ܓܘܼܕܵܐ ܠܓܘܼܕܵܐ ܝܘܲܚ ܗ݇ܘܵܐ ܐܲܚܢܲܢ ܥܲܡ ܡܲܡ ܥܲܙܝܼܙ ܕܵܢܝܼ.ܗܿܘ ܡܲܡ ܥܲܙܝܼܙ ܚܲܕ݇ ܐ݇ܢܵܫܵܐ ܗ݇ܘܵܐ ܓܸܡܕܵܢܵܐ ܘܓܡܝܼܪܵܐ ܒܩܘܼܡܬܵܐ ܐܝܼܢܵܐ ܒܸܗ݇ܢܘܼܗܝ ܪܵܒܵܐ ܥܝܼܩܬܵܐ ܗ݇ܘܵܐ . ܐܸܢ ܚܲܕ݇ ܫܘܼܓܼܠܵܐ ܒܐܵܣܵܢܵܝܘܼܬܵܐ ܠܵܐ ܟܵܡܸܠ ܗ݇ܘܵܐ ܒܐܝܼܕܘܼܗܝ؛ ܟܸܐ ܚܵܠܨܵܐ ܗ݇ܘܵܐ ܐܸܠܸܗ ܘܟܸܐ ܟܵܪܸܒ ܗ݇ܘܵܐ ܪܵܒܵܐ.ܐܝܼܬܵܐ ܗܵܝܓܵܗ ܟܠܸܗ ܟܲܪܒܸܗ ܟܸܐ ܦܵܠܸܛ ܗ݇ܘܵܐ ܠܸܗ ܒܪܸܫܵܐ ܕܚܵܠܬܘܼ ܪܵܚܸܝܠ: ܒܲܟܼܬܸܗ.ܘܟܸܐ ܚܵܫܸܒܼ ܗ݇ܘܵܐ ܕܟܠܲܝܗܝ ܐܲܢܸܐ ܩܲܘܲܡܝܵܬܸ̈ܐ ܓܢܵܗܵܐ ܕܪܵܚܸܝܠ ܝܢܵܐ.
ܗܿܘ ܝܵܘܡܵܐ؛ ܚܲܕ݇ ܡܼܢ ܝܵܘܡܵܢܸ̈ܐ ܕܬܸܫܖ̈ܝܼܸܐ ܗ݇ܘܵܐ. ܐܵܢܝܼ ܕܕܲܚܠܵܐ(ܚܸܛܸ̈ܐ ܘܣܥܵܖܸ̈ܐ)
ܕܫܸܢ݇ܬܲܝܗܝ ܩܲܪܩܘܼܙܘܼܗܿ ܗ݇ܘܵܘ؛ ܠܘܼܒܠܲܝܗܝ ܗ݇ܘܵܐ ܚܸܛܲܝܗܝ ܥܲܠ ܢܲܗܪܵܐ. ܬܲܡܵܐ
ܚܘܼܠܸܠܲܝܗܝ ܗ݇ܘܵܘ ܘܟܸܐܦܲܝܗܝ ܕܘܟܼܝܲܝܗܝ ܘܦܪܝܼܫܲܝܗܝ ܗ݇ܘܵܘ. ܡܘܼܣܩܲܝܗܝ ܗ݇ܘܵܘ
ܥܲܠ ܐ݇ܓܵܖܸ̈ܐ ܘܫܬܝܼܚܲܝܗܝ ܗ݇ܘܵܘ ܕܒܵܖ̈ܙܝܼ ܩܵܕ݇ܡ ܫܸܡܫܵܐ. ܗܵܝܓܵܗ ܟܠܲܝܗܝ ܐܵܢܝܼ ܚܸܛܸ̈ܐ ܒܖ̈ܝܼܙܸܐ ܡܸܚܝܲܝܗܝ ܠܗ݇ܘܿܢ ܒܥܸܪܒܵܠܵܐ ܘܚܲܕ݇ ܚܲܕ݇ ܟܸܐܦܲܝܗܝ ܘܙܝܼܘܵܢܲܝܗܝ ܓܘܼܒܝܲܝܗܝ ܠܗ݇ܘܿܢ ܘܦܪܸܩܠܗ݇ܘܿܢ.
ܚܵܠܬܘܼ ܪܵܚܸܝܠ ܐ݇ܡܸܪܵܗܿ: ـ ܥܲܙܝܼܙ ܫܩܘܿܠܗ݇ܘܿܢ ܐܲܢܸܐ ܡܲܐܢܸ̈ܐ ܘܟ̰ܲܡܟ̰ܸ̈ܐ ܘܥܸܖ̈ܒܵܠܸܐ ܡܲܨܠܝܼ ܘܚܲܕ݇ ܚܲܕ݇ ܚܪܘܼܙܠܗ݇ܘܿܢ ܠܫܵܘܦܲܝܗܝ. ܚܙܝܼ؛ ܐܵܗ ܥܸܪܒܵܠܵܐ ܠܵܐ ܦܵܝܫܵܐ ܥܲܠ ܐܲܪܥܵܐ ܢܝܼܡܵܢܬܵܐ.. ܟܠܲܝܗܝ ܫܸܬܝܘܼܗܿ ܒܸܕ ܬܵܦܢܝܼ ܘܒܸܕ ܚܵܪܒܼܵܐ. ܐܲܢ݇ܬ ܩܵܘܡܘܼܟܼ ܪܵܡܵܐ ܝܠܸܗ ܗܲܪ ܬܠܝܼܠܵܗܿ ܥܲܠ ܕܗܿܘ ܡܝܼܚܵܐ( ܒܸܨܡܵܪܵܐ) ܕܥܲܠ ܓܘܼܕܵܐ ܕܟܘܼܚܬܵܐ.
ܡܲܡ ܥܲܙܝܼܙ ܟܸܐ ܡܲܫܡܸܥ ܗ݇ܘܵܐ ܠܵܗܿ ܚܵܠܬܘܼ ܪܵܚܸܝܠ ܪܵܒܵܐ ܓ̰ܲܠܕܸܐ. ܟܠܸܗ ܗܿܘ ܡܸܢܕܝܼ ܫܩܸܠܸܗ ܘܩܘܼܪܩܸܙܠܸܗ ܘܡܘܼܨܠܸܐ ܠܸܗ ܠܫܵܘܦܸܗ. ܫܩܸܠܸܗ ܠܥܸܪܒܵܠܵܐ ܘܥܒܼܸܪܸܗ ܠܟܘܼܚܬܵܐ ܕܬܵܠܸܐ ܠܵܗܿ ܠܫܵܦܘܼܗܿ ܥܲܠ ܡܝܼܚܵܐ ܕܥܲܠ ܓܘܼܕܵܐ. ܐܝܼܢܵܐ ܐܝܼܕܘܼܗܝ ܠܵܐ ܡܛܸܐ ܠܵܗܿ. ܓܪܝܼܫܵܐ ܠܸܗ ܬܲܚܬܵܐ ܕܠܲܚܡܵܐ ܬ݇ܚܘܿܬ ܐܲܩܠܸܗ ܘܝܣܸܩܠܸܗ ܥܲܠܘܼܗܿ ܘܬܸܠܝܵܐ ܠܸܗ.ܗܿܝܓܵܗ ܟܝܼܦܠܸܗ ܕܫܵܩܸܠܵܗܿ ܬܲܚܬܵܐ.
ܓ̰ܪܸܦܠܵܗܿ ܥܸܪܒܵܠܵܐ ܡܼܢ ܥܲܠ ܡܝܼܚܵܐ: ܡܼܢ ܕܗܿܝ ܪܵܡܘܼܬܵܐ ܕܓܘܼܕܵܐ: ܢܦܸܠܵܗܿ ܥܲܠ ܩܲܪܩܲܦܬܘܼܗܝ؛ ܐܵܦܸܢ ܕܪܸܫܸܗ ܚܲܕ݇ܟ̰ܵܐ ܙܸܐ ܕܘܼܪܒܸܢܵܐ ܗ݇ܘܵܐ؛ ܐܝܼܢܵܐ ܠܵܐ ܡܘܼܬ݇ܝܵܐ ܠܸܗ ܥܲܠ ܦܲܐܬܸܗ. ܡܸܢ݇ܕܪܸܫ݇
ܫܩܸܠܸܗ ܗܲܪ ܐܲܝܟܼ ܩܲܕ݇ܡܬܵܐ ܬܸܠܝܵܐ ܠܸܗ ܥܲܠ ܡܝܼܚܵܐ؛ ܡܼܢ ܕܗܿܝ ܕܡܝܼܚܵܐ ܠܸܐ
ܗ݇ܘܵܐ ܪܵܒܵܐ ܡܪܝܼܕܵܐ(ܩܸܘܝܵܐ)ܒܫܵܘܦܸܗ ܥܲܠ ܓܘܼܕܵܐ؛ ܩܵܐ ܓܵܗܵܐ ܕܬܪܸܝܢ ܙܸܐ
ܢܦܸܠܸܗ ܒܪܸܫܵܐ ܕܡܲܡ ܥܲܙܝܼܙ.ܗܵܝܓܵܗ ܐ݇ܚܸܪ݇ܢܵܐ ܥܝܼܩܠܵܗܿ ܒܸܗ݇ܢܸܗ؛ ܡܚܸܐ ܠܸܗ ܚܲܕ݇ ܪܲܦܨܵܐ ܠܩܲܣܢܲܩ(ܩܲܝܣܵܐ) ܕܥܸܪܒܵܠܵܐ.ܥܸܪܒܵܠܵܐ ܢܕܸܐܠܵܗܿ ܡܐܲܝܟܼ ܓܘܼܬܬܵܐ ܕܦܘܼܬܒܵܠ ܘܕܩܸܪܵܗܿ ܠܓܘܼܕܵܐ(ܒܗܿܝ ܕܩܲܣܢܲܩ ܘܓܲܪܕܵܐ ܕܙܩܘܼܪܵܐ ܕܓܵܘܸܗ ܓܖ̈ܝܼܫܸܐ ܝܢܵܐ؛ ܒܘܼܬ ܐܵܗܵܐ ܥܸܪܒܵܠܵܐ ܐܝܼܬ ܠܵܗܿ ܐܲܝܟܵܢܵܝܘܼܬܵܐܐܸܠܵܣܛܝܼܩܵܝܬܵܐ)؛ ܗܲܪ ܟ̰ܸܡ ܐܲܝܟܼ ܓܘܼܬܬܵܐ ܕܬܸܝܢܝܼܣ ܥܒܼܸܕܠܵܗܿ ܐܸܣܟܘܵܫ ܘܡܼܢ ܥܲܠ ܓܘܼܕܵܐ ܒܣܘܼܪܗܵܒܼܵܐ ܢܕܸܐܠܵܗܿ ܘܩܝܼܬܠܵܗܿ ܥܲܠ ܩܸܨܵܐ ܘܢܲܚܝܼܪܵܐ ܕܡܲܡ ܥܲܙܝܼܙ. ܗܵܝܓܵܗ ܡܸܣܟܸܢܵܐ ܗܲܪ ܟ̰ܸܡ ܣܘܼܢܣܸܦܠܸܗ؛ ܪܸܫܸܗ ܠܵܐ ܒܲܣܵܐ ܐܵܕܝܼܵܐ ܩܸܨܸܗ ܘܢܲܚܝܼܪܸܗ ܙܸܐ ܙܝܼܪܠܗ݇ܘܿܢ.
ܟܪܸܒܠܸܗ ܪܵܒܵܐ... ܘܚܸܙܝܵܐ ܠܸܗ ܥܸܪܒܵܠܵܐ ܕܘܼܝܠܵܗܿ ܦܘܼܡܵܐ ـ ܬ݇ܚܬܵܐ ܩܵܕ݇ܡ ܐܲܩܠܸܗ. ܡܘܼܪܡܵܐ ܠܸܗ ܐܲܩܠܸܗ ܘܡܚܸܐ ܠܸܗ ܥܲܠ ܓܲܖ̈ܕܘܼܗܿ.ܓܲܖ̈ܕܸܐ ܓܠܸܓ̰ܠܗ݇ܘܿܢ؛ ܐܲܩܠܸܗ ܙܸܐ ܩܘܼܪܸܣܠܵܗܿ ܒܸܝܠܵܐ ܒܸܝܠ ܫܸܬܝܸ̈ܐ ܫܝܼܖ̈ܵܛܸܐ ܕܓܲܪܕܵܐ ܕܥܸܪܒܵܠܵܐ. ܡܸܣܟܸܢܵܐ! ܗܲܪ ܓ̰ܲܪܘܼܒܸܐ ܝܠܸܗ ܕܓܵܪܸܫܠܵܗܿ ܐܲܩܠܸܗ ܕܦܵܠܸܛܠܵܗܿ ܡܼܢ ܓܲܪܕܵܐ؛ ܠܸܐ ܝܠܸܗ ܡܨܵܝܵܐ. ܟܡܵܐ ܕܚܲܝܠܸܗ ܕܪܸܐܠܸܗ ܩܵܠܸ̈ܐ ܒܚܵܠܬܘܼ ܪܵܚܸܝܠ: ـ ܪܵܚܸܐ... ܪܵܚܸܐ...ܬܵܐ ܡܛܝܼ ܥܲܠܝܼ ܦܲܪܸܩܠܝܼ ܡܼܢ ܐܝܼܕܵܐ ܕܐܵܗ ܥܸܪܒܵܠܵܐ ܕ...؛ ܐܵܚܸܐ ܕܘܼܝܠܵܗܿ ܒܸܩܛܵܠܝܼ. ܚܵܬ ܪܵܚܸܝܠ ܒܡܲܠܝܲܙܬܵܐ ܨܠܸܐ ܠܵܗܿ ܘܨܘܼܦܝܵܐ ܠܵܗܿ ܡܲܣܵܠܵܐ(ܡܲܬܠܵܐ).
ܪܵܒܵܐ ܝܢܵܐ ܐ݇ܢܵܫܸ̈ܐ ܕܐܲܝܟܼ ܐܵܗܵܐ ܥܸܪܒܵܠܵܐ ܕܡܲܡ ܥܲܙܝܼܙ ܕܟܸܐ ܫܵܝܝܼ ܒܐ݇ܢܵܫܸ̈ܐ ܘܗܸܟ̰ ܠܸܐ ܥܵܩܖ̈ܝܼ!
ܫܡܥܘܢ ܒܝܬ ܐܝܫܘ
No comments:
Post a Comment