ܛܲܟܼܣܸ̈ܐ ܕܐܲܒܼܵܗܵܬܸ̈ܐ

                    

   ܛܲܡܲܪܬܵܐ ܕܡܝܼܬܸ̈ܐ: ܛܲܟܼܣܸ̈ܐ ܕܛܲܡܲܪܵܬܵܐ ܕܡܝܼ̈ܬܸܐ ܠܟܸܣ ܐܵܬܘܼܖ̈ܵܝܸܐ ܥܲܫܝܼܖ̈ܵܬܸܐ ܥܲܡܖ̈ܵܢܸܐ ܒܐܘܼܚܕܵܢܵܐ ܕܘܵܐܢ؛ ܦܝܼܫܸ̈ܐ ܝܢܵܐ ܟܬܝܼܒܼܸܐ ܒܝܲܕ ܡܝܲܩܪܵܐ ܡ.ܐ.ܠܵܠܵܝܵܐܢ ܪܘܼܣܢܵܝܵܐ؛ܒܫܸܢ݇ܬܵܐ 1914. ܗܿܘ ܗܵܕܟܼܵܐ ܒܸܟܬܵܒܼܵܐ ܝܠܸܗ: ܒܥܕܵܢܵܐ ܕܫܲܢܵܝܬܵܐ ܕܚܲܕ݇ ܡܼܢ ܗܲܕܵܡܸ̈ܐ ܕܒܲܝܬܵܐ؛ ܡܼܢ ܩܵܕ݇ܡ ܟܠ ܡܸܢܕܝܼ ܚܲܕ݇ ܐ݇ܢܵܫܵܐ ܠܸܒܵܢܵܐ ܟܸܐ ܥܵܟ̰ܸܡ ܠܗ݇ܘܿܢ ܥܲܝܢܵܬܸ̈ܐ ܕܡܝܼܬܵܐ.ܐܝܼܕܘܼܗܝ ܟܸܐ ܟܵܬܪܝܼ ܠܗ݇ܘܿܢ ܥܲܠ ܨܲܕܪܘܼܗܝ ܘܐܲܩܠܘܼܗ̈ܝ ܟܸܐ ܦܲܫܩܝܼܠܗ݇ܘܿܢ ܕܬܖ̈ܝܼܨܸܐ(ܕܘܼܙ) ܗܵܘܝܼ.ܟܸܐ ܬܲܢܝܼ ܕܐܸܢ ܥܲܝܢܸ̈ܐ ܕܡܵܘܬܵܢܵܐ ܦܬܝܼܚܸ̈ܐ ܦܵܝܫܝܼ ܡܲܥܢܵܝܘܼܗܿ ܐܵܗܵܐ ܝܠܵܗܿ ܕܡܵܘܬܵܢܵܐ ܒܸܣܒܵܪܵܐ ܝܠܸܗ ܥܲܠ ܚܲܕ݇ ܡܼܢ ܚܸܙܡܵܢܘܼܗܝ ܕܝܼܠܸܗ ܓܵܘ ܚܙܘܼܩܝܵܐ(ܣܲܦܲܪ).ܗܵܝܓܵܗ ܟܸܐ ܡܲܦܬܸܠܝܼ ܠܵܗܿ ܦܲܐܬܘܼܗܝ ܠܓܸܒܵܐ ܕܩܸܒܠܵܐ ܘܟܸܐ ܬܲܢܬܸܢܝܼ ܒܸܣܡܵܐ ܬ݇ܚܘܼܬ ܐܲܩܠܘܼܗ̈ܝ؛ ܟܸܐ ܡܲܚܒܸܖ̈ܝܼ ܠܗ݇ܘܿܢ ܚܸܙܡܵܢܸ̈ܐ ܘܖ̈ܵܚܡܸܐ ܐܵܦ ܠܩܲܫܵܐ ܩܵܐ ܣܲܦܵܝܬܵܐ ܕܡܵܘܬܵܢܵܐ. ܩܲܫܵܐ ܟܸܐ ܩܵܪܸܐ  ܡܼܢ ܥܲܠ ܟܬܵܒܼܵܐ ܘܟܸܐ ܬܵܪܸܨ ܚܲܕ݇ ܨܠܝܼܒܼܵܐ ܡܼܢ ܩܲܝܣܵܐ ܘܟܸܐ ܡܲܬܸܒܼ ܠܸܗ ܓܵܘ ܚܲܕ݇ ܩܵܙܵܢܟ̰ܵܐ ܡܠܝܼܬܵܐ ܡܝܼܵܐ ܘܟܸܐ ܦܵܩܸܕ ܕܡܲܫܚܸܢܝܼ ܠܗ݇ܘܿܢ ܐܵܢܝ݇ ܡܝܼܵܐ.ܗܵܝܓܵܗ ܚܲܕ݇ ܐ݇ܢܵܫܵܐ ܟܸܐ ܚܵܝܸܦ ܠܸܗ ܡܝܼܬܵܐ.ܩܵܐ ܐܵܗܵܐ ܫܘܼܓܼ݇ܠܵܐ ܩܲܕ݇ܡܵܝܬܵܐ ܟܸܐ ܚܲܠܸܠ ܠܵܗܿ ܨܸܒܥܵܐ ܡܲܚܘܝܼܵܢܬܵܐ(انگشت اشاره) ܕܐܝܼܕܵܐ ܕܝܲܡܝܼܢܵܐ ܒܡܝܼܵܐ ܒܘܼܖ̈ܟܼܸܐ ܘܪܵܫܸܡ ܨܠܝܼܒܼܵܐ ܥܲܠ ܩܸܨܘܼܗܝ. ܗܵܝܓܵܗ ܒܡܝܼܵܐ ܫܲܚܝܼܢܸ̈ܐ ܘܨܵܒܘܼܢ(ܨܵܦܘܿܢܵܐ)   ܟܸܐ ܚܲܠܸܠ ܠܵܗܿ ܕܪܵܥܢܘܼܗܝ ܘܟܠܵܗܿ ܓܸܒܵܐ ܕܝܲܡܝܼܢܵܐ.ܡܒܵܬ݇ܪ ܗܵܕܵܐ ܕܪܵܥܢܵܐ ܘܟܠܵܗܿ ܓܸܒܵܐ ܕܣܸܡܵܠܵܐ. ܗܵܝܓܵܗ ܡܐܵܢܝܼ ܡܝܼܵܐ ܕܓܵܘ ܩܵܙܵܢܟ̰ܵܐ ܚܲܕ݇ ܣܲܗܡܵܐ ܟܸܐ ܕܵܪܝܼ ܠܸܗ ܓܵܘ ܚܕܵܐ ܣܲܝܢܵܐ(ܛܲܫܬܵܐ) ܘܣܲܗܡܵܐ ܦܲܝܫܵܢܵܐ ܟܸܐ ܬܲܦܚܝܼ ܠܸܗ. ܡܒܵܬ݇ܪ ܐܵܗܵܐ ܟܸܐ ܦܵܠܛܝܼ ܠܸܗ ܨܠܝܼܒܼܵܐ ܕܩܲܝܣܵܐ ܡܼܢ ܓܵܘ ܩܵܙܵܢܟ̰ܵܐ ܘܡܲܬܒܼܝܼ ܠܸܗ ܓܵܘ ܣܲܝܢܵܐ ܘܚܲܕ݇ ܦܘܼܢܕܵܐ ܙܸܐ ܟܸܐ ܡܲܬܒܼܝܼ ܠܕܸܦܢܵܐ ܕܣܲܝܢܵܐ ܘܥܲܠ ܬܸܪܘܲܝ ܐܲܢܸܐ ܟܸܐ ܡܲܚܦܝܼ ܩܵܙܵܢܟ̰ܵܐ ܗܵܕܟܼܵܐ ܕܗܵܘܵܐ ܡܵܛܸܐ ܠܦܘܼܢܕܵܐ ܘܠܵܗܝܸܐ ܠܡܸܬܚܵܐ ܕܬܠܵܬ݇ ܝܵܘܡܵܢܸ̈ܐ.               ܦܵܣܘܼܥܬܵܐ ܬܪܝܼܵܢܝܼܬܵܐ ܗܲܕܲܪܬܵܐ ܕܟܘܼܪܵܟܼܵܐ ܝܠܵܗܿ.ܟܸܐ ܚܵܝܛܝܼ ܣܘܼܕܪܵܐ ܘܬܘܼܢܒܵܢܵܐ ܘܟܸܐ ܡܲܠܒܼܸܫܝܼ ܠܗ݇ܘܿܢ ܥܲܠ ܡܝܼܬܵܐ ܘܒܠܲܡܛܵܐ(نمد) ܟܸܐ ܝܵܣܪܝܼ ܠܗ݇ܘܿܢ ܐܲܩܠܘܼ̈ܗܝ؛ ܚܲܨܘܼܗܝ ܘܕܖ̈ܵܥܢܵܢܘܼܗܝ.ܦܲܐܬܵܐ ܕܡܝܼܬܵܐ ܐܲܚܟ̰ܝܼ ܡܘܼܟܸܣܬܵܐ ܝܠܵܗܿ ܒܚܕܵܐ ܝܵܠܸܚܬܵܐ.ܗܵܝܓܵܗ ܟܸܐ ܡܲܬܒܼܝܼ ܠܵܗܿ ܫܠܲܕܵܐ(جسد) ܕܡܝܼܬܵܐ ܥܲܠ ܢܲܣܸܠܩܵܐ(ܬܪܸܝܢ ܩܲܝܣܸܐ ܝܣܝܼܖܸ̈ܐ ܒܐܘܼܕܵܠܸܐ ܐܲܝܟܼ ܣܸܡܲܠܬܵܐ)؛ܝܲܢ ܓܵܘ ܨܲܢܕܘܼܩܵܐ؛ ܟܲܕ ܫܠܲܕܵܐ ܟܘܼܪܡܸܟܼܬܵܐ ܝܠܵܗܿ ܒܟܘܼܪܵܟܼܵܐ.ܗܵܝܓܵܗ ܢܲܣܸܠܩܵܐ ܝܲܢ ܨܲܢܕܘܼܩܵܐ ܬܠܵܬ݇ ܓܵܗܸ̈ܐ ܟܸܐ ܡܲܪܡܝܼ ܘܡܲܬܒܼܝܼܠܸܗ ܥܲܠ ܐܲܪܥܵܐ؛ ܒܵܬ݇ܪ ܗܵܕܵܐ ܦܠܵܛܵܐ ܘܒܸܪܚܵܫܵܐ ܝܢܵܐ ܠܒܸܝܬ ܩܒܼܘܼܖܸ̈ܐ.ܓܵܘ ܒܲܝܬܵܐ؛ ܒܗܿܝ ܕܘܼܟܵܐ ܕܝܼܠܵܗܿ ܫܠܲܕܵܐ؛ ܡܲܬܘܼܒܼܸܐ ܝܢܵܐ ܚܲܕ݇ ܦܘܼܢܕܵܐ ܕܠܵܗܝܸܐ ܩܵܐ ܡܸܬܚܵܐ ܕܬܠܵܬ݇ ܝܵܘܡܵܢܸ̈ܐ.ܓܵܘ ܠܲܒܲܠܬܵܐ ܕܬܒܼܝܼܪܬܵܐ ܩܲܫܵܐ ܥܲܡ ܫܲܡܵܫܵܐ  ܟܸܐ ܐܵܙܠ݇ܝܼ ܗ݇ܘܵܘ ܩܵܕ݇ܡܵܐ ܩܵܕ݇ܡ ܬܒܼܝܼܪܬܵܐ ܘܐܲܪܒܥܵܐ ܓܵܢܵܬܸ̈ܐ ܙܸܐ ܟܸܐ ܠܲܒܠܝܼ ܠܵܗܿ ܬܒܼܝܼܪܬܵܐ ܥܲܠ ܖ̈ܲܦ̰ܫܵܢܲܝܗܝ. ܐ݇ܢܵܫܸ̈ܐ ܥܲܬܝܼܖܸ̈ܐ ܟܸܐ ܠܲܒܠܝܼ ܚܲܕ݇ ܣܘܼܣܵܐ ܣܘܼܪܓܵܐ ܩܵܕ݇ܡܵܐ ܩܵܕ݇ܡ ܬܒܼܝܼܪܬܵܐ ܘܟܸܐ ܖ̈ܲܦܝܼ ܚܲܕ݇ ܩܸܛܥܵܐ ܕܦܵܪܟ̰ܵܐ ܡܓܵܘܢܵܢܵܐ(ܪܲܢܓܵܢܵܐ) ܥܲܠܸܗ.ܚܲܕ݇ܟܡܵܐ ܡܼܢ ܐ݇ܢܵܫܸ̈ܐ ܙܸܐ ܟܸܐ  ܬܵܠܝܼ ܣܲܝܦܵܐ ܘܫܵܩܠܝܼ ܚܲܕ݇ ܙܲܝܢܵܐ(ܟ̰ܲܟܵܐ) ܐ݇ܚܸܪ݇ܢܵܐ ܟܲܕ ܕܒܼܝܼܩܘܼܗܿ ܬܲܪܣܵܐ.                                                                           ܐܝܼܡܲܢ ܕܡܵܛܝܼ ܠܒܸܝܬ ܩܒܼܘܼܖܸ̈ܐ ܟܸܐ ܡܲܬܒܼܝܼ ܠܵܗܿ  ܬܒܼܝܼܪܬܵܐ ܥܲܠ ܐܲܪܥܵܐ ܘܒܲܟܼܬܵܬܸ̈ܐ ܟܸܐ ܫܲܪܝܼ ܒܸܟܼܝܵܐ ܘܒܸܠܝܵܝܵܐ. ܪܵܒܵܐ ܓܵܗܸ̈ܐ ܠܸܐ ܫܵܒܼܩܝܼ  ܕܒܲܟܼܬܵܬܸ̈ܐ ܒܵܟܼܝܼ ܒܗܿܝ ܕܐܝܼܬ ܠܗ݇ܘܿܢ ܗܲܝܡܵܢܘܼܬܵܐ ܕܕܸܡܥܸ̈ܐ ܕܥܲܝܢܲܝ̈ܗܝ ܒܸܕ ܡܲܬܪܝܼ ܠܵܗܿ ܗܿܝ ܕܘܼܟܬܵܐ ܘܡܝܼܬܵܐ ܒܸܕ ܥܲܓ̰ܸܙ. ܒܲܟܼܬܵܬܸ̈ܐ ܡܼܢ ܠܲܐܟܼܵܐ ܟܸܐ ܕܵܝܖ̈ܝܼ ܠܒܲܝܬܵܐ ܕܡܝܼܬܵܐ؛ ܐܝܼܢܵܐ ܐܘܼܖ̈ܙܸܐ ܟܸܐ ܡܲܪܡܝܼ ܘܡܲܬܒܼܝܼ ܠܵܗܿ ܬܒܼܝܼܪܬܵܐ ܬܠܵܬ݇ ܓܵܗܸ̈ܐ ܥܲܠ ܐܲܪܥܵܐ ܘܗܵܝܓܵܗ ܟܸܐ ܐܵܙܠ݇ܝܼ ܠܒܸܝܬ ܩܒܼܘܼܖܸ̈ܐ.ܒܥܕܵܢܵܐ ܕܡܲܬܲܒܼܬܵܐ ܕܬܒܼܝܼܪܬܵܐ ܓܵܘ ܩܲܒܼܪܵܐ؛ ܩܲܫܵܐ ܘܟܠܲܝܗܝ ܐ݇ܢܵܫܸ̈ܐ ܐ݇ܚܸܖ̈݇ܢܸܐ ܟܸܐ ܫܵܩܠܝܼ ܚܲܕ݇ ܩܛܝܼܪܵܐ(ܟ̰ܲܢܓܵܐ) ܕܥܲܦܪܵܐ ܓܵܐ ܐܝܼܕܲܝܗܝ ܘܟܲܕ ܡܲܬܘܼܒܼܘܼܗܿ ܝܢܵܐ ܫܠܲܕܵܐ ܓܵܘ ܩܲܒܼܪܵܐ ܩܲܫܵܐ ܡܩܲܕܘܼܫܘܼܗܝ ܝܠܸܗ ܗܿܘ ܥܲܦܪܵܐ ܘܪܲܦܘܼܝܘܼܗܝ ܝܠܸܗ ܓܵܘ ܩܲܒܼܪܵܐ.                                                                                           

   ܡܒܵܬ݇ܪ ܛܲܡܲܪܬܵܐ ܕܡܝܼܬܵܐ؛ ܟܸܐ ܚܲܠܸܠܝܼ ܠܐܝܼ̈ܕܲܗܝ ܘܠܦܲܐܬܲܝܗܝ ܠܡܲܪܙܵܐ ܕܚܕܵܐ ܢܲܗܪܵܐ ܝܲܢ ܚܕܵܐ ܫܵܩܝܼܬܵܐ ܘܟܸܐ ܕܵܝܪܝܼ ܠܥܘܼܡܪܵܐ ܩܵܐ ܪܵܐܙܵܐ.ܗܵܝܓܵܗ ܟܸܐ ܐܵܙܠ݇ܝܼ ܠܒܲܝܬܵܐ ܕܡܝܼܬܵܐ ܩܵܐ ܐ݇ܟܼܵܠܬܵܐ ܕܟܵܘܸܬܪܵܐ ܕܦܝܼܫܬܵܐ ܝܠܵܗܿ ܗܘܼܕܸܪܬܵܐ ܒܝܲܕ ܚܸܙܡܵܢܸ̈ܐ ܩܘܼܪܒܵܐ. ܒܵܬ݇ܪ ܐ݇ܟܼܵܠܬܵܐ ܕܟܵܘܸܬܪܵܐ ܟܸܐ ܒܲܣܡܝܼ ܠܪܸܫܵܐ ܕܐ݇ܢܵܫܸ̈ܐ ܕܡܵܘܬܵܢܵܐ ܘܟܸܐ ܕܵܝܪܝܼ ܠܒܵܬܸ̈ܐ ܕܓܵܢܲܝܗܝ.                        

   ܠܝܵܘܡܵܐ ܕܬܠܵܬ݇ ܒܲܟܼܬܵܬܸ̈ܐ ܟܸܐ ܫܵܩܠܝܼ ܠܐܵܢܝܼ ܡܝܼܵܐ ܕܦܝܼܫܸ̈ܐ ܝܢܵܐ ܡܼܢ ܚܝܵܦܬܵܐ ܕܡܝܼܬܵܐ ܘܟܸܐ ܕܵܪܝܼ ܠܗ݇ܘܿܢ ܓܵܘ ܚܲܕ݇ ܡܲܐܢܵܐ ܕܥܲܦܪܵܐ ܥܲܡ ܗܿܘ ܨܠܝܼܒܼܵܐ ܕܩܲܝܣܵܐ ܘܟܸܐ ܐܵܙܠ݇ܝܼ ܠܒܸܝܬ ܩܒܼܘܼܪܸ̈ܐ. ܩܲܫܵܐ ܟܸܐ ܡܩܲܕܸܫ ܠܸܗ ܩܲܒܼܪܵܐ ܘܟܸܐ ܡܲܪܝܸܣ ܠܗ݇ܘܿܢ ܐܵܢܝܼ ܡܝܼܵܐ ܥܲܠ ܩܲܒܼܪܵܐ ܒܦܸܨܠܵܐ ܕܨܠܝܼܒܼܵܐ.ܘܟܸܐ ܛܵܝܸܨ ܠܸܗ ܨܠܝܼܒܼܵܐ ܠܪܸܫܵܐ ܕܩܲܒܼܪܵܐ.ܘܒܵܬ݇ܪ ܗܵܕܵܐ ܟܸܐ ܫܵܡܸܛ ܠܸܗ ܡܲܐܢܵܐ ܕܡܝܼܵܐ. ܒܵܬ݇ܪ ܦܪܵܩܬܵܐ ܟܸܐ ܕܵܝܪܝܼ ܠܥܘܼܡܪܵܐ ܘܩܵܫܵܐ ܟܸܐ ܥܵܒܼܸܕ ܪܵܐܙܵܐ.ܒܦܪܵܩܬܵܐ ܕܪܵܐܙܵܐ ܟܸܐ ܦܲܠܓܼ݇ܝܼ ܒܸܣܪܵܐ ܒܫܝܼܠܵܐ ܒܸܝܠ ܐ݇ܢܵܫܸ̈ܐ ܘܩܵܐ ܟܠ ܚܲܕ݇ ܟܸܐ ܝܵܗܒܼܝܼ ܚܲܕ݇ ܩܸܛܥܵܐ ܕܒܸܣܪܵܐ ܥܲܡ ܬܪܸܝܢ ܩܸܛܥܵܛܸ̈ܐ ܕܠܲܚܡܵܐ.                                                           

   ܠܝܵܘܡܵܐ ܕܬܸܫܥܵܐ(ܐܸܟ̰ܵܐ) ܡܸܢ݇ܕܪܸܫ݇ ܟܸܐ ܐܵܙܠ݇ܝܼ ܠܒܸܝܬ ܩܒܼܘܼܖܸ̈ܐ ܲܘܡܒܵܬ݇ܪ ܪܵܐܙܵܐ ܓܵܘ ܥܘܼܡܪܵܐ ܟܸܐ ܐܵܙܠܝܼ ܩܵܐ ܟܵܘܸܬܪܵܐ. ܡܒܵܬ݇ܪ ܒܲܪܒܲܙܬܵܐ ܕܐ݇ܢܵܫܸ̈ܐ؛ ܩܲܪܝܼܒܼܵܐ ܟܸܐ ܝܵܗܒܼܸܠ ܕܲܫܢܸ̈ܐ ܩܵܐ ܟܠܲܝܗܝ ܐܵܢܝܼ ܕܓܵܘ ܐ݇ܟܘܼܡܵܐ ܝܢܵܐ ܘܟܸܐ ܡܲܓܪܸܐ ܠܕܸܩܢܵܐ ܕܐܘܼܖ̈ܙܸܐ. ܩܲܪܝܼܒܼܬܵܐ ܙܸܐ ܟܸܐ ܡܲܫܚܸܢܵܐ ܡܝܼܵܐ ܘܟܸܐ ܚܲܠܸܠܵܐ ܠܪܸܫܵܐ ܕܒܲܟܼܬܵܬܸ̈ܐ.ܩܵܐ ܫܸܢ݇ܬܵܐ ܡܸܢ݇ܕܪܸܫ݇ ܟܸܐ ܐܵܣܩܝܼ ܠܒܸܝܬ ܩܒܼܘܼܖܸ̈ܐ ܘܩܵܐ ܟܠܲܝܗܝ ܒܢܲܝ̈ ܡܵܬܵܐ ܟܸܐ ܝܵܗܒܼܝܼ ܟܵܘܸܬܪܵܐ.                                                                                                      

 ܒܡܵܬܘܵܬܸ̈ܐ ܕܐܘܼܪܡܝܼ ܘܣܲܠܲܡܵܣ ܐܝܼܡܲܢ ܕܚܲܕ݇ ܡܼܢ ܒܢܲܝ ܡܵܬܵܐ ܫܵܢܸܐ ܗ݇ܘܵܐ ܡܼܢ ܐܵܗܵܐ ܕܘܼܢܝܸܐ ܟܸܐ ܡܲܚܒܸܪܝܼ ܗ݇ܘܵܘ ܠܟܠܲܝܗܝ ܚܸܙܡܵܢܸ̈ܐ.ܒܐܵܗܵܐ ܝܵܘܡܵܐ ܪܵܒܵܐ ܐ݇ܢܵܫܸ̈ܐ ܟܸܐ ܐܵܬܝܼ ܗ݇ܘܵܘ ܠܒܲܝܬܵܐ ܕܡܵܘܬܵܢܵܐ ܘܠܸܐ ܗܵܘܝܵܐ ܗ݇ܘܵܐ ܟ̰ܝܵܕܬܵܐ. ܐܝܼܢܵܐ ܩܵܐ ܬܠܵܬ݇ܝܸ̈ܐ ܘܐܲܪܒܥܝܼܸܐ ܟܸܐ ܟ̰ܵܝܕܝܼ ܗ݇ܘܵܘ ܡܼܢ ܚܸܙܡܵܢܸ̈ܐ ܘܖ̈ܵܚܡܸܐ ܩܵܐ ܫܲܪܲܟܬܵܐ ܓܵܘ ܚܘܼܪܙܵܐ.ܒܝܵܘܡܵܐ ܕܣܵܦܲܝܬܵܐ ܘܝܵܘܡܵܐ ܕܬܠܵܬ݇ܝܸ̈ܐ ܡܒܵܬ݇ܪ ܕܝܵܪܬܵܐ ܡܼܢ ܒܸܝܬ ܩܒܼܘܼܖܸ̈ܐ ܟܸܐ ܝܵܗܒܼܝܼ ܗ݇ܘܵܘ ܛܥܵܡܬܵܐ ܩܵܐ ܥܵܠܡܵܐ. ܛܥܵܡܬܵܐ ܕܒܸܚܒܼܵܫܵܐ ܗ݇ܘܵܐ ܡܼܢ ܟܲܪܥܵܐ؛ܓܘܼܒܬܵܐ؛ܕܸܒܼܫܵܐ ܘܣܦܝܼܪܵܐ ܟܸܐ ܦܵܝܫܵܐ ܗ݇ܘܵܐ ܩܪܝܼܬܵܐ ܩܲܝܕܲܡܬܵܐ ܕܩܲܒܼܪܵܐ.ܘܗܿܘ ܠܲܝܠܸܐ ܕܛܵܡܖ̈ܝܼ ܗ݇ܘܵܘ ܠܡܝܼܬܵܐ؛ ܟܡܵܐ ܓ̰ܘܲܢܩܸ̈ܐ ܟܸܐ ܫܵܩܠܝܼ ܗ݇ܘܵܘ ܠܬܘܼܦܲܢܓܲܝܗܝ ܘܟܸܐ ܐܵܙܠܝܼ ܗ݇ܘܵܘ ܠܒܸܝܬ ܩܒܼܘܼܖܸ̈ܐ ܘܗܲܠ ܩܵܝܕܲܡܬܵܐ ܟܸܐ ܟܵܠܝܼ ܗ݇ܘܵܘ ܥܸܠܸܠ ܡܼܢ ܩܲܒܼܪܵܐ ܩܲܕ ܗܘܿܛܲܪ ܠܵܐ ܦܵܠܛܵܐ ܗ݇ܘܵܐ ܠܫܠܲܕܵܐ ܕܡܝܼܬܵܐ. ܡܵܪܵܐ ܕܡܵܘܬܵܢܵܐ ܟܸܐ ܠܲܒܸܠ ܗ݇ܘܵܐ ܐ݇ܟܼܵܠܬܵܐ ܘܫܬܵܝܬܵܐ ܩܵܬܲܝܗܝ ܘܐܵܢܝܼ ܗܲܠ ܦܲܠܓܵܐ ܕܠܲܝܠܸܐ ܟܸܐ ܗܵܘܝܼ ܗ݇ܘܵܘ ܪܲܦܘܼܝܸܐ ܓܘܼܠܠܵܬܸܐ ܓܵܘ ܗܵܘܵܐ ܩܵܐ ܡܲܪܚܲܩܬܵܐ ܕܗܘܿܛܲܪ. ܐܵܗܵܐ ܛܲܟܼܣܵܐ ܗܲܠ ܐܸܕܝܘܿܡ ܟܸܐ ܦܵܐܸܫ ܢܛܝܼܪܵܐ ܓܵܘ ܡܵܬܘܵܬܸܐ ܕܣܲܠܲܡܵܣ.                                                                                                                        

   ܡܼܢ ܝܵܘܡܵܐ ܕܡܵܘܬܵܐ ܗܲܠ ܫܲܒܼܥܵܐ ܝܵܘܡܵܢܸ̈ܐ ܒܟܠ ܝܵܘܡܵܐ ܚܲܕ݇ ܡܼܢ ܒܲܟܼܬܵܬܸܐ ܕܚܸܙܡܵܢܸ̈ܐ ܟܸܐ ܫܵܓܼ݇ܪܵܐ(ܫܵܝܪܵܐ) ܗ݇ܘܵܐ ܠܣܝܼܡܵܘܵܪ ܘܟܸܐ ܗܲܕܪܵܐ ܗ݇ܘܵܐ ܟ̰ܵܐܝ ܘܟܸܐ ܫܵܩܠܵܐ ܗ݇ܘܵܐ ܠܣܝܼܡܵܘܵܪ ܘܣܬܝܼܟܵܢܸ̈ܐ ܘܩܲܢܕܵܐ ܘܟܵܕܸ̈ܐ ܘܟܸܐ ܠܲܒܠܵܐ ܗ݇ܘܵܐ ܠܒܲܝܬܵܐ ܕܡܵܪ ܡܵܘܬܵܢܵܐ ܩܲܕ ܠܵܐ ܦܵܝܫܝܼ ܒܢܲܦ̰ܫܲܝܗܝ ܘܟܠܲܝܗܝ ܒܲܟܼܬܵܬܸ̈ܐ ܙܸܐ ܟܸܐ ܓ̰ܵܡܥܝܼ ܗ݇ܘܵܘ ܬܲܡܵܐ.ܩܲܪܝܼܒܼܬܵܐ ܫܲܒܼܥܵܐ ܝܵܘܡܵܢܸ̈ܐ ܟܸܐ ܦܵܝܫܵܐ ܗ݇ܘܵܐ ܠܟܸܣ ܡܵܪ ܡܵܘܬܵܢܵܐ.                                                                                                                          

 ܩܵܐ ܫܩܵܠܬܵܐ ܕܐ݇ܟܘܼܡܵܐ ܗܲܠ ܐܲܪܒܥܝܼ ܝܵܘܡܵܢܸ̈ܐ ܟܸܐ ܣܵܒܖ̈ܝܼ ܗ݇ܘܵܘ. ܗܵܝܓܵܗ ܩܲܪܝܼܒܼܵܐ ܟܸܐ ܠܲܒܸܠ ܗ݇ܘܵܐ ܠܗ݇ܘܿܢ ܐܘܼܖ̈ܙܸܐ ܠܟܸܣ ܣܲܦܵܪܵܐ(ܕܲܠܲܟ) ܘܩܲܪܝܼܒܼܬܵܐ ܙܸܐ ܟܸܐ ܗܲܕܪܵܐ ܗ݇ܘܵܐ ܠܝܵܠܸܚܝܵܬܸ̈ܐ ܡܓܵܘܢܵܢܸܐ ܘܟܸܐ ܕܵܪܝܵܐ ܗ݇ܘܵܐ ܠܗ݇ܘܿܢ ܥܲܠ ܪܸܫܵܐ ܕܒܲܟܼܬܵܬܸ̈ܐ ܒܪܘܼܫܡܵܐ ܕܦܪܵܩܬܵܐ ܕܚܲܫܵܐ ܘܐܸܒܼܠܵܐ. ܐܝܼܢܵܐ ܚܸܙܡܵܢܸ̈ܐ ܩܘܼܪܒܵܐ ܕܡܵܘܬܵܢܵܐ ܗܲܠ ܚܕܵܐ ܫܸܢ݇ܬܵܐ ܟܸܐ ܠܵܒܼܫܝܼ ܗ݇ܘܵܘ ܐ݇ܟܘܼܡܵܐ. ܡܒܵܬ݇ܪ ܚܕܵܐ ܫܸܢ݇ܬܵܐ ܡܸܢ݇ܕܪܸܫ݇ ܟܸܐ ܐܵܙܠ݇ܝܼ ܗ݇ܘܵܘ ܠܒܸܝܬ ܩܒܼܘܼܖܸ̈ܐ ܘܡܒܵܬ݇ܪ ܨܠܘܼܬܵܐ ܟܸܐ ܡܲܬܒܼܝܼ ܗ݇ܘܵܘ ܟܸܐܦܵܐ ܥܲܠ ܩܲܒܼܪܵܐ. ܘܟܠ ܫܸܢ݇ܬܵܐ ܒܝܵܘܡܵܐ ܕܥܪܘܼܒܼܬܵܐ ܕܚܲܫܵܐ ܟܸܐ ܐܵܙܠ݇ܝܼ ܗ݇ܘܵܘ ܠܒܸܝܬ ܩܒܼܘܼܖܸ̈ܐ ܩܵܐ ܚܲܠܲܠܬܵܐ ܕܩܒܼܘܼܖܸ̈ܐ ܕܗܿܘ ܢܝܼܚ ܢܲܦ̰ܫܵܐ ܐܵܦ ܟܠܲܝܗܝ ܚܸܙܡܵܢܸ̈ܐ ܢܝܼܚܸ̈ܐ ܘܟܸܐ ܠܲܒܠܝܼ ܗ݇ܘܵܘ ܐ݇ܟܼܵܠܬܵܐ ܕܬܲܡܵܐ ܦܵܝܫܵܐ ٰܐ݇ܟܼܝܼܠܧܵ.                                                                            

ܡܲܬܠܸ̈ܐ ܒܲܒܼܠܵܝܸ̈ܐ

        ܡܲܬܠܸ̈ܐ ܒܲܒܼܠܵܝܸ̈ܐ ܠܸܐ ܝܢܵܐ ܪܵܒܵܐ ܥܲܬܝܼܩܸ̈ܐ ܡܼܢ ܡܲܬܠܸ̈ܐ ܫܘܼܡܝܼܖ̈ܵܝܸܐ ܘܒܸܕܡܵܝܵܐ ܝܢܵܐ ܥܲܠܲܝܗܝ ܒܥܲܡܝܼܩܘܼܬܵܐ ܕܪܸܢܝܵܐ(ܬܲܚܡܲܢܬܵܐ) ܘܚܸܟܼܸܡܬܵܐ ܘܡܲܙܝܘܼܕܸܐ ܝܢܵܐ ܥܲܠܲܝܗܝ ܒܢܸܣܝܵܢܵܐ ܘܬܲܚܡܲܢܝܵܬܸ̈ܐ ܚܲܕ݇ܬܸ̈ܐ ܘܗܲܪ ܒܗܿܝ ܥܕܵܢܵܐ ܒܸܫ ܓܡܝܼܖܸ̈ܐ ܝܢܵܐ ܘܒܸܚܒܼܵܫܵܐ ܝܢܵܐ ܡܼܢ ܖܸ̈ܢܝܸܐ ܦܝܼܠܵܣܘܿܦܵܝܸ̈ܐ. ܪܵܒܵܐ ܡܼܢ ܣܘܼܟܵܠܸ̈ܐ ܘܨܘܼܖ̈ܝܵܬܸܐ ܕܡܲܬܠܸ̈ܐ ܒܲܒܼܠܵܝܸܐ ܡܫܘܿܢܸܐ ܠܗ݇ܘܿܢ ܠܓܸܒ ܬܵܘܕܝܼܵܬܸ̈ܐ ܕܦܝܼܫܸܐ ܗ݇ܘܵܘ ܒܸܢܝܸ̈ܐ ܥܲܠ ܚܕܵܝܘܼܬ ܐܲܠܵܗܵܐ ܘܦܪܝܼܫܵܐܝܼܬ ܥܲܠ ܕܝܵܬܸܩܸܐ ܚܲܕ݇ܬܵܐ ܒܗܿܝ ܕܣܵܝܘܿܡܘܼܗܿ ܐܝܼܬ ܗ݇ܘܵܘ ܠܗ݇ܘܿܢ ܝܕܵܥܬܵܐ ܒܝܘܼܠܦܵܢܵܐ ܕܒܲܒܼܠܵܝܸ̈ܐ. ܘܐܲܢܸܐ ܝܢܵܐ ܚܲܕ݇ܟܡܵܐ  ܡܸܢܲܝܗܝ:                                                                            

܀ܐܸܢ ܥܒܼܸܕܠܘܼܟܼ ܒܝܼܫܬܵܐ ܥܲܡ ܚܲܒܼܪܘܼܟܼ؛ ܡܘܼܕ݇ ܒܥܵܒܼܕܸܬ ܥܲܡ ܒܥܸܠܕܒܼܵܒܼܘܼܟܼ؟                                                

܀ܠܵܐ ܦܵܠܚܸܬ ܒܝܼܫܬܵܐ ܘܒܗܿܝ ܥܕܵܢܵܐ ܠܸܐ ܩܵܒܠܸܬ ܡܲܪܥܵܐ ܣܵܟܼ(ܗܝܼܟ̰).                                                         

܀ ܢܵܗ݇ܣܵܐ ܥܵܩܸܪܒܼܵܐ ܚܲܕ݇ ܐ݇ܢܵܫܵܐ؛ܡܘܼܕ ܝܘܼܬܪܵܢܵܐ ܐܝܼܬܠܵܗܿ ܡܸܢܸܗ؟ ܘܡܵܝܸܬ݇ܐ ܡܲܪܡܝܵܢܵܐ(ܩܵܛܘܿܠܵܐ) ܡܵܘܬܵܐ ܥܲܠ ܚܲܕ݇ ܐ݇ܢܵܫܵܐ؛ ܐܲܝܢܝܼ ܛܵܒܼܬܵܐ ܒܩܵܢܸܐ  ܡܒܵܬ݇ܪܸܗ؟                                                                                                   

܀ ܟܲܠܒܬܵܐ ܒܸܒܨܵܝܵܐ(ܛܲܥܘܼܝܸܐ) ܠܬܘܼܪܣܵܝܵܐ؛ ܝܠܸܕܠܵܗܿ ܓܘܼܖ̈ܝܸܐ ܒܝܼܫܸ̈ܐ.                                                          

܀ܩܵܢܸܐ ܚܲܝܠܵܢܵܐ ܠܚܲܝܘܼܬܸܗ ܒܚܲܝܠܵܐ ܕܕܪܵܥܢܸܗ ܐܝܼܢܵܐ ܡܚܝܼܠܵܐ ܒܙܵܒܸܢ ܠܝܲܠܘܼܕܸܗ.                                                  

܀ ܫܲܠܛܸܢ ܠܦܘܼܡܘܼܟܼ ܘܦܘܼܫ ܙܗܝܼܪܵܐ(ܗܸܫܝܲܪ) ܡܼܢ ܡܲܡܠܠܘܼܟܼ.                 

܀ ܗܸܕܝܘܿܛܵܐ(ܒܘܿܪܵܐ:ܦܫܝܼܛܵܐ) ܝܠܸܗ ܥܵܓܼܸܠܬܵܐ(ܥܵܪܵܒܵܢܵܐ)؛ ܘܣܲܟܼܠܵܐ ܐܘܼܪܚܘܼܗܿ.(ܒܘܼܬ ܡܗܲܕܝܵܢܵܐ ܣܲܟܼܠܵܐ ܕܒܸܕ ܡܵܡܛܸܐ ܠܐ݇ܢܵܫܸ̈ܐ ܠܚܸܫܟܵܐ ܘܥܲܡܛܵܢܵܐ.                                                        

܀ ܠܵܐ ܡܲܚܙܸܬ ܒܝܼܫܬܵܐ ܠܡܵܢܝܼ ܕܥܵܒܼܸܕ ܟܘܼܬܵܫܵܐ ܥܲܡܘܼܟܼ.

܀ ܒܚܘܼܡܣܵܢܵܐ(ܚܡܵܠܬܵܐ) ܘܪܵܚܡܘܼܬܵܐ ܩܵܒܸܠ ܠܡܵܢܝܼ ܕܣܵܩܒܸܠܘܼܟܼ (ܬܵܦܸܩ ܒܝܼܘܼܟܼ)ܒܒܝܼܫܘܼܬܵܐ.                                         

܀ ܡܲܦܠܸܚ ܟܸܐܢܘܼܬܵܐ ܒܲܪܩܘܼܒܼܠ ܒܥܸܠܕܒܼܵܒܼܘܼܟܼ.

܀ ܒܲܪܣܸܡ ܒܦܲܐܬܵܐ ܕܒܲܪܩܘܼܒܼܠܵܝܘܼܟܼ.

܀ ܠܵܐ ܡܲܣܠܸܬ ܠܡܵܢܝܼ ܕܝܼܠܸܗ ܒܲܨܘܿܪܵܐ ܡܸܢܘܼܟܼ ܒܕܲܪܓܼܵܐ.

܀ ܡܵܢܝܼ ܕܡܒܲܩܸܪܠܘܼܟܼ ܡܲܦܢܸܐ ܠܸܗ(ܓ̰ܲܘܸܒ ܠܸܗ) ܒܪܵܚܡܘܼܬܵܐ ܘܐܝܼܩܵܪܵܐ.

܀ ܠܵܐ ܓܵܒܼܪܸܬ ܓܲܝܵܪܬܵܐ (ܒܲܟܼܬܵܐ ܚܪܝܼܒܼܬܵܐ) ܟܲܕ ܒܢܲܝ̈ ܙܵܘܓܘܼܗܿ(ܓܲܒܼܪܵܢܘܼܗܿ) ܪܵܒܵܐ ܝܢܵܐ. ܡܛܠ ܕܗܿܝ ܠܸܐ ܗܲܝܸܪܵܐ ܠܘܼܟܼ ܓܵܘ ܚܲܫܘܼܟܼ. ܘܒܡܲܣܚܸܪܵܐ ܒܝܼܘܼܟܼ ܓܵܘ ܐܵܓܼܘܼܢܘܼܟܼ (ܦܠܵܫܘܼܟܼ). ܘܠܲܝــܬ ܠܵــܗܿ  ܐܝܼܩܵܪܵܐ ܩܵܬܘܼܟܼ ܐܵܦ ܠܵܐ ܡܸܫܬܲܡܥܵܢܘܼܬܵܐ(ܡܲܨܝܵܬܬܵܐ).ܒܗܿܝ ܕܗܿܝ ܒܸܕ ܡܲܬܒܼܵܐ ܟܠܵــܗܿ ܝܲܨܝܼܦܘܼܬܘܼܗܿ ܠــܐ݇ܚܸܖ̈݇ܢܸܐ. ܗܿܝ ܒܸܕ ܦܲܪܦܸܣܵܐ ܠܒܲܝــܬܵܐ  ܕܥܵܒܼܪܵܐ ܓܵܘܸܗ ܘܫܵܘܬܵܦܘܼܗܿ(ܗܿܘ ܕܒܸܬܝܵܒܼܵܐ ܘܒܸܩܝܵܡܵܐ ܝܠܸܗ ܥܲܡܘܼܗܿ) ܠܸܐ ܡܵܨܸܐ ܕܢܵܛܸܪ ܠܓܵܢܸܗ.                                           

܀ ܐ݇ܙܸܠܸܗ ܛܲܝܪܵܐ ܠܨܲܝܕܵܐ ܕܠܵܐ ܡܨܝܼܕܬܵܐ ܘܠܵܐ ܨܝܼܕܠܸܗ ܟ̰ܘܼ ܡܸܢܕܝܼ.

܀ ܩܵܕ݇ܡ ܚܲܪܙܸܦܝܼܠܝܼ ܠܬܲܚܬ ܡܝܼܵܐ ܘܡܘܼܬܒܼܵܐܠܝܼ ܓܵܢܝܼ ܠܡܵܘܬܵܐ. ܘܠܵܐ ܨܝܼܕܠܝܼ ܢܘܼܢܸ̈ܐ ܘܡܛܘܿܠܸܩܠܝܼ ܠܒܼܘܼܫܝܼ̈.(ܒܘܼܬ ܚܲܒܼܖ̈ܵܘܵܬܸ̈ܐ ܒܝܼܫܸ̈ܐ

ܕܠܸܐ ܝܢܵܐ ܡܛܵܝܵܐ ܠܢܝܼܫܵܝ ܐܸܠܵܐ ܦܪܵܩܵܐ ܝܠܸܗ ܚܲܒܼܪܲܝ ܒܚܲܕ݇ ܙܝܵܢܵܐ ܙܥܘܿܪܵܐ).                                        

܀ ܢܵܗ݇ܣܵܐ ܥܲܩܸܪܒܼܵܐ ܚܲܕ݇ ܐ݇ܢܵܫܵܐ؛ ܡܘܼܕ ܝܘܼܬܪܵܢܵܐ ܐܝܼܬ ܠܵܗܿ ܡܸܢܸܗ؟ ܘܡܵܝܸܬ݇ܐ ܡܲܪܡܝܵܢܵܐ(ܩܵܛܘܿܠܵܐ) ܡܵܘܬܵܐ ܠܚܲܕ݇ ܐ݇ܢܵܫܵܐ؛ ܡܘܼܕ ܛܵܒܼܧܵ ܒܩܵܢܸܐ ܡܼܢ ܒܵܬ݇ܪܸܗ؟                                                       

܀ ܫܲܠܛܸܢ ܠܦܘܼܡܘܼܟܼ ܘܦܘܼܫ ܙܗܝܼܪܵܐ ܡܼܢ ܡܲܡܠܠܘܼܟܼ.

܀ ܠܵܐ ܐܵܡܪܸܬ ܡܲܡܠܠܵܐ ܚܟܼܝܼܪܵܐ ܐܵܘ ܟܕܵܒܵܐ(ܒܕܘܼܓܠܸܐ).

܀ ܐܲܝܟܵܐ ܡܵܨܸܐ ܬܲܥܠܵܐ ܠܥܪܵܩܬܵܐ ܡܼܢ ܡܝܵܩܪܘܼܬܵܐ ܕܫܲܡܲܫ.(ܐܵܗܵܐ ܡܸܐܡܪܵܐ ܝܠܸܗ ܡܼܢ ܐܲܣܲܪܚܲܕܘܼܢ ܩܵܐ ܒܥܸܠܕܒܼܵܒܼܸܗ ܕܟܡܵܐ ܕܪܵܚܫܝܼ ܒܫܒܼܝܼܠܵܐ ܦܬܝܼܠܵܐ ܠܸܐ ܡܵܨܝܼ ܕܦܵܪܩܝܼ ܡܼܢ ܚܲܝܠܝܼ).                

                                          ܫܩܝܼܠܬܵܐ ܡܼܢ ܡܓܠܬܐ ܒܢܐܦܠ

                                       ܡܢܝܢܐ 22 ܫܒܛ 2004