ܡܲܬܠܸ̈ܐ ܒܲܒܼܠܵܝܸ̈ܐ

        ܡܲܬܠܸ̈ܐ ܒܲܒܼܠܵܝܸ̈ܐ ܠܸܐ ܝܢܵܐ ܪܵܒܵܐ ܥܲܬܝܼܩܸ̈ܐ ܡܼܢ ܡܲܬܠܸ̈ܐ ܫܘܼܡܝܼܖ̈ܵܝܸܐ ܘܒܸܕܡܵܝܵܐ ܝܢܵܐ ܥܲܠܲܝܗܝ ܒܥܲܡܝܼܩܘܼܬܵܐ ܕܪܸܢܝܵܐ(ܬܲܚܡܲܢܬܵܐ) ܘܚܸܟܼܸܡܬܵܐ ܘܡܲܙܝܘܼܕܸܐ ܝܢܵܐ ܥܲܠܲܝܗܝ ܒܢܸܣܝܵܢܵܐ ܘܬܲܚܡܲܢܝܵܬܸ̈ܐ ܚܲܕ݇ܬܸ̈ܐ ܘܗܲܪ ܒܗܿܝ ܥܕܵܢܵܐ ܒܸܫ ܓܡܝܼܖܸ̈ܐ ܝܢܵܐ ܘܒܸܚܒܼܵܫܵܐ ܝܢܵܐ ܡܼܢ ܖܸ̈ܢܝܸܐ ܦܝܼܠܵܣܘܿܦܵܝܸ̈ܐ. ܪܵܒܵܐ ܡܼܢ ܣܘܼܟܵܠܸ̈ܐ ܘܨܘܼܖ̈ܝܵܬܸܐ ܕܡܲܬܠܸ̈ܐ ܒܲܒܼܠܵܝܸܐ ܡܫܘܿܢܸܐ ܠܗ݇ܘܿܢ ܠܓܸܒ ܬܵܘܕܝܼܵܬܸ̈ܐ ܕܦܝܼܫܸܐ ܗ݇ܘܵܘ ܒܸܢܝܸ̈ܐ ܥܲܠ ܚܕܵܝܘܼܬ ܐܲܠܵܗܵܐ ܘܦܪܝܼܫܵܐܝܼܬ ܥܲܠ ܕܝܵܬܸܩܸܐ ܚܲܕ݇ܬܵܐ ܒܗܿܝ ܕܣܵܝܘܿܡܘܼܗܿ ܐܝܼܬ ܗ݇ܘܵܘ ܠܗ݇ܘܿܢ ܝܕܵܥܬܵܐ ܒܝܘܼܠܦܵܢܵܐ ܕܒܲܒܼܠܵܝܸ̈ܐ. ܘܐܲܢܸܐ ܝܢܵܐ ܚܲܕ݇ܟܡܵܐ  ܡܸܢܲܝܗܝ:                                                                            

܀ܐܸܢ ܥܒܼܸܕܠܘܼܟܼ ܒܝܼܫܬܵܐ ܥܲܡ ܚܲܒܼܪܘܼܟܼ؛ ܡܘܼܕ݇ ܒܥܵܒܼܕܸܬ ܥܲܡ ܒܥܸܠܕܒܼܵܒܼܘܼܟܼ؟                                                

܀ܠܵܐ ܦܵܠܚܸܬ ܒܝܼܫܬܵܐ ܘܒܗܿܝ ܥܕܵܢܵܐ ܠܸܐ ܩܵܒܠܸܬ ܡܲܪܥܵܐ ܣܵܟܼ(ܗܝܼܟ̰).                                                         

܀ ܢܵܗ݇ܣܵܐ ܥܵܩܸܪܒܼܵܐ ܚܲܕ݇ ܐ݇ܢܵܫܵܐ؛ܡܘܼܕ ܝܘܼܬܪܵܢܵܐ ܐܝܼܬܠܵܗܿ ܡܸܢܸܗ؟ ܘܡܵܝܸܬ݇ܐ ܡܲܪܡܝܵܢܵܐ(ܩܵܛܘܿܠܵܐ) ܡܵܘܬܵܐ ܥܲܠ ܚܲܕ݇ ܐ݇ܢܵܫܵܐ؛ ܐܲܝܢܝܼ ܛܵܒܼܬܵܐ ܒܩܵܢܸܐ  ܡܒܵܬ݇ܪܸܗ؟                                                                                                   

܀ ܟܲܠܒܬܵܐ ܒܸܒܨܵܝܵܐ(ܛܲܥܘܼܝܸܐ) ܠܬܘܼܪܣܵܝܵܐ؛ ܝܠܸܕܠܵܗܿ ܓܘܼܖ̈ܝܸܐ ܒܝܼܫܸ̈ܐ.                                                          

܀ܩܵܢܸܐ ܚܲܝܠܵܢܵܐ ܠܚܲܝܘܼܬܸܗ ܒܚܲܝܠܵܐ ܕܕܪܵܥܢܸܗ ܐܝܼܢܵܐ ܡܚܝܼܠܵܐ ܒܙܵܒܸܢ ܠܝܲܠܘܼܕܸܗ.                                                  

܀ ܫܲܠܛܸܢ ܠܦܘܼܡܘܼܟܼ ܘܦܘܼܫ ܙܗܝܼܪܵܐ(ܗܸܫܝܲܪ) ܡܼܢ ܡܲܡܠܠܘܼܟܼ.                 

܀ ܗܸܕܝܘܿܛܵܐ(ܒܘܿܪܵܐ:ܦܫܝܼܛܵܐ) ܝܠܸܗ ܥܵܓܼܸܠܬܵܐ(ܥܵܪܵܒܵܢܵܐ)؛ ܘܣܲܟܼܠܵܐ ܐܘܼܪܚܘܼܗܿ.(ܒܘܼܬ ܡܗܲܕܝܵܢܵܐ ܣܲܟܼܠܵܐ ܕܒܸܕ ܡܵܡܛܸܐ ܠܐ݇ܢܵܫܸ̈ܐ ܠܚܸܫܟܵܐ ܘܥܲܡܛܵܢܵܐ.                                                        

܀ ܠܵܐ ܡܲܚܙܸܬ ܒܝܼܫܬܵܐ ܠܡܵܢܝܼ ܕܥܵܒܼܸܕ ܟܘܼܬܵܫܵܐ ܥܲܡܘܼܟܼ.

܀ ܒܚܘܼܡܣܵܢܵܐ(ܚܡܵܠܬܵܐ) ܘܪܵܚܡܘܼܬܵܐ ܩܵܒܸܠ ܠܡܵܢܝܼ ܕܣܵܩܒܸܠܘܼܟܼ (ܬܵܦܸܩ ܒܝܼܘܼܟܼ)ܒܒܝܼܫܘܼܬܵܐ.                                         

܀ ܡܲܦܠܸܚ ܟܸܐܢܘܼܬܵܐ ܒܲܪܩܘܼܒܼܠ ܒܥܸܠܕܒܼܵܒܼܘܼܟܼ.

܀ ܒܲܪܣܸܡ ܒܦܲܐܬܵܐ ܕܒܲܪܩܘܼܒܼܠܵܝܘܼܟܼ.

܀ ܠܵܐ ܡܲܣܠܸܬ ܠܡܵܢܝܼ ܕܝܼܠܸܗ ܒܲܨܘܿܪܵܐ ܡܸܢܘܼܟܼ ܒܕܲܪܓܼܵܐ.

܀ ܡܵܢܝܼ ܕܡܒܲܩܸܪܠܘܼܟܼ ܡܲܦܢܸܐ ܠܸܗ(ܓ̰ܲܘܸܒ ܠܸܗ) ܒܪܵܚܡܘܼܬܵܐ ܘܐܝܼܩܵܪܵܐ.

܀ ܠܵܐ ܓܵܒܼܪܸܬ ܓܲܝܵܪܬܵܐ (ܒܲܟܼܬܵܐ ܚܪܝܼܒܼܬܵܐ) ܟܲܕ ܒܢܲܝ̈ ܙܵܘܓܘܼܗܿ(ܓܲܒܼܪܵܢܘܼܗܿ) ܪܵܒܵܐ ܝܢܵܐ. ܡܛܠ ܕܗܿܝ ܠܸܐ ܗܲܝܸܪܵܐ ܠܘܼܟܼ ܓܵܘ ܚܲܫܘܼܟܼ. ܘܒܡܲܣܚܸܪܵܐ ܒܝܼܘܼܟܼ ܓܵܘ ܐܵܓܼܘܼܢܘܼܟܼ (ܦܠܵܫܘܼܟܼ). ܘܠܲܝــܬ ܠܵــܗܿ  ܐܝܼܩܵܪܵܐ ܩܵܬܘܼܟܼ ܐܵܦ ܠܵܐ ܡܸܫܬܲܡܥܵܢܘܼܬܵܐ(ܡܲܨܝܵܬܬܵܐ).ܒܗܿܝ ܕܗܿܝ ܒܸܕ ܡܲܬܒܼܵܐ ܟܠܵــܗܿ ܝܲܨܝܼܦܘܼܬܘܼܗܿ ܠــܐ݇ܚܸܖ̈݇ܢܸܐ. ܗܿܝ ܒܸܕ ܦܲܪܦܸܣܵܐ ܠܒܲܝــܬܵܐ  ܕܥܵܒܼܪܵܐ ܓܵܘܸܗ ܘܫܵܘܬܵܦܘܼܗܿ(ܗܿܘ ܕܒܸܬܝܵܒܼܵܐ ܘܒܸܩܝܵܡܵܐ ܝܠܸܗ ܥܲܡܘܼܗܿ) ܠܸܐ ܡܵܨܸܐ ܕܢܵܛܸܪ ܠܓܵܢܸܗ.                                           

܀ ܐ݇ܙܸܠܸܗ ܛܲܝܪܵܐ ܠܨܲܝܕܵܐ ܕܠܵܐ ܡܨܝܼܕܬܵܐ ܘܠܵܐ ܨܝܼܕܠܸܗ ܟ̰ܘܼ ܡܸܢܕܝܼ.

܀ ܩܵܕ݇ܡ ܚܲܪܙܸܦܝܼܠܝܼ ܠܬܲܚܬ ܡܝܼܵܐ ܘܡܘܼܬܒܼܵܐܠܝܼ ܓܵܢܝܼ ܠܡܵܘܬܵܐ. ܘܠܵܐ ܨܝܼܕܠܝܼ ܢܘܼܢܸ̈ܐ ܘܡܛܘܿܠܸܩܠܝܼ ܠܒܼܘܼܫܝܼ̈.(ܒܘܼܬ ܚܲܒܼܖ̈ܵܘܵܬܸ̈ܐ ܒܝܼܫܸ̈ܐ

ܕܠܸܐ ܝܢܵܐ ܡܛܵܝܵܐ ܠܢܝܼܫܵܝ ܐܸܠܵܐ ܦܪܵܩܵܐ ܝܠܸܗ ܚܲܒܼܪܲܝ ܒܚܲܕ݇ ܙܝܵܢܵܐ ܙܥܘܿܪܵܐ).                                        

܀ ܢܵܗ݇ܣܵܐ ܥܲܩܸܪܒܼܵܐ ܚܲܕ݇ ܐ݇ܢܵܫܵܐ؛ ܡܘܼܕ ܝܘܼܬܪܵܢܵܐ ܐܝܼܬ ܠܵܗܿ ܡܸܢܸܗ؟ ܘܡܵܝܸܬ݇ܐ ܡܲܪܡܝܵܢܵܐ(ܩܵܛܘܿܠܵܐ) ܡܵܘܬܵܐ ܠܚܲܕ݇ ܐ݇ܢܵܫܵܐ؛ ܡܘܼܕ ܛܵܒܼܧܵ ܒܩܵܢܸܐ ܡܼܢ ܒܵܬ݇ܪܸܗ؟                                                       

܀ ܫܲܠܛܸܢ ܠܦܘܼܡܘܼܟܼ ܘܦܘܼܫ ܙܗܝܼܪܵܐ ܡܼܢ ܡܲܡܠܠܘܼܟܼ.

܀ ܠܵܐ ܐܵܡܪܸܬ ܡܲܡܠܠܵܐ ܚܟܼܝܼܪܵܐ ܐܵܘ ܟܕܵܒܵܐ(ܒܕܘܼܓܠܸܐ).

܀ ܐܲܝܟܵܐ ܡܵܨܸܐ ܬܲܥܠܵܐ ܠܥܪܵܩܬܵܐ ܡܼܢ ܡܝܵܩܪܘܼܬܵܐ ܕܫܲܡܲܫ.(ܐܵܗܵܐ ܡܸܐܡܪܵܐ ܝܠܸܗ ܡܼܢ ܐܲܣܲܪܚܲܕܘܼܢ ܩܵܐ ܒܥܸܠܕܒܼܵܒܼܸܗ ܕܟܡܵܐ ܕܪܵܚܫܝܼ ܒܫܒܼܝܼܠܵܐ ܦܬܝܼܠܵܐ ܠܸܐ ܡܵܨܝܼ ܕܦܵܪܩܝܼ ܡܼܢ ܚܲܝܠܝܼ).                

                                          ܫܩܝܼܠܬܵܐ ܡܼܢ ܡܓܠܬܐ ܒܢܐܦܠ

                                       ܡܢܝܢܐ 22 ܫܒܛ 2004

 

  ܥܠ ܥܝܢܐ ܕܡܝܐ

  ܦܠܸܛܠܵܗܿ ܘܲܪܕܝܼܵܐ ܡܼܢ ܓܵܘ ܒܲܝܬܵܐ ܟܲܕ ܒܐܝܼܕܘܼܗܿ ܕܒܼܝܼܩܬܵܐ ܗ݇ܘܵܐ ܚܕܵܐ ܟܘܼܪܡܘܼܟܼܬܵܐ. ܓܵܘ ܚܸܫܟܵܐ  ܥܲܡܘܼܩܵܐ ܕܦܲܠܓܵܐ ܕܠܲܝܠܸܐ؛ ܒܬܸܫܘܸܫܬܵܐ ܪ݇ܚܸܫܠܵܗܿ ܠܓܸܒܵܐ ܕܣܸܡܲܠܬܵܐ ܕܡܼܢ ܩܵܕ݇ܡ ܥܕܵܢܵܐ ܡܘܼܣܢܸܕܬܘܼܗܿ ܗ݇ܘܵܐ ܠܓܘܼܕܵܐ.ܚܸܫܟܵܐ ܡܘܼܟܣܵܐ ܗ݇ܘܵܐ ܠܟܠ ܚܲܕ݇ ܕܘܼܟܵܐ ܘܬܲܠܓܵܐ ܕܫܘܼܪܝܵܐ ܗ݇ܘܵܐ ܒܸܥܪܵܝܵܐ ܡܼܢ ܠܲܝܠܸܐ ܕܲܥܒܼܲܪ ؛ ܡܛܵܝܵܐ ܗ݇ܘܵܐ ܗܲܠ ܒܸܪܟܵܐ. ܝܣܝܼܩܲܝܠܵܗܿ ܦܲܠܸ̈ܐ ܕܣܸܡܲܠܬܵܐ ܚܲܕ݇ ܚܲܕ݇ ܘܡܘܼܬܒܼܲܝܠܵܗܿ ܐܲܩܠܘܼ̈ܗܿ ܥܲܠ ܐ݇ܓܵܪܸܐ. ܒܵܬ݇ܪ ܟܡܵܐ ܦܵܣܘܿܥܝܵܬܸ̈ܐ ܟܠܸܐ ܠܵܗܿ ܘܓܘܼܫܸܩܠܵܗܿ ܠܐܸܠܬܸܚܬ݇ ܠܓܵܘ ܥܵܠܘܿܠܵܐ. ܬܘܼܚܡܸܢܵܗܿ: ـ ܐܵܕܝܼܵܐ ܒܡܵܛܸܐ. ܗܵܝܓܵܗ ܪܓܼܸܫܠܵܗܿ ܕܒܸܪܓܵܕܵܐ ܝܠܵܗܿ ܡܼܢ ܩܲܪܬܵܐ ܕܥܒܼܵܪܵܐ ܗ݇ܘܵܐ ܡܼܢ ܓ̰ܘܼܠܘܼ̈ܗܿ ܘܡܐܲܝܟܼ ܚܡܵܛܵܐ ܒܲܙܒܘܼܙܸܐ ܗ݇ܘܵܐ ܠܓܸܠܕܘܼܗ.                                                                                          

   ܐ݇ܬܸܐ ܠܵܗܿ ܩܵܕ݇ܡ ܥܲܝܢܘܼܗܿ ܦܲܪܨܘܼܦܵܐ ܕܓܝܼܘܲܪܓܝܼܣ؛ ܗܿܘ ܕܒܸܕ ܐܵܬܸܐ ܗ݇ܘܵܐ ܩܵܐ ܠܲܒܲܠܬܘܼܗܿ. ܨܘܼܠܡܸܢܠܵܗܿ ܠܚܲܕ݇ ܓ̰ܘܵܢܩܵܐ ܠܵܚܘܿܡܵܐ ܘܩܵܘܡܘܼܗܝ ܪܵܡܵܐ.ܙܲܪܕܵܢܵܝܵܐ ܗ݇ܘܵܐ ܒܚܕܵܐ ܦܲܐܬܵܐ ܓܵܚܘܿܟܬܵܐ؛ ܗܲܪ ܐܲܝܟܼ ܕܚܙܝܼܬܘܼܗܝ ܗ݇ܘܵܐ ܒܚܸܠܡܘܼܗܿ. ܒܸܙܡܵܪܵܐ ܘܒܪܸܩܕܵܐ ܠܲܝܬ ܗ݇ܘܵܐ ܐܲܝܟܼ ܕܝܼܘܼܗܝ ܓܵܘ ܟܠܲܝ ܡܵܬܘܵܬܸ̈ܐ ܕܚܲܕܸܖ̈ܘܵܢܸܐ. ܓܝܼܘܲܪܓܝܼܣ ܐܲܚܘܿܢܵܐ ܕܚܲܒܼܸܪܬܘܼܗܿ ܗ݇ܘܵܐ ܘܟܠ ܟܡܵܐ ܚܲܕ݇ ܟܸܐ ܐܵܬܸܐ ܗ݇ܘܵܐ ܠܡܵܬܵܐ ܩܵܐ ܬܦܵܩܬܵܐ ܒܚܵܬܸܗ.                                                                                                   

        ܟܡܵܐ ܝܲܖ̈ܚܸܐ ܩܵܕ݇ܡ ܗܵܕܵܐ؛ ܒܠܲܝܠܸܐ ܕܝܵܘܢܲܢ ܢܒܼܝܼܵܐ ܚܙܝܼܬܘܼܗܝ ܗ݇ܘܵܐ ܒܚܸܠܡܘܼܗܿ. ܗܿܝ ܫܸܢ݇ܬܵܐ ܙܸܐ ܐܲܝܟܼ ܟܠ ܥܕܵܢܵܐ ܨܝܼܡܬܵܐ ܗ݇ܘܵܐ ܬܠܵܬ݇ ܝܵܘܡܵܢܸ̈ܐ ܘܒܪܲܡܫܵܐ ܕܚܲܡܸܫܒܫܲܒܵܐ ܐ݇ܟܼܝܼܠܬܵܐ ܗ݇ܘܵܐ ܫܲܒܼܥܵܐ ܩܘܼܓ̰ܸܐ ܡܼܢ ܗܿܝ ܦܘܼܚܘܼܢ ܕܗܘܼܕܸܪܬܘܼܗܿ ܗ݇ܘܵܐ ܒܐܝܼ̈ܕܵܬܸܐ ܕܓܵܢܘܼܗܿ؛ ܘܬܠܵܬ݇ ܩܘܼܓ̰ܸܐ ܙܸܐ ܡܸܠܚܵܐ ܒܵܬܪܲܝܗܝ. ܘܕܠܵܐ ܟ̰ܘܼ ܚܕܵܐ ܗܲܡܙܲܡܬܵܐ ܕܡܝܼܟܼܬܵܐ ܗ݇ܘܵܐܼ ܒܐܵܗܵܐ ܗܸܒܼܝܼ ܕܚܵܙܝܵܐ ܠܸܗ ܗܵܘ ܓ̰ܘܵܢܩܵܐ ܕܒܸܕ ܗܵܘܸܐ ܚܲܒܪܵܐ ܕܚܲܝܘܼܗܿ.   ܒܚܸܠܡܘܼܗܿ؛ ܟܠܝܼܬܵܐ ܗ݇ܘܵܐ ܥܲܠ ܥܲܝܢܵܐ ܕܡܝܼܵܐ ܘܓܝܼܘܲܪܓܝܼܣ ܬܵܡܵܐ ܗ݇ܘܵܐ ܟܲܕ ܦܘܼܫܛܘܼܗܝ ܗ݇ܘܵܐ ܠܓܸܒܘܼܗܿ ܚܲܕ݇ ܟܵܣܵܐ ܙܥܘܿܪܵܐ؛ ܘܗܿܝ ܫܩܝܼܠܬܘܼܗܝ ܗ݇ܘܵܐ ܟܵܣܵܐ ܡܐܝܼܕܘܼܗܝ ܘܫܬܝܼܬܵܐ ܗ݇ܘܵܐ ܡܐܵܢܝ݇ ܡܝܼܵܐ ܨܸܦܝܸ̈ܐ ܕܓܵܘ ܟܵܣܵܐ.                                                                                                               

   ܠܸܐ ܗ݇ܘܵܐ ܓܪܝܼܫܬܵܐ ܒܸܫ ܙܵܘܕܵܐ ܡܼܢ ܟܡܵܐ ܝܵܘܡܵܢܸ̈ܐ ܕܬܦܝܼܩܬܵܐ ܗ݇ܘܵܐ ܒܓܝܼܘܲܪܓܝܼܣ ܗܲܪ ܬܵܡܵܐ ܠܟܸܣ ܗܿܝ ܥܲܝܢܵܐ ܕܚܙܝܼܬܘܼܗܿ ܗ݇ܘܵܐ ܒܚܸܠܡܘܼܗܿ.ܓܝܼܘܲܪܓܝܼܣ ܗܘܼܡܙܸܡܵܐ ܗ݇ܘܵܐ ܥܲܡܘܼܗܿ ܘܐ݇ܡܝܼܪܵܐ ܗ݇ܘܵܐ ܕܐܸܢ ܒܵܒܘܼܗܿ  ܪܵܙܝܼ ܗܵܘܸܐ ܒܵܥܸܐ ܐܵܬܸܐ ܠܛܵܠܝܼܒܘܼܬܘܼܗܿ. ܗܲܪ ܗܿܘ ܝܵܘܡܵܐ ܘܲܪܕܝܼܵܐ ܡܘܼܚܒܸܪܵܐ ܠܵܗܿ ܝܸܡܘܼܗܿ ܒܘܼܬ ܟܠ ܡܸܢܕܝܼ. ܒܪܲܡܫܵܐ ܟܲܕ ܗܿܝ ܗܲܕܘܼܪܸܐ ܗ݇ܘܵܐ ܩܵܐ ܕܡܵܟܼܵܐ ܫܡܸܥܠܵܗܿ ܕܒܵܒܘܼܗܿ ܐ݇ܡܵܪܵܐ ܝܠܸܗ: (ܬܲܢܝܼ ܩܵܐ ܘܲܪܕܝܼܵܐ ܕ ܠܸܗ ܗܵܘܸܐ ܐܵܗ ܫܘܼܓܼ݇ܠܵܐ.) ܓܝܼܘܲܪܓܝܼܣ ܠܲܝܬ ܗ݇ܘܵܐ ܠܸܗ  ܥܘܼܬܪܵܐ ܘܕܵܘܸܠܬܵܐ ܐܵܦܸܢ ܕܚܲܕ݇ ܓ̰ܘܲܢܩܵܐ ܗ݇ܘܵܐ ܛܲܢܵܢܵܐ ܐܝܼܢܵܐ ܒܵܒܵ ܕܘܲܪܕܝܼܵܐ ܟܸܐ ܒܵܥܸܐ ܗ݇ܘܵܐ ܕܝܵܗܒܼܸܠ ܗ݇ܘܵܐ ܠܵܗܿ ܩܵܐ ܚܲܕ݇ ܡܼܢ ܚܸܙܡܵܢܘܼܗܝ ܕܩܘܼܘܸܠܵܐ ܗ݇ܘܵܐ ܕܒܸܕ ܡܲܠܸܐ ܠܸܗ ܩܕܵܠܘܼܗܿ ܡܼܢ ܕܲܗܒܼܵܐ ܙܲܪܕܵܐ.                                                                                       

     ܗܵܝܓܵܗ ܚܵܬܵܐ ܕܓܝܼܘܲܪܓܝܼܣ ܡܘܼܬ݇ܝܸܬܵܐ ܗ݇ܘܵܐ ܚܲܒܪܵܐ ܕܐܸܢ ܡܲܚܘܼܒܸܐ ܝܠܵܗܿ  ܩܵܐ ܓܝܼܘܲܪܓܝܼܣ؛ ܗܲܕܪܵܐ ܠܵܗܿ ܓܵܢܘܼܗܿ ܩܵܐ ܠܲܝܠܸܐ ܕܚܲܕ݇ܒܫܲܒܵܐ ܘܗܿܘ ܒܸܕ ܐܵܬܸܐ ܒܵܬ݇ܪܘܼܗܿ ܕܓ̰ܵܢܸܒܼ ܠܵܗܿ.                                                                               

   ܪܝܼܡܠܸܗ ܩܵܠܵܐ ܕܢܒܼܵܚܬܵܐ ܕܟܲܠܒܸ̈ܐ ܒܡܵܬܵܐ. ܘܫܡܸܥܠܵܗܿ ܘܲܪܕܝܼܵܐ ܠܩܵܠܵܐ ܕܒܵܒܘܼܗܿ ܕܦܠܸܛܠܸܗ ܠܓܵܘ ܕܵܪܬܵܐ ܘܟܠܸܐ ܠܸܗ ܩܵܐ ܚܲܕ݇ ܡܸܬܚܵܐ ܟܸܪܝܵܐ. ܪ݇ܚܸܫܠܸܗ ܠܓܸܒܵܐ ܕܦܵܓܵܐ ܘܡܘܼܩܘܸܐ ܠܸܗ ܠܩܸܦܠܵܐ ܕܬܲܪܥܵܐ ܘܕܸܪܸܗ ܠܓܵܘܵܐ ܕܒܲܝܬܵܐ ܘܐ݇ܡܸܪܸܗ ܩܵܐ ܒܲܟܼܬܸܗ: ܒܲܟܼܬܵܐ ܒܸܚܫܵܒܼܸܢ ܕܐܲܕܠܲܝܠܸܐ ܓܸܢܵܒܼܸܐ ܒܸܕ ܡܵܚܝܼ ܠܡܵܬܵܐ. ܐܲܠܵܗܵܐ ܪܵܚܸܡ ܥܲܠܲܢ. ܗܵܝܓܵܗ ܥܒܼܸܪܸܗ ܓܵܘ ܒܲܝܬܵܐ ܘܕܒܼܝܼܪܲܝܠܸܗ ܟܠܲܝܗܝ ܬܲܖ̈ܥܵܢܸܐ.                                                                                                                          

   ܡܼܢ ܩܲܪܬܵܐ ܨܲܢܨܘܼܦܸܐ ܗ݇ܘܵܘ ܨܸܒܥܵܬܸ̈ܐ ܕܐܝܼܕܘܼܗܿ ܘܐܲܩܠܘܼܗܿ. ܠܸܐ ܗ݇ܘܵܐ ܡܨܵܝܵܐ ܕܟܵܠܝܵܐ ܗ݇ܘܵܐ ܠܚܲܕ݇ ܫܵܘܦܵܐ. ܬܘܼܚܡܸܢܵܗܿ: ܕܵܐܟܼܝܼ ܗ݇ܘܝܼܬܵܐ ܝܠܵܗܿ. ܩܵܡܘܼ ܠܸܐ ܝܠܸܗ ܒܸܐܬܵܝܵܐ. ܠܵܐ ܗܵܘܝܵܐ ܕܦܫܝܼܡܵܐ ܝܠܸܗ؟ ܐܸܢ ܠܵܐ ܐܵܬܸܐ ܗܲܠ ܟܡܵܐ ܕܲܩܝܼܩܸ̈ܐ ܐ݇ܚܸܖ̈݇ܢܸܐ؛ ܒܸܕ ܕܵܝܪܵܢ ܠܒܲܝܬܵܐ.ܟܲܕ ܒܠܝܼܓܬܵܐ ܒܐܲܢܸܐ ܬܲܚܡܲܢܝܵܬܸ̈ܐ ܒܚܲܕ݇ ܓܵܗ ܬܸܪܵܗܿ ܠܓܵܢܘܼܗܿ. ܪܓܼܸܫܠܵܗܿ ܕܩܵܐ ܡܸܬܚܵܐ ܕܟܡܵܐ ܕܲܩܝܼܩܸ̈ܐ ܒܸܐܬܵܝܵܐ ܗ݇ܘܵܐ ܚܲܕ݇ ܩܵܠܵܐ ܕܟ̰ܲܩܟ̰ܲܩܬܵܐ ܡܼܢ ܐܸܠܬܸܚܬ݇ ܘܗܿܝ ܠܸܐ ܗ݇ܘܵܐ ܫܡܝܼܥܬܵܐ. ܠܵܐ ܝܕܸܥܠܵܗܿ ܡܘܼܕ ܩܵܠܵܐ ܝܠܸܗ.                                     

  ܓܪܝܼܫܵܐ ܠܵܗܿ ܓܵܢܘܼܗܿ ܠܓܸܒܵܐ ܕܥܵܠܘܼܠܵܐ ܘܓܵܘ ܗܿܘ ܚܸܫܟܵܐ ܥܲܡܘܼܩܵܐ ܓܘܼܫܸܩܠܵܗܿ ܠܐܸܠܬܸܚܬ݇. ܫܡܸܥܠܵܗܿ ܚܲܕ݇ ܩܵܠܵܐ ܕܐ݇ܡܵܪܵܐ ܗ݇ܘܵܐ: ܬܵܐ! ܡܲܠܝܸܙ ܬܵܐ! ܡܠܸܐ ܠܸܗ ܠܸܒܘܼܗܿ ܡܼܢ ܚܲܕܘܼܬܵܐ. ܗܸܐ! ܐ݇ܬܝܼܵܐ ܗ݇ܘܵܐ ܓܝܼܘܲܪܓܝܼܣ ܒܵܬ݇ܪܘܼܗܿ.ܒܡܲܠܝܲܙܬܵܐ ܨܸܠܝܲܝܗܝ ܠܵܗܿ ܦܲܠܸ̈ܐ ܕܣܸܡܲܠܬܵܐ ܘܟܲܕ ܡܛܸܐ ܠܵܗܿ ܠܗܿܝ ܐ݇ܚܲܪܵܝܬܵܐ؛ ܝܪܸܟܼܠܵܗܿ ܚܕܵܐ ܐܝܼܕܵܐ ܠܓܸܒܘܼܗܿ ܘܕܒܼܝܼܩܵܐ ܠܵܗܿ ܐܝܼܕܘܼܗܿ. ܦܪܝܼܩܬܵܐ ܗ݇ܘܵܐ ܬܸܫܘܸܫܬܵܐ ܕܘܲܪܕܝܼܵܐ. ܐ݇ܚܸܪ݇ܢܵܐ ܠܲܝܬ ܗ݇ܘܵܐ ܟ̰ܘܼ ܚܲܕ݇ ܙܕܘܿܥܬܵܐ ܒܠܸܒܘܼܗܿ. ܒܝܼܕܵܥܵܐ ܗ݇ܘܵܐ ܕܐܝܼܕܘܼܗܿ ܓܵܘ ܐܝܼܕܵܐ ܕܚܲܕ݇ ܓ̰ܘܲܢܩܵܐ ܛܲܢܵܢܵܐ ܝܠܵܗܿ.   

   ܒܗܿܘ ܝܵܘܡܵܐ ܐ݇ܚܸܪ݇ܢܵܐ ܟܸܠܝܸ̈ܐ ܗ݇ܘܵܘ ܩܵܕ݇ܡ ܒܘܼܪܵܟܼܵܐ ܘܐܲܒܘܼܢܵܐ ܒܲܪܘܼܟܼܲܝܗܝ ܗ݇ܘܵܐ ܐܲܝܟܼ ܚܲܕ݇ ܙܵܘܓܵܐ ܐܵܬܘܼܪܵܝܵܐ. ܒܕܲܥܬܝܼܕ ܐܵܢܝܼ ܒܸܕ ܚܵܝܝܼ ܗ݇ܘܵܘ ܒܚܲܕ݇ ܚܘܼܒܵܐ ܫܲܚܝܼܢܵܐ ܗܲܠ ܦܪܵܩܬܵܐ ܕܚܲܝܲܝܗܝ ܘܒܸܕ ܒܵܢܝܼ ܗ݇ܘܵܘ ܚܲܕ݇ ܒܲܝܬܵܐ ܡܸܠܝܵܐ ܡܼܢ ܚܲܕܘܼܬܵܐ ܘܒܸܕ ܒܲܓ̰ܖ̈ܝܼ ܗ݇ܘܵܘ ܝܵܠܸ̈ܐ ܘܒܢܵܬܸ̈ܐ ܩܵܐ ܐܘܼܡܬܵܐ.                                                                                                

ܫܡܝܪܡ ܕ.ܦܘܪܝܐܢ