢܐ ܥܣܩ̈ܐ

ܗܕܵܣܵܐ ܝܘܸܢ: ܬܲܚܡܘܼܢܸܐ ܝܘܸܢ

ܓܝܵܫܵܐ ܝܘܸܢ: ܒܸܕܩܵܪܵܐ ܝܘܸܢ، لمس می‌کنم

ܥܲܪܝܵܐ: ܫܘܼܠܚܵܝܵܐ

ܢܫܵܒܼܵܐ ܝܘܸܢ: ܡܐܲܝܟܼ ܦܵܘܚܵܐ ܘܲܙܘܘܼܙܸܐ ܝܘܸܢ

ܪܲܥܡܵܐ: ܒܲܪܩܵܐ ܕܫܡܲܝܵܐ

ܟܠ ܝܘܡܐ

ܒܒܓ̰ܢ ܠܥܙܪܝܢ

     ܟܠ ܝܵܘܡܵܐ ܫܲܒܼܲܥ ܒܛܲܒܲܚ ܘܟܠ ܕܘܼܟܵܐ ܣܸܡܹܝܠ ܝܠܵܗܿ

     ܩܵܐ ܕܐܲܝܢܝ݇ ܕܘܼܟܵܐ ܡܵܚܸܝܢ ܒܪܸܫܝܼ، ܠܐܲܝܢܝ݇ ܝܵܘܡܵܐ ܒܵܟܼܸܝܢ ܐ݇ܚܸܪ݇ܢ؟

    ܥܲܝܢܝܼ̈ ܗ݇ܘܝܼܸܐ ܕܸܩܠܲܬ، ܦܲܐܬܝܼ ܠܚܵܒܘܼܪ ܚܕܸܪܵܗܿ

     ܬܲܢܝܼ ܗܲܠ ܐܝܼܡܲܢ ܗܲܪ ܬܲܢܚܸܝܢ، ܥܲܠ ܒܸܖ̈ܟܵܟܝܼ ܡܵܚܸܝܢ ܐ݇ܚܸܪ݇ܢ؟

     ܫܸܡܫܵܐ ܕܐܵܬܘܼܪ ܚܵܙܸܝܬ ܐܝܼܡܲܢ ܒܙܵܪܸܩ ܓܵܗ ܐ݇ܚܸܪ݇ܬܵܐ

     ܩܵܕ ܫܵܩܸܠ ܗܸܒܼܝܼ، ܒܪܘܿܢܵܐ ܕܐܘܼܡܬܵܐ، ܡܫܸܡܫܵܐ ܫܵܚܸܢ ܐ݇ܚܸܪ݇ܢ؟

     ܗ݇ܘܸܐ ܠܗ݇ܘܿܢ ܡܗܲܕܝܵܢܲܢ ܠܲܛܸ̈ܐ، ܦܠܸܛܠܗ݇ܘܿܢ ܐܵܢܵܝܸ̈ܐ

     ܫܵܩܠܸܢ ܣܲܝܦܵܐ ܕܓܸܠܓܵܡܸܫ، ܠܐܘܼܡܬܝܼ ܡܣܲܟܼܠܸ̈ܐ ܕܵܟܼܸܝܢ ܐ݇ܚܸܪ݇ܢ!

     ܕܘܼܝܘܸܢ ܦܫܵܪܵܐ ܒܘܼܬ ܣܲܝܦ̰ܘܿ، ܣܸܡܹܝܠܸܐ، ܡܐܲܝܟܼ ܚܲܕ݇ ܦܘܼܢܕܵܐ

     ܡܐܲܝܟܼ ܕܗܵܘ ܢܘܼܪܵܐ ܬܚܘܼܬܵܐ ܕܩܸܛܡܵܐ ܓܵܘ ܓܵܢܝܼ ܒܵܟܼܸܝܢ ܐ݇ܚܸܪ݇ܢ!

     ܬܲܢܝܼ ܓܲܢܸ̈ܐ ܕܒܵܒܼܹܝܠ ܐ݇ܝ݇ܟܲܝܢܵܐ، ܛܥܘܿܢܝܵܬܲܝܗܝ ܓܲܒܸܝܢ، ܫܵܬܚܸܢ

     ܫܵܘܦܵܐ ܕܛܥܘܿܢܬܵܐ، ܐܸܕܝܘܿܡ ܚܲܫܵܐ ܩܲܕ݇ܡ ܫܸܡܫܵܐ ܒܫܵܬܚܸܢ ܐ݇ܚܸܪ݇ܢ!

     ܠܲܝܬ ܠܲܢ ܡܝܼܵ̈ܐ ܒܫܵܩܝܼܵܬܲܢ، ܟܸܐܦܸ̈ܐ ܕܐܸܖ̈ܚܲܢ ܫܸܠܝܸ̈ܐ ܝܢܵܐ

     ܬܲܢܝܼܡܘܿܢ ܒܵܓ̰ܘܿ، ܚܸܛܘܼܗ̈ܝ ܓܵܘ ܕܐܲܝܢܝ݇ ܐܸܪܚܸܐ ܛܵܚܸܢ ܐ݇ܚܸܪ݇ܢ؟

ܣܦܪܝܘܬܐ ܕܫܒܼܼܼܖ̈ܐ

ܐܝܼܬ ܗ݇ܘܵܐ ܠܲܝܬ ܗ݇ܘܵܐ ܡܲܬܠܝܵܬܸ̈ܐ

ܥܘܿܩܒܪܵܐ ܐܸܓܪܵܐ

ܡܲܬܸܠܬܵܐ ܦܘܼܫܸܩܬܵܐ ܥܲܡ ܚܲܕ݇ܟܡܵܐ ܫܘܼܚܠܵܦܸ̈ܐ ܒܝܲܕ:

ܡܵܕܠܹܝܢ ܕܵܝܒܼܝܼܣ

ܐܵܕܵܪ 2012

ܐܝܼܬ ܗ݇ܘܵܐ ܠܲܝܬ ܗ݇ܘܵܐ...

   ܐܝܼܬ ܗ݇ܘܵܐ ܬܪܹܝܢ ܐܲܚܘܿܢܘܵܬܸ̈ܐ ܥܘܼܩܒܖܸ̈ܐ ܕܚܲܝܝܼ ܗ݇ܘܵܐ ܓܵܘ ܕܸܫܬܵܐ ܬܚܘܿܬ ܫܟܘܼܪܵܐ ܕܒܲܝܬܵܐ ܕܚܕܵܐ ܣܲܒܼܬܵܐ. ܚܲܕ݇ ܡܸܢܵܝ ܡܫܲܡܢܵܐ ܘܬܲܪܒܵܢܵܐ ܗ݇ܘܵܐ ܫܸܡܸܗ ܪܵܡܐܹܝܠ. ܟܸܐ ܩܵܪܝܼ ܗ݇ܘܵܘ ܠܸܗ ܚܲܒܼܖ̈ܵܘܵܬܸܗ: ܓܲܪܘܼܣܵܐ. ܗܿܘ ܐ݇ܚܸܪ݇ܢܵܐ ܒܲܓܝܼܪܵܐ ܘܢܣܝܼܣܵܐ ܗ݇ܘܵܐ ܫܸܡܸܗ ܒܪܘܿܢܐܹܝܠ. ܒܪܘܿܢܐܹܝܠ ܒܘܼܫ ܓܘܼܪܵܐ ܗ݇ܘܵܐ ܒܫܸܢܸ̈ܐ ܡܼܢ ܪܵܡܐܹܝܠ، ܐܝܼܢܵܐ ܟܸܬ ܚܵܫܒܼܝܼ ܗ݇ܘܵܘ ܠܸܗ ܥܘܼܩܒܖܸ̈ܐ ܐ݇ܚܖܸ̈ܢܸܐ ܗܿܘ ܒܘܼܫ ܙܥܘܿܪܵܐ.

   ܚܲܕ݇ ܝܵܘܡܵܐ ܝܕܸܥܠܸܗ ܪܵܡܐܹܝܠ ܕܒܪܘܿܢܐܹܝܠ ܡܲܚܒܵܢܵܐ ܝܠܸܗ ܕܡܸܐܟܼܘܿܠܝܵܬܸ̈ܐ ܛܵܒܼܵܬܸ̈ܐ ܘܡܵܪܵܐ ܪܹܝܚܵܐ ܒܲܣܝܼܡܵܐ. ܡܨܵܝܵܐ ܗ݇ܘܵܐ ܒܪܘܿܢܐܹܝܠ ܕܦܵܪܸܫ ܗ݇ܘܵܐ ܒܡܸܨܥܵܝܵܐ ܕܪܹܝܚܵܐ ܠܡܸܐܟܼܘܿܠܝܵܬܸ̈ܐ ܡܵܪܵܐ ܝܘܼܬܪܵܢܵܐ ܠܚܘܼܠܡܵܢܵܐ ܕܦܲܓܼܪܵܐ ܡܼܢ ܡܸܐܟܼܘܿܠܝܵܬܸ̈ܐ ܣܲܖ̈ܝܸܐ ܘܡܵܪܵܐ ܙܝܵܢܵܐ.

   ܒܚܘܼܫܵܒܼܵܐ ܕܪܵܡܐܹܝܠ ܐܵܗܵܐ ܟܲܟܪܵܐ ܕܡܝܼܪܵܐ ܝܠܸܗ ܕܦܵܐܸܫ ܚܸܙܝܵܐ ܡܼܢ ܚܲܕ݇ ܥܘܼܩܒܪܵܐ، ܒܗܿܝ ܕܗܿܘ ܐܲܟܼܠܵܢܵܐ ܕܙܸܒܠܵܐ ܘܡܸܐܟܼܘܿܠܝܵܬܸ̈ܐ ܣܲܖ̈ܝܸܐ ܘܬܲܖ̈ܒܵܢܸܐ ܗ݇ܘܵܐ.

   ܐܲܡܝܼܢܵܐܝܼܬ ܟܸܐ ܚܲܕܸܪ ܗ݇ܘܵܐ ܒܪܘܿܢܐܹܝܠ ܒܵܬܲܪ ܡܸܐܟܼܘܿܠܝܵܬܸ̈ܐ ܨܦܵܝܝܼ ܘܛܵܒܼܵܬܸ̈ܐ، ܘܒܐܵܗܵܐ ܫܘܼܓܼ݇ܠܵܐ ܟܸܐ ܗܵܘܸܐ ܗ݇ܘܵܐ ܠܸܗ ܡܲܪܥܵܐ ܕܪܸܫܵܐ. ܒܚܲܕ݇ ܪܲܡܫܵܐ ܟܲܕ ܪܲܥܡܵܐ ܘܒܲܖ̈ܩܸܐ ܡܚܵܝܵܐ ܗ݇ܘܵܘ، ܒܥܸܐ ܠܸܗ ܒܪܘܿܢܐܹܝܠ ܕܡܲܦܫܸܪ ܗ݇ܘܵܐ ܒܢܘܼܪܵܐ ܕܒܲܖ̈ܩܸܐ ܫܡܲܝܵܢܸ̈ܐ ܚܲܕ݇ܟ̰ܵܐ ܓܘܼܦܬܵܐ ܒܲܣܝܼܡܬܵܐ ܘܕܵܪܸܐ ܗ݇ܘܵܐ ܥܲܠ ܦܸܛܘܿܪܬܵܐ ܛܲܥܡܵܢܬܵܐ.

   ܐ݇ܣܸܩܠܗ݇ܘܿܢ ܐܲܚܘܿܢܘܵܬܸ̈ܐ ܥܲܠ ܐ݇ܓܵܪܵܐ ܕܒܲܝܬܵܐ ܕܣܲܒܼܬܵܐ. ܡܘܼܬܸܒܼܠܸܗ ܒܪܘܿܢܐܹܝܠ ܠܓܘܼܦܬܵܐ ܥܲܠ ܦܸܛܘܿܪܬܵܐ ܘܣܒܸܪܸܗ ܠܡܚܲܝܬܵܐ ܕܒܲܪܩܵܐ. ܐܝܼܢܵܐ ܩܵܡ ܡܵܚܸܐ ܠܗ݇ܘܿܢ ܒܲܪܩܵܐ ܘܐ݇ܣܸܩܠܸܗ ܬܸܢܵܐ ܡܼܢ ܦܸܛܘܿܪܬܵܐ ܘܓܘܼܦܬܵܐ. ܓܲܕܵܢܵܐܝܼܬ ܦܘܼܪܬܸܟܠܗ݇ܘܿܢ ܐܲܚܘܿܢܘܵܬܸ̈ܐ ܡܼܢ ܐܵܗܵܐ ܩܸܢܛܵܐ.

   ܐܵܦ ܟܸܐ ܡܲܣܸܡ ܗ݇ܘܵܐ ܒܪܘܿܢܐܹܝܠ ܒܒܲܫܲܠܬܵܐ ܕܡܸܐܟܼܘܿܠܝܵܬܸ̈ܐ ܒܲܣܝܼܡܸ̈ܐ ܘܠܸܐ ܙܵܕܸܥ ܗ݇ܘܵܐ ܐܸܢ ܒܐܵܗܵܐ ܫܘܼܓܼ݇ܠܵܐ ܢܵܦܸܠ ܗ݇ܘܵܐ ܒܢܵܣܝܘܼܬܵܐ.

   ܚܲܕ݇ ܝܵܘܡܵܐ ܐ݇ܙܸܠܗ݇ܘܿܢ ܐܲܚܘܿܢܘܵܬܸ̈ܐ ܠܬܵܘܵܢܵܐ ܕܣܲܒܼܬܵܐ ܟܲܕ ܗܿܝ ܝܬܝܼܒܼܬܵܐ ܗ݇ܘܵܐ ܘܛܠܝܼܬܵܐ ܩܲܕ݇ܡ ܬܲܢܘܼܪܵܐ. ܡܘܼܚܙܸܐ ܠܸܗ ܒܪܘܿܢܐܹܝܠ ܠܟܬܵܒܼܵܐ ܕܒܲܫܲܠܬܵܐ ܕܐܝܼܬ ܗ݇ܘܵܐ ܠܵܗܿ ܣܲܒܼܬܵܐ. ܪܵܒܵܐ ܬܡܸܗܠܸܗ ܪܵܡܐܹܝܠ ܐܝܼܡܲܢ ܕܦܘܼܪܡܸܐ ܠܸܗ ܕܒܪܘܿܢܐܹܝܠ ܡܵܨܸܐ ܩܵܪܸܐ ܐܲܝܟܼ ܚܲܕ݇ ܒܲܪܢܵܫܵܐ!

   ܐܝܼܡܲܢ ܕܫܡܝܼܥܠܸܗ ܒܪܘܿܢܐܹܝܠ ܠܩܵܠܵܐ ܕܚܲܕ݇ ܒܲܫܠܵܢܵܐ ܡܫܲܡܗܵܐ ܡܼܢ ܦܪܵܣ ܚܸܙܘܵܐ ܕܣܲܒܼܬܵܐ، ܪܗܸܛܠܸܗ ܕܚܵܙܸܐ ܕܵܐܟܼܝܼ ܡܲܚܙܘܼܝܸܐ ܗ݇ܘܵܐ ܗܿܘ ܒܲܫܠܵܢܵܐ ܠܐܘܼܪܚܵܐ ܕܒܲܫܲܠܬܵܐ ܒܲܡܗܝܼܪܘܼܬܵܐ.

   ܐܵܗܵܐ ܚܲܕ݇ ܓܼܲܠܛܵܐ ܓܘܼܪܵܐ ܗ݇ܘܵܐ ܒܗܿܝ ܕܡܸܢܫܸܠܬܵܢܸܐ ܪܥܸܫܠܵܗܿ ܣܲܒܼܬܵܐ ܡܼܢ ܫܸܢܬܵܐ ܘܫܘܼܕܸܪܵܗܿ ܠܩܵܛܘܼ ܕܢܵܦܠܵܐ ܒܵܬܪܵܝ ܘܛܵܪܕܵܐ ܠܟܠܵܝ ܥܘܼܩܸܒܖܸ̈ܐ. ܒܪܘܿܢܐܹܝܠ ܘܪܵܡܐܹܝܠ ܘܟܠܵܝ ܐܲܚܘܿܢܘܵܬܵܝ ܘܚܵܬܘܵܬܵܝ ܗ݇ܘܸܐ ܠܗ݇ܘܿܢ ܥܸܨܝܸ̈ܐ ܕܥܵܪܩܝܼ ܗ݇ܘܵܘ ܒܗܿܘ ܝܵܘܡܵܐ ܡܼܢ ܗܿܘ ܒܲܝܬܵܐ.

   ܪܗܸܛܠܸܗ ܟܠ ܥܘܼܩܒܪܵܐ ܠܚܲܕ݇ ܓܸܒܵܐ ܘܛܘܼܫܸܐ ܠܸܗ ܠܓܵܢܸܗ. ܥܪܸܩܠܗ݇ܘܿܢ ܒܪܘܿܢܐܹܝܠ ܘܪܵܡܐܹܝܠ ܠܕܲܫܬܵܐ.

   ܬܡܵܗܵܐ ܗ݇ܘܵܐ ܪܵܡܐܹܝܠ ܕܵܐܟܼܝܼ ܡܨܵܝܵܐ ܗ݇ܘܵܐ ܒܪܘܿܢܐܹܝܠ ܕܐܵܙܸܠ ܗ݇ܘܵܐ ܒܐܘܼܪܚܵܐ ܥܲܡ ܬܲܪܬܝܼܢ ܐܲܩܠܵܬܸ̈ܐ ܐܲܝܟܼ ܚܲܕ݇ ܒܲܪܢܵܫܵܐ. ܐܝܼܢܵܐ ܒܪܘܿܢܐܹܝܠ ܠܸܐ ܗ݇ܘܵܐ ܡܲܚܘܼܒܸܐ ܕܚܵܝܸܐ ܗ݇ܘܵܐ ܒܕܘܼܟܵܢܸ̈ܐ ܫܲܚܬܵܢܸ̈ܐ ܐܲܝܟܼ ܐܵܢܝܼ ܥܘܼܩܒܖܸ̈ܐ ܐ݇ܚܸܖ̈݇ܢܸܐ.

   ܘܟܲܕ ܪܵܡܐܹܝܠ ܟܸܐ ܡܲܚܸܒ ܗ݇ܘܵܐ ܕܡܥܲܪܓܸܠ ܗ݇ܘܵܐ ܓܵܘ ܥܲܦܪܵܐ ܘܛܝܼܢܵܐ ܒܪܘܿܢܐܹܝܠ ܟܸܐ ܗܵܘܸܐ ܗ݇ܘܵܐ ܚܝܵܦܵܐ ܘܡܬܲܡܘܼܙܸܐ ܘܡܕܲܟܼܘܼܝܸܐ ܦܲܓܼܪܸܗ. ܟܸܐ ܙܵܕܸܥ ܗ݇ܘܵܐ ܪܵܡܐܹܝܠ ܡܼܢ ܐ݇ܢܵܫܸ̈ܐ ܘܟܸܐ ܡܛܵܫܸܐ ܗ݇ܘܵܐ ܠܓܵܢܸܗ ܐܝܼܡܲܢ ܕܚܵܙܸܐ ܗ݇ܘܵܐ ܠܗ݇ܘܿܢ.

   ܐܝܼܢܵܐ ܒܪܘܿܢܐܹܝܠ ܠܲܝܬ ܗ݇ܘܵܐ ܠܸܗ ܙܕܘܿܥܬܵܐ ܡܼܢ ܐ݇ܢܵܫܵܐ. ܗܿܘ ܟܸܐ ܡܲܚܸܒ ܗ݇ܘܵܐ ܕܚܵܝܸܐ ܥܲܡܵܝ ܘܐܲܟܼܘܵܬܵܝ.

   ܝܠܝܼܦܠܸܗ ܒܪܘܿܢܐܹܝܠ ܕܡܒܲܫܸܠ ܠܚܕܵܐ ܡܸܐܟܼܘܿܠܬܵܐ ܕܐ݇ܢܵܫܸ̈ܐ ܒܫܸܡܵܐ ܕܐܸܓܪܵܐ ܕܪܵܒܵܐ ܛܲܥܡܵܢܬܵܐ ܗ݇ܘܵܐ.

   ܚܲܕ݇ ܝܵܘܡܵܐ ܟܲܕ ܒܠܝܼܓܵܐ ܗ݇ܘܵܐ ܒܲܫܘܼܠܸܐ ܐܸܓܪܵܐ، ܐ݇ܬܸܐ ܠܗ݇ܘܿܢ ܥܘܼܩܒܖܸ̈ܐ ܐ݇ܚܸܖ̈݇ܢܸܐ ܙܸܐ ܐܝܼܡܲܢ ܕܢܫܸܡܠܗ݇ܘܿܢ ܠܪܹܝܚܵܐ ܒܲܣܝܼܡܵܐ.

   ܟܲܕ ܟܠܵܝ ܥܘܼܩܒܖܸ̈ܐ ܐ݇ܟܼܝܼܠ ܠܗ݇ܘܿܢ ܘܡܘܼܚܸܒܵܐ ܠܗ݇ܘܿܢ ܡܸܐܟܼܘܿܠܬܵܐ ܕܒܪܘܿܢܐܹܝܠ، ܡܼܢ ܗܿܘ ܝܵܘܡܵܐ ܘܒܵܬ݇ܪܸܗ ܠܒܪܘܿܢܐܹܝܠ ܩܪܸܐ ܠܗ݇ܘܿܢ: ܥܘܼܩܒܪܵܐ ܐܸܓܪܵܐ.

   ܡܼܢ ܗܿܘ ܝܵܘܡܵܐ ܟܠ ܚܕܵܐ ܡܸܐܟܼܘܿܠܬܵܐ ܛܵܒܼܬܵܐ ܕܥܘܼܩܒܪܵܐ ܐܸܓܪܵܐ ܬܘܼܪܸܨܠܸܗ، ܐܲܚܘܿܢܸܗ ܪܵܡܐܹܝܠ ܐ݇ܟܼܝܼܠ ܠܸܗ. ܘܟܠܸܐ ܠܸܗ ܪܵܡܐܹܝܠ ܡܼܢ ܐ݇ܟܼܵܠܬܵܐ ܕܡܸܐܟܼܘܿܠܝܵܬܸ̈ܐ ܣܲܖ̈ܝܸܐ ܘܬܲܖ̈ܒܵܢܸܐ.

   ܐܵܦܸܢ ܕܬܲܪܬܝܼܢ ܐܲܚܘܿܢܘܵܬܸ̈ܐ ܦܪܝܼܫܸܐ ܗ݇ܘܵܘ ܒܕܝܼܠܵܝܵܬܸ̈ܐ، ܐܝܼܢܵܐ ܡܨܸܐ ܠܗ݇ܘܿܢ ܕܩܲܪܒܸܢܝܼ ܠܸܚܕܵܕܸܐ ܘܡܲܚܸܒܝܼ ܚܲܕ݇ ܠܗܿܘ ܐ݇ܚܸܪ݇ܢܵܐ.

   ܠܩܘܼܪܒܵܐ ܕܚܲܕ݇ܟܡܵܐ ܪܘܿܡܝܵܬܸ̈ܐ ܒܢܸܐ ܠܗ݇ܘܿܢ ܩܸܢܵܐ، ܟܠ ܚܲܕ݇ ܕܓܵܢܸܗ. ܘܒܡܸܬܚܵܐ ܕܪܵܒܵܐ ܫܸܢܸ̈ܐ ܚܝܸܐ ܠܗ݇ܘܿܢ ܒܲܫܠܵܡܵܐ ܘܲܒܚܘܼܠܡܵܢܵܐ ܛܵܒܼܵܐ ܒܫܒܼܵܒܼܘܼܬܵܐ ܥܲܡ ܚܕܵܕܸ̈ܐ.

   ܗܵܕܟܼܵܐ ܡܘܼܠܸܦܠܸܗ ܒܪܘܿܢܐܹܝܠ ܠܪܵܡܐܹܝܠ ܠܐܘܼܪܚܵܐ ܕܒܲܫܲܠܬܵܐ ܕܐܸܓܪܵܐ:

   ܡܠܘܿܐܸ̈ܐ:

   ܒܢܵܬ ـ ܓܲܢܸ̈ܐ

   ܬܘܼܡܵܐ

   ܟܪܲܦܣܵܐ

   ܡܸܠܚܵܐ ܘܦܸܠܦܸܠܵܐ ܐ݇ܟܘܼܡܵܐ

   ܡܸܫܚܵܐ ܕܙܲܝܬܵܐ

   ܡܝܼܵ̈ܐ ܕܐܸܛܪܘܼܓܵܐ ܚܲܡܘܼܨܵܐ

   ܬܘܼܩܵܢܵܐ ܕܐܸܓܪܵܐ:

   ܫܠܘܿܩ ܠܒܢܵܬ ـ ܓܲܢܸ̈ܐ ܓܵܘ ܛܲܒܼܩܵܐ ܘܐܸܢ ܡܵܨܸܝܬ ܕܡܒܲܫܠܸܬ ܠܗ݇ܘܿܢ ܐܲܝܟܼ ܛܘܝܼܬܵܐ ܥܲܠ ܢܘܼܪܵܐ، ܒܘܼܫ ܒܲܣܝܼܡܸ̈ܐ ܒܸܕ ܗܵܘܝܼ. ܡܩܲܠܸܦ ܠܗ݇ܘܿܢ ܘܡܪܘܿܣ ܠܗ݇ܘܿܢ. ܡܪܘܿܣ ܠܬܘܼܡܵܐ ܘܚܠܘܿܛ ܥܲܡ ܒܢܵܬ ـ ܓܲܢܸ̈ܐ. ܕܪܝܼ ܡܸܠܚܵܐ ܘܦܸܠܦܸܠܵܐ ܐ݇ܟܘܼܡܵܐ ܘܡܸܫܚܵܐ ܕܙܲܝܬܵܐ ܘܡܝܼܵ̈ܐ ܕܐܸܛܪܘܼܓܵܐ ܚܲܡܘܼܨܵܐ ܥܲܠܵܝ ܘܚܠܘܿܛ ܠܗ݇ܘܿܢ ܒܲܚܕܵܕܸ̈ܐ. ܕܲܩܕܸܩ ܠܟܪܲܦܣܵܐ ܘܒܙܘܿܩ ܠܸܗ ܥܲܠ ܦܵܬܵܝ.

   ܐܵܦ ܡܵܨܸܝܬ ܕܡܲܙܝܸܕܸܬ ܠܐܲܢܸܐ ܡܠܘܿܐܸ̈ܐ:

   ܝܲܒܖ̈ܘܼܚܸܐ ܣܵܡܘܿܩܸ̈ܐ

   ܦܸܠܦܸܠܵܐ ܣܵܡܘܿܩܵܐ

   ܦܸܠܦܸܠܵܐ ܩܝܼܢܵܐ

   ܩܲܖ̈ܥܸܐ

   ܡܛܵܘܝܼ ܠܝܲܖ̈ܩܸܐ ܥܲܠ ܢܘܼܪܵܐ ܝܲܢ ܫܠܘܿܩ ܠܗ݇ܘܿܢ ܓܵܘ ܛܲܒܼܩܵܐ. ܡܩܲܠܸܦ ܠܗ݇ܘܿܢ ܘܡܩܲܛܩܸܛ ܠܗ݇ܘܿܢ. ܕܪܝܼ ܬܘܼܡܵܐ ܡܪܝܼܣܵܐ ܘܡܸܠܚܵܐ ܘܦܸܠܦܸܠܵܐ ܐ݇ܟܘܼܡܵܐ ܘܡܸܫܚܵܐ ܕܙܲܝܬܵܐ ܘܡܝܼܵ̈ܐ ܕܐܸܛܪܘܼܓܵܐ ܚܲܡܘܼܨܵܐ ܥܲܠܵܝ ܘܚܠܘܿܛ ܠܗ݇ܘܿܢ. ܕܲܩܕܸܩ ܠܟܪܲܦܣܵܐ ܘܒܙܘܿܩ ܠܸܗ ܥܲܠ ܦܵܬܵܝ.

ܟܐܦܐ ܛܝܡܢܐ

   ܚܕܵܐ ܒܲܟܼܬܵܐ ܚܲܟܝܼܡܬܵܐ ܕܒܸܚܙܵܩܵܐ ܗ݇ܘܵܐ ܒܛܘܼܖ̈ܵܢܸܐ ܡܘܼܫܟ̰ܸܚܠܵܗܿ ܚܲܕ݇ ܟܸܐܦܵܐ ܛܝܼܡܵܢܵܐ ܓܵܘ ܚܲܕ݇ ܢܲܗܪܵܐ. ܠܩܘܼܕܡܸܐ ܕܗܿܘ ܝܵܘܡܵܐ ܬܦܸܩܠܵܗܿ ܒܲܟܼܬܵܐ ܒܚܲܕ݇ ܚܵܙܘܿܩܵܐ ܐ݇ܚܸܪ݇ܢܵܐ ܕܟܦܝܼܢܵܐ ܗ݇ܘܵܐ ܘܗܿܝ ܦܬܝܼܚܵܐ ܠܵܗܿ ܟ̰ܲܢܬܘܼܗܿ ܘܝܗܸܒܼܠܵܗܿ ܩܵܬܸܗ ܡܼܢ ܡܸܐܟܼܘܼܠܬܘܼܗܿ.

   ܚܵܙܘܿܩܵܐ ܟܦܝܼܢܵܐ ܚܙܸܐ ܠܸܐ ܠܗܿܘ ܟܸܐܦܵܐ ܛܝܼܡܵܢܵܐ ܘܛܠܸܒܠܸܗ ܡܼܢ ܒܲܟܼܬܵܐ ܕܝܵܗܒܼܵܠܸܗ ܩܵܬܸܗ ܗܿܘ ܟܸܐܦܵܐ ܘܒܲܟܼܬܵܐ ܥܒܼܝܼܕܠܵܗܿ ܐܲܝܟܼ ܛܠܵܒܬܸܗ. ܚܵܙܘܿܩܵܐ ܫܒܼܝܼܩܵܐ ܠܸܐ ܒܲܟܼܬܵܐ ܘܐ݇ܙܸܠܸܗ ܟܲܕ ܪܵܒܵܐ ܦܨܝܼܚܵܐ ܗ݇ܘܵܐ ܒܘܼܬ ܓܲܕܸܗ ܛܵܒܼܵܐ ܒܗܿܝ ܕܨܦܵܝܝܼ ܒܝܼܕܵܥܵܐ ܗ݇ܘܵܐ ܕܗܿܘ ܟܸܐܦܵܐ ܟܡܵܐ ܛܝܼܡܵܢܵܐ ܝܠܸܗ ܘܒܸܕ ܡܵܠܸܐ ܠܸܗ ܩܵܐ ܟܠܸܗ ܡܸܬܚܵܐ ܕܚܲܝܘܼܬܸܗ.

   ܐܝܼܢܵܐ ܒܵܬ݇ܪ ܟܡܵܐ ܝܵܘܡܵܢܸ̈ܐ ܗܿܘ ܡܘܼܕܸܪܸܗ ܠܟܸܐܦܵܐ ܩܵܐ ܒܲܟܼܬܵܐ ܚܲܟܝܼܡܬܵܐ ܘܐ݇ܡܸܪܸܗ: ܐܵܢܵܐ ܗܵܕܟܼܵܐ ܗܲܡܘܼܢܸܐ ܝܘܸܢ ܗ݇ܘܵܐ ܕܟܸܐ ܝܵܕܥܸܢ ܟܡܵܐ ܛܝܼܡܵܢܵܐ ܝܠܸܗ ܐܵܗܵܐ ܟܸܐܦܵܐ ܐܝܼܢܵܐ ܐܵܕܝܼܵܐ ܡܲܕܘܼܪܘܼܗܝ ܝܘܸܢ ܒܐܵܗܵܐ ܣܲܒܼܪܵܐ ܕܐܲܢ݇ܬܝ ܡܵܨܝܵܬܝ ܝܵܗܒܼܵܬ ܠܝܼ ܚܲܕ݇ ܡܸܢܕܝܼ ܒܘܼܫ ܛܝܼܡܵܢܵܐ. ܗܲܒܼܠܝܼ ܠܗܿܘ ܡܸܢܕܝܼ ܕܐܝܼܬ ܟܸܣܠܵܟܼܝ، ܗܿܘ ܡܸܢܕܝܼ ܕܡܘܼܥܒܼܸܕܠܸܗ ܩܵܬܵܟܼܝ ܕܝܵܗܒܼܵܬܠܸܗ ܟܸܐܦܵܐ ܩܵܬܝܼ!

                                                       ܟܬܘܒܐ: ܠܐ ܝܕܥܝܐ

                       ܦܘܫܩܐ ܡܼܢ ܠܫܢܐ ܐܢܓܠܝܫܝܐ: ܫܡܝܪܡ ܕ. ܦܘܪܝܐܢ

ܒܝܬ ܦܪܣܐ ܕܐܢܚܝܕܘܐܢܐ

ܦܘܪܕܫܐ

ܟܘܢܫ ܡܘܫܚܬ̈ܐ ܘܫܘܟܢ̈ܐ

ܟܘܼܢܵܫ ܡܘܼܫܚܵܬܵ̈ܐ

ܒܹܝܬ ܦܪܵܣܵܐ ܕܐܸܢܚܹܝܕܘܼܐܲܢܵܐ ܒܵܥܸܐ ܕܡܵܘܕܸܥ ܘܲܒܟܠ ܚܲܕܘܼܬܵܐ ܪܲܒܬܵܐ ܠܟܠܲܝܗܝ ܥܠܲܝܡܲ̈ܢ ܘܥܠܲܝܡܵܬܲ̈ܢ ܐܵܢܝܼ ܕܐܝܼܬ ܠܲܝܗܝ ܪܸܓܼܬܵܐ ܕܟܵܬܒܼܝܼ ܡܲܚܪܵܐ، ܕܗܵܐ ܒܹܝܬ ܦܪܵܣܵܐ ܕܐܸܢܚܹܝܕܘܼܐܲܢܵܐ ܒܵܥܸܐ ܕܦܵܪܸܣ ܚܲܕ݇ ܟܘܼܢܵܫܵܐ ܕܡܘܼܫܚܵ̈ܬܵܐ ܕܚܵܒܼܸܫ ܡܘܼܫܚܵ̈ܬܵܐ ܕܲܥܠܲܝܡܲܝ̈ܢ ܘܲܥܠܲܝܡܵ̈ܬܲܢ. ܢܝܼܫܲܢ ܝܠܸܗ ܓܘܼܪܵܓܼܵܐ ܕܥܠܲܝܡܘܼܬܲܢ ܘܲܢܩܵܠܵܐ ܕܐܘܼܪܚܵܐ ܩܕܵܡܲܝܗܝ، ܕܟܵܬܒܼܝܼ ܘܦܵܪܣܝܼ ܠܡܘܼܫܚܵ̈ܬܲܝܗܝ. ܘܗܵܕܟܼܵܐ ܕܗܵܘܸܐ ܠܲܝܗܝ ܐܲܦܬܵܐ ܕܥܵܒܼܪܝܼ ܒܚܲܩܠܵܐ ܕܣܸܦܪܵܝܘܼܬܵܐ ܘܛܵܥܢܝܼ ܠܢܲܒܼܪܲܫܬܵܐ ܕܣܵܦܪܘܼܬܲܢ ܠܓܵܘ ܕܲܥܬܝܼܕ ܕܠܵܐ ܕܵܥܟܼܵܐ ܫܪܵܓܼܵܐ ܕܠܸܫܵܢܲܢ ܒܚܘܼܕܖܸ̈ܐ ܣܦܝܼܖ̈ܵܝܸܐ ܕܥܵܠܡܵܐ.

ܐܵܗܵܐ ܟܘܼܢܵܫ ܡܘܼܫܚܵ̈ܬܵܐ ܒܸܕ ܗܵܘܸܐ ܬܚܘܿܬ ܡܲܨܚܵܢܘܼܬܵܐ ܕܢܝܼܢܸܒܼ ܠܵܡܲܣܘܼ ܘܥܸܠܘܲܝ ܕܟܘܼܢܵܫܵܐ ܒܸܕ ܗܵܘܸܐ "ܖ̈ܵܡܘܼܥܸ̈ܐ ܕܢܘܼܪܵܐ" ܘܒܹܝܬ ܦܪܵܣܵܐ ܕܐܸܢܚܹܝܕܘܼܐܲܢܵܐ ܒܸܕ ܦܵܪܸܣ ܠܐܵܗܵܐ ܟܘܼܢܵܫ ܡܘܼܫܚܵ̈ܬܵܐ ܒܣܝܼܩܘܼܡܵܐ ܕܐܒ 7 ܒܸܗ 6766 ܘܗܵܕܟܼܵܐ ܠܕܘܼܟܼܪܵܢܵܐ ܕܣܵܗܕܲܝܢ ܡܲܩܘܝܼܵܢܵܐ، ܡܛܠ ܗܵܕܵܐ ܡܵܣܵܐ ܕܟܠܲܝܗܝ ܡܘܼܫܚܵ̈ܬܵܐ ܘܵܠܸܐ ܕܗܵܘܸܐ ܠܸܗ ܐܝܼܣܘܿܖܸ̈ܐ ܒܣܵܗܕܸ̈ܐ ܘܣܵܗܕܘܼܬܵܐ. ܟܠ ܚܕܵܐ ܥܠܲܝܡܬܵܐ ܘܟܠ ܚܲܕ݇ ܥܠܲܝܡܵܐ ܕܒܵܥܝܼ ܡܫܵܬܦܝܼ ܘܦܵܪܣܝܼ ܠܲܡܫܘܼܚܬܲܝܗܝ ܓܵܘ ܕܐܵܗܵܐ ܟܘܼܢܵܫ ܡܘܼܫܚܵ̈ܬܵܐ ܘܵܠܸܐ ܕܡܫܲܘܓܼܸܪܝܼ ܠܲܢ ܠܵܐ ܝܲܬܝܼܪ ܡܼܢ ܬܲܪܬܹܝܢ ܡܘܼܫܚܵ̈ܬܵܐ ܠܐܵܗܵܐ ܫܘܼܘܓܼܵܪܵܐ ܕܝܼܠܵܢܵܝܵܐ ܕܒܹܝܬ ܦܪܵܣܵܐ ܘܠܵܐ ܠܩܝܼܫ ܡܼܢ ܚܙܝܼܪܵܢ 30 ܒܸܗ 6766.

submissions@enheduannapublishing.com

ܥܠܲܝܡܲܝ̈ܢ ܘܲܥܠܲܝܡܵ̈ܬܲܢ ܕܒܵܥܝܼ ܕܲܡܫܲܘܓܼܸܪܝܼ ܠܲܢ ܠܡܘܼܫܚܵܬܲܝܗܝ ܕܦܵܪܣܲܚ ܠܲܝܗܝ ܓܵܘ ܕܐܵܗܵܐ ܟܘܼܢܵܫ ܡܘܼܫܚܵܬܵ̈ܐ ܘܵܠܸܐ ܕܢܵܛܪܝܼ ܠܬܸܢܘܲܝ ܕܦܪܵܣܵܐ ܗܿܘ ܕܢܘܼܩܙܸ̈ܗ ܣܵܕܪܝܼ ܠܬܲܚܬ:

ܐ ـ ܡܘܼܫܚܵ̈ܬܵܐ ܘܵܠܸܐ ܕܗܵܘܝܼ ܟܬܝܼܒܼܸ̈ܐ ܒܚܲܕ݇ ܡܼܢ ܕܐܲܢܲܝ ܬܲܪܬܹܝܢ ܐܵܬܘܵ̈ܬܵܐ: Assyrian Fonts ܕܪܵܒܝܼ ܕܲܢܝܼܐܝܼܠ ܕܵܘܝܼܕ ܕܒܹܝܬ ܒܸܢܝܵܡܝܼܢ ܐܵܘ ܐܵܬܘܵ̈ܬܵܐ ܕDr. Eshu Marcus. ܐܸܢ ܟܬܵܒܼܵܐ ܝܬܘܿܢ ܒܠܸܥܙܵܐ ܡܲܕܸܢܚܵܝܵܐ، ܘܲܒܐܵܬܘܵ̈ܬܵܐ ܕܡܸܠܬܵܐ ܐܸܢ ܟܬܵܒܼܵܐ ܝܬܘܿܢ ܒܠܸܥܙܵܐ ܡܲܥܪܒܼܵܝܵܐ.

ܒ ـ ܝܘܼܪܒܼܵܐ ܕܐܵܬܘܵ̈ܬܵܐ ܘܵܠܸܐ ܕܗܵܘܸܐ 18 ܘܦܵܘܫܵܐ ܕܒܹܝܬ ܣܸܖ̈ܛܸܐ ܘܵܠܸܐ ܕܗܵܘܸܐ ܥܦܝܼܦܵܐ.

ܓ ـ ܡܘܼܫܚܵ̈ܬܵܐ ܘܵܠܸܐ ܕܡܵܛܝܼ ܠܲܢ ܒܐܲܡܘܿܡܵܐ Mellel ܐܵܘ Word ܘܥܲܡ ܚܕܵܐ ܐܲܨܲܚܬܵܐ ܒܐܵܡܘܿܡ PDF.

ܕ ـ ܡܘܼܫܚܵ̈ܬܵܐ ܘܵܠܸܐ ܕܗܵܘܝܼ ܡܵܖ̈ܵܢܵܝܸܐ ܘܠܵܐ ܘܵܠܸܐ ܕܗܵܘܝܼ ܦܖ̈ܝܼܣܸܐ ܡܼܢ ܩܕܵܡ ܥܸܕܵܢܵܐ ܘܙܸܕܩܸ̈ܐ ܕܛܒܼܵܥܵܐ ܘܵܠܸܐ ܕܦܵܝܫܝܼ ܝܗܝܼܒܼܸ̈ܐ ܠܒܹܝܬ ܦܪܵܣܵܐ ܕܐܸܢܚܹܝܕܘܼܐܲܢܵܐ.

ܗ ـ ܒܹܝܬ ܦܪܵܣܵܐ ܕܐܸܢܚܹܝܕܘܼܐܲܢܵܐ ܐܝܼܬ ܠܸܗ ܦܣܵܣܵܐ ܕܠܵܐ ܦܵܪܸܣ ܠܡܘܼܫܚܵ̈ܬܵܐ ܘܐܝܼܬ ܠܸܗ ܙܸܕܩܵܐ ܕܠܵܐ ܡܵܘܕܸܥ ܠܡܵܫܘܿܚܬܲܝܗܝ ܐܵܘ ܠܡܵܫܘܿܚܲܝܗܝ ܠܥܸܠܬܵܐ ܕܠܵܐ ܦܪܵܣܬܲܝܗܝ ܐܵܦ ܐܸܢ ܣܒܝܼܪܬܵܐ ܝܠܵܗܿ ܡܼܢ ܡܲܨܚܵܢܵܐ ܕܟܘܼܢܵܫܵܐ ܕܲܡܫܲܒܸܠ ܠܥܠܲܝܡܵܬܲܢ ܘܲܠܥܠܲܝܡܲܝܢ ܒܡܸܠܟܸ̈ܗ ܘܢܸܣܝܵܢܸ̈ܗ ܡܲܚܖ̈ܵܝܸܐ.

ܚܒܖ̈ܢܐ ܥܣܩ̈ܐ

ܪܸܗܓܵܐ: ܝܲܨܝܼܦܘܼܬܵܐ

ܓܘܼܪܵܓܼܵܐ: ܝܵܗܒܼܵܠܬܵܐ ܕܠܸܒܵܐ، ܡܠܲܒܲܒܼܬܵܐ

ܐܵܦܬܵܐ: ܦܘܼܪܣܵܐ

ܡܵܨܚܵܢܘܼܬܵܐ: ܟܵܬܘܿܒܼܘܼܬܵܐ

ܢܲܒܼܪܵܫܬܵܐ: ܫܪܵܓܼܵܐ

ܖ̈ܵܡܘܼܥܸܐ: ܩܸܛܡܸ̈ܐ

ܡܵܣܵܐ: ܩܝܼܢܬܵܐ، ܓܘܼܠܥܵܐ

ܥܲܠܘܲܝ: ܟܘܼܢܵܝ ܟܬܝܼܒܼܬܵܐ، ܬܝܼܬܪ

ܝܘܼܪܒܼܵܐ: ܓܘܼܪܘܼܬܵܐ

ܐܲܡܘܼܡܵܐ: ܩܵܠܒܼܵܐ، Format

ܡܵܪܵܢܵܝܵܐ: ܫܸܖ̈ܫܵܝܸܐ، ܠܵܐ ܗܵܘܝܼ ܡܘܼܦܠܸܚܸ̈ܐ ܡܼܢ ܩܲܕ݇ܡ ܥܸܕܵܢܵܐ

ܦܵܘܫܵܐ: ܥܵܪܵܐ، ܪܵܘܚܵܐ