ܣܓܼܪܐ ܥܠ ܐܘܪܚܢ

                                   ܝܘܐܪܫ ܗܝܕܘ

   ܒܚܲܕ݇ ܡܼܢ ܝܵܘܡܵܢܸ̈ܐ، ܚܲܕ݇ ܡܲܠܟܵܐ ܦܩܸܕܠܸܗ ܕܚܲܕ݇ ܐܝܼܣܵܪܵܐ ܦܵܐܸܫ ܡܘܼܬܒܼܵܐ ܥܲܠ ܐܘܼܪܚܵܐ ܕܐܲܙܵܠ݇ܢܸ̈ܐ ܘܐܲܬܝܵܢܸ̈ܐ. ܡܲܠܟܵܐ ܛܘܼܫܝܵܐ ܠܸܗ ܓܵܢܸܗ ܕܠܵܐ ܦܵܐܸܫ ܚܸܙܝܵܐ، ܐܝܼܢܵܐ ܗܲܪ ܒܗܿܝ ܥܸܕܵܢܵܐ ܗܿܘ ܡܵܨܸܐ ܗ݇ܘܵܐ ܕܚܵܙܸܐ ܠܟܠ ܥܵܒܼܘܿܪܵܐ ܡܼܢ ܗܿܝ ܐܘܼܪܚܵܐ. ܡܲܠܟܵܐ ܒܥܸܐ ܠܸܗ ܕܝܵܕܸܥ ܐܸܢ ܚܲܕ݇ ܡܼܢ ܐܵܢܝܼ ܥܵܒܼܖ̈ܲܝ‌ ـ ܐܘܼܪܚܵܐ ܒܸܬ ܡܲܪܚܸܩ ܠܐܝܼܣܵܪܵܐ ܡܼܢ ܐܘܼܪܚܵܐ.                                      

   ܚܲܕ݇ܟܡܵܐ ܡܼܢ ܬܲܓܵܖܸ̈ܐ ܥܲܬܝܼܖܸ̈ܐ ܕܡܲܠܟܵܐ ܥܒܼܸܪܗ݇ܘܿܢ ܡܼܢ ܬܵܡܵܐ ܘܲܪܚܸܫܠܗ݇ܘܿܢ ܚܕܵܪܲܝ ܐܝܼܣܵܪܵܐ. ܚܲܕ݇ܟܡܵܐ ܐ݇ܚܖܸ̈ܢܸܐ ܒܟܲܪܒܵܐ ܪܫܸܐ ܠܗ݇ܘܿܢ ܠܡܲܠܟܵܐ ܒܗܵܝ ܕܐܘܼܪܚܵܐ ܣܟܝܼܪܬܵܐ ܗܘܵܬ݇ ܒܗܿܘ ܐܝܼܣܵܪܵܐ. ܐܝܼܢܵܐ ܐܵܦܠܵܐ ܚܲܕ݇ ܡܸܢܲܝܗܝ ܒܨܸܐ ܠܸܗ ܝܲܢ ܬܘܼܚܡܸܢܸܗ ܕܡܲܪܚܸܩ ܠܐܝܼܣܵܪܵܐ ܡܼܢ ܐܘܼܪܚܵܐ. ܒܚܲܪܬܵܐ ܚܲܕ݇ ܐܲܟܵܪܵܐ، ܛܥܝܼܢܵܐ ܥܲܠ ܚܵܨܸܗ ܟܲܪܬܵܐ ܕܦܸܐܖܸ̈ܐ، ܐ݇ܬܸܐ ܠܸܗ ܕܥܵܒܼܸܪ ܡܼܢ ܬܵܡܵܐ ܘܚܙܸܐ ܠܸܗ ܠܐܝܼܣܵܪܵܐ ܕܒܼܝܼܩܵܐ ܠܐܘܼܪܚܵܐ. ܡܘܼܬܸܒܼܠܸܗ ܠܟܲܪܬܸܗ ܥܲܠ ܣܸܛܪܵܐ ܕܐܘܼܪܚܵܐ ܕܡܲܪܚܸܩ ܠܐܝܼܣܵܪܵܐ ܐܝܼܢܵܐ ܐܝܼܣܵܪܵܐ ܪܵܒܵܐ ܝܲܩܘܼܪܵܐ ܗ݇ܘܵܐ. ܐܲܟܵܪܵܐ ܠܵܐ ܫܦܸܠ ܠܸܗ ܘܒܵܬܲܪ ܢܘܼܣܵܝܸ̈ܐ ܘܥܲܡܠܸ̈ܐ ܝܲܬܝܼܖܸ̈ܐ، ܡܨܸܐ ܠܸܗ ܒܚܲܪܬܵܐ ܕܡܲܪܚܸܩ ܠܐܝܼܣܵܪܵܐ ܡܼܢ ܐܘܼܪܚܵܐ.                                                 

   ܐܝܼܡܲܢ ܕܐܲܟܵܪܵܐ ܛܥܸܢܠܸܗ ܠܟܲܪܬܸܗ ܕܐܵܙܸܠ ܗ݇ܘܵܐ، ܚܙܸܐ ܠܸܗ ܚܕܵܐ ܟܝܼܣܬܵܐ ܕܙܘܼܙܸ̈ܐ ܒܫܵܘܦܵܐ ܕܗܿܘ ܐܝܼܣܵܪܵܐ. ܐܲܟܵܪܵܐ ܫܩܸܠ ܠܸܗ ܠܟܝܼܣܬܵܐ ܘܲܦܬܝܼܚܵܐ ܠܸܗ، ܚܙܸܐ ܠܸܗ ܙܘܼܙܸ̈ܐ ܘܕܲܗܒܼܵܐ ܘܚܲܕ݇ ܦܸܬܓܼܵܡܵܐ ܡܼܢ ܡܲܠܟܵܐ ܒܸܐܡܵܪܵܐ "ܗܵܕܸܐ ܟܝܼܣܬܵܐ ܕܕܲܗܒܼܵܐ ܝܼܠܵܗܿ ܦܘܼܪܥܵܢܵܐ ܠܗܿܘ ܦܲܪܨܘܿܦܵܐ ܕܡܲܪܚܸܩ ܠܐܝܼܣܵܪܵܐ ܡܼܢ ܐܘܼܪܚܵܐ"   

ܦܘܫܩ ܡܠ̈ܐ

ܣܸܓܼܪܵܐ: ܣܸܟܼܪܵܐ: ܡܲܟܠܵܝܬܵܐ: مانع

ܥܵܒܼܖ̈ܲܝ ܐܘܼܪܚܵܐ: ܥܲܒܼܖ̈ܵܢܸܐ ܡܼܢ ܐܘܼܪܚܵܐ

ܚܕܵܪܲܝ: ܚܲܕܸܖ̈ܘܵܢܸܐ

ܪܫܸܐܠܗ݇ܘܿܢ: ܪܸܫܘܲܬ ܝܘܼܗܒܼܸܠܗ݇ܘܿܢ

ܣܟܝܼܪܬܵܐ: ܕܒܼܝܼܩܬܵܐ

ܒܨܸܐܠܸܗ: ܨܘܼܚܨܸܐܠܸܗ

ܟܲܪܬܵܐ: ܛܲܥܢܵܐ

ܦܸܐܖܸ̈ܐ: ܛܥܘܿܢܝܵܬܸ̈ܐ ܕܐܝܼܠܵܢܸ̈ܐ

ܣܸܛܪܵܐ: ܡܲܪܙܵܐ

ܠܵܐ ܫܦܸܠ ܠܸܗ: ܐܝܼܕܵܐ ܠܵܐ ܓܪܸܫܠܸܗ

ܢܘܼܣܵܝܸ̈ܐ: ܢܸܣܝܵܢܸ̈ܐ، ܓ̰ܘܼܖ̈ܵܒܸܐ

ܥܲܡܠܸ̈ܐ: ܙܲܗܡܲܬܸ̈ܐ

ܝܲܬܝܼܖܸ̈ܐ: ܪܵܒܵܐ، ܣܲܓܝܼܸ̈ܐܐ

ܦܸܬܓܼܵܡܵܐ: ܚܲܒܪܵܐ، پیغام

ܗܵܕܸܐ: ܐܵܗܵܐ (ܢܸܩܒܬܵܢܵܝܵܐ)

ܦܘܼܪܥܵܢܵܐ: پاداش